ສຸຕ຺ຕນ຺ຕິກທຸກນິກ຺ເຂປໍ

໑໓໐໓. ກຕເມ ຘມ຺ມາ ວິຊ຺ຊາຠາຄິໂນ? ວິຊ຺ຊາຍ ສມ຺ປຍຸຕ຺ຕກາ ຘມ຺ມາ – ອິເມ ຘມ຺ມາ ວິຊ຺ຊາຠາຄິໂນ.

໑໓໐໔. ກຕເມ ຘມ຺ມາ ອວິຊ຺ຊາຠາຄິໂນ? ອວິຊ຺ຊາຍ ສມ຺ປຍຸຕ຺ຕກາ ຘມ຺ມາ – ອິເມ ຘມ຺ມາ ອວິຊ຺ຊາຠາຄິໂນ.

໑໓໐໕. ກຕເມ ຘມ຺ມາ ວິຊ຺ຊູປມາ? ເຫຏ຺ຐິເມສຸ ຕີສຸ ອຣິຍມຄ຺ເຄສຸ ປຎ຺ຎາ – ອິເມ ຘມ຺ມາ ວິຊ຺ຊູປມາ.

໑໓໐໖. ກຕເມ ຘມ຺ມາ ວຊິຣູປມາ? ອຸປຣິຏ຺ຐິເມ ອຣຫຕ຺ຕມຄ຺ເຄ ປຎ຺ຎາ – ອິເມ ຘມ຺ມາ ວຊິຣູປມາ.

໑໓໐໗. ກຕເມ ຘມ຺ມາ ພາລາ? ອຫິຣີກຎ຺ຈ ອໂນຕ຺ຕປ຺ປຎ຺ຈ – ອິເມ ຘມ຺ມາ ພາລາ. ສພ຺ເພປິ ອກຸສລາ ຘມ຺ມາ ພາລາ.

໑໓໐໘. ກຕເມ ຘມ຺ມາ ປຓ຺ຑິຕາ? ຫິຣີ ຈ ໂອຕ຺ຕປ຺ປຎ຺ຈ – ອິເມ ຘມ຺ມາ ປຓ຺ຑິຕາ. ສພ຺ເພປິ ກຸສລາ ຘມ຺ມາ ປຓ຺ຑິຕາ.

໑໓໐໙. ກຕເມ ຘມ຺ມາ ກຓ຺ຫາ? ອຫິຣີກຎ຺ຈ ອໂນຕ຺ຕປ຺ປຎ຺ຈ – ອິເມ ຘມ຺ມາ ກຓ຺ຫາ. ສພ຺ເພປິ ອກຸສລາ ຘມ຺ມາ ກຓ຺ຫາ.

໑໓໑໐. ກຕເມ ຘມ຺ມາ ສຸກ຺ກາ? ຫິຣີ ຈ ໂອຕ຺ຕປ຺ປຎ຺ຈ – ອິເມ ຘມ຺ມາ ສຸກ຺ກາ? ສພ຺ເພປິ ກຸສລາ ຘມ຺ມາ ສຸກ຺ກາ.

໑໓໑໑. ກຕເມ ຘມ຺ມາ ຕປນີຍາ? ກາຍທຸຈ຺ຈຣິຕໍ, ວຈີທຸຈ຺ຈຣິຕໍ, ມໂນທຸຈ຺ຈຣິຕໍ – ອິເມ ຘມ຺ມາ ຕປນີຍາ. ສພ຺ເພປິ ອກຸສລາ ຘມ຺ມາ ຕປນີຍາ.

໑໓໑໒. ກຕເມ ຘມ຺ມາ ອຕປນີຍາ? ກາຍສຸຈຣິຕໍ, ວຈີສຸຈຣິຕໍ, ມໂນສຸຈຣິຕໍ – ອິເມ ຘມ຺ມາ ອຕປນີຍາ. ສພ຺ເພປິ ກຸສລາ ຘມ຺ມາ ອຕປນີຍາ.

໑໓໑໓. ກຕເມ ຘມ຺ມາ ອຘິວຈນາ? ຍາ ເຕສໍ ເຕສໍ ຘມ຺ມານໍ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປ – ອິເມ ຘມ຺ມາ ອຘິວຈນາ. ສພ຺ເພວ ຘມ຺ມາ ອຘິວຈນປຖາ.

໑໓໑໔. ກຕເມ ຘມ຺ມາ ນິຣຸຕ຺ຕິ? ຍາ ເຕສໍ ເຕສໍ ຘມ຺ມານໍ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປ – ອິເມ ຘມ຺ມາ ນິຣຸຕ຺ຕິ. ສພ຺ເພວ ຘມ຺ມາ ນິຣຸຕ຺ຕິປຖາ.

໑໓໑໕. ກຕເມ ຘມ຺ມາ ປຎ຺ຎຕ຺ຕິ? ຍາ ເຕສໍ ເຕສໍ ຘມ຺ມານໍ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປ – ອິເມ ຘມ຺ມາ ປຎ຺ຎຕ຺ຕິ. ສພ຺ເພວ ຘມ຺ມາ ປຎ຺ຎຕ຺ຕິປຖາ.

໑໓໑໖. ຕຕ຺ຖ ກຕມໍ ນາມໍ? ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ, ອສງ຺ຂຕາ ຈ ຘາຕຸ – ອິທໍ ວຸຈ຺ຈຕິ ນາມໍ.

