໓. ອຘິປຕິປຈ຺ຈໂຍ

ທຸວິໂຘ ອຘິປຕິປຈ຺ຈໂຍ ອາຣມ຺ມຓາຘິປຕິປຈ຺ຈໂຍ ສຫ ຊາຕາຘິປຕິປຈ຺ຈໂຍ ຈ. ຕຕ຺ຖ ກຕໂມ ອາຣມ຺ມຓາຘິປຕິປຈ຺ຈໂຍ. ອາຣມ຺ມຓປຈ຺ຈເຍ ວຸຕ຺ເຕສຸ ອາຣມ຺ມເຓສຸ ຍານິ ອາຣມ຺ມຓານິ ອຕິອິຏ຺ຐານິ ໂຫນ຺ຕິ ອຕິກນ຺ຕານິ ອຕິມນາປານິ ຄຣຸກຕານິ. ຕານິ ອາຣມ຺ມຓານິ ອາຣມ຺ມຓາຘິປຕິປຈ຺ຈໂຍ. ຕຕ຺ຖ ອຕິອິຏ຺ຐານີຕິ ສຠາວໂຕ ອິຏ຺ຐານິ ວາ ໂຫນ຺ຕຸ ອນິຏ຺ຐານິ ວາ, ເຕນ ເຕນ ປຸຄ຺ຄເລນ ອຕິອິຈ຺ຉິຕານິ ອາຣມ຺ມຓານິ ອິຘ ອຕິອິຏ຺ຐານິ ນາມ.

ຕານິ ປນ ຘມ຺ມໂຕ ທ຺ເວ ໂທສມູລຈິຕ຺ຕຸປ຺ປາເທ ຈ ທ຺ເວ ໂມມູຫ ຈິຕ຺ຕຸປ຺ປາເທ ຈ ທຸກ຺ຂສຫຄຕກາຍວິຎ຺ຎາຓຈິຕ຺ຕຸປ຺ປາເທ ຈ ຐເປຕ຺ວາ ອວເສສານິ ສພ຺ພານິ ກາມາວຈຣຈິຕ຺ຕເຈຕສິການິ ຈ ຣູປາຣູປ ໂລກຸຕ຺ຕຣຈິຕ຺ຕເຈຕສິການິ ຈ ສພ຺ພານິ ອຕິອິຏ຺ຐຣູປານິ ຈ ໂຫນ຺ຕິ.

ເຕສຸປິ ກາມາຣມ຺ມຓານິ ຄຣຸໍ ກໂຣນ຺ຕສ຺ເສວ ອາຣມ຺ມຓາ ຘິປຕິປຈ຺ຈໂຍ. ຄຣຸໍ ອກໂຣນ຺ຕສ຺ສ ອາຣມ຺ມຓາຘິປຕິປຈ຺ຈໂຍ ນ ໂຫຕິ. ຌານລາຠິໂນ ປນ ອຕ຺ຕນາ ປຏິລທ຺ຘານິ ມຫຄ຺ຄຕຌານານິ ອຣິຍສາວກາ ຈ ອຕ຺ຕນາ ປຏິລທ຺ເຘ ໂລກຸຕ຺ຕຣຘມ຺ເມ ຄຣຸໍ ອກໂຣນ຺ຕາ ນາມ ນຕ຺ຖິ.

ກຕເມ ຘມ຺ມາ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ. ອຏ຺ຐ ໂລຠ ມູລຈິຕ຺ຕານິ ອຏ຺ຐ ກາມາວຈຣກຸສລຈິຕ຺ຕານິ ຈຕ຺ຕາຣິ ກາມາວຈຣ ຎາຓສມ຺ປຍຸຕ຺ຕກິຣິຍຈິຕ຺ຕານິ ອຏ຺ຐ ໂລກຸຕ຺ຕຣຈິຕ຺ຕານິ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ.

