໑໓. ເຕຣສມວຄ຺ໂຄ

(໑໒໖) ໑. ກປ຺ປຏ຺ຐກຖາ

໖໕໔. ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາຕິ? ອາມນ຺ຕາ. ກປ຺ໂປ ຈ ສຓ຺ຐາຕິ ພຸທ຺ໂຘ ຈ ໂລເກ ອຸປ຺ປຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ…. ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາຕິ? ອາມນ຺ຕາ. ກປ຺ໂປ ຈ ສຓ຺ຐາຕິ ສງ຺ໂຆ ຈ ຠິຊ຺ຊຕີຕິ? ນ ເຫວໍ ວຕ຺ຕພ຺ເພ…ເປ… ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາຕິ? ອາມນ຺ຕາ. ກປ຺ໂປ ຈ ສຓ຺ຐາຕິ ກປ຺ປຏ຺ໂຐ ຈ ກປ຺ປຏ຺ຐິຍໍ ກມ຺ມໍ ກໂຣຕີຕິ? ນ ເຫວໍ ວຕ຺ຕພ຺ເພ…ເປ… ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາຕິ? ອາມນ຺ຕາ. ກປ຺ໂປ ຈ ສຓ຺ຐາຕິ ກປ຺ປຏ຺ໂຐ ຈ ປຸຄ຺ຄໂລ ກາລໍ ກໂຣຕີຕິ? ນ ເຫວໍ ວຕ຺ຕພ຺ເພ…ເປ….

໖໕໕. ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາຕິ? ອາມນ຺ຕາ. ອຕີຕໍ ກປ຺ປໍ ຕິຏ຺ເຐຍ຺ຍ, ອນາຄຕໍ ກປ຺ປໍ ຕິຏ຺ເຐຍ຺ຍາຕິ? ນ ເຫວໍ ວຕ຺ຕພ຺ເພ…ເປ… ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາຕິ? ອາມນ຺ຕາ. ທ຺ເວ ກປ຺ເປ ຕິຏ຺ເຐຍ຺ຍ… ຕໂຍ ກປ຺ເປ ຕິຏ຺ເຐຍ຺ຍ… ຈຕ຺ຕາໂຣ ກປ຺ເປ ຕິຏ຺ເຐຍ຺ຍາຕິ? ນ ເຫວໍ ວຕ຺ຕພ຺ເພ…ເປ….

໖໕໖. ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາຕິ? ອາມນ຺ຕາ. ກປ຺ປຏ຺ໂຐ ກປ຺ເປ ຑຍ຺ຫນ຺ເຕ ກຕ຺ຖ ຄຈ຺ຉຕີຕິ? ອຎ຺ຎໍ ໂລກຘາຕຸໍ ຄຈ຺ຉຕີຕິ. ມໂຕ ຄຈ຺ຉຕິ, ເວຫາສໍ ຄຈ຺ຉຕີຕິ? ມໂຕ ຄຈ຺ຉຕີຕິ. ກປ຺ປຏ຺ຐິຍໍ ກມ຺ມໍ ອປຣາປຣິຍເວປກ຺ກນ຺ຕິ? ນ ເຫວໍ ວຕ຺ຕພ຺ເພ…ເປ… [ເວຫາສໍ ຄຈ຺ຉຕີຕິ (?) ອຍໍ ຫິ ປຣວາທິສ຺ສ ປຏິຎ຺ຎາເຍວ, ກຖາ. ໖໒໑-໖໒໓ ນວມປນ຺ຕິຍໍ ວິຍ] ເວຫາສໍ ຄຈ຺ຉຕີຕິ? ອາມນ຺ຕາ [ເວຫາສໍ ຄຈ຺ຉຕີຕິ (?) ອຍໍ ຫິ ປຣວາທິສ຺ສ ປຏິຎ຺ຎາເຍວ, ກຖາ. ໖໒໑-໖໒໓ ນວມປນ຺ຕິຍໍ ວິຍ]. ກປ຺ປຏ຺ໂຐ ອິທ຺ຘິມາຕິ? ນ ເຫວໍ ວຕ຺ຕພ຺ເພ…ເປ… ກປ຺ປຏ຺ໂຐ ອິທ຺ຘິມາຕິ? ອາມນ຺ຕາ. ກປ຺ປຏ຺ເຐນ ຉນ຺ທິທ຺ຘິປາໂທ ຠາວິໂຕ ວີຣິຍິທ຺ຘິປາໂທ ຠາວິໂຕ ຈິຕ຺ຕິທ຺ຘິປາໂທ ຠາວິໂຕ ວີມໍສິທ຺ຘິປາໂທ ຠາວິໂຕຕິ? ນ ເຫວໍ ວຕ຺ຕພ຺ເພ…ເປ….

໖໕໗. ນ ວຕ຺ຕພ຺ພໍ – ‘‘ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ອາປາຍິໂກ ເນຣຍິໂກ, ກປ຺ປຏ຺ໂຐ ສງ຺ຆເຠທໂກ;

ວຄ຺ຄຣໂຕ ອຘມ຺ມຏ຺ໂຐ, ໂຍຄກ຺ເຂມາ ປຘໍສຕິ;

ສງ຺ຆໍ ສມຄ຺ຄໍ ເຠຕ຺ວານ [ຠິນ຺ທິຕ຺ວາ (ສີ. ກ.)], ກປ຺ປໍ ນິຣຍມ຺ຫິ ປຈ຺ຈຕີ’’ຕິ [ຈູຬວ. ໓໕໔; ອ. ນິ. ໑໐.໓໙; ອິຕິວຸ. ໑໘].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍາຕິ.

ກປ຺ປຏ຺ຐກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໒໗) ໒. ກຸສລປຏິລາຠກຖາ

໖໕໘. ກປ຺ປຏ຺ໂຐ ກຸສລໍ ຈິຕ຺ຕໍ ນ ປຏິລເຠຍ຺ຍາຕິ? ອາມນ຺ຕາ. ກປ຺ປຏ຺ໂຐ ທານໍ ທເທຍ຺ຍາຕິ? ອາມນ຺ຕາ. ຫຎ຺ຈິ ກປ຺ປຏ຺ໂຐ ທານໍ ທເທຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ກປ຺ປຏ຺ໂຐ ກຸສລໍ ຈິຕ຺ຕໍ ນ ປຏິລເຠຍ຺ຍາ’’ຕິ.

