ສຬວຄ຺ຄ

ມາລຸກ຺ຍປຸຕ຺ຕສຸຕ຺ຕ

ປຸຈ຺ຉາ – ເຕນາວຸໂສ ຠຄວຕາ…ເປ… ສມ຺ມາສມ຺ພຸທ຺ເຘນ ສຬວຄ຺ເຄ ທຸຕິຍໍ ມາລຸກ຺ຍປຸຕ຺ຕສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ມາລຸກ຺ຍປຸຕ຺ຕຕ຺ເຖຣໍ ອາຣພ຺ຠ ຠາສິຕໍ. ອາຍສ຺ມາ ຠນ຺ເຕ ມາລຸກ຺ຍປຸຕ຺ຕຕ຺ເຖໂຣ ຠຄວນ຺ຕໍ ເອຕທໂວຈ ‘‘ສາຘຸ ເມ ຠນ຺ເຕ ຠຄວາ ສໍຂິຕ຺ເຕນ ຘມ຺ມໍ ເທເສຕຸ, ຍມຫໍ ຠຄວໂຕ ຘມ຺ມໍ ສຸຕ຺ວາ ເອໂກ ວູປກຏ຺ໂຐ ອປ຺ປມຕ຺ໂຕ ອາຕາປີ ປຫິຕຕ຺ໂຕ ວິຫເຣຍ຺ຍ’’ນ຺ຕິ. ຕສ຺ມິໍ ວຕ຺ຖຸສ຺ມິໍ ‘‘ເອຕ຺ຖ ທານິ ມາລຸກ຺ຍປຸຕ຺ຕ ກິໍ ທຫເຣ ຠິກ຺ຂູ ວກ຺ຂາມາຕິ’’ອາທິນາ ເຖຣໍ ອປສາເທຕ຺ວາ ເຈວ ອຸສ຺ສາເທຕ຺ວາ ຈ ‘‘ຕໍ ກິໍ ມຎ຺ຎສິ ມາລຸກ຺ຍປຸຕ຺ຕ, ເຍ ເຕ ຈກ຺ຂຸວິຎ຺ເຎຍ຺ຍາ ຣູປາ ອທິຏ຺ຐາ ອທິຏ຺ຐປຸພ຺ພາ, ນ ຈ ປສ຺ສສິ, ນ ຈ ເຕ ໂຫຕິ ປສ຺ເສຍ຺ຍນ຺ຕິ, ອຕ຺ຖິ ເຕ ຕຕ຺ຖ ຉນ຺ໂທ ວາ ຣາໂຄ ວາ ເອວມາທິນາ ຠນ຺ເຕ ຠຄວຕາ ຠາສິຕໍ.

ປຸຈ຺ຉາ – ອິມສ຺ມິໍ ຈ ໂຂ ປນາວຸໂສ ຠຄວຕາ ໂອວາເທ ສໍຂິຕ຺ເຕນ ຠາສິເຕ ໂສ ອາຍສ຺ມາ ມາລຸກ຺ຍປຸຕ຺ຕຕ຺ເຖໂຣ ຠຄວນ຺ຕໍ ກິໍ ອໂວຈ ກຖຎ຺ຈສ຺ສ ຠຄວາ ອນຸຎ຺ຎາສິ. ກີທິໂສ ຈສ຺ສາຍສ຺ມໂຕ ມາລຸກ຺ຍປຸຕ຺ຕຕ຺ເຖຣສ຺ສ ຘມ຺ມາຠິສມໂຍ ອໂຫສິ.

ວິສ຺ສຊ຺ຊນາ – ອິມສ຺ມິໍ ໂຂ ຠນ຺ເຕ ໂອວາເທ ຠຄວຕາ ສໍຂິຕ຺ເຕນ ຠາສິເຕ ອາຍສ຺ມາ ມາລຸກ຺ຍປຸຕ຺ຕຕ຺ເຖໂຣ ຠຄວນ຺ຕໍ ເອຕທໂວຈ ‘‘ອິມສ຺ສ ຂ຺ວາຫໍ ຠນ຺ເຕ ຠຄວຕາ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ອາຊານາມິ.

ຣູປໍ ທິສ຺ວາ ມຸຏ຺ຐາ, ປິຍໍ ນິມິຕ຺ຕໍ ມນສິ ກໂຣໂຕ;

ສາຣຕ຺ຕຈິຕ຺ໂຕ ເວເທຕິ, ຕຎ຺ຈ ອຊ຺ໂຌສ ຕິຏ຺ຐຕິ.

ຕສ຺ສ ວຑ຺ຒນ຺ຕິ ເວທນາ, ອເນກາ ຣູປສມ຺ຠວາ;

ອຠິຊ຺ຌາ ຈ ວິເຫສາ ຈ, ຈິຕ຺ຕມສ຺ສູປຫຎ຺ຎຕິ;

ເອວໍ ອາຈິນໂຕ ທຸກ຺ຂໍ, ອາຣາ ນິພ຺ພານ ວຸຈ຺ຈຕິ;

ເປຍ຺ຍາລ

ນ ໂສ ຣຊ຺ຊຕິ ຘມ຺ເມສຸ, ຘມ຺ມໍ ຎຕ຺ວາ ປຏິສ຺ສໂຕ;

ວິຣຕ຺ຕຈິຕ຺ໂຕ ເວເທຕິ, ຕຎ຺ຈ ນາຊ຺ໂຌສ ຕິຏ຺ຐຕິ.

