໕. ປຎ຺ຈມວຄ຺ໂຄ

(໔໓) ໑. ວິມຸຕ຺ຕິກຖາ

໔໑໘. ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ຍໍ ກິຎ຺ຈິ ວິມຸຕ຺ຕິຎາຓໍ ສພ຺ພໍ ຕໍ ວິມຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ…. ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ປຈ຺ຈເວກ຺ຂຓຎາຓໍ ວິມຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ….

ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ໂຄຕ຺ຣຠຸໂນ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ… ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ໂສຕາປນ຺ນສ຺ສ ຎາຓໍ, ໂສຕາປຕ຺ຕິຜລໍ ປຕ຺ຕສ຺ສ ປຏິລທ຺ຘສ຺ສ ອຘິຄຕສ຺ສ ສຈ຺ຉິກຕສ຺ສ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ສກທາຄາມິສ຺ສ ຎາຓໍ, ສກທາຄາມິຜລໍ ປຕ຺ຕສ຺ສ ປຏິລທ຺ຘສ຺ສ ອຘິຄຕສ຺ສ ສຈ຺ຉິກຕສ຺ສ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ອນາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ອນາຄາມິສ຺ສ ຎາຓໍ, ອນາຄາມິຜລໍ ປຕ຺ຕສ຺ສ ປຏິລທ຺ຘສ຺ສ ອຘິຄຕສ຺ສ ສຈ຺ຉິກຕສ຺ສ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ອຣຫໂຕ ຎາຓໍ, ອຣຫຕ຺ຕໍ ປຕ຺ຕສ຺ສ ປຏິລທ຺ຘສ຺ສ ອຘິຄຕສ຺ສ ສຈ຺ຉິກຕສ຺ສ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

໔໑໙. ໂສຕາປຕ຺ຕິຜລສມງ຺ຄິສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ… ສກທາຄາມິຜລສມງ຺ຄິສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ… ອນາຄາມິຜລສມງ຺ຄິສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ… ອຣຫຕ຺ຕຜລສມງ຺ຄິສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕນ຺ຕິ? ນ ເຫວໍ ວຕ຺ຕພ຺ເພ…ເປ….

໔໒໐. ໂສຕາປຕ຺ຕິຜລສມງ຺ຄິສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕໍ ຕຎ຺ຈ ຜລໍ ປຕ຺ຕສ຺ສ ຎາຓນ຺ຕິ? ອາມນ຺ຕາ. ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕໍ ຕຎ຺ຈ ຜລໍ ປຕ຺ຕສ຺ສ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ສກທາຄາມິຜລສມງ຺ຄິສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕໍ ຕຎ຺ຈ ຜລໍ ປຕ຺ຕສ຺ສ ຎາຓນ຺ຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕໍ ຕຎ຺ຈ ຜລໍ ປຕ຺ຕສ຺ສ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ອນາຄາມິຜລສມງ຺ຄິສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕໍ ຕຎ຺ຈ ຜລໍ ປຕ຺ຕສ຺ສ ຎາຓນ຺ຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕໍ ຕຎ຺ຈ ຜລໍ ປຕ຺ຕສ຺ສ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ອຣຫຕ຺ຕຜລສມງ຺ຄິສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕໍ ຕຎ຺ຈ ຜລໍ ປຕ຺ຕສ຺ສ ຎາຓນ຺ຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ວິມຸຕ຺ຕິຎາຓໍ ວິມຸຕ຺ຕໍ ຕຎ຺ຈ ຜລໍ ປຕ຺ຕສ຺ສ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

ວິມຸຕ຺ຕິກຖາ ນິຏ຺ຐິຕາ.

໕. ປຎ຺ຈມວຄ຺ໂຄ

(໔໔) ໒. ອເສຂຎາຓກຖາ

໔໒໑. ເສຂສ຺ສ ອເສຂໍ ຎາຓໍ ອຕ຺ຖີຕິ? ອາມນ຺ຕາ. ເສໂຂ ອເສຂໍ ຘມ຺ມໍ ຊານາຕິ ປສ຺ສຕິ, ທິຏ຺ຐໍ ວິທິຕໍ ສຈ຺ຉິກຕໍ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕີຕິ? ນ ເຫວໍ ວຕ຺ຕພ຺ເພ…ເປ… ນນຸ ເສໂຂ ອເສຂໍ ຘມ຺ມໍ ນ ຊານາຕິ ນ ປສ຺ສຕິ, ອທິຏ຺ຐໍ ອວິທິຕໍ ອສຈ຺ຉິກຕໍ ນ ອຸປສມ຺ປຊ຺ຊ ວິຫຣຕິ, ນ ກາເຍນ ຜຸສິຕ຺ວາ ວິຫຣຕີຕິ? ອາມນ຺ຕາ. ຫຎ຺ຈິ ເສໂຂ ອເສຂໍ ຘມ຺ມໍ ນ ຊານາຕິ ນ ປສ຺ສຕິ, ອທິຏ຺ຐໍ ອວິທິຕໍ ອສຈ຺ຉິກຕໍ ນ ອຸປສມ຺ປຊ຺ຊ ວິຫຣຕິ, ນ ກາເຍນ ຜຸສິຕ຺ວາ ວິຫຣຕິ, ໂນ ຈ ວຕ ເຣ ວຕ຺ຕພ຺ເພ – ‘‘ເສຂສ຺ສ ອເສຂໍ ຎາຓໍ ອຕ຺ຖີ’’ຕິ.

ອເສຂສ຺ສ ອເສຂໍ ຎາຓໍ ອຕ຺ຖິ, ອເສໂຂ ອເສຂໍ ຘມ຺ມໍ ຊານາຕິ ປສ຺ສຕິ, ທິຏ຺ຐໍ ວິທິຕໍ ສຈ຺ຉິກຕໍ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕີຕິ? ອາມນ຺ຕາ. ເສຂສ຺ສ ອເສຂໍ ຎາຓໍ ອຕ຺ຖິ, ເສໂຂ ອເສຂໍ ຘມ຺ມໍ ຊານາຕິ ປສ຺ສຕິ, ທິຏ຺ຐໍ ວິທິຕໍ ສຈ຺ຉິກຕໍ ອຸປສມ຺ປຊ຺ຊ ວິຫຣຕິ, ກາເຍນ ຜຸສິຕ຺ວາ ວິຫຣຕີຕິ? ນ ເຫວໍ ວຕ຺ຕພ຺ເພ…ເປ….