໑໓໑໗. ຕຕ຺ຖ ກຕມໍ ຣູປໍ? ຈຕ຺ຕາໂຣ ຈ ມຫາຠູຕາ, ຈຕຸນ຺ນຎ຺ຈ ມຫາຠູຕານໍ ອຸປາທາຍ ຣູປໍ – ອິທໍ ວຸຈ຺ຈຕິ ຣູປໍ.

໑໓໑໘. ຕຕ຺ຖ ກຕມາ ອວິຊ຺ຊາ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອຍໍ ວຸຈ຺ຈຕິ ອວິຊ຺ຊາ.

໑໓໑໙. ຕຕ຺ຖ ກຕມາ ຠວຕຓ຺ຫາ? ໂຍ ຠເວສຸ ຠວຉນ຺ໂທ…ເປ… ຠວຊ຺ໂຌສານໍ – ອຍໍ ວຸຈ຺ຈຕິ ຠວຕຓ຺ຫາ.

໑໓໒໐. ຕຕ຺ຖ ກຕມາ ຠວທິຏ຺ຐິ? ຠວິສ຺ສຕິ ອຕ຺ຕາ ຈ ໂລໂກ ຈາຕິ, ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ຠວທິຏ຺ຐິ.

໑໓໒໑. ຕຕ຺ຖ ກຕມາ ວິຠວທິຏ຺ຐິ? ນ ຠວິສ຺ສຕິ ອຕ຺ຕາ ຈ ໂລໂກ ຈາຕິ, ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ວິຠວທິຏ຺ຐິ.

໑໓໒໒. ຕຕ຺ຖ ກຕມາ ສສ຺ສຕທິຏ຺ຐິ? ສສ຺ສໂຕ ອຕ຺ຕາ ຈ ໂລໂກ ຈາຕິ, ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ສສ຺ສຕທິຏ຺ຐິ.

໑໓໒໓. ຕຕ຺ຖ ກຕມາ ອຸຈ຺ເຉທທິຏ຺ຐິ? ອຸຈ຺ຉິຊ຺ຊິສ຺ສຕິ ອຕ຺ຕາ ຈ ໂລໂກ ຈາຕິ, ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ອຸຈ຺ເຉທທິຏ຺ຐິ.

໑໓໒໔. ຕຕ຺ຖ ກຕມາ ອນ຺ຕວາ ທິຏ຺ຐິ? ອນ຺ຕວາ ອຕ຺ຕາ ຈ ໂລໂກ ຈາຕິ, ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ອນ຺ຕວາ ທິຏ຺ຐິ.

໑໓໒໕. ຕຕ຺ຖ ກຕມາ ອນນ຺ຕວາ ທິຏ຺ຐິ? ອນນ຺ຕວາ ອຕ຺ຕາ ຈ ໂລໂກ ຈາຕິ, ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ອນນ຺ຕວາ ທິຏ຺ຐິ.

໑໓໒໖. ຕຕ຺ຖ ກຕມາ ປຸພ຺ພນ຺ຕານຸທິຏ຺ຐິ? ປຸພ຺ພນ຺ຕໍ ອາຣພ຺ຠ ຍາ ອຸປ຺ປຊ຺ຊຕິ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ປຸພ຺ພນ຺ຕານຸທິຏ຺ຐິ.

໑໓໒໗. ຕຕ຺ຖ ກຕມາ ອປຣນ຺ຕານຸທິຏ຺ຐິ? ອປຣນ຺ຕໍ ອາຣພ຺ຠ ຍາ ອຸປ຺ປຊ຺ຊຕິ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ອປຣນ຺ຕານຸທິຏ຺ຐິ.

໑໓໒໘. ຕຕ຺ຖ ກຕມໍ ອຫິຣິກໍ? ຍໍ ນ ຫິຣີຍຕິ ຫິຣິຍິຕພ຺ເພນ, ນ ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ອຫິຣິກໍ.

໑໓໒໙. ຕຕ຺ຖ ກຕມໍ ອໂນຕ຺ຕປ຺ປໍ? ຍໍ ນ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ, ນ ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ອໂນຕ຺ຕປ຺ປໍ.

໑໓໓໐. ຕຕ຺ຖ ກຕມາ ຫິຣີ? ຍໍ ຫິຣີຍຕິ ຫິຣິຍິຕພ຺ເພນ, ຫິຣີຍຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອຍໍ ວຸຈ຺ຈຕິ ຫິຣີ.

໑໓໓໑. ຕຕ຺ຖ ກຕມໍ ໂອຕ຺ຕປ຺ປໍ? ຍໍ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນ, ໂອຕ຺ຕປ຺ປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ – ອິທໍ ວຸຈ຺ຈຕິ ໂອຕ຺ຕປ຺ປໍ.

໑໓໓໒. ຕຕ຺ຖ ກຕມາ ໂທວຈສ຺ສຕາ? ສຫຘມ຺ມິເກ ວຸຈ຺ຈມາເນ ໂທວຈສ຺ສາຍໍ ໂທວຈສ຺ສິຍໍ ໂທວຈສ຺ສຕາ ວິປ຺ປຏິກູລຄ຺ຄາຫິຕາ ວິປຈ຺ຈນີກສາຕຕາ ອນາທຣິຍໍ ອນາທຣຕາ ອຄາຣວຕາ ອປ຺ປຏິສ຺ສວຕາ – ອຍໍ ວຸຈ຺ຈຕິ ໂທວຈສ຺ສຕາ.

