໔. ຈຕຸຕ຺ຖວຄ຺ໂຄ

(໓໙) ໗. ລກ຺ຂຓກຖາ

໔໐໐. ລກ຺ຂຓສມນ຺ນາຄໂຕ ໂພຘິສຕ຺ໂຕຕິ? ອາມນ຺ຕາ. ປເທສລກ຺ຂເຓຫິ ສມນ຺ນາຄໂຕ ປເທສໂພຘິສຕ຺ໂຕຕິ? ນ ເຫວໍ ວຕ຺ຕພ຺ເພ…ເປ….

ລກ຺ຂຓສມນ຺ນາຄໂຕ ໂພຘິສຕ຺ໂຕຕິ? ອາມນ຺ຕາ. ຕິຠາຄລກ຺ຂເຓຫິ ສມນ຺ນາຄໂຕ ຕິຠາຄໂພຘິສຕ຺ໂຕຕິ? ນ ເຫວໍ ວຕ຺ຕພ຺ເພ…ເປ….

ລກ຺ຂຓສມນ຺ນາຄໂຕ ໂພຘິສຕ຺ໂຕຕິ? ອາມນ຺ຕາ. ອຸປຑ຺ຒລກ຺ຂເຓຫິ ສມນ຺ນາຄໂຕ ອຸປຑ຺ຒໂພຘິສຕ຺ໂຕຕິ? ນ ເຫວໍ ວຕ຺ຕພ຺ເພ…ເປ….

ລກ຺ຂຓສມນ຺ນາຄໂຕ ໂພຘິສຕ຺ໂຕຕິ? ອາມນ຺ຕາ. ຈກ຺ກວຕ຺ຕິສຕ຺ໂຕ ລກ຺ຂຓສມນ຺ນາຄໂຕ, ຈກ຺ກວຕ຺ຕິສຕ຺ໂຕ ໂພຘິສຕ຺ໂຕຕິ? ນ ເຫວໍ ວຕ຺ຕພ຺ເພ…ເປ….

ຈກ຺ກວຕ຺ຕິສຕ຺ໂຕ ລກ຺ຂຓສມນ຺ນາຄໂຕ, ຈກ຺ກວຕ຺ຕິສຕ຺ໂຕ ໂພຘິສຕ຺ໂຕຕິ? ອາມນ຺ຕາ. ຍາທິໂສ ໂພຘິສຕ຺ຕສ຺ສ ປຸພ຺ພໂຍໂຄ ປຸພ຺ພຈຣິຍາ ຘມ຺ມກ຺ຂານໍ ຘມ຺ມເທສນາ, ຕາທິໂສ ຈກ຺ກວຕ຺ຕິສຕ຺ຕສ຺ສ ປຸພ຺ພໂຍໂຄ ປຸພ຺ພຈຣິຍາ ຘມ຺ມກ຺ຂານໍ ຘມ຺ມເທສນາຕິ? ນ ເຫວໍ ວຕ຺ຕພ຺ເພ…ເປ….

໔໐໑. ຍຖາ ໂພຘິສຕ຺ຕສ຺ສ ຊາຍມານສ຺ສ ເທວາ ປຐມໍ ປຏິຄ຺ຄຓ຺ຫນ຺ຕິ ປຈ຺ຉາ ມນຸສ຺ສາ [ທີ. ນິ. ໒.໒໗; ມ. ນິ. ໓.໒໐໕ ວຸຕ຺ຕໍ ທິສ຺ສາຍ ປຸຈ຺ຉຕິ], ເອວເມວໍ ຈກ຺ກວຕ຺ຕິສຕ຺ຕສ຺ສ ຊາຍມານສ຺ສ ເທວາ ປຐມໍ ປຏິຄ຺ຄຓ຺ຫນ຺ຕິ ປຈ຺ຉາ ມນຸສ຺ສາຕິ? ນ ເຫວໍ ວຕ຺ຕພ຺ເພ…ເປ….

