໙. ນວມວຄ຺ໂຄ

(໙໒) ໙. ນ ຍຖາຈິຕ຺ຕສ຺ສ ວາຈາຕິກຖາ

໕໖໔. ນ ຍຖາຈິຕ຺ຕສ຺ສ ວາຈາຕິ? ອາມນ຺ຕາ. ອຜສ຺ສກສ຺ສ ວາຈາ ອເວທນກສ຺ສ ວາຈາ ອສຎ຺ຎກສ຺ສ ວາຈາ ອເຈຕນກສ຺ສ ວາຈາ ອຈິຕ຺ຕກສ຺ສ ວາຈາຕິ? ນ ເຫວໍ ວຕ຺ຕພ຺ເພ…ເປ… ນນຸ ສຜສ຺ສກສ຺ສ ວາຈາ ສເວທນກສ຺ສ ວາຈາ ສສຎ຺ຎກສ຺ສ ວາຈາ ສເຈຕນກສ຺ສ ວາຈາ ສຈິຕ຺ຕກສ຺ສ ວາຈາຕິ? ອາມນ຺ຕາ. ຫຎ຺ຈິ ສຜສ຺ສກສ຺ສ ວາຈາ…ເປ… ສຈິຕ຺ຕກສ຺ສ ວາຈາ, ໂນ ຈ ວຕ ເຣ ວຕ຺ຕພ຺ເພ – ‘‘ນ ຍຖາຈິຕ຺ຕສ຺ສ ວາຈາ’’ຕິ.

ນ ຍຖາຈິຕ຺ຕສ຺ສ ວາຈາຕິ? ອາມນ຺ຕາ. ອນາວຏ຺ເຏນ຺ຕສ຺ສ [ອນາວຏ຺ຏນ຺ຕສ຺ສ (ປີ.), ອນາວຊ຺ຊນ຺ຕສ຺ສ (ສີ. ສ຺ຍາ. ກ.) ກຖາ. ໔໘໔ ປສ຺ສິຕພ຺ພໍ] ວາຈາ…ເປ… ອນາໂຠຄສ຺ສ ວາຈາ…ເປ… ອປ຺ປຓິທຫນ຺ຕສ຺ສ ວາຈາຕິ? ນ ເຫວໍ ວຕ຺ຕພ຺ເພ…ເປ… ນນຸ ອາວຏ຺ເຏນ຺ຕສ຺ສ ວາຈາ ອາໂຠຄສ຺ສ ວາຈາ…ເປ… ປຓິທຫນ຺ຕສ຺ສ ວາຈາຕິ? ອາມນ຺ຕາ. ຫຎ຺ຈິ ອາວຏ຺ເຏນ຺ຕສ຺ສ ວາຈາ ອາໂຠຄສ຺ສ ວາຈາ ປຓິທຫນ຺ຕສ຺ສ ວາຈາ, ໂນ ຈ ວຕ ເຣ ວຕ຺ຕພ຺ເພ – ‘‘ນ ຍຖາຈິຕ຺ຕສ຺ສ ວາຈາ’’ຕິ.

ນ ຍຖາຈິຕ຺ຕສ຺ສ ວາຈາຕິ? ອາມນ຺ຕາ. ນນຸ ວາຈາ ຈິຕ຺ຕສມຸຏ຺ຐານາ ຈິຕ຺ເຕນ ສຫຊາຕາ ຈິຕ຺ເຕນ ສຫ ເອກຸປ຺ປາທາຕິ? ອາມນ຺ຕາ. ຫຎ຺ຈິ ວາຈາ ຈິຕ຺ຕສມຸຏ຺ຐານາ ຈິຕ຺ເຕນ ສຫຊາຕາ ຈິຕ຺ເຕນ ສຫ ເອກຸປ຺ປາທາ, ໂນ ຈ ວຕ ເຣ ວຕ຺ຕພ຺ເພ – ‘‘ນ ຍຖາຈິຕ຺ຕສ຺ສ ວາຈາ’’ຕິ.

ນ ຍຖາຈິຕ຺ຕສ຺ສ ວາຈາຕິ? ອາມນ຺ຕາ. ນ ຠຓິຕຸກາໂມ ຠຓຕິ, ນ ກເຖຕຸກາໂມ ກເຖຕິ, ນ ອາລປິຕຸກາໂມ ອາລປຕິ, ນ ໂວຫຣິຕຸກາໂມ ໂວຫຣຕີຕິ? ນ ເຫວໍ ວຕ຺ຕພ຺ເພ…ເປ… ນນຸ ຠຓິຕຸກາໂມ ຠຓຕິ, ກເຖຕຸກາໂມ ກເຖຕິ, ອາລປິຕຸກາໂມ ອາລປຕິ, ໂວຫຣິຕຸກາໂມ ໂວຫຣຕີຕິ? ອາມນ຺ຕາ. ຫຎ຺ຈິ ຠຓິຕຸກາໂມ ຠຓຕິ, ກເຖຕຸກາໂມ ກເຖຕິ, ອາລປິຕຸກາໂມ ອາລປຕິ, ໂວຫຣິຕຸກາໂມ ໂວຫຣຕິ, ໂນ ຈ ວຕ ເຣ ວຕ຺ຕພ຺ເພ – ‘‘ນ ຍຖາຈິຕ຺ຕສ຺ສ ວາຈາ’’ຕິ.

໕໖໕. ນ ວຕ຺ຕພ຺ພໍ – ‘‘ນ ຍຖາຈິຕ຺ຕສ຺ສ ວາຈາ’’ຕິ? ອາມນ຺ຕາ. ນນຸ ອຕ຺ຖິ ໂກຈິ ‘‘ອຎ຺ຎໍ ຠຓິສ຺ສາມີ’’ຕິ ອຎ຺ຎໍ ຠຓຕິ, ‘‘ອຎ຺ຎໍ ກເຖສ຺ສາມີ’’ຕິ ອຎ຺ຎໍ ກເຖຕິ, ‘‘ອຎ຺ຎໍ ອາລປິສ຺ສາມີ’’ຕິ ອຎ຺ຎໍ ອາລປຕິ, ‘‘ອຎ຺ຎໍ ໂວຫຣິສ຺ສາມີ’’ຕິ ອຎ຺ຎໍ ໂວຫຣຕີຕິ? ອາມນ຺ຕາ. ຫຎ຺ຈິ ອຕ຺ຖິ ໂກຈິ ‘‘ອຎ຺ຎໍ ຠຓິສ຺ສາມີ’’ຕິ ອຎ຺ຎໍ ຠຓຕິ,…ເປ… ‘‘ອຎ຺ຎໍ ໂວຫຣິສ຺ສາມີ’’ຕິ ອຎ຺ຎໍ ໂວຫຣຕິ, ເຕນ ວຕ ເຣ ວຕ຺ຕພ຺ເພ – ‘‘ນ ຍຖາຈິຕ຺ຕສ຺ສ ວາຈາ’’ຕິ.

ນ ຍຖາຈິຕ຺ຕສ຺ສ ວາຈາຕິກຖາ ນິຏ຺ຐິຕາ.