໓. ຕຕິຍວຄ຺ໂຄ

(໒໖) ໖. ອຏ຺ຐມກສ຺ສອິນ຺ທ຺ຣິຍກຖາ

໓໗໑. ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ສທ຺ຘິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ສທ຺ຘາຕິ? ນ ເຫວໍ ວຕ຺ຕພ຺ເພ. ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ວີຣິຍິນ຺ທ຺ຣິຍໍ…ເປ… ນຕ຺ຖິ ສຕິນ຺ທ຺ຣິຍໍ…ເປ… ນຕ຺ຖິ ສມາຘິນ຺ທ຺ຣິຍໍ…ເປ… ນຕ຺ຖິ ປຎ຺ຎິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ປຎ຺ຎາຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ວີຣິຍໍ…ເປ… ອຕ຺ຖິ ສຕິ… ອຕ຺ຖິ ສມາຘິ… ອຕ຺ຖິ ປຎ຺ຎາຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ປຎ຺ຎິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ມໂນ, ອຕ຺ຖິ ມນິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ອຕ຺ຖິ ສທ຺ຘິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ມໂນ, ອຕ຺ຖິ ມນິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ອຕ຺ຖິ ປຎ຺ຎິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ໂສມນສ຺ສໍ, ອຕ຺ຖິ ໂສມນສ຺ສິນ຺ທ຺ຣິຍໍ, ອຕ຺ຖິ ຊີວິຕໍ, ອຕ຺ຖິ ຊີວິຕິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ອຕ຺ຖິ ສທ຺ຘິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ຊີວິຕໍ, ອຕ຺ຖິ ຊີວິຕິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ…ເປ… ອຕ຺ຖິ ປຎ຺ຎາ, ອຕ຺ຖິ ປຎ຺ຎິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ນຕ຺ຖິ ສທ຺ຘິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ມໂນ, ນຕ຺ຖິ ມນິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ນຕ຺ຖິ ສທ຺ຘິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ໂສມນສ຺ສໍ, ນຕ຺ຖິ ໂສມນສ຺ສິນ຺ທ຺ຣິຍນ຺ຕິ…ເປ… ອຕ຺ຖິ ຊີວິຕໍ, ນຕ຺ຖິ ຊີວິຕິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ນຕ຺ຖິ ປຎ຺ຎິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ມໂນ, ນຕ຺ຖິ ມນິນ຺ທ຺ຣິຍນ຺ຕິ? ອຕ຺ຖິ ໂສມນສ຺ສໍ, ນຕ຺ຖິ ໂສມນສ຺ສິນ຺ທ຺ຣິຍນ຺ຕິ? ອຕ຺ຖິ ຊີວິຕໍ, ນຕ຺ຖິ ຊີວິຕິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ສທ຺ຘິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມໂກ ປຸຄ຺ຄໂລ ອສ຺ສທ຺ໂຘຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ວີຣິຍິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມໂກ ປຸຄ຺ຄໂລ ກຸສີໂຕ ຫີນວີຣິໂຍຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ສຕິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມໂກ ປຸຄ຺ຄໂລ ມຸຏ຺ຐສ຺ສຕິ ອສມ຺ປຊາໂນຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ສມາຘິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມໂກ ປຸຄ຺ຄໂລ ອສມາຫິໂຕ ວິພ຺ຠນ຺ຕຈິຕ຺ໂຕຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ປຎ຺ຎິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມໂກ ປຸຄ຺ຄໂລ ທຸປ຺ປຎ຺ໂຎ ເອລມູໂຄຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ສາ ຈ ສທ຺ຘາ ນິຍ຺ຍານິກາຕິ? ອາມນ຺ຕາ. ຫຎ຺ຈິ ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ສາ ຈ ສທ຺ຘາ ນິຍ຺ຍານິກາ, ໂນ ຈ ວຕ ເຣ ວຕ຺ຕພ຺ເພ – ‘‘ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ສທ຺ຘິນ຺ທ຺ຣິຍ’’ນ຺ຕິ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ວີຣິຍໍ, ຕຎ຺ຈ ວີຣິຍໍ ນິຍ຺ຍານິກໍ; ອຕ຺ຖິ ສຕິ, ສາ ຈ ສຕິ ນິຍ຺ຍານິກາ; ອຕ຺ຖິ ສມາຘິ, ໂສ ຈ ສມາຘິ ນິຍ຺ຍານິໂກ; ອຕ຺ຖິ ປຎ຺ຎາ, ສາ ຈ ປຎ຺ຎາ ນິຍ຺ຍານິກາຕິ? ອາມນ຺ຕາ. ຫຎ຺ຈິ ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ສາ ຈ ປຎ຺ຎາ ນິຍ຺ຍານິກາ, ໂນ ຈ ວຕ ເຣ ວຕ຺ຕພ຺ເພ – ‘‘ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ປຎ຺ຎິນ຺ທ຺ຣິຍ’’ນ຺ຕິ.

