(໗໔) ໒. ອນ຺ຕຣາຠວກຖາ

໕໐໕. ອຕ຺ຖິ ອນ຺ຕຣາຠໂວຕິ? ອາມນ຺ຕາ. ກາມຠໂວຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອນ຺ຕຣາຠໂວຕິ? ອາມນ຺ຕາ. ຣູປຠໂວຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອນ຺ຕຣາຠໂວຕິ? ອາມນ຺ຕາ. ອຣູປຠໂວຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອນ຺ຕຣາຠໂວຕິ? ອາມນ຺ຕາ. ກາມຠວສ຺ສ ຈ ຣູປຠວສ຺ສ ຈ ອນ຺ຕເຣ ອຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອນ຺ຕຣາຠໂວຕິ? ອາມນ຺ຕາ. ຣູປຠວສ຺ສ ຈ ອຣູປຠວສ຺ສ ຈ ອນ຺ຕເຣ ອຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ…ເປ….

ກາມຠວສ຺ສ ຈ ຣູປຠວສ຺ສ ຈ ອນ຺ຕເຣ ນຕ຺ຖິ ອນ຺ຕຣາຠໂວຕິ? ອາມນ຺ຕາ. ຫຎ຺ຈິ ກາມຠວສ຺ສ ຈ ຣູປຠວສ຺ສ ຈ ອນ຺ຕເຣ ນຕ຺ຖິ ອນ຺ຕຣາຠໂວ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ອນ຺ຕຣາຠໂວ’’ຕິ. ຣູປຠວສ຺ສ ຈ ອຣູປຠວສ຺ສ ຈ ອນ຺ຕເຣ ນຕ຺ຖິ ອນ຺ຕຣາຠໂວຕິ? ອາມນ຺ຕາ. ຫຎ຺ຈິ ຣູປຠວສ຺ສ ຈ ອຣູປຠວສ຺ສ ຈ ອນ຺ຕເຣ ນຕ຺ຖິ ອນ຺ຕຣາຠໂວ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ອນ຺ຕຣາຠໂວ’’ຕິ.

໕໐໖. ອຕ຺ຖິ ອນ຺ຕຣາຠໂວຕິ? ອາມນ຺ຕາ. ປຎ຺ຈມີ ສາ ໂຍນິ, ຉຏ຺ຐມີ ສາ ຄຕິ, ອຏ຺ຐມີ ສາ ວິຎ຺ຎາຓຏ຺ຐິຕິ, ທສໂມ ໂສ ສຕ຺ຕາວາໂສຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອນ຺ຕຣາຠໂວຕິ? ອາມນ຺ຕາ. ອນ຺ຕຣາຠໂວ ຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ວິຎ຺ຎາຓຏ຺ຐິຕິ ອຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອນ຺ຕຣາຠວູປຄໍ ກມ຺ມນ຺ຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອນ຺ຕຣາຠວູປຄາ ສຕ຺ຕາຕິ? ນ ເຫວໍ ວຕ຺ຕພ຺ເພ…ເປ… ອນ຺ຕຣາຠເວ ສຕ຺ຕາ ຊາຍນ຺ຕິ ຊີຍນ຺ຕິ ມີຍນ຺ຕິ ຈວນ຺ຕິ ອຸປປຊ຺ຊນ຺ຕີຕິ? ນ ເຫວໍ ວຕ຺ຕພ຺ເພ…ເປ… ອນ຺ຕຣາຠເວ ອຕ຺ຖິ ຣູປໍ ເວທນາ ສຎ຺ຎາ ສງ຺ຂາຣາ ວິຎ຺ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ອນ຺ຕຣາຠໂວ ປຎ຺ຈໂວກາຣຠໂວຕິ? ນ ເຫວໍ ວຕ຺ຕພ຺ເພ…ເປ….

