(໑໔) ໕. ວຈີເຠທກຖາ

໓໒໖. ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ສພ຺ພຕ຺ຖ ສມາປນ຺ນານໍ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ສພ຺ພທາ ສມາປນ຺ນານໍ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ສພ຺ເພສໍ ສມາປນ຺ນານໍ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ສພ຺ພສມາປຕ຺ຕີສຸ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ສມາປນ຺ນສ຺ສ ອຕ຺ຖິ ກາຍເຠໂທຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ນຕ຺ຖິ ກາຍເຠໂທຕິ? ອາມນ຺ຕາ. ສມາປນ຺ນສ຺ສ ນຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ອຕ຺ຖິ ວາຈາ, ອຕ຺ຖິ ວຈີເຠໂທຕິ? ອາມນ຺ຕາ. ສມາປນ຺ນສ຺ສ ອຕ຺ຖິ ກາໂຍ, ອຕ຺ຖິ ກາຍເຠໂທຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ອຕ຺ຖິ ກາໂຍ, ນຕ຺ຖິ ກາຍເຠໂທຕິ? ອາມນ຺ຕາ. ສມາປນ຺ນສ຺ສ ອຕ຺ຖິ ວາຈາ, ນຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

໓໒໗. ທຸກ຺ຂນ຺ຕິ ຊານນ຺ໂຕ ທຸກ຺ຂນ຺ຕິ ວາຈໍ ຠາສຕີຕິ? ອາມນ຺ຕາ. ສມຸທໂຍຕິ ຊານນ຺ໂຕ ສມຸທໂຍຕິ ວາຈໍ ຠາສຕີຕິ? ນ ເຫວໍ ວຕ຺ຕພ຺ເພ…ເປ….

ທຸກ຺ຂນ຺ຕິ ຊານນ຺ໂຕ ທຸກ຺ຂນ຺ຕິ ວາຈໍ ຠາສຕີຕິ? ອາມນ຺ຕາ. ນິໂຣໂຘຕິ ຊານນ຺ໂຕ ນິໂຣໂຘຕິ ວາຈໍ ຠາສຕີຕິ? ນ ເຫວໍ ວຕ຺ຕພ຺ເພ…ເປ….

ທຸກ຺ຂນ຺ຕິ ຊານນ຺ໂຕ ທຸກ຺ຂນ຺ຕິ ວາຈໍ ຠາສຕີຕິ? ອາມນ຺ຕາ. ມຄ຺ໂຄຕິ ຊານນ຺ໂຕ ມຄ຺ໂຄຕິ ວາຈໍ ຠາສຕີຕິ? ນ ເຫວໍ ວຕ຺ຕພ຺ເພ…ເປ….

ສມຸທໂຍຕິ ຊານນ຺ໂຕ ນ ຈ ສມຸທໂຍຕິ ວາຈໍ ຠາສຕີຕິ? ອາມນ຺ຕາ. ທຸກ຺ຂນ຺ຕິ ຊານນ຺ໂຕ ນ ຈ ທຸກ຺ຂນ຺ຕິ ວາຈໍ ຠາສຕີຕິ? ນ ເຫວໍ ວຕ຺ຕພ຺ເພ…ເປ….

ນິໂຣໂຘຕິ ຊານນ຺ໂຕ ນ ຈ ນິໂຣໂຘຕິ ວາຈໍ ຠາສຕີຕິ? ອາມນ຺ຕາ. ທຸກ຺ຂນ຺ຕິ ຊານນ຺ໂຕ ນ ຈ ທຸກ຺ຂນ຺ຕິ ວາຈໍ ຠາສຕີຕິ? ນ ເຫວໍ ວຕ຺ຕພ຺ເພ…ເປ….

ມຄ຺ໂຄຕິ ຊານນ຺ໂຕ ນ ຈ ມຄ຺ໂຄຕິ ວາຈໍ ຠາສຕີຕິ? ອາມນ຺ຕາ. ທຸກ຺ຂນ຺ຕິ ຊານນ຺ໂຕ ນ ຈ ທຸກ຺ຂນ຺ຕິ ວາຈໍ ຠາສຕີຕິ? ນ ເຫວໍ ວຕ຺ຕພ຺ເພ…ເປ….

