(໑໔໕) ໑. ປຈ຺ຈຍຕາກຖາ

໗໑໑. ປຈ຺ຈຍຕາ ວວຕ຺ຖິຕາຕິ? ອາມນ຺ຕາ. ນນຸ ວີມໍສາ ເຫຕຸ, ໂສ ຈ ອຘິປຕີຕິ? ອາມນ຺ຕາ. ຫຎ຺ຈິ ວີມໍສາ ເຫຕຸ, ໂສ ຈ ອຘິປຕິ, ເຕນ ວຕ ເຣ ວຕ຺ຕພ຺ເພ – ‘‘ເຫຕຸປຈ຺ຈເຍນ ປຈ຺ຈໂຍ, ອຘິປຕິປຈ຺ຈເຍນ ປຈ຺ຈໂຍ’’ຕິ.

ນນຸ ຉນ຺ທາຘິປຕິ ສຫຊາຕານໍ ຘມ຺ມານໍ ອຘິປຕີຕິ? ອາມນ຺ຕາ. ຫຎ຺ຈິ ຉນ຺ທາຘິປຕິ ສຫຊາຕານໍ ຘມ຺ມານໍ ອຘິປຕິ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ສຫຊາຕປຈ຺ຈເຍນ ປຈ຺ຈໂຍ’’ຕິ.

໗໑໒. ນນຸ ວີຣິຍາຘິປຕິ ສຫຊາຕານໍ ຘມ຺ມານໍ ອຘິປຕີຕິ? ອາມນ຺ຕາ. ຫຎ຺ຈິ ວີຣິຍາຘິປຕິ ສຫຊາຕານໍ ຘມ຺ມານໍ ອຘິປຕິ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ສຫຊາຕປຈ຺ຈເຍນ ປຈ຺ຈໂຍ’’ຕິ.

ນນຸ ວີຣິຍາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ອິນ຺ທ຺ຣິຍນ຺ຕິ? ອາມນ຺ຕາ. ຫຎ຺ຈິ ວີຣິຍາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ອິນ຺ທ຺ຣິຍໍ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ອິນ຺ທ຺ຣິຍປຈ຺ຈເຍນ ປຈ຺ຈໂຍ’’ຕິ.

ນນຸ ວີຣິຍາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ມຄ຺ຄງ຺ຄນ຺ຕິ? ອາມນ຺ຕາ. ຫຎ຺ຈິ ວີຣິຍາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ມຄ຺ຄງ຺ຄໍ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ມຄ຺ຄປຈ຺ຈເຍນ ປຈ຺ຈໂຍ’’ຕິ.

໗໑໓. ນນຸ ຈິຕ຺ຕາຘິປຕິ ສຫຊາຕານໍ ຘມ຺ມານໍ ອຘິປຕີຕິ? ອາມນ຺ຕາ. ຫຎ຺ຈິ ຈິຕ຺ຕາຘິປຕິ ສຫຊາຕານໍ ຘມ຺ມານໍ ອຘິປຕິ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ສຫຊາຕປຈ຺ຈເຍນ ປຈ຺ຈໂຍ’’ຕິ.

ນນຸ ຈິຕ຺ຕາຘິປຕິ ສຫຊາຕານໍ ຘມ຺ມານໍ ອຘິປຕິ, ໂສ ຈ ອາຫາໂຣຕິ? ອາມນ຺ຕາ. ຫຎ຺ຈິ ຈິຕ຺ຕາຘິປຕິ ສຫຊາຕານໍ ຘມ຺ມານໍ ອຘິປຕິ, ໂສ ຈ ອາຫາໂຣ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ອາຫາຣປຈ຺ຈເຍນ ປຈ຺ຈໂຍ’’ຕິ.

ນນຸ ຈິຕ຺ຕາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ອິນ຺ທ຺ຣິຍນ຺ຕິ? ອາມນ຺ຕາ. ຫຎ຺ຈິ ຈິຕ຺ຕາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ອິນ຺ທ຺ຣິຍໍ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ອິນ຺ທ຺ຣິຍປຈ຺ຈເຍນ ປຈ຺ຈໂຍ’’ຕິ.

໗໑໔. ນນຸ ວີມໍສາຘິປຕິ ສຫຊາຕານໍ ຘມ຺ມານໍ ອຘິປຕີຕິ? ອາມນ຺ຕາ. ຫຎ຺ຈິ ວີມໍສາຘິປຕິ ສຫຊາຕານໍ ຘມ຺ມານໍ ອຘິປຕິ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ສຫຊາຕປຈ຺ຈເຍນ ປຈ຺ຈໂຍ’’ຕິ.

ນນຸ ວີມໍສາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ອິນ຺ທ຺ຣິຍນ຺ຕິ? ອາມນ຺ຕາ. ຫຎ຺ຈິ ວີມໍສາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ອິນ຺ທ຺ຣິຍໍ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ອິນ຺ທ຺ຣິຍປຈ຺ຈເຍນ ປຈ຺ຈໂຍ’’ຕິ.

ນນຸ ວີມໍສາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ມຄ຺ຄງ຺ຄນ຺ຕິ? ອາມນ຺ຕາ. ຫຎ຺ຈິ ວີມໍສາຘິປຕິ ສຫຊາຕານໍ ຘມ຺ມານໍ ອຘິປຕິ, ຕຎ຺ຈ ມຄ຺ຄງ຺ຄໍ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ມຄ຺ຄປຈ຺ຈເຍນ ປຈ຺ຈໂຍ’’ຕິ.