ຕຕ຺ຖ ໂລກິຍານິ ຉຬາຣມ຺ມຓານິ ໂລຠມູລຈິຕ຺ຕານໍ ປຈ຺ຈໂຍ. ສຕ຺ຕຣສ ໂລກິຍກຸສລານິ ຈຕຸນ຺ນໍ ຎາຓວິປ຺ປຍຸຕ຺ຕ ກຸສລານໍ. ຕານິ ກຸສລານິເຈວ ເຫຏ຺ຐິມມຄ຺ຄຜລານິ ຈ ນິພ຺ພານຎ຺ຈ ຈຕຸນ຺ນໍ ຎາຓສມ຺ປຍຸຕ຺ຕກຸສລານໍ. ອຣຫຕ຺ຕມຄ຺ຄຜລານິ ຈ ນິພ຺ພານຎ຺ຈ ຈຕຸນ຺ນໍ ຎາຓສມ຺ປຍຸຕ຺ຕກິຣິຍານໍ. ນິພ຺ພານໍ ອຏ຺ຐນ຺ນໍ ໂລກຸຕ຺ຕຣ ຈິຕ຺ຕານນ຺ຕິ.

ເກນຏ຺ເຐນ ອາຣມ຺ມຓໍ, ເກນຏ຺ເຐນ ອຘິປຕິ. ອາລມ຺ພິ ຕພ຺ພຏ຺ເຐນ ອາຣມ຺ມຓໍ, ອາຘິປຈ຺ຈຏ຺ເຐນ ອຘິປຕິ. ໂກ ອາຘິປຈ຺ຈຏ຺ໂຐ. ອຕ຺ຕານໍ ຄຣຸໍ ກຕ຺ວາ ປວຕ຺ເຕສຸ ຈິຕ຺ຕເຈຕສິເກສຸ ອິສ຺ສຣຠາໂວ ອາຘິປຈ຺ຈຏ຺ໂຐ. ໂລເກ ສາມິກາ ວິຍ ອາຣມ຺ມຓາຘິປຕິປຈ຺ຈຍ ຘມ຺ມາ ທຏ຺ຐພ຺ພາ, ທາສາ ວິຍ ປຈ຺ຈຍຸປ຺ປນ຺ນຘມ຺ມາ ທຏ຺ຐພ຺ພາ.

ສຸຕໂສມຊາຕເກ ຣາຊາ ໂປຣິສາໂທ ມນຸສ຺ສມໍສໍ ຄຣຸໍ ກໂຣນ຺ໂຕ ມນຸສ຺ສມໍສເຫຕຸ ຣຊ຺ຊໍ ປຫາຍ ອຣຎ຺ເຎ ວິຈຣຕິ. ຕຕ຺ຖ ມນຸສ຺ສມໍເສ ຄນ຺ຘຣສ ຘມ຺ມາ ອາຣມ຺ມຓາຘິປຕິປຈ຺ຈໂຍ. ຣຎ຺ໂຎ ໂປຣິສາທສ຺ສ ໂລຠມູລຈິຕ຺ຕໍ ປຈ຺ຈຍຸປ຺ປນ຺ນຘມ຺ໂມ. ຣາຊາ ສຸຕ ໂສໂມ ສຈ຺ຈຘມ຺ມໍ ຄຣຸໍ ກຕ຺ວາ ສຈ຺ຈຘມ຺ມເຫຕຸ ຣຊ຺ຊສມ຺ປຕ຺ຕິຎ຺ຈ ຎາຕິ ສງ຺ຆຎ຺ຈ ອຕ຺ຕໂນ ຊີວິຕຎ຺ຈ ຉຏ຺ເຏຕ຺ວາ ປຸນ ຣຎ຺ໂຎ ໂປຣິສາທສ຺ສ ຫຕ຺ຖໍ ອຸປຄໂຕ. ຕຕ຺ຖ ສຈ຺ຈຘມ຺ໂມ ອາຣມ຺ມຓາຘິປຕິປຈ຺ຈໂຍ. ຣຎ຺ໂຎ ສຸຕໂສມສ຺ສ ກຸສລຈິຕ຺ຕໍ ປຈ຺ຈຍຸປ຺ປນ຺ນຘມ຺ໂມ. ເອສນໂຍ ສພ຺ເພສຸ ຄຣຸກເຕສຸ ອາຣມ຺ມເຓສຸ.

ກຕໂມ ສຫຊາຕາຘິປຕິປຈ຺ຈໂຍ. ອຘິປຕິຠາວໍ ປຕ຺ຕາ ຈຕ຺ຕາໂຣ ຘມ຺ມາ ອຘິປຕິປຈ຺ຈໂຍ, ຉນ຺ໂທ ຈິຕ຺ຕໍ ວີຣິຍໍ ວີມໍສາ.

