(໑໔໓) ໘. ອພ຺ຍາກຕກຖາ

໗໐໖. ທິຏ຺ຐິຄຕໍ ອພ຺ຍາກຕນ຺ຕິ? ອາມນ຺ຕາ. ວິປາກາພ຺ຍາກຕໍ ກິຣິຍາພ຺ຍາກຕໍ ຣູປໍ ນິພ຺ພານໍ ຈກ຺ຂາຍຕນໍ…ເປ… ໂຜຏ຺ຐພ຺ພາຍຕນນ຺ຕິ? ນ ເຫວໍ ວຕ຺ຕພ຺ເພ…ເປ… ທິຏ຺ຐິຄຕໍ ອພ຺ຍາກຕນ຺ຕິ? ອາມນ຺ຕາ. ທິຏ຺ຐິຄຕສມ຺ປຍຸຕ຺ໂຕ ຜສ຺ໂສ ອພ຺ຍາກໂຕຕິ? ນ ເຫວໍ ວຕ຺ຕພ຺ເພ…ເປ… ທິຏ຺ຐິຄຕໍ ອພ຺ຍາກຕນ຺ຕິ? ອາມນ຺ຕາ. ທິຏ຺ຐິຄຕສມ຺ປຍຸຕ຺ຕາ ເວທນາ…ເປ… ສຎ຺ຎາ…ເປ… ເຈຕນາ…ເປ… ຈິຕ຺ຕໍ ອພ຺ຍາກຕນ຺ຕິ? ນ ເຫວໍ ວຕ຺ຕພ຺ເພ…ເປ….

ທິຏ຺ຐິຄຕສມ຺ປຍຸຕ຺ໂຕ ຜສ຺ໂສ ອກຸສໂລຕິ? ອາມນ຺ຕາ. ທິຏ຺ຐິຄຕໍ ອກຸສລນ຺ຕິ? ນ ເຫວໍ ວຕ຺ຕພ຺ເພ…ເປ… ທິຏ຺ຐິຄຕສມ຺ປຍຸຕ຺ຕາ ເວທນາ ສຎ຺ຎາ ເຈຕນາ ຈິຕ຺ຕໍ ອກຸສລນ຺ຕິ? ອາມນ຺ຕາ. ທິຏ຺ຐິຄຕໍ ອກຸສລນ຺ຕິ? ນ ເຫວໍ ວຕ຺ຕພ຺ເພ…ເປ….

໗໐໗. ທິຏ຺ຐິຄຕໍ ອພ຺ຍາກຕນ຺ຕິ? ອາມນ຺ຕາ. ອຜລໍ ອວິປາກນ຺ຕິ? ນ ເຫວໍ ວຕ຺ຕພ຺ເພ…ເປ… ນນຸ ສຜລໍ ສວິປາກນ຺ຕິ? ອາມນ຺ຕາ. ຫຎ຺ຈິ ສຜລໍ ສວິປາກໍ, ໂນ ຈ ວຕ ເຣ ວຕ຺ຕພ຺ເພ – ‘‘ທິຏ຺ຐິຄຕໍ ອພ຺ຍາກຕ’’ນ຺ຕິ.

ທິຏ຺ຐິຄຕໍ ອພ຺ຍາກຕນ຺ຕິ? ອາມນ຺ຕາ. ນນຸ ມິຈ຺ຉາທິຏ຺ຐິປຣມານິ ວຊ຺ຊານິ [ອງ຺ຄຸຕ຺ຕຣນິກາເຍ] ວຸຕ຺ຕານິ ຠຄວຕາຕິ? ອາມນ຺ຕາ. ຫຎ຺ຈິ ມິຈ຺ຉາທິຏ຺ຐິປຣມານິ ວຊ຺ຊານິ ວຸຕ຺ຕານິ ຠຄວຕາ, ໂນ ຈ ວຕ ເຣ ວຕ຺ຕພ຺ເພ – ‘‘ທິຏ຺ຐິຄຕໍ ອພ຺ຍາກຕ’’ນ຺ຕິ.

ທິຏ຺ຐິຄຕໍ ອພ຺ຍາກຕນ຺ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ມິຈ຺ຉາທິຏ຺ຐິ ໂຂ, ວຈ຺ຉ, ອກຸສລາ [ອກຸສລໍ (ມ. ນິ. ໒.໑໙໔)], ສມ຺ມາທິຏ຺ຐິ ກຸສລາ’’ [ກຸສລໍ (ມ. ນິ. ໒.໑໐໔)] ຕິ [ມ. ນິ. ໒.໑໙໔]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ທິຏ຺ຐິຄຕໍ ອພ຺ຍາກຕ’’ນ຺ຕິ.

