ລກາຣນ຺ຕຘາຕຸ
ປາລ ຣກ຺ຂເຓ. ‘‘ຣກ຺ຂຓໍ, ຕາຓໍ, ໂຄປນໍ, ອວນໍ, ປາລນໍ, ຣກ຺ຂາ, ຣກ຺ຂຓາ, ຄຸຕ຺ຕິ’’ ອິຈ຺ເຈເຕ ປຣິຍາຍາ. ປາເລຕິ, ປາລຍຕິ. ປາລໂກ, ພຸທ຺ຘປາໂລ. ອມ຺ພປາລີ ຄຓິກາ. ສໂມ ຠວຕຸ ປາລິນາ. ປາລິໂຕ, ປາລນໍ, ປາຬິ.
ເອຕ຺ຖ ປາຬີຕິ ອຕ຺ຖໍ ປາເລຕີຕິ ປາຬິ, ລສ຺ສ ຬຕ຺ຕໍ. ອຖ ວາ ອນ຺ໂຕທກໍ ຣກ຺ຂຓຏ຺ເຐນ ມຫໂຕ ຕຬາກສ຺ສ ຖິຣາ ມຫຕີຕິ ປາຬິ ວິຍາຕິ ປາຬິ, ປຣິຍຕ຺ຕິຘມ຺ໂມ. ອປໂຣ ນໂຍ ປກຏ຺ຐານໍ ອຸກ຺ກຏ຺ຐານໍ ສີລາທິອຕ຺ຖານໍ ໂພຘນໂຕ ສຠາວນິຣຸຕ຺ຕິຠາວໂຕ ພຸທ຺ຘາທີຫິ ຠາສິຕຕ຺ຕາ ຈ ປກຏ຺ຐານໍ ວຈນປ຺ປພນ຺ຘານໍ ອາຬີຕິ ປາຬິ.
ປາຬິສທ຺ໂທ ປາຬິຘມ຺ເມ, ຕຬາກປາຬິຍມ຺ປິ ຈ;
ທິສ຺ສເຕ ປນ຺ຕິຍຎ຺ເຈວ, ອິຕິ ເຎຍ຺ຍໍ ວິຊານຕາ.
ອຍຎ຺ຫິ ‘‘ປາຬິຍາ ອຕ຺ຖມຸປປຣິກ຺ຂນ຺ຕີ’’ຕິອາທີສຸ ປຣິຍຕ຺ຕິຘມ຺ມສງ຺ຂາເຕ ປາຬິຘມ຺ເມ ທິສ຺ສຕິ. ‘‘ມຫໂຕ ຕຬາກສ຺ສ ປາຬີ’’ຕິອາທີສຸ ຕຬາກປາຬິຍໍ. ‘‘ປາຬິຍາ ນິສີທິໍສູ’’ຕິອາທີສຸ ປນ຺ຕິຍໍ, ປຏິປາຏິຍາ ນິສີທິໍສູຕິ ອຕ຺ໂຖ. ອິມສ຺ມິໍ ປນຕ຺ເຖ ຘາຕຸຍາ ກິຈ຺ຈໍ ນຕ຺ຖິ. ປາຏິປທິໂກ ຫິ ປນ຺ຕິວາຈໂກ ປາຬິສທ຺ໂທ.
ຕິລ ສິເນຫເນ. ເຕເລຕິ, ເຕລຍຕິ. ເຕລໍ, ຕິໂລ, ຕິລໍ.
