ອເຫຕຸກກິຣິຍາອພ຺ຍາກຕໍ

ກິຣິຍາມໂນຘາຕຸ

໕໖໖. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ມໂນຘາຕຸ ອຸປ຺ປນ຺ນາ ໂຫຕິ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ ອຸເປກ຺ຂາສຫຄຕາ ຣູປາຣມ຺ມຓາ ວາ…ເປ… ໂຜຏ຺ຐພ຺ພາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ຕີຓິນ຺ທ຺ຣິຍານິ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກາ ມໂນຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

໕໖໗. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ຊີວິຕິນ຺ທ຺ຣິຍໍ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ກິຣິຍາ ມໂນຘາຕຸ.

ກິຣິຍາມໂນວິຎ຺ຎາຓຘາຕຸໂສມນສ຺ສສຫຄຕາ

໕໖໘. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ ໂສມນສ຺ສສຫຄຕາ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ປີຕິ ໂຫຕິ, ສຸຂໍ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ, ມນິນ຺ທ຺ຣິຍໍ ໂຫຕິ, ໂສມນສ຺ສິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

໕໖໙. ກຕໂມ ຕສ຺ມິໍ ສມເຍ ຜສ຺ໂສ ໂຫຕິ? ໂຍ ຕສ຺ມິໍ ສມເຍ ຜສ຺ໂສ ຜຸສນາ ສໍຜຸສນາ ສໍຜຸສິຕຕ຺ຕໍ – ອຍໍ ຕສ຺ມິໍ ສມເຍ ຜສ຺ໂສ ໂຫຕິ…ເປ….

໕໗໐. ກຕມາ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ – ອຍໍ ຕສ຺ມິໍ ສມເຍ ຈິຕ຺ຕສ຺ເສກຄ຺ຄຕາ ໂຫຕິ.

໕໗໑. ກຕມໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ? ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຘິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ – ອິທໍ ຕສ຺ມິໍ ສມເຍ ວີຣິຍິນ຺ທ຺ຣິຍໍ ໂຫຕິ.

໕໗໒. ກຕມໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ? ຍາ ຕສ຺ມິໍ ສມເຍ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ – ອິທໍ ຕສ຺ມິໍ ສມເຍ ສມາຘິນ຺ທ຺ຣິຍໍ ໂຫຕິ…ເປ… ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ.

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ປຎ຺ຈິນ຺ທ຺ຣິຍານິ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກາ ມໂນວິຎ຺ຎາຓຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

໕໗໓. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ກິຣິຍາ ມໂນວິຎ຺ຎາຓຘາຕຸ ໂສມນສ຺ສສຫຄຕາ.

ກິຣິຍາມໂນວິຎ຺ຎາຓຘາຕຸອຸເປກ຺ຂາສຫຄຕາ

໕໗໔. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ ອຸເປກ຺ຂາສຫຄຕາ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ, ເວທນາ ໂຫຕິ, ສຎ຺ຎາ ໂຫຕິ, ເຈຕນາ ໂຫຕິ, ຈິຕ຺ຕໍ ໂຫຕິ, ວິຕກ຺ໂກ ໂຫຕິ, ວິຈາໂຣ ໂຫຕິ, ອຸເປກ຺ຂາ ໂຫຕິ, ຈິຕ຺ຕສ຺ເສກຄ຺ຄຕາ ໂຫຕິ, ວີຣິຍິນ຺ທ຺ຣິຍໍ ໂຫຕິ, ສມາຘິນ຺ທ຺ຣິຍໍ ໂຫຕິ ມນິນ຺ທ຺ຣິຍໍ ໂຫຕິ, ອຸເປກ຺ຂິນ຺ທ຺ຣິຍໍ ໂຫຕິ, ຊີວິຕິນ຺ທ຺ຣິຍໍ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ, ທ຺ວາຍຕນານິ ໂຫນ຺ຕິ, ທ຺ເວ ຘາຕຸໂຍ ໂຫນ຺ຕິ, ຕໂຍ ອາຫາຣາ ໂຫນ຺ຕິ, ປຎ຺ຈິນ຺ທ຺ຣິຍານິ ໂຫນ຺ຕິ, ເອໂກ ຜສ຺ໂສ ໂຫຕິ…ເປ… ເອກາ ມໂນວິຎ຺ຎາຓຘາຕຸ ໂຫຕິ, ເອກໍ ຘມ຺ມາຍຕນໍ ໂຫຕິ, ເອກາ ຘມ຺ມຘາຕຸ ໂຫຕິ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ – ອິເມ ຘມ຺ມາ ອພ຺ຍາກຕາ…ເປ….

໕໗໕. ກຕໂມ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ? ຜສ຺ໂສ ເຈຕນາ ວິຕກ຺ໂກ ວິຈາໂຣ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ສມາຘິນ຺ທ຺ຣິຍໍ ຊີວິຕິນ຺ທ຺ຣິຍໍ; ເຍ ວາ ປນ ຕສ຺ມິໍ ສມເຍ ອຎ຺ເຎປິ ອຕ຺ຖິ ປຏິຈ຺ຈສມຸປ຺ປນ຺ນາ ອຣູປິໂນ ຘມ຺ມາ ຐເປຕ຺ວາ ເວທນາກ຺ຂນ຺ຘໍ ຐເປຕ຺ວາ ສຎ຺ຎາກ຺ຂນ຺ຘໍ ຐເປຕ຺ວາ ວິຎ຺ຎາຓກ຺ຂນ຺ຘໍ – ອຍໍ ຕສ຺ມິໍ ສມເຍ ສງ຺ຂາຣກ຺ຂນ຺ໂຘ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ກິຣິຍາ ມໂນວິຎ຺ຎາຓຘາຕຸ ອຸເປກ຺ຂາສຫຄຕາ.