ທິຏ຺ຐິຄຕໍ ອພ຺ຍາກຕນ຺ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ມິຈ຺ຉາທິຏ຺ຐິສ຺ສ ໂຂ ອຫໍ, ປຸຓ຺ຓ, ທ຺ວິນ຺ນໍ ຄຕີນໍ ອຎ຺ຎຕຣໍ ຄຕິໍ ວທາມິ – ນິຣຍໍ ວາ ຕິຣຈ຺ຉານໂຍນິໍ ວາ’’ຕິ [ມ. ນິ. ໒.໗໙]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ທິຏ຺ຐິຄຕໍ ອພ຺ຍາກຕ’’ນ຺ຕິ.

໗໐໘. ນ ວຕ຺ຕພ຺ພໍ – ‘‘ທິຏ຺ຐິຄຕໍ ອພ຺ຍາກຕ’’ນ຺ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘‘ສສ຺ສໂຕ ໂລໂກ’ຕິ ໂຂ, ວຈ຺ຉ, ອພ຺ຍາກຕເມຕໍ, ‘ອສສ຺ສໂຕ ໂລໂກ’ຕິ ໂຂ, ວຈ຺ຉ, ອພ຺ຍາກຕເມຕໍ, ‘ອນ຺ຕວາ ໂລໂກ’ຕິ ໂຂ, ວຈ຺ຉ, ອພ຺ຍາກຕເມຕໍ, ‘ອນນ຺ຕວາ ໂລໂກ’ຕິ ໂຂ, ວຈ຺ຉ…ເປ… ‘ຕໍ ຊີວໍ ຕໍ ສຣີຣ’ນ຺ຕິ ໂຂ, ວຈ຺ຉ…ເປ… ‘ອຎ຺ຎໍ ຊີວໍ ອຎ຺ຎໍ ສຣີຣ’ນ຺ຕິ ໂຂ, ວຈ຺ຉ…ເປ… ‘ໂຫຕິ ຕຖາຄໂຕ ປຣໍ ມຣຓາ’ຕິ ໂຂ, ວຈ຺ຉ…ເປ… ‘ນ ໂຫຕິ ຕຖາຄໂຕ ປຣໍ ມຣຓາ’ຕິ ໂຂ, ວຈ຺ຉ…ເປ… ‘ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາ’ຕິ ໂຂ, ວຈ຺ຉ…ເປ… ‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ’ຕິ ໂຂ, ວຈ຺ຉ, ອພ຺ຍາກຕເມຕ’’ນ຺ຕິ [ສໍ. ນິ. ໔.໔໑໖, ໂຖກໍ ປນ ວິສທິສໍ]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ທິຏ຺ຐິຄຕໍ ອພ຺ຍາກຕນ຺ຕິ.

ທິຏ຺ຐິຄຕໍ ອພ຺ຍາກຕນ຺ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ມິຈ຺ຉາທິຏ຺ຐິກສ຺ສ, ຠິກ຺ຂເວ, ປຸຣິສປຸຄ຺ຄລສ຺ສ ຍຎ຺ເຈວ ກາຍກມ຺ມໍ ຍຖາທິຏ຺ຐິສມຕ຺ຕໍ ສມາທິນ຺ນໍ, ຍຎ຺ຈ ວຈີກມ຺ມໍ…ເປ… ຍຎ຺ຈ ມໂນກມ຺ມໍ, ຍາ ຈ ເຈຕນາ, ຍາ ຈ ປຕ຺ຖນາ, ໂຍ ຈ ປຓິຘິ, ເຍ ຈ ສງ຺ຂາຣາ, ສພ຺ເພ ເຕ ຘມ຺ມາ ອນິຏ຺ຐາຍ ອກນ຺ຕາຍ ອມນາປາຍ ອຫິຕາຍ ທຸກ຺ຂາຍ ສໍວຕ຺ຕນ຺ຕີ’’ຕິ [ອ. ນິ. ໑.໓໐໖]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ທິຏ຺ຐິຄຕໍ ອພ຺ຍາກຕ’’ນ຺ຕິ.

ອພ຺ຍາກຕກຖາ ນິຏ຺ຐິຕາ.