ກຕເມ ຘມ຺ມາ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ. ອຘິປຕິ ສມ຺ປຍຸຕ຺ຕາ ຈິຕ຺ຕເຈຕສິກາ ຈ ອຘິປຕິສມຸຏ຺ຐິຕາ ຈິຕ຺ຕຊຣູປຘມ຺ມາ ຈ ຕສ຺ສ ປຈ຺ຈຍສ຺ສ ປຈ຺ຈຍຸປ຺ປນ຺ນາ.

ເກນຏ຺ເຐນ ສຫຊາໂຕ, ເກນຏ຺ເຐນ ອຘິປຕິ.

ສຫຸປ຺ປາທນຏ຺ເຐນ ສຫຊາໂຕ, ສຫຊາຕານໍ ຘມ຺ມານໍ ອຠິຠວນຏ຺ເຐນ ອຘິປຕິ. ຕຕ຺ຖ ສຫຸປ຺ປາທນຏ຺ເຐນາຕິ ໂຍ ຘມ຺ໂມ ສຍໍ ອຸປ຺ປຊ຺ຊມາໂນ ອຕ຺ຕນາ ສຫຊາຕຘມ຺ເມ ຈ ອຕ຺ຕນາ ສເຫວ ອຸປ຺ປາເທຕິ, ຕສ຺ສ ອຕ຺ຕນາ ສຫຊາຕຘມ຺ມານໍ ສຫຸປ຺ປາທນຏ຺ເຐນ.

ອຠິຠວນຏ຺ເຐນາຕິ ອຊ຺ໂຌຕ຺ຖຣຓຏ຺ເຐນ. ຍຖາ ຣາຊາ ຈກ຺ກວຕ຺ຕິ ອຕ຺ຕໂນ ປຸຎ຺ຎິທ຺ຘິຍາ ສກລທີປວາສິໂນ ອຠິຠວນ຺ໂຕ ອຊ຺ໂຌຕ຺ຖຣນ຺ໂຕ ອຕ຺ຕໂນ ວເສ ວຕ຺ຕາເປຕິ, ສກລທີປວາສິໂນ ຈ ຕສ຺ສ ວເສ ວຕ຺ຕນ຺ຕິ. ຕຖາ ອຘິປຕິຏ຺ຐານປຕ຺ຕາ ອິເມ ຈຕ຺ຕາໂຣ ຘມ຺ມາ ອຕ຺ຕໂນ ອຕ຺ຕໂນ ວິສເຍ ສຫຊາຕຘມ຺ເມ ອຠິຠວນ຺ຕາ ອຊ຺ໂຌຕ຺ຖຣນ຺ຕາ ອຕ຺ຕໂນ ວເສ ວຕ຺ຕາເປນ຺ຕິ, ສຫຊາຕຘມ຺ມາ ຈ ເຕສໍ ວເສ ວຕ຺ຕນ຺ຕິ. ຍຖາ ວາ ສິລາຖມ຺ເຠ ປຖວິຘາຕຸ ອຸທກກ຺ຂນ຺ເຘ ອາໂປຘາຕຸ ອຄ຺ຄິກ຺ຂນ຺ເຘ ເຕໂຊຘາຕຸ ວາຕກ຺ຂນ຺ເຘ ວາໂຍຘາຕຸ ອຕ຺ຕນາ ສຫຊາຕາ ຕິສ຺ໂສ ຘາຕຸໂຍ ອຠິຠວນ຺ຕາ ອຊ຺ໂຌຕ຺ຖຣນ຺ຕາ ອຕ຺ຕໂນ ຄຕິໍ ຄມາເປນ຺ຕິ, ສຫຊາຕຘາຕຸໂຍ ຈ ຕາສໍ ຄຕິໍ ຄຈ຺ຉນ຺ຕິ, ເອວເມວ ອຘິປຕິຏ຺ຐານປຕ຺ຕາ ອິເມ ຈຕ຺ຕາໂຣ ຘມ຺ມາ ອຕ຺ຕໂນ ພເລນ ສຫຊາຕຘມ຺ເມ ອຕ຺ຕໂນ ຄຕິໍ ຄມາເປນ຺ຕິ, ສຫຊາຕຘມ຺ມາ ຈ ເຕສໍ ຄຕິໍ ຄຈ຺ຉນ຺ຕິ, ເອວໍ ສຫຊາຕຘມ຺ມານໍ ອຠິຠວນຏ຺ເຐນ.

