໒. ສໍສນ຺ທນພ຺ຣຫ຺ມຈຣິຍກຖາ

໒໗໓. ອນາຄາມີ ປຸຄ຺ຄໂລ ອິຘ ຠາວິເຕນ ມຄ຺ເຄນ ຕຕ຺ຖ ຜລໍ ສຈ຺ຉິກໂຣຕີຕິ? ອາມນ຺ຕາ. ໂສຕາປນ຺ໂນ ປຸຄ຺ຄໂລ ຕຕ຺ຖ ຠາວິເຕນ ມຄ຺ເຄນ ອິຘ ຜລໍ ສຈ຺ຉິກໂຣຕີຕິ? ນ ເຫວໍ ວຕ຺ຕພ຺ເພ.

ອນາຄາມີ ປຸຄ຺ຄໂລ ອິຘ ຠາວິເຕນ ມຄ຺ເຄນ ຕຕ຺ຖ ຜລໍ ສຈ຺ຉິກໂຣຕີຕິ? ອາມນ຺ຕາ. ສກທາຄາມີ ປຸຄ຺ຄໂລ ອິຘ ປຣິນິພ຺ພາຍິປຸຄ຺ຄໂລ [ອິຘປຣິນິພ຺ພາຍີ (?)] ຕຕ຺ຖ ຠາວິເຕນ ມຄ຺ເຄນ ອິຘ ຜລໍ ສຈ຺ຉິກໂຣຕີຕິ? ນ ເຫວໍ ວຕ຺ຕພ຺ເພ.

ໂສຕາປນ຺ໂນ ປຸຄ຺ຄໂລ ອິຘ ຠາວິເຕນ ມຄ຺ເຄນ ອິຘ ຜລໍ ສຈ຺ຉິກໂຣຕີຕິ? ອາມນ຺ຕາ. ອນາຄາມີ ປຸຄ຺ຄໂລ ຕຕ຺ຖ ຠາວິເຕນ ມຄ຺ເຄນ ຕຕ຺ຖ ຜລໍ ສຈ຺ຉິກໂຣຕີຕິ? ນ ເຫວໍ ວຕ຺ຕພ຺ເພ.

ສກທາຄາມີ ປຸຄ຺ຄໂລ ອິຘ ປຣິນິພ຺ພາຍິປຸຄ຺ຄໂລ ອິຘ ຠາວິເຕນ ມຄ຺ເຄນ ອິຘ ຜລໍ ສຈ຺ຉິກໂຣຕີຕິ? ອາມນ຺ຕາ. ອນາຄາມີ ປຸຄ຺ຄໂລ ຕຕ຺ຖ ຠາວິເຕນ ມຄ຺ເຄນ ຕຕ຺ຖ ຜລໍ ສຈ຺ຉິກໂຣຕີຕິ? ນ ເຫວໍ ວຕ຺ຕພ຺ເພ…ເປ….

ອິຘ ວິຫາຍ ນິຏ຺ຐສ຺ສ ປຸຄ຺ຄລສ຺ສ ມຄ຺ໂຄ ຈ ຠາວີຍຕິ, ນ ຈ ກິເລສາ ປຫີຍນ຺ຕີຕິ? ອາມນ຺ຕາ. ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ມຄ຺ໂຄ ຈ ຠາວີຍຕິ, ນ ຈ ກິເລສາ ປຫີຍນ຺ຕີຕິ? ນ ເຫວໍ ວຕ຺ຕພ຺ເພ…ເປ….

ອິຘ ວິຫາຍ ນິຏ຺ຐສ຺ສ ປຸຄ຺ຄລສ຺ສ ມຄ຺ໂຄ ຈ ຠາວີຍຕິ, ນ ຈ ກິເລສາ ປຫີຍນ຺ຕີຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ…ເປ… ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ມຄ຺ໂຄ ຈ ຠາວີຍຕິ, ນ ຈ ກິເລສາ ປຫີຍນ຺ຕີຕິ? ນ ເຫວໍ ວຕ຺ຕພ຺ເພ…ເປ….

ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອປຸພ຺ພໍ ອຈຣິມໍ ມຄ຺ໂຄ ຈ ຠາວີຍຕິ, ກິເລສາ ຈ ປຫີຍນ຺ຕີຕິ? ອາມນ຺ຕາ. ອິຘ ວິຫາຍ ນິຏ຺ຐສ຺ສ ປຸຄ຺ຄລສ຺ສ ອປຸພ຺ພໍ ອຈຣິມໍ ມຄ຺ໂຄ ຈ ຠາວີຍຕິ, ກິເລສາ ຈ ປຫີຍນ຺ຕີຕິ? ນ ເຫວໍ ວຕ຺ຕພ຺ເພ.

ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ…ເປ… ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອປຸພ຺ພໍ ອຈຣິມໍ ມຄ຺ໂຄ ຈ ຠາວີຍຕິ, ກິເລສາ ຈ ປຫີຍນ຺ຕີຕິ? ອາມນ຺ຕາ. ອິຘ ວິຫາຍ ນິຏ຺ຐສ຺ສ ປຸຄ຺ຄລສ຺ສ ອປຸພ຺ພໍ ອຈຣິມໍ ມຄ຺ໂຄ ຈ ຠາວີຍຕິ, ກິເລສາ ຈ ປຫີຍນ຺ຕີຕິ? ນ ເຫວໍ ວຕ຺ຕພ຺ເພ.

