(໑໒໔) ໙. ທຸຄ຺ຄຕິກຖາ

໖໕໐. ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕີຕິ? ອາມນ຺ຕາ. ທິຏ຺ຐິສມ຺ປນ຺ໂນ ປຸຄ຺ຄໂລ ອາປາຍິເກ ຣູເປ ຣຊ຺ເຊຍ຺ຍາຕິ? ອາມນ຺ຕາ. ຫຎ຺ຈິ ທິຏ຺ຐິສມ຺ປນ຺ໂນ ປຸຄ຺ຄໂລ ອາປາຍິເກ ຣູເປ ຣຊ຺ເຊຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕີ’’ຕິ.

ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕີຕິ? ອາມນ຺ຕາ. ທິຏ຺ຐິສມ຺ປນ຺ໂນ ປຸຄ຺ຄໂລ ອາປາຍິເກ ສທ຺ເທ…ເປ… ຄນ຺ເຘ… ຣເສ… ໂຜຏ຺ຐພ຺ເພ…ເປ… ອມນຸສ຺ສິຕ຺ຖິຍາ ຕິຣຈ຺ຉານຄຕິຕ຺ຖິຍາ ນາຄກຎ຺ຎາຍ ເມຖຸນໍ ຘມ຺ມໍ ປຏິເສເວຍ຺ຍ, ອເຊຬກໍ ປຏິຄ຺ຄຓ຺ເຫຍ຺ຍ, ກຸກ຺ກຸຏສູກຣໍ ປຏິຄ຺ຄຓ຺ເຫຍ຺ຍ, ຫຕ຺ຖິຄວສ຺ສວຬວໍ ປຏິຄ຺ຄຓ຺ເຫຍ຺ຍ… ຕິຕ຺ຕິຣວຏ຺ຏກໂມຣກປິຎ຺ຊຣໍ [… ກປິຎ຺ຊລໍ (ສ຺ຍາ. ກໍ. ປີ.)] ປຏິຄ຺ຄຓ຺ເຫຍ຺ຍາຕິ? ອາມນ຺ຕາ. ຫຎ຺ຈິ ທິຏ຺ຐິສມ຺ປນ຺ໂນ ປຸຄ຺ຄໂລ ຕິຕ຺ຕິຣວຏ຺ຏກໂມຣກປິຎ຺ຊຣໍ ປຏິຄ຺ຄຓ຺ເຫຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕີ’’ຕິ.

໖໕໑. ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕິ, ທິຏ຺ຐິສມ຺ປນ຺ໂນ ປຸຄ຺ຄໂລ ອາປາຍິເກ ຣູເປ ຣຊ຺ເຊຍ຺ຍາຕິ? ອາມນ຺ຕາ. ອຣຫໂຕ ປຫີນາ ທຸຄ຺ຄຕິ, ອຣຫາ ອາປາຍິເກ ຣູເປ ຣຊ຺ເຊຍ຺ຍາຕິ? ນ ເຫວໍ ວຕ຺ຕພ຺ເພ…ເປ… ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕິ, ທິຏ຺ຐິສມ຺ປນ຺ໂນ ປຸຄ຺ຄໂລ ອາປາຍິເກ ສທ຺ເທ… ຄນ຺ເຘ… ຣເສ… ໂຜຏ຺ຐພ຺ເພ…ເປ… ຕິຕ຺ຕິຣວຏ຺ຏກໂມຣກປິຎ຺ຊຣໍ ປຏິຄ຺ຄຓ຺ເຫຍ຺ຍາຕິ? ອາມນ຺ຕາ. ອຣຫໂຕ ປຫີນາ ທຸຄ຺ຄຕິ, ອຣຫາ ຕິຕ຺ຕິຣວຏ຺ຏກໂມຣກປິຎ຺ຊຣໍ ປຏິຄ຺ຄຓ຺ເຫຍ຺ຍາຕິ? ນ ເຫວໍ ວຕ຺ຕພ຺ເພ…ເປ….