໔໒໒. ເສຂສ຺ສ ອເສຂໍ ຎາຓໍ ອຕ຺ຖິ, ເສໂຂ ອເສຂໍ ຘມ຺ມໍ ນ ຊານາຕິ ນ ປສ຺ສຕິ, ອທິຏ຺ຐໍ ອວິທິຕໍ ອສຈ຺ຉິກຕໍ ນ ອຸປສມ຺ປຊ຺ຊ ວິຫຣຕິ, ນ ກາເຍນ ຜຸສິຕ຺ວາ ວິຫຣຕີຕິ? ອາມນ຺ຕາ. ອເສຂສ຺ສ ອເສຂໍ ຎາຓໍ ອຕ຺ຖິ, ອເສໂຂ ອເສຂໍ ຘມ຺ມໍ ນ ຊານາຕິ ນ ປສ຺ສຕິ, ອທິຏ຺ຐໍ ອວິທິຕໍ ອສຈ຺ຉິກຕໍ ນ ອຸປສມ຺ປຊ຺ຊ ວິຫຣຕິ, ນ ກາເຍນ ຜຸສິຕ຺ວາ ວິຫຣຕີຕິ? ນ ເຫວໍ ວຕ຺ຕພ຺ເພ…ເປ….

ເສຂສ຺ສ ອເສຂໍ ຎາຓໍ ອຕ຺ຖີຕິ? ອາມນ຺ຕາ. ໂຄຕ຺ຣຠຸໂນ ປຸຄ຺ຄລສ຺ສ ໂສຕາປຕ຺ຕິມຄ຺ເຄ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ…ເປ… ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ໂສຕາປຕ຺ຕິຜເລ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ…ເປ… ສກທາຄາມິຜລ… ອນາຄາມິຜລ… ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຣຫຕ຺ເຕ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ…ເປ….

໔໒໓. ນ ວຕ຺ຕພ຺ພໍ – ‘‘ເສຂສ຺ສ ອເສຂໍ ຎາຓໍ ອຕ຺ຖີ’’ຕິ? ອາມນ຺ຕາ. ນນຸ ອາຍສ຺ມາ ອານນ຺ໂທ ເສໂຂ – ‘‘ຠຄວາ ອຸຬາໂຣ’’ຕິ ຊານາຕິ, ‘‘ສາຣິປຸຕ຺ໂຕ ເຖໂຣ, ມຫາໂມຄ຺ຄລ຺ລາໂນ ເຖໂຣ ອຸຬາໂຣ’’ຕິ ຊານາຕີຕິ? ອາມນ຺ຕາ. ຫຎ຺ຈິ ອາຍສ຺ມາ ອານນ຺ໂທ ເສໂຂ – ‘‘ຠຄວາ ອຸຬາໂຣ’’ຕິ ຊານາຕິ, ‘‘ສາຣິປຸຕ຺ໂຕ ເຖໂຣ, ມຫາໂມຄ຺ຄລ຺ລາໂນ ເຖໂຣ ອຸຬາໂຣ’’ຕິ ຊານາຕິ, ເຕນ ວຕ ເຣ ວຕ຺ຕພ຺ເພ – ‘‘ເສຂສ຺ສ ອເສຂໍ ຎາຓໍ ອຕ຺ຖີ’’ຕິ.

ອເສຂຎາຓກຖາ ນິຏ຺ຐິຕາ.

໕. ປຎ຺ຈມວຄ຺ໂຄ

(໔໕) ໓. ວິປຣີຕກຖາ

໔໒໔. ປຖວີກສິຓໍ ສມາປຕ຺ຕິໍ [ປຖວີກສິຓສມາປຕ຺ຕິໍ (ສີ. ກ.)] ສມາປນ຺ນສ຺ສ ວິປຣີເຕ ຎາຓນ຺ຕິ? ອາມນ຺ຕາ. ອນິຈ຺ເຈ ນິຈ຺ຈນ຺ຕິ ວິປຣິເຍໂສຕິ? ນ ເຫວໍ ວຕ຺ຕພ຺ເພ…ເປ… ທຸກ຺ເຂ ສຸຂນ຺ຕິ…ເປ… ອນຕ຺ຕນິ ອຕ຺ຕາຕິ…ເປ… ອສຸເຠ ສຸຠນ຺ຕິ ວິປຣິເຍໂສຕິ? ນ ເຫວໍ ວຕ຺ຕພ຺ເພ…ເປ….

ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓນ຺ຕິ? ອາມນ຺ຕາ. ອກຸສລນ຺ຕິ? ນ ເຫວໍ ວຕ຺ຕພ຺ເພ…ເປ… ນນຸ ກຸສລນ຺ຕິ? ອາມນ຺ຕາ. ຫຎ຺ຈິ ກຸສລໍ, ໂນ ຈ ວຕ ເຣ ວຕ຺ຕພ຺ເພ – ‘‘ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓ’’ນ຺ຕິ.

ອນິຈ຺ເຈ ນິຈ຺ຈນ຺ຕິ ວິປຣິເຍໂສ, ໂສ ຈ ອກຸສໂລຕິ? ອາມນ຺ຕາ. ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓໍ, ຕຎ຺ຈ ອກຸສລນ຺ຕິ? ນ ເຫວໍ ວຕ຺ຕພ຺ເພ…ເປ… ທຸກ຺ເຂ ສຸຂນ຺ຕິ…ເປ… ອນຕ຺ຕນິ ອຕ຺ຕາຕິ…ເປ… ອສຸເຠ ສຸຠນ຺ຕິ ວິປຣິເຍໂສ, ໂສ ຈ ອກຸສໂລຕິ? ອາມນ຺ຕາ. ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓໍ, ຕຎ຺ຈ ອກຸສລນ຺ຕິ? ນ ເຫວໍ ວຕ຺ຕພ຺ເພ…ເປ….

໔໒໕. ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓໍ, ຕຎ຺ຈ ອກຸສລນ຺ຕິ? ອາມນ຺ຕາ. ອນິຈ຺ເຈ ນິຈ຺ຈນ຺ຕິ ວິປຣິເຍໂສ, ໂສ ຈ ກຸສໂລຕິ? ນ ເຫວໍ ວຕ຺ຕພ຺ເພ…ເປ… ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓໍ, ຕຎ຺ຈ ອກຸສລນ຺ຕິ? ອາມນ຺ຕາ. ທຸກ຺ເຂ ສຸຂນ຺ຕິ…ເປ… ອນຕ຺ຕນິ ອຕ຺ຕາຕິ…ເປ… ອສຸເຠ ສຸຠນ຺ຕິ ວິປຣິເຍໂສ, ໂສ ຈ ກຸສໂລຕິ? ນ ເຫວໍ ວຕ຺ຕພ຺ເພ…ເປ….

