໑໐. ປຎ຺ຎຕ຺ຕານຸໂຍໂຄ

໖໑. ຣູປຘາຕຸຍາ ຣູປີ ປຸຄ຺ຄໂລຕິ? ອາມນ຺ຕາ. ກາມຘາຕຸຍາ ກາມີ ປຸຄ຺ຄໂລຕິ? ນ ເຫວໍ ວຕ຺ຕພ຺ເພ…ເປ….

໖໒. ຣູປຘາຕຸຍາ ຣູປິໂນ ສຕ຺ຕາຕິ? ອາມນ຺ຕາ. ກາມຘາຕຸຍາ ກາມິໂນ ສຕ຺ຕາຕິ? ນ ເຫວໍ ວຕ຺ຕພ຺ເພ…ເປ….

໖໓. ອຣູປຘາຕຸຍາ ອຣູປີ ປຸຄ຺ຄໂລຕິ? ອາມນ຺ຕາ. ກາມຘາຕຸຍາ ກາມີ ປຸຄ຺ຄໂລຕິ? ນ ເຫວໍ ວຕ຺ຕພ຺ເພ…ເປ….

໖໔. ອຣູປຘາຕຸຍາ ອຣູປິໂນ ສຕ຺ຕາຕິ? ອາມນ຺ຕາ. ກາມຘາຕຸຍາ ກາມິໂນ ສຕ຺ຕາຕິ? ນ ເຫວໍ ວຕ຺ຕພ຺ເພ…ເປ….

໖໕. ຣູປຘາຕຸຍາ ຣູປີ ປຸຄ຺ຄໂລ ອຣູປຘາຕຸຍາ ອຣູປີ ປຸຄ຺ຄໂລ, ອຕ຺ຖິ ຈ ໂກຈິ ຣູປຘາຕຸຍາ ຈຸໂຕ ອຣູປຘາຕຸໍ ອຸປປຊ຺ຊຕີຕິ? ອາມນ຺ຕາ. ຣູປີ ປຸຄ຺ຄໂລ ອຸປຈ຺ຉິນ຺ໂນ, ອຣູປີ ປຸຄ຺ຄໂລ ຊາໂຕຕິ? ນ ເຫວໍ ວຕ຺ຕພ຺ເພ…ເປ….

໖໖. ຣູປຘາຕຸຍາ ຣູປິໂນ ສຕ຺ຕາ ອຣູປຘາຕຸຍາ ອຣູປິໂນ ສຕ຺ຕາ, ອຕ຺ຖິ ຈ ໂກຈິ ຣູປຘາຕຸຍາ ຈຸໂຕ ອຣູປຘາຕຸໍ ອຸປປຊ຺ຊຕີຕິ? ອາມນ຺ຕາ. ຣູປີ ສຕ຺ໂຕ ອຸປຈ຺ຉິນ຺ໂນ, ອຣູປີ ສຕ຺ໂຕ ຊາໂຕຕິ? ນ ເຫວໍ ວຕ຺ຕພ຺ເພ…ເປ….

໖໗. ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕຕິ? ອາມນ຺ຕາ. ປຸຄ຺ຄໂລຕິ ວາ ຊີໂວຕິ ວາ, ຊີໂວຕິ ວາ ປຸຄ຺ຄໂລຕິ ວາ, ປຸຄ຺ຄລໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕຕິ? ອາມນ຺ຕາ. ອຎ຺ໂຎ ກາໂຍ, ອຎ຺ໂຎ ປຸຄ຺ຄໂລຕິ? ອາມນ຺ຕາ. ອຎ຺ຎໍ ຊີວໍ, ອຎ຺ຎໍ ສຣີຣນ຺ຕິ? ນ ເຫວໍ ວຕ຺ຕພ຺ເພ.

ອາຊານາຫິ ນິຄ຺ຄຫໍ. ຫຎ຺ຈິ ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ປຸຄ຺ຄໂລຕິ ວາ ຊີໂວຕິ ວາ, ຊີໂວຕິ ວາ ປຸຄ຺ຄໂລຕິ ວາ, ປຸຄ຺ຄລໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ອຎ຺ໂຎ ກາໂຍ ອຎ຺ໂຎ ປຸຄ຺ຄໂລ; ເຕນ ວຕ ເຣ ວຕ຺ຕພ຺ເພ – ‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ. ຍໍ ຕຕ຺ຖ ວເທສິ – ‘‘ວຕ຺ຕພ຺ເພ ໂຂ – ‘ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ປຸຄ຺ຄໂລຕິ ວາ ຊີໂວຕິ ວາ, ຊີໂວຕິ ວາ ປຸຄ຺ຄໂລຕິ ວາ, ປຸຄ຺ຄລໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ອຎ຺ໂຎ ກາໂຍ ອຎ຺ໂຎ ປຸຄ຺ຄໂລ,’ ໂນ ຈ ວຕ຺ຕພ຺ເພ – ‘ອຎ຺ຎໍ ຊີວໍ ອຎ຺ຎໍ ສຣີຣ’’’ນ຺ຕິ ມິຈ຺ຉາ.