ຍຖາສ຺ສ ຊານໂຕ ຘມ຺ມໍ, ເສວໂຕ ຈາປິ ເວທນໍ;

ຂີຍຕິ ໂນປຈີຍຕິ, ເອວໍ ໂສ ຈຣຕີ ສໂຕ;

ເອວໍ ອປຈິນໂຕ ທຸກ຺ຂໍ, ສນ຺ຕິເກ ນິພ຺ພານ ວຸຈ຺ຈຕີຕິ.

ອິມສ຺ສ ຂ຺ວາຫໍ ຠນ຺ເຕ ຠຄວຕາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ຖໍ ອາຊານາມີຕິ. ຠຄວາ ຈ ຠນ຺ເຕ ‘‘ສາຘຸ ສາຘຸ ມາລຸກ຺ຍປຸຕ຺ຕ, ສາຘຸ ໂຂ ຕ຺ວໍ ມາລຸກ຺ຍປຸຕ຺ຕ ມຍາ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ອາຊານາສີ’’ຕິ ສາຘຸກາຣໍ ທຕ຺ວາ–

‘‘ຣູປໍ ທິສ຺ວາ ສຕິ ມຸຏ຺ໂຐ, ປິຍໍ ນິມິຕ຺ຕໍ ມນສິ ກໂຣໂຕ;

ສາຣຕ຺ຕຈິຕ຺ໂຕ ເວເທຕິ, ຕຎ຺ຈ ອຊ຺ໂຌສ ຕິຏ຺ຐຕີ’’ຕິ–

ອາທິນາ

ເຖຣສ຺ສ ວຈນໍ ສມນຸຎ຺ຎາສິ. ໂສ ຈ ຠນ຺ເຕ ອາຍສ຺ມາ ມາລຸກ຺ຍປຸຕ຺ຕຕ຺ເຖໂຣ ເອໂກ ວູປກຏ຺ໂຐ ອປ຺ປມຕ຺ໂຕ ອາຕາປີ ປຫິຕຕ຺ໂຕ ວິຫຣນ຺ໂຕ ນຈິຣສ຺ເສວ ຍສ຺ສຕ຺ຖາຍ ກຸລປຸຕ຺ຕາ ສມ຺ມເທວ ອຄາຣສ຺ມາ ອນຄາຣິຍໍ ປພ຺ພຊນ຺ຕິ, ຕທນຸຕ຺ຕຣໍ ພ຺ຣຫ຺ມຈຣິຍປຣິໂຍສານໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫາສິ, ‘‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’’ຕິ ອພ຺ຠຎ຺ຎາສິ. ອຎ຺ຎຕໂຣຈ ປນາຍສ຺ມາ ມາລຸກ຺ຍປຸຕ຺ໂຕ ອຣຫຕໍ ອໂຫສິ. ເອວໍ ໂຂ ຠນ຺ເຕ ຕສ຺ສ ອາຍສ຺ມໂຕ ອຠິສມ຺ປຣາໂຍ ອໂຫສິ.

ຣູປໍ ທິສ຺ວາ ສຕິ ມຸຏ຺ຐາ, ປິຍໍ ນິມິຕ຺ຕໍ ມນສິ ກໂຣໂຕ;

ສາຣຕ຺ຕຈິຕ຺ໂຕ ເວເທຕິ, ຕຎ຺ຈ ອຊ຺ໂຌສ ຕິຏ຺ຐຕິ.

ປມາທວິຫາຣີສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ຈຕຸຕ຺ຖໍ ປມາທວິຫາຣີສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ປມາທວິຫາຣິຎ຺ຈ ໂວ ຠິກ຺ຂເວ ເທເສສ຺ສາມິ ອປ຺ປມາທວິຫາຣິຎ຺ຈ, ຕໍ ສຸຓາຖ. ກຖຎ຺ຈ ຠິກ຺ຂເວ ປມາທວິຫາຣີ ໂຫຕິ. ຈກ຺ຂຸນ຺ທ຺ຣິຍໍ ອສໍວຸຕສ຺ສ ຠິກ຺ຂເວ ວິຫຣໂຕ ຈິຕ຺ຕໍ ພ຺ຍາສິຎ຺ຈຕິ ຈກ຺ຂຸວິຎ຺ເຎຍ຺ເຍສຸ ຣູເປສຸ, ຕສ຺ສ ພ຺ຍາສິຕ຺ຕຈິຕ຺ຕສ຺ສ ປາໂມຊ຺ຊໍ ນ ໂຫຕິ, ປາໂມຊ຺ເຊ ອສຕິ ປີຕິ ນ ໂຫຕິ, ປີຕິຍາ ປສ຺ສທ຺ຘິ ນ ໂຫຕິ, ປສ຺ສທ຺ຘິຍາ ອສຕິ ທຸກ຺ຂໍ ໂຫຕິ, ທຸກ຺ຂິໂນ ຈິຕ຺ຕໍ ນ ສມາຘິຍຕິ, ອສມາຫິ ເຕ ຈິຕ຺ເຕ ຘມ຺ມາ ນ ປາຕຸຠວນ຺ຕິ, ຘມ຺ມານໍ ອປາຕຸຠາວາ ປມາທວິຫາຣີຕ຺ເວວ ສງ຺ຂໍ ຄຈ຺ຉຕີ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.