໙. ນວມວຄ຺ໂຄ

(໙໐) ໗. ວິຕກ຺ການຸປຕິຕກຖາ

໕໖໒. ສພ຺ພໍ ຈິຕ຺ຕໍ ວິຕກ຺ການຸປຕິຕນ຺ຕິ? ອາມນ຺ຕາ. ສພ຺ພໍ ຈິຕ຺ຕໍ ວິຈາຣານຸປຕິຕໍ ປີຕານຸປຕິຕໍ ສຸຂານຸປຕິຕໍ ທຸກ຺ຂານຸປຕິຕໍ ໂສມນສ຺ສານຸປຕິຕໍ ໂທມນສ຺ສານຸປຕິຕໍ ອຸເປກ຺ຂານຸປຕິຕໍ ສທ຺ຘານຸປຕິຕໍ ວີຣິຍານຸປຕິຕໍ ສຕານຸປຕິຕໍ ສມາຘານຸປຕິຕໍ ປຎ຺ຎານຸປຕິຕໍ ຣາຄານຸປຕິຕໍ ໂທສານຸປຕິຕໍ…ເປ… ອໂນຕ຺ຕປ຺ປານຸປຕິຕນ຺ຕິ? ນ ເຫວໍ ວຕ຺ຕພ຺ເພ…ເປ….

ສພ຺ພໍ ຈິຕ຺ຕໍ ວິຕກ຺ການຸປຕິຕນ຺ຕິ? ອາມນ຺ຕາ. ນນຸ ອຕ຺ຖິ ອວິຕກ຺ໂກ ວິຈາຣມຕ຺ໂຕ ສມາຘີຕິ? ອາມນ຺ຕາ. ຫຎ຺ຈິ ອຕ຺ຖິ ອວິຕກ຺ໂກ ວິຈາຣມຕ຺ໂຕ ສມາຘິ, ໂນ ຈ ວຕ ເຣ ວຕ຺ຕພ຺ເພ – ‘‘ສພ຺ພໍ ຈິຕ຺ຕໍ ວິຕກ຺ການຸປຕິຕ’’ນ຺ຕິ.

ສພ຺ພໍ ຈິຕ຺ຕໍ ວິຕກ຺ການຸປຕິຕນ຺ຕິ? ອາມນ຺ຕາ. ນນຸ ອຕ຺ຖິ ອວິຕກ຺ໂກ ອວິຈາໂຣ ສມາຘີຕິ? ອາມນ຺ຕາ. ຫຎ຺ຈິ ອຕ຺ຖິ ອວິຕກ຺ໂກ ອວິຈາໂຣ ສມາຘິ, ໂນ ຈ ວຕ ເຣ ວຕ຺ຕພ຺ເພ – ‘‘ສພ຺ພໍ ຈິຕ຺ຕໍ ວິຕກ຺ການຸປຕິຕ’’ນ຺ຕິ. ສພ຺ພໍ ຈິຕ຺ຕໍ ວິຕກ຺ການຸປຕິຕນ຺ຕິ? ອາມນ຺ຕາ. ນນຸ ຕໂຍ ສມາຘີ ວຸຕ຺ຕາ ຠຄວຕາ – ສວິຕກ຺ໂກ ສວິຈາໂຣ ສມາຘິ, ອວິຕກ຺ໂກ ວິຈາຣມຕ຺ໂຕ ສມາຘິ, ອວິຕກ຺ໂກ ອວິຈາໂຣ ສມາຘີຕິ [ທີ. ນິ. ໓.໓໐໕, ໓໕໓]? ອາມນ຺ຕາ. ຫຎ຺ຈິ ຕໂຍ ສມາຘີ ວຸຕ຺ຕາ ຠຄວຕາ – ສວິຕກ຺ໂກ ສວິຈາໂຣ ສມາຘິ, ອວິຕກ຺ໂກ ວິຈາຣມຕ຺ໂຕ ສມາຘິ, ອວິຕກ຺ໂກ ອວິຈາໂຣ ສມາຘິ, ໂນ ຈ ວຕ ເຣ ວຕ຺ຕພ຺ເພ – ‘‘ສພ຺ພໍ ຈິຕ຺ຕໍ ວິຕກ຺ການຸປຕິຕ’’ນ຺ຕິ.

ວິຕກ຺ການຸປຕິຕກຖາ ນິຏ຺ຐິຕາ.