໑໓໓໓. ຕຕ຺ຖ ກຕມາ ປາປມິຕ຺ຕຕາ? ເຍ ເຕ ປຸຄ຺ຄລາ ອສ຺ສທ຺ຘາ ທຸສ຺ສີລາ ອປ຺ປສ຺ສຸຕາ ມຈ຺ຉຣິໂນ ທຸປ຺ປຎ຺ຎາ, ຍາ ເຕສໍ ເສວນາ ນິເສວນາ ສໍເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ຕໍສມ຺ປວງ຺ກຕາ – ອຍໍ ວຸຈ຺ຈຕິ ປາປມິຕ຺ຕຕາ.

໑໓໓໔. ຕຕ຺ຖ ກຕມາ ໂສວຈສ຺ສຕາ? ສຫຘມ຺ມິເກ ວຸຈ຺ຈມາເນ ໂສວຈສ຺ສາຍໍ ໂສວຈສ຺ສິຍໍ ໂສວຈສ຺ສຕາ ອປ຺ປຏິກູລຄ຺ຄາຫິຕາ ອວິປຈ຺ຈນີກສາຕຕາ ສຄາຣວຕາ ສາທຣິຍໍ ສາທຣຕາ ສປ຺ປຏິສ຺ສວຕາ – ອຍໍ ວຸຈ຺ຈຕິ ໂສວຈສ຺ສຕາ.

໑໓໓໕. ຕຕ຺ຖ ກຕມາ ກລ຺ຍາຓມິຕ຺ຕຕາ? ເຍ ເຕ ປຸຄ຺ຄລາ ສທ຺ຘາ ສີລວນ຺ໂຕ ພຫຸສ຺ສຸຕາ ຈາຄວນ຺ໂຕ ປຎ຺ຎວນ຺ໂຕ, ຍາ ເຕສໍ ເສວນາ ນິເສວນາ ສໍເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ຕໍສມ຺ປວງ຺ກຕາ – ອຍໍ ວຸຈ຺ຈຕິ ກລ຺ຍາຓມິຕ຺ຕຕາ.

໑໓໓໖. ຕຕ຺ຖ ກຕມາ ອາປຕ຺ຕິກຸສລຕາ? ປຎ຺ຈປິ ອາປຕ຺ຕິກ຺ຂນ຺ຘາ ອາປຕ຺ຕິໂຍ, ສຕ຺ຕປິ ອາປຕ຺ຕິກ຺ຂນ຺ຘາ ອາປຕ຺ຕິໂຍ. ຍາ ຕາສໍ ອາປຕ຺ຕີນໍ ອາປຕ຺ຕິກຸສລຕາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ອາປຕ຺ຕິກຸສລຕາ.

໑໓໓໗. ຕຕ຺ຖ ກຕມາ ອາປຕ຺ຕິວຸຏ຺ຐານກຸສລຕາ? ຍາ ຕາຫິ ອາປຕ຺ຕີຫິ ວຸຏ຺ຐານກຸສລຕາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ອາປຕ຺ຕິວຸຏ຺ຐານກຸສລຕາ.

໑໓໓໘. ຕຕ຺ຖ ກຕມາ ສມາປຕ຺ຕິກຸສລຕາ? ອຕ຺ຖິ ສວິຕກ຺ກສວິຈາຣາ ສມາປຕ຺ຕິ, ອຕ຺ຖິ ອວິຕກ຺ກວິຈາຣມຕ຺ຕາ ສມາປຕ຺ຕິ, ອຕ຺ຖິ ອວິຕກ຺ກອວິຈາຣາ ສມາປຕ຺ຕິ. ຍາ ຕາສໍ ສມາປຕ຺ຕີນໍ ສມາປຕ຺ຕິກຸສລຕາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ສມາປຕ຺ຕິກຸສລຕາ.

໑໓໓໙. ຕຕ຺ຖ ກຕມາ ສມາປຕ຺ຕິວຸຏ຺ຐານກຸສລຕາ? ຍາ ຕາຫິ ສມາປຕ຺ຕີຫິ ວຸຏ຺ຐານກຸສລຕາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ສມາປຕ຺ຕິວຸຏ຺ຐານກຸສລຕາ.

໑໓໔໐. ຕຕ຺ຖ ກຕມາ ຘາຕຸກຸສລຕາ? ອຏ຺ຐາຣສ ຘາຕຸໂຍ ຈກ຺ຂຸຘາຕຸ ຣູປຘາຕຸ ຈກ຺ຂຸວິຎ຺ຎາຓຘາຕຸ, ໂສຕຘາຕຸ ສທ຺ທຘາຕຸ ໂສຕວິຎ຺ຎາຓຘາຕຸ, ຆານຘາຕຸ ຄນ຺ຘຘາຕຸ ຆານວິຎ຺ຎາຓຘາຕຸ, ຊິວ຺ຫາຘາຕຸ ຣສຘາຕຸ ຊິວ຺ຫາວິຎ຺ຎາຓຘາຕຸ, ກາຍຘາຕຸ ໂຜຏ຺ຐພ຺ພຘາຕຸ ກາຍວິຎ຺ຎາຓຘາຕຸ, ມໂນຘາຕຸ ຘມ຺ມຘາຕຸ ມໂນວິຎ຺ຎາຓຘາຕຸ. ຍາ ຕາສໍ ຘາຕູນໍ ຘາຕຸກຸສລຕາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ຘາຕຸກຸສລຕາ.