ອເຫຕຸກາ ກິຣິຍາ ອພ຺ຍາກຕາ.

ສເຫຕຸກກາມາວຈຣກິຣິຍາ

໕໗໖. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ ກິຣິຍາ ເນວ ກຸສລາ ນາກຸສລາ ນ ຈ ກມ຺ມວິປາກາ ໂສມນສ຺ສສຫຄຕາ ຎາຓສມ຺ປຍຸຕ຺ຕາ…ເປ… ໂສມນສ຺ສສຫຄຕາ ຎາຓສມ຺ປຍຸຕ຺ຕາ ສສງ຺ຂາເຣນ…ເປ… ໂສມນສ຺ສສຫຄຕາ ຎາຓວິປ຺ປຍຸຕ຺ຕາ…ເປ… ໂສມນສ຺ສສຫຄຕາ ຎາຓວິປ຺ປຍຸຕ຺ຕາ ສສງ຺ຂາເຣນ…ເປ… ອຸເປກ຺ຂາສຫຄຕາ ຎາຓສມ຺ປຍຸຕ຺ຕາ…ເປ… ອຸເປກ຺ຂາສຫຄຕາ ຎາຓສມ຺ປຍຸຕ຺ຕາ ສສງ຺ຂາເຣນ…ເປ… ອຸເປກ຺ຂາສຫຄຕາ ຎາຓວິປ຺ປຍຸຕ຺ຕາ…ເປ… ອຸເປກ຺ຂາສຫຄຕາ ຎາຓວິປ຺ປຍຸຕ຺ຕາ ສສງ຺ຂາເຣນ ຣູປາຣມ຺ມຓາ ວາ…ເປ… ຘມ຺ມາຣມ຺ມຓາ ວາ ຍໍ ຍໍ ວາ ປນາຣພ຺ຠ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ …ເປ… ອິເມ ຘມ຺ມາ ອພ຺ຍາກຕາ…ເປ… ອໂລໂຠ ອພ຺ຍາກຕມູລໍ…ເປ… ອໂທໂສ ອພ຺ຍາກຕມູລໍ…ເປ… ອິເມ ຘມ຺ມາ ອພ຺ຍາກຕາ.

ສເຫຕຸກາ ກາມາວຈຣກິຣິຍາ.

ຣູປາວຈຣກິຣິຍາ

໕໗໗. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ປຖວີກສິຓໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໕໗໘. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ວິຕກ຺ກວິຈາຣານໍ ວູປສມາ…ເປ… ທຸຕິຍໍ ຌານໍ…ເປ… ຕຕິຍໍ ຌານໍ…ເປ… ຈຕຸຕ຺ຖໍ ຌານໍ…ເປ… ປຐມໍ ຌານໍ…ເປ… ປຎ຺ຈມໍ ຌານໍ ອຸປສມ຺ປຊ຺ຊ ວິຫຣຕິ ປຖວີກສິຓໍ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

ຣູປາວຈຣກິຣິຍາ.

ອຣູປາວຈຣກິຣິຍາ

໕໗໙. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ສພ຺ພໂສ ຣູປສຎ຺ຎານໍ ສມຕິກ຺ກມາ ປຏິຆສຎ຺ຎານໍ ອຕ຺ຖງ຺ຄມາ ນານຕ຺ຕສຎ຺ຎານໍ ອມນສິກາຣາ ອາກາສານຎ຺ຈາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໕໘໐. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ສພ຺ພໂສ ອາກາສານຎ຺ຈາຍຕນໍ ສມຕິກ຺ກມ຺ມ ວິຎ຺ຎາຓຎ຺ຈາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໕໘໑. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ສພ຺ພໂສ ວິຎ຺ຎາຓຎ຺ຈາຍຕນໍ ສມຕິກ຺ກມ຺ມ ອາກິຎ຺ຈຎ຺ຎາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ.

໕໘໒. ກຕເມ ຘມ຺ມາ ອພ຺ຍາກຕາ? ຍສ຺ມິໍ ສມເຍ ອຣູປາວຈຣໍ ຌານໍ ຠາເວຕິ ກິຣິຍໍ ເນວ ກຸສລໍ ນາກຸສລໍ ນ ຈ ກມ຺ມວິປາກໍ ທິຏ຺ຐຘມ຺ມສຸຂວິຫາຣໍ ສພ຺ພໂສ ອາກິຎ຺ຈຎ຺ຎາຍຕນໍ ສມຕິກ຺ກມ຺ມ ເນວສຎ຺ຎານາສຎ຺ຎາຍຕນສຎ຺ຎາສຫຄຕໍ ສຸຂສ຺ສ ຈ ປຫານາ…ເປ… ຈຕຸຕ຺ຖໍ ຌານໍ ອຸປສມ຺ປຊ຺ຊ ວິຫຣຕິ, ຕສ຺ມິໍ ສມເຍ ຜສ຺ໂສ ໂຫຕິ…ເປ… ອວິກ຺ເຂໂປ ໂຫຕິ…ເປ… ອິເມ ຘມ຺ມາ ອພ຺ຍາກຕາ…ເປ… ອໂລໂຠ ອພ຺ຍາກຕມູລໍ…ເປ… ອໂທໂສ ອພ຺ຍາກຕມູລໍ…ເປ… ອໂມໂຫ ອພ຺ຍາກຕມູລໍ…ເປ… ອິເມ ຘມ຺ມາ ອພ຺ຍາກຕາ.

ອຣູປາວຈຣກິຣິຍາ.

ກິຣິຍາ ອພ຺ຍາກຕາ.

ຈິຕ຺ຕຸປ຺ປາທກຓ຺ຑໍ ນິຏ຺ຐິຕໍ.