ຍຖາ ໂພຘິສຕ຺ຕສ຺ສ ຊາຍມານສ຺ສ ຈຕ຺ຕາໂຣ ນໍ ເທວປຸຕ຺ຕາ ປຏິຄ຺ຄເຫຕ຺ວາ ມາຕຸ ປຸຣໂຕ ຐເປນ຺ຕິ – ‘‘ອຕ຺ຕມນາ, ເທວິ, ໂຫຫິ! ມເຫສກ຺ໂຂ ເຕ ປຸຕ຺ໂຕ ອຸປ຺ປນ຺ໂນ’’ຕິ, ເອວເມວໍ ຈກ຺ກວຕ຺ຕິສຕ຺ຕສ຺ສ ຊາຍມານສ຺ສ ຈຕ຺ຕາໂຣ ນໍ ເທວປຸຕ຺ຕາ ປຏິຄ຺ຄເຫຕ຺ວາ ມາຕຸ ປຸຣໂຕ ຐເປນ຺ຕິ – ‘‘ອຕ຺ຕມນາ, ເທວິ, ໂຫຫິ! ມເຫສກ຺ໂຂ ເຕ ປຸຕ຺ໂຕ ອຸປ຺ປນ຺ໂນ’’ຕິ? ນ ເຫວໍ ວຕ຺ຕພ຺ເພ…ເປ….

ຍຖາ ໂພຘິສຕ຺ຕສ຺ສ ຊາຍມານສ຺ສ ທ຺ເວ ອຸທກສ຺ສ ຘາຣາ ອນ຺ຕລິກ຺ຂາ ປາຕຸຠວນ຺ຕິ – ເອກາ ສີຕສ຺ສ, ເອກາ ອຸຓ຺ຫສ຺ສ – ເຍນ ໂພຘິສຕ຺ຕສ຺ສ ອຸທກກິຈ຺ຈໍ ກໂຣນ຺ຕິ ມາຕຸ ຈ, ເອວເມວໍ ຈກ຺ກວຕ຺ຕິສຕ຺ຕສ຺ສ ຊາຍມານສ຺ສ ທ຺ເວ ອຸທກສ຺ສ ຘາຣາ ອນ຺ຕລິກ຺ຂາ ປາຕຸຠວນ຺ຕິ – ເອກາ ສີຕສ຺ສ, ເອກາ ອຸຓ຺ຫສ຺ສ – ເຍນ ຈກ຺ກວຕ຺ຕິສຕ຺ຕສ຺ສ ອຸທກກິຈ຺ຈໍ ກໂຣນ຺ຕິ ມາຕຸ ຈາຕິ? ນ ເຫວໍ ວຕ຺ຕພ຺ເພ…ເປ….

ຍຖາ ສມ຺ປຕິຊາໂຕ ໂພຘິສຕ຺ໂຕ ສເມຫິ ປາເທຫິ ປຕິຏ຺ຐຫິຕ຺ວາ ອຸຕ຺ຕເຣນ ອຠິມຸໂຂ ສຕ຺ຕປທວີຕິຫາເຣນ ຄຈ຺ຉຕິ ເສຕມ຺ຫິ ຉຕ຺ເຕ ອນຸຘາຣິຍມາເນ, ສພ຺ພາ ຈ ທິສາ ວິໂລເກຕິ, ອາສຠິຎ຺ຈ ວາຈໍ ຠາສຕິ – ‘‘ອຄ຺ໂຄຫມສ຺ມິ ໂລກສ຺ສ, ເຊຏ຺ໂຐຫມສ຺ມິ ໂລກສ຺ສ, ເສຏ຺ໂຐຫມສ຺ມິ ໂລກສ຺ສ, ອຍມນ຺ຕິມາ ຊາຕິ, ນຕ຺ຖິ ທານິ ປຸນພ຺ຠໂວ’’ຕິ, ເອວເມວໍ ສມ຺ປຕິຊາໂຕ ຈກ຺ກວຕ຺ຕິສຕ຺ໂຕ ສເມຫິ ປາເທຫິ ປຕິຏ຺ຐຫິຕ຺ວາ ອຸຕ຺ຕເຣນ ອຠິມຸໂຂ ສຕ຺ຕປທວີຕິຫາເຣນ ຄຈ຺ຉຕິ ເສຕມ຺ຫິ ຉຕ຺ເຕ ອນຸຘາຣິຍມາເນ, ສພ຺ພາ ຈ ທິສາ ວິໂລເກຕິ, ອາສຠິຎ຺ຈ ວາຈໍ ຠາສຕິ – ‘‘ອຄ຺ໂຄຫມສ຺ມິ ໂລກສ຺ສ, ເຊຏ຺ໂຐຫມສ຺ມິ ໂລກສ຺ສ, ເສຏ຺ໂຐຫມສ຺ມິ ໂລກສ຺ສ, ອຍມນ຺ຕິມາ ຊາຕິ, ນຕ຺ຖິ ທານິ ປຸນພ຺ຠໂວ’’ຕິ? ນ ເຫວໍ ວຕ຺ຕພ຺ເພ…ເປ….