໓໒໘. ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ຎາຓໍ ກິໍໂຄຈຣນ຺ຕິ? ຎາຓໍ ສຈ຺ຈໂຄຈຣນ຺ຕິ. ໂສຕໍ ສຈ຺ຈໂຄຈຣນ຺ຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ໂສຕໍ ກິໍ ໂຄຈຣນ຺ຕິ? ໂສຕໍ ສທ຺ທໂຄຈຣນ຺ຕິ. ຎາຓໍ ສທ຺ທໂຄຈຣນ຺ຕິ? ນ ເຫວໍ ວຕ຺ຕພ຺ເພ.

ສມາປນ຺ນສ຺ສ ອຕ຺ຖິ ວຈີເຠໂທ ຎາຓໍ ສຈ຺ຈໂຄຈຣໍ, ໂສຕໍ ສທ຺ທໂຄຈຣນ຺ຕິ? ອາມນ຺ຕາ. ຫຎ຺ຈິ ຎາຓໍ ສຈ຺ຈໂຄຈຣໍ, ໂສຕໍ ສທ຺ທໂຄຈຣໍ, ໂນ ຈ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

ສມາປນ຺ນສ຺ສ ອຕ຺ຖິ ວຈີເຠໂທ ຎາຓໍ ສຈ຺ຈໂຄຈຣໍ, ໂສຕໍ ສທ຺ທໂຄຈຣນ຺ຕິ? ອາມນ຺ຕາ. ທ຺ວິນ຺ນໍ ຜສ຺ສານໍ, ທ຺ວິນ຺ນໍ ເວທນານໍ, ທ຺ວິນ຺ນໍ ສຎ຺ຎານໍ, ທ຺ວິນ຺ນໍ ເຈຕນານໍ, ທ຺ວິນ຺ນໍ ຈິຕ຺ຕານໍ ສໂມຘານໍ ໂຫຕີຕິ? ນ ເຫວໍ ວຕ຺ຕພ຺ເພ.

໓໒໙. ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ.

ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ອາໂປກສິຓໍ…ເປ… ເຕໂຊກສິຓໍ… ວາໂຍກສິຓໍ… ນີລກສິຓໍ… ປີຕກສິຓໍ… ໂລຫິຕກສິຓໍ… ໂອທາຕກສິຓໍ… ອາກາສານຎ຺ຈາຍຕນໍ … ວິຎ຺ຎາຓຎ຺ຈາຍຕນໍ… ອາກິຎ຺ຈຎ຺ຎາຍຕນໍ…ເປ… ເນວສຎ຺ຎານາສຎ຺ຎາຍຕນໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ຫຎ຺ຈິ ປຖວີກສິຓໍ ສມາປຕ຺ຕິໍ ສມາປນ຺ນສ຺ສ ນຕ຺ຖິ ວຈີເຠໂທ, ໂນ ຈ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

ອາໂປກສິຓໍ … ເຕໂຊກສິຓໍ… ວາໂຍກສິຓໍ… ນີລກສິຓໍ… ປີຕກສິຓໍ… ໂລຫິຕກສິຓໍ… ໂອທາຕກສິຓໍ… ອາກາສານຎ຺ຈາຍຕນໍ … ວິຎ຺ຎາຓຎ຺ຈາຍຕນໍ… ອາກິຎ຺ຈຎ຺ຎາຍຕນໍ… ເນວສຎ຺ຎານາສຎ຺ຎາຍຕນໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ຫຎ຺ຈິ ເນວສຎ຺ຎານາສຎ຺ຎາຍຕນໍ ສມາປນ຺ນສ຺ສ ນຕ຺ຖິ ວຈີເຠໂທ, ໂນ ຈ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ໂລກິຍສມາປຕ຺ຕິໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ໂລກິຍໍ ປຐມໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ…. ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ໂລກິຍໍ ທຸຕິຍໍ ຌານໍ… ຕຕິຍໍ ຌານໍ… ຈຕຸຕ຺ຖໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ໂລກິຍໍ ສມາປຕ຺ຕິໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ຫຎ຺ຈິ ໂລກິຍໍ ສມາປຕ຺ຕິໍ ສມາປນ຺ນສ຺ສ ນຕ຺ຖິ ວຈີເຠໂທ, ໂນ ຈ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

