໑໒. ທ຺ວາທສມນໂຍ

໑໒. ສມ຺ປຍຸຕ຺ເຕນສງ຺ຄຫິຕາສງ຺ຄຫິຕປທນິທ຺ເທໂສ

໔໑໗. ເວທນາກ຺ຂນ຺ເຘນ ເຍ ຘມ຺ມາ… ສຎ຺ຎາກ຺ຂນ຺ເຘນ ເຍ ຘມ຺ມາ… ສງ຺ຂາຣກ຺ຂນ຺ເຘນ ເຍ ຘມ຺ມາ ສມ຺ປຍຸຕ຺ຕາ, ເຕ ຘມ຺ມາ ກຕິຫິ ຂນ຺ເຘຫິ ກຕິຫາຍຕເນຫິ ກຕິຫິ ຘາຕູຫິ ສງ຺ຄຫິຕາ? ເຕ ຘມ຺ມາ ຕີຫິ ຂນ຺ເຘຫິ ທ຺ວີຫາຍຕເນຫິ ອຏ຺ຐຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ທສຫາຍຕເນຫິ ທສຫິ ຘາຕູຫິ ອສງ຺ຄຫິຕາ.

໔໑໘. ວິຎ຺ຎາຓກ຺ຂນ຺ເຘນ ເຍ ຘມ຺ມາ… ມນາຍຕເນນ ເຍ ຘມ຺ມາ… ຈກ຺ຂຸວິຎ຺ຎາຓຘາຕຸຍາ ເຍ ຘມ຺ມາ…ເປ… ມໂນຘາຕຸຍາ ເຍ ຘມ຺ມາ… ມໂນວິຎ຺ຎາຓຘາຕຸຍາ ເຍ ຘມ຺ມາ ສມ຺ປຍຸຕ຺ຕາ…ເປ… ເຕ ຘມ຺ມາ ຕີຫິ ຂນ຺ເຘຫິ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໑໙. ສມຸທຍສຈ຺ເຈນ ເຍ ຘມ຺ມາ… ມຄ຺ຄສຈ຺ເຈນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໒໐. ມນິນ຺ທ຺ຣິເຍນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໒໑. ສຸຂິນ຺ທ຺ຣິເຍນ ເຍ ຘມ຺ມາ… ທຸກ຺ຂິນ຺ທ຺ຣິເຍນ ເຍ ຘມ຺ມາ… ໂສມນສ຺ສິນ຺ທ຺ຣິເຍນ ເຍ ຘມ຺ມາ… ໂທມນສ຺ສິນ຺ທ຺ຣິເຍນ ເຍ ຘມ຺ມາ ສມ຺ປຍຸຕ຺ຕາ…, ເຕ ຘມ຺ມາ ຕີຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໒໒. ອຸເປກ຺ຂິນ຺ທ຺ຣິເຍນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ທ຺ວີຫາຍຕເນຫິ ສຕ຺ຕຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ທສຫາຍຕເນຫິ ເອກາທສຫິ ຘາຕູຫິ ອສງ຺ຄຫິຕາ.

໔໒໓. ສທ຺ຘິນ຺ທ຺ຣິເຍນ ເຍ ຘມ຺ມາ… ວີຣິຍິນ຺ທ຺ຣິເຍນ ເຍ ຘມ຺ມາ… ສຕິນ຺ທ຺ຣິເຍນ ເຍ ຘມ຺ມາ… ສມາຘິນ຺ທ຺ຣິເຍນ ເຍ ຘມ຺ມາ… ປຎ຺ຎິນ຺ທ຺ຣິເຍນ ເຍ ຘມ຺ມາ… ອນຎ຺ຎາຕຎ຺ຎສ຺ສາມີຕິນ຺ທ຺ຣິເຍນ ເຍ ຘມ຺ມາ… ອຎ຺ຎິນ຺ທ຺ຣິເຍນ ເຍ ຘມ຺ມາ… ອຎ຺ຎາຕາວິນ຺ທ຺ຣິເຍນ ເຍ ຘມ຺ມາ… ອວິຊ຺ຊາຍ ເຍ ຘມ຺ມາ… ອວິຊ຺ຊາປຈ຺ຈຍາ ສງ຺ຂາເຣຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໒໔. ສງ຺ຂາຣປຈ຺ຈຍາ ວິຎ຺ຎາເຓນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໒໕. ສຬາຍຕນປຈ຺ຈຍາ ຜສ຺ເສນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ອຏ຺ຐຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ທສຫິ ຘາຕູຫິ ອສງ຺ຄຫິຕາ.

