ຈິຕ຺ຕສງ຺ຄຫ-ປຣມຕ຺ຖທີປນີ

໑໗. ອິທານິ ອຸທ຺ເທສກ຺ກເມນ ຈິຕ຺ຕໍ ຕາວ ນິທ຺ທິສນ຺ໂຕ ຕຕ຺ຖ ຈິຕ຺ຕນ຺ຕິອາທິມາຫ. ຕຕ຺ຖາຕິ ເຕສຸ ຈຕູສຸ ອຠິຘມ຺ມຕ຺ເຖສຸ. ຕາວ ປຖມໍ. ຈຕ຺ຕາໂຣ ວິຘາ ປກາຣາ ຍສ຺ສ ຕໍ ຈຕຸພ຺ພິຘໍ.

໑໘. ກາມາວຈຣນ຺ຕິ ເອຕ຺ຖ ກາມີຍຕີຕິ ກາໂມ. ກາເມນ຺ຕິວາ ເອຕ຺ຖ ສຕ຺ຕາ ອວິກ຺ຂມ຺ຠິຕກາມຣາຄຕ຺ຕາ ກາມຣຕິຍາເອວ ຣມນ຺ຕິ. ນ ອຸປຣິຠູມີສຸ ວິຍ ຌານຣຕິຍາຕິ ກາໂມ. ເອກາທສວິຘາ ກາມຠູມິ. ນນຸ ເຈຕ຺ຖ ຌານລາຠິໂນປິ ສນ຺ຕີຕິ. ນ ນ ສນ຺ຕິ. ເຕປນ ກທາຈິ ເທວາຕິ ນຕ຺ເຖຕ຺ຖ ໂທໂສ. ອວີຈິນິຣຍາທໂຍ ກຖໍ ກາມີຍນ຺ຕິ. ກຖຎ຺ຈ ຕຕ຺ຖ ສຕ຺ຕາ ກາມຣຕິຍາ ຣມນ຺ຕີຕິ. ນິມິຕ຺ຕສ຺ສາທວເສນວາ ຠວນິກນ຺ຕິວເສນວາຕິ. ມຣຓກາເລ ຫິ ອຸປຏ຺ຐິຕາ ນິຣຍຄ຺ຄິຊາລາ ສຸວຓ຺ຓວຓ຺ຓາວິຍ ຂາຍນ຺ຕິ. ເອໂກ ກິຣ ມິຈ຺ຉາທິຏ຺ຐິໂກ ພ຺ຣາຫ຺ມໂຓ ມຣຓມຎ຺ເຈ ນິປ຺ປນ຺ໂນ ໂຫຕິ. ຕສ຺ສ ອາຈຣິຍພ຺ຣາຫ຺ມຓາ ສມີເປ ຐຕ຺ວາ ພ຺ຣຫ຺ມໂລກໍ ໂຠ ຄຈ຺ຉາຕິ ວທນ຺ຕິ. ຕສ຺ສປນ ອວີຈິນິຣເຍ ອຄ຺ຄິຊາລາ ອຸປຏ຺ຐຫນ຺ຕິ. ຕທາ ໂສ ໂຠ ອາຈຣິຍາ ສຸວຓ຺ຓວຓ຺ຓາ ປຎ຺ຎາຍນ຺ຕີຕິ ອາຫ. ເອສ ໂຠ ພ຺ຣຫ຺ມໂລໂກ. ຕຕ຺ຖ ຄຈ຺ຉາຕິ ວທນ຺ຕິ. ໂສ ກາລງ຺ກຕ຺ວາ ອວີຈິມ຺ຫິ ອຸປ຺ປຊ຺ຊິ. ເອວໍ ນິມິຕ຺ຕສ຺ສາທວເສນ ເຕ ກາມີຍນ຺ຕິ. ຕຕ຺ຖ ອຸປ຺ປນ຺ນານໍປິ ຠວນິກນ຺ຕິນາມ ໂຫຕີຕິ. ອປິຈ, ຕຕ຺ຖ ອຸປ຺ປນ຺ນາ ອວິກ຺ຂມ຺ຠິຕກາມຣາຄາເອວ ໂຫນ຺ຕິ, ໂອກາເສ ສຕິ ກາມຣຕິຍາ ຣມິສ຺ສນ຺ຕິ ເຍວາຕິ. ຕສ຺ມິໍ ກາເມ ອວຈຣຕີຕິ ກາມາວຈຣໍ. ເອຕ຺ຖຈ ອວຈຣຕີຕິ ປທສ຺ສ ອຸປ຺ປຊ຺ຊຕີຕິ ອຕ຺ໂຖ ນ ຄເຫຕພ຺ໂພ. ໂສ ຫິ ອຕ຺ໂຖ ປາຬິຍາຈ ນສເມຕິ. ນານາໂທສຍຸຕ຺ໂຕຈ ໂຫຕີຕິ. ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາຕິ ຫິ ປາຬິຍໍ ວຸຕ຺ຕໍ. ຍທິ ເຈຕ຺ຖ ໂສ ອຕ຺ໂຖ ອຘິປ຺ເປໂຕ ສິຍາ. ເອວໍ ສຠິ ເອຕ຺ຖາວຈຣາ ເອຕ຺ຖຸປ຺ປນ຺ນາຕິ ວຸຕ຺ຕໍ ສິຍາ. ນປນ ວຸຕ຺ຕໍ. ນຈ ປຣິຍາປນ຺ນສທ຺ໂທ ອຸປ຺ປນ຺ນສທ຺ເທນ ສຫ ສມານຕ຺ໂຖຕິ ສກ຺ກາ ວຕ຺ຕຸໍ. ນ ຫິ ໂລກຸຕ຺ຕຣຈິຕ຺ຕານິ ຕີສຸ ຠເວສຸ ອຸປ຺ປນ຺ນາ ນິປິ ຕຕ຺ຣ ປຣິຍາປນ຺ນານິເຍວ ໂຫນ຺ຕີຕິ. ເອວໍ ຕາວ ປາຬິຍາ ນສເມຕີຕິ.