ຍຖາ ໂພຘິສຕ຺ຕສ຺ສ ຊາຍມານສ຺ສ ມຫໂຕ ອາໂລກສ຺ສ ມຫໂຕ ໂອຠາສສ຺ສ ມຫໂຕ ຠູມິຈາລສ຺ສ ປາຕຸຠາໂວ ໂຫຕິ, ເອວເມວໍ ຈກ຺ກວຕ຺ຕິສຕ຺ຕສ຺ສ ຊາຍມານສ຺ສ ມຫໂຕ ອາໂລກສ຺ສ ມຫໂຕ ໂອຠາສສ຺ສ ມຫໂຕ ຠູມິຈາລສ຺ສ ປາຕຸຠາໂວ ໂຫຕີຕິ? ນ ເຫວໍ ວຕ຺ຕພ຺ເພ…ເປ….

ຍຖາ ໂພຘິສຕ຺ຕສ຺ສ ປກຕິກາໂຍ ສມນ຺ຕາ ພ຺ຍາມໍ ໂອຠາສຕິ, ເອວເມວໍ ຈກ຺ກວຕ຺ຕິສຕ຺ຕສ຺ສ ປກຕິກາໂຍ ສມນ຺ຕາ ພ຺ຍາມໍ ໂອຠາສຕີຕິ? ນ ເຫວໍ ວຕ຺ຕພ຺ເພ…ເປ….

ຍຖາ ໂພຘິສຕ຺ໂຕ ມຫາສຸປິນໍ ປສ຺ສຕິ, ເອວເມວໍ ຈກ຺ກວຕ຺ຕິສຕ຺ໂຕ ມຫາສຸປິນໍ ປສ຺ສຕີຕິ? ນ ເຫວໍ ວຕ຺ຕພ຺ເພ…ເປ….

໔໐໒. ນ ວຕ຺ຕພ຺ພໍ – ‘‘ລກ຺ຂຓສມນ຺ນາຄໂຕ ໂພຘິສຕ຺ໂຕ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ທ຺ວຕ຺ຕິໍສິມານິ, ຠິກ຺ຂເວ, ມຫາປຸຣິສສ຺ສ ມຫາປຸຣິສລກ຺ຂຓານິ, ເຍຫິ ສມນ຺ນາຄຕສ຺ສ ມຫາປຸຣິສສ຺ສ ທ຺ເວວ ຄຕິໂຍ ຠວນ຺ຕິ ອນຎ຺ຎາ [ນ ອຎ຺ຎາ (ກ.)]! ສເຈ ອຄາຣໍ ອຊ຺ຌາວສຕິ, ຣາຊາ ໂຫຕິ ຈກ຺ກວຕ຺ຕີ ຘມ຺ມິໂກ ຘມ຺ມຣາຊາ ຈາຕຸຣນ຺ໂຕ ວິຊິຕາວີ ຊນປທຕ຺ຖາວຣິຍປ຺ປຕ຺ໂຕ ສຕ຺ຕຣຕນສມນ຺ນາຄໂຕ. ຕສ຺ສິມານິ ສຕ຺ຕ ຣຕນານິ ຠວນ຺ຕິ, ເສຍ຺ຍຖິທໍ – ຈກ຺ກຣຕນໍ, ຫຕ຺ຖິຣຕນໍ, ອສ຺ສຣຕນໍ, ມຓິຣຕນໍ, ອິຕ຺ຖິຣຕນໍ, ຄຫປຕິຣຕນໍ, ປຣິຓາຍກຣຕນເມວ ສຕ຺ຕມໍ. ປໂຣສຫສ຺ສໍ ໂຂ ປນສ຺ສ ປຸຕ຺ຕາ ຠວນ຺ຕິ ສູຣາ ວີຣງ຺ຄຣູປາ ປຣເສນປ຺ປມທ຺ທນາ. ໂສ ອິມໍ ປຖວິໍ ສາຄຣປຣິຍນ຺ຕໍ ອທຓ຺ເຑນ ອສຕ຺ເຖນ ຘມ຺ເມນ ອຠິວິຊິຍ ອຊ຺ຌາວສຕິ. ສເຈ ໂຂ ປນ ອຄາຣສ຺ມາ ອນຄາຣິຍໍ ປພ຺ພຊຕິ, ອຣຫໍ ໂຫຕິ ສມ຺ມາສມ຺ພຸທ຺ໂຘ ໂລເກ ວິວຏ຺ຏຈ຺ຉໂທ’’ຕິ [ທີ. ນິ. ໓.໒໐໐]. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ລກ຺ຂຓສມນ຺ນາຄໂຕ ໂພຘິສຕ຺ໂຕຕິ.

ລກ຺ຂຓກຖາ ນິຏ຺ຐິຕາ.