ສກ຺ກສໍຍຸຕ຺ຕ

ວຕປທສຸຕ຺ຕ

ປຸຈ຺ຉາ – ສກ຺ກສໍຍຸຕ຺ເຕ ປນາວຸໂສ ວຕປທສຸຕ຺ຕໍ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ສກ຺ກສ຺ສ ຠິກ຺ຂເວ ເທວານມິນ຺ທສ຺ສ ປຸພ຺ເພ ມນຸສ຺ສຠູຕສ຺ສ ສຕ຺ຕ ວຕປທານິ ສມຕ຺ຕານິ ສມາທິນ຺ນານິ ອເຫສຸໍ, ເຍສໍ ສມາທິນ຺ນຕ຺ຕາ ສກ຺ໂກ ສກ຺ກຕ຺ຕໍ ອຊ຺ຌຄາຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ສກ຺ກສ຺ສ ຠິກ຺ຂເວ ເທວານມິນ຺ທສ຺ສ ປຸພ຺ເພ ມນຸສ຺ສຠູຕສ຺ສ ອິມານິ ສຕ຺ຕ ວຕປທານິ ສມຕ຺ຕານິ ສມາທິນ຺ນານິ ອເຫສຸໍ.

ມາຕາເປຕ຺ຕິຠຣໍ ຊນ຺ຕຸໍ, ກຸເລ ເຊຏ຺ຐາປຈາຍິນໍ;

ສຓ຺ຫໍ ສຂິລສມ຺ຠາສໍ, ເປສຸເຓຍ຺ຍປ຺ປຫາຍິນໍ;

ມຈ຺ເຉຣວິນເຍ ຍຸຕ຺ຕໍ, ສຈ຺ຈໍ ໂກຘາຠິຠຸໍ ນຣໍ;

ຕໍ ເວ ເທວາ ຕາວຕິໍສາ, ອາຫຸ ‘‘ສປ຺ປຸຣິໂສ’’ອິຕິ.

ທລິທ຺ທສຸຕ຺ຕ

ປຸຈ຺ຉາ – ທລິທ຺ທສຸຕ຺ຕໍ ປນາວຸໂສ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ. ວິສ຺ສຊ຺ຊນາ. ຣາຊຄເຫ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ຠູຕປຸພ຺ພໍ ຠິກ຺ຂເວ ອຎ຺ຎຕໂຣ ປຸຣິໂສ ອິມສ຺ມິໍເຍວ ຣາຊຄເຫ ມນຸສ຺ສທລິທ຺ໂທ ອໂຫສິ ມນຸສ຺ສກປໂຓ ມນຸສ຺ສວຣາໂກ, ໂສ ຕຖາຄຕປ຺ປເວທິເຕ ຘມ຺ມວິນເຍ ສທ຺ຘໍ ສມາທິຍິ, ສີລໍ, ສຸຕໍ, ຈາຄໍ, ປຎ຺ຎໍ ສມາທິຍີ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ຍສ຺ສ ສທ຺ຘາ ຕຖາຄເຕ, ອຈລາ ສຸປ຺ປຕິຏ຺ຐິຕາ;

ສີລຎ຺ຈ ຍສ຺ສ ກລ຺ຍາຓໍ, ອຣິຍກນ຺ຕໍ ປສໍສິຕໍ.

ຍຊມານສຸຕ຺ຕ

ປຸຈ຺ຉາ – ຍຊມານສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກິສ຺ມິໍ ວຕ຺ຖຸສ຺ມິໍ ກຖຎ຺ຈ ຠາສິຕໍ.

ວິສ຺ສຊ຺ຊນາ – ຣາຊຄເຫ ຠນ຺ເຕ ສກ຺ກໍ ເທວານມິນ຺ທໍ ອາຣພ຺ຠ ຠາສິຕໍ. ສກ຺ໂກ ຠນ຺ເຕ ເທວານມິນ຺ໂທ ຠຄວນ຺ຕໍ ຄາຖາຍ ອຊ຺ຌຠາສິ–

‘‘ຍຊມານານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ;

ກໂຣຕໍ ໂອປຘິກໍ ປຸຎ຺ຎໍ, ກຕ຺ຖ ທິນ຺ນໍ ມຫປ຺ຜລ’’ນ຺ຕິ.