໔໒໖. ຜສ຺ສປຈ຺ຈຍາ ເວທນາຍ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ທ຺ວີຫາຍຕເນຫິ ອຏ຺ຐຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ທສຫາຍຕເນຫິ ທສຫິ ຘາຕູຫິ ອສງ຺ຄຫິຕາ.

໔໒໗. ເວທນາປຈ຺ຈຍາ ຕຓ຺ຫາຍ ເຍ ຘມ຺ມາ… ຕຓ຺ຫາປຈ຺ຈຍາ ອຸປາທາເນນ ເຍ ຘມ຺ມາ… ກມ຺ມຠເວນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໒໘. ໂສເກນ ເຍ ຘມ຺ມາ… ທຸກ຺ເຂນ ເຍ ຘມ຺ມາ… ໂທມນສ຺ເສນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໒໙. ອຸປາຍາເສນ ເຍ ຘມ຺ມາ… ສຕິປຏ຺ຐາເນນ ເຍ ຘມ຺ມາ… ສມ຺ມປ຺ປຘາເນນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໓໐. ອິທ຺ຘິປາເທນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໓໑. ຌາເນນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໓໒. ອປ຺ປມຎ຺ຎາຍ ເຍ ຘມ຺ມາ… ປຎ຺ຈຫິ ອິນ຺ທ຺ຣິເຍຫິ ເຍ ຘມ຺ມາ… ປຎ຺ຈຫິ ພເລຫິ ເຍ ຘມ຺ມາ… ສຕ຺ຕຫິ ໂພຊ຺ຌງ຺ເຄຫິ ເຍ ຘມ຺ມາ… ອຣິເຍນ ອຏ຺ຐງ຺ຄິເກນ ມຄ຺ເຄນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໓໓. ຜສ຺ເສນ ເຍ ຘມ຺ມາ… ເຈຕນາຍ ເຍ ຘມ຺ມາ… ມນສິກາເຣນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ອຏ຺ຐຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ທສຫິ ຘາຕູຫິ ອສງ຺ຄຫິຕາ.

໔໓໔. ເວທນາຍ ເຍ ຘມ຺ມາ… ສຎ຺ຎາຍ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ທ຺ວີຫາຍຕເນຫິ ອຏ຺ຐຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ທສຫາຍຕເນຫິ ທສຫິ ຘາຕູຫິ ອສງ຺ຄຫິຕາ.

໔໓໕. ຈິຕ຺ເຕນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໓໖. ອຘິໂມກ຺ເຂນ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ຕີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ປນ຺ນຣສຫິ ຘາຕູຫິ ອສງ຺ຄຫິຕາ.

