໒໒. ພາວີສຕິມວຄ຺ໂຄ

(໒໑໐) ໓. ອາເນຎ຺ຊກຖາ

໘໙໖. ອຣຫາ ອາເນຎ຺ເຊ ຐິໂຕ ປຣິນິພ຺ພາຍຕີຕິ? ອາມນ຺ຕາ. ນນຸ ອຣຫາ ປກຕິຈິຕ຺ເຕ ຐິໂຕ ປຣິນິພ຺ພາຍຕີຕິ? ອາມນ຺ຕາ. ຫຎ຺ຈິ ອຣຫາ ປກຕິຈິຕ຺ເຕ ຐິໂຕ ປຣິນິພ຺ພາຍຕິ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫາ ອາເນຎ຺ເຊ ຐິໂຕ ປຣິນິພ຺ພາຍຕີ’’ຕິ.

ອຣຫາ ອາເນຎ຺ເຊ ຐິໂຕ ປຣິນິພ຺ພາຍຕີຕິ? ອາມນ຺ຕາ. ອຣຫາ ກິຣິຍມເຍ ຈິຕ຺ເຕ ຐິໂຕ ປຣິນິພ຺ພາຍຕີຕິ? ນ ເຫວໍ ວຕ຺ຕພ຺ເພ…ເປ… ນນຸ ອຣຫາ ວິປາກຈິຕ຺ເຕ ຐິໂຕ ປຣິນິພ຺ພາຍຕີຕິ? ອາມນ຺ຕາ. ຫຎ຺ຈິ ອຣຫາ ວິປາກຈິຕ຺ເຕ ຐິໂຕ ປຣິນິພ຺ພາຍຕິ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫາ ອາເນຎ຺ເຊ ຐິໂຕ ປຣິນິພ຺ພາຍຕີ’’ຕິ.

ອຣຫາ ອາເນຎ຺ເຊ ຐິໂຕ ປຣິນິພ຺ພາຍຕີຕິ? ອາມນ຺ຕາ. ອຣຫາ ກິຣິຍາພ຺ຍາກເຕ ຈິຕ຺ເຕ ຐິໂຕ ປຣິນິພ຺ພາຍຕີຕິ? ນ ເຫວໍ ວຕ຺ຕພ຺ເພ…ເປ… ນນຸ ອຣຫາ ວິປາກາພ຺ຍາກເຕ ຈິຕ຺ເຕ ຐິໂຕ ປຣິນິພ຺ພາຍຕີຕິ? ອາມນ຺ຕາ. ຫຎ຺ຈິ ອຣຫາ ວິປາກາພ຺ຍາກເຕ ຈິຕ຺ເຕ ຐິໂຕ ປຣິນິພ຺ພາຍຕິ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫາ ອາເນຎ຺ເຊ ຐິໂຕ ປຣິນິພ຺ພາຍຕີ’’ຕິ.

ອຣຫາ ອາເນຎ຺ເຊ ຐິໂຕ ປຣິນິພ຺ພາຍຕີຕິ? ອາມນ຺ຕາ. ນນຸ ຠຄວາ ຈຕຸຕ຺ຖຊ຺ຌານາ ວຸຏ຺ຐຫິຕ຺ວາ ສມນນ຺ຕຣາ ປຣິນິພ຺ພຸໂຕຕິ [ທີ. ນິ. ໒.໒໑໙]? ອາມນ຺ຕາ. ຫຎ຺ຈິ ຠຄວາ ຈຕຸຕ຺ຖຊ຺ຌານາ ວຸຏ຺ຐຫິຕ຺ວາ ສມນນ຺ຕຣາ ປຣິນິພ຺ພຸໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫາ ອາເນຎ຺ເຊ ຐິໂຕ ປຣິນິພ຺ພາຍຕີ’’ຕິ.

ອາເນຎ຺ຊກຖາ ນິຏ຺ຐິຕາ.