໑໓໔໑. ຕຕ຺ຖ ກຕມາ ມນສິກາຣກຸສລຕາ? ຍາ ຕາສໍ ຘາຕູນໍ ມນສິກາຣກຸສລຕາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ມນສິກາຣກຸສລຕາ.

໑໓໔໒. ຕຕ຺ຖ ກຕມາ ອາຍຕນກຸສລຕາ? ທ຺ວາທສາຍຕນານິ – ຈກ຺ຂາຍຕນໍ, ຣູປາຍຕນໍ, ໂສຕາຍຕນໍ, ສທ຺ທາຍຕນໍ, ຆານາຍຕນໍ, ຄນ຺ຘາຍຕນໍ, ຊິວ຺ຫາຍຕນໍ, ຣສາຍຕນໍ, ກາຍາຍຕນໍ, ໂຜຏ຺ຐພ຺ພາຍຕນໍ, ມນາຍຕນໍ, ຘມ຺ມາຍຕນໍ. ຍາ ເຕສໍ ອາຍຕນານໍ ອາຍຕນກຸສລຕາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ອາຍຕນກຸສລຕາ.

໑໓໔໓. ຕຕ຺ຖ ກຕມາ ປຏິຈ຺ຈສມຸປ຺ປາທກຸສລຕາ? ອວິຊ຺ຊາປຈ຺ຈຍາ ສງ຺ຂາຣາ, ສງ຺ຂາຣປຈ຺ຈຍາ ວິຎ຺ຎາຓໍ, ວິຎ຺ຎາຓປຈ຺ຈຍາ ນາມຣູປໍ, ນາມຣູປປຈ຺ຈຍາ ສຬາຍຕນໍ, ສຬາຍຕນປຈ຺ຈຍາ ຜສ຺ໂສ, ຜສ຺ສປຈ຺ຈຍາ ເວທນາ, ເວທນາປຈ຺ຈຍາ ຕຓ຺ຫາ, ຕຓ຺ຫາປຈ຺ຈຍາ ອຸປາທານໍ, ອຸປາທານປຈ຺ຈຍາ ຠໂວ, ຠວປຈ຺ຈຍາ ຊາຕິ, ຊາຕິປຈ຺ຈຍາ ຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ສມ຺ຠວນ຺ຕິ; ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕີຕິ. ຍາ ຕຕ຺ຖ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ປຏິຈ຺ຈສມຸປ຺ປາທກຸສລຕາ.

໑໓໔໔. ຕຕ຺ຖ ກຕມາ ຐານກຸສລຕາ? ເຍ ເຍ ຘມ຺ມາ ເຍສໍ ເຍສໍ ຘມ຺ມານໍ ເຫຕູ ປຈ຺ຈຍາ ອຸປ຺ປາທາຍ [ອຸປາທາຍ (ສີ. ກ.)] ຕໍ ຕໍ ຐານນ຺ຕິ, ຍາ ຕຕ຺ຖ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ຐານກຸສລຕາ.

໑໓໔໕. ຕຕ຺ຖ ກຕມາ ອຏ຺ຐານກຸສລຕາ? ເຍ ເຍ ຘມ຺ມາ ເຍສໍ ເຍສໍ ຘມ຺ມານໍ ນ ເຫຕູ ນ ປຈ຺ຈຍາ ອຸປ຺ປາທາຍ ຕໍ ຕໍ ອຏ຺ຐານນ຺ຕິ, ຍາ ຕຕ຺ຖ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ອຏ຺ຐານກຸສລຕາ.

໑໓໔໖. ຕຕ຺ຖ ກຕໂມ ອຊ຺ຊໂວ? ຍາ ອຊ຺ຊວຕາ ອຊິມ຺ຫຕາ ອວງ຺ກຕາ ອກຸຏິລຕາ – ອຍໍ ວຸຈ຺ຈຕິ ອຊ຺ຊໂວ.

໑໓໔໗. ຕຕ຺ຖ ກຕໂມ ມທ຺ທໂວ? ຍາ ມຸທຸຕາ ມທ຺ທວຕາ ອກກ຺ຂຬຕາ ອກຖິນຕາ ນີຈຈິຕ຺ຕຕາ – ອຍໍ ວຸຈ຺ຈຕິ ມທ຺ທໂວ.

໑໓໔໘. ຕຕ຺ຖ ກຕມາ ຂນ຺ຕິ? ຍາ ຂນ຺ຕິ ຂມນຕາ ອຘິວາສນຕາ ອຈຓ຺ຑິກ຺ກໍ ອນສຸໂຣໂປ ອຕ຺ຕມນຕາ ຈິຕ຺ຕສ຺ສ – ອຍໍ ວຸຈ຺ຈຕິ ຂນ຺ຕິ.

໑໓໔໙. ຕຕ຺ຖ ກຕມໍ ໂສຣຈ຺ຈໍ? ໂຍ ກາຍິໂກ ອວີຕິກ຺ກໂມ, ວາຈສິໂກ ອວີຕິກ຺ກໂມ, ກາຍິກວາຈສິໂກ ອວີຕິກ຺ກໂມ – ອິທໍ ວຸຈ຺ຈຕິ ໂສຣຈ຺ຈໍ. ສພ຺ໂພປິ ສີລສໍວໂຣ ໂສຣຈ຺ຈໍ.