໔໒໖. ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓນ຺ຕິ? ອາມນ຺ຕາ. ອຣຫາ ປຖວີກສິຓໍ ສມາປຕ຺ຕິໍ ສມາປຊ຺ເຊຍ຺ຍາຕິ? ອາມນ຺ຕາ. ຫຎ຺ຈິ ອຣຫາ ປຖວີກສິຓໍ ສມາປຕ຺ຕິໍ ສມາປຊ຺ເຊຍ຺ຍ, ໂນ ຈ ວຕ ເຣ ວຕ຺ຕພ຺ເພ – ‘‘ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓ’’ນ຺ຕິ.

ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓໍ, ອຣຫາ ປຖວີກສິຓໍ ສມາປຕ຺ຕິໍ ສມາປຊ຺ເຊຍ຺ຍາຕິ? ອາມນ຺ຕາ. ອຕ຺ຖິ ອຣຫໂຕ ວິປຣິເຍໂສຕິ? ນ ເຫວໍ ວຕ຺ຕພ຺ເພ…ເປ….

ອຕ຺ຖິ ອຣຫໂຕ ວິປຣິເຍໂສຕິ? ອາມນ຺ຕາ. ອຕ຺ຖິ ອຣຫໂຕ ສຎ຺ຎາວິປຣິເຍໂສ ຈິຕ຺ຕວິປຣິເຍໂສ ທິຏ຺ຐິວິປຣິເຍໂສຕິ? ນ ເຫວໍ ວຕ຺ຕພ຺ເພ…ເປ….

ນຕ຺ຖິ ອຣຫໂຕ ສຎ຺ຎາວິປຣິເຍໂສ ຈິຕ຺ຕວິປຣິເຍໂສ ທິຏ຺ຐິວິປຣິເຍໂສຕິ? ອາມນ຺ຕາ. ຫຎ຺ຈິ ນຕ຺ຖິ ອຣຫໂຕ ສຎ຺ຎາວິປຣິເຍໂສ ຈິຕ຺ຕວິປຣິເຍໂສ ທິຏ຺ຐິວິປຣິເຍໂສ, ໂນ ຈ ວຕ ເຣ ວຕ຺ຕພ຺ເພ – ‘‘ອຕ຺ຖິ ອຣຫໂຕ ວິປຣິເຍໂສ’’ຕິ.

໔໒໗. ນ ວຕ຺ຕພ຺ພໍ – ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓນ຺ຕິ? ອາມນ຺ຕາ. ປຖວີກສິຓໍ ສມາປຕ຺ຕິໍ ສມາປຊ຺ຊນ຺ຕສ຺ສ ສພ຺ເພວ ປຖວີຕິ? ນ ເຫວໍ ວຕ຺ຕພ຺ເພ. ເຕນ ຫິ ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓນ຺ຕິ.

ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓນ຺ຕິ? ອາມນ຺ຕາ. ນນຸ ປຖວີ ອຕ຺ຖິ, ອຕ຺ຖິ ຈ ໂກຈິ ປຖວິໍ ປຖວິໂຕ ສມາປຊ຺ຊຕີຕິ? ອາມນ຺ຕາ. ຫຎ຺ຈິ ປຖວີ ອຕ຺ຖິ, ອຕ຺ຖິ ຈ ໂກຈິ ປຖວິໍ ປຖວິໂຕ ສມາປຊ຺ຊຕິ, ໂນ ຈ ວຕ ເຣ ວຕ຺ຕພ຺ເພ – ‘‘ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓ’’ນ຺ຕິ.

ປຖວີ ອຕ຺ຖິ, ປຖວິໍ ປຖວິໂຕ ສມາປຊ຺ຊນ຺ຕສ຺ສ ວິປຣີຕໍ ໂຫຕີຕິ? ອາມນ຺ຕາ. ນິພ຺ພານໍ ອຕ຺ຖິ, ນິພ຺ພານໍ ນິພ຺ພານໂຕ ສມາປຊ຺ຊນ຺ຕສ຺ສ ວິປຣີຕໍ ໂຫຕີຕິ? ນ ເຫວໍ ວຕ຺ຕພ຺ເພ…ເປ… ເຕນ ຫິ ນ ວຕ຺ຕພ຺ພໍ – ‘‘ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ວິປຣີເຕ ຎາຓ’’ນ຺ຕິ.

ວິປຣີຕກຖາ ນິຏ຺ຐິຕາ.

໕. ປຎ຺ຈມວຄ຺ໂຄ

(໔໖) ໔. ນິຍາມກຖາ

໔໒໘. ອນິຍຕສ຺ສ ນິຍາມຄມນາຍ ອຕ຺ຖິ ຎາຓນ຺ຕິ? ອາມນ຺ຕາ. ນິຍຕສ຺ສ ອນິຍາມຄມນາຍ ອຕ຺ຖິ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

ນິຍຕສ຺ສ ອນິຍາມຄມນາຍ ນຕ຺ຖິ ຎາຓນ຺ຕິ? ອາມນ຺ຕາ. ອນິຍຕສ຺ສ ນິຍາມຄມນາຍ ນຕ຺ຖິ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

ອນິຍຕສ຺ສ ນິຍາມຄມນາຍ ອຕ຺ຖິ ຎາຓນ຺ຕິ? ອາມນ຺ຕາ. ນິຍຕສ຺ສ ນິຍາມຄມນາຍ ອຕ຺ຖິ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

ນິຍຕສ຺ສ ນິຍາມຄມນາຍ ນຕ຺ຖິ ຎາຓນ຺ຕິ? ອາມນ຺ຕາ. ອນິຍຕສ຺ສ ນິຍາມຄມນາຍ ນຕ຺ຖິ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

ອນິຍຕສ຺ສ ນິຍາມຄມນາຍ ອຕ຺ຖິ ຎາຓນ຺ຕິ? ອາມນ຺ຕາ. ອນິຍຕສ຺ສ ອນິຍາມຄມນາຍ ອຕ຺ຖິ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

ອນິຍຕສ຺ສ ອນິຍາມຄມນາຍ ນຕ຺ຖິ ຎາຓນ຺ຕິ? ອາມນ຺ຕາ. ອນິຍຕສ຺ສ ນິຍາມຄມນາຍ ນຕ຺ຖິ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

໔໒໙. ອນິຍຕສ຺ສ ນິຍາມຄມນາຍ ອຕ຺ຖິ ຎາຓນ຺ຕິ? ອາມນ຺ຕາ. ອນິຍຕສ຺ສ ນິຍາມຄມນາຍ ອຕ຺ຖິ ນິຍາໂມຕິ? ນ ເຫວໍ ວຕ຺ຕພ຺ເພ…ເປ….