໔໓໗. ສຸຂາຍ ເວທນາຍ ສມ຺ປຍຸຕ຺ເຕຫິ ຘມ຺ເມຫິ ເຍ ຘມ຺ມາ… ທຸກ຺ຂາຍ ເວທນາຍ ສມ຺ປຍຸຕ຺ເຕຫິ ຘມ຺ເມຫິ ເຍ ຘມ຺ມາ… ອທຸກ຺ຂມສຸຂາຍ ເວທນາຍ ສມ຺ປຍຸຕ຺ເຕຫິ ຘມ຺ເມຫິ ເຍ ຘມ຺ມາ… ສວິຕກ຺ກສວິຈາເຣຫິ ຘມ຺ເມຫິ ເຍ ຘມ຺ມາ… ອວິຕກ຺ກວິຈາຣມຕ຺ເຕຫິ ຘມ຺ເມຫິ ເຍ ຘມ຺ມາ… ປີຕິສຫຄເຕຫິ ຘມ຺ເມຫິ ເຍ ຘມ຺ມາ… ສຸຂສຫຄເຕຫິ ຘມ຺ເມຫິ ເຍ ຘມ຺ມາ… ອຸເປກ຺ຂາສຫຄເຕຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ເອເກນ ຂນ຺ເຘນ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ຈຕູຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໓໘. ເຫຕູຫິ ຘມ຺ເມຫິ ເຍ ຘມ຺ມາ… ເຫຕູຫິ ເຈວ ສເຫຕຸເກຫິ ຈ ຘມ຺ເມຫິ ເຍ ຘມ຺ມາ… ເຫຕູຫິ ເຈວ ເຫຕຸສມ຺ປຍຸຕ຺ເຕຫິ ຈ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໓໙. ສເຫຕຸເກຫິ ເຈວ ນ ຈ ເຫຕູຫິ ຘມ຺ເມຫິ ເຍ ຘມ຺ມາ… ເຫຕຸສມ຺ປຍຸຕ຺ເຕຫິ ເຈວ ນ ຈ ເຫຕູຫິ ຘມ຺ເມຫິ ເຍ ຘມ຺ມາ… ນ ເຫຕຸສເຫຕຸເກຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ເອເກນ ຂນ຺ເຘນ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ຈຕູຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໔໐. ອາສເວຫິ ຘມ຺ເມຫິ ເຍ ຘມ຺ມາ… ອາສເວຫິ ເຈວ ສາສເວຫິ ຈ ຘມ຺ເມຫິ ເຍ ຘມ຺ມາ… ອາສເວຫິ ເຈວ ອາສວສມ຺ປຍຸຕ຺ເຕຫິ ຈ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໔໑. ອາສວສມ຺ປຍຸຕ຺ເຕຫິ ເຈວ ໂນ ຈ ອາສເວຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ເອເກນ ຂນ຺ເຘນ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ຈຕູຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໔໒. ສໍໂຍຊເນຫິ ຘມ຺ເມຫິ ເຍ ຘມ຺ມາ… ຄນ຺ເຖຫິ ຘມ຺ເມຫິ ເຍ ຘມ຺ມາ… ໂອເຆຫິ ຘມ຺ເມຫິ ເຍ ຘມ຺ມາ… ໂຍເຄຫິ ຘມ຺ເມຫິ ເຍ ຘມ຺ມາ… ນີວຣເຓຫິ ຘມ຺ເມຫິ ເຍ ຘມ຺ມາ… ປຣາມາເສຫິ ຘມ຺ເມຫິ ເຍ ຘມ຺ມາ… ປຣາມາເສຫິ ເຈວ ປຣາມຏ຺ເຐຫິ ຈ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໔໓. ປຣາມາສສມ຺ປຍຸຕ຺ເຕຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ເອເກນ ຂນ຺ເຘນ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ຈຕູຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໔໔. ຈິຕ຺ເຕຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຕີຫິ ຂນ຺ເຘຫິ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ທ຺ວີຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

໔໔໕. ເຈຕສິເກຫິ ຘມ຺ເມຫິ ເຍ ຘມ຺ມາ… ຈິຕ຺ຕສມ຺ປຍຸຕ຺ເຕຫິ ຘມ຺ເມຫິ ເຍ ຘມ຺ມາ… ຈິຕ຺ຕສໍສຏ຺ເຐຫິ ຘມ຺ເມຫິ ເຍ ຘມ຺ມາ… ຈິຕ຺ຕສໍສຏ຺ຐສມຸຏ຺ຐາເນຫິ ຘມ຺ເມຫິ ເຍ ຘມ຺ມາ… ຈິຕ຺ຕສໍສຏ຺ຐສມຸຏ຺ຐານສຫຠູຫິ ຘມ຺ເມຫິ ເຍ ຘມ຺ມາ… ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕີຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ເອເກນ ຂນ຺ເຘນ ເອເກນາຍຕເນນ ສຕ຺ຕຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ຈຕູຫິ ຂນ຺ເຘຫິ ເອກາທສຫາຍຕເນຫິ ເອກາທສຫິ ຘາຕູຫິ ອສງ຺ຄຫິຕາ.