໑໓໕໐. ຕຕ຺ຖ ກຕມໍ ສາຂລ຺ຍໍ? ຍາ ສາ ວາຈາ ອຓ຺ຑກາ ກກ຺ກສາ ປຣກຏຸກາ ປຣາຠິສຊ຺ຊນີ ໂກຘສາມນ຺ຕາ ອສມາຘິສໍວຕ຺ຕນິກາ, ຕຖາຣູປິໍ ວາຈໍ ປຫາຍ ຍາ ສາ ວາຈາ ເນຬາ ກຓ຺ຓສຸຂາ ເປມນີຍາ ຫທຍງ຺ຄມາ ໂປຣີ ພຫຸຊນກນ຺ຕາ ພຫຸຊນມນາປາ ຕຖາຣູປິໍ ວາຈໍ ຠາສິຕາ ໂຫຕິ; ຍາ ຕຕ຺ຖ ສຓ຺ຫວາຈຕາ ສຂິລວາຈຕາ ອຜຣຸສວາຈຕາ – ອິທໍ ວຸຈ຺ຈຕິ ສາຂລ຺ຍໍ.

໑໓໕໑. ຕຕ຺ຖ ກຕໂມ ປຏິສນ຺ຖາໂຣ? ທ຺ເວ ປຏິສນ຺ຖາຣາ – ອາມິສປຏິສນ຺ຖາໂຣ ຈ ຘມ຺ມປຏິສນ຺ຖາໂຣ ຈ. ອິເຘກຈ຺ໂຈ ປຏິສນ຺ຖາຣໂກ ໂຫຕິ ອາມິສປຏິສນ຺ຖາເຣນ ວາ ຘມ຺ມປຏິສນ຺ຖາເຣນ ວາ – ອຍໍ ວຸຈ຺ຈຕິ ປຏິສນ຺ຖາໂຣ.

໑໓໕໒. ຕຕ຺ຖ ກຕມາ ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ? ອິເຘກຈ຺ໂຈ ຈກ຺ຂຸນາ ຣູປໍ ທິສ຺ວາ ນິມິຕ຺ຕຄ຺ຄາຫີ ໂຫຕິ ອນຸພ຺ຍຎ຺ຊນຄ຺ຄາຫີ. ຍຕ຺ວາຘິກຣຓເມນໍ ຈກ຺ຂຸນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ນ ປຏິປຊ຺ຊຕິ, ນ ຣກ຺ຂຕິ ຈກ຺ຂຸນ຺ທ຺ຣິຍໍ, ຈກ຺ຂຸນ຺ທ຺ຣິເຍ ນ ສໍວຣໍ ອາປຊ຺ຊຕິ. ໂສເຕນ ສທ຺ທໍ ສຸຕ຺ວາ…ເປ… ຆາເນນ ຄນ຺ຘໍ ຆາຍິຕ຺ວາ…ເປ… ຊິວ຺ຫາຍ ຣສໍ ສາຍິຕ຺ວາ…ເປ… ກາເຍນ ໂຜຏ຺ຐພ຺ພໍ ຜຸສິຕ຺ວາ…ເປ… ມນສາ ຘມ຺ມໍ ວິຎ຺ຎາຍ ນິມິຕ຺ຕຄ຺ຄາຫີ ໂຫຕິ ອນຸພ຺ຍຎ຺ຊນຄ຺ຄາຫີ. ຍຕ຺ວາຘິກຣຓເມນໍ ມນິນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ນ ປຏິປຊ຺ຊຕິ, ນ ຣກ຺ຂຕິ ມນິນ຺ທ຺ຣິຍໍ, ມນິນ຺ທ຺ຣິເຍ ນ ສໍວຣໍ ອາປຊ຺ຊຕິ. ຍາ ອິເມສໍ ຉນ຺ນໍ ອິນ຺ທ຺ຣິຍານໍ ອຄຸຕ຺ຕິ ອໂຄປນາ ອນາຣກ຺ໂຂ ອສໍວໂຣ – ອຍໍ ວຸຈ຺ຈຕິ ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ.

໑໓໕໓. ຕຕ຺ຖ ກຕມາ ໂຠຊເນ ອມຕ຺ຕຎ຺ຎຸຕາ? ອິເຘກຈ຺ໂຈ ອປ຺ປຏິສງ຺ຂາ ອໂຍນິໂສ ອາຫາຣໍ ອາຫາເຣຕິ ທວາຍ ມທາຍ ມຓ຺ຑນາຍ ວິຠູສນາຍ. ຍາ ຕຕ຺ຖ ອສນ຺ຕຸຏ຺ຐິຕາ ອມຕ຺ຕຎ຺ຎຸຕາ ອປ຺ປຏິສງ຺ຂາ ໂຠຊເນ – ອຍໍ ວຸຈ຺ຈຕິ ໂຠຊເນ ອມຕ຺ຕຎ຺ຎຸຕາ.

