(໓໖) ໔. ສມນ຺ນາຄຕກຖາ

໓໙໓. ອຣຫາ ຈຕູຫິ ຜເລຫິ ສມນ຺ນາຄໂຕຕິ? ອາມນ຺ຕາ. ອຣຫາ ຈຕູຫິ ຜສ຺ເສຫິ ຈຕູຫິ ເວທນາຫິ ຈຕູຫິ ສຎ຺ຎາຫິ ຈຕູຫິ ເຈຕນາຫິ ຈຕູຫິ ຈິຕ຺ເຕຫິ ຈຕູຫິ ສທ຺ຘາຫິ ຈຕູຫິ ວີຣິເຍຫິ ຈຕູຫິ ສຕີຫິ ຈຕູຫິ ສມາຘີຫິ ຈຕູຫິ ປຎ຺ຎາຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອນາຄາມີ ຕີຫິ ຜເລຫິ ສມນ຺ນາຄໂຕຕິ? ອາມນ຺ຕາ. ອນາຄາມີ ຕີຫິ ຜສ຺ເສຫິ…ເປ… ຕີຫິ ປຎ຺ຎາຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມີ ທ຺ວີຫິ ຜເລຫິ ສມນ຺ນາຄໂຕຕິ? ອາມນ຺ຕາ. ສກທາຄາມີ ທ຺ວີຫິ ຜສ຺ເສຫິ…ເປ… ທ຺ວີຫິ ປຎ຺ຎາຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອຣຫາ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ອຣຫາ ໂສຕາປນ຺ໂນ ສຕ຺ຕກ຺ຂຕ຺ຕຸປຣໂມ, ໂກລງ຺ໂກໂລ, ເອກພີຊີຕິ? ນ ເຫວໍ ວຕ຺ຕພ຺ເພ…ເປ… ອຣຫາ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ອຣຫາ ສກທາຄາມີຕິ? ນ ເຫວໍ ວຕ຺ຕພ຺ເພ …ເປ… ອຣຫາ ອນາຄາມິຜເລນ ສມນ຺ນາຄໂຕຕິ? ອາມນ຺ຕາ. ອຣຫາ ອນາຄາມີ, ອນ຺ຕຣາປຣິນິພ຺ພາຍີ, ອຸປຫຈ຺ຈປຣິນິພ຺ພາຍີ, ອສງ຺ຂາຣປຣິນິພ຺ພາຍີ, ສສງ຺ຂາຣປຣິນິພ຺ພາຍີ, ອຸທ຺ຘໍໂສໂຕ ອກນິຏ຺ຐຄາມີຕິ? ນ ເຫວໍ ວຕ຺ຕພ຺ເພ…ເປ….

ອນາຄາມີ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ອນາຄາມີ ໂສຕາປນ຺ໂນ ສຕ຺ຕກ຺ຂຕ຺ຕຸປຣໂມ, ໂກລງ຺ໂກໂລ, ເອກພີຊີຕິ? ນ ເຫວໍ ວຕ຺ຕພ຺ເພ …ເປ… ອນາຄາມີ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ອນາຄາມີ ສກທາຄາມີຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມີ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສກທາຄາມີ ໂສຕາປນ຺ໂນ ສຕ຺ຕກ຺ຂຕ຺ຕຸປຣໂມ, ໂກລງ຺ໂກໂລ, ເອກພີຊີຕິ? ນ ເຫວໍ ວຕ຺ຕພ຺ເພ…ເປ….

໓໙໔. ໂສຕາປຕ຺ຕິຜເລນ ສມນ຺ນາຄໂຕ ‘‘ໂສຕາປນ຺ໂນ’’ຕິ ວຕ຺ຕພ຺ໂພຕິ? ອາມນ຺ຕາ. ອຣຫາ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອຣຫາ, ໂສ ໂສຕາປນ຺ໂນຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິຜເລນ ສມນ຺ນາຄໂຕ ‘‘ສກທາຄາມີ’’ຕິ ວຕ຺ຕພ຺ໂພຕິ? ອາມນ຺ຕາ. ອຣຫາ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອຣຫາ, ໂສ ສກທາຄາມີຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິຜເລນ ສມນ຺ນາຄໂຕ ‘‘ອນາຄາມີ’’ຕິ ວຕ຺ຕພ຺ໂພຕິ? ອາມນ຺ຕາ. ອຣຫາ ອນາຄາມິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອຣຫາ, ໂສ ອນາຄາມີຕິ? ນ ເຫວໍ ວຕ຺ຕພ຺ເພ…ເປ….

