໓. ສຸຕ຺ຕສາຘນປຣິຫານິ

໒໖໕. ປຣິຫາຍຕິ ອຣຫາ ອຣຫຕ຺ຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ອຸຈ຺ຈາວຈາ ຫິ ປຏິປທາ [ປຏິປາທາ (ອຏ຺ຐ.)], ສມເຓນ ປກາສິຕາ;

ນ ປາຣໍ ທິຄຸຓໍ ຍນ຺ຕິ, ນຍິທໍ ເອກຄຸຓໍ ມຸຕ’’ນ຺ຕິ [ສຸ. ນິ. ໗໑໙ ສຸຕ຺ຕນິປາເຕ].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ປຣິຫາຍຕິ ອຣຫາ ອຣຫຕ຺ຕາ’’ຕິ.

ປຣິຫາຍຕິ ອຣຫາ ອຣຫຕ຺ຕາຕິ? ອາມນ຺ຕາ. ອຕ຺ຖິ ຉິນ຺ນສ຺ສ ເຉທິຍນ຺ຕິ? ນ ເຫວໍ ວຕ຺ຕພ຺ເພ.

ອຕ຺ຖິ ຉິນ຺ນສ຺ສ ເຉທິຍນ຺ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ວີຕຕຓ຺ໂຫ ອນາທາໂນ, ກິຈ຺ຈໍ ຍສ຺ສ ນ ວິຊ຺ຊຕິ;

ຉິນ຺ນສ຺ສ ເຉທິຍໍ ນຕ຺ຖິ, ໂອຆປາໂສ ສມູຫໂຕ’’ຕິ.

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ອຕ຺ຖິ ຉິນ຺ນສ຺ສ ເຉທິຍ’’ນ຺ຕິ.

໒໖໖. ປຣິຫາຍຕິ ອຣຫາ ອຣຫຕ຺ຕາຕິ? ອາມນ຺ຕາ. ອຕ຺ຖິ ກຕສ຺ສ ປຕິຈໂຍຕິ? ນ ເຫວໍ ວຕ຺ຕພ຺ເພ.

ອຕ຺ຖິ ກຕສ຺ສ ປຕິຈໂຍຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ –

‘‘ຕສ຺ສ ສມ຺ມາ ວິມຸຕ຺ຕສ຺ສ, ສນ຺ຕຈິຕ຺ຕສ຺ສ ຠິກ຺ຂຸໂນ;

ກຕສ຺ສ ປຕິຈໂຍ ນຕ຺ຖິ, ກຣຓີຍໍ ນ ວິຊ຺ຊຕິ.

‘‘ເສໂລ ຍຖາ ເອກຄ຺ຆໂນ, ວາເຕນ ນ ສມີຣຕິ;

ເອວໍ ຣູປາ ຣສາ ສທ຺ທາ, ຄນ຺ຘາ ຜສ຺ສາ ຈ ເກວລາ.

‘‘ອິຏ຺ຐາ ຘມ຺ມາ ອນິຏ຺ຐາ ຈ, ນປ຺ປເວເຘນ຺ຕິ ຕາທິໂນ;

ຐິຕໍ ຈິຕ຺ຕໍ ວິປ຺ປມຸຕ຺ຕໍ, ວຍໍ ຈສ຺ສານຸປສ຺ສຕີ’’ຕິ [ມຫາວ. ໒໔໔; ອ. ນິ. ໖.໕໕].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ອຕ຺ຖິ ກຕສ຺ສ ປຕິຈໂຍ’’ຕິ.

໒໖໗. ນ ວຕ຺ຕພ຺ພໍ – ‘‘ປຣິຫາຍຕິ ອຣຫາ ອຣຫຕ຺ຕາ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ປຎ຺ຈິເມ, ຠິກ຺ຂເວ, ຘມ຺ມາ ສມຍວິມຸຕ຺ຕສ຺ສ ຠິກ຺ຂຸໂນ ປຣິຫານາຍ ສໍວຕ຺ຕນ຺ຕິ. ກຕເມ ປຎ຺ຈ? ກມ຺ມາຣາມຕາ, ຠສ຺ສາຣາມຕາ, ນິທ຺ທາຣາມຕາ, ສງ຺ຄຓິກາຣາມຕາ, ຍຖາວິມຸຕ຺ຕໍ ຈິຕ຺ຕໍ ນ ປຈ຺ຈເວກ຺ຂຕິ. ອິເມ ໂຂ, ຠິກ຺ຂເວ, ປຎ຺ຈ ຘມ຺ມາ ສມຍວິມຸຕ຺ຕສ຺ສ ຠິກ຺ຂຸໂນ ປຣິຫານາຍ ສໍວຕ຺ຕນ຺ຕີ’’ຕິ [ອ. ນິ. ໕.໑໔໙]. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ປຣິຫາຍຕິ ອຣຫາ ອຣຫຕ຺ຕາຕິ.