໑໓໕໔. ຕຕ຺ຖ ກຕມາ ອິນ຺ທ຺ຣິເຍສຸ ຄຸຕ຺ຕທ຺ວາຣຕາ? ອິເຘກຈ຺ໂຈ ຈກ຺ຂຸນາ ຣູປໍ ທິສ຺ວາ ນ ນິມິຕ຺ຕຄ຺ຄາຫີ ໂຫຕິ ນ ອນຸພ຺ຍຎ຺ຊນຄ຺ຄາຫີ. ຍຕ຺ວາຘິກຣຓເມນໍ ຈກ຺ຂຸນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ປຏິປຊ຺ຊຕິ, ຣກ຺ຂຕິ ຈກ຺ຂຸນ຺ທ຺ຣິຍໍ, ຈກ຺ຂຸນ຺ທ຺ຣິເຍ ສໍວຣໍ ອາປຊ຺ຊຕິ. ໂສເຕນ ສທ຺ທໍ ສຸຕ຺ວາ…ເປ… ຆາເນນ ຄນ຺ຘໍ ຆາຍິຕ຺ວາ…ເປ… ຊິວ຺ຫາຍ ຣສໍ ສາຍິຕ຺ວາ…ເປ… ກາເຍນ ໂຜຏ຺ຐພ຺ພໍ ຜຸສິຕ຺ວາ…ເປ… ມນສາ ຘມ຺ມໍ ວິຎ຺ຎາຍ ນ ນິມິຕ຺ຕຄ຺ຄາຫີ ໂຫຕິ ນານຸພ຺ຍຎ຺ຊນຄ຺ຄາຫີ. ຍຕ຺ວາຘິກຣຓເມນໍ ມນິນ຺ທ຺ຣິຍໍ ອສໍວຸຕໍ ວິຫຣນ຺ຕໍ ອຠິຊ຺ຌາໂທມນສ຺ສາ ປາປກາ ອກຸສລາ ຘມ຺ມາ ອນ຺ວາສ຺ສເວຍ຺ຍຸໍ, ຕສ຺ສ ສໍວຣາຍ ປຏິປຊ຺ຊຕິ, ຣກ຺ຂຕິ ມນິນ຺ທ຺ຣິຍໍ, ມນິນ຺ທ຺ຣິເຍ ສໍວຣໍ ອາປຊ຺ຊຕິ. ຍາ ອິເມສໍ ຉນ຺ນໍ ອິນ຺ທ຺ຣິຍານໍ ຄຸຕ຺ຕິ ໂຄປນາ ອາຣກ຺ໂຂ ສໍວໂຣ – ອຍໍ ວຸຈ຺ຈຕິ ອິນ຺ທ຺ຣິເຍສຸ ຄຸຕ຺ຕທ຺ວາຣຕາ.

໑໓໕໕. ຕຕ຺ຖ ກຕມາ ໂຠຊເນ ມຕ຺ຕຎ຺ຎຸຕາ? ອິເຘກຈ຺ໂຈ ປຏິສງ຺ຂາ ໂຍນິໂສ ອາຫາຣໍ ອາຫາເຣຕິ – ເນວ ທວາຍ ນ ມທາຍ ນ ມຓ຺ຑນາຍ ນ ວິຠູສນາຍ ຍາວເທວ ອິມສ຺ສ ກາຍສ຺ສ ຐິຕິຍາ ຍາປນາຍ ວິຫິໍສູປຣຕິຍາ ພ຺ຣຫ຺ມຈຣິຍານຸຄ຺ຄຫາຍ, ອິຕິ ປຸຣາຓຎ຺ຈ ເວທນໍ ປຏິຫງ຺ຂາມິ, ນວຎ຺ຈ ເວທນໍ ນ ອຸປ຺ປາເທສ຺ສາມິ, ຍາຕ຺ຣາ ຈ ເມ ຠວິສ຺ສຕິ ອນວຊ຺ຊຕາ ຈ ຜາສຸວິຫາໂຣ ຈາຕິ. ຍາ ຕຕ຺ຖ ສນ຺ຕຸຏ຺ຐິຕາ ມຕ຺ຕຎ຺ຎຸຕາ ປຏິສງ຺ຂາ ໂຠຊເນ – ອຍໍ ວຸຈ຺ຈຕິ ໂຠຊເນ ມຕ຺ຕຎ຺ຎຸຕາ.

໑໓໕໖. ຕຕ຺ຖ ກຕມໍ ມຸຏ຺ຐສຈ຺ຈໍ? ຍາ ອສຕິ ອນນຸສ຺ສຕິ ອປ຺ປຏິສ຺ສຕິ ອສຕິ ອສຣຓຕາ ອຘາຣຓຕາ ປິລາປນຕາ ສມ຺ມຸສນຕາ – ອິທໍ ວຸຈ຺ຈຕິ ມຸຏ຺ຐສຈ຺ຈໍ.

໑໓໕໗. ຕຕ຺ຖ ກຕມໍ ອສມ຺ປຊຎ຺ຎໍ? ຍໍ ອຎ຺ຎາຓໍ ອທສ຺ສນໍ…ເປ… ອວິຊ຺ຊາລງ຺ຄີ ໂມໂຫ ອກຸສລມູລໍ – ອິທໍ ວຸຈ຺ຈຕິ ອສມ຺ປຊຎ຺ຎໍ.

໑໓໕໘. ຕຕ຺ຖ ກຕມາ ສຕິ? ຍາ ສຕິ ອນຸສ຺ສຕິ ປຏິສ຺ສຕິ ສຕິ ສຣຓຕາ ຘາຣຓຕາ ອປິລາປນຕາ ອສມ຺ມຸສນຕາ ສຕິ ສຕິນ຺ທ຺ຣິຍໍ ສຕິພລໍ ສມ຺ມາສຕິ – ອຍໍ ວຸຈ຺ຈຕິ ສຕິ.

