ມິຄຊາລວຄ຺ຄ

ປຐມ ມິຄຊາລສຸຕ຺ຕ

ປຸຈ຺ຉາ – ມິຄຊາລວຄ຺ເຄ ອາວຸໂສ ປຐມມິຄຊາລສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ອາຍສ຺ມນ຺ຕໍ ມິຄຊາລຕ຺ເຖຣໍ ອາຣພ຺ຠ ຠາສິຕໍ. ອາຍສ຺ມາ ຠນ຺ເຕ ມິຄຊາລຕ຺ເຖໂຣ ຠຄວນ຺ຕໍ ເອຕທໂວຈ ‘‘ເອກວິຫາຣີ ເອກວິຫາຣີຕິ ຠນ຺ເຕ ວຸຈ຺ຈຕິ, ກິຕ຺ຕາວຕານຸໂຂ ຠນ຺ເຕ ເອກວິຫາຣີ ໂຫຕິ, ກິຕ຺ຕາວຕາຈ ປນ ສທຸຕິຍວິຫາຣີ ໂຫຕີ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ສນ຺ຕິ ໂຂ ມິຄຊາລ ຈກ຺ຂຸວິຎ຺ເຎຍາ ຣູປາ ອິຏ຺ຐາ ກນ຺ຕາ ມນາປາ ປິຍຣູປາ ກາມູປສໍຫິຕາ ຣຊນີຍາ, ຕຎ຺ເຈ ຠິກ຺ຂຸ ອຠິນນ຺ທຕິ ອຠິວທຕິ ອຊ຺ໂຌສາຍ ຕິຏ຺ຐຕິ, ຕສ຺ສ ຕໍ ອຠິນນ຺ທໂຕ ອຠິວທໂຕ ອຊ຺ໂຌສາຍ ຕິຏ຺ຐໂຕ ອຸປ຺ປຊ຺ຊຕິ ນນ຺ທີ, ນນ຺ທິຍາ ສຕິ ສາຣາໂຄ ໂຫຕິ, ສາຣາເຄ ສຕິ ສໍໂຍໂຄ ໂຫຕິ, ນນ຺ທິສໍໂຍຊນສໍຍຸຕ຺ໂຕ ໂຂ ມິຄຊາລ ຠິກ຺ຂຸ ສທຸຕິຍວິຫາຣີຕິ ວຸຈ຺ຈຕີ’’ຕິ ເອວມາທິນາ ຠຄວຕາ ຠາສິຕໍ.

ປຐມ ຉຜສ຺ສາຍຕນສຸຕ຺ຕ

ປຸຈ຺ຉາ – ຕຕ຺ເຖວ ນວມໍ ສໍຄີຕໍ ປຐມຉຜສ຺ສາຍຕນສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ໂຍ ຫິ ໂກຈິ ວິກ຺ຂເວ ຠິກ຺ຂຸ ຉນ຺ນໍ ຜສ຺ສາຍຕນານໍ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ນປ຺ປຊານາຕິ, ອວຸສິຕໍ ເຕນ ພ຺ຣຫ຺ມຈຣິຍໍ, ອາຣກາ ໂສ ອິມສ຺ມາ ຘມ຺ມວິນຍາ’’ຕິ ເອວມາທິນາ ຠຄວຕາ ຠາສິຕໍ.

ອຫໍ ຫິ ຠນ຺ເຕ ຉນ຺ນໍ ຜສ຺ສາຍຕນານໍ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ນປ຺ປຊານາມິ.

ຈກ຺ຂຸໍ ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາຕິ ສມນຸປສ຺ສສິ.

ໂນ ເຫຕໍ ຠນ຺ເຕ.

ເອຕ຺ຖ ຈ ເຕ ຠິກ຺ຂຸ ຈກ຺ຂຸ ເນຕໍ ມມ, ເນໂສຫມສ຺ມິ, ນ ເມໂສ ອຕ຺ຕາຕິ ເອວເມຕໍ ຍຖາຠູຕໍ ສມ຺ມປ຺ປຎ຺ຎາຍ ສຸທິຏ຺ຐໍ ຠວິສ຺ສຕິ, ເອເສວນ຺ໂຕ ທຸກ຺ຂສ຺ສ.