ຕຕ຺ຖ ຕິໂລຕິ ຕິລຄຈ຺ໂຉ. ຕິລນ຺ຕິ ຕປ຺ຜລໍ. ຕໂຕ ປນ ນິກ຺ຂນ຺ໂຕ ສິເນໂຫ ເຕລໍ. ໂສ ຫິ ‘‘ຕິລານໍ ອິທນ຺ຕິ ເຕລ’’ນ຺ຕິ ວຸຈ຺ຈຕິ. ຍທິ ເອວໍ ‘‘ສາສປເຕລ’’ນ຺ຕິອາທິວຈນໍ ນ ຍຸຊ຺ເຊຍ຺ຍາຕິ? ໂນ ນ ຍຸຊ຺ຊຕິ, ‘‘ຕິລສິເນຫເນ’’ຕິ ເອວໍ ວຸຕ຺ຕາຍ ຕິລຘາຕຸຍາ ສາມຎ຺ຎໂຕ ຍສ຺ສ ກສ຺ສຈິ ສິເນຫສ຺ສ ວຈນໂຕ. ເຕນ ‘‘ສາສປເຕລໍ, ມຘຸກເຕລ’’ນ຺ຕິອາທໂຍ ສາສເນ ປໂຍຄາ ທິສ຺ສນ຺ຕິ. ມຍໍ ປນ ຕິລຘາຕຸວເສນ ນິປ຺ຜນ຺ນານໍ ຕິລຄຈ຺ຉຕປ຺ຜລວາຈການໍ ‘‘ຕິໂລ, ຕິລ’’ນ຺ຕິ ສທ຺ທຣູປານໍ ປກາສນມຸເຂນ ‘‘ຕິລານໍ ອິທນ຺ຕິ ເຕລ’’ນ຺ຕິ ວທາມ, ນ ປນ ເຕນ ວຈເນນ ສາສປາທີນໍ ສິເນຫສ຺ສ ອເຕລຕ຺ຕໍ ວທາມ. ອຖ ກິຎ຺ຈຣຫີຕິ ເຈ? ຕທ຺ຘິຕວິຘາເນ ວິຎ຺ຎຸນໍ ໂກສລ຺ລຕ຺ຖໍ ຕິລສທ຺ທໍ ປຏິຈ຺ຈ ‘‘ຕິລານໍ ອິທນ຺ຕິ ເຕລ’’ນ຺ຕິ ວທາມ. ສິເນຫສງ຺ຂາຕສ຺ສ ສາສປາທີນໍ ເຕລສ຺ສ ວຈນໍ ນ ຊຫາມ, ຕສ຺ມາ ອຸທາຫຣຓປ຺ປກາສເນ ‘‘ຕິໂລ, ຕິລໍ, ເຕລ’’ນ຺ຕິ ອວຕ຺ວາ ‘‘ເຕລໍ, ຕິໂລ, ຕິລ’’ນ຺ຕິ ອມ຺ເຫຫິ ວຸຕ຺ຕໍ. ອິທຎ຺ຫິ ວຈນໍ ເຕລສ຺ສ ສາມຎ຺ຎໂຕ ສິເນເຫ ປວຕ຺ຕິໍ ທີເປຕິ. ເຕເນວ ຈ ສາສເນ ‘‘ຕິລເຕລໍ, ສາສປເຕລ’’ນ຺ຕິອາທິນາ ວິເສສວຈນມ຺ປິ ທິສ຺ສຕີຕິ ນິຏ຺ຐເມຕ຺ຖາວຄນ຺ຕພ຺ພໍ. ອປິຈ ເຕລສທ຺ໂທ ເຍຠຸຍ຺ເຍນ ຕິລເຕເລ ວຕ຺ຕຕິ, ຍຖາ ມິຄສທ຺ໂທ ຫຣິຓມິເຄຕິປິ ທຏ຺ຐພ຺ພໍ.
ຊລ ອປວາຣເຓ. ຊາເລຕິ, ຊາລຍຕິ. ຊາລໍ, ຊາລາ. ຊາລນ຺ຕິ ມຈ຺ຉຊາລໍ. ຊາລາຕິ ອຄ຺ຄິຊາລາ.
ຂລ ໂສເຈຍ຺ເຍ. ໂສເຈຍ຺ຍໍ ສຸຈິຠາໂວ. ຂາເລຕິ, ຂາລຍຕິ. ປກ຺ຂາເລຕິ, ປກ຺ຂາລຍຕິ.