໑໓໕໙. ຕຕ຺ຖ ກຕມໍ ສມ຺ປຊຎ຺ຎໍ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ສມ຺ປຊຎ຺ຎໍ.

໑໓໖໐. ຕຕ຺ຖ ກຕມໍ ປຏິສງ຺ຂານພລໍ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ປຏິສງ຺ຂານພລໍ.

໑໓໖໑. ຕຕ຺ຖ ກຕມໍ ຠາວນາພລໍ? ຍາ ກຸສລານໍ ຘມ຺ມານໍ ອາເສວນາ ຠາວນາ ພຫຸລີກມ຺ມໍ – ອິທໍ ວຸຈ຺ຈຕິ ຠາວນາພລໍ. ສຕ຺ຕປິ ໂພຊ຺ຌງ຺ຄາ ຠາວນາພລໍ.

໑໓໖໒. ຕຕ຺ຖ ກຕໂມ ສມໂຖ? ຍາ ຈິຕ຺ຕສ຺ສ ຐິຕິ…ເປ… ສມ຺ມາສມາຘິ – ອຍໍ ວຸຈ຺ຈຕິ ສມໂຖ.

໑໓໖໓. ຕຕ຺ຖ ກຕມາ ວິປສ຺ສນາ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ວິປສ຺ສນາ.

໑໓໖໔. ຕຕ຺ຖ ກຕມໍ ສມຖນິມິຕ຺ຕໍ? ຍາ ຈິຕ຺ຕສ຺ສ ຐິຕິ…ເປ… ສມ຺ມາສມາຘິ – ອິທໍ ວຸຈ຺ຈຕິ ສມຖນິມິຕ຺ຕໍ.

໑໓໖໕. ຕຕ຺ຖ ກຕມໍ ປຄ຺ຄາຫນິມິຕ຺ຕໍ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ – ອິທໍ ວຸຈ຺ຈຕິ ປຄ຺ຄາຫນິມິຕ຺ຕໍ.

໑໓໖໖. ຕຕ຺ຖ ກຕໂມ ປຄ຺ຄາໂຫ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ – ອຍໍ ວຸຈ຺ຈຕິ ປຄ຺ຄາໂຫ.

໑໓໖໗. ຕຕ຺ຖ ກຕໂມ ອວິກ຺ເຂໂປ? ຍາ ຈິຕ຺ຕສ຺ສ ຐິຕິ…ເປ… ສມ຺ມາສມາຘິ – ອຍໍ ວຸຈ຺ຈຕິ ອວິກ຺ເຂໂປ.

໑໓໖໘. ຕຕ຺ຖ ກຕມາ ສີລວິປຕ຺ຕິ? ໂຍ ກາຍິໂກ ວີຕິກ຺ກໂມ, ວາຈສິໂກ ວີຕິກ຺ກໂມ, ກາຍິກວາຈສິໂກ ວີຕິກ຺ກໂມ – ອຍໍ ວຸຈ຺ຈຕິ ສີລວິປຕ຺ຕິ. ສພ຺ພມ຺ປິ ທຸສ຺ສິລ຺ຍໍ ສີລວິປຕ຺ຕິ.

໑໓໖໙. ຕຕ຺ຖ ກຕມາ ທິຏ຺ຐິວິປຕ຺ຕິ? ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ, ນຕ຺ຖິ ຫຸຕໍ, ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ນຕ຺ຖິ ອຍໍ ໂລໂກ, ນຕ຺ຖິ ປໂຣ ໂລໂກ, ນຕ຺ຖິ ມາຕາ, ນຕ຺ຖິ ປິຕາ, ນຕ຺ຖິ ສຕ຺ຕາ ໂອປປາຕິກາ, ນຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ ສມ຺ມາປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີຕິः ຍາ ເອວຣູປາ ທິຏ຺ຐິ ທິຏ຺ຐິຄຕໍ…ເປ… ວິປຣິຍາສຄ຺ຄາໂຫ – ອຍໍ ວຸຈ຺ຈຕິ ທິຏ຺ຐິວິປຕ຺ຕິ. ສພ຺ພາປິ ມິຈ຺ຉາທິຏ຺ຐິ ທິຏ຺ຐິວິປຕ຺ຕິ.

໑໓໗໐. ຕຕ຺ຖ ກຕມາ ສີລສມ຺ປທາ? ໂຍ ກາຍິໂກ ອວີຕິກ຺ກໂມ, ວາຈສິໂກ ອວີຕິກ຺ກໂມ, ກາຍິກວາຈສິໂກ ອວີຕິກ຺ກໂມ – ອຍໍ ວຸຈ຺ຈຕິ ສີລສມ຺ປທາ. ສພ຺ໂພປິ ສີລສໍວໂຣ ສີລສມ຺ປທາ.