ຕສ຺ມິໍ ຠນ຺ເຕ ວຕ຺ຖຸສ຺ມິໍ–

‘‘ຈຕ຺ຕາໂຣ ຈ ປຏິປນ຺ນາ, ຈຕ຺ຕາໂຣຈ ຜເລ ຐິຕາ;

ເອສ ສງ຺ໂຆ ອຸຊຸຠູໂຕ, ປຎ຺ຎາສີລສມາຫິໂຕ;

ຍຊມານານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ;

ກໂຣຕໍ ໂອປຘິກໍ ປຸຎ຺ຎໍ, ສງ຺ເຆ ທິນ຺ນໍ ມຫປ຺ຜລໍ’’ນ຺ຕິ.

ເອວໍ ໂຂ ຠນ຺ເຕ ຠຄວຕາ ຠາສິຕໍ.

ຍຊມານານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ,

ກໂຣຕໍ ໂອປຘິຕໍ ປຸຎ຺ຎໍ, ກຕ຺ຖ ທິນ຺ນໍ ມຫປ຺ຜລໍ–

ຈຕ຺ຕາໂຣ ຈ ປຏິປນ຺ນາ, ຈຕ຺ຕາໂຣ ຈ ຜເລ ຐິຕາ;

ເອສ ສງ຺ໂຆ ອຸຊຸຠູໂຕ, ປຎ຺ຎາສີລສມາຫິໂຕ;

ຍຊມານານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ;

ກໂຣຕໍ ໂອປຘິກໍ ປຸຎ຺ຎໍ, ສງ຺ເຆ ທິນ຺ນໍ ມຫປ຺ຜລໍ–

ຄຫຏ຺ຐວນ຺ທນາສຸຕ຺ຕ

ປຸຈ຺ຉາ – ຄຫຏ຺ຐວນ຺ທນາສຸຕ຺ຕໍ ປນາວຸໂສ ຠຄວຕາ ກຕ຺ຖ ກໍ ອາຣພ຺ຠ ກຖຎ຺ຈ ຠາສິຕໍ.

ວິສ຺ສຊ຺ຊນາ – ສາວຕ຺ຖິຍໍ ຠນ຺ເຕ ສມ຺ພຫຸເລ ຠິກ຺ຂູ ອາຣພ຺ຠ ‘‘ຠູຕປຸພ຺ພໍ ຠິກ຺ຂເວ ສກ຺ໂກ ເທວານມິນ຺ໂທ ມາຕລິໍ ສງ຺ຄາຫກໍ ອາມນ຺ເຕສີ’’ຕິ ເອວມາທິນາ ຠນ຺ເຕ ຠຄວຕາ ຠາສິຕໍ.

ຕໍ ນມສ຺ສນ຺ຕິ ເຕວິຊ຺ຊາ, ສພ຺ເພ ຠຸມ຺ມາຈ ຂຕ຺ຕິຍາ;

ຈຕ຺ຕາໂຣ ຈ ມຫາຣາຊາ, ຕິທສາຈ ຍສສ຺ສິໂນ;

ອຖໂກ ນາມ ໂສ ຍກ຺ໂຂ, ຍໍ ຕ຺ວໍ ສກ຺ກ ນມສ຺ສສິ–

ອຫຎ຺ຈ ສີລສມ຺ປນ຺ເນ, ຈິຣຣຕ຺ຕສມາຫິເຕ;

ສມ຺ມາປພ຺ພຊິເຕ ວນ຺ເທ, ພ຺ຣຫ຺ມຈຣິຍປຣາຍເນ.

ເຍ ຄຫຏ຺ຐາ ປຸຎ຺ຎກຣາ, ສີລວນ຺ໂຕ ອຸປາສກາ;

ຘມ຺ເມນ ທາຣໍ ໂປເສນ຺ຕິ, ເຕ ນມສ຺ສາມິ ມາຕລິ.