໗. ສຕ຺ຕມນໂຍ

໗. ສມ຺ປຍຸຕ຺ເຕນວິປ຺ປຍຸຕ຺ຕປທນິທ຺ເທໂສ

໓໐໖. ເວທນາກ຺ຂນ຺ເຘນ ເຍ ຘມ຺ມາ… ສຎ຺ຎາກ຺ຂນ຺ເຘນ ເຍ ຘມ຺ມາ… ສງ຺ຂາຣກ຺ຂນ຺ເຘນ ເຍ ຘມ຺ມາ… ວິຎ຺ຎາຓກ຺ຂນ຺ເຘນ ເຍ ຘມ຺ມາ… ມນາຍຕເນນ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ, ເຕ ຘມ຺ມາ ກຕິຫິ ຂນ຺ເຘຫິ ກຕິຫາຍຕເນຫິ ກຕິຫິ ຘາຕູຫິ ວິປ຺ປຍຸຕ຺ຕາ? ເຕ ຘມ຺ມາ ຈຕູຫິ ຂນ຺ເຘຫິ ເອເກນາຍຕເນນ ສຕ຺ຕຫິ ຘາຕູຫິ ວິປ຺ປຍຸຕ຺ຕາ; ເອເກນາຍຕເນນ ເອກາຍ ຘາຕຸຍາ ເກຫິຈິ ວິປ຺ປຍຸຕ຺ຕາ.

໓໐໗. ຈກ຺ຂຸວິຎ຺ຎາຓຘາຕຸຍາ ເຍ ຘມ຺ມາ…ເປ… ມໂນຘາຕຸຍາ ເຍ ຘມ຺ມາ… ມໂນວິຎ຺ຎາຓຘາຕຸຍາ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ນ ເກຫິຈິ ຂນ຺ເຘຫິ ນ ເກຫິຈິ ອາຍຕເນຫິ ເອກາຍ ຘາຕຸຍາ ວິປ຺ປຍຸຕ຺ຕາ.

໓໐໘. ມນິນ຺ທ຺ຣິເຍນ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ເອເກນາຍຕເນນ ສຕ຺ຕຫິ ຘາຕູຫິ ວິປ຺ປຍຸຕ຺ຕາ; ເອເກນາຍຕເນນ ເອກາຍ ຘາຕຸຍາ ເກຫິຈິ ວິປ຺ປຍຸຕ຺ຕາ.

໓໐໙. ອຸເປກ຺ຂິນ຺ທ຺ຣິເຍນ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ນ ເກຫິຈິ ຂນ຺ເຘຫິ ນ ເກຫິຈິ ອາຍຕເນຫິ ປຎ຺ຈຫິ ຘາຕູຫິ ວິປ຺ປຍຸຕ຺ຕາ.

໓໑໐. ສງ຺ຂາຣປຈ຺ຈຍາ ວິຎ຺ຎາເຓນ ເຍ ຘມ຺ມາ… ສຬາຍຕນປຈ຺ຈຍາ ຜສ຺ເສນ ເຍ ຘມ຺ມາ… ຜສ຺ສປຈ຺ຈຍາ ເວທນາຍ ເຍ ຘມ຺ມາ… ຜສ຺ເສນ ເຍ ຘມ຺ມາ… ເວທນາຍ ເຍ ຘມ຺ມາ… ສຎ຺ຎາຍ ເຍ ຘມ຺ມາ… ເຈຕນາຍ ເຍ ຘມ຺ມາ… ຈິຕ຺ເຕນ ເຍ ຘມ຺ມາ… ມນສິກາເຣນ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ເອເກນາຍຕເນນ ສຕ຺ຕຫິ ຘາຕູຫິ ວິປ຺ປຍຸຕ຺ຕາ; ເອເກນາຍຕເນນ ເອກາຍ ຘາຕຸຍາ ເກຫິຈິ ວິປ຺ປຍຸຕ຺ຕາ.

໓໑໑. ອຘິໂມກ຺ເຂນ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ນ ເກຫິຈິ ຂນ຺ເຘຫິ ນ ເກຫິຈິ ອາຍຕເນຫິ ເອກາຍ ຘາຕຸຍາ ວິປ຺ປຍຸຕ຺ຕາ.

