໔. ໂຍນກຣຏ຺ຐສາສນວໍສກຖາມຄ຺ໂຄ

໔. ອິທານິ ປນ ໂຍນກຣຏ຺ເຐ ສາສນສ຺ສຸປ຺ປຕ຺ຕິໍ ກເຖສ຺ສາມິ. ຠຄວາ ຫິ ເວເນຍ຺ຍຫິຕາວໂຫ ໂຍນກຣຏ຺ເຐ ມມສາສນໍ ຈິຣກາລໍ ປຠິຏ຺ຐຫິສ຺ສຕີຕິ ອາເປກ຺ຂິຕ຺ວາ ສທ຺ຘິໍ ຠິກ຺ຂຸ ສງ຺ເຆນ ເທສຈາຣິກໍ ອາຫິຓ຺ຑນ຺ໂຕ ລຠຸຎ຺ຊໍ ນາມ ນຄຣໍ ອຄມາສິ. ຕທາ ເອໂກ ເນສາໂທ ຫຣິຜລໍ ທຕ຺ວາ ຕໍ ປຣິຠຸຎ຺ຊິຕ຺ວາ ຫຣິພີເຊ ຂິປິເຕ ປຖວິຍໍ ອປຕິຕ຺ວາ ອາກາເສເຍວ ປຕິຏ຺ຐາສິ. ຕໍ ທິສ຺ວາ ສິຕໍ ປຕ຺ວາກາສິ. ຕມຕ຺ຖໍ ທິສ຺ວາ ອານນ຺ທຕ຺ເຖໂຣ ປຸຈ຺ຉິ. ອນາຄເຕ ໂຂ ອານນ຺ທ ອິມສ຺ມິໍ ຐາເນ ມມ ຘາຕຸເຈຕິຍໍ ປຕິຏ຺ຐຫິສ຺ສຕິ, ສາສນໍ ວິຣູຬມາປຊ຺ຊິສ຺ສຕີຕິ ພ຺ຍາກາສິ. ຠຄວຕາ ປນ ຫຣິຜລສ຺ສ ຠຸຎ຺ຊິຕຏ຺ຐານຕ຺ຕາຫຣິຠຸຎ຺ໂຊຕິ ຕສ຺ສ ຣຏ຺ຐສ຺ສ ນາມໍ ອໂຫສິ. ທ຺ວິນ຺ນໍ ຕາປສານໍ ຐປິຕໍ ຊລສຸຕ຺ຕິກໍ ປຏິຈ຺ຈ ໂຍນການໍ ຠາສາຍ ລຠຸຎ຺ໂຊຕິ ນາມໍ ອໂຫສິ.

ຕທາ ຕຕ຺ຖ ມປິນ຺ນາຍ ນາມ ເອກິສ຺ສາ ມາຕິກາຍ ສມີເປ ນິສິນ຺ໂນ ເອໂກ ລວກຸລິກເຊຏ຺ຐໂກ ອຕ຺ຕໂນ ປຸຕ຺ຕໍ ສຕ຺ຕວສ຺ສິກໍ ຠຄວໂຕ ນິຍ຺ຍາເທຕ຺ວາ ປພ຺ພາເຊສິ. ກມ຺ມຏ຺ຐານານຸໂຍຄວເສນ ອຈິເຣເນວ ອຣຫຕ຺ຕໍ ປາປຸຓິ. ສຕ຺ຕວສ຺ສິ ກສ຺ສຈ ສາມເຓຣສ຺ສ ອຣຫຕ຺ຕໍ ສຈ຺ຉິກຕຏ຺ຐານຕໍ ປຏິຈ຺ຈ ໂຍນກຠາສາຍ ເອຕໍ ຐານໍ ຈງ຺ຄມງ຺ຆ ອິຕິ ວຸຈ຺ຈຕິ. ຈິຣກາລ ວເສນ ຊງ຺ຄມງ຺ຆ ອິຕິ ວຸຈ຺ຈຕິ. ຕໂຕ ປຏ຺ຐາຍເຍວ ໂຍນກຣຏ຺ເຐ ສາສນໍ ປຕິຏ຺ຐາຕີຕິ.

ອິທໍ ໂຍນກຣຏ຺ເຐ ປຐມໍ ສາສນສ຺ສ ປຕິຏ຺ຐານໍ.