ໂລກິຍໍ ປຐມໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ຫຎ຺ຈິ ໂລກິຍໍ ປຐມໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທ, ໂນ ຈ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

ໂລກິຍໍ ທຸຕິຍໍ ຌານໍ… ຕຕິຍໍ ຌານໍ… ຈຕຸຕ຺ຖໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ຫຎ຺ຈິ ໂລກິຍໍ ຈຕຸຕ຺ຖໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທ, ໂນ ຈ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

໓໓໐. ໂລກຸຕ຺ຕຣໍ ປຐມໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ໂລກິຍໍ ປຐມໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ໂລກຸຕ຺ຕຣໍ ປຐມໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ໂລກິຍໍ ທຸຕິຍໍ ຌານໍ… ຕຕິຍໍ ຌານໍ… ຈຕຸຕ຺ຖໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ໂລກິຍໍ ປຐມໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ໂລກຸຕ຺ຕຣໍ ປຐມໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ໂລກິຍໍ ທຸຕິຍໍ ຌານໍ… ຕຕິຍໍ ຌານໍ… ຈຕຸຕ຺ຖໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ໂລກຸຕ຺ຕຣໍ ປຐມໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

໓໓໑. ໂລກຸຕ຺ຕຣໍ ປຐມໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ໂລກຸຕ຺ຕຣໍ ທຸຕິຍໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ໂລກຸຕ຺ຕຣໍ ປຐມໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ໂລກຸຕ຺ຕຣໍ ຕຕິຍໍ ຌານໍ… ຈຕຸຕ຺ຖໍ ຌານໍ ສມາປນ຺ນສ຺ສ ອຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ໂລກຸຕ຺ຕຣໍ ທຸຕິຍໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ໂລກຸຕ຺ຕຣໍ ປຐມໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ໂລກຸຕ຺ຕຣໍ ທຸຕິຍໍ ຌານໍ… ຕຕິຍໍ ຌານໍ… ຈຕຸຕ຺ຖໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ອາມນ຺ຕາ. ໂລກຸຕ຺ຕຣໍ ປຐມໍ ຌານໍ ສມາປນ຺ນສ຺ສ ນຕ຺ຖິ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

໓໓໒. ນ ວຕ຺ຕພ຺ພໍ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ? ອາມນ຺ຕາ. ນນຸ ວິຕກ຺ກວິຈາຣາ ວຈີສງ຺ຂາຣາ ວຸຕ຺ຕາ ຠຄວຕາ – ‘‘ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ’’ຕິ? ອາມນ຺ຕາ. ຫຎ຺ຈິ ວິຕກ຺ກວິຈາຣາ ວຈີສງ຺ຂາຣາ ວຸຕ຺ຕາ ຠຄວຕາ – ‘‘ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ,’’ ເຕນ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

ວິຕກ຺ກວິຈາຣາ ວຈີສງ຺ຂາຣາ ວຸຕ຺ຕາ ຠຄວຕາ – ‘‘ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ’’ຕິ [ອຕ຺ຖິ ວິຕກ຺ກວິຈາຣາ (ສ຺ຍາ.) ເອວມຸປຣິປິ], ອຕ຺ຖິ ຕສ຺ສ ວຈີເຠໂທຕິ? ອາມນ຺ຕາ. ປຖວີກສິຓໍ ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ, ອຕ຺ຖິ ຕສ຺ສ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ວິຕກ຺ກວິຈາຣາ ວຈີສງ຺ຂາຣາ ວຸຕ຺ຕາ ຠຄວຕາ – ‘‘ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ’’ຕິ, ອຕ຺ຖິ ຕສ຺ສ ວຈີເຠໂທຕິ? ອາມນ຺ຕາ. ອາໂປກສິຓໍ… ເຕໂຊກສິຓໍ… ວາໂຍກສິຓໍ… ນີລກສິຓໍ… ປີຕກສິຓໍ… ໂລຫິຕກສິຓໍ… ໂອທາຕກສິຓໍ ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ, ອຕ຺ຖິ ຕສ຺ສ ວຈີເຠໂທຕິ? ນ ເຫວໍ ວຕ຺ຕພ຺ເພ…ເປ….