ເອຕ຺ຖ ວເທຍ຺ຍຸໍ, ຍທິ ສຫຊາຕຘມ຺ມານໍ ອຠິຠວນຏ຺ເຐນ ອຘິປຕິນາມ ສິຍາ. ເອວໍ ສຕິ ຕິຏ຺ຐຕຸ ຉນ຺ໂທ, ໂລໂຠ ເອວ ອຘິປຕິນາມ ສິຍາ, ໂສ ຫິ ຉນ຺ທໂຕປິ ພລວຕໂຣ ຫຸຕ຺ວາ ສຫ ຊາຕຘມ຺ເມ ອຠິຠວນ຺ໂຕ ປວຕ຺ຕຕີຕິ. ວຸຈ຺ຈເຕ, ພາລປຸຖຸຊ຺ຊເນສຸ ເອວ ໂລໂຠ ຉນ຺ທໂຕ ພລວຕໂຣ ໂຫຕິ, ປຓ຺ຑິເຕສຸ ປນ ຉນ຺ໂທ ເອວ ໂລຠໂຕ ພລວຕໂຣ ຫຸຕ຺ວາ ສຫຊາຕຘມ຺ເມ ອຠິ ຠວນ຺ໂຕ ປວຕ຺ຕຕິ. ສເຈ ຫິ ໂລໂຠ ເອວ ຉນ຺ທໂຕ ພລວຕໂຣ ສິຍາ, ກຖໍ ອິເມ ສຕ຺ຕາ ໂລຠສ຺ສ ຫຕ຺ຖຄຕາ ຠວສມ຺ປຕ຺ຕິ ໂຠຄສມ຺ມຕ຺ຕິໂຍ ຉຏ຺ເຏຕ຺ວາ ເນກ຺ຂມ຺ມຘມ຺ເມ ປູເຣຕ຺ວາ ວຏ຺ຏທຸກ຺ຂໂຕ ນິສ຺ສເຣຍ຺ຍຸໍ. ຍສ຺ມາ ປນ ຉນ຺ໂທ ເອວ ໂລຠໂຕ ພລວຕໂຣ ໂຫຕິ, ຕສ຺ມາ ອິເມ ສຕ຺ຕາ ໂລຠສ຺ສ ຫຕ຺ຖຄຕາ ຠວສມ຺ປຕ຺ຕິ ໂຠຄສມ຺ປຕ຺ຕິໂຍ ຉຏ຺ເຏຕ຺ວາ ເນກ຺ຂມ຺ມຘມ຺ເມ ປູເຣຕ຺ວາ ວຏ຺ຏທຸກ຺ຂໂຕ ນິສ຺ສຣນ຺ຕິ. ຕສ຺ມາ ຉນ຺ໂທ ເອວ ໂລຠໂຕ ພລວຕໂຣ ໂຫຕິ, ຉນ຺ໂທ ເອວ ອຘິປຕິ, ນ ໂລໂຠຕິ. ເອສ ນໂຍ ໂທສາທີສຸປີຕິ.

ຕຕ຺ຖ ໂລເກ ມຫນ຺ເຕສຸ ສຸທຸກ຺ກເຣສຸ ປຸຣິສກມ຺ເມສຸ ປຈ຺ຈຸປຏ຺ຐິເຕສຸ ອິເມ ຈຕ຺ຕາໂຣ ຘມ຺ມາ ກມ຺ມສິທ຺ຘິຍາ ສໍວຕ຺ຕນ຺ຕິ. ກຖໍ.