ກປ຺ປຏ຺ໂຐ ກຸສລໍ ຈິຕ຺ຕໍ ນ ປຏິລເຠຍ຺ຍາຕິ? ອາມນ຺ຕາ. ກປ຺ປຏ຺ໂຐ ຈີວຣໍ ທເທຍ຺ຍ…ເປ… ປິຓ຺ຑປາຕໍ ທເທຍ຺ຍ…ເປ… ເສນາສນໍ ທເທຍ຺ຍ…ເປ… ຄິລານປຈ຺ຈຍເຠສຊ຺ຊປຣິກ຺ຂາຣໍ ທເທຍ຺ຍ … ຂາທນີຍໍ ທເທຍ຺ຍ… ໂຠຊນີຍໍ ທເທຍ຺ຍ… ປານີຍໍ ທເທຍ຺ຍ… ເຈຕິຍໍ ວນ຺ເທຍ຺ຍ… ເຈຕິເຍ ມາລໍ ອາໂຣເປຍ຺ຍ… ຄນ຺ຘໍ ອາໂຣເປຍ຺ຍ… ວິເລປນໍ ອາໂຣເປຍ຺ຍ…ເປ… ເຈຕິຍໍ ອຠິທກ຺ຂິຓໍ [ປທກ຺ຂິຓໍ (ປີ.)] ກເຣຍ຺ຍາຕິ? ອາມນ຺ຕາ. ຫຎ຺ຈິ ກປ຺ປຏ຺ໂຐ ເຈຕິຍໍ ອຠິທກ຺ຂິຓໍ ກເຣຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ກປ຺ປຏ຺ໂຐ ກຸສລໍ ຈິຕ຺ຕໍ ນ ປຏິລເຠຍ຺ຍາ’’ຕິ…ເປ….

໖໕໙. ກປ຺ປຏ຺ໂຐ ກຸສລໍ ຈິຕ຺ຕໍ ປຏິລເຠຍ຺ຍາຕິ? ອາມນ຺ຕາ. ຕໂຕ ວຸຏ຺ຐານໍ ກຸສລໍ ຈິຕ຺ຕໍ ປຏິລເຠຍ຺ຍາຕິ? ອາມນ຺ຕາ. ຣູປາວຈຣໍ…ເປ… ອຣູປາວຈຣໍ…ເປ… ໂລກຸຕ຺ຕຣໍ ກຸສລໍ ຈິຕ຺ຕໍ ປຏິລເຠຍ຺ຍາຕິ? ນ ເຫວໍ ວຕ຺ຕພ຺ເພ…ເປ….

ກຸສລປຏິລາຠກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໒໘) ໓. ອນນ຺ຕຣາປຍຸຕ຺ຕກຖາ

໖໖໐. ອນນ຺ຕຣາປຍຸຕ຺ໂຕ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກເມຍ຺ຍາຕິ? ອາມນ຺ຕາ. ມິຈ຺ຉຕ຺ຕນິຍາມຎ຺ຈ ສມ຺ມຕ຺ຕນິຍາມຎ຺ຈ ອຸໂຠ ໂອກ຺ກເມຍ຺ຍາຕິ? ນ ເຫວໍ ວຕ຺ຕພ຺ເພ…ເປ… ອນນ຺ຕຣາປຍຸຕ຺ໂຕ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກເມຍ຺ຍາຕິ? ອາມນ຺ຕາ. ນນຸ ຕໍ ກມ຺ມໍ ປຍຸຕ຺ຕໍ ກຸກ຺ກຸຈ຺ຈໍ ອຸປ຺ປາທິຕໍ ວິປ຺ປຏິສາຣິຍໍ ຊນິຕນ຺ຕິ? ອາມນ຺ຕາ. ຫຎ຺ຈິ ຕໍ ກມ຺ມໍ ປຍຸຕ຺ຕໍ ກຸກ຺ກຸຈ຺ຈໍ ອຸປ຺ປາທິຕໍ ວິປ຺ປຏິສາຣິຍໍ ຊນິຕໍ, ໂນ ຈ ວຕ ເຣ ວຕ຺ຕພ຺ເພ – ‘‘ອນນ຺ຕຣາປຍຸຕ຺ໂຕ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກເມຍ຺ຍາ’’ຕິ.

໖໖໑. ອນນ຺ຕຣາປຍຸຕ຺ໂຕ ປຸຄ຺ຄໂລ ອຠພ຺ໂພ ສມ຺ມຕ຺ຕນິຍາມໍ ໂອກ຺ກມິຕຸນ຺ຕິ? ອາມນ຺ຕາ. ມາຕາ ຊີວິຕາ ໂວໂຣປິຕາ… ປິຕາ ຊີວິຕາ ໂວໂຣປິໂຕ… ອຣຫາ ຊີວິຕາ ໂວໂຣປິໂຕ… ທຸຏ຺ເຐນ ຈິຕ຺ເຕນ ຕຖາຄຕສ຺ສ ໂລຫິຕໍ ອຸປ຺ປາທິຕໍ… ສງ຺ໂຆ ຠິນ຺ໂນຕິ? ນ ເຫວໍ ວຕ຺ຕພ຺ເພ…ເປ….

ອນນ຺ຕຣາປຍຸຕ຺ໂຕ ປຸຄ຺ຄໂລ ຕໍ ກມ຺ມໍ ປຏິສໍຫຣິຕ຺ວາ ກຸກ຺ກຸຈ຺ຈໍ ປຏິວິໂນເທຕ຺ວາ ວິປ຺ປຏິສາຣິຍໍ ປຏິວິເນຕ຺ວາ [ປຏິວິໂນເທຕ຺ວາ (ສີ. ປີ. ກ.)] ອຠພ຺ໂພ ສມ຺ມຕ຺ຕນິຍາມໍ ໂອກ຺ກມິຕຸນ຺ຕິ? ອາມນ຺ຕາ. ມາຕາ ຊີວິຕາ ໂວໂຣປິຕາ… ປິຕາ ຊີວິຕາ ໂວໂຣປິໂຕ…ເປ… ສງ຺ໂຆ ຠິນ຺ໂນຕິ? ນ ເຫວໍ ວຕ຺ຕພ຺ເພ…ເປ….