໑໓໗໑. ຕຕ຺ຖ ກຕມາ ທິຏ຺ຐິສມ຺ປທາ? ອຕ຺ຖິ ທິນ຺ນໍ, ອຕ຺ຖິ ຍິຏ຺ຐໍ, ອຕ຺ຖິ ຫຸຕໍ, ອຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ອຕ຺ຖິ ອຍໍ ໂລໂກ, ອຕ຺ຖິ ປໂຣ ໂລໂກ, ອຕ຺ຖິ ມາຕາ, ອຕ຺ຖິ ປິຕາ, ອຕ຺ຖິ ສຕ຺ຕາ ໂອປປາຕິກາ, ອຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ ສມ຺ມາປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີຕິः ຍາ ເອວຣູປາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ທິຏ຺ຐິສມ຺ປທາ. ສພ຺ພາປິ ສມ຺ມາທິຏ຺ຐິ ທິຏ຺ຐິສມ຺ປທາ.

໑໓໗໒. ຕຕ຺ຖ ກຕມາ ສີລວິສຸທ຺ຘິ? ໂຍ ກາຍິໂກ ອວີຕິກ຺ກໂມ, ວາຈສິໂກ ອວີຕິກ຺ກໂມ, ກາຍິກວາຈສິໂກ ອວີຕິກ຺ກໂມ – ອຍໍ ວຸຈ຺ຈຕິ ສີລວິສຸທ຺ຘິ. ສພ຺ໂພປິ ສີລສໍວໂຣ ສີລວິສຸທ຺ຘິ.

໑໓໗໓. ຕຕ຺ຖ ກຕມາ ທິຏ຺ຐິວິສຸທ຺ຘິ? ກມ຺ມສ຺ສກຕຎາຓໍ ສຈ຺ຈານຸໂລມິກຎາຓໍ ມຄ຺ຄສມງ຺ຄິສ຺ສ ຎາຓໍ ຜລສມງ຺ຄິສ຺ສ ຎາຓໍ.

໑໓໗໔. ທິຏ຺ຐິວິສຸທ຺ຘິ ໂຂ ປນາຕິ – ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ.

໑໓໗໕. ຍຖາທິຏ຺ຐິສ຺ສ ຈ ປຘານນ຺ຕິ – ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ.

໑໓໗໖. ສໍເວໂຄຕິ – ຊາຕິຠຍໍ ຊຣາຠຍໍ ພ຺ຍາຘິຠຍໍ ມຣຓຠຍໍ. ສໍເວຊນິຍໍ [ສໍເວຊນີຍໍ (ສີ.)] ຐານນ຺ຕິ – ຊາຕິ ຊຣາ ພ຺ຍາຘິ ມຣຓໍ.

໑໓໗໗. ສໍວິຄ຺ຄສ຺ສ ຈ ໂຍນິໂສ ປຘານນ຺ຕິ – ອິຘ ຠິກ຺ຂຸ ອນຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ອນຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ປຫານາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອນຸປ຺ປນ຺ນານໍ ກຸສລານໍ ຘມ຺ມານໍ ອຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອຸປ຺ປນ຺ນານໍ ກຸສລານໍ ຘມ຺ມານໍ ຐິຕິຍາ ອສມ຺ໂມສາຍ ຠິຍ຺ໂຍຠາວາຍ ເວປຸລ຺ລາຍ ຠາວນາຍ ປາຣິປູຣິຍາ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ.

໑໓໗໘. ອສນ຺ຕຸຏ຺ຐິຕາ ຈ ກຸສເລສຸ ຘມ຺ເມສູຕິ – ຍາ ກຸສລານໍ ຘມ຺ມານໍ ຠາວນາຍ ອສນ຺ຕຸຏ຺ຐສ຺ສ ຠິຍ຺ໂຍກມ຺ຍຕາ.

໑໓໗໙. ອປ຺ປຏິວານິຕາ ຈ ປຘານສ຺ມິນ຺ຕິ – ຍາ ກຸສລານໍ ຘມ຺ມານໍ ຠາວນາຍ ສກ຺ກຈ຺ຈກິຣິຍຕາ ສາຕຈ຺ຈກິຣິຍຕາ ອຏ຺ຐິຕກິຣິຍຕາ ອໂນລີນວຸຕ຺ຕິຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ອາເສວນາ ຠາວນາ ພຫຸລີກມ຺ມໍ.

໑໓໘໐. ວິຊ຺ຊາຕິ – ຕິສ຺ໂສ ວິຊ຺ຊາ – ປຸພ຺ເພນິວາສານຸສ຺ສຕິ ຎາຓໍ ວິຊ຺ຊາ, ສຕ຺ຕານໍ ຈຸຕູປປາເຕ ຎາຓໍ ວິຊ຺ຊາ, ອາສວານໍ ຂເຍ ຎາຓໍ ວິຊ຺ຊາ.

໑໓໘໑. ວິມຸຕ຺ຕີຕິ – ທ຺ເວ ວິມຸຕ຺ຕິໂຍ – ຈິຕ຺ຕສ຺ສ [ຈິຕ຺ຕສ຺ສ ຈ (ສີ. ສ຺ຍາ.)] ອຘິມຸຕ຺ຕິ, ນິພ຺ພານຎ຺ຈ.

໑໓໘໒. ຂເຍ ຎາຓນ຺ຕິ – ມຄ຺ຄສມງ຺ຄິສ຺ສ ຎາຓໍ.

໑໓໘໓. ອນຸປ຺ປາເທ ຎາຓນ຺ຕິ – ຜລສມງ຺ຄິສ຺ສ ຎາຓໍ.

ນິກ຺ເຂປກຓ຺ຑໍ ນິຏ຺ຐິຕໍ.