ສາສເນ ປນ ປຎ຺ຈຕິໍສາຘິເກ ທ຺ວິວສ຺ສສເຕ ສມ຺ປຕ຺ເຕ ມຫາຣກ຺ຂິຕຕ຺ເຖໂຣ ໂຍນກຣຏ຺ຐໍ ຄນ຺ຕ຺ວາ ກມ຺ໂພຊເຂມາວຣ ຫຣິຠຸຎ຺ຊາຍຸທ຺ຘຍາທີສຸ ອເນເກສຸ ຣຏ຺ເຐສຸ ສາສນໍ ປຕິຏ຺ຐາເປຕິ. ຕານິ ຫິ ສພ຺ພານິ ຣຏ຺ຐານິ ສງ຺ຄເຫຕ຺ວາ ທສ຺ເສນ຺ເຕຫິ ອຏ຺ຐກຖາຈຣິເຍຫິ ໂຍນກໂລກນ຺ຕິ ໂອກາສກາໂລກວາຈເກນ ສາມຎ຺ຎສທ຺ເທນ ວຸຕ຺ຕໍ. ປກຕິ ເຫສາ ຄນ຺ຖກາຣານໍ ເຍນ ເກນຈາກາເຣນ ອຕ຺ຖນ຺ຕຣສ຺ສ ວິຎ຺ຎາປນາຕິ.

ມຫາຣກ຺ຂິຕຕ຺ເຖໂຣ ຈ ສທ຺ຘິໍ ປຎ຺ຈຫິ ຠິກ຺ຂູຫິ ປາຏລິປຸຕ຺ຕໂຕ ອນິລປຖມຄ຺ເຄນ ໂຍນກໂລກໍ ອາຄນ຺ຕ຺ວາ ກາຬກາຣາມສຸຕ຺ເຕນ ໂຍນເກ ປສາເທສິ. ສຕ຺ຕຕິສຫສ຺ສາຘິກປາຓສຕສຫສ຺ສໍ ມຄ຺ຄຜລາລງ຺ກາຣໍ ອທາສິ. ສນ຺ຕິເກ ຈສ຺ສ ທສສຫສ຺ສານິ ປພ຺ພຊິໍສຸ. ເອວໍ ໂສ ຕຕ຺ຖສາສນໍ ປຕິຏ຺ຐາເປສິ. ຕຖາ ຈ ວຸຕ຺ຕໍ ອຏ຺ຐກຖາຍໍ,–

ໂຍນກຣຏ຺ຐໍ ຕທາ ຄນ຺ຕ຺ວາ, ໂສ ມຫາຣກ຺ຂິໂຕ ອິສິ;

ກາຬກາຣາມສຸຕ຺ເຕນ, ເຕ ປສາເທສິ ໂຍນເກຕິ.

ຕໂຕ ປຏ຺ຐາຍ ເຕສໍ ສິສ຺ສປຣມ຺ປຣາ ພຫູ ໂຫນ຺ຕິ, ຄຓນປຖໍ ວີຕິວຕ຺ຕາ.

ອິທໍ ໂຍນກຣຏ຺ເຐ ມຫາຣກ຺ຂິຕຕ຺ເຖຣາທໂຍ ປຏິຈ຺ຈ

ທຸຕິຍໍ ສາສນສ຺ສ ປຕິຏ຺ຐານໍ.

ໂຍນກຣຏ຺ເຐ ລກຸນ຺ນນຄເຣ ຊິນຈກ຺ເກ ປຎ຺ຈວສ຺ສສເຕ ມຓິມຍໍ ພຸທ຺ຘປ຺ປຏິມໍ ມາເປຕ຺ວາ ວິສຸກມ຺ມເທວປຸຕ຺ໂຕ ນາຄເສນຕ຺ເຖຣສ຺ສ ອທາສິ. ນາເຄເສນຕ຺ເຖໂຣ ຈ ຕສ຺ມິໍ ປຏິມມ຺ຫິ ຘາຕຸ ອາຄນ຺ຕ຺ວາ ປຕິຏ຺ຐາຕູຕິ ອຘິຏ຺ຐາສິ. ອຘິຏ຺ຐານວເສເນວ ສຕ຺ຕຘາຕຸໂຍ ອາຄນ຺ຕ຺ວາ ຕຕ຺ຖ ປຕິຏ຺ຐຫິຕ຺ວາ ປາຏິຫາຣິຍໍ ທສ຺ເສສຸນ຺ຕິ ຣາຊວໍເສ ວຸຕ຺ຕໍ.