ອນິຍຕສ຺ສ ນິຍາມຄມນາຍ ອຕ຺ຖິ ຎາຓນ຺ຕິ? ອາມນ຺ຕາ. ອນິຍຕສ຺ສ ນິຍາມຄມນາຍ ອຕ຺ຖິ ສຕິປຏ຺ຐານາ… ສມ຺ມປ຺ປຘານາ… ອິທ຺ຘິປາທາ… ອິນ຺ທ຺ຣິຍາ… ພລາ… ໂພຊ຺ຌງ຺ຄາຕິ? ນ ເຫວໍ ວຕ຺ຕພ຺ເພ…ເປ….

ອນິຍຕສ຺ສ ນິຍາມຄມນາຍ ນຕ຺ຖິ ນິຍາໂມຕິ? ອາມນ຺ຕາ. ຫຎ຺ຈິ ອນິຍຕສ຺ສ ນິຍາມຄມນາຍ ນຕ຺ຖິ ນິຍາໂມ, ໂນ ວຕ ເຣ ວຕ຺ຕພ຺ເພ – ‘‘ອນິຍຕສ຺ສ ນິຍາມຄມນາຍ ອຕ຺ຖິ ຎາຓ’’ນ຺ຕິ.

ອນິຍຕສ຺ສ ນິຍາມຄມນາຍ ນຕ຺ຖິ ສຕິປຏ຺ຐານາ…ເປ… ໂພຊ຺ຌງ຺ຄາຕິ? ອາມນ຺ຕາ. ຫຎ຺ຈິ ອນິຍຕສ຺ສ ນິຍາມຄມນາຍ ນຕ຺ຖິ ໂພຊ຺ຌງ຺ຄາ, ໂນ ວຕ ເຣ ວຕ຺ຕພ຺ເພ – ‘‘ອນິຍຕສ຺ສ ນິຍາມຄມນາຍ ອຕ຺ຖິ ຎາຓ’’ນ຺ຕິ.

໔໓໐. ອນິຍຕສ຺ສ ນິຍາມຄມນາຍ ອຕ຺ຖິ ຎາຓນ຺ຕິ? ອາມນ຺ຕາ. ໂຄຕ຺ຣຠຸໂນ ປຸຄ຺ຄລສ຺ສ ໂສຕາປຕ຺ຕິມຄ຺ເຄ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ…ເປ… ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ໂສຕາປຕ຺ຕິຜເລ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ …ເປ… ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຣຫຕ຺ເຕ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ…ເປ….

໔໓໑. ນ ວຕ຺ຕພ຺ພໍ – ‘‘ອນິຍຕສ຺ສ ນິຍາມຄມນາຍ ອຕ຺ຖິ ຎາຓ’’ນ຺ຕິ? ອາມນ຺ຕາ. ນນຸ ຠຄວາ ຊານາຕິ – ‘‘ອຍໍ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກມິສ຺ສຕິ, ຠພ຺ໂພ ອຍໍ ປຸຄ຺ຄໂລ ຘມ຺ມໍ ອຠິສເມຕຸ’’ນ຺ຕິ? ອາມນ຺ຕາ. ຫຎ຺ຈິ ຠຄວາ ຊານາຕິ – ‘‘ອຍໍ ປຸຄ຺ຄໂລ ສມ຺ມຕ຺ຕນິຍາມໍ ໂອກ຺ກມິສ຺ສຕິ, ຠພ຺ໂພ ອຍໍ ປຸຄ຺ຄໂລ ຘມ຺ມໍ ອຠິສເມຕຸໍ,’’ ເຕນ ວຕ ເຣ ວຕ຺ຕພ຺ເພ – ‘‘ອນິຍຕສ຺ສ ນິຍາມຄມນາຍ ອຕ຺ຖິ ຎາຓ’’ນ຺ຕິ.

ນິຍາມກຖາ ນິຏ຺ຐິຕາ.

໕. ປຎ຺ຈມວຄ຺ໂຄ

(໔໗) ໕. ປຏິສມ຺ຠິທາກຖາ

໔໓໒. ສພ຺ພໍ ຎາຓໍ ປຏິສມ຺ຠິທາຕິ? ອາມນ຺ຕາ. ສມ຺ມຸຕິຎາຓໍ ປຏິສມ຺ຠິທາຕິ? ນ ເຫວໍ ວຕ຺ຕພ຺ເພ…ເປ… ສມ຺ມຸຕິຎາຓໍ ປຏິສມ຺ຠິທາຕິ? ອາມນ຺ຕາ. ເຍ ເກຈິ ສມ຺ມຸຕິໍ ຊານນ຺ຕິ, ສພ຺ເພ ເຕ ປຏິສມ຺ຠິທາປຕ຺ຕາຕິ? ນ ເຫວໍ ວຕ຺ຕພ຺ເພ…ເປ… ສພ຺ພໍ ຎາຓໍ ປຏິສມ຺ຠິທາຕິ? ອາມນ຺ຕາ. ເຈໂຕປຣິຍາເຍ ຎາຓໍ ປຏິສມ຺ຠິທາຕິ? ນ ເຫວໍ ວຕ຺ຕພ຺ເພ…ເປ… ເຈໂຕປຣິຍາເຍ ຎາຓໍ ປຏິສມ຺ຠິທາຕິ? ອາມນ຺ຕາ. ເຍ ເກຈິ ປຣຈິຕ຺ຕໍ ຊານນ຺ຕິ, ສພ຺ເພ ເຕ ປຏິສມ຺ຠິທາປຕ຺ຕາຕິ? ນ ເຫວໍ ວຕ຺ຕພ຺ເພ…ເປ….

ສພ຺ພໍ ຎາຓໍ ປຏິສມ຺ຠິທາຕິ? ອາມນ຺ຕາ. ສພ຺ພາ ປຎ຺ຎາ ປຏິສມ຺ຠິທາຕິ? ນ ເຫວໍ ວຕ຺ຕພ຺ເພ…ເປ… ສພ຺ພາ ປຎ຺ຎາ ປຏິສມ຺ຠິທາຕິ? ອາມນ຺ຕາ. ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ອຕ຺ຖິ ປຎ຺ຎາ, ສາ ປຎ຺ຎາ ປຏິສມ຺ຠິທາຕິ? ນ ເຫວໍ ວຕ຺ຕພ຺ເພ…ເປ… ອາໂປກສິຓໍ…ເປ… ເຕໂຊກສິຓໍ…ເປ… ວາໂຍກສິຓໍ…ເປ… ນີລກສິຓໍ…ເປ… ປີຕກສິຓໍ…ເປ… ໂລຫິຕກສິຓໍ…ເປ… ໂອທາຕກສິຓໍ…ເປ… ອາກາສານຎ຺ຈາຍຕນໍ…ເປ… ວິຎ຺ຎາຓຎ຺ຈາຍຕນໍ…ເປ… ອາກິຎ຺ຈຎ຺ຎາຍຕນໍ…ເປ… ເນວສຎ຺ຎານາສຎ຺ຎາຍຕນໍ ສມາປນ຺ນສ຺ສ…ເປ… ທານໍ ທທນ຺ຕສ຺ສ…ເປ… ຈີວຣໍ ທທນ຺ຕສ຺ສ…ເປ… ປິຓ຺ຑປາຕໍ ທທນ຺ຕສ຺ສ…ເປ… ເສນາສນໍ ທທນ຺ຕສ຺ສ…ເປ… ຄິລານປຈ຺ຈຍເຠສຊ຺ຊປຣິກ຺ຂາຣໍ ທທນ຺ຕສ຺ສ ອຕ຺ຖິ ປຎ຺ຎາ, ສາ ປຎ຺ຎາ ປຏິສມ຺ຠິທາຕິ? ນ ເຫວໍ ວຕ຺ຕພ຺ເພ…ເປ….