໓໑໒. ອທຸກ຺ຂມສຸຂາຍ ເວທນາຍ ສມ຺ປຍຸຕ຺ເຕຫິ ຘມ຺ເມຫິ ເຍ ຘມ຺ມາ… ອຸເປກ຺ຂາສຫຄເຕຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ນ ເກຫິຈິ ຂນ຺ເຘຫິ ນ ເກຫິຈິ ອາຍຕເນຫິ ປຎ຺ຈຫິ ຘາຕູຫິ ວິປ຺ປຍຸຕ຺ຕາ.

໓໑໓. ສວິຕກ຺ກສວິຈາເຣຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ນ ເກຫິຈິ ຂນ຺ເຘຫິ ນ ເກຫິຈິ ອາຍຕເນຫິ ເອກາຍ ຘາຕຸຍາ ວິປ຺ປຍຸຕ຺ຕາ.

໓໑໔. ຈິຕ຺ເຕຫິ ຘມ຺ເມຫິ ເຍ ຘມ຺ມາ… ເຈຕສິເກຫິ ຘມ຺ເມຫິ ເຍ ຘມ຺ມາ… ຈິຕ຺ຕສມ຺ປຍຸຕ຺ເຕຫິ ຘມ຺ເມຫິ ເຍ ຘມ຺ມາ … ຈິຕ຺ຕສໍສຏ຺ເຐຫິ ຘມ຺ເມຫິ ເຍ ຘມ຺ມາ… ຈິຕ຺ຕສໍສຏ຺ຐສມຸຏ຺ຐາເນຫິ ຘມ຺ເມຫິ ເຍ ຘມ຺ມາ… ຈິຕ຺ຕສໍສຏ຺ຐສມຸຏ຺ຐານສຫຠູຫິ ຘມ຺ເມຫິ ເຍ ຘມ຺ມາ… ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕີຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ເອເກນາຍຕເນນ ສຕ຺ຕຫິ ຘາຕູຫິ ວິປ຺ປຍຸຕ຺ຕາ; ເອເກນາຍຕເນນ ເອກາຍ ຘາຕຸຍາ ເກຫິຈິ ວິປ຺ປຍຸຕ຺ຕາ.

໓໑໕. ສວິຕກ຺ເກຫິ ຘມ຺ເມຫິ ເຍ ຘມ຺ມາ… ສວິຈາເຣຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ… ເຕ ຘມ຺ມາ ນ ເກຫິຈິ ຂນ຺ເຘຫິ ນ ເກຫິຈິ ອາຍຕເນຫິ ເອກາຍ ຘາຕຸຍາ ວິປ຺ປຍຸຕ຺ຕາ.

໓໑໖. ອຸເປກ຺ຂາສຫຄເຕຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ, ເຕຫິ ຘມ຺ເມຫິ ເຍ ຘມ຺ມາ ວິປ຺ປຍຸຕ຺ຕາ, ເຕ ຘມ຺ມາ ກຕິຫິ ຂນ຺ເຘຫິ ກຕິຫາຍຕເນຫິ ກຕິຫິ ຘາຕູຫິ ວິປ຺ປຍຸຕ຺ຕາ? ເຕ ຘມ຺ມາ ນ ເກຫິຈິ ຂນ຺ເຘຫິ ນ ເກຫິຈິ ອາຍຕເນຫິ ປຎ຺ຈຫິ ຘາຕູຫິ ວິປ຺ປຍຸຕ຺ຕາ.

ຂນ຺ຘາ ຈຕຸໂຣ ອາຍຕນຎ຺ຈ ເມກໍ;

ຘາຕູສຸ ສຕ຺ຕ ທ຺ເວປິ ຈ ອິນ຺ທ຺ຣິຍໂຕ.

ຕໂຍ ປຏິຈ຺ຈ ຕຖຣິວ ຜສ຺ສປຎ຺ຈມາ;

ອຘິມຸຈ຺ຈນາ ມນສິ ຕິເກສຸ ຕີຓິ.

ສຕ຺ຕນ຺ຕຣາ ທ຺ເວ ຈ ມເນນ ຍຸຕ຺ຕາ;

ວິຕກ຺ກວິຈາຣຓາ ອຸເປກ຺ຂກາຍ ຈາຕິ.

ສມ຺ປຍຸຕ຺ເຕນວິປ຺ປຍຸຕ຺ຕປທນິທ຺ເທໂສ ສຕ຺ຕໂມ.