ຫີນຈ຺ຉນ຺ທາ ພຫຸຊ຺ຊນາ ມຫນ຺ຕານິ ສຸທຸກ຺ກຣານິ ປຸຣິສກມ຺ມານິ ທິສ຺ວາ ນິວຕ຺ຕຈ຺ຉນ຺ທາ ໂຫນ຺ຕິ. ກາຕຸໍ ນ ອິຈ຺ຉນ຺ຕິ, ອມ຺ຫາກໍ ອວິສໂຍຕິ ນິຣເປກ຺ຂາ ຐເປນ຺ຕິ. ຉນ຺ທາຘິໂກ ປນ ຕາທິສານິ ປຸຣິສກມ຺ມານິ ທິສ຺ວາ ອຸຄ຺ຄຕຈ຺ຉນ຺ໂທ ໂຫຕິ, ອຕິວິຍ ກາຕຸໍ ອິຈ຺ຉຕິ, ມມ ວິສໂຍ ເອໂສຕິ ອຘິຏ຺ຐານໍ ຄຈ຺ຉຕິ. ໂສ ຉນ຺ເທນ ອຠິກຑ຺ຒິໂຕ ຍາວ ຕໍ ກມ຺ມໍ ນ ສິຊ຺ຌຕິ, ຕາວ ອນ຺ຕຣາ ຕໍ ກມ຺ມໍ ຉຏ຺ເຏຕຸໍ ນ ສກ຺ໂກຕິ. ເອວຎ຺ຈ ສຕິ ອຕິມຫນ຺ຕໍປິ ຕໍ ກມ຺ມໍ ເອກສ຺ມິໍ ກາເລ ສິທ຺ຘໍ ຠວິສ຺ສຕິ.

ຫີນວີຣິຍາ ຈ ພຫຸຊ຺ຊນາ ຕາທິສານິ ກມ຺ມານິ ທິສ຺ວາ ນິວຕ຺ຕ ວີຣິຍາ ໂຫນ຺ຕິ, ອິທໍ ເມ ກມ຺ມໍ ກໂຣນ຺ຕສ຺ສ ພຫຸໍ ກາຍທຸກ຺ຂໍ ວາ ເຈໂຕທຸກ຺ຂໍ ວາ ຠວິສ຺ສຕີຕິ ນິວຕ຺ຕນ຺ຕິ. ວີຣິຍາຘິໂກ ປນ ຕາທິສານິ ປຸຣິສກມ຺ມານິ ທິສ຺ວາ ອຸຄ຺ຄຕວີຣິໂຍ ໂຫຕິ, ອິທາເນວ ອຸຏ຺ຐຫິຕ຺ວາ ກາຕຸໍ ອິຈ຺ຉຕິ. ໂສ ຈິຣກາລໍປິ ຕໍ ກມ຺ມໍ ກໂຣນ຺ໂຕ ພຫຸໍ ກາຍທຸກ຺ຂໍ ວາ ເຈໂຕທຸກ຺ຂໍ ວາ ອນຸຠວນ຺ໂຕປິ ຕສ຺ມິໍ ວີຣິຍ ກມ຺ເມ ນນິພ຺ພິນ຺ທຕິ, ມຫນ຺ເຕນ ກມ຺ມວີຣິເຍນ ວິນາ ຠວິຕຸໍ ນ ສກ຺ໂກຕິ, ຕາທິເສນ ວີຣິເຍນ ຣຕ຺ຕິທິວໍ ເຂເປນ຺ໂຕ ຈິຕ຺ຕສຸຂໍ ວິນ຺ທຕິ. ເອວຎ຺ຈ ສຕິ ອຕິມຫນ຺ຕໍປິ ຕໍ ກມ຺ມໍ ເອກສ຺ມິໍ ກາເລ ສິທ຺ຘໍ ຠວິສ຺ສຕິ.

ຫີນຈິຕ຺ຕາ ຈ ພຫຸຊ຺ຊນາ ຕາທິສານິ ກມ຺ມານິ ທິສ຺ວາ ນິວຕ຺ຕຈິຕ຺ຕາ ໂຫນ຺ຕິ. ປຸນ ອາຣມ຺ມຓໍປິ ນ ກໂຣນ຺ຕິ. ຈິຕ຺ຕາຘິໂກ ປນ ຕາທິສານິ ກມ຺ມານິ ທິສ຺ວາ ອຸຄ຺ຄຕຈິຕ຺ໂຕ ໂຫຕິ, ຈິຕ຺ຕໍ ວິໂນເທຕຸໍປິ ນ ສກ຺ໂກຕິ, ນິຈ຺ຈກາລໍ ຕຕ຺ຖ ນິພນ຺ຘຈິຕ຺ໂຕ ໂຫຕິ. ໂສ ຈິຕ຺ຕວສິໂກ ຫຸຕ຺ວາ ຈິຣກາລໍປິ ຕໍ ກມ຺ມໍ ກໂຣນ຺ໂຕ ພຫຸໍ ກາຍທຸກ຺ຂໍວາປີຕິອາທິນາ ຉນ຺ທາຘິປຕິນເຍນ ວຕ຺ຕພ຺ພໍ.