໔໓໓. ນ ວຕ຺ຕພ຺ພໍ – ‘‘ສພ຺ພໍ ຎາຓໍ ປຏິສມ຺ຠິທາ’’ຕິ? ອາມນ຺ຕາ. ອຕ຺ຖິ ໂລກຸຕ຺ຕຣາ ປຎ຺ຎາ, ສາ ປຎ຺ຎາ ນ ປຏິສມ຺ຠິທາຕິ? ນ ເຫວໍ ວຕ຺ຕພ຺ເພ…ເປ… ເຕນ ຫິ ສພ຺ພໍ ຎາຓໍ ປຏິສມ຺ຠິທາຕິ.

ປຏິສມ຺ຠິທາກຖາ ນິຏ຺ຐິຕາ.

໕. ປຎ຺ຈມວຄ຺ໂຄ

(໔໘) ໖. ສມ຺ມຸຕິຎາຓກຖາ

໔໓໔. ນ ວຕ຺ຕພ຺ພໍ – ‘‘ສມ຺ມຸຕິຎາຓໍ ສຈ຺ຈາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ? ອາມນ຺ຕາ. ນນຸ ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ອຕ຺ຖິ ຎາຓໍ, ປຖວີກສິຓຎ຺ຈ ສມ຺ມຸຕິສຈ຺ຈມ຺ຫີຕິ? ອາມນ຺ຕາ. ຫຎ຺ຈິ ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ອຕ຺ຖິ ຎາຓໍ, ປຖວີກສິຓຎ຺ຈ ສມ຺ມຸຕິສຈ຺ຈມ຺ຫິ, ເຕນ ວຕ ເຣ ວຕ຺ຕພ຺ເພ – ‘‘ສມ຺ມຸຕິຎາຓໍ ສຈ຺ຈາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ.

ນ ວຕ຺ຕພ຺ພໍ – ‘‘ສມ຺ມຸຕິຎາຓໍ ສຈ຺ຈາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ? ອາມນ຺ຕາ…ເປ… ນນຸ ອາໂປກສິຓໍ…ເປ… ເຕໂຊກສິຓໍ…ເປ… ຄິລານປຈ຺ຈຍເຠສຊ຺ຊປຣິກ຺ຂາຣໍ ທທນ຺ຕສ຺ສ ອຕ຺ຖິ ຎາຓໍ, ຄິລານປຈ຺ຈຍເຠສຊ຺ຊປຣິກ຺ຂາໂຣ ຈ ສມ຺ມຸຕິສຈ຺ຈມ຺ຫີຕິ? ອາມນ຺ຕາ. ຫຎ຺ຈິ ຄິລານປຈ຺ຈຍເຠສຊ຺ຊປຣິກ຺ຂາຣໍ ທທນ຺ຕສ຺ສ ອຕ຺ຖິ ຎາຓໍ, ຄິລານປຈ຺ຈຍເຠສຊ຺ຊປຣິກ຺ຂາໂຣ ຈ ສມ຺ມຸຕິສຈ຺ຈມ຺ຫິ, ເຕນ ວຕ ເຣ ວຕ຺ຕພ຺ເພ – ‘‘ສມ຺ມຸຕິຎາຓໍ ສຈ຺ຈາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ.

໔໓໕. ສມ຺ມຸຕິຎາຓໍ ສຈ຺ຈາຣມ຺ມຓຎ຺ເຎວ ນ ອຎ຺ຎາຣມ຺ມຓນ຺ຕິ? ອາມນ຺ຕາ. ເຕນ ຎາເຓນ ທຸກ຺ຂໍ ປຣິຊານາຕິ, ສມຸທຍໍ ປຊຫຕິ, ນິໂຣຘໍ ສຈ຺ຉິກໂຣຕິ, ມຄ຺ຄໍ ຠາເວຕີຕິ? ນ ເຫວໍ ວຕ຺ຕພ຺ເພ…ເປ….

ສມ຺ມຸຕິຎາຓກຖາ ນິຏ຺ຐິຕາ.

໕. ປຎ຺ຈມວຄ຺ໂຄ

(໔໙) ໗. ຈິຕ຺ຕາຣມ຺ມຓກຖາ

໔໓໖. ເຈໂຕປຣິຍາເຍ ຎາຓໍ ຈິຕ຺ຕາຣມ຺ມຓຎ຺ເຎວ ນ ອຎ຺ຎາຣມ຺ມຓນ຺ຕິ? ອາມນ຺ຕາ. ນນຸ ອຕ຺ຖິ ໂກຈິ ‘‘ສຣາຄໍ ຈິຕ຺ຕໍ ສຣາຄໍ ຈິຕ຺ຕ’’ນ຺ຕິ ປຊານາຕີຕິ? ອາມນ຺ຕາ. ຫຎ຺ຈິ ອຕ຺ຖິ ໂກຈິ ‘‘ສຣາຄໍ ຈິຕ຺ຕໍ ສຣາຄໍ ຈິຕ຺ຕ’’ນ຺ຕິ ປຊານາຕິ, ໂນ ຈ ວຕ ເຣ ວຕ຺ຕພ຺ເພ – ‘‘ເຈໂຕປຣິຍາເຍ ຎາຓໍ ຈິຕ຺ຕາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ.

