ສມນ຺ຕກູຏວຓ຺ຓນາ |ໂອ໐.໐໐໐໑|

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

໑. ສຕຕວິຕຕ ກິຕ຺ຕິໍ ຘສ຺ຕກນ຺ທປ຺ປທປ຺ປໍ

ຕິຠວຫິຕວິຘານໍ ສພ຺ພໂລເກກເກຕຸໍ,

ອມິຕມຕິມນຄ຺ຆໍ ສນ຺ຕິທໍ ເມຣຸສາຣໍ

ສຸຄຕມຫມຸທາຣໍ ຣູປສາຣໍ ນມາມິ;

໒. ຫຕທຸຣິຕຕຸສາຣໍ ໂມຫປງ຺ໂກປຕາປໍ

ມນກມລວິກາສໍ ຊນ຺ຕຸນໍ ເສສການໍ,

ກຸມຕິກຸມຸທນາສໍ ພຸທ຺ຘປຸພ຺ພາຈລຄ຺ຄາ

ອຸທິຕມຫມຸທາຣໍ ຘມ຺ມຠານຸໍ ນມາມິ;

໓. ສກລວິມລສີລໍ ຘຸຕປາປາຣິຊາລໍ

ສຸຣນຣມຫນີຍໍ ປາຫຸເນຍ຺ຍາຫຸເນຍ຺ຍໍ,

ອຸຊຸປຖປຏິປນ຺ນໍ ປຸຎ຺ຎເຂຕ຺ຕໍ ຊນານໍ

ຄຓມຫມຠິວນ຺ເທ ສາຣທໍ ສາທເຣນ;

໔. ອິຕິ ກຬິຕ ປຓາມາ ຫນ຺ຕ຺ວ ສພ຺ໂພປສຄ຺ເຄ

ສຸຄຕວິມລ ປາທມ຺ໂຠຊສມ຺ປາຕ ປູຕໍ,

ສຸມນສິຂຣິຣາຊໍ ວຓ຺ຓຍິສ຺ສໍ ສຸຣານໍ

ວສຕິ ມຕຸລເມຕໍ ສາຘຸຊນ຺ຕຸ ສຸຓນ຺ຕຸ;

໕. ສວຓາ ລປນາ ເຈວ ສຕິຍາ ຈາປິ ວນ຺ທນາ,

ຍສ຺ສ ສມ຺ມາ ສຸຂີ ໂຫຕີ ນິພ຺ພາຓຎ຺ຈາຘິຄຈ຺ຉຕິ;

໖. |ໂອ໐.໐໐໐໒|

ຕສ຺ມາ ສປ຺ປຸຣິເສເຫ’ທໍ ປຕ຺ເຖນ຺ເຕຫິ ຕິສມ຺ປທໍ,

ສວຓີຍຎ຺ຫິ ສາຘູຫິ ອຈິກ຺ຂິຕ຺ເຕນ ເຈຕສາ;

໗. ໂຍ ໂລກຕິລໂກ ນາໂຖ ປູເຣຕ຺ວາ ທສ ປາຣມີ,

ຊາໂຕສິ ຕຸສິເຕ ກາເຍ ສນ຺ຕຸສິໂຕ’ຕິ ວິສ຺ສຸໂຕ;

໘. ອາຣາຘິໂຕ ສຸຣາທີຫິ ກາໂລ ມາຣິສ ເຕ ອຍໍ,

ຕິຓ຺ໂຓ ຕາຣຍິມໍ ໂລກໍ ພຫູ ອປ຺ປຣຊກ຺ຂກາ;

໙. ເອຕທຕ຺ຖາຍ ເຕ ວີຣ ປູຣິຕາ ທສ ປາຣມີ,

ພາຫຸໍ ປິຕຸສ຺ສ ປຸຕ຺ໂຕ’ວ ໂລໂກ ອາລມ຺ພເຕ ຕຸວໍ;

໑໐. ເຕສໍ ຕໍ ວຈນໍ ສຸຕ຺ວາ ມຫາສຕ຺ໂຕ ມຫາມຕີ,

ວິໂລກເນ ວິໂລເກຕ຺ວາ ປຎ຺ຈາມລ ວິໂລຈໂນ;

໑໑. ຊມ຺ພຸທີປຄ຺ຄກມເລ ກຓ຺ຓິກາ’ວ ມໂນຣມາ,

ປຸຣີ ກປິຬວຕ຺ຖູ’ສິ ວິສາຓາ’ວ ສຸຘາສິນໍ;