ໂສຕາປຕ຺ຕິຜເລນ ສມນ຺ນາຄໂຕ ‘‘ໂສຕາປນ຺ໂນ’’ຕິ ວຕ຺ຕພ຺ໂພຕິ? ອາມນ຺ຕາ. ອນາຄາມີ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອນາຄາມີ, ໂສ ໂສຕາປນ຺ໂນຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິຜເລນ ສມນ຺ນາຄໂຕ ‘‘ສກທາຄາມີ’’ຕິ ວຕ຺ຕພ຺ໂພຕິ? ອາມນ຺ຕາ. ອນາຄາມີ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ອນາຄາມີ, ໂສ ສກທາຄາມີຕິ? ນ ເຫວໍ ວຕ຺ຕພ຺ເພ…ເປ….

ໂສຕາປຕ຺ຕິຜເລນ ສມນ຺ນາຄໂຕ ‘‘ໂສຕາປນ຺ໂນ’’ຕິ ວຕ຺ຕພ຺ໂພຕິ? ອາມນ຺ຕາ. ສກທາຄາມີ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ສ຺ເວວ ສກທາຄາມີ, ໂສ ໂສຕາປນ຺ໂນຕິ? ນ ເຫວໍ ວຕ຺ຕພ຺ເພ…ເປ….

໓໙໕. ອຣຫາ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອຣຫາ ໂສຕາປຕ຺ຕິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອຣຫາ ໂສຕາປຕ຺ຕິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫາ ໂສຕາປຕ຺ຕິຜເລນ ສມນ຺ນາຄໂຕ’’ຕິ.

ອຣຫາ ໂສຕາປຕ຺ຕິຜລໍ ວີຕິວຕ຺ໂຕ ເຕນ ສມນ຺ນາຄໂຕຕິ? ອາມນ຺ຕາ. ອຣຫາ ໂສຕາປຕ຺ຕິມຄ຺ຄໍ ວີຕິວຕ຺ໂຕ, ສກ຺ກາຍທິຏ຺ຐິໍ ວິຈິກິຈ຺ຉໍ ສີລພ຺ພຕປຣາມາສໍ, ອປາຍຄມນີຍໍ ຣາຄໍ, ອປາຍຄມນີຍໍ ໂທສໍ, ອປາຍຄມນີຍໍ ໂມຫໍ ວີຕິວຕ຺ໂຕ ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອຣຫາ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອຣຫາ ສກທາຄາມິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອຣຫາ ສກທາຄາມິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫາ ສກທາຄາມິຜເລນ ສມນ຺ນາຄໂຕ’’ຕິ.

ອຣຫາ ສກທາຄາມິຜລໍ ວີຕິວຕ຺ໂຕ ເຕນ ສມນ຺ນາຄໂຕຕິ? ອາມນ຺ຕາ. ອຣຫາ ສກທາຄາມິມຄ຺ຄໍ ວີຕິວຕ຺ໂຕ, ໂອຬາຣິກໍ ກາມຣາຄໍ, ໂອຬາຣິກໍ ພ຺ຍາປາທໍ ວີຕິວຕ຺ໂຕ ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອຣຫາ ອນາຄາມິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອຣຫາ ອນາຄາມິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອຣຫາ ອນາຄາມິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອຣຫາ ອນາຄາມິຜເລນ ສມນ຺ນາຄໂຕ’’ຕິ.