ອນນ຺ຕຣາປຍຸຕ຺ໂຕ ປຸຄ຺ຄໂລ ຕໍ ກມ຺ມໍ ປຏິສໍຫຣິຕ຺ວາ ກຸກ຺ກຸຈ຺ຈໍ ປຏິວິໂນເທຕ຺ວາ ວິປ຺ປຏິສາຣິຍໍ ປຏິວິເນຕ຺ວາ ອຠພ຺ໂພ ສມ຺ມຕ຺ຕນິຍາມໍ ໂອກ຺ກມິຕຸນ຺ຕິ? ອາມນ຺ຕາ. ນນຸ ຕໍ ກມ຺ມໍ ປຏິສໍຫຏໍ ກຸກ຺ກຸຈ຺ຈໍ ປຏິວິໂນທິຕໍ ວິປ຺ປຏິສາຣິຍໍ ປຏິວິນີຕນ຺ຕິ? ອາມນ຺ຕາ. ຫຎ຺ຈິ ຕໍ ກມ຺ມໍ ປຏິສໍຫຏໍ ກຸກ຺ກຸຈ຺ຈໍ ປຏິວິໂນທິຕໍ ວິປ຺ປຏິສາຣິຍໍ ປຏິວິນີຕໍ, ໂນ ຈ ວຕ ເຣ ວຕ຺ຕພ຺ເພ – ‘‘ອນນ຺ຕຣາປຍຸຕ຺ໂຕ ປຸຄ຺ຄໂລ ຕໍ ກມ຺ມໍ ປຏິສໍຫຣິຕ຺ວາ ກຸກ຺ກຸຈ຺ຈໍ ປຏິວິໂນເທຕ຺ວາ ວິປ຺ປຏິສາຣິຍໍ ປຏິວິເນຕ຺ວາ ອຠພ຺ໂພ ສມ຺ມຕ຺ຕນິຍາມໍ ໂອກ຺ກມິຕຸ’’ນ຺ຕິ.

໖໖໒. ອນນ຺ຕຣາປຍຸຕ຺ໂຕ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກເມຍ຺ຍາຕິ? ອາມນ຺ຕາ. ນນຸ ຕໍ ກມ຺ມໍ ປຍຸຕ຺ໂຕ ອາສີຕິ? ອາມນ຺ຕາ. ຫຎ຺ຈິ ຕໍ ກມ຺ມໍ ປຍຸຕ຺ໂຕ ອາສິ, ໂນ ຈ ວຕ ເຣ ວຕ຺ຕພ຺ເພ – ‘‘ອນນ຺ຕຣາປຍຸຕ຺ໂຕ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກເມຍ຺ຍາ’’ຕິ.

ອນນ຺ຕຣາປຍຸຕ຺ຕກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໒໙) ໔. ນິຍຕສ຺ສ ນິຍາມກຖາ

໖໖໓. ນິຍໂຕ ນິຍາມໍ ໂອກ຺ກມຕີຕິ? ອາມນ຺ຕາ. ມິຈ຺ຉຕ຺ຕນິຍໂຕ ສມ຺ມຕ຺ຕນິຍາມໍ ໂອກ຺ກມຕິ, ສມ຺ມຕ຺ຕນິຍໂຕ ມິຈ຺ຉຕ຺ຕນິຍາມໍ ໂອກ຺ກມຕີຕິ? ນ ເຫວໍ ວຕ຺ຕພ຺ເພ…ເປ….

ນິຍໂຕ ນິຍາມໍ ໂອກ຺ກມຕີຕິ? ອາມນ຺ຕາ. ປຸພ຺ເພ ມຄ຺ຄໍ ຠາເວຕ຺ວາ ປຈ຺ຉາ ນິຍາມໍ ໂອກ຺ກມຕີຕິ? ນ ເຫວໍ ວຕ຺ຕພ຺ເພ…ເປ… ປຸພ຺ເພ ໂສຕາປຕ຺ຕິມຄ຺ຄໍ ຠາເວຕ຺ວາ ປຈ຺ຉາ ໂສຕາປຕ຺ຕິນິຍາມໍ ໂອກ຺ກມຕີຕິ? ນ ເຫວໍ ວຕ຺ຕພ຺ເພ…ເປ… ປຸພ຺ເພ ສກທາຄາມິ…ເປ… ອນາຄາມິ…ເປ… ອຣຫຕ຺ຕມຄ຺ຄໍ ຠາເວຕ຺ວາ ປຈ຺ຉາ ອຣຫຕ຺ຕນິຍາມໍ ໂອກ຺ກມຕີຕິ? ນ ເຫວໍ ວຕ຺ຕພ຺ເພ…ເປ….

ປຸພ຺ເພ ສຕິປຏ຺ຐານໍ…ເປ… ສມ຺ມປ຺ປຘານໍ… ອິທ຺ຘິປາທໍ… ອິນ຺ທ຺ຣິຍໍ… ພລໍ… ໂພຊ຺ຌງ຺ຄໍ ຠາເວຕ຺ວາ ປຈ຺ຉາ ນິຍາມໍ ໂອກ຺ກມຕີຕິ? ນ ເຫວໍ ວຕ຺ຕພ຺ເພ…ເປ….

໖໖໔. ນ ວຕ຺ຕພ຺ພໍ – ‘‘ນິຍໂຕ ນິຍາມໍ ໂອກ຺ກມຕີ’’ຕິ? ອາມນ຺ຕາ. ຠພ຺ໂພ ໂພຘິສຕ຺ໂຕ ຕາຍ ຊາຕິຍາ ຘມ຺ມໍ ນາຠິສເມຕຸນ຺ຕິ? ນ ເຫວໍ ວຕ຺ຕພ຺ເພ. ເຕນ ຫິ ນິຍໂຕ ນິຍາມໍ ໂອກ຺ກມຕີຕິ.

ນິຍຕສ຺ສ ນິຍາມກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໓໐) ໕. ນິວຸຕກຖາ

໖໖໕. ນິວຸໂຕ ນີວຣຓໍ ຊຫຕີຕິ? ອາມນ຺ຕາ. ຣຕ຺ໂຕ ຣາຄໍ ຊຫຕິ, ທຸຏ຺ໂຐ ໂທສໍ ຊຫຕິ, ມູຬ຺ໂຫ ໂມຫໍ ຊຫຕິ, ກິລິຏ຺ໂຐ ກິເລເສ ຊຫຕີຕິ? ນ ເຫວໍ ວຕ຺ຕພ຺ເພ…ເປ… ຣາເຄນ ຣາຄໍ ຊຫຕິ, ໂທເສນ ໂທສໍ ຊຫຕິ, ໂມເຫນ ໂມຫໍ ຊຫຕິ, ກິເລເສຫິ ກິເລເສ ຊຫຕີຕິ? ນ ເຫວໍ ວຕ຺ຕພ຺ເພ…ເປ….