໑໒. ສິງ຺ຄີນິກ຺ຂມຍາຠາສ ຕຸງ຺ຄສິງ຺ຄສມງ຺ຄິຕາ,

ມຓິສີຫປຎ຺ຊຣາກິຓ຺ຓ ປາສາທາ ຍຕ຺ຖ ຠາສເຣ;

໑໓. ສຆເນ ຄຄເນ ນິຈ຺ຈໍ ສເຕຣຕສຕານິ’ວ,

ອນິເລຣິຕປຊ຺ໂຊຕ ໂສຓ຺ຓເກຕຸ ອຫູ ຍຫິໍ;

໑໔. ຊນານໍ ນີລເນຕ຺ເຕຫິ ວທເນຫິ ຕຸ ຍາ ປຸຣີ,

ມຘຸປາລິສໂມນທ຺ຘ ກຎ຺ຊິນີ ສິຣິມາວເຫ;

໑໕. ຣງ຺ຄຕຸງ຺ຄຕຸຣງ຺ເຄຫິ ຄຊ຺ຊິເຕຫິ ຈ ຍາ ປຸຣີ,

ສໂຆສຸຕ຺ຕຸງ຺ຄກລ຺ໂລລ ໂລລສາຄຣສນ຺ຕິຠາ;

໑໖. ອວ຺ຫມານາ’ວ ເທວານໍ ປຸຣລຂ຺ຍາ ຠຸຊາ ອິວ,

ມນ຺ທານິເລຣິຕາ ຕຸງ຺ຄ ນານາຣາຄທ຺ຘຊາ ຍຫິໍ;

໑໗. ນານາເວສຘຣາ ຍສ຺ມິໍ ນານາຠູສຓ ຠູສິຕາ,

ນານາສມ຺ປຕ຺ຕິສໍຍຸຕ຺ຕາ ນານາວິຊ຺ຊາສຸ ປາຣຄາ;

໑໘. |ໂອ໐.໐໐໐໓|

ນວໂຍພ຺ພນ ອຸທ຺ທາມາ ຣູເປນ ຈ ມໂນຫຣາ,

ສຈ຺ເຈສຸ ນິຣຕາ ນິຈ຺ຈໍ ອນກ຺ກຸຏ຺ຐກຸລາ ສິຍຸໍ;

໑໙. ນິຈ຺ຈໍ ກີຬາ ວິທທ຺ຘາຫິ ນຣນາຣີຫິ ເສວິຕາ,

ຍາ ປຸຣີ ສາຘຸຣູປາ’ສິ ມຘຸຣາລາປິນີຫິ ຈ;

໒໐. ຕສ຺ມິໍ ສທ຺ຘາທໂຍເປຕ ໂອກ຺ກາກກຸລເກຕຸໂກ,

ສຸທ຺ໂຘທນວ຺ຫໂຍ ອາສີ ວິສ຺ສຸໂຕ ຠຸວນຕ຺ຕເຍ;

໒໑. ຍສ຺ສງ຺ຆິກມເລ ສພ຺ພ ຠຸຠຸຊານໍ ມຫີຕເລ,

ກິຣີຏມຓິຫິງ຺ຄາລິ ກີຬນ຺ຕີ’ວ ນິຣນ຺ຕຣໍ;

໒໒. ຍສ຺ສ ປຕ຺ຖຏເຕເຊນ ປຸຣເນຕາປິ ທິວາກໂຣ,

ວຫນີຈ’ມ຺ພເຣ ລີລໍ ໂອສຘີປຕິໂນ ທິວາ;

໒໓. ຍສ຺ສ ທານປ຺ປວາໂຫ ຕຸ ນານາຍາຈກ ຊນ຺ຕຸນໍ,

ມໂນທຘີສຸ ເວລນ຺ເຕຕິກ຺ກມນ຺ໂຕວ ສຕ຺ຕຕໍ;

໒໔. ມຕິຍາ ສຸຣມນ຺ຕີວ ຘເນນ ຘນໂທ ວິຍ,

ຣູເປນ ກຸສຸເມສຸ’ວ ໂຍ ຊຸມ຺ຫຕິ ມຫີຕເລ;

໒໕. ຕສ຺ສາຠິສິຕ຺ຕາ ຣຊ຺ເຊນ ມຫາມາຍາຕິ ວິສ຺ສຸຕາ,

ຈນ຺ທິກາ ວິຍ ຈນ຺ທສ຺ສ ຄິຣິຣາຊາ’ວ ກປາລິໂຕ;