ຕຎ຺ຈ ວຈນໍ ມມ ປຣິນິພ຺ພານໂຕ ປຎ຺ຈວສ຺ສສເຕ ອຕິກ຺ກນ຺ເຕ ເອເຕ ອຸປ຺ປຊ຺ຊິສ຺ສນ຺ຕີຕິ ມິລິນ຺ທປຎ຺ຫາຍໍ ວຸຕ຺ຕວຈເນນ ກາລປຣິມາຓວເສນ ຈ ສເມຕິ. ໂຍນກຣຏ຺ເຐ ມິລິນ຺ທຣຎ຺ໂຎ ກາເລ ຊິນຈກ຺ເກ ປຎ຺ຈວສ຺ສສເຕເຍວ ນາຄເສນຕ຺ເຖຣໍ ປຏິສ຺ສ ຊິນຈກ຺ກໍ ວິຣູຬໍ ຫຸຕ຺ວາ ປຕິຏ຺ຐາສິ.

ອິທໍ ໂຍນກຣຏ຺ເຐ ນາຄເສນຕ຺ເຖຣໍ ປຏິຈ຺ຈ ຕຕິຍໍ

ສາສນສ຺ສ ປຕິຏ຺ຐານໍ.

ກລິຍຸເຄ ປຎ຺ຈສຏ຺ຐິວສ຺ເສລຠຸຎ຺ຊນຄຣໂຕ ສງ຺ກມິຕ຺ວາ ກ຺ຍຸງ຺ຄຣນຄເຣ ມາປິກສ຺ສ ພຎ຺ຎາໂຈມງ຺ຄຣ ນາມກສ຺ສ ຣຎ຺ໂຎ ກາເລ ມຊ຺ຌິມເທສໂຕ ກສ຺ສປຕ຺ເຖໂຣ ປຎ຺ຈຫິ ເຖເຣຫິ ສທ຺ຘິໍ ອາຄຈ຺ຉິ.

ຕທາ ໂສ ຣາຊາ ວິຫາຣໍ ກຕ຺ວາ ເຕສໍ ອທາສິ. ສີຫຬທີປໂຕ ຈ ຘາຕຸໂຍ ອາເນຕ຺ວາ ເອໂກ ເຖໂຣ ອາຄຈ຺ຉິ. ຘາຕຸໂຕ ປາຏິຫາຣິຍໍ ທິສ຺ວາ ປສີທິຕ຺ວາ ລຠຸຎ຺ຊເຈຕິຍ ນິຘານໍ ອກາສິ. ເຕ ຈ ເຖເຣ ປຏິຈ຺ຈ ໂຍນກຣຏ຺ເຐ ສາສນ ວໍໂສ ອາຄໂຕ.

ອິທໍ ໂຍນກຣຏ຺ເຐ ຈຕຸຕ຺ຖໍ ສາສນສ຺ສ ປຕິຏ຺ຐານໍ.

ກລິຍຸເຄ ທ຺ວາສຏ຺ຐາຘິເກ ສຕ຺ຕສເຕ ສມ຺ປຕ຺ເຖ ຈິນຣຏ຺ຐິນ຺ໂທ ຣາຊາ ອຠິຠວິຕ຺ວາ ສກລມ຺ປິ ໂຍນກຣຏ຺ຐໍ ສງ຺ຂຸພ຺ຠິຕໍ ໂຫຕິ. ຕທາ ມຫາຘມ຺ມຄມ຺ຠີຣຕ຺ເຖໂຣ ມຫາເມຘງ຺ກຣຕ຺ເຖ ໂຣຈາຕິ ທ຺ເວ ເຖໂຣ ໂຍນກຣຏ຺ຐໂຕ ສທ຺ຘິໍ ພຫູຫິ ຠິກ຺ຂູຫິ ສີຫຬທີປໍ ອຄມໍສຸ. ຕທາ ຈ ສີຫຬທີເປ ທຸພ຺ຠິກ຺ຂຠເຍນ ອຠິຠູໂຕ ຫຸຕ຺ວາ ຕໂຕ ສ຺ຍາມຣຏ຺ເຐ ໂສກ຺ກຕຍນຄຣໍ ປຸນ ອຄມໍສຸ.