໕໐໗. ອຕ຺ຖິ ກາມຠໂວ, ກາມຠໂວ ຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ວິຎ຺ຎາຓຏ຺ຐິຕິ ອຕ຺ຕຠາວປຏິລາໂຠຕິ? ອາມນ຺ຕາ. ອຕ຺ຖິ ອນ຺ຕຣາຠໂວ, ອນ຺ຕຣາຠໂວ ຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ວິຎ຺ຎາຓຏ຺ຐິຕິ ອຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ກາມຠວູປຄໍ ກມ຺ມນ຺ຕິ? ອາມນ຺ຕາ. ອຕ຺ຖິ ອນ຺ຕຣາຠວູປຄໍ ກມ຺ມນ຺ຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ກາມຠວູປຄາ ສຕ຺ຕາຕິ? ອາມນ຺ຕາ. ອຕ຺ຖິ ອນ຺ຕຣາຠວູປຄາ ສຕ຺ຕາຕິ? ນ ເຫວໍ ວຕ຺ຕພ຺ເພ…ເປ… ກາມຠເວ ສຕ຺ຕາ ຊາຍນ຺ຕິ ຊີຍນ຺ຕິ ມີຍນ຺ຕິ ຈວນ຺ຕິ ອຸປປຊ຺ຊນ຺ຕີຕິ? ອາມນ຺ຕາ. ອນ຺ຕຣາຠເວ ສຕ຺ຕາ ຊາຍນ຺ຕິ ຊີຍນ຺ຕິ ມີຍນ຺ຕິ ຈວນ຺ຕິ ອຸປປຊ຺ຊນ຺ຕີຕິ? ນ ເຫວໍ ວຕ຺ຕພ຺ເພ…ເປ… ກາມຠເວ ອຕ຺ຖິ ຣູປໍ ເວທນາ ສຎ຺ຎາ ສງ຺ຂາຣາ ວິຎ຺ຎາຓນ຺ຕິ? ອາມນ຺ຕາ. ອນ຺ຕຣາຠເວ ອຕ຺ຖິ ຣູປໍ ເວທນາ ສຎ຺ຎາ ສງ຺ຂາຣາ ວິຎ຺ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ກາມຠໂວ ປຎ຺ຈໂວກາຣຠໂວຕິ? ອາມນ຺ຕາ. ອນ຺ຕຣາຠໂວ ປຎ຺ຈໂວກາຣຠໂວຕິ? ນ ເຫວໍ ວຕ຺ຕພ຺ເພ…ເປ….

ອຕ຺ຖິ ຣູປຠໂວ, ຣູປຠໂວ ຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ວິຎ຺ຎາຓຏ຺ຐິຕິ ອຕ຺ຕຠາວປຏິລາໂຠຕິ? ອາມນ຺ຕາ. ອຕ຺ຖິ ອນ຺ຕຣາຠໂວ, ອນ຺ຕຣາຠໂວ ຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ວິຎ຺ຎາຓຏ຺ຐິຕິ ອຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ຣູປຠວູປຄໍ ກມ຺ມນ຺ຕິ? ອາມນ຺ຕາ. ອຕ຺ຖິ ອນ຺ຕຣາຠວູປຄໍ ກມ຺ມນ຺ຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ຣູປຠວູປຄາ ສຕ຺ຕາຕິ? ອາມນ຺ຕາ. ອຕ຺ຖິ ອນ຺ຕຣາຠວູປຄາ ສຕ຺ຕາຕິ? ນ ເຫວໍ ວຕ຺ຕພ຺ເພ…ເປ… ຣູປຠເວ ສຕ຺ຕາ ຊາຍນ຺ຕິ ຊີຍນ຺ຕິ ມີຍນ຺ຕິ ຈວນ຺ຕິ ອຸປປຊ຺ຊນ຺ຕີຕິ? ອາມນ຺ຕາ. ອນ຺ຕຣາຠເວ ສຕ຺ຕາ ຊາຍນ຺ຕິ ຊີຍນ຺ຕິ ມີຍນ຺ຕິ ຈວນ຺ຕິ ອຸປປຊ຺ຊນ຺ຕີຕິ? ນ ເຫວໍ ວຕ຺ຕພ຺ເພ…ເປ… ຣູປຠເວ ອຕ຺ຖິ ຣູປໍ ເວທນາ ສຎ຺ຎາ ສງ຺ຂາຣາ ວິຎ຺ຎາຓນ຺ຕິ? ອາມນ຺ຕາ. ອນ຺ຕຣາຠເວ ອຕ຺ຖິ ຣູປໍ ເວທນາ ສຎ຺ຎາ ສງ຺ຂາຣາ ວິຎ຺ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ຣູປຠໂວ ປຎ຺ຈໂວກາຣຠໂວຕິ? ອາມນ຺ຕາ. ອນ຺ຕຣາຠໂວ ປຎ຺ຈໂວກາຣຠໂວຕິ? ນ ເຫວໍ ວຕ຺ຕພ຺ເພ…ເປ….