ອຕ຺ຖິ ອຣຫໂຕ ກມ຺ມາຣາມຕາຕິ? ນ ເຫວໍ ວຕ຺ຕພ຺ເພ.

ອຕ຺ຖິ ອຣຫໂຕ ກມ຺ມາຣາມຕາຕິ? ອາມນ຺ຕາ. ອຕ຺ຖິ ອຣຫໂຕ ຣາໂຄ ກາມຣາໂຄ ກາມຣາຄປຣິຍຸຏ຺ຐານໍ ກາມຣາຄສໍໂຍຊນໍ ກາໂມໂຆ ກາມໂຍໂຄ ກາມຈ຺ຉນ຺ທນີວຣຓນ຺ຕິ? ນ ເຫວໍ ວຕ຺ຕພ຺ເພ.

ອຕ຺ຖິ ອຣຫໂຕ ຠສ຺ສາຣາມຕາ, ອຕ຺ຖິ ອຣຫໂຕ ນິທ຺ທາຣາມຕາ, ອຕ຺ຖິ ອຣຫໂຕ ສງ຺ຄຓິກາຣາມຕາຕິ? ນ ເຫວໍ ວຕ຺ຕພ຺ເພ.

ອຕ຺ຖິ ອຣຫໂຕ ສງ຺ຄຓິກາຣາມຕາຕິ? ອາມນ຺ຕາ. ອຕ຺ຖິ ອຣຫໂຕ ຣາໂຄ ກາມຣາໂຄ ກາມຣາຄປຣິຍຸຏ຺ຐານໍ ກາມຣາຄສໍໂຍຊນໍ ກາໂມໂຆ ກາມໂຍໂຄ ກາມຈ຺ຉນ຺ທນີວຣຓນ຺ຕິ? ນ ເຫວໍ ວຕ຺ຕພ຺ເພ.

໒໖໘. ປຣິຫາຍຕິ ອຣຫາ ອຣຫຕ຺ຕາຕິ? ອາມນ຺ຕາ. ອຣຫາ ອຣຫຕ຺ຕາ ປຣິຫາຍມາໂນ ກິໍ ປຣິຍຸຏ຺ຐິໂຕ ປຣິຫາຍຕີຕິ? ຣາຄປຣິຍຸຏ຺ຐິໂຕ ປຣິຫາຍຕີຕິ. ປຣິຍຸຏ຺ຐານໍ ກິໍ ປຏິຈ຺ຈ ອຸປ຺ປຊ຺ຊຕີຕິ? ອນຸສຍໍ ປຏິຈ຺ຈ ອຸປ຺ປຊ຺ຊຕີຕິ. ອຕ຺ຖິ ອຣຫໂຕ ອນຸສຍາຕິ? ນ ເຫວໍ ວຕ຺ຕພ຺ເພ.

ອຕ຺ຖິ ອຣຫໂຕ ອນຸສຍາຕິ? ອາມນ຺ຕາ. ອຕ຺ຖິ ອຣຫໂຕ ກາມຣາຄານຸສໂຍ ປຏິຆານຸສໂຍ ມານານຸສໂຍ ທິຏ຺ຐານຸສໂຍ ວິຈິກິຈ຺ຉານຸສໂຍ ຠວຣາຄານຸສໂຍ ອວິຊ຺ຊານຸສໂຍຕິ? ນ ເຫວໍ ວຕ຺ຕພ຺ເພ.

ໂທສປຣິຍຸຏ຺ຐິໂຕ ປຣິຫາຍຕີຕິ…ເປ… ໂມຫປຣິຍຸຏ຺ຐິໂຕ ປຣິຫາຍຕີຕິ…. ປຣິຍຸຏ຺ຐານໍ ກິໍ ປຏິຈ຺ຈ ອຸປ຺ປຊ຺ຊຕີຕິ? ອນຸສຍໍ ປຏິຈ຺ຈ ອຸປ຺ປຊ຺ຊຕີຕິ. ອຕ຺ຖິ ອຣຫໂຕ ອນຸສຍາຕິ? ນ ເຫວໍ ວຕ຺ຕພ຺ເພ…ເປ….

ອຕ຺ຖິ ອຣຫໂຕ ອນຸສຍາຕິ? ອາມນ຺ຕາ. ອຕ຺ຖິ ອຣຫໂຕ ກາມຣາຄານຸສໂຍ…ເປ… ອວິຊ຺ຊານຸສໂຍຕິ? ນ ເຫວໍ ວຕ຺ຕພ຺ເພ.