ນ ວຕ຺ຕພ຺ພໍ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ? ອາມນ຺ຕາ. ນນຸ ວິຕກ຺ກສມຸຏ຺ຐານາ ວາຈາ ວຸຕ຺ຕາ ຠຄວຕາ – ‘‘ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ’’ຕິ? ອາມນ຺ຕາ. ຫຎ຺ຈິ ວິຕກ຺ກສມຸຏ຺ຐານາ ວາຈາ ວຸຕ຺ຕາ ຠຄວຕາ – ‘‘ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ,’’ ເຕນ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

ວິຕກ຺ກສມຸຏ຺ຐານາ ວາຈາ ວຸຕ຺ຕາ ຠຄວຕາ – ‘‘ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ’’ຕິ, ອຕ຺ຖິ ຕສ຺ສ ວຈີເຠໂທຕິ? ອາມນ຺ຕາ. ສຎ຺ຎາສມຸຏ຺ຐານາ ວາຈາ ວຸຕ຺ຕາ ຠຄວຕາ – ‘‘ທຸຕິຍໍ ຌານໍ ສມາປນ຺ນສ຺ສ ອຕ຺ຖິ ສຎ຺ຎາ, ອຕ຺ຖິ ຕສ຺ສ ວິຕກ຺ກວິຈາຣາ’’ຕິ? ນ ເຫວໍ ວຕ຺ຕພ຺ເພ…ເປ….

ວິຕກ຺ກສມຸຏ຺ຐານາ ວາຈາ ວຸຕ຺ຕາ ຠຄວຕາ – ‘‘ປຐມໍ ຌານໍ ສມາປນ຺ນສ຺ສ ອຕ຺ຖິ ວິຕກ຺ກວິຈາຣາ’’ຕິ, ອຕ຺ຖິ ຕສ຺ສ ວຈີເຠໂທຕິ? ອາມນ຺ຕາ. ສຎ຺ຎາສມຸຏ຺ຐານາ ວາຈາ ວຸຕ຺ຕາ ຠຄວຕາ – ຕຕິຍໍ ຌານໍ…ເປ… ຈຕຸຕ຺ຖໍ ຌານໍ… ອາກາສານຎ຺ຈາຍຕນໍ… ວິຎ຺ຎາຓຎ຺ຈາຍຕນໍ… ອາກິຎ຺ຈຎ຺ຎາຍຕນໍ ສມາປນ຺ນສ຺ສ ອຕ຺ຖິ ສຎ຺ຎາ, ອຕ຺ຖິ ຕສ຺ສ ວິຕກ຺ກວິຈາຣາຕິ? ນ ເຫວໍ ວຕ຺ຕພ຺ເພ…ເປ….

໓໓໓. ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ນນຸ ‘‘ປຐມໍ ຌານໍ ສມາປນ຺ນສ຺ສ ວາຈາ ນິຣຸທ຺ຘາ ໂຫຕີ’’ຕິ [ສໍ. ນິ. ໔.໒໕໙, ໒໖໓]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ຫຎ຺ຈິ ‘‘ປຐມໍ ຌານໍ ສມາປນ຺ນສ຺ສ ວາຈາ ນິຣຸທ຺ຘາ ໂຫຕີ’’ຕິ, ອຕ຺ເຖວ ສຸຕ຺ຕນ຺ໂຕຕິ, ໂນ ຈ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

‘‘ປຐມໍ ຌານໍ ສມາປນ຺ນສ຺ສ ວາຈາ ນິຣຸທ຺ຘາ ໂຫຕີ’’ຕິ [ສໍ. ນິ. ໔.໒໕໙, ໒໖໓], ອຕ຺ເຖວ ສຸຕ຺ຕນ຺ໂຕຕິ, ອຕ຺ຖິ ຕສ຺ສ ວຈີເຠໂທຕິ? ອາມນ຺ຕາ. ‘‘ທຸຕິຍໍ ຌານໍ ສມາປນ຺ນສ຺ສ ວິຕກ຺ກວິຈາຣາ ນິຣຸທ຺ຘາ ໂຫນ຺ຕີ’’ຕິ [ສໍ. ນິ. ໔.໒໕໙, ໒໖໓], ອຕ຺ເຖວ ສຸຕ຺ຕນ຺ໂຕຕິ, ອຕ຺ຖິ ຕສ຺ສ ວິຕກ຺ກວິຈາຣາຕິ? ນ ເຫວໍ ວຕ຺ຕພ຺ເພ…ເປ….