ນນຸ ອຕ຺ຖິ ໂກຈິ ວີຕຣາຄໍ ຈິຕ຺ຕໍ…ເປ… ສໂທສໍ ຈິຕ຺ຕໍ… ວີຕໂທສໍ ຈິຕ຺ຕໍ… ສໂມຫໍ ຈິຕ຺ຕໍ… ວີຕໂມຫໍ ຈິຕ຺ຕໍ… ສໍຂິຕ຺ຕໍ ຈິຕ຺ຕໍ… ວິກ຺ຂິຕ຺ຕໍ ຈິຕ຺ຕໍ… ມຫຄ຺ຄຕໍ ຈິຕ຺ຕໍ… ອມຫຄ຺ຄຕໍ ຈິຕ຺ຕໍ… ສອຸຕ຺ຕຣໍ ຈິຕ຺ຕໍ… ອນຸຕ຺ຕຣໍ ຈິຕ຺ຕໍ… ສມາຫິຕໍ ຈິຕ຺ຕໍ… ອສມາຫິຕໍ ຈິຕ຺ຕໍ… ວິມຸຕ຺ຕໍ ຈິຕ຺ຕໍ…ເປ… ອວິມຸຕ຺ຕໍ ຈິຕ຺ຕໍ ‘‘ອວິມຸຕ຺ຕໍ ຈິຕ຺ຕ’’ນ຺ຕິ ປຊານາຕີຕິ? ອາມນ຺ຕາ. ຫຎ຺ຈິ ອຕ຺ຖິ ໂກຈິ ‘‘ອວິມຸຕ຺ຕໍ ຈິຕ຺ຕໍ ອວິມຸຕ຺ຕໍ ຈິຕ຺ຕ’’ນ຺ຕິ ປຊານາຕິ, ໂນ ຈ ວຕ ເຣ ວຕ຺ຕພ຺ເພ – ‘‘ເຈໂຕປຣິຍາເຍ ຎາຓໍ ຈິຕ຺ຕາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ.

໔໓໗. ຜສ຺ສາຣມ຺ມເຓ ຎາຓໍ ວຕ຺ຕພ຺ພໍ – ‘‘ເຈໂຕປຣິຍາເຍ ຎາຓ’’ນ຺ຕິ? ອາມນ຺ຕາ. ຫຎ຺ຈິ ຜສ຺ສາຣມ຺ມເຓ ຎາຓໍ ວຕ຺ຕພ຺ພໍ ເຈໂຕປຣິຍາເຍ ຎາຓໍ, ໂນ ຈ ວຕ ເຣ ວຕ຺ຕພ຺ເພ – ‘‘ເຈໂຕປຣິຍາເຍ ຎາຓໍ ຈິຕ຺ຕາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ. ເວທນາຣມ຺ມເຓ ຎາຓໍ…ເປ… ສຎ຺ຎາຣມ຺ມເຓ ຎາຓໍ… ເຈຕນາຣມ຺ມເຓ ຎາຓໍ… ຈິຕ຺ຕາຣມ຺ມເຓ ຎາຓໍ… ສທ຺ຘາຣມ຺ມເຓ ຎາຓໍ… ວີຣິຍາຣມ຺ມເຓ ຎາຓໍ… ສຕາຣມ຺ມເຓ ຎາຓໍ… ສມາຘາຣມ຺ມເຓ ຎາຓໍ… ປຎ຺ຎາຣມ຺ມເຓ ຎາຓໍ… ຣາຄາຣມ຺ມເຓ ຎາຓໍ … ໂທສາຣມ຺ມເຓ ຎາຓໍ… ໂມຫາຣມ຺ມເຓ ຎາຓໍ…ເປ… ອໂນຕ຺ຕປ຺ປາຣມ຺ມເຓ ຎາຓໍ ວຕ຺ຕພ຺ພໍ – ‘‘ເຈໂຕປຣິຍາເຍ ຎາຓ’’ນ຺ຕິ? ອາມນ຺ຕາ. ຫຎ຺ຈິ ອໂນຕ຺ຕປ຺ປາຣມ຺ມເຓ ຎາຓໍ ວຕ຺ຕພ຺ພໍ ເຈໂຕປຣິຍາເຍ ຎາຓໍ, ໂນ ຈ ວຕ ເຣ ວຕ຺ຕພ຺ເພ – ‘‘ເຈໂຕປຣິຍາເຍ ຎາຓໍ ຈິຕ຺ຕາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ.

ຜສ຺ສາຣມ຺ມເຓ ຎາຓໍ ນ ວຕ຺ຕພ຺ພໍ – ‘‘ເຈໂຕປຣິຍາເຍ ຎາຓ’’ນ຺ຕິ? ອາມນ຺ຕາ. ຜສ຺ສປຣິຍາເຍ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ… ເວທນາຣມ຺ມເຓ ຎາຓໍ…ເປ… ສຎ຺ຎາຣມ຺ມເຓ ຎາຓໍ…ເປ… ອໂນຕ຺ຕປ຺ປາຣມ຺ມເຓ ຎາຓໍ ນ ວຕ຺ຕພ຺ພໍ – ‘‘ເຈໂຕປຣິຍາເຍ ຎາຓ’’ນ຺ຕິ? ອາມນ຺ຕາ. ອໂນຕ຺ຕປ຺ປປຣິຍາເຍ ຎາຓນ຺ຕິ? ນ ເຫວໍ ວຕ຺ຕພ຺ເພ…ເປ….

໔໓໘. ນ ວຕ຺ຕພ຺ພໍ – ‘‘ເຈໂຕປຣິຍາເຍ ຎາຓໍ ຈິຕ຺ຕາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ? ອາມນ຺ຕາ. ນນຸ ເຈໂຕປຣິຍາເຍ ຎາຓນ຺ຕິ? ອາມນ຺ຕາ. ຫຎ຺ຈິ ເຈໂຕປຣິຍາເຍ ຎາຓໍ, ເຕນ ວຕ ເຣ ວຕ຺ຕພ຺ເພ – ‘‘ເຈໂຕປຣິຍາເຍ ຎາຓໍ ຈິຕ຺ຕາຣມ຺ມຓຎ຺ເຎວ ນ ອຎ຺ຎາຣມ຺ມຓ’’ນ຺ຕິ.

ຈິຕ຺ຕາຣມ຺ມຓກຖາ ນິຏ຺ຐິຕາ.

໕. ປຎ຺ຈມວຄ຺ໂຄ

(໕໐) ໘. ອນາຄຕຎາຓກຖາ

໔໓໙. ອນາຄເຕ ຎາຓໍ ອຕ຺ຖີຕິ? ອາມນ຺ຕາ. ອນາຄຕໍ ມູລໂຕ ຊານາຕິ, ເຫຕຸໂຕ ຊານາຕິ, ນິທານໂຕ ຊານາຕິ, ສມ຺ຠວໂຕ ຊານາຕິ, ປຠວໂຕ ຊານາຕິ, ສມຸຏ຺ຐານໂຕ ຊານາຕິ, ອາຫາຣໂຕ ຊານາຕິ, ອາຣມ຺ມຓໂຕ ຊານາຕິ, ປຈ຺ຈຍໂຕ ຊານາຕິ, ສມຸທຍໂຕ ຊານາຕີຕິ? ນ ເຫວໍ ວຕ຺ຕພ຺ເພ…ເປ….