໔໔໖. ອຸປາທາເນຫິ ຘມ຺ເມຫິ ເຍ ຘມ຺ມາ… ກິເລເສຫິ ຘມ຺ເມຫິ ເຍ ຘມ຺ມາ… ກິເລເສຫິ ເຈວ ສໍກິເລສິເກຫິ ຈ ຘມ຺ເມຫິ ເຍ ຘມ຺ມາ… ກິເລເສຫິ ເຈວ ສໍກິລິຏ຺ເຐຫິ ຈ ຘມ຺ເມຫິ ເຍ ຘມ຺ມາ… ກິເລເສຫິ ເຈວ ກິເລສສມ຺ປຍຸຕ຺ເຕຫິ ຈ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ… ເຕ ຘມ຺ມາ ຈຕູຫິ ຂນ຺ເຘຫິ ທ຺ວີຫາຍຕເນຫິ ທ຺ວີຫິ ຘາຕູຫິ ສງ຺ຄຫິຕາ. ກຕິຫິ ອສງ຺ຄຫິຕາ? ເອເກນ ຂນ຺ເຘນ ທສຫາຍຕເນຫິ ໂສຬສຫິ ຘາຕູຫິ ອສງ຺ຄຫິຕາ.

໔໔໗. ສໍກິລິຏ຺ເຐຫິ ເຈວ ໂນ ຈ ກິເລເສຫິ ຘມ຺ເມຫິ ເຍ ຘມ຺ມາ… ກິເລສສມ຺ປຍຸຕ຺ເຕຫິ ເຈວ ໂນ ຈ ກິເລເສຫິ ຘມ຺ເມຫິ ເຍ ຘມ຺ມາ… ສວິຕກ຺ເກຫິ ຘມ຺ເມຫິ ເຍ ຘມ຺ມາ… ສວິຈາເຣຫິ ຘມ຺ເມຫິ ເຍ ຘມ຺ມາ… ສປ຺ປີຕິເກຫິ ຘມ຺ເມຫິ ເຍ ຘມ຺ມາ… ປີຕິສຫຄເຕຫິ ຘມ຺ເມຫິ ເຍ ຘມ຺ມາ… ສຸຂສຫຄເຕຫິ ຘມ຺ເມຫິ ເຍ ຘມ຺ມາ… ອຸເປກ຺ຂາສຫຄເຕຫິ ຘມ຺ເມຫິ ເຍ ຘມ຺ມາ ສມ຺ປຍຸຕ຺ຕາ, ເຕ ຘມ຺ມາ ກຕິຫິ ຂນ຺ເຘຫິ ກຕິຫາຍຕເນຫິ ກຕິຫິ ຘາຕູຫິ ສງ຺ຄຫິຕາ? ເຕ ຘມ຺ມາ ເອເກນ ຂນ຺ເຘນ ເອເກນາຍຕເນນ ເອກາຍ ຘາຕຸຍາ ສງ຺ຄຫິຕາ. ກຕິຫິ ອສງ຺ຄຫິຕາ? ຈຕູຫິ ຂນ຺ເຘຫິ ເອກາທສຫາຍຕເນຫິ ສຕ຺ຕຣສຫິ ຘາຕູຫິ ອສງ຺ຄຫິຕາ.

ຣູປກ຺ຂນ຺ຘາ ຈຕ຺ຕາໂຣ, ມນາຍຕນເມວ ຈ;

ວິຎ຺ຎາຓຘາຕຸໂຍ ສຕ຺ຕ, ທ຺ເວ ສຈ຺ຈາ ຈຸທ຺ທສິນ຺ທ຺ຣິຍາ.

ປຈ຺ຈເຍ ທ຺ວາທສ ປທາ, ຕໂຕ ອຸປຣິ ໂສຬສ;

ຕິເກສຸ ອຏ຺ຐ ໂຄຈ຺ຉເກ, ເຕຈຕ຺ຕາລີສເມວ ຈ.

ມຫນ຺ຕຣທຸເກ ສຕ຺ຕ, ປທາ ປິຏ຺ຐິທຸເກສຸ ຉ;

ນວມສ຺ສ ປທສ຺ເສເຕ, ນິທ຺ເທເສ ສງ຺ຄຫໍ ຄຕາຕິ.

ສມ຺ປຍຸຕ຺ເຕນສງ຺ຄຫິຕາສງ຺ຄຫິຕປທນິທ຺ເທໂສ ທ຺ວາທສໂມ.