໙. ມຫາຣຏ຺ຐສາສນວໍສກຖາມຄ຺ໂຄ

໙. ອິໂຕ ປຣໍ ມຫາຣຏ຺ຐສາສນວໍສກຖາມຄ຺ຄໍ ກຖຍິສ຺ສາມິ ຍຖາວຸຕ຺ຕມາຕິກາວເສນ.

ຕຕິຍສງ຺ຄີຕາວສາເນ ຫິ ມຫາໂມຄ຺ຄລິປຸຕ຺ຕຕິສ຺ສຕ຺ເຖໂຣ ມຫາຘມ຺ມຣກ຺ຂິຕ຺ເຖຣໍ ມຫາຣຏ຺ຐໍ ເປເສສິ,-ຕ຺ວໍ ເອຕໍ ຣຏ຺ຐໍ ຄນ຺ຕ຺ວາ ເອຕ຺ຖ ສາສນໍ ປຕິຏ຺ຐາເປສີຕິ.

ມຫາຘມ຺ມຣກ຺ຂິຕຕ຺ເຖໂຣຈ ອຕ຺ຕປຎ຺ຈໂມ ຫຸຕ຺ວາ ມຫາຣຏ຺ຐໍ ຄນ຺ຕ຺ວາ ມຫານາຣທກສ຺ສປຊາຕກກຖາຍ ມຫາຣຏ຺ຐເກ ປສາເທຕ຺ວາ ຈຕຸຣາສີຕິປາຓສຫສ຺ສານິ ມຄ຺ຄຜເລສຸ ປຕິຏ຺ຐາເປສິ. ເຕຣສສຫສ຺ສານິ ປພ຺ພຊິໍສຸ. ເອວໍ ໂສ ຕຕ຺ຖ ສາສນໍ ປຕິຏ຺ຐາເປສິ.

ມຫາຣຏ຺ຐໍ ອິສິ ຄນ຺ຕ຺ວາ, ໂສ ມຫາ ຘມ຺ມຣກ຺ຂິໂຕ;

ຊາຕກໍ ກຖຍິຕ຺ວານ, ປສາເທສິ ມຫາຊນນ຺ຕິ.

ຕຕ຺ຖ ກິຣ ມນຸສ຺ສາ ປຸພ຺ເພ ອຄ຺ຄິຫຸຕາທິມິຈ຺ຉາກມ຺ມໍ ເຍຠຸຍ຺ເຍນ ອກໍສຸ. ເຕເນວ ເຖໂຣ ມຫານາຣທກສ຺ສປຊາຕກກຖໍ ເທເສສິ. ຕໂຕ ປຏ຺ຐາຍ ຕຕ຺ຖ ມນຸສ຺ສາ ຊາຕກ ກຖໍ ເຍຠຸຍ຺ເຍນ ໂສຕຸໍ ອຕິວິຍ ອິຈ຺ຉນ຺ຕິ. ຠິກ຺ຂູຈ ເຍຠຸຍ຺ເຍນ ຄຫຏ຺ຐານໍ ຊາຕກກຖໍເຍວ ເທເສນ຺ຕິ. ວິເສສໂຕ ປນ ວສ຺ສນ຺ຕຣຊາຕກກຖໍ ເຕ ມນຸສ຺ສາ ພຫູຫິ ທາຕພ຺ພວຕ຺ຖູຫິ ປູເຊຕ຺ວາ ສຸຓນ຺ຕິ.

ຕຎ຺ຈ ມຫາຣຏ຺ຐໍ ນາມ ສ຺ຍາມຣຏ຺ຐສມີເປ ຐິຕໍ, ເຕເນວ ສ຺ຍາມຣຏ຺ຐວາສິໂນປິ ຠິກ຺ຂູ ຄຫຏ຺ຐາຈ ເຍຠຸຍ຺ເຍນ ໂສຕຸໍ ອິຈ຺ຉນ຺ຕີຕິ. ມຫາຘມ຺ມຣກ຺ຂິຕຕ຺ເຖໂຣປິ ມຫາຣຏ຺ຐວາສີຫິ ສທ຺ຘິໍ ສກລສ຺ຍາມຣຏ຺ຐວາສີນໍ ຘມ຺ມໍ ເທເສສິ, ອມຕຣສໍ ປາເຍສິ, ຍຖາ ໂຍນກຘມ຺ມຣກ຺ຂິຕຕ຺ເຖໂຣ ອປຣນ຺ຕຣຏ຺ຐໍ ຄນ຺ຕ຺ວາ ສກລມຣມ຺ມຣຏ຺ຐວາສີນນ຺ຕິ.