ຣາໂຄ ຈິຕ຺ຕສມ຺ປຍຸຕ຺ໂຕ, ມຄ຺ໂຄ ຈິຕ຺ຕສມ຺ປຍຸຕ຺ໂຕຕິ? ອາມນ຺ຕາ. ທ຺ວິນ຺ນໍ ຜສ຺ສານໍ…ເປ… ທ຺ວິນ຺ນໍ ຈິຕ຺ຕານໍ ສໂມຘານໍ ໂຫຕີຕິ? ນ ເຫວໍ ວຕ຺ຕພ຺ເພ…ເປ… ຣາໂຄ ອກຸສໂລ, ມຄ຺ໂຄ ກຸສໂລຕິ? ອາມນ຺ຕາ. ກຸສລາກຸສລາ ສາວຊ຺ຊານວຊ຺ຊາ ຫີນປຓີຕາ ກຓ຺ຫສຸກ຺ກສປ຺ປຏິຠາຄາ ຘມ຺ມາ ສມ຺ມຸຂີຠາວໍ ອາຄຈ຺ຉນ຺ຕີຕິ? ນ ເຫວໍ ວຕ຺ຕພ຺ເພ…ເປ….

໖໖໖. ກຸສລາກຸສລາ ສາວຊ຺ຊານວຊ຺ຊາ ຫີນປຓີຕາ ກຓ຺ຫສຸກ຺ກສປ຺ປຏິຠາຄາ ຘມ຺ມາ ສມ຺ມຸຂີຠາວໍ ອາຄຈ຺ຉນ຺ຕີຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຈຕ຺ຕາຣິມານິ, ຠິກ຺ຂເວ, ສຸວິທູຣວິທູຣານິ! ກຕມານິ ຈຕ຺ຕາຣິ? ນຠຎ຺ຈ, ຠິກ຺ຂເວ, ປຖວີ ຈ – ອິທໍ ປຐມໍ ສຸວິທູຣວິທູຣໍ…ເປ… ຕສ຺ມາ ສຕໍ ຘມ຺ໂມ ອສພ຺ຠິ ອາຣກາ’’ຕິ. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ກຸສລາກຸສລາ…ເປ… ສມ຺ມຸຂີຠາວໍ ອາຄຈ຺ຉນ຺ຕີ’’ຕິ.

ນິວຸໂຕ ນີວຣຓໍ ຊຫຕີຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ໂສ ເອວໍ ສມາຫິເຕ ຈິຕ຺ເຕ ປຣິສຸທ຺ເຘ ປຣິໂຍທາເຕ ອນງ຺ຄເຓ ວິຄຕູປກ຺ກິເລເສ ມຸທຸຠູເຕ ກມ຺ມນິເຍ ຐິເຕ ອາເນຎ຺ຊປ຺ປຕ຺ເຕ ອາສວານໍ ຂຍຎາຓາຍ ຈິຕ຺ຕໍ ອຠິນິນ຺ນາເມຕີ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ນິວຸໂຕ ນີວຣຓໍ ຊຫຕີ’’ຕິ…ເປ….

໖໖໗. ນ ວຕ຺ຕພ຺ພໍ – ‘‘ນິວຸໂຕ ນີວຣຓໍ ຊຫຕີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຕສ຺ສ ເອວໍ ຊານໂຕ ເອວໍ ປສ຺ສໂຕ ກາມາສວາປິ ຈິຕ຺ຕໍ ວິມຸຈ຺ຈຕິ…ເປ… ອວິຊ຺ຊາສວາປິ ຈິຕ຺ຕໍ ວິມຸຈ຺ຈຕີ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນິວຸໂຕ ນີວຣຓໍ ຊຫຕີຕິ.

ນິວຸຕກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໓໑) ໖. ສມ຺ມຸຂີຠູຕກຖາ

໖໖໘. ສມ຺ມຸຂີຠູໂຕ ສໍໂຍຊນໍ ຊຫຕີຕິ? ອາມນ຺ຕາ. ຣຕ຺ໂຕ ຣາຄໍ ຊຫຕິ, ທຸຏ຺ໂຐ ໂທສໍ ຊຫຕິ, ມູຬ຺ໂຫ ໂມຫໍ ຊຫຕິ, ກິລິຏ຺ໂຐ ກິເລເສ ຊຫຕີຕິ? ນ ເຫວໍ ວຕ຺ຕພ຺ເພ…ເປ… ຣາເຄນ ຣາຄໍ ຊຫຕິ, ໂທເສນ ໂທສໍ ຊຫຕິ, ໂມເຫນ ໂມຫໍ ຊຫຕິ, ກິເລເສຫິ ກິເລເສ ຊຫຕີຕິ? ນ ເຫວໍ ວຕ຺ຕພ຺ເພ…ເປ….

໖໖໙. ກຸສລາກຸສລາ…ເປ… ສມ຺ມຸຂີຠາວໍ ອາຄຈ຺ຉນ຺ຕີຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຈຕ຺ຕາຣິມານິ, ຠິກ຺ຂເວ, ສຸວິທູຣວິທູຣານິ! ກຕມານິ ຈຕ຺ຕາຣິ? ນຠຎ຺ຈ, ຠິກ຺ຂເວ, ປຖວີ ຈ – ອິທໍ ປຐມໍ ສຸວິທູຣວິທູຣໍ…ເປ… ຕສ຺ມາ ສຕໍ ຘມ຺ໂມ ອສພ຺ຠິ ອາຣກາ’’ຕິ. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ກຸສລາກຸສລາ…ເປ… ສມ຺ມຸຂີຠາວໍ ອາຄຈ຺ຉນ຺ຕີ’’ຕິ.

ສມ຺ມຸຂີຠູໂຕ ສໍໂຍຊນໍ ຊຫຕີຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ໂສ ເອວໍ ສມາຫິເຕ ຈິຕ຺ເຕ…ເປ… ອາສວານໍ ຂຍຎາຓາຍ ຈິຕ຺ຕໍ ອຠິນິນ຺ນາເມຕີ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ສມ຺ມຸຂີຠູໂຕ ສໍໂຍຊນໍ ຊຫຕີ’’ຕິ.