ອຣຫາ ອນາຄາມິຜລໍ ວີຕິວຕ຺ໂຕ ເຕນ ສມນ຺ນາຄໂຕຕິ? ອາມນ຺ຕາ. ອຣຫາ ອນາຄາມິມຄ຺ຄໍ ວີຕິວຕ຺ໂຕ, ອຓຸສຫຄຕໍ ກາມຣາຄໍ, ອຓຸສຫຄຕໍ ພ຺ຍາປາທໍ ວີຕິວຕ຺ໂຕ ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອນາຄາມີ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອນາຄາມີ ໂສຕາປຕ຺ຕິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອນາຄາມີ ໂສຕາປຕ຺ຕິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອນາຄາມີ ໂສຕາປຕ຺ຕິຜເລນ ສມນ຺ນາຄໂຕ’’ຕິ.

ອນາຄາມີ ໂສຕາປຕ຺ຕິຜລໍ ວີຕິວຕ຺ໂຕ ເຕນ ສມນ຺ນາຄໂຕຕິ? ອາມນ຺ຕາ. ອນາຄາມີ ໂສຕາປຕ຺ຕິມຄ຺ຄໍ ວີຕິວຕ຺ໂຕ, ສກ຺ກາຍທິຏ຺ຐິໍ…ເປ… ອປາຍຄມນີຍໍ ໂມຫໍ ວີຕິວຕ຺ໂຕ ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອນາຄາມີ ສກທາຄາມິຜເລນ ສມນ຺ນາຄໂຕຕິ? ອາມນ຺ຕາ. ນນຸ ອນາຄາມີ ສກທາຄາມິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ອນາຄາມີ ສກທາຄາມິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ອນາຄາມີ ສກທາຄາມິຜເລນ ສມນ຺ນາຄໂຕ’’ຕິ.

ອນາຄາມີ ສກທາຄາມິຜລໍ ວີຕິວຕ຺ໂຕ ເຕນ ສມນ຺ນາຄໂຕຕິ? ອາມນ຺ຕາ. ອນາຄາມີ ສກທາຄາມິມຄ຺ຄໍ ວີຕິວຕ຺ໂຕ, ໂອຬາຣິກໍ ກາມຣາຄໍ, ໂອຬາຣິກໍ ພ຺ຍາປາທໍ ວີຕິວຕ຺ໂຕ ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມີ ໂສຕາປຕ຺ຕິຜເລນ ສມນ຺ນາຄໂຕຕິ? ອາມນ຺ຕາ. ນນຸ ສກທາຄາມີ ໂສຕາປຕ຺ຕິຜລໍ ວີຕິວຕ຺ໂຕຕິ? ອາມນ຺ຕາ. ຫຎ຺ຈິ ສກທາຄາມີ ໂສຕາປຕ຺ຕິຜລໍ ວີຕິວຕ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ສກທາຄາມີ ໂສຕາປຕ຺ຕິຜເລນ ສມນ຺ນາຄໂຕ’’ຕິ.

ສກທາຄາມີ ໂສຕາປຕ຺ຕິຜລໍ ວີຕິວຕ຺ໂຕ ເຕນ ສມນ຺ນາຄໂຕຕິ? ອາມນ຺ຕາ. ສກທາຄາມີ ໂສຕາປຕ຺ຕິມຄ຺ຄໍ ວີຕິວຕ຺ໂຕ, ສກ຺ກາຍທິຏ຺ຐິໍ…ເປ… ອປາຍຄມນີຍໍ ໂມຫໍ ວີຕິວຕ຺ໂຕ ເຕນ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

໓໙໖. ນ ວຕ຺ຕພ຺ພໍ – ‘‘ອຣຫາ ຈຕູຫິ ຜເລຫິ ສມນ຺ນາຄໂຕ’’ຕິ? ອາມນ຺ຕາ. ນນຸ ອຣຫຕາ ຈຕ຺ຕາຣິ ຜລານິ ປຏິລທ຺ຘານິ, ເຕຫິ ຈ ອປຣິຫີໂນຕິ? ອາມນ຺ຕາ. ຫຎ຺ຈິ ອຣຫຕາ ຈຕ຺ຕາຣິ ຜລານິ ປຏິລທ຺ຘານິ ເຕຫິ ຈ ອປຣິຫີໂນ, ເຕນ ວຕ ເຣ ວຕ຺ຕພ຺ເພ – ‘‘ອຣຫາ ຈຕູຫິ ຜເລຫິ ສມນ຺ນາຄໂຕ’’ຕິ.

