໑໒. ທ຺ວາທສມວຄ຺ໂຄ

(໑໑໗) ໒. ກມ຺ມກຖາ

໖໓໓. ສພ຺ພໍ ກມ຺ມໍ ສວິປາກນ຺ຕິ? ອາມນ຺ຕາ. ສພ຺ພາ ເຈຕນາ ສວິປາກາຕິ? ນ ເຫວໍ ວຕ຺ຕພ຺ເພ…ເປ… ສພ຺ພາ ເຈຕນາ ສວິປາກາຕິ? ອາມນ຺ຕາ. ວິປາກາພ຺ຍາກຕາ ເຈຕນາ ສວິປາກາຕິ? ນ ເຫວໍ ວຕ຺ຕພ຺ເພ…ເປ… ສພ຺ພາ ເຈຕນາ ສວິປາກາຕິ? ອາມນ຺ຕາ. ກິຣິຍາພ຺ຍາກຕາ ເຈຕນາ ສວິປາກາຕິ? ນ ເຫວໍ ວຕ຺ຕພ຺ເພ…ເປ….

ສພ຺ພາ ເຈຕນາ ສວິປາກາຕິ? ອາມນ຺ຕາ. ກາມາວຈຣາ ວິປາກາພ຺ຍາກຕາ ເຈຕນາ ສວິປາກາຕິ? ນ ເຫວໍ ວຕ຺ຕພ຺ເພ…ເປ… ສພ຺ພາ ເຈຕນາ ສວິປາກາຕິ? ອາມນ຺ຕາ. ຣູປາວຈຣາ ອຣູປາວຈຣາ ອປຣິຍາປນ຺ນາ ວິປາກາພ຺ຍາກຕາ ເຈຕນາ ສວິປາກາຕິ? ນ ເຫວໍ ວຕ຺ຕພ຺ເພ…ເປ….

ສພ຺ພາ ເຈຕນາ ສວິປາກາຕິ? ອາມນ຺ຕາ. ກາມາວຈຣາ ກິຣິຍາພ຺ຍາກຕາ ເຈຕນາ ສວິປາກາຕິ? ນ ເຫວໍ ວຕ຺ຕພ຺ເພ…ເປ… ສພ຺ພາ ເຈຕນາ ສວິປາກາຕິ? ອາມນ຺ຕາ. ຣູປາວຈຣາ ອຣູປາວຈຣາ ກິຣິຍາພ຺ຍາກຕາ ເຈຕນາ ສວິປາກາຕິ? ນ ເຫວໍ ວຕ຺ຕພ຺ເພ…ເປ….

໖໓໔. ວິປາກາພ຺ຍາກຕາ ເຈຕນາ ອວິປາກາຕິ? ອາມນ຺ຕາ. ຫຎ຺ຈິ ວິປາກາພ຺ຍາກຕາ ເຈຕນາ ອວິປາກາ, ໂນ ຈ ວຕ ເຣ ວຕ຺ຕພ຺ເພ – ‘‘ສພ຺ພາ ເຈຕນາ ສວິປາກາ’’ຕິ.

ກິຣິຍາພ຺ຍາກຕາ ເຈຕນາ ອວິປາກາຕິ? ອາມນ຺ຕາ. ຫຎ຺ຈິ ກິຣິຍາພ຺ຍາກຕາ ເຈຕນາ ອວິປາກາ, ໂນ ຈ ວຕ ເຣ ວຕ຺ຕພ຺ເພ – ‘‘ສພ຺ພາ ເຈຕນາ ສວິປາກາ’’ຕິ.

ກາມາວຈຣາ ຣູປາວຈຣາ ອຣູປາວຈຣາ ອປຣິຍາປນ຺ນາ ວິປາກາພ຺ຍາກຕາ ເຈຕນາ ອວິປາກາຕິ? ອາມນ຺ຕາ. ຫຎ຺ຈິ ອປຣິຍາປນ຺ນາ ວິປາກາພ຺ຍາກຕາ ເຈຕນາ ອວິປາກາ, ໂນ ຈ ວຕ ເຣ ວຕ຺ຕພ຺ເພ – ‘‘ສພ຺ພາ ເຈຕນາ ສວິປາກາ’’ຕິ.

ກາມາວຈຣາ ຣູປາວຈຣາ ອຣູປາວຈຣາ ກິຣິຍາພ຺ຍາກຕາ ເຈຕນາ ອວິປາກາຕິ? ອາມນ຺ຕາ. ຫຎ຺ຈິ ອຣູປາວຈຣາ ກິຣິຍາພ຺ຍາກຕາ ເຈຕນາ ອວິປາກາ, ໂນ ຈ ວຕ ເຣ ວຕ຺ຕພ຺ເພ – ‘‘ສພ຺ພາ ເຈຕນາ ສວິປາກາ’’ຕິ.

໖໓໕. ນ ວຕ຺ຕພ຺ພໍ – ‘‘ສພ຺ພໍ ກມ຺ມໍ ສວິປາກ’’ນ຺ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ນາຫໍ, ຠິກ຺ຂເວ, ສຎ຺ເຈຕນິການໍ ກມ຺ມານໍ ກຕານໍ ອຸປຈິຕານໍ ອປ຺ປຏິສໍວິທິຕ຺ວາ ພ຺ຍນ຺ຕິຠາວໍ ວທາມິ, ຕຎ຺ຈ ໂຂ ທິຏ຺ເຐວ ຘມ຺ເມ ອຸປປຊ຺ເຊ [ອຸປປຊ຺ຊໍ (ອ. ນິ. ໑໐.໑໗)] ວາ ອປເຣ ວາ ປຣິຍາເຍ’’ຕິ [ອ. ນິ. ໑໐.໒໑໗]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ສພ຺ພໍ ກມ຺ມໍ ສວິປາກນ຺ຕິ.

ກມ຺ມກຖາ ນິຏ຺ຐິຕາ.