ອນາຄາມີ ປຸຄ຺ຄໂລ ກຕກຣຓີໂຍ ຠາວິຕຠາວໂນ ຕຕ຺ຖ ອຸປປຊ຺ຊຕີຕິ? ອາມນ຺ຕາ. ອຣຫາ ອຸປປຊ຺ຊຕີຕິ? ນ ເຫວໍ ວຕ຺ຕພ຺ເພ.

ອຣຫາ ອຸປປຊ຺ຊຕີຕິ? ອາມນ຺ຕາ. ອຕ຺ຖິ ອຣຫໂຕ ປຸນພ຺ຠໂວຕິ? ນ ເຫວໍ ວຕ຺ຕພ຺ເພ.

ອຕ຺ຖິ ອຣຫໂຕ ປຸນພ຺ຠໂວຕິ? ອາມນ຺ຕາ. ອຣຫາ ຠເວນ ຠວໍ ຄຈ຺ຉຕິ, ຄຕິຍາ ຄຕິໍ ຄຈ຺ຉຕິ, ສໍສາເຣນ ສໍສາຣໍ ຄຈ຺ຉຕິ, ອຸປປຕ຺ຕິຍາ ອຸປປຕ຺ຕິໍ ຄຈ຺ຉຕີຕິ? ນ ເຫວໍ ວຕ຺ຕພ຺ເພ.

ອນາຄາມີ ປຸຄ຺ຄໂລ ກຕກຣຓີໂຍ ຠາວິຕຠາວໂນ ອໂນຫຏຠາໂຣ ຕຕ຺ຖ ອຸປປຊ຺ຊຕີຕິ? ອາມນ຺ຕາ. ຠາໂຣຫຣຓາຍ ປຸນ ມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ.

ອນາຄາມີ ປຸຄ຺ຄໂລ ກຕກຣຓີໂຍ ຠາວິຕຠາວໂນ ອປຣິຎ຺ຎາຕທຸກ຺ໂຂ ອປ຺ປຫີນກິເລໂສ ອສຈ຺ຉິກຕນິໂຣໂຘ ອປ຺ປຏິວິທ຺ຘາກຸປ຺ໂປ ຕຕ຺ຖ ອຸປປຊ຺ຊຕີຕິ? ອາມນ຺ຕາ. ອກຸປ຺ປປຏິເວຘາຍ ປຸນ ມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ.

ອນາຄາມີ ປຸຄ຺ຄໂລ ກຕກຣຓີໂຍ ຠາວິຕຠາວໂນ ອໂນຫຏຠາໂຣ ຕຕ຺ຖ ອຸປປຊ຺ຊຕິ, ນ ຈ ຠາໂຣຫຣຓາຍ ປຸນ ມຄ຺ຄໍ ຠາເວຕີຕິ? ອາມນ຺ຕາ. ອໂນຫຏຠາໂຣ ຈ ຕຕ຺ຖ ປຣິນິພ຺ພາຍຕີຕິ? ນ ເຫວໍ ວຕ຺ຕພ຺ເພ.

ອນາຄາມີ ປຸຄ຺ຄໂລ ກຕກຣຓີໂຍ ຠາວິຕຠາວໂນ ອປຣິຎ຺ຎາຕທຸກ຺ໂຂ ອປ຺ປຫີນກິເລໂສ ອສຈ຺ຉິກຕນິໂຣໂຘ ອປ຺ປຏິວິທ຺ຘາກຸປ຺ໂປ ຕຕ຺ຖ ອຸປປຊ຺ຊຕິ, ນ ຈ ອກຸປ຺ປປຏິເວຘາຍ ປຸນ ມຄ຺ຄໍ ຠາເວຕີຕິ? ອາມນ຺ຕາ. ອປ຺ປຏິວິທ຺ຘາກຸປ຺ໂປ ຈ ຕຕ຺ຖ ປຣິນິພ຺ພາຍຕີຕິ? ນ ເຫວໍ ວຕ຺ຕພ຺ເພ. ຍຖາ ມິໂຄ ສລ຺ເລນ ວິທ຺ໂຘ ທູຣມ຺ປິ ຄນ຺ຕ຺ວາ ກາລໍ ກໂຣຕິ, ເອວເມວໍ ອນາຄາມີ ປຸຄ຺ຄໂລ ອິຘ ຠາວິເຕນ ມຄ຺ເຄນ ຕຕ຺ຖ ຜລໍ ສຈ຺ຉິກໂຣຕີຕິ.

ຍຖາ ມິໂຄ ສລ຺ເລນ ວິທ຺ໂຘ ທູຣມ຺ປິ ຄນ຺ຕ຺ວາ ສສລ຺ໂລວ ກາລໍ ກໂຣຕິ, ເອວເມວໍ ອນາຄາມີ ປຸຄ຺ຄໂລ ອິຘ ຠາວິເຕນ ມຄ຺ເຄນ ຕຕ຺ຖ ສສລ຺ໂລວ ປຣິນິພ຺ພາຍຕີຕິ? ນ ເຫວໍ ວຕ຺ຕພ຺ເພ…ເປ….

ພ຺ຣຫ຺ມຈຣິຍກຖາ ນິຏ຺ຐິຕາ.