ຕລ ປຕິຏ຺ຐາຍໍ. ຕາເລຕິ, ຕາລຍຕິ. ຕາໂລ, ຕລໍ.
ເອຕ຺ຖ ຕາໂລຕິ ຕິຓຣາຊຣຸກ຺ໂຂ. ຕລນ຺ຕິ ປາຓິຕລຠູມິຕລາທິ. ຕຎ຺ຫິ ຕາລຍຕິ ປຕິຏ຺ຐາຕິ ເອຕ຺ຖ ວຕ຺ຖຸຊາຕນ຺ຕິ ຕລໍ.
ຕຸລ ອຸມ຺ມາເນ. ໂຕເລຕິ, ໂຕລຍຕິ.
ທຸລ ອຸກ຺ເຂເປ. ອຸກ຺ເຂໂປ ອຸທ຺ຘໍ ຂິປນໍ. ໂທເລຕິ, ໂທລຍຕິ. ໂທລາ.
ເອຕ຺ຖ ຈ ໂທລິຍຕິ ອຸກ຺ຂິປິຍຕິ ຍຕ຺ຖ ນິປນ຺ໂນ ທາຣໂກ, ຍຖານິປນ຺ນໂກ ວາຕິ ໂທລາ.
ວຸລ ນິມ຺ມຊ຺ຊເນ. ໂວເລຕິ, ໂວຍລຕິ.
ມີລ ນິມີລເນ. ມີເລຕິ, ມີລຍຕິ. ມີລນໍ, ອຸມ຺ມີລນໍ, ນິມີລນໍ.
ມູລ ໂຣຫເນ. ມູເລຕິ, ມູລຍຕິ. ມູລໍ. ເອສາ ຫິ ຍທາ ປຕິຏ຺ຐາຍໍ ວຕ຺ຕຕິ, ຕທາ ຠູວາທິຄຓິກາ, ‘‘ມູລຕີ’’ຕິ ຈສ຺ສາ ຣູປໍ.
ຕຕ຺ຖ ມູລນ຺ຕິ ມູລຍຕິ ຣູຫຕິ ຣຸກ຺ຂາທິ ເອເຕນາຕິ ມູລໍ. ອຖ ວາ ມູລຍຕິ ຉິນ຺ໂນປິ ໂກຈິ ເອເຕນ ອຈ຺ຉິນ຺ເນນ ປຸນເທວ ຣູຫຕີຕິ ມູລໍ. ວຸຕ຺ຕຎ຺ຫິ –
‘‘ຍຖາປິ ມູເລ ອນຸປທ຺ທເວ ທຬ຺ເຫ,
ຉິນ຺ໂນປິ ຣຸກ຺ໂຂ ປຸນເທວ ຣູຫຕິ;
ເອວມ຺ປິ ຕຓ຺ຫານຸສເຍ ອນູຫເຕ,
ນິພ຺ພຕ຺ຕຕິ ທຸກ຺ຂມິທໍ ປຸນປ຺ປຸນ’’ນ຺ຕິ;
ມູລສທ຺ທສ຺ສ ອຕ຺ຖຸທ຺ຘາໂຣ ເຫຏ຺ຐາ ຠູວາທິຄເຓ ວຸຕ຺ໂຕ.
ກລ ປິລ ເຂເປ. ກາເລຕິ, ກາລຍຕິ. ກາໂລ. ປິເລຕິ, ປິລຍຕິ.