ອຣຫໂຕ ປຫີນາ ທຸຄ຺ຄຕິ, ນ ຈ ອຣຫາ ອາປາຍິເກ ຣູເປ ຣຊ຺ເຊຍ຺ຍາຕິ? ອາມນ຺ຕາ. ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕິ, ນ ຈ ທິຏ຺ຐິສມ຺ປນ຺ໂນ ປຸຄ຺ຄໂລ ອາປາຍິເກ ຣູເປ ຣຊ຺ເຊຍ຺ຍາຕິ? ນ ເຫວໍ ວຕ຺ຕພ຺ເພ…ເປ… ອຣຫໂຕ ປຫີນາ ທຸຄ຺ຄຕິ, ນ ຈ ອຣຫາ ອາປາຍິເກ ສທ຺ເທ…ເປ… ຄນ຺ເຘ…ເປ… ຣເສ…ເປ… ໂຜຏ຺ຐພ຺ເພ…ເປ… ອມນຸສ຺ສິຕ຺ຖິຍາ ຕິຣຈ຺ຉານຄຕິຕ຺ຖິຍາ ນາຄກຎ຺ຎາຍ ເມຖຸນໍ ຘມ຺ມໍ ປຏິເສເວຍ຺ຍ, ອເຊຬກໍ ປຏິຄ຺ຄຓ຺ເຫຍ຺ຍ, ກຸກ຺ກຸຏສູກຣໍ ປຏິຄ຺ຄຓ຺ເຫຍ຺ຍ, ຫຕ຺ຖິຄວສ຺ສວຬວໍ ປຏິຄ຺ຄຓ຺ເຫຍ຺ຍ…ເປ… ຕິຕ຺ຕິຣວຏ຺ຏກໂມຣກປິຎ຺ຊຣໍ ປຏິຄ຺ຄຓ຺ເຫຍ຺ຍາຕິ? ອາມນ຺ຕາ. ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕິ, ນ ຈ ທິຏ຺ຐິສມ຺ປນ຺ໂນ ປຸຄ຺ຄໂລ ຕິຕ຺ຕິຣວຏ຺ຏກໂມຣກປິຎ຺ຊຣໍ ປຏິຄ຺ຄຓ຺ເຫຍ຺ຍາຕິ? ນ ເຫວໍ ວຕ຺ຕພ຺ເພ…ເປ….

໖໕໒. [ອຏ຺ຐກຖານຸໂລມໍ ປຣວາທີປຸຈ຺ຉາລກ຺ຂຓໍ. ຕຖາປາຍໍ ປຸຈ຺ຉາ ສກວາທິສ຺ສ, ປຸຣິມາໂຍ ຈ ອິມິສ຺ສໍ ທຸຄ຺ຄຕິກຖາຍໍ ປຣວາທິສ຺ສາຕິ ຄເຫຕພ຺ພາ ວິຍ ທິສ຺ສນ຺ຕິ] ນ ວຕ຺ຕພ຺ພໍ – ‘‘ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕີ’’ຕິ? ອາມນ຺ຕາ. ທິຏ຺ຐິສມ຺ປນ຺ໂນ ປຸຄ຺ຄໂລ ນິຣຍໍ ອຸປປຊ຺ເຊຍ຺ຍ…ເປ… ຕິຣຈ຺ຉານໂຍນິໍ ອຸປປຊ຺ເຊຍ຺ຍ… ເປຕ຺ຕິວິສຍໍ ອຸປປຊ຺ເຊຍ຺ຍາຕິ? ນ ເຫວໍ ວຕ຺ຕພ຺ເພ. ເຕນ ຫິ ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ປຫີນາ ທຸຄ຺ຄຕີຕິ.

ທຸຄ຺ຄຕິກຖາ ນິຏ຺ຐິຕາ.