ມນ຺ທປຎ຺ຎາ ຈ ພຫຸຊ຺ຊນາ ຕາທິສານິ ກມ຺ມານິ ທິສ຺ວາ ນິວຕ຺ຕປຎ຺ຎາ ໂຫນ຺ຕິ, ກມ຺ມານໍ ອາທິມ຺ປິ ນ ປສ຺ສນ຺ຕິ, ອນ຺ຕປິ ນ ປສ຺ສນ຺ຕິ, ອນ຺ຘກາເຣ ປວິສນ຺ຕາ ວິຍ ໂຫນ຺ຕິ, ຕານິ ກມ຺ມານິ ກາຕຸໍ ຈິຕ຺ຕໍປິ ນ ນມຕິ. ປຎ຺ຎາຘິໂກ ປນ ຕາທິສານິ ກມ຺ມານິ ທິສ຺ວາ ອຸຄ຺ຄຕປຎ຺ໂຎ ໂຫຕິ, ກມ຺ມານໍ ອາທິໍປິ ປສ຺ສຕິ, ອນ຺ຕໍປິ ປສ຺ສຕິ, ຜລໍປິ ປສ຺ສຕິ, ອານິສໍສໍປິ ປສ຺ສຕິ. ສຸເຂນ ກມ຺ມສິທ຺ຘິຍາ ນານາອຸປາຍໍປິ ປສ຺ສຕິ. ໂສ ຈິຣກາລໍປິ ຕໍ ກມ຺ມໍ ກໂຣນ຺ໂຕຕິອາທິນາ ວີຣິຍາຘິປຕິນເຍນ ວຕ຺ຕພ຺ພໍ. ອິຘ ປນ ມຫຕິຍາ ກມ຺ມວີມໍສາຍາຕິ ຈ ຕາທິສິຍາ ກມ຺ມ ວີມໍສາຍາຕິ ຈ ວຕ຺ຕພ຺ພໍ.

ເອວໍ ໂລເກ ມຫນ຺ເຕສຸ ສຸທຸກ຺ກເຣສຸ ປຸຣິສກມ຺ເມສຸ ປຈ຺ຈຸປຏ຺ຐິເຕສຸ ອິເມ ຈຕ຺ຕາໂຣ ຘມ຺ມາ ກມ຺ມສິທ຺ຘິຍາ ສໍວຕ຺ຕນ຺ຕິ. ອິເມສຎ຺ຈ ຈຕຸນ຺ນໍ ອຘິປຕີນໍ ວິຊ຺ຊມານຕ຺ຕາ ໂລເກ ປຸຣິສວິເສສາ ນາມ ທິສ຺ສນ຺ຕິ, ສພ຺ພຎ຺ຎຸພຸທ຺ຘາ ນາມ ທິສ຺ສນ຺ຕິ, ສພ຺ພຎ຺ຎຸໂພຘິສຕ຺ຕາ ນາມ ທິສ຺ສນ຺ຕິ, ປຈ຺ເຈກພຸທ຺ຘາ ນາມ ທິສ຺ສນ຺ຕິ, ປຈ຺ເຈກໂພຘິສຕ຺ຕານາມ ທິສ຺ສນ຺ຕິ, ອຄ຺ຄສາວການາມ ມຫາສາວກາ ນາມ ສາວກໂພຘິສຕ຺ຕາ ນາມ ທິສ຺ສນ຺ຕິ. ໂລເກປິ ເອວຣູປານໍ ປຸຣິສວິເສສານໍ ວເສນ ສຕ຺ຕ ໂລກສ຺ສ ອຕ຺ຖາຍ ຫິຕາຍ ສຸຂາຍ ປຎ຺ຎາສິປ຺ປວິເສສາ ຈ ປຣິໂຠຄວຕ຺ຖຸວິເສສາ ຈ ທິສ຺ສນ຺ຕີຕິ. ອຘິປຕິປຈ຺ຈຍທີປນາ ນິຏ຺ຐິຕາ.