໓໗໒. ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ອຕ຺ຖິ ສທ຺ຘິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ອຕ຺ຖິ ສທ຺ຘິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ… ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ອຕ຺ຖິ ປຎ຺ຎິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ອຕ຺ຖິ ປຎ຺ຎິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອນາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ… ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ອຕ຺ຖິ ສທ຺ຘິນ຺ທ຺ຣິຍໍ…ເປ… ອຕ຺ຖິ ປຎ຺ຎາ, ອຕ຺ຖິ ປຎ຺ຎິນ຺ທ຺ຣິຍນ຺ຕິ? ອາມນ຺ຕາ. ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ອຕ຺ຖິ ປຎ຺ຎິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ນຕ຺ຖິ ສທ຺ຘິນ຺ທ຺ຣິຍນ຺ຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ນຕ຺ຖິ ສທ຺ຘິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ… ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ນຕ຺ຖິ ປຎ຺ຎິນ຺ທ຺ຣິຍນ຺ຕິ? ອາມນ຺ຕາ. ສກທາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ນຕ຺ຖິ ປຎ຺ຎິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ສທ຺ຘາ, ນຕ຺ຖິ ສທ຺ຘິນ຺ທ຺ຣິຍນ຺ຕິ…ເປ… ອຕ຺ຖິ ປຎ຺ຎາ, ນຕ຺ຖິ ປຎ຺ຎິນ຺ທ຺ຣິຍນ຺ຕິ? ອາມນ຺ຕາ. ອນາຄາມິຜລສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ… ອຣຫຕ຺ຕສຈ຺ຉິກິຣິຍາຍ ປຏິປນ຺ນສ຺ສ ປຸຄ຺ຄລສ຺ສ ອຕ຺ຖິ ປຎ຺ຎາ, ນຕ຺ຖິ ປຎ຺ຎິນ຺ທ຺ຣິຍນ຺ຕິ? ນ ເຫວໍ ວຕ຺ຕພ຺ເພ…ເປ….

ອຏ຺ຐມກສ຺ສ ປຸຄ຺ຄລສ຺ສ ນຕ຺ຖິ ປຎ຺ຈິນ຺ທ຺ຣິຍານີຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ປຎ຺ຈິມານິ, ຠິກ຺ຂເວ, ອິນ຺ທ຺ຣິຍານິ! ກຕມານິ ປຎ຺ຈ? ສທ຺ຘິນ຺ທ຺ຣິຍໍ, ວີຣິຍິນ຺ທ຺ຣິຍໍ, ສຕິນ຺ທ຺ຣິຍໍ, ສມາຘິນ຺ທ຺ຣິຍໍ, ປຎ຺ຎິນ຺ທ຺ຣິຍໍ – ອິມານິ ໂຂ, ຠິກ຺ຂເວ, ປຎ຺ຈິນ຺ທ຺ຣິຍານິ. ອິເມສໍ ໂຂ, ຠິກ຺ຂເວ, ປຎ຺ຈນ຺ນໍ ອິນ຺ທ຺ຣິຍານໍ ສມຕ຺ຕາ ປຣິປູຣຕ຺ຕາ ອຣຫາ ໂຫຕິ. ຕໂຕ ມຸທຸຕເຣຫິ ອຣຫຕ຺ຕສຈ຺ຉິກິຣິຍາຍ ປຏິປນ຺ໂນ ໂຫຕິ, ຕໂຕ ມຸທຸຕເຣຫິ ອນາຄາມີ ໂຫຕິ, ຕໂຕ ມຸທຸຕເຣຫິ ອນາຄາມິຜລສຈ຺ຉິກິຣິຍາຍ ປຏິປນ຺ໂນ ໂຫຕິ, ຕໂຕ ມຸທຸຕເຣຫິ ສກທາຄາມີ ໂຫຕິ, ຕໂຕ ມຸທຸຕເຣຫິ ສກທາຄາມິຜລສຈ຺ຉິກິຣິຍາຍ ປຏິປນ຺ໂນ ໂຫຕິ, ຕໂຕ ມຸທຸຕເຣຫິ ໂສຕາປນ຺ໂນ ໂຫຕິ, ຕໂຕ ມຸທຸຕເຣຫິ ໂສຕາປຕ຺ຕິຜລສຈ຺ຉິກິຣິຍາຍ ປຏິປນ຺ໂນ ໂຫຕິ. ຍສ຺ສ ໂຂ, ຠິກ຺ຂເວ, ອິມານິ ປຎ຺ຈິນ຺ທ຺ຣິຍານິ ສພ຺ເພນ ສພ຺ພໍ ສພ຺ພຖາ ສພ຺ພໍ ນຕ຺ຖິ, ຕມຫໍ ‘ພາຫິໂຣ ປຸຖຸຊ຺ຊນປກ຺ເຂ ຐິໂຕ’ຕິ ວທາມີ’’ຕິ [ສໍ. ນິ. ໕.໔໘໘]. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ອຏ຺ຐມໂກ ປຸຄ຺ຄໂລ ພາຫິໂຣ ປຸຖຸຊ຺ຊນປກ຺ເຂ ຐິໂຕຕິ? ນ ເຫວໍ ວຕ຺ຕພ຺ເພ…ເປ… ເຕນ ຫິ ອຏ຺ຐມກສ຺ສ ປຸຄ຺ຄລສ຺ສ ອຕ຺ຖິ ປຎ຺ຈິນ຺ທ຺ຣິຍານີຕິ.

ອຏ຺ຐມກສ຺ສ ອິນ຺ທ຺ຣິຍກຖາ ນິຏ຺ຐິຕາ.