ເອຕ຺ຖ ກາໂລຕິ ສມໂຍປິ ມຈ຺ຈຸປິ. ຕຕ຺ຣ ສມໂຍ ເຕສໍ ເຕສໍ ສຕ຺ຕານໍ ອາຍຸໍ ກາລຍຕິ ເຂເປຕິ ທິວເສ ທິວເສ ອປ຺ປໍ ອປ຺ປໍ ກໂຣຕີຕິ ກາໂລຕິ ວຸຈ຺ຈຕິ. ວຸຕ຺ຕມ຺ປິ ເຈຕໍ –
‘‘ກາໂລ ຆສຕິ ຠູຕານິ, ສພ຺ພາເນວ ສຫຕ຺ຕນາ;
ໂຍ ຈ ກາລຆໂສ ຠູໂຕ, ສຠູຕປຈນິໍປຈີ’’ຕິ.
ມຈ຺ຈຸ ປນ ກາລຍຕິ ເຕສໍ ເຕສໍ ສຕ຺ຕານໍ ຊີວິຕໍ ເຂເປຕິ ສມຸຈ຺ເຉທວເສນ ນາເສຕີຕິ ກາໂລຕິ ວຸຈ຺ຈຕິ. ເຕນາຫຸ ອຏ຺ຐກຖາຈຣິຍາ ‘‘ກາໂລຕິ ມຈ຺ຈຸ. ກາລຍຕິ ສຕ຺ຕານໍ ຊີວິຕໍ ນາເສຕີຕິ ກາໂລ. ກາເລນ ມຈ຺ຈຸນາ ກໂຕ ນາສິໂຕຕິ ກາລກໂຕ’’ຕິ. ‘‘ມຣຓໍ ຫິນ຺ທໍ ມຈ຺ຈຸ ມຏ຺ຏຸ ຈຸຕິ ກາໂລ ອນ຺ຕໂກ ນິກ຺ເຂໂປ’’ຕິ ມຣຓສ຺ສາຠິຘານານິ.
ສຸລ຺ລ ສຊ຺ຊເນ. ສຸລ຺ເລຕິ, ສຸລ຺ລຍຕິ.
ອິລ ເປຣເຓ. ອິເລຕິ, ອິລຍຕິ.
ວລ ຠຣເຓ. ວາເລຕິ, ວາລຍຕິ. ວາໂລ.
ລລ ອິຈ຺ຉາຍໍ. ລເລຕິ, ລລຍຕິ.
ທລ ວິທາຣເຓ. ທາເລຕິ, ທາລຍຕິ, ປທາເລຕິ, ປທາລຍຕິ. ກຸທາໂລ.
ກລ ຄຕິສງ຺ຂ຺ຍາເນສຸ. ກາເລຕິ, ກາລຍຕິ. ກາໂລ, ກລາ. ກລາຕິ ອວຍໂວ. ສາ ຫິ ກາລຍິຕພ຺ພາ ສງ຺ຂາຍິຕພ຺ພາຕິ ກລາ.
ສີລ ອຸປຘາຣເຓ. ອຸປຘາຣຓໍ ຠຸໂສ ຘາຣຓໍ, ປຕິຏ຺ຐາວເສນ ອາຘາຣຠາໂວ. ສີເລຕິ, ສີລຍຕິ. ສີລໍ, ສີລນໍ.
ເອຕ຺ຖ ສີລນ຺ຕິ ສີເລຕິ ອຸປຘາເຣຕິ ຕໍສມງ຺ຄີປຸຄ຺ຄລໍ ອປາເຍສຸ ອຸປ຺ປຕ຺ຕິນິວາຣຓວເສນ ຠຸໂສ ຘາເຣຕີຕິ ສີລໍ. ອຖ ວາສີລິຍຕິ ອຸປຈາຣິຍຕິ ສປ຺ປຸຣິເສຫິ ຫທຍມໍສນ຺ຕຣໍ ອຸປເນຕ຺ວາ ຘາຣິຍຕີຕິ ສີລໍ. ສີລນນ຺ຕິ ຠູວາທິຄເຓ ອວິປ຺ປກິຓ຺ຓຕາສງ຺ຂາຕໍ ສມາຘານໍ ວຸຈ຺ຈຕິ. ຕຕ຺ຖ ‘‘ສີລຕີ’’ຕິ ຣູປໍ, ອິຘ ປນ ອາຘາຣຠາວສງ຺ຂາຕໍ ອຸປຘາຣຓໍ ວຸຈ຺ຈຕິ. ເອຕ຺ຖ ຈ ‘‘ສີເລຕິ, ສີລຍຕີ’’ຕິ ຣູປານິ. ອຏ຺ຐກຖາສຸ ຫິ ‘‘ກຸສລານໍ ຘມ຺ມານໍ ປຕິຏ຺ຐາວເສນ ອາຘາຣຠາໂວ ອຸປຘາຣຓ’’ນ຺ຕິ ວຸຕ຺ໂຕ.