‘‘ປຐມໍ ຌານໍ ສມາປນ຺ນສ຺ສ ວາຈາ ນິຣຸທ຺ຘາ ໂຫຕີ’’ຕິ [ສໍ. ນິ. ໔.໒໕໙, ໒໖໓], ອຕ຺ເຖວ ສຸຕ຺ຕນ຺ໂຕຕິ, ອຕ຺ຖິ ຕສ຺ສ ວຈີເຠໂທຕິ? ອາມນ຺ຕາ. ‘‘ຕຕິຍໍ ຌານໍ ສມາປນ຺ນສ຺ສ ປີຕິ ນິຣຸທ຺ຘາ ໂຫຕິ, ຈຕຸຕ຺ຖໍ ຌານໍ ສມາປນ຺ນສ຺ສ ອສ຺ສາສປສ຺ສາສາ ນິຣຸທ຺ຘາ ໂຫນ຺ຕິ, ອາກາສານຎ຺ຈາຍຕນໍ ສມາປນ຺ນສ຺ສ ຣູປສຎ຺ຎາ ນິຣຸທ຺ຘາ ໂຫຕິ, ວິຎ຺ຎາຓຎ຺ຈາຍຕນໍ ສມາປນ຺ນສ຺ສ ອາກາສານຎ຺ຈາຍຕນສຎ຺ຎາ ນິຣຸທ຺ຘາ ໂຫຕິ, ອາກິຎ຺ຈຎ຺ຎາຍຕນໍ ສມາປນ຺ນສ຺ສ ວິຎ຺ຎາຓຎ຺ຈາຍຕນສຎ຺ຎາ ນິຣຸທ຺ຘາ ໂຫຕິ, ເນວສຎ຺ຎານາສຎ຺ຎາຍຕນໍ ສມາປນ຺ນສ຺ສ ອາກິຎ຺ຈຎ຺ຎາຍຕນສຎ຺ຎາ ນິຣຸທ຺ຘາ ໂຫຕິ, ສຎ຺ຎາເວທຍິຕນິໂຣຘໍ ສມາປນ຺ນສ຺ສ ສຎ຺ຎາ ຈ ເວທນາ ຈ ນິຣຸທ຺ຘາ ໂຫນ຺ຕີ’’ຕິ [ສໍ. ນິ. ໔.໒໕໙, ໒໖໓; ອ. ນິ. ໙.໓໑; ທີ. ນິ. ໓.໓໔໔], ອຕ຺ເຖວ ສຸຕ຺ຕນ຺ໂຕຕິ, ອຕ຺ຖິ ຕສ຺ສ ສຎ຺ຎາ ຈ ເວທນາ ຈາຕິ? ນ ເຫວໍ ວຕ຺ຕພ຺ເພ…ເປ….

ນ ວຕ຺ຕພ຺ພໍ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ? ອາມນ຺ຕາ. ນນຸ ປຐມສ຺ສ ຌານສ຺ສ ສທ຺ໂທ ກຓ຺ຑໂກ [ກຓ຺ຏໂກ (ສ຺ຍາ.) ອ. ນິ. ໑໐.໗໒] ວຸຕ຺ໂຕ ຠຄວຕາຕິ [ອ. ນິ. ໑໐.໗໒ ກຓ຺ຏກສຸຕ຺ຕໍ ນິສ຺ສາຍ ປຸຈ຺ຉຕິ]? ອາມນ຺ຕາ. ຫຎ຺ຈິ ປຐມສ຺ສ ຌານສ຺ສ ສທ຺ໂທ ກຓ຺ຏໂກ ວຸຕ຺ໂຕ ຠຄວຕາ, ເຕນ ວຕ ເຣ ວຕ຺ຕພ຺ເພ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ.