ອຕ຺ຖິ ອຣູປຠໂວ, ອຣູປຠໂວ ຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ວິຎ຺ຎາຓຏ຺ຐິຕິ ອຕ຺ຕຠາວປຏິລາໂຠຕິ? ອາມນ຺ຕາ. ອຕ຺ຖິ ອນ຺ຕຣາຠໂວ, ອນ຺ຕຣາຠໂວ ຠໂວ ຄຕິ ສຕ຺ຕາວາໂສ ສໍສາໂຣ ໂຍນິ ວິຎ຺ຎາຓຏ຺ຐິຕິ ອຕ຺ຕຠາວປຏິລາໂຠຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອຣູປຠວູປຄໍ ກມ຺ມນ຺ຕິ? ອາມນ຺ຕາ. ອຕ຺ຖິ ອນ຺ຕຣາຠວູປຄໍ ກມ຺ມນ຺ຕິ? ນ ເຫວໍ ວຕ຺ຕພ຺ເພ…ເປ… ອຕ຺ຖິ ອຣູປຠວູປຄາ ສຕ຺ຕາຕິ? ອາມນ຺ຕາ. ອຕ຺ຖິ ອນ຺ຕຣາຠວູປຄາ ສຕ຺ຕາຕິ? ນ ເຫວໍ ວຕ຺ຕພ຺ເພ…ເປ… ອຣູປຠເວ ສຕ຺ຕາ ຊາຍນ຺ຕິ ຊີຍນ຺ຕິ ມີຍນ຺ຕິ ຈວນ຺ຕິ ອຸປປຊ຺ຊນ຺ຕີຕິ? ອາມນ຺ຕາ. ອນ຺ຕຣາຠເວ ສຕ຺ຕາ ຊາຍນ຺ຕິ ຊີຍນ຺ຕິ ມີຍນ຺ຕິ ຈວນ຺ຕິ ອຸປປຊ຺ຊນ຺ຕີຕິ? ນ ເຫວໍ ວຕ຺ຕພ຺ເພ…ເປ… ອຣູປຠເວ ອຕ຺ຖິ ເວທນາ ສຎ຺ຎາ ສງ຺ຂາຣາ ວິຎ຺ຎາຓນ຺ຕິ? ອາມນ຺ຕາ. ອນ຺ຕຣາຠເວ ອຕ຺ຖິ ເວທນາ ສຎ຺ຎາ ສງ຺ຂາຣາ ວິຎ຺ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ອຣູປຠໂວ ຈຕຸໂວກາຣຠໂວຕິ? ອາມນ຺ຕາ. ອນ຺ຕຣາຠໂວ ຈຕຸໂວກາຣຠໂວຕິ? ນ ເຫວໍ ວຕ຺ຕພ຺ເພ…ເປ….

໕໐໘. ອຕ຺ຖິ ອນ຺ຕຣາຠໂວຕິ? ອາມນ຺ຕາ. ສພ຺ເພສຎ຺ເຎວ ສຕ຺ຕານໍ ອຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ …ເປ… ສພ຺ເພສຎ຺ເຎວ ສຕ຺ຕານໍ ນຕ຺ຖິ ອນ຺ຕຣາຠໂວຕິ? ອາມນ຺ຕາ. ຫຎ຺ຈິ ສພ຺ເພສຎ຺ເຎວ ສຕ຺ຕານໍ ນຕ຺ຖິ ອນ຺ຕຣາຠໂວ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ອນ຺ຕຣາຠໂວ’’ຕິ.

ອຕ຺ຖິ ອນ຺ຕຣາຠໂວຕິ? ອາມນ຺ຕາ. ອານນ຺ຕຣິຍສ຺ສ ປຸຄ຺ຄລສ຺ສ ອຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ…ເປ… ອານນ຺ຕຣິຍສ຺ສ ປຸຄ຺ຄລສ຺ສ ນຕ຺ຖິ ອນ຺ຕຣາຠໂວຕິ? ອາມນ຺ຕາ. ຫຎ຺ຈິ ອານນ຺ຕຣິຍສ຺ສ ປຸຄ຺ຄລສ຺ສ ນຕ຺ຖິ ອນ຺ຕຣາຠໂວ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ອນ຺ຕຣາຠໂວ’’ຕິ.