ອນາຄເຕ ຎາຓໍ ອຕ຺ຖີຕິ? ອາມນ຺ຕາ. ອນາຄຕໍ ເຫຕຸປຈ຺ຈຍຕໍ ຊານາຕິ, ອາຣມ຺ມຓປຈ຺ຈຍຕໍ ຊານາຕິ, ອຘິປຕິປຈ຺ຈຍຕໍ ຊານາຕິ, ອນນ຺ຕຣປຈ຺ຈຍຕໍ ຊານາຕິ, ສມນນ຺ຕຣປຈ຺ຈຍຕໍ ຊານາຕີຕິ? ນ ເຫວໍ ວຕ຺ຕພ຺ເພ…ເປ….

ອນາຄເຕ ຎາຓໍ ອຕ຺ຖີຕິ? ອາມນ຺ຕາ. ໂຄຕ຺ຣຠຸໂນ ປຸຄ຺ຄລສ຺ສ ໂສຕາປຕ຺ຕິມຄ຺ເຄ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ…ເປ…. ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ໂສຕາປຕ຺ຕິຜເລ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິ…ເປ… ອນາຄາມິ …ເປ… ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຣຫຕ຺ເຕ ຎາຓໍ ອຕ຺ຖີຕິ? ນ ເຫວໍ ວຕ຺ຕພ຺ເພ…ເປ….

໔໔໐. ນ ວຕ຺ຕພ຺ພໍ – ‘‘ອນາຄເຕ ຎາຓໍ ອຕ຺ຖີ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ປາຏລິປຸຕ຺ຕສ຺ສ ໂຂ, ອານນ຺ທ, ຕໂຍ ອນ຺ຕຣາຍາ ຠວິສ຺ສນ຺ຕິ – ອຄ຺ຄິໂຕ ວາ ອຸທກໂຕ ວາ ມິຖຸເຠທາ ວາ’’ຕິ [ມຫາວ. ໒໘໖; ທີ. ນິ. ໒.໑໕໒; ອຸທາ. ໗໖]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອນາຄເຕ ຎາຓໍ ອຕ຺ຖີຕິ.

ອນາຄຕຎາຓກຖາ ນິຏ຺ຐິຕາ.

໕. ປຎ຺ຈມວຄ຺ໂຄ

(໕໑) ໙. ປຏຸປ຺ປນ຺ນກຖາ

໔໔໑. ປຏຸປ຺ປນ຺ເນ [ປຈ຺ຈຸປ຺ປນ຺ເນ (ສີ. ສ຺ຍາ.)] ຎາຓໍ ອຕ຺ຖີຕິ? ອາມນ຺ຕາ. ເຕນ ຎາເຓນ ຕໍ ຎາຓໍ ຊານາຕີຕິ? ນ ເຫວໍ ວຕ຺ຕພ຺ເພ…ເປ… ເຕນ ຎາເຓນ ຕໍ ຎາຓໍ ຊານາຕີຕິ? ອາມນ຺ຕາ. ເຕນ ຎາເຓນ ຕໍ ຎາຓໍ ‘‘ຎາຓ’’ນ຺ຕິ ຊານາຕີຕິ? ນ ເຫວໍ ວຕ຺ຕພ຺ເພ…ເປ… ເຕນ ຎາເຓນ ຕໍ ຎາຓໍ ‘‘ຎາຓ’’ນ຺ຕິ ຊານາຕີຕິ? ອາມນ຺ຕາ. ຕໍ ຎາຓໍ ຕສ຺ສ ຎາຓສ຺ສ ອາຣມ຺ມຓນ຺ຕິ? ນ ເຫວໍ ວຕ຺ຕພ຺ເພ…ເປ….

ຕໍ ຎາຓໍ ຕສ຺ສ ຎາຓສ຺ສ ອາຣມ຺ມຓນ຺ຕິ? ອາມນ຺ຕາ. ເຕນ ຜສ຺ເສນ ຕໍ ຜສ຺ສໍ ຜຸສຕິ, ຕາຍ ເວທນາຍ ຕໍ ເວທນໍ ເວເທຕິ, ຕາຍ ສຎ຺ຎາຍ ຕໍ ສຎ຺ຎໍ ສຎ຺ຊານາຕິ, ຕາຍ ເຈຕນາຍ ຕໍ ເຈຕນໍ ເຈເຕຕິ, ເຕນ ຈິຕ຺ເຕນ ຕໍ ຈິຕ຺ຕໍ ຈິນ຺ເຕຕິ, ເຕນ ວິຕກ຺ເກນ ຕໍ ວິຕກ຺ກໍ ວິຕກ຺ເກຕິ, ເຕນ ວິຈາເຣນ ຕໍ ວິຈາຣໍ ວິຈາເຣຕິ, ຕາຍ ປີຕິຍາ ຕໍ ປີຕິໍ ປິຍາຍຕິ, ຕາຍ ສຕິຍາ ຕໍ ສຕິໍ ສຣຕິ, ຕາຍ ປຎ຺ຎາຍ ຕໍ ປຎ຺ຎໍ ປຊານາຕິ, ເຕນ ຂຄ຺ເຄນ ຕໍ ຂຄ຺ຄໍ ຉິນ຺ທຕິ, ເຕນ ຜຣສຸນາ ຕໍ ຜຣສຸໍ ຕຈ຺ຉຕິ, ຕາຍ ກຸຘາຣິຍາ ຕໍ ກຸຘາຣິໍ ຕຈ຺ຉຕິ, ຕາຍ ວາສິຍາ ຕໍ ວາສິໍ ຕຈ຺ຉຕິ, ຕາຍ ສູຈິຍາ ຕໍ ສູຈິໍ ສິພ຺ເພຕິ, ເຕນ ອງ຺ຄຸລຄ຺ເຄນ ຕໍ ອງ຺ຄຸລຄ຺ຄໍ ປຣາມສຕິ, ເຕນ ນາສິກຄ຺ເຄນ ຕໍ ນາສິກຄ຺ຄໍ ປຣາມສຕິ, ເຕນ ມຕ຺ຖເກນ ຕໍ ມຕ຺ຖກໍ ປຣາມສຕິ, ເຕນ ຄູເຖນ ຕໍ ຄູຖໍ ໂຘວຕິ, ເຕນ ມຸຕ຺ເຕນ ຕໍ ມຸຕ຺ຕໍ ໂຘວຕິ, ເຕນ ເຂເຬນ ຕໍ ເຂຬໍ ໂຘວຕິ, ເຕນ ປຸພ຺ເພນ ຕໍ ປຸພ຺ພໍ ໂຘວຕິ, ເຕນ ໂລຫິເຕນ ຕໍ ໂລຫິຕໍ ໂຘວຕີຕິ? ນ ເຫວໍ ວຕ຺ຕພ຺ເພ …ເປ….