ຕໂຕ ປຈ຺ຉາ ລກຸນ຺ນນຄຣໍ ຄນ຺ຕ຺ວາ ສາສນໍ ປຄ຺ຄຓ຺ຫນ຺ຕານໍ ລຊ຺ຊິເປສລານໍ ຠິກ຺ຂູນໍ ສນ຺ຕິເກ ປຸນ ສິກ຺ຂໍ ຄຓ຺ຫິໍສຸ. ເຕ ຈ ເຖໂຣ ສ຺ຍາມຣຏ຺ເຐ ໂຍນກຣຏ຺ເຐ ຈ ສພ຺ພຕ຺ຖ ສາສນໍ ປຕິຏ຺ຐາເປສຸນ຺ຕິ.

ອິທໍ ໂຍນກຣຏ຺ເຐ ປຕ຺ຕລງ຺ເກ ທ຺ເວ ເຖເຣ ປຏິຈ຺ຈ ປຎ຺ຈມໍ

ສາສນສ຺ສ ປຕິຏ຺ຐານໍ.

ກລິຍຸເຄ ປຎ຺ຈວີສາຘິເກ ອຏ຺ຐວສ຺ສສເຕ ສມ຺ປຕ຺ເຕ ສິຣິສທ຺ຘມ຺ມໂລກປຕິຈກ຺ກວຕ຺ຕິຣາຊາ ລຠຸຎ຺ຊເຈຕິຍໍ ປຸນ ມຫນ຺ຕໍ ກຕ຺ວາ ຕສ຺ສ ເຈຕິຍສ຺ສ ສມີເປ ຈຕ຺ຕາໂຣ ວິຫາເຣ ກາຣາເປຕ຺ວາ ມຫາເມຘງ຺ກຣຕ຺ເຖຣສ຺ສ ສາຣິປຸຕ຺ຕຕ຺ເຖຣສ຺ສ ຈ ອທາສິ. ຕທາປິ ເຕ ທ຺ເວ ເຖຣາ ສາສນໍ ປຣິສຸທ຺ຘໍ ກຕ຺ວາ ປຕິຏ຺ຐາເປສຸນ຺ຕິ.

ອິທໍ ໂຍນກຣຏ຺ເຐ ມຫາເມຘງ຺ກຣສາຣິປຸຕ຺ຕຕ຺ເຖເຣ

ປຏິຈ຺ຈ ຉຏ຺ຐໍ ສາສນສ຺ສ ປຕິຏ຺ຐານໍ.

ກລິຍຸເຄ ເຕຈຕ຺ຕາລີສາຘິເກ ນວວສ຺ສສເຕ ສມ຺ປຕ຺ເຕ ຫໍສາວຕີນຄເຣ ອເນກເສຕິຠິນ຺ໂທ ນາມ ຣາຊາ ໂຍນກຣຏ຺ຐໍ ອຠິຠວິຕ຺ວາ ອຕ຺ຕໂນ ຫຕ຺ຖຄຕໍ ກຕ຺ວາ ພລິ ຠຸຎ຺ຊນຕ຺ຖາຍ ເຊຏ຺ຐປຸຕ຺ຕສ຺ສ ອນຸຣຸທ຺ຘສ຺ສ ນາມ ຣາຊກຸມາຣສ຺ສ ທຕ຺ວາ ພຫູຫິ ອມຈ຺ເຈຫິ ສທ຺ຘິໍ ຕຕ຺ຖ ຄນ຺ຕ຺ວາ ອນຸຣາຊຕາເວນ ຣຊ຺ຊໍ ກາຣາເປສິ. ສາສນຎ຺ຈ ວິໂສຘາເປຕຸໍ ສທ຺ຘມ຺ມຈກ຺ກສາມິຕ຺ເຖຣໍ ເຕນ ສທ຺ຘິໍ ປຫິຓິ.

ອເນກເສຕິຠິນ຺ໂນ ກິຣ ຣາຊາ ໂຍນກຣຏ຺ຐໍ ວິຊຍກາເລ ປຐມໍ ສາສນສ຺ສ ປຕິຏ຺ຐານຠູຕມິທນ຺ຕິ ກຕ຺ວາ ຕໍຣຏ຺ຐວາສິໂນ ກຣມຣານີຕຠາເວນ ນ ອຄ຺ຄເຫສີຕິ.