໒໖. ລກ຺ຂີ’ວ ວາສຸເທວສ຺ສ ສີຕາ’ວ ຣາມຣາຊິໂນ,

ມເຫສີສິ ວຣາໂຣຫາ ສຸນ຺ທຣີ ສຸນ຺ທຣາຘຣາ;

໒໗. ຕສ຺ສາ ກຸຈ຺ຉິກຣຓ຺ຑມ຺ຫິ ອນຄ຺ຆຣຕນໍ ວິຍ,

ຂຕ຺ຕິໍສາຫິ ນິມິຕ຺ເຕຫິ ວິມ຺ຫາເປນ຺ໂຕ ສເທວກໍ;

໒໘. ສິຕມ຺ພຸຊກໂຣ ສນ຺ໂຕ ສິເຕຠຈ຺ຉາປໂກ ວິຍ,

ກຕ຺ວາ ປທກ຺ຂິຓໍ ມາຕຸ ປຏິສນ຺ຘິມຄຓ຺ຫິ ໂສ;

໒໙. ທເສກາທສມາເສນ ຕສ຺ເສວໍ ອາສິ ເຈຕນາ,

ປສ຺ສິຕຸໍ ສກຎາຕີນໍ ຄນ຺ຕ຺ວານ ນຄຣໍ ຕທາ;

໓໐. |ໂອ໐.໐໐໐໔|

ນິເວເທຕ຺ວາ ຕມຕ຺ຖໍ ສາ ຣຎ຺ໂຎ ເຕນ ສຸສຊ຺ຊິເຕ,

ສປຣິຈ຺ຉທາ ຕທາ ມຄ຺ເຄ ຄຈ຺ຉນ຺ຕິ ອນ຺ຕຣາປເຖ;

໓໑. ເທວຕານໍ ມໂນນນ຺ທກຣ ນນ຺ທນ ສນ຺ນິຠໍ,

ທິສ຺ວານ ລຸມ຺ພິນິໍ ນາມ ອຸຍ຺ຍານໍ ມນນນ຺ທນໍ;

໓໒. ຕສ຺ມິໍ ກີຬິຕຸມຸສ຺ສາຫາ ປວິສິຕ຺ວານ ຕໍ ວນໍ,

ກີຬນ຺ຕິ ອຸປຄນ຺ຕ຺ວານ ມງ຺ຄລໍ ສາລປາທປໍ;

໓໓. ວິໂລລ ປລ຺ລວາກິຓ຺ຓໍ ສຸຜຸລ຺ລກຸສຸໂມນຕໍ,

ຄເຫຕ຺ວາ ສາລສາຂໍ ສາ ສຸຣຕ຺ຕກຣ ປລ຺ລວາ;

໓໔. ເທເວຫິ ຄຫິຕາ’ຣກ຺ຂາ ມຫມາເນ ສເທວເກ,

ຊເນສິ ຕນຍໍ ມາຍາ ຕຕ຺ຣຏ຺ຐາ ໂລກໂລຈນໍ;

໓໕. ພ຺ຣຫ຺ມາໂນ ໂລກປາລາ ຈ ມນຸສ຺ສາ ກມໂຕ ຕທາ,

ໂສຓ຺ຓຊາລາຊິນາທີຫິ ຄຓ຺ຫິໍສຸ ຊນນນ຺ທນໍ;

໓໖. ມຫິໍ ປຕິຏ຺ຐິໂຕ ຘີໂຣ ປສ຺ສິຕ຺ວານ ຕໂຕ ທິສາ,

ອຸຕ຺ຕຣາຠິມຸໂຂ ສຕ຺ຕປທໍ ຄຓ຺ຕ຺ວາ’ມ຺ພຸເຊ ຐິໂຕ;

໓໗. ທິສນ຺ຕມວໂລເກຕ຺ວາ ສຸຜຸລ຺ລມ຺ພຸຊໂລຈໂນ,

ນິຈ຺ຉາເຣສາສຠິໍ ວາຈໍ ອຄ຺ໂຄ ເສຏ຺ໂຐ’ຕິອາທິນາ;

໓໘. ພ຺ຣຫ຺ມາມຣນຣາທີຫິ ປູຊິໂຕ ຈ ນມສ຺ສິໂຕ,

ກເມນ ອຠິວຑ຺ຒນ຺ໂຕ ຊຸຓ຺ຫປກ຺ເຂ ສສີ ຍຖາ;

໓໙. ພ຺ຣຫ຺ມູນໍ ຉຕ຺ຕຉາຍາຍ ມນ຺ທາຣກຸສຸມນ຺ຕເຣ,

ສານນ຺ທາມນ຺ທເທເວຫິ ຘຸຕຈາມຣມຊ຺ຌໂຄ;