໖໗໐. ນ ວຕ຺ຕພ຺ພໍ – ‘‘ສມ຺ມຸຂີຠູໂຕ ສໍໂຍຊນໍ ຊຫຕີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຕສ຺ສ ເອວໍ ຊານໂຕ ເອວໍ ປສ຺ສໂຕ ກາມາສວາປິ ຈິຕ຺ຕໍ ວິມຸຈ຺ຈຕິ…ເປ… ອວິຊ຺ຊາສວາປິ ຈິຕ຺ຕໍ ວິມຸຈ຺ຈຕີ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ສມ຺ມຸຂີຠູໂຕ ສໍໂຍຊນໍ ຊຫຕີຕິ.

ສມ຺ມຸຂີຠູຕກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໓໒) ໗. ສມາປນ຺ໂນ ອສ຺ສາເທຕິກຖາ

໖໗໑. ສມາປນ຺ໂນ ອສ຺ສາເທຕິ, ຌານນິກນ຺ຕິ ຌານາຣມ຺ມຓາຕິ? ອາມນ຺ຕາ. ຕໍ ຌານໍ ຕສ຺ສ ຌານສ຺ສ ອາຣມ຺ມຓນ຺ຕິ? ນ ເຫວໍ ວຕ຺ຕພ຺ເພ…ເປ… ຕໍ ຌານໍ ຕສ຺ສ ຌານສ຺ສ ອາຣມ຺ມຓນ຺ຕິ? ອາມນ຺ຕາ. ເຕນ ຜສ຺ເສນ ຕໍ ຜສ຺ສໍ ຜຸສຕິ, ຕາຍ ເວທນາຍ ຕໍ ເວທນໍ ເວເທຕິ, ຕາຍ ສຎ຺ຎາຍ ຕໍ ສຎ຺ຎໍ ສຎ຺ຊານາຕິ, ຕາຍ ເຈຕນາຍ ຕໍ ເຈຕນໍ ເຈເຕຕິ, ເຕນ ຈິຕ຺ເຕນ ຕໍ ຈິຕ຺ຕໍ ຈິນ຺ເຕຕິ, ເຕນ ວິຕກ຺ເກນ ຕໍ ວິຕກ຺ກໍ ວິຕກ຺ເກຕິ, ເຕນ ວິຈາເຣນ ຕໍ ວິຈາຣໍ ວິຈາເຣຕິ, ຕາຍ ປີຕິຍາ ຕໍ ປີຕິ ປິຍາຍຕິ, ຕາຍ ສຕິຍາ ຕໍ ສຕິໍ ສຣຕິ, ຕາຍ ປຎ຺ຎາຍ ຕໍ ປຎ຺ຎໍ ປຊານາຕີຕິ? ນ ເຫວໍ ວຕ຺ຕພ຺ເພ…ເປ….

ຌານນິກນ຺ຕິ ຈິຕ຺ຕສມ຺ປຍຸຕ຺ຕາ, ຌານໍ ຈິຕ຺ຕສມ຺ປຍຸຕ຺ຕນ຺ຕິ? ອາມນ຺ຕາ. ທ຺ວິນ຺ນໍ ຜສ຺ສານໍ…ເປ… ທ຺ວິນ຺ນໍ ຈິຕ຺ຕານໍ ສໂມຘານໍ ໂຫຕີຕິ? ນ ເຫວໍ ວຕ຺ຕພ຺ເພ…ເປ….

ຌານນິກນ຺ຕິ ອກຸສລໍ, ຌານໍ ກຸສລນ຺ຕິ? ອາມນ຺ຕາ. ກຸສລາກຸສລາ ສາວຊ຺ຊານວຊ຺ຊາ ຫີນປຓີຕາ ກຓ຺ຫສຸກ຺ກສປ຺ປຏິຠາຄາ ຘມ຺ມາ ສມ຺ມຸຂີຠາວໍ ອາຄຈ຺ຉນ຺ຕີຕິ? ນ ເຫວໍ ວຕ຺ຕພ຺ເພ…ເປ….

໖໗໒. ກຸສລາກຸສລາ ສາວຊ຺ຊານວຊ຺ຊາ ຫີນປຓີຕາ ກຓ຺ຫສຸກ຺ກສປ຺ປຏິຠາຄາ ຘມ຺ມາ ສມ຺ມຸຂີຠາວໍ ອາຄຈ຺ຉນ຺ຕີຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຈຕ຺ຕາຣິມານິ, ຠິກ຺ຂເວ, ສຸວິທູຣວິທູຣານິ! ກຕມານິ ຈຕ຺ຕາຣິ? ນຠຎ຺ຈ, ຠິກ຺ຂເວ, ປຖວີ ຈ – ອິທໍ ປຐມໍ ສຸວິທູຣວິທູຣໍ…ເປ… ຕສ຺ມາ ສຕໍ ຘມ຺ໂມ ອສພ຺ຠິ ອາຣກາ’’ຕິ. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ກຸສລາກຸສລາ ສາວຊ຺ຊານວຊ຺ຊາ ຫີນປຓີຕາ ກຓ຺ຫສຸກ຺ກສປ຺ປຏິຠາຄາ ຘມ຺ມາ ສມ຺ມຸຂີຠາວໍ ອາຄຈ຺ຉນ຺ຕີ’’ຕິ.

໖໗໓. ນ ວຕ຺ຕພ຺ພໍ – ‘‘ສມາປນ຺ໂນ ອສ຺ສາເທຕິ, ຌານນິກນ຺ຕິ ຌານາຣມ຺ມຓາ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ອິຘ, ຠິກ຺ຂເວ, ຠິກ຺ຂຸ ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ປຐມໍ ຌານໍ ອຸປສມ຺ປຊ຺ຊ ວິຫຣຕິ, ໂສ ຕໍ ອສ຺ສາເທຕິ ຕໍ ນິກາເມຕິ ເຕນ ຈ ວິຕ຺ຕິໍ ອາປຊ຺ຊຕິ; ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ໂສ ຕໍ ອສ຺ສາເທຕິ ຕໍ ນິກາເມຕິ ເຕນ ຈ ວິຕ຺ຕິໍ ອາປຊ຺ຊຕີ’’ຕິ [ອ. ນິ. ໔.໑໒໓]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ສມາປນ຺ໂນ ອສ຺ສາເທຕິ, ຌານນິກນ຺ຕິ ຌານາຣມ຺ມຓາຕິ.