ຍຖາວຸຕ຺ຕຕ຺ເຖຣວໍເສສຸ ຈ ເອໂກ ລກຸນ຺ນນຄເຣ ອຣຎ຺ຎວາສີ ເຖໂຣ ຕຕ຺ຖ ນຄເຣ ອຊ຺ຊ ອສຸກສ຺ມິໍ ຐາເນ ເອໂກ ມໂຕຕິ ຄິຫີນໍ ກເຖຕ຺ວາ ຍຖາກຖິຕໍ ຠູຕໍ ຫຸຕ຺ວາ ອຍໍ ອຠິຎ຺ຎາລາຠີຕິ ປາກໂຏ ອໂຫສິ.

ຕສ຺ມິໍເຍວ ຈ ນຄເຣ ມຫາມງ຺ຄໂລ ນາມ ເຖໂຣ ອເນກເສຕິຠິນ຺ທສ຺ສ ຣຎ຺ໂຎ ຍຸຊ຺ຌິຕຸໍ ອາຄຕກາເລ ອເນກເສຕິຠິນ຺ໂທ ຣາຊາ ມໍ ປກ຺ໂກສິສ຺ສຕິ, ສມານຊາຕິກໍ ທູຕໍ ເປສ຺ເສສ຺ສຕີຕິ ປກ຺ໂກສິຕກາລໂຕ ປຐມເມວວທິ. ຍຖາວຸຕ຺ຕນິຍາເມເນວ ປກ຺ໂກສນໂຕ ອຍໍ ອຠິຎ຺ຎາ ລາຠີຕິ ກິຕ຺ຕິ ໂຆໂສ ອໂຫສິ.

ຕຕ຺ຖ ນຄເຣ ຎາຓວິລາສຕ຺ເຖໂຣ ສງ຺ຂ຺ຍາປກາສກໍ ນາມ ປກຣຓໍ ອກາສິ. ຕໍຬີກໍ ປນ ປຕ຺ຕລງ຺ກຕ຺ເຖຣສ຺ສ ວິຫາເຣ ວສນ຺ໂຕ ສິຣິມງ຺ຄໂລນາມ ເຖໂຣ ອກາສິ.

ວິສຸທ຺ຘິມຄ຺ຄທີປນິໍ ປນ ສໍຎ຺ຎ຺ວຕ຺ຕອຣຎ຺ຎວາສີ ອຸຕ຺ຕຣາຣາໂມ ນາມ ເອໂກ ເຖໂຣ. ມງ຺ຄລທີປນິໍ ສິຣິມງ຺ຄລຕ຺ເຖໂຣ. ອຸປ຺ປາຕສນ຺ຕິໍ ອຎ຺ຎຕໂຣ ເຖໂຣ. ຕໍ ກິຣ ອຸປ຺ປາຕສນ຺ຕິໍ ສຊ຺ຌາຍິຕ຺ວາ ຈີນຣຎ຺ໂຎ ເສນໍ ອຊິນີຕິ. ອິຈ຺ເຈວໍ ໂຍນກຣຏ຺ເຐ ອຠິຎ຺ຎາລາຠີນໍ ຄນ຺ຖກາຣານຎ຺ຈ ເຖຣານໍ ອານຸຠາເວນ ຊິນສາສນໍ ປຣິສຸທ຺ຘໍ ຫຸຕ຺ວາ ປຕິຏ຺ຐາຕິ. ເອວໍ ເຫຕຸຜລສມ຺ພນ຺ຘວເສນ ອາທິ ອນ຺ຕ ສມ຺ພນ຺ຘວເສນ ຈ ຍຖາວຸຕ຺ເຕຫິ ຕີຫິ ນເຍຫິ ເຖຣປຣມ຺ປຣາ ຆຏ຺ເຏຕ຺ວາ ຄເຫຕພ຺ພາ.

ອິຕິ ສາສນວໍເສ ໂຍນກຣຏ຺ຐສາສນວໍສກຖາ

ມຄ຺ໂຄ ນາມ ຈຕຸຕ຺ໂຖ ປຣິຈ຺ເຉໂທ.