໔໐. ທິພ຺ເພຫິ ຣູປສທ຺ເທຫິ ຄນ຺ເຘຫິ ຈ ຣເສຫິ ຈ,

ໂຜຏ຺ຐພ຺ເພຫິ ຈ ທິພ຺ເພຫິ ໂມທມາໂນ ອເນກຘາ;

໔໑. ທິພ຺ເພຫິ ຣມຓີເຍຫິ ນຈ຺ເຈຫິ ວາທິເຕຫິ ຈ,

ປທາເນກສຫສ຺ເສຫິ ຖູຍມານຄຸຓາກໂຣ;

໔໒. |ໂອ໐.໐໐໐໕|

ປຕ຺ວາ ໂສຬສມໍ ວສ຺ສໍ ຎາຕິສງ຺ຆສ຺ສ ມຊ຺ຌໂຄ,

ທສ຺ເສຕ຺ວາ’ເສສສິປ຺ປໍ ຕໍ ໂລເກ ວິຊ຺ຊຕິ ຍໍ ຕທາ;

໔໓. ຎາຕິສງ຺ຆໍ ປໂມເທນ຺ໂຕ ເທເວ ຈ ມນຸເຊ’ປິ ຈ,

ລທ຺ຘາ ຍໂສຘຣໍ ເທວິໍ’ນຸກູລໍ ຊາຕິຊາຕິຍໍ;

໔໔. ໂສຓ຺ຓທປ຺ປຓສງ຺ກາສ ໂສມ຺ມານນ ວິຠຸສິຕໍ,

ນີລນີຣຊສງ຺ກາສ ວິສາລາຍຕ ໂລຈນໍ;

໔໕. ສິງ຺ຄາຣມນ຺ທິຣທ຺ວາເຣ ຘໂຊປມຠມຸທ຺ວຍໍ,

ເຫມກາຫລສງ຺ກາສ ນາສິກໍ ຣູປລກ຺ຂິຍາ

໔໖. ນີລເວລ຺ລິຕຘມ຺ມິລ຺ລ ຊິມຸໂຕຠຍ ໂກຏິຍໍ,

ນິຈ຺ຈວິຊ຺ຊຸລ຺ລຕາຈກ຺ກ ມນຸຎ຺ຎກຓ຺ຓປາສກໍ;

໔໗. ສາຕກຸມ຺ຠນິຠາຠາສ ປໂຍຘຣຆຏທ຺ວໍ,

ສຸວຓ຺ຓທ຺ທິຕຏາຍາຕ ນິຊ຺ຌຣາກາຣຫາຣກໍ

໔໘. ເທຫເທວທ຺ທຸມາລມ຺ພ ປາໂຣຫາຠຠຸຊທ຺ວຍໍ,

ອງ຺ຄຸລີປລ຺ລວນ຺ຕມ຺ພຸ ພິນ຺ທຸຈາຣຸ ນຂາວລິໍ;

໔໙. ເທຫມາລາລິມາລາຠ ໂຣມຣາຊິວິຣາຊິຕໍ,

ຣູປຓ຺ຓວຕຣງ຺ຄາຫ ວລິຕ຺ຕຍ ວິຈິຕ຺ຕກໍ;

໕໐. ໂສຓ຺ຓຣມ຺ຠາສມາວຏ຺ຏ ປິໂຓຣຸທ຺ວຍ ສຸນ຺ທຣໍ,

ສນ຺ນິຣກລິກາກາຣ ຈາຣຸຊງ຺ຆາ ວິຠູສິຕໍ;

໕໑. ປຈ຺ຈກ຺ຂຣູປລກ຺ຂິຎ຺ຈ ລີລານິຈຍ ສນ຺ນິຠໍ,

ຄຸຓານມາກຣໍ ສາຘຸ ເວລໍວ ຣຕິສາຄເຣ;

໕໒. ກນ຺ໂຕ ວສນ຺ຕຣາຊາ’ວ ກນ຺ທປ຺ໂປ’ວ ສຸຣູປວາ,

ສສີ’ວ ທສ຺ສນີໂຍ ຈ ສູຣິໂຍ ວິຍ ເຕຊວາ;

໕໓. ອຈລຕ຺ເຕນ ເມຣູວ ຄມ຺ຠີເຣນຓ຺ຓໂວ ວິຍ,

ພ຺ຣຫ຺ມສ຺ສໂຣ ປິຍໍວາທີ ປຎ຺ຄ຺ຎາຍ ຈ ອນູປໂມ;