ສມາປນ຺ໂນ ອສ຺ສາເທຕິກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໓໓) ໘. ອສາຕຣາຄກຖາ

໖໗໔. ອຕ຺ຖິ ອສາຕຣາໂຄຕິ? ອາມນ຺ຕາ. ທຸກ຺ຂາຠິນນ຺ທິໂນ ສຕ຺ຕາ, ອຕ຺ຖິ ເກຈິ ທຸກ຺ຂໍ ປຕ຺ເຖນ຺ຕິ ປິເຫນ຺ຕິ ເອສນ຺ຕິ ຄເວສນ຺ຕິ ປຣິເຍສນ຺ຕິ, ທຸກ຺ຂໍ ອຊ຺ໂຌສາຍ ຕິຏ຺ຐນ຺ຕີຕິ? ນ ເຫວໍ ວຕ຺ຕພ຺ເພ…ເປ… ນນຸ ສຸຂາຠິນນ຺ທິໂນ ສຕ຺ຕາ, ອຕ຺ຖິ ເກຈິ ສຸຂໍ ປຕ຺ເຖນ຺ຕິ ປິເຫນ຺ຕິ ເອສນ຺ຕິ ຄເວສນ຺ຕິ ປຣິເຍສນ຺ຕິ, ສຸຂໍ ອຊ຺ໂຌສາຍ ຕິຏ຺ຐນ຺ຕີຕິ? ອາມນ຺ຕາ. ຫຎ຺ຈິ ສຸຂາຠິນນ຺ທິໂນ ສຕ຺ຕາ, ອຕ຺ຖິ ເກຈິ ສຸຂໍ ປຕ຺ເຖນ຺ຕິ ປິເຫນ຺ຕິ ເອສນ຺ຕິ ຄເວສນ຺ຕິ ປຣິເຍສນ຺ຕິ, ສຸຂໍ ອຊ຺ໂຌສາຍ ຕິຏ຺ຐນ຺ຕິ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ອສາຕຣາໂຄ’’ຕິ.

ອຕ຺ຖິ ອສາຕຣາໂຄຕິ? ອາມນ຺ຕາ. ທຸກ຺ຂາຍ ເວທນາຍ ຣາຄານຸສໂຍ ອນຸເສຕິ, ສຸຂາຍ ເວທນາຍ ປຏິຆານຸສໂຍ ອນຸເສຕີຕິ? ນ ເຫວໍ ວຕ຺ຕພ຺ເພ…ເປ… ນນຸ ສຸຂາຍ ເວທນາຍ ຣາຄານຸສໂຍ ອນຸເສຕິ, ທຸກ຺ຂາຍ ເວທນາຍ ປຏິຆານຸສໂຍ ອນຸເສຕີຕິ? ອາມນ຺ຕາ. ຫຎ຺ຈິ ສຸຂາຍ ເວທນາຍ ຣາຄານຸສໂຍ ອນຸເສຕິ, ທຸກ຺ຂາຍ ເວທນາຍ ປຏິຆານຸສໂຍ ອນຸເສຕິ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ອສາຕຣາໂຄ’’ຕິ.

໖໗໕. ນ ວຕ຺ຕພ຺ພໍ – ‘‘ອຕ຺ຖິ ອສາຕຣາໂຄ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ໂສ ເອວໍ ອນຸໂຣຘວິໂຣຘໍ ສມາປນ຺ໂນ ຍໍ ກິຎ຺ຈິ ເວທນໍ ເວທຍຕິ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ, ໂສ ຕໍ ເວທນໍ ອຠິນນ຺ທຕິ ອຠິວທຕິ ອຊ຺ໂຌສາຍ ຕິຏ຺ຐຕີ’’ຕິ [ມ. ນິ. ໓.໔໐໙ ມຫາຕຓ຺ຫາສງ຺ຂເຍ]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຕ຺ຖິ ອສາຕຣາໂຄຕິ.

ອສາຕຣາຄກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໓໔) ໙. ຘມ຺ມຕຓ຺ຫາ ອພ຺ຍາກຕາຕິກຖາ

໖໗໖. ຘມ຺ມຕຓ຺ຫາ ອພ຺ຍາກຕາຕິ? ອາມນ຺ຕາ. ວິປາກາພ຺ຍາກຕາ ກິຣິຍາພ຺ຍາກຕາ ຣູປໍ ນິພ຺ພານໍ ຈກ຺ຂາຍຕນໍ…ເປ… ໂຜຏ຺ຐພ຺ພາຍຕນນ຺ຕິ? ນ ເຫວໍ ວຕ຺ຕພ຺ເພ…ເປ….

ຘມ຺ມຕຓ຺ຫາ ອພ຺ຍາກຕາຕິ? ອາມນ຺ຕາ. ຣູປຕຓ຺ຫາ ອພ຺ຍາກຕາຕິ? ນ ເຫວໍ ວຕ຺ຕພ຺ເພ …ເປ… ຘມ຺ມຕຓ຺ຫາ ອພ຺ຍາກຕາຕິ? ອາມນ຺ຕາ. ສທ຺ທຕຓ຺ຫາ…ເປ… ຄນ຺ຘຕຓ຺ຫາ…ເປ… ຣສຕຓ຺ຫາ…ເປ… ໂຜຏ຺ຐພ຺ພຕຓ຺ຫາ ອພ຺ຍາກຕາຕິ? ນ ເຫວໍ ວຕ຺ຕພ຺ເພ…ເປ….

ຣູປຕຓ຺ຫາ ອກຸສລາຕິ? ອາມນ຺ຕາ. ຘມ຺ມຕຓ຺ຫາ ອກຸສລາຕິ? ນ ເຫວໍ ວຕ຺ຕພ຺ເພ…ເປ… ສທ຺ທຕຓ຺ຫາ…ເປ… ໂຜຏ຺ຐພ຺ພຕຓ຺ຫາ ອກຸສລາຕິ? ອາມນ຺ຕາ. ຘມ຺ມຕຓ຺ຫາ ອກຸສລາຕິ? ນ ເຫວໍ ວຕ຺ຕພ຺ເພ…ເປ….

