(໗໓) ໑. ຉຄຕິກຖາ

໕໐໓. ຉ ຄຕິໂຍຕິ? ອາມນ຺ຕາ. ນນຸ ປຎ຺ຈ ຄຕິໂຍ ວຸຕ຺ຕາ ຠຄວຕາ – ນິຣໂຍ, ຕິຣຈ຺ຉານໂຍນິ, ເປຕ຺ຕິວິສໂຍ, ມນຸສ຺ສາ, ເທວາຕິ [ມ. ນິ. ໑.໑໕໓]? ອາມນ຺ຕາ. ຫຎ຺ຈິ ປຎ຺ຈ ຄຕິໂຍ ວຸຕ຺ຕາ ຠຄວຕາ – ນິຣໂຍ, ຕິຣຈ຺ຉານໂຍນິ, ເປຕ຺ຕິວິສໂຍ, ມນຸສ຺ສາ, ເທວາ; ໂນ ຈ ວຕ ເຣ ວຕ຺ຕພ຺ເພ – ‘‘ຉ ຄຕິໂຍ’’ຕິ.

ຉ ຄຕິໂຍຕິ? ອາມນ຺ຕາ. ນນຸ ກາລກຎ຺ຈິກາ [ກາລກຎ຺ຊິກາ (ສີ. ສ຺ຍາ. ກໍ.), ກາຬກຎ຺ຊກາ (ປີ.)] ສຸຣາ ເປຕານໍ ສມານວຓ຺ຓາ ສມານໂຠຄາ ສມານາຫາຣາ ສມານາຍຸກາ ເປເຕຫິ ສຫ ອາວາຫວິວາຫໍ ຄຈ຺ຉນ຺ຕີຕິ? ອາມນ຺ຕາ. ຫຎ຺ຈິ ກາລກຎ຺ຈິກາ ອສຸຣາ ເປຕານໍ ສມານວຓ຺ຓາ ສມານໂຠຄາ ສມານາຫາຣາ ສມານາຍຸກາ ເປເຕຫິ ສຫ ອາວາຫວິວາຫໍ ຄຈ຺ຉນ຺ຕິ, ໂນ ຈ ວຕ ເຣ ວຕ຺ຕພ຺ເພ – ‘‘ຉ ຄຕິໂຍ’’ຕິ.

ຉ ຄຕິໂຍຕິ? ອາມນ຺ຕາ. ນນຸ ເວປຈິຕ຺ຕິປຣິສາ ເທວານໍ ສມານວຓ຺ຓາ ສມານໂຠຄາ ສມານາຫາຣາ ສມານາຍຸກາ ເທເວຫິ ສຫ ອາວາຫວິວາຫໍ ຄຈ຺ຉນ຺ຕີຕິ? ອາມນ຺ຕາ. ຫຎ຺ຈິ ເວປຈິຕ຺ຕິປຣິສາ ເທວານໍ ສມານວຓ຺ຓາ ສມານໂຠຄາ ສມານາຫາຣາ ສມານາຍຸກາ ເທເວຫິ ສຫ ອາວາຫວິວາຫໍ ຄຈ຺ຉນ຺ຕິ, ໂນ ຈ ວຕ ເຣ ວຕ຺ຕພ຺ເພ – ‘‘ຉ ຄຕິໂຍ’’ຕິ.

ຉ ຄຕິໂຍຕິ? ອາມນ຺ຕາ. ນນຸ ເວປຈິຕ຺ຕິປຣິສາ ປຸພ຺ພເທວາຕິ? ອາມນ຺ຕາ. ຫຎ຺ຈິ ເວປຈິຕ຺ຕິປຣິສາ ປຸພ຺ພເທວາ, ໂນ ຈ ວຕ ເຣ ວຕ຺ຕພ຺ເພ – ‘‘ຉ ຄຕິໂຍ’’ຕິ.

໕໐໔. ນ ວຕ຺ຕພ຺ພໍ – ‘‘ຉ ຄຕິໂຍ’’ຕິ? ອາມນ຺ຕາ. ນນຸ ອຕ຺ຖິ ອສຸຣກາໂຍຕິ, ອາມນ຺ຕາ. ຫຎ຺ຈິ ອຕ຺ຖິ ອສຸຣກາໂຍ, ເຕນ ວຕ ເຣ ວຕ຺ຕພ຺ເພ – ‘‘ຉ ຄຕິໂຍ’’ຕິ.

ຉຄຕິກຖາ ນິຏ຺ຐິຕາ.