໕໔. |ໂອ໐.໐໐໐໖|

ວສນ຺ໂຕ ໂສ ມຫາວີໂຣ ປຸຣສ຺ມິໍ ກປິລວ຺ຫເຍ,

ທິສ຺ວາ ນິມິຕ຺ເຕ ຈຕຸໂຣ ອຸຍ຺ຍານ ຄມນຎ຺ຊເສ;

໕໕. ປພ຺ພຊ຺ຊາຠິຣໂຕ ນາໂຖ ຄນ຺ຕ຺ວາ ອຸຍ຺ຍານຠູມິຍໍ,

ສຸຜຸລ຺ລຈມ຺ປກາໂສກ ນາຄາທາ’ເຄຫິ ມຓ຺ຑິຕໍ;

໕໖. ຜຸລ຺ລປງ຺ກຊ ກຬ຺ຫາຣ ຊລາຊລຍ ສຕາກຸລໍ,

ມນ຺ທມນ຺ທານິລາຍາຕ ນານາໂມເທຫິ ວາສິຕໍ;

໕໗. ສຣາ ສຣໍ ສມາຍາຕ ມຘຸພ຺ພຕ ນິເສວິຕໍ,

ຜລປຸປ຺ຜຣສຸທ຺ທາມ ທ຺ວິຊ ສງ຺ຆ ນິກູຊິຕໍ;

໕໘. ນຈ຺ຈນ຺ຕ ມຕ຺ຕໂມຣານໍ ນິຈ຺ຈໍ ມຓ຺ຑປສນ຺ຕິຠໍ,

ທິພ຺ພນ຺ຕ ມິຄສຄ຺ຆານໍ ກີຬາມຓ຺ຑປ ສນ຺ນິຠໍ;

໕໙. ສມີຣ ສິສິໂຣທາຣ ຘາຣາສີກຣ ວາຣິຫິ,

ຘາຣາມຓ຺ຑປ ປນ຺ຕີຫິ ຊນານນ຺ທກຣໍ ວຣໍ;

໖໐. ອຸຍ຺ຍານວນມາຄມ຺ມ ເທວຣາຊາວ ນນ຺ທນໍ,

ກີຬນ຺ໂຕ ນິຊປຸຕ຺ຕສ຺ສ ສຸຕ຺ວານ ຊາຕສາສນໍ;

໖໑. ນິວຕ຺ໂຕ ວິສ຺ສກມ຺ເມນ ສຫສ຺ສກ຺ໂຂວ ຠູສິໂຕ,

ປຸຣໍ ປວິສມາໂນວ ກິສາ ໂຄຕມິ ຠາສິຕໍ;

໖໒. ສຸຕ຺ວານ ນິພ຺ພຸຕປທໍ ຕທາ ຈິຕ຺ຕານຸກູລກໍ,

ສນ຺ຕຸຏ຺ໂຐ ສານຸຣາໂຄ ຈ ລກ຺ຂຄ຺ຆໍ ຕາຣຠາສຸຣໍ;

໖໓. ຫາຣໍ ຕິສ຺ສາຍ ເປເສຕ຺ວາ ຄນ຺ຕ຺ວານ ສກມນ຺ທິຣໍ,

ເທວຣາຊວິລາເສນ ນິສີທິ ປວຣາສເນ;

໖໔. ອຖາຄມ຺ມ ຕທາ ເນກນາຏິກາ ປຣິວາຣຍຸໍ,

ວຊ຺ຊນ຺ຕິ ເຠຣິໂຍ ຕາສຸ ປຄ຺ຄຍ຺ຫ ກາຈິ ນາຣິໂຍ;

໖໕. ນານາລຍສມາກິຓ຺ຓໍ ຄີຕໍ ຄາຍນ຺ຕິ ກາຈິ’ປິ,

ຘມນ຺ຕິ ສຸສິຣໍ ກາຈິ ກາຈິ ວາເທນ຺ຕິ ຕນ຺ຕິໂຍ;

໖໖. |ໂອ໐.໐໐໐໗|

ຈາຣຸ ພິມ຺ພາຘຣາຣມ຺ມ ປໂຍຘຣຠຣາ ສຸຠາ,

ວິສາລາຍຕ ນີລກ຺ຂາ ໂສມໂສມ຺ມານນາ ຕທາ;

໖໗. ນຈ຺ຈນ຺ຕິ ປຸຣໂຕ ຕສ຺ສ ເຠຣິມຓ຺ຑລ ມຊ຺ຌຄາ,

ເທວກຎ຺ຎາວ ຣງ຺ຄມ຺ຫີ ຣສຠາວນິຣນ຺ຕຣໍ;