ຍໍ ປນ ໂຍນກຣຏ຺ຐສາສນວໍສກຖາຍໍ ວຸຕ຺ຕໍ, ຕມ຺ປິ ສພ຺ພໍ ເອຕ຺ຖາປິ ທຏ຺ຐພ຺ພໍເຍວ, ເຕຫິ ຕສ຺ສ ເອກສທິສຕ຺ເຕນ ຐິຕຕ຺ຕາຕິ. ຕຖາ ຫິ ນາຄເສນຕ຺ເຖໂຣປິ ໂຍນກຣຏ຺ເຐ ວສິຕ຺ວາ ສ຺ຍາມຣຏ຺ຐາທີສຸປິ ສາສນໍ ປຕິຏ຺ຐາເປສິ. ໂຍນກຣຏ຺ຐວາສິໂນ ມຫາຘມ຺ມຄມ຺ຠີຣຕ຺ເຖຣມຫາເມຘງ຺ກຣຕ຺ເຖຣາຈ ສທ຺ຘິໍ ພຫູຫິ ຠິກ຺ຂູຫິ ສີຫຬທີປໍ ຄນ຺ຕ຺ວາ ຕໂຕ ປຸນາຄນ຺ຕ຺ວາ ສ຺ຍາມຣຏ຺ເຐ ໂສກ຺ກຕຍນຄຣໍ ປຕ຺ວາ ຕຕ຺ຖ ນິສີທິຕ຺ວາ ສາສນໍ ປຄ຺ຄຓ຺ຫິຕ຺ວາ ປຈ຺ຉາ ລກຸນ຺ນນຄເຣ ນິສີທິຕ຺ວາ ສາສນໍ ປຄ຺ຄຓ຺ຫິ. ເອວໍ ໂຍນກຣຏ຺ເຐ ສາສນໍ ຐິຕໍ ສ຺ຍາມາທີສຸປິ ຐິຕໍເຍວາຕິ ທຏ຺ຐພ຺ພໍ.

ພຸທ຺ຘສ຺ສ ຠຄວໂຕ ປຣິນິພ຺ພານໂຕ ທ຺ວິສຕາຘິການໍ ທ຺ວິນ຺ນໍ ວສ຺ສສຫສ຺ສານໍ ອຸປຣິ ນວຸຕິເມ ວສ຺ສ ສີຫຬທີເປ ຣຊ຺ຊໍ ປຕ຺ຕສ຺ສ ກິຕ຺ຕິສ຺ສິຣິຣາຊສີຫມຫາຣາຊສ຺ສ ອຠິເສກໂຕ ຕຕິເຍ ວສ຺ເສ ເຕເນວ ກິຕ຺ຕິສ຺ສິຣິຣາຊສີຫມຫາຣຎ຺ຎາ ປຫິຕປຓ຺ຓາກາຣສາສນໍ ອາຄມ຺ມ ສຣາມາຘິປຕິຘມ຺ມິກມຫາຣາຊາຘິຣາເຊນາຓຕ຺ເຕຫິ ລງ຺ກາທີປໍ ອາຄເຕຫິ ອຸປາລິຕ຺ເຖ ຣາທີຫິ ປຕິຏ຺ຐາປິໂຕ ວໍໂສ ອຸປາລິວໍໂສຕິ ປາກໂຏ. ໂສຈ ທຸວິໂຘ ປຸພ຺ພາຣາມວິຫາຣວາສີອຠຍຄິຣິວິຫາຣວາສີວເສນາຕິ. ເອວໍ ມຫານຄຣໂຍນກລ຺ຍາມຣຏ຺ເຐສຸ ສາສນໍ ຖິຣໍ ຫຸຕ຺ວາ ຕິຏ຺ຐຕີຕິ ເວທິຕພ຺ພນ຺ຕິ.

ອິຕິ ສາສນວໍເສ ມຫາຣຏ຺ຐສາສນວໍສກຖາມຄ຺ໂຄ ນາມ

ນວໂມ ປຣິຈ຺ເຉໂທ.