ເວລ ກາໂລປເທເສ. ເວເລຕິ, ເວລຍຕິ. ເວລາ. ເກຈິ ‘‘ເວລ ອິຕິ ຘາຕຸສທ຺ໂທ ນ ໂຫຕີ’’ຕິ ວທນ຺ຕິ, ຕໍ ນ ຄເຫຕພ຺ພໍ, ໂປຣາເຓຫິ ສທ຺ທສຕ຺ຖວິທູຫິ ‘‘ເວລຍຕີ’’ຕິ ຣູປສ຺ສ ທສ຺ສິຕຕ຺ຕາ.
ປລ ມູລ ລວນປວເນສຸ. ລວນໍ ເຉທນໍ, ປວນໍ ໂສຘນໍ. ປາເລຕິ, ປາລຍຕິ. ປລໍ. ປລໍ ນາມ ມານວິເສໂສ. ໂລກສ຺ສ ວິມຕິໍ ປາເລຕິ ລຸນາຕິ ໂສເຘຕິ ຈາຕິ ປລໍ. ມູເລຕິ, ມູລຍຕິ. ສທ຺ທສຕ຺ຖວິທູ ປນ ‘‘ມູລຍຕິ ເກທາຣໍ, ມູລຍຕິ ຘຎ຺ຎ’’ນ຺ຕິ ປໂຍຄໍ ວທນ຺ຕິ.
ຖູລ ປຣິພ຺ຣູຫເນ. ປຣິພ຺ຣູຫນໍ ວຑ຺ຒນໍ. ຖູເລຕິ, ຖູລຍຕິ. ຖູໂລ ປຸຣິໂສ. ຖູລາ ຊເວນ ຫາຍນ຺ຕິ.
ປລ ຄຕິຍໍ. ປເລຕິ, ປລຍຕິ. ອຕ຺ຖໍ ປເລຕິ ນ ອຸເປຕິ ສງ຺ຂໍ. ປເລຕິ ຣສມາທາຍ. ຍຖາ ສຸຕ຺ຕຄຸຬໍ ຍຕ຺ຕເກຫິ ສຸຕ຺ເຕຫິ ເວຐິຕໍ, ຕຕ຺ຕເກຫິ ເອວ ປລຍຕິ.
ຈິງ຺ຄຸລ ປຣິພ຺ຠມເນ. ຈິງ຺ຄຸເລຕິ, ຈິງ຺ຄຸລຍຕິ. ຈິງ຺ຄຸລຍິຕ຺ວາ. ອຕ຺ຣາຍໍ ປາຬິ ‘‘ຍາວຕິກາ ອຠິສງ຺ຂາຣສ຺ສ ຄຕິ, ຕາວຕິກໍ ຄນ຺ຕ຺ວາ ຈິງ຺ຄຸລຍິຕ຺ວາ ຠູມິຍໍ ປປຕີ’’ຕິ. ຕຕ຺ຖ ຈິງ຺ຄຸລຍິຕ຺ວາຕິ ປຣິພ຺ຠມິຕ຺ວາ.
ລກາຣນ຺ຕຘາຕຸຣູປານິ.