ນ ອານນ຺ຕຣິຍສ຺ສ ປຸຄ຺ຄລສ຺ສ ອຕ຺ຖິ ອນ຺ຕຣາຠໂວຕິ? ອາມນ຺ຕາ. ອານນ຺ຕຣິຍສ຺ສ ປຸຄ຺ຄລສ຺ສ ອຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ…ເປ… ອານນ຺ຕຣິຍສ຺ສ ປຸຄ຺ຄລສ຺ສ ນຕ຺ຖິ ອນ຺ຕຣາຠໂວຕິ? ອາມນ຺ຕາ. ນ ອານນ຺ຕຣິຍສ຺ສ ປຸຄ຺ຄລສ຺ສ ນຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ…ເປ… ນິຣຍູປຄສ຺ສ ປຸຄ຺ຄລສ຺ສ…ເປ… ອສຎ຺ຎສຕ຺ຕູປຄສ຺ສ ປຸຄ຺ຄລສ຺ສ …ເປ… ອຣູປູປຄສ຺ສ ປຸຄ຺ຄລສ຺ສ ອຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ…ເປ… ອຣູປູປຄສ຺ສ ປຸຄ຺ຄລສ຺ສ ນຕ຺ຖິ ອນ຺ຕຣາຠໂວຕິ? ອາມນ຺ຕາ. ຫຎ຺ຈິ ອຣູປູປຄສ຺ສ ປຸຄ຺ຄລສ຺ສ ນຕ຺ຖິ ອນ຺ຕຣາຠໂວ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ອນ຺ຕຣາຠໂວ’’ຕິ.

ນ ອຣູປູປຄສ຺ສ ປຸຄ຺ຄລສ຺ສ ອຕ຺ຖິ ອນ຺ຕຣາຠໂວຕິ? ອາມນ຺ຕາ. ອຣູປູປຄສ຺ສ ປຸຄ຺ຄລສ຺ສ ອຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ…ເປ… ອຣູປູປຄສ຺ສ ປຸຄ຺ຄລສ຺ສ ນຕ຺ຖິ ອນ຺ຕຣາຠໂວຕິ? ອາມນ຺ຕາ. ນ ອຣູປູປຄສ຺ສ ປຸຄ຺ຄລສ຺ສ ນຕ຺ຖິ ອນ຺ຕຣາຠໂວຕິ? ນ ເຫວໍ ວຕ຺ຕພ຺ເພ…ເປ….

໕໐໙. ນ ວຕ຺ຕພ຺ພໍ ອຕ຺ຖິ ອນ຺ຕຣາຠໂວຕິ? ອາມນ຺ຕາ. ນນຸ ອນ຺ຕຣາປຣິນິພ຺ພາຍີ ປຸຄ຺ຄໂລ ອຕ຺ຖີຕິ? ອາມນ຺ຕາ. ຫຎ຺ຈິ ອນ຺ຕຣາປຣິນິພ຺ພາຍີ ປຸຄ຺ຄໂລ ອຕ຺ຖິ, ເຕນ ວຕ ເຣ [ໂນ ຈ ວຕ ເຣ (ສີ. ກ.), ໂນ ວຕ ເຣ (ສ຺ຍາ.)] ວຕ຺ຕພ຺ເພ – ‘‘ອຕ຺ຖິ ອນ຺ຕຣາຠໂວ’’ຕິ.

ອນ຺ຕຣາປຣິນິພ຺ພາຍີ ປຸຄ຺ຄໂລ ອຕ຺ຖີຕິ ກຕ຺ວາ ອຕ຺ຖິ ອນ຺ຕຣາຠໂວຕິ? ອາມນ຺ຕາ. ອຸປຫຈ຺ຈປຣິນິພ຺ພາຍີ ປຸຄ຺ຄໂລ ອຕ຺ຖີຕິ ກຕ຺ວາ ອຕ຺ຖິ ອຸປຫຈ຺ຈຠໂວຕິ? ນ ເຫວໍ ວຕ຺ຕພ຺ເພ…ເປ… ອນ຺ຕຣາປຣິນິພ຺ພາຍີ ປຸຄ຺ຄໂລ ອຕ຺ຖີຕິ ກຕ຺ວາ ອຕ຺ຖິ ອນ຺ຕຣາຠໂວຕິ? ອາມນ຺ຕາ. ອສງ຺ຂາຣປຣິນິພ຺ພາຍີ ປຸຄ຺ຄໂລ…ເປ… ສສງ຺ຂາຣປຣິນິພ຺ພາຍີ ປຸຄ຺ຄໂລ ອຕ຺ຖີຕິ ກຕ຺ວາ ອຕ຺ຖິ ສສງ຺ຂາຣຠໂວຕິ? ນ ເຫວໍ ວຕ຺ຕພ຺ເພ…ເປ….

ອນ຺ຕຣາຠວກຖາ ນິຏ຺ຐິຕາ.