ນ ວຕ຺ຕພ຺ພໍ – ‘‘ອນາຄາມີ ຕີຫິ ຜເລຫິ ສມນ຺ນາຄໂຕ’’ຕິ? ອາມນ຺ຕາ. ນນຸ ອນາຄາມິນາ ຕີຓິ ຜລານິ ປຏິລທ຺ຘານິ, ເຕຫິ ຈ ອປຣິຫີໂນຕິ? ອາມນ຺ຕາ. ຫຎ຺ຈິ ອນາຄາມິນາ ຕີຓິ ຜລານິ ປຏິລທ຺ຘານິ ເຕຫິ ຈ ອປຣິຫີໂນ, ເຕນ ວຕ ເຣ ວຕ຺ຕພ຺ເພ – ‘‘ອນາຄາມີ ຕີຫິ ຜເລຫິ ສມນ຺ນາຄໂຕ’’ຕິ.

ນ ວຕ຺ຕພ຺ພໍ – ‘‘ສກທາຄາມີ ທ຺ວີຫິ ຜເລຫິ ສມນ຺ນາຄໂຕ’’ຕິ? ອາມນ຺ຕາ. ນນຸ ສກທາຄາມິນາ ທ຺ເວ ຜລານິ ປຏິລທ຺ຘານິ, ເຕຫິ ຈ ອປຣິຫີໂນຕິ? ອາມນ຺ຕາ. ຫຎ຺ຈິ ສກທາຄາມິນາ ທ຺ເວ ຜລານິ ປຏິລທ຺ຘານິ ເຕຫິ ຈ ອປຣິຫີໂນ, ເຕນ ວຕ ເຣ ວຕ຺ຕພ຺ເພ – ‘‘ສກທາຄາມີ ທ຺ວີຫິ ຜເລຫິ ສມນ຺ນາຄໂຕ’’ຕິ.

ອຣຫຕາ ຈຕ຺ຕາຣິ ຜລານິ ປຏິລທ຺ຘານິ ເຕຫິ ຈ ອປຣິຫີໂນຕິ, ອຣຫາ ຈຕູຫິ ຜເລຫິ ສມນ຺ນາຄໂຕຕິ? ອາມນ຺ຕາ. ອຣຫຕາ ຈຕ຺ຕາໂຣ ມຄ຺ຄາ ປຏິລທ຺ຘາ ເຕຫິ ຈ ອປຣິຫີໂນຕິ, ອຣຫາ ຈຕູຫິ ມຄ຺ເຄຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິນາ ຕີຓິ ຜລານິ ປຏິລທ຺ຘານິ ເຕຫິ ຈ ອປຣິຫີໂນຕິ, ອນາຄາມີ ຕີຫິ ຜເລຫິ ສມນ຺ນາຄໂຕຕິ? ອາມນ຺ຕາ. ອນາຄາມິນາ ຕໂຍ ມຄ຺ຄາ ປຏິລທ຺ຘາ ເຕຫິ ຈ ອປຣິຫີໂນຕິ, ອນາຄາມີ ຕີຫິ ມຄ຺ເຄຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ສກທາຄາມິນາ ທ຺ເວ ຜລານິ ປຏິລທ຺ຘານິ ເຕຫິ ຈ ອປຣິຫີໂນຕິ, ສກທາຄາມີ ທ຺ວີຫິ ຜເລຫິ ສມນ຺ນາຄໂຕຕິ? ອາມນ຺ຕາ. ສກທາຄາມິນາ ທ຺ເວ ມຄ຺ຄາ ປຏິລທ຺ຘາ, ເຕຫິ ຈ ອປຣິຫີໂນຕິ, ສກທາຄາມີ ທ຺ວີຫິ ມຄ຺ເຄຫິ ສມນ຺ນາຄໂຕຕິ? ນ ເຫວໍ ວຕ຺ຕພ຺ເພ…ເປ….

ສມນ຺ນາຄຕກຖາ ນິຏ຺ຐິຕາ.