ຊມ຺ພຸຂາທກສໍຍຸຕ຺ຕ

ນິພ຺ພານປຎ຺ຫາສຸຕ຺ຕ

ປຸຈ຺ຉາ – ຊມ຺ພຸຂາທກສໍຍຸຕ຺ເຕ ອາວຸໂສ ປຐມໍ ນິພ຺ພານປຎ຺ຫາສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ມຄເຘສຸ ຠນ຺ເຕ ນາລກຄາມເກ ຊມ຺ພຸຂາທກໍ ປຣິພ຺ພາຊກໍ ອາຣພ຺ຠ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ. ຊມ຺ພຸຂາທໂກ ຠນ຺ເຕ ປຣິພ຺ພາຊໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ ‘‘ນິພ຺ພານໍ ນິພ຺ພານນ຺ຕິ ອາວຸໂສ ສາຣິປຸຕ຺ຕ ວຸຈ຺ຈຕິ, ກຕມໍ ນຸໂຂ ອາວຸໂສ ນິພ຺ພານ’’ນ຺ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ໂຍ ໂຂ ອາວຸໂສ ຣາຄກ຺ຂໂຍ ໂທສກ຺ຂໂຍ ໂມຫກ຺ຂໂຍ, ອິທໍ ວຸຈ຺ຈຕິ ນິພ຺ພານ’’ນ຺ຕິ ເອວມາທິນາ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ.

ຘມ຺ມວາທີປຎ຺ຫາສຸຕ຺ຕ

ປຸຈ຺ຉາ – ຕຕ຺ເຖວ ອາວຸໂສ ໂປຣາຓເກຫິ ຘມ຺ມສໍຄາຫກມຫາເຖເຣຫິ ຕຕິຍໍ ສໍຄີຕໍ ຘມ຺ມວາທີປຎ຺ຫາສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ມຄເຘສຸເຍວ ຠນ຺ເຕ ນາລກຄາເມ ຊມ຺ພຸຂາທກໍ ປຣິພ຺ພາຊກໍ ອາຣພ຺ຠ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ. ຊມ຺ພຸຂາທໂກ ຠນ຺ເຕ ປຣິພ຺ພາຊໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ ‘‘ເກ ນຸ ໂຂ ອາວຸໂສ ສາຣິປຸຕ຺ຕ ໂລເກ ຘມ຺ມວາທິໂນ, ເກ ໂລເກ ສຸປ຺ປຏິປນ຺ນາ, ເກ ໂລເກ ສຸຄຕາ’’ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ເຍ ໂຂ ອາວຸໂສ ຣາຄປ຺ປຫານາຍ ຘມ຺ມໍ ເທເສນ຺ຕິ, ໂທສປ຺ປຫານາຍ ຘມ຺ມໍ ເທເສນ຺ຕິ, ໂມຫປ຺ປຫານາຍ ຘມ຺ມໍ ເທເສນ຺ຕິ. ເຕ ໂລເກ ຘມ຺ມວາທິໂນ’’ຕິ ເອວມາທິນາ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ.

ເກ ໂລເກ ສຸປ຺ປຏິປນ຺ນາ.

ເກ ໂລເກ ສຸຄຕາ.

ທຸກ຺ກຣປຎ຺ຫາສຸຕ຺ຕ

ປຸຈ຺ຉາ – ຕຕ຺ເຖວ ໂປຣາຓເກຫິ ຘມ຺ມສໍຄາຫກ ມຫາເຖເຣຫິ ປຣິໂຍສານສຸຕ຺ຕຠາເວນ ສໍຄີຕໍ ທຸກ຺ກຣປຎ຺ຫາສຸຕ຺ຕໍ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ເກນ ກຖຎ຺ຈ ຠາສິຕໍ.

ວິສ຺ສຊ຺ຊນາ – ມຄເຘສຸເຍວ ນາລກຄາເມ ຊມ຺ພຸຂາທກໍ ປຣິພ຺ພາຊກໍ ອາຣພ຺ຠ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ. ຊມ຺ພຸຂາທໂກ ຠນ຺ເຕ ປຣິພ຺ພາຊໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ ‘‘ກິໍ ນຸ ໂຂ ອາວຸໂສ ສາຣິປຸຕ຺ຕ ອິມສ຺ມິໍ ຘມ຺ມວິນເຍ ທຸກ຺ກຣ’’ນ຺ຕິ. ຕສ຺ມິໍ ຠນ຺ເຕ ວຕ຺ຖຸສ຺ມິໍ ‘‘ປພ຺ພຊ຺ຊາ ໂຂ ອາວຸໂສ ອິມສ຺ມິໍ ຘມ຺ມວິນເຍ ທຸກ຺ກຣາ’’ຕິ ເອວມາທິນາ ອາຍສ຺ມຕາ ສາຣິປຸຕ຺ຕຕ຺ເຖເຣນ ຘມ຺ມເສນາປຕິນາ ຠາສິຕໍ.