໗໑໕. ນນຸ ອຣິຍໍ ຘມ຺ມໍ ຄຣຸໍ ກຕ຺ວາ ອຸປ຺ປຊ຺ຊຕິ ປຈ຺ຈເວກ຺ຂຓາ, ຕຎ຺ຈາຣມ຺ມຓນ຺ຕິ? ອາມນ຺ຕາ. ຫຎ຺ຈິ ອຣິຍໍ ຘມ຺ມໍ ຄຣຸໍ ກຕ຺ວາ ອຸປ຺ປຊ຺ຊຕິ ປຈ຺ຈເວກ຺ຂຓາ, ຕຎ຺ຈາຣມ຺ມຓໍ, ເຕນ ວຕ ເຣ ວຕ຺ຕພ຺ເພ – ‘‘ອຘິປຕິປຈ຺ຈເຍນ ປຈ຺ຈໂຍ, ອາຣມ຺ມຓປຈ຺ຈເຍນ ປຈ຺ຈໂຍ’’ຕິ.

໗໑໖. ນນຸ ປຸຣິມາ ປຸຣິມາ ກຸສລາ ຘມ຺ມາ ປຈ຺ຉິມານໍ ປຈ຺ຉິມານໍ ກຸສລານໍ ຘມ຺ມານໍ ອນນ຺ຕຣປຈ຺ຈເຍນ ປຈ຺ຈໂຍ, ສາ ຈ ອາເສວນາຕິ? ອາມນ຺ຕາ. ຫຎ຺ຈິ ປຸຣິມາ ປຸຣິມາ ກຸສລາ ຘມ຺ມາ ປຈ຺ຉິມານໍ ປຈ຺ຉິມານໍ ກຸສລານໍ ຘມ຺ມານໍ ອນນ຺ຕຣປຈ຺ຈເຍນ ປຈ຺ຈໂຍ, ສາ ຈ ອາເສວນາ, ເຕນ ວຕ ເຣ ວຕ຺ຕພ຺ເພ – ‘‘ອນນ຺ຕຣປຈ຺ຈເຍນ ປຈ຺ຈໂຍ, ອາເສວນປຈ຺ຈເຍນ ປຈ຺ຈໂຍ’’ຕິ.

ນນຸ ປຸຣິມາ ປຸຣິມາ ອກຸສລາ ຘມ຺ມາ ປຈ຺ຉິມານໍ ປຈ຺ຉິມານໍ ອກຸສລານໍ ຘມ຺ມານໍ ອນນ຺ຕຣປຈ຺ຈເຍນ ປຈ຺ຈໂຍ, ສາ ຈ ອາເສວນາຕິ? ອາມນ຺ຕາ. ຫຎ຺ຈິ ປຸຣິມາ ປຸຣິມາ ອກຸສລາ ຘມ຺ມາ ປຈ຺ຉິມານໍ ປຈ຺ຉິມານໍ ອກຸສລານໍ ຘມ຺ມານໍ ອນນ຺ຕຣປຈ຺ຈເຍນ ປຈ຺ຈໂຍ, ສາ ຈ ອາເສວນາ, ເຕນ ວຕ ເຣ ວຕ຺ຕພ຺ເພ – ‘‘ອນນ຺ຕຣປຈ຺ຈເຍນ ປຈ຺ຈໂຍ, ອາເສວນປຈ຺ຈເຍນ ປຈ຺ຈໂຍ’’ຕິ.

ນນຸ ປຸຣິມາ ປຸຣິມາ ກິຣິຍາພ຺ຍາກຕາ ຘມ຺ມາ ປຈ຺ຉິມານໍ ປຈ຺ຉິມານໍ ກິຣິຍາພ຺ຍາກຕານໍ ຘມ຺ມານໍ ອນນ຺ຕຣປຈ຺ຈເຍນ ປຈ຺ຈໂຍ, ສາ ຈ ອາເສວນາຕິ? ອາມນ຺ຕາ. ຫຎ຺ຈິ ປຸຣິມາ ປຸຣິມາ ກິຣິຍາພ຺ຍາກຕາ ຘມ຺ມາ ປຈ຺ຉິມານໍ ປຈ຺ຉິມານໍ ກິຣິຍາພ຺ຍາກຕານໍ ຘມ຺ມານໍ ອນນ຺ຕຣປຈ຺ຈເຍນ ປຈ຺ຈໂຍ, ສາ ຈ ອາເສວນາ, ເຕນ ວຕ ເຣ ວຕ຺ຕພ຺ເພ – ‘‘ອນນ຺ຕຣປຈ຺ຈເຍນ ປຈ຺ຈໂຍ, ອາເສວນປຈ຺ຈເຍນ ປຈ຺ຈໂຍ’’ຕິ.

໗໑໗. ນ ວຕ຺ຕພ຺ພໍ – ‘‘ປຈ຺ຈຍຕາ ວວຕ຺ຖິຕາ’’ຕິ? ອາມນ຺ຕາ. ເຫຕຸປຈ຺ຈເຍນ ປຈ຺ຈໂຍ ໂຫຕິ, ອາຣມ຺ມຓປຈ຺ຈເຍນ ປຈ຺ຈໂຍ ໂຫຕິ, ອນນ຺ຕຣປຈ຺ຈເຍນ ປຈ຺ຈໂຍ ໂຫຕິ, ສມນນ຺ຕຣປຈ຺ຈເຍນ ປຈ຺ຈໂຍ ໂຫຕີຕິ? ນ ເຫວໍ ວຕ຺ຕພ຺ເພ. ເຕນ ຫິ ປຈ຺ຈຍຕາ ວວຕ຺ຖິຕາຕິ.

ປຈ຺ຈຍຕາກຖາ ນິຏ຺ຐິຕາ.