໖໗໗. ຘມ຺ມຕຓ຺ຫາ ອພ຺ຍາກຕາຕິ? ອາມນ຺ຕາ. ນນຸ ຕຓ຺ຫາ ອກຸສລາ ວຸຕ຺ຕາ ຠຄວຕາຕິ? ອາມນ຺ຕາ. ຫຎ຺ຈິ ຕຓ຺ຫາ ອກຸສລາ ວຸຕ຺ຕາ ຠຄວຕາ, ໂນ ຈ ວຕ ເຣ ວຕ຺ຕພ຺ເພ – ‘‘ຘມ຺ມຕຓ຺ຫາ ອພ຺ຍາກຕາ’’ຕິ.

ຘມ຺ມຕຓ຺ຫາ ອພ຺ຍາກຕາຕິ? ອາມນ຺ຕາ. ນນຸ ໂລໂຠ ອກຸສໂລ ວຸຕ຺ໂຕ ຠຄວຕາ, ຘມ຺ມຕຓ຺ຫາ ໂລໂຠຕິ? ອາມນ຺ຕາ. ຫຎ຺ຈິ ໂລໂຠ ອກຸສໂລ ວຸຕ຺ໂຕ ຠຄວຕາ, ຘມ຺ມຕຓ຺ຫາ ໂລໂຠ, ໂນ ຈ ວຕ ເຣ ວຕ຺ຕພ຺ເພ – ‘‘ຘມ຺ມຕຓ຺ຫາ ອພ຺ຍາກຕາ’’ຕິ.

໖໗໘. ຘມ຺ມຕຓ຺ຫາ ໂລໂຠ ອພ຺ຍາກໂຕຕິ? ອາມນ຺ຕາ. ຣູປຕຓ຺ຫາ ໂລໂຠ ອພ຺ຍາກໂຕຕິ? ນ ເຫວໍ ວຕ຺ຕພ຺ເພ…ເປ… ຘມ຺ມຕຓ຺ຫາ ໂລໂຠ ອພ຺ຍາກໂຕຕິ? ອາມນ຺ຕາ. ສທ຺ທຕຓ຺ຫາ…ເປ… ໂຜຏ຺ຐພ຺ພຕຓ຺ຫາ ໂລໂຠ ອພ຺ຍາກໂຕຕິ? ນ ເຫວໍ ວຕ຺ຕພ຺ເພ…ເປ….

ຣູປຕຓ຺ຫາ ໂລໂຠ ອກຸສໂລຕິ? ອາມນ຺ຕາ. ຘມ຺ມຕຓ຺ຫາ ໂລໂຠ ອກຸສໂລຕິ? ນ ເຫວໍ ວຕ຺ຕພ຺ເພ…ເປ… ສທ຺ທຕຓ຺ຫາ…ເປ… ໂຜຏ຺ຐພ຺ພຕຓ຺ຫາ ໂລໂຠ ອກຸສໂລຕິ? ອາມນ຺ຕາ. ຘມ຺ມຕຓ຺ຫາ ໂລໂຠ ອກຸສໂລຕິ? ນ ເຫວໍ ວຕ຺ຕພ຺ເພ…ເປ….

໖໗໙. ຘມ຺ມຕຓ຺ຫາ ອພ຺ຍາກຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຍາຍໍ ຕຓ຺ຫາ ໂປໂນພ຺ຠວິກາ ນນ຺ທີຣາຄສຫຄຕາ ຕຕ຺ຣຕຕ຺ຣາຠິນນ຺ທິນີ, ເສຍ຺ຍຖິທໍ – ກາມຕຓ຺ຫາ, ຠວຕຓ຺ຫາ, ວິຠວຕຓ຺ຫາ’’ຕິ [ມຫາວ. ໑໔; ທີ. ນິ. ໒.໔໐໐]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ຘມ຺ມຕຓ຺ຫາ ອພ຺ຍາກຕາ’’ຕິ.

໖໘໐. ນ ວຕ຺ຕພ຺ພໍ – ‘‘ຘມ຺ມຕຓ຺ຫາ ອພ຺ຍາກຕາ’’ຕິ? ອາມນ຺ຕາ. ນນຸ ສາ ຘມ຺ມຕຓ຺ຫາຕິ? ອາມນ຺ຕາ. ຫຎ຺ຈິ ສາ ຘມ຺ມຕຓ຺ຫາ, ເຕນ ວຕ ເຣ ວຕ຺ຕພ຺ເພ – ‘‘ຘມ຺ມຕຓ຺ຫາ ອພ຺ຍາກຕາ’’ຕິ.

ຘມ຺ມຕຓ຺ຫາ ອພ຺ຍາກຕາຕິກຖາ ນິຏ຺ຐິຕາ.

໑໓. ເຕຣສມວຄ຺ໂຄ

(໑໓໕) ໑໐. ຘມ຺ມຕຓ຺ຫາ ນ ທຸກ຺ຂສມຸທໂຍຕິກຖາ

໖໘໑. ຘມ຺ມຕຓ຺ຫາ ນ ທຸກ຺ຂສມຸທໂຍຕິ? ອາມນ຺ຕາ. ຣູປຕຓ຺ຫາ ນ ທຸກ຺ຂສມຸທໂຍຕິ? ນ ເຫວໍ ວຕ຺ຕພ຺ເພ…ເປ… ຘມ຺ມຕຓ຺ຫາ ນ ທຸກ຺ຂສມຸທໂຍຕິ? ອາມນ຺ຕາ. ສທ຺ທຕຓ຺ຫາ…ເປ… ຄນ຺ຘຕຓ຺ຫາ…ເປ… ຣສຕຓ຺ຫາ…ເປ… ໂຜຏ຺ຐພ຺ພຕຓ຺ຫາ ນ ທຸກ຺ຂສມຸທໂຍຕິ? ນ ເຫວໍ ວຕ຺ຕພ຺ເພ…ເປ….

ຣູປຕຓ຺ຫາ ທຸກ຺ຂສມຸທໂຍຕິ? ອາມນ຺ຕາ. ຘມ຺ມຕຓ຺ຫາ ທຸກ຺ຂສມຸທໂຍຕິ? ນ ເຫວໍ ວຕ຺ຕພ຺ເພ…ເປ… ສທ຺ທຕຓ຺ຫາ…ເປ… ຄນ຺ຘຕຓ຺ຫາ…ເປ… ຣສຕຓ຺ຫາ…ເປ… ໂຜຏ຺ຐພ຺ພຕຓ຺ຫາ ທຸກ຺ຂສມຸທໂຍຕິ? ອາມນ຺ຕາ. ຘມ຺ມຕຓ຺ຫາ ທຸກ຺ຂສມຸທໂຍຕິ? ນ ເຫວໍ ວຕ຺ຕພ຺ເພ…ເປ….