໔໔໒. ນ ວຕ຺ຕພ຺ພໍ – ‘‘ປຏຸປ຺ປນ຺ເນ ຎາຓໍ ອຕ຺ຖີ’’ຕິ? ອາມນ຺ຕາ. ນນຸ ສພ຺ພສງ຺ຂາເຣ ອນິຈ຺ຈໂຕ ທິຏ຺ເຐ ຕມ຺ປິ ຎາຓໍ ອນິຈ຺ຈໂຕ ທິຏ຺ຐໍ ໂຫຕີຕິ? ອາມນ຺ຕາ. ຫຎ຺ຈິ ສພ຺ພສງ຺ຂາເຣ ອນິຈ຺ຈໂຕ ທິຏ຺ເຐ ຕມ຺ປິ ຎາຓໍ ອນິຈ຺ຈໂຕ ທິຏ຺ຐໍ ໂຫຕິ, ເຕນ ວຕ ເຣ ວຕ຺ຕພ຺ເພ – ‘‘ປຏຸປ຺ປນ຺ເນ ຎາຓໍ ອຕ຺ຖີ’’ຕິ.

ປຏຸປ຺ປນ຺ນຎາຓກຖາ [ປຈ຺ຈຸປ຺ປນ຺ນກຖາ (ສີ.)] ນິຏ຺ຐິຕາ.

໕. ປຎ຺ຈມວຄ຺ໂຄ

(໕໒) ໑໐. ຜລຎາຓກຖາ

໔໔໓. ສາວກສ຺ສ ຜເລ ຎາຓໍ ອຕ຺ຖີຕິ? ອາມນ຺ຕາ. ສາວໂກ ຜລສ຺ສ ກຕໍ ປຎ຺ຎາເປຕີຕິ? ນ ເຫວໍ ວຕ຺ຕພ຺ພ…ເປ….

ສາວກສ຺ສ ຜເລ ຎາຓໍ ອຕ຺ຖີຕິ? ອາມນ຺ຕາ. ອຕ຺ຖິ ສາວກສ຺ສ ຜລປໂຣປຣິຍຕ຺ຕິ ອິນ຺ທ຺ຣິຍປໂຣປຣິຍຕ຺ຕິ ປຸຄ຺ຄລປໂຣປຣິຍຕ຺ຕີຕິ? ນ ເຫວໍ ວຕ຺ຕພ຺ເພ…ເປ….

ສາວກສ຺ສ ຜເລ ຎາຓໍ ອຕ຺ຖີຕິ? ອາມນ຺ຕາ. ອຕ຺ຖິ ສາວກສ຺ສ ຂນ຺ຘປຎ຺ຎຕ຺ຕິ ອາຍຕນປຎ຺ຎຕ຺ຕິ ຘາຕຸປຎ຺ຎຕ຺ຕິ ສຈ຺ຈປຎ຺ຎຕ຺ຕິ ອິນ຺ທ຺ຣິຍປຎ຺ຎຕ຺ຕິ ປຸຄ຺ຄລປຎ຺ຎຕ຺ຕີຕິ? ນ ເຫວໍ ວຕ຺ຕພ຺ເພ…ເປ….

ສາວກສ຺ສ ຜເລ ຎາຓໍ ອຕ຺ຖີຕິ? ອາມນ຺ຕາ. ສາວໂກ ຊິໂນ ສຕ຺ຖາ ສມ຺ມາສມ຺ພຸທ຺ໂຘ ສພ຺ພຎ຺ຎູ ສພ຺ພທສ຺ສາວີ ຘມ຺ມສ຺ສາມີ ຘມ຺ມປ຺ປຏິສຣໂຓຕິ? ນ ເຫວໍ ວຕ຺ຕພ຺ເພ…ເປ….

ສາວກສ຺ສ ຜເລ ຎາຓໍ ອຕ຺ຖີຕິ? ອາມນ຺ຕາ. ສາວໂກ ອນຸປ຺ປນ຺ນສ຺ສ ມຄ຺ຄສ຺ສ ອຸປ຺ປາເທຕາ ອສຎ຺ຊາຕສ຺ສ ມຄ຺ຄສ຺ສ ສຎ຺ຊເນຕາ ອນກ຺ຂາຕສ຺ສ ມຄ຺ຄສ຺ສ ອກ຺ຂາຕາ ມຄ຺ຄຎ຺ຎູ ມຄ຺ຄວິທູ ມຄ຺ຄໂກວິໂທຕິ? ນ ເຫວໍ ວຕ຺ຕພ຺ເພ…ເປ….

໔໔໔. ນ ວຕ຺ຕພ຺ພໍ – ‘‘ສາວກສ຺ສ ຜເລ ຎາຓໍ ອຕ຺ຖີ’’ຕິ? ອາມນ຺ຕາ. ສາວໂກ ອຎ຺ຎາຓີຕິ? ນ ເຫວໍ ວຕ຺ຕພ຺ເພ…ເປ… ເຕນ ຫິ ສາວກສ຺ສ ຜເລ ຎາຓໍ ອຕ຺ຖີຕິ…ເປ….

ຜລຎາຓກຖາ ນິຏ຺ຐິຕາ.

ປຎ຺ຈມວຄ຺ໂຄ.

ຕສ຺ສຸທ຺ທານໍ –

ວິມຸຕ຺ຕິຎາຓໍ ວິມຸຕ຺ຕໍ, ເສຂສ຺ສ ອເສຂໍ ຎາຓໍ, ວິປຣີເຕ ຎາຓໍ, ອນິຍຕສ຺ສ ນິຍາມຄມນາຍ ອຕ຺ຖິ ຎາຓໍ, ສພ຺ພໍ ຎາຓໍ ປຏິສມ຺ຠິທາຕິ, ສມ຺ມຸຕິຎາຓໍ, ເຈໂຕປຣິຍາເຍ ຎາຓໍ, ອນາຄເຕ ຎາຓໍ, ປຏຸປ຺ປນ຺ເນ ຎາຓໍ, ສາວກສ຺ສ ຜເລ ຎາຓນ຺ຕິ.

ມຫາປຓ຺ຓາສໂກ.

ຕສ຺ສາປິ ອຸທ຺ທານໍ –

ສຕ຺ຕຸປລທ຺ຘິໍ, ອຸປຫຣໂຕ, ພລໍ, ຄິຫິສ຺ສ ອຣຫາ ຈ, ວິມຸຕ຺ຕິປຎ຺ຈມນ຺ຕິ.