ປຐມສ຺ສ ຌານສ຺ສ ສທ຺ໂທ ກຓ຺ຏໂກ ວຸຕ຺ໂຕ ຠຄວຕາຕິ, ສມາປນ຺ນສ຺ສ ອຕ຺ຖິ ວຈີເຠໂທຕິ? ອາມນ຺ຕາ. ທຸຕິຍສ຺ສ ຌານສ຺ສ ວິຕກ຺ກວິຈາຣາ ກຓ຺ຏໂກ ວຸຕ຺ໂຕ ຠຄວຕາ… ຕຕິຍສ຺ສ ຌານສ຺ສ ປີຕິ ກຓ຺ຏໂກ ວຸຕ຺ໂຕ ຠຄວຕາ… ຈຕຸຕ຺ຖສ຺ສ ຌານສ຺ສ ອສ຺ສາສປສ຺ສາສາ ກຓ຺ຏໂກ ວຸຕ຺ໂຕ ຠຄວຕາ [ອ. ນິ. ໑໐.໗໒] … ອາກາສານຎ຺ຈາຍຕນໍ ສມາປນ຺ນສ຺ສ ຣູປສຎ຺ຎາ ກຓ຺ຏໂກ ວຸຕ຺ໂຕ ຠຄວຕາ… ວິຎ຺ຎາຓຎ຺ຈາຍຕນໍ ສມາປນ຺ນສ຺ສ ອາກາສານຎ຺ຈາຍຕນສຎ຺ຎາ ກຓ຺ຏໂກ ວຸຕ຺ໂຕ ຠຄວຕາ… ອາກິຎ຺ຈຎ຺ຎາຍຕນໍ ສມາປນ຺ນສ຺ສ ວິຎ຺ຎາຓຎ຺ຈາຍຕນສຎ຺ຎາ ກຓ຺ຏໂກ ວຸຕ຺ໂຕ ຠຄວຕາ… ເນວສຎ຺ຎານາສຎ຺ຎາຍຕນໍ ສມາປນ຺ນສ຺ສ ອາກິຎ຺ຈຎ຺ຎາຍຕນສຎ຺ຎາ ກຓ຺ຏໂກ ວຸຕ຺ໂຕ ຠຄວຕາ… ສຎ຺ຎາເວທຍິຕນິໂຣຘໍ ສມາປນ຺ນສ຺ສ ສຎ຺ຎາ ຈ ເວທນາ ຈ ກຓ຺ຏໂກ ວຸຕ຺ໂຕ ຠຄວຕາ [ອ. ນິ. ໑໐.໗໒], ອຕ຺ຖິ ຕສ຺ສ ສຎ຺ຎາ ຈ ເວທນາ ຈາຕິ? ນ ເຫວໍ ວຕ຺ຕພ຺ເພ…ເປ….

ນ ວຕ຺ຕພ຺ພໍ – ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ສິຂິສ຺ສ, ອານນ຺ທ, ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ ອຠິຠູ ນາມ ສາວໂກ ພ຺ຣຫ຺ມໂລເກ ຐິໂຕ ທສສຫສ຺ສິໂລກຘາຕຸໍ ສເຣນ ວິຎ຺ຎາເປສິ –

‘ອາຣພ຺ຠຖ ນິກ຺ກມຖ, ຍຸຎ຺ຊຖ ພຸທ຺ຘສາສເນ;

ຘຸນາຖ ມຈ຺ຈຸໂນ ເສນໍ, ນຬາຄາຣໍວ ກຸຎ຺ຊໂຣ.

‘ໂຍ ອິມສ຺ມິໍ ຘມ຺ມວິນເຍ, ອປ຺ປມຕ຺ໂຕ ວິຫສ຺ສຕິ [ວິເຫສ຺ສຕິ (ສີ. ສ຺ຍາ. ກໍ.) ວິຫຣິສ຺ສຕິ (ກ.)];

ປຫາຍ ຊາຕິສໍສາຣໍ, ທຸກ຺ຂສ຺ສນ຺ຕໍ ກຣິສ຺ສຕີ’’’ຕິ [ອ. ນິ. ໑ ຕິກນິປາເຕ; ສໍ. ນິ. ໑.໒໘໕].

ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ສມາປນ຺ນສ຺ສ ອຕ຺ຖິ ວຈີເຠໂທຕິ.

ວຈີເຠທກຖາ ນິຏ຺ຐິຕາ.