໔. ຈຕຸຕ຺ຖວຄ຺ໂຄ

(໔໑) ໙. ອປຣາປິ ສມນ຺ນາຄຕກຖາ

໔໐໖. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຕີຫິ ຜເລຫິ ສມນ຺ນາຄໂຕຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຈຕູຫິ ຜສ຺ເສຫິ ຈຕູຫິ ເວທນາຫິ ຈຕູຫິ ສຎ຺ຎາຫິ ຈຕູຫິ ເຈຕນາຫິ ຈຕູຫິ ຈິຕ຺ເຕຫິ ຈຕູຫິ ສທ຺ຘາຫິ ຈຕູຫິ ວີຣິເຍຫິ ຈຕູຫິ ສຕີຫິ ຈຕູຫິ ສມາຘີຫິ ຈຕູຫິ ປຎ຺ຎາຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທ຺ວີຫິ ຜເລຫິ ສມນ຺ນາຄໂຕຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຕີຫິ ຜສ຺ເສຫິ ຕີຫິ ເວທນາຫິ…ເປ… ຕີຫິ ປຎ຺ຎາຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທ຺ວີຫິ ຜສ຺ເສຫິ ທ຺ວີຫິ ເວທນາຫິ…ເປ… ທ຺ວີຫິ ປຎ຺ຎາຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປນ຺ໂນ ສຕ຺ຕກ຺ຂຕ຺ຕຸປຣໂມ, ໂກລງ຺ໂກໂລ, ເອກພີຊີຕິ? ນ ເຫວໍ ວຕ຺ຕພ຺ເພ…ເປ….

ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມີຕິ? ນ ເຫວໍ ວຕ຺ຕພ຺ເພ…ເປ….

ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມິຜເລນ ສມນ຺ນາຄໂຕຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມີ ອນ຺ຕຣາປຣິນິພ຺ພາຍີ, ອຸປຫຈ຺ຈປຣິນິພ຺ພາຍີ, ອສງ຺ຂາຣປຣິນິພ຺ພາຍີ, ສສງ຺ຂາຣປຣິນິພ຺ພາຍີ, ອຸທ຺ຘໍໂສໂຕ ອກນິຏ຺ຐຄາມີຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປນ຺ໂນ ສຕ຺ຕກ຺ຂຕ຺ຕຸປຣໂມ, ໂກລງ຺ໂກໂລ, ເອກພີຊີຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມີຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປນ຺ໂນ ສຕ຺ຕກ຺ຂຕ຺ຕຸປຣໂມ, ໂກລງ຺ໂກໂລ, ເອກພີຊີຕິ? ນ ເຫວໍ ວຕ຺ຕພ຺ເພ…ເປ….

໔໐໗. ໂສຕາປຕ຺ຕິຜເລນ ສມນ຺ນາຄໂຕ ໂສຕາປນ຺ໂນຕິ ວຕ຺ຕພ຺ໂພຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ, ໂສ ໂສຕາປນ຺ໂນຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິຜເລນ ສມນ຺ນາຄໂຕ ສກທາຄາມີຕິ ວຕ຺ຕພ຺ໂພຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ, ໂສ ສກທາຄາມີຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິຜເລນ ສມນ຺ນາຄໂຕ ອນາຄາມີຕິ ວຕ຺ຕພ຺ໂພຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ, ໂສ ອນາຄາມີຕິ? ນ ເຫວໍ ວຕ຺ຕພ຺ເພ…ເປ….

ໂສຕາປຕ຺ຕິຜເລນ ສມນ຺ນາຄໂຕ ໂສຕາປນ຺ໂນຕິ ວຕ຺ຕພ຺ໂພຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ, ໂສ ໂສຕາປນ຺ໂນຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິຜເລນ ສມນ຺ນາຄໂຕ ສກທາຄາມີຕິ ວຕ຺ຕພ຺ໂພຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ, ໂສ ສກທາຄາມີຕິ? ນ ເຫວໍ ວຕ຺ຕພ຺ເພ…ເປ….

ໂສຕາປຕ຺ຕິຜເລນ ສມນ຺ນາຄໂຕ ໂສຕາປນ຺ໂນຕິ ວຕ຺ຕພ຺ໂພຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ, ໂສ ໂສຕາປນ຺ໂນຕິ? ນ ເຫວໍ ວຕ຺ຕພ຺ເພ…ເປ….

໔໐໘. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕ’’ຕິ.

ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິມຄ຺ຄໍ ວີຕິວຕ຺ໂຕ, ສກ຺ກາຍທິຏ຺ຐິໍ ວິຈິກິຈ຺ຉໍ ສີລພ຺ພຕປຣາມາສໍ ອປາຍຄມນີຍໍ ຣາຄໍ ອປາຍຄມນີຍໍ ໂທສໍ ອປາຍຄມນີຍໍ ໂມຫໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜເລນ ສມນ຺ນາຄໂຕ’’ຕິ.

ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜລໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິມຄ຺ຄໍ ວີຕິວຕ຺ໂຕ, ໂອຬາຣິກໍ ກາມຣາຄໍ ໂອຬາຣິກໍ ພ຺ຍາປາທໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມິຜເລນ ສມນ຺ນາຄໂຕ’’ຕິ.

ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມິຜລໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ອນາຄາມິມຄ຺ຄໍ ວີຕິວຕ຺ໂຕ, ອຓຸສຫຄຕໍ ກາມຣາຄໍ ອຓຸສຫຄຕໍ ພ຺ຍາປາທໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

໔໐໙. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕ’’ຕິ.

ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິມຄ຺ຄໍ ວີຕິວຕ຺ໂຕ, ສກ຺ກາຍທິຏ຺ຐິໍ…ເປ… ອປາຍຄມນີຍໍ ໂມຫໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜເລນ ສມນ຺ນາຄໂຕ’’ຕິ.

ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິຜລໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ສກທາຄາມິມຄ຺ຄໍ ວີຕິວຕ຺ໂຕ, ໂອຬາຣິກໍ ກາມຣາຄໍ ໂອຬາຣິກໍ ພ຺ຍາປາທໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

໔໑໐. ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ນນຸ ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕ’’ຕິ.

ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜລໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິມຄ຺ຄໍ ວີຕິວຕ຺ໂຕ, ສກ຺ກາຍທິຏ຺ຐິໍ…ເປ… ອປາຍຄມນີຍໍ ໂມຫໍ ວີຕິວຕ຺ໂຕ, ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

໔໑໑. ນ ວຕ຺ຕພ຺ພໍ – ‘‘ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຕີຫິ ຜເລຫິ ສມນ຺ນາຄໂຕ’’ຕິ? ອາມນ຺ຕາ. ນນຸ ອຣຫຕ຺ຕສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ຕີຓິ ຜລານິ ປຏິລທ຺ຘານິ, ເຕຫິ ຈ ອປຣິຫີໂນຕິ? ອາມນ຺ຕາ. ຫຎ຺ຈິ ອຣຫຕ຺ຕສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ຕີຓິ ຜລານິ ປຏິລທ຺ຘານິ ເຕຫິ ຈ ອປຣິຫີໂນ, ເຕນ ວຕ ເຣ ວຕ຺ຕພ຺ເພ – ‘‘ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຕີຫິ ຜເລຫິ ສມນ຺ນາຄໂຕ’’ຕິ.

ນ ວຕ຺ຕພ຺ພໍ – ‘‘ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທ຺ວີຫິ ຜເລຫິ ສມນ຺ນາຄໂຕ’’ຕິ? ອາມນ຺ຕາ. ນນຸ ອນາຄາມິຜລສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ທ຺ເວ ຜລານິ ປຏິລທ຺ຘານິ, ເຕຫິ ຈ ອປຣິຫີໂນຕິ? ອາມນ຺ຕາ. ຫຎ຺ຈິ ອນາຄາມິຜລສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ທ຺ເວ ຜລານິ ປຏິລທ຺ຘານິ ເຕຫິ ຈ ອປຣິຫີໂນ, ເຕນ ວຕ ເຣ ວຕ຺ຕພ຺ເພ – ‘‘ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທ຺ວີຫິ ຜເລຫິ ສມນ຺ນາຄໂຕ’’ຕິ.

ນ ວຕ຺ຕພ຺ພໍ – ‘‘ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕ’’ຕິ? ອາມນ຺ຕາ. ນນຸ ສກທາຄາມິຜລສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ໂສຕາປຕ຺ຕິຜລໍ ປຏິລທ຺ຘໍ, ເຕນ ຈ ອປຣິຫີໂນຕິ? ອາມນ຺ຕາ. ຫຎ຺ຈິ ສກທາຄາມິຜລສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ໂສຕາປຕ຺ຕິຜລໍ ປຏິລທ຺ຘໍ ເຕນ ຈ ອປຣິຫີໂນ, ເຕນ ວຕ ເຣ ວຕ຺ຕພ຺ເພ – ‘‘ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕ’’ຕິ.

໔໑໒. ອຣຫຕ຺ຕສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ຕີຓິ ຜລານິ ປຏິລທ຺ຘານິ ເຕຫິ ຈ ອປຣິຫີໂນຕິ, ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຕີຫິ ຜເລຫິ ສມນ຺ນາຄໂຕຕິ? ອາມນ຺ຕາ. ອຣຫຕ຺ຕສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ຈຕ຺ຕາໂຣ ມຄ຺ຄາ ປຏິລທ຺ຘາ ເຕຫິ ຈ ອປຣິຫີໂນຕິ, ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຈຕູຫິ ມຄ຺ເຄຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິຜລສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ທ຺ເວ ຜລານິ ປຏິລທ຺ຘານິ ເຕຫິ ຈ ອປຣິຫີໂນຕິ, ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທ຺ວີຫິ ຜເລຫິ ສມນ຺ນາຄໂຕຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ຕໂຍ ມຄ຺ຄາ ປຏິລທ຺ຘາ ເຕຫິ ຈ ອປຣິຫີໂນຕິ, ອນາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ຕີຫິ ມຄ຺ເຄຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິຜລສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ໂສຕາປຕ຺ຕິຜລໍ ປຏິລທ຺ຘໍ ເຕນ ຈ ອປຣິຫີໂນຕິ, ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ເນນ ປຸຄ຺ຄເລນ ທ຺ເວ ມຄ຺ຄາ ປຏິລທ຺ຘາ ເຕຫິ ຈ ອປຣິຫີໂນຕິ, ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ປຸຄ຺ຄໂລ ທ຺ວີຫິ ມຄ຺ເຄຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອປຣາປິ ສມນ຺ນາຄຕກຖາ ນິຏ຺ຐິຕາ.