ໂນ ເຈ ປນ ວຕ຺ຕພ຺ເພ – ‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ, ໂນ ຈ ວຕ ເຣ ວຕ຺ຕພ຺ເພ – ‘‘ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ປຸຄ຺ຄໂລຕິ ວາ ຊີໂວຕິ ວາ, ຊີໂວຕິ ວາ ປຸຄ຺ຄໂລຕິ ວາ, ປຸຄ຺ຄລໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ອຎ຺ໂຎ ກາໂຍ ອຎ຺ໂຎ ປຸຄ຺ຄໂລ’’ຕິ. ຍໍ ຕຕ຺ຖ ວເທສິ – ‘‘ວຕ຺ຕພ຺ເພ ໂຂ – ‘ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ປຸຄ຺ຄໂລຕິ ວາ ຊີໂວຕິ ວາ, ຊີໂວຕິ ວາ ປຸຄ຺ຄໂລຕິ ວາ, ປຸຄ຺ຄລໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ອຎ຺ໂຎ ກາໂຍ ອຎ຺ໂຎ ປຸຄ຺ຄໂລ’, ໂນ ຈ ວຕ຺ຕພ຺ເພ – ‘ອຎ຺ຎໍ ຊີວໍ ອຎ຺ຎໍ ສຣີຣ’’’ນ຺ຕິ ມິຈ຺ຉາ…ເປ….

໖໘. ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕຕິ? ອາມນ຺ຕາ. ວຸຕ຺ຕໍ ຠຄວຕາ – ‘‘ອຕ຺ຖິ ປຸຄ຺ຄໂລ ອຕ຺ຕຫິຕາຍ ປຏິປນ຺ໂນ’’ຕິ? ອາມນ຺ຕາ. ອຎ຺ໂຎ ກາໂຍ ອຎ຺ໂຎ ປຸຄ຺ຄໂລຕິ? ນ ເຫວໍ ວຕ຺ຕພ຺ເພ.

ອາຊານາຫິ ປຏິກມ຺ມໍ. ຫຎ຺ຈິ ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ວຸຕ຺ຕໍ ຠຄວຕາ – ‘‘ອຕ຺ຖິ ປຸຄ຺ຄໂລ ອຕ຺ຕຫິຕາຍ ປຏິປນ຺ໂນ,’’ ເຕນ ວຕ ເຣ ວຕ຺ຕພ຺ເພ – ‘‘ອຎ຺ໂຎ ກາໂຍ ອຎ຺ໂຎ ປຸຄ຺ຄໂລ’’ຕິ. ຍໍ ຕຕ຺ຖ ວເທສິ – ‘‘ວຕ຺ຕພ຺ເພ ໂຂ – ‘ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ວຸຕ຺ຕໍ ຠຄວຕາ – ອຕ຺ຖິ ປຸຄ຺ຄໂລ ອຕ຺ຕຫິຕາຍ ປຏິປນ຺ໂນ,’ ໂນ ຈ ວຕ຺ຕພ຺ເພ – ‘ອຎ຺ໂຎ ກາໂຍ ອຎ຺ໂຎ ປຸຄ຺ຄໂລ’’’ຕິ ມິຈ຺ຉາ.

ໂນ ເຈ ປນ ວຕ຺ຕພ຺ເພ – ‘‘ອຎ຺ໂຎ ກາໂຍ ອຎ຺ໂຎ ປຸຄ຺ຄໂລ’’ຕິ, ໂນ ຈ ວຕ ເຣ ວຕ຺ຕພ຺ເພ – ‘‘ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ວຸຕ຺ຕໍ ຠຄວຕາ – ‘ອຕ຺ຖິ ປຸຄ຺ຄໂລ ອຕ຺ຕຫິຕາຍ ປຏິປນ຺ໂນ’’’ຕິ. ຍໍ ຕຕ຺ຖ ວເທສິ – ‘‘ວຕ຺ຕພ຺ເພ ໂຂ – ‘ກາໂຍຕິ ວາ ສຣີຣນ຺ຕິ ວາ, ສຣີຣນ຺ຕິ ວາ ກາໂຍຕິ ວາ, ກາຍໍ ອປ຺ປິຍໍ ກຣິຕ຺ວາ ເອເສເສ ເອກຏ຺ເຐ ສເມ ສມຠາເຄ ຕຊ຺ຊາເຕ, ວຸຕ຺ຕໍ ຠຄວຕາ – ອຕ຺ຖິ ປຸຄ຺ຄໂລ ອຕ຺ຕຫິຕາຍ ປຏິປນ຺ໂນ,’ ໂນ ຈ ວຕ຺ຕພ຺ເພ – ‘ອຎ຺ໂຎ ກາໂຍ ອຎ຺ໂຎ ປຸຄ຺ຄໂລ’’’ຕິ ມິຈ຺ຉາ. (ສໍຂິຕ຺ຕໍ)

ປຎ຺ຎຕ຺ຕານຸໂຍໂຄ.