ປຣິຫາຍຕິ ອຣຫາ ອຣຫຕ຺ຕາຕິ? ອາມນ຺ຕາ. ອຣຫໂຕ ອຣຫຕ຺ຕາ ປຣິຫາຍມານສ຺ສ ກິໍ ອຸປຈຍໍ ຄຈ຺ຉຕີຕິ? ຣາໂຄ ອຸປຈຍໍ ຄຈ຺ຉຕີຕິ. ສກ຺ກາຍທິຏ຺ຐິ ອຸປຈຍໍ ຄຈ຺ຉຕີຕິ, ວິຈິກິຈ຺ຉາ ອຸປຈຍໍ ຄຈ຺ຉຕີຕິ, ສີລພ຺ພຕປຣາມາໂສ ອຸປຈຍໍ ຄຈ຺ຉຕີຕິ? ນ ເຫວໍ ວຕ຺ຕພ຺ເພ. ໂທໂສ ອຸປຈຍໍ ຄຈ຺ຉຕີຕິ…ເປ… ໂມໂຫ ອຸປຈຍໍ ຄຈ຺ຉຕີຕິ, ສກ຺ກາຍທິຏ຺ຐິ ອຸປຈຍໍ ຄຈ຺ຉຕີຕິ, ວິຈິກິຈ຺ຉາ ອຸປຈຍໍ ຄຈ຺ຉຕີຕິ, ສີລພ຺ພຕປຣາມາໂສ ອຸປຈຍໍ ຄຈ຺ຉຕີຕິ? ນ ເຫວໍ ວຕ຺ຕພ຺ເພ.

ປຣິຫາຍຕິ ອຣຫາ ອຣຫຕ຺ຕາຕິ? ອາມນ຺ຕາ. ອຣຫາ ອາຈິນຕີຕິ? ນ ເຫວໍ ວຕ຺ຕພ຺ເພ. ອຣຫາ ອປຈິນຕີຕິ? ນ ເຫວໍ ວຕ຺ຕພ຺ເພ. ອຣຫາ ປຊຫຕີຕິ? ນ ເຫວໍ ວຕ຺ຕພ຺ເພ. ອຣຫາ ອຸປາທິຍຕີຕິ? ນ ເຫວໍ ວຕ຺ຕພ຺ເພ. ອຣຫາ ວິສິເນຕີຕິ? ນ ເຫວໍ ວຕ຺ຕພ຺ເພ. ອຣຫາ ອຸສ຺ສິເນຕີຕິ? ນ ເຫວໍ ວຕ຺ຕພ຺ເພ. ອຣຫາ ວິຘູເປຕີຕິ? ນ ເຫວໍ ວຕ຺ຕພ຺ເພ. ອຣຫາ ສນ຺ຘູເປຕີຕິ? ນ ເຫວໍ ວຕ຺ຕພ຺ເພ.

ນນຸ ອຣຫາ ເນວາຈິນຕິ ນ ອປຈິນຕິ ອປຈິນິຕ຺ວາ ຐິໂຕຕິ? ອາມນ຺ຕາ. ຫຎ຺ຈິ ອຣຫາ ເນວາຈິນຕິ ນ ອປຈິນຕິ ອປຈິນິຕ຺ວາ ຐິໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ປຣິຫາຍຕິ ອຣຫາ ອຣຫຕ຺ຕາ’’ຕິ.

ນນຸ ອຣຫາ ເນວ ປຊຫຕິ ນ ອຸປາທິຍຕິ ປຊຫິຕ຺ວາ ຐິໂຕຕິ? ອາມນ຺ຕາ. ຫຎ຺ຈິ ອຣຫາ ເນວ ປຊຫຕິ ນ ອຸປາທິຍຕິ ປຊຫິຕ຺ວາ ຐິໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ປຣິຫາຍຕິ ອຣຫາ ອຣຫຕ຺ຕາ’’ຕິ.

ນນຸ ອຣຫາ ເນວ ວິສິເນຕິ ນ ອຸສ຺ສິເນຕິ ວິສິນິຕ຺ວາ ຐິໂຕຕິ? ອາມນ຺ຕາ. ຫຎ຺ຈິ ອຣຫາ ເນວ ວິສິເນຕິ ນ ອຸສ຺ສິເນຕິ ວິສິນິຕ຺ວາ ຐິໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ປຣິຫາຍຕິ ອຣຫາ ອຣຫຕ຺ຕາ’’ຕິ.

ນນຸ ອຣຫາ ເນວ ວິຘູເປຕິ ນ ສນ຺ຘູເປຕິ ວິຘູເປຕ຺ວາ ຐິໂຕຕິ? ອາມນ຺ຕາ. ຫຎ຺ຈິ ອຣຫາ ເນວ ວິຘູເປຕິ ນ ສນ຺ຘູເປຕິ ວິຘູເປຕ຺ວາ ຐິໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ປຣິຫາຍຕິ ອຣຫາ ອຣຫຕ຺ຕາ’’ຕິ.

ປຣິຫານິກຖາ ນິຏ຺ຐິຕາ.