(໒໑໑) ໔. ຘມ຺ມາຠິສມຍກຖາ

໘໙໗. ອຕ຺ຖິ ຄພ຺ຠເສຍ຺ຍາຍ ຘມ຺ມາຠິສມໂຍຕິ? ອາມນ຺ຕາ. ອຕ຺ຖິ ຄພ຺ຠເສຍ຺ຍາຍ ຘມ຺ມເທສນາ, ຘມ຺ມສ຺ສວນໍ, ຘມ຺ມສາກຈ຺ຉາ, ປຣິປຸຈ຺ຉາ, ສີລສມາທານໍ, ອິນ຺ທ຺ຣິເຍສຸ ຄຸຕ຺ຕທ຺ວາຣຕາ, ໂຠຊເນ ມຕ຺ຕຎ຺ຎຸຕາ, ປຸພ຺ພຣຕ຺ຕາປຣຣຕ຺ຕໍ ຊາຄຣິຍານຸໂຍໂຄຕິ? ນ ເຫວໍ ວຕ຺ຕພ຺ເພ…ເປ… ນຕ຺ຖິ ຄພ຺ຠເສຍ຺ຍາຍ ຘມ຺ມເທສນາ, ຘມ຺ມສ຺ສວນໍ…ເປ… ປຸພ຺ພຣຕ຺ຕາປຣຣຕ຺ຕໍ ຊາຄຣິຍານຸໂຍໂຄຕິ? ອາມນ຺ຕາ. ຫຎ຺ຈິ ນຕ຺ຖິ ຄພ຺ຠເສຍ຺ຍາຍ ຘມ຺ມເທສນາ, ຘມ຺ມສ຺ສວນໍ…ເປ… ປຸພ຺ພຣຕ຺ຕາປຣຣຕ຺ຕໍ ຊາຄຣິຍານຸໂຍໂຄ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ຄພ຺ຠເສຍ຺ຍາຍ ຘມ຺ມາຠິສມໂຍ’’ຕິ.

ອຕ຺ຖິ ຄພ຺ຠເສຍ຺ຍາຍ ຘມ຺ມາຠິສມໂຍຕິ? ອາມນ຺ຕາ. ນນຸ ທ຺ເວ ປຈ຺ຈຍາ ສມ຺ມາທິຏ຺ຐິຍາ ອຸປ຺ປາທາຍ – ປຣໂຕ ຈ ໂຆໂສ, ໂຍນິໂສ ຈ ມນສິກາໂຣຕິ? ອາມນ຺ຕາ. ຫຎ຺ຈິ ທ຺ເວ ປຈ຺ຈຍາ ສມ຺ມາທິຏ຺ຐິຍາ ອຸປ຺ປາທາຍ – ປຣໂຕ ຈ ໂຆໂສ, ໂຍນິໂສ ຈ ມນສິກາໂຣ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ຄພ຺ຠເສຍ຺ຍາຍ ຘມ຺ມາຠິສມໂຍ’’ຕິ.

ອຕ຺ຖິ ຄພ຺ຠເສຍ຺ຍາຍ ຘມ຺ມາຠິສມໂຍຕິ? ອາມນ຺ຕາ. ສຸຕ຺ຕສ຺ສ ປມຕ຺ຕສ຺ສ ມຸຏ຺ຐສ຺ສຕິສ຺ສ ອສມ຺ປຊານສ຺ສ ຘມ຺ມາຠິສມໂຍຕິ? ນ ເຫວໍ ວຕ຺ຕພ຺ເພ…ເປ….

ຘມ຺ມາຠິສມຍກຖາ ນິຏ຺ຐິຕາ.