໖໘໒. ຘມ຺ມຕຓ຺ຫາ ນ ທຸກ຺ຂສມຸທໂຍຕິ? ອາມນ຺ຕາ. ນນຸ ຕຓ຺ຫາ ທຸກ຺ຂສມຸທໂຍ ວຸຕ຺ໂຕ ຠຄວຕາຕິ? ອາມນ຺ຕາ. ຫຎ຺ຈິ ຕຓ຺ຫາ ທຸກ຺ຂສມຸທໂຍ ວຸຕ຺ໂຕ ຠຄວຕາ, ໂນ ຈ ວຕ ເຣ ວຕ຺ຕພ຺ເພ – ‘‘ຘມ຺ມຕຓ຺ຫາ ນ ທຸກ຺ຂສມຸທໂຍ’’ຕິ. ຘມ຺ມຕຓ຺ຫາ ນ ທຸກ຺ຂສມຸທໂຍຕິ? ອາມນ຺ຕາ. ນນຸ ໂລໂຠ ທຸກ຺ຂສມຸທໂຍ ວຸຕ຺ໂຕ ຠຄວຕາ, ຘມ຺ມຕຓ຺ຫາ ໂລໂຠຕິ? ອາມນ຺ຕາ. ຫຎ຺ຈິ ໂລໂຠ ທຸກ຺ຂສມຸທໂຍ ວຸຕ຺ໂຕ ຠຄວຕາ, ຘມ຺ມຕຓ຺ຫາ ໂລໂຠ, ໂນ ຈ ວຕ ເຣ ວຕ຺ຕພ຺ເພ – ‘‘ຘມ຺ມຕຓ຺ຫາ ນ ທຸກ຺ຂສມຸທໂຍ’’ຕິ.

໖໘໓. ຘມ຺ມຕຓ຺ຫາ ໂລໂຠ, ນ ທຸກ຺ຂສມຸທໂຍຕິ? ອາມນ຺ຕາ. ຣູປຕຓ຺ຫາ ໂລໂຠ, ນ ທຸກ຺ຂສມຸທໂຍຕິ? ນ ເຫວໍ ວຕ຺ຕພ຺ເພ…ເປ… ຘມ຺ມຕຓ຺ຫາ ໂລໂຠ, ນ ທຸກ຺ຂສມຸທໂຍຕິ? ອາມນ຺ຕາ. ສທ຺ທຕຓ຺ຫາ…ເປ… ຄນ຺ຘຕຓ຺ຫາ…ເປ… ຣສຕຓ຺ຫາ…ເປ… ໂຜຏ຺ຐພ຺ພຕຓ຺ຫາ ໂລໂຠ, ນ ທຸກ຺ຂສມຸທໂຍຕິ? ນ ເຫວໍ ວຕ຺ຕພ຺ເພ…ເປ….

ຣູປຕຓ຺ຫາ ໂລໂຠ ທຸກ຺ຂສມຸທໂຍຕິ? ອາມນ຺ຕາ. ຘມ຺ມຕຓ຺ຫາ ໂລໂຠ ທຸກ຺ຂສມຸທໂຍຕິ? ນ ເຫວໍ ວຕ຺ຕພ຺ເພ…ເປ… ສທ຺ທຕຓ຺ຫາ…ເປ… ໂຜຏ຺ຐພ຺ພຕຓ຺ຫາ ໂລໂຠ ທຸກ຺ຂສມຸທໂຍຕິ? ອາມນ຺ຕາ. ຘມ຺ມຕຓ຺ຫາ ໂລໂຠ ທຸກ຺ຂສມຸທໂຍຕິ? ນ ເຫວໍ ວຕ຺ຕພ຺ເພ…ເປ….

໖໘໔. ຘມ຺ມຕຓ຺ຫາ ນ ທຸກ຺ຂສມຸທໂຍຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຍາຍໍ ຕຓ຺ຫາ ໂປໂນພ຺ຠວິກາ ນນ຺ທີຣາຄສຫຄຕາ ຕຕ຺ຣຕຕ຺ຣາຠິນນ຺ທິນີ, ເສຍ຺ຍຖິທໍ – ກາມຕຓ຺ຫາ, ຠວຕຓ຺ຫາ, ວິຠວຕຓ຺ຫາ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ຘມ຺ມຕຓ຺ຫາ ນ ທຸກ຺ຂສມຸທໂຍ’’ຕິ.

໖໘໕. ນ ວຕ຺ຕພ຺ພໍ – ‘‘ຘມ຺ມຕຓ຺ຫາ ນ ທຸກ຺ຂສມຸທໂຍ’’ຕິ? ອາມນ຺ຕາ. ນນຸ ສາ ຘມ຺ມຕຓ຺ຫາຕິ? ອາມນ຺ຕາ. ຫຎ຺ຈິ ສາ ຘມ຺ມຕຓ຺ຫາ, ເຕນ ວຕ ເຣ ວຕ຺ຕພ຺ເພ – ‘‘ຘມ຺ມຕຓ຺ຫາ ນ ທຸກ຺ຂສມຸທໂຍ’’ຕິ.

ຘມ຺ມຕຓ຺ຫາ ນ ທຸກ຺ຂສມຸທໂຍຕິກຖາ ນິຏ຺ຐິຕາ.

ເຕຣສມວຄ຺ໂຄ.

ຕສ຺ສຸທ຺ທານໍ –

ກປ຺ປຏ຺ໂຐ ກປ຺ປໍ ຕິຏ຺ເຐຍ຺ຍ, ກປ຺ປຏ຺ໂຐ ກຸສລໍ ຈິຕ຺ຕໍ ນ ປຏິລເຠຍ຺ຍ, ອນນ຺ຕຣາປຍຸຕ຺ໂຕ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກເມຍ຺ຍ, ນິຍໂຕ ນິຍາມໍ ໂອກ຺ກມຕິ, ນິວຸໂຕ ນີວຣຓໍ ຊຫຕິ, ສມ຺ມຸຂີຠູໂຕ ສໍໂຍຊນໍ ຊຫຕິ, ຌານນິກນ຺ຕິ, ອສາຕຣາໂຄ, ຘມ຺ມຕຓ຺ຫາ ອພ຺ຍາກຕາ, ຘມ຺ມຕຓ຺ຫາ ນ ທຸກ຺ຂສມຸທໂຍຕິ.