ຍທິຈ ໂສ ອຕ຺ໂຖ ຄຫິໂຕ ສິຍາ. ເອວຎ຺ຈ ສຕິ ຕສ຺ມິໍ ກາເມ ເຍ ມຫຄ຺ຄຕ ໂລກຸຕ຺ຕຣຘມ຺ມາ ອຸປ຺ປຊ຺ຊນ຺ຕິ. ເຕສໍປິ ກາມາ ວຈຣຕາປຕ຺ຕິໂທໂສ ຣູປາວຈຣຕາທິ ມຸຕ຺ຕິໂທໂສຈ ອາປຊ຺ຊຕິ. ເຍຈ ກາມາວຈຣຘມ຺ມາ ຣູປາຣູປຠູມີສຸ ອຸປ຺ປຊ຺ຊນ຺ຕິ. ເຕສຎ຺ຈ ຣູປາຣູປາ ວຈຣຕາ ປຕ຺ຕິໂທໂສ ກາມາວຈຣຕາ ມຸຕ຺ຕິໂທໂສຈ ອາປຊ຺ຊຕີຕິ. ນນຸ ເຍຠຸຍ຺ຍວຸຕ຺ຕິວເສນປິ ເກສຎ຺ຈິ ນາມລາໂຠ ໂຫຕິ. ຍຖາ ວນຈຣໂກ ສງ຺ຄາມາວຈໂຣຕິ. ຕສ຺ມາ ອິຘປິ ເຕສໍ ຘມ຺ມານໍ ອຕ຺ຕໂນ ອຕ຺ຕໂນ ຠຸມ຺ມີສຸ ອຸປ຺ປນ຺ນພຫຸລຕ຺ຕາ ກາມາວຈຣາທິ ນາມລາເຠ ສຕິ ນ ໂກຈິ ໂທໂສຕິ.ນ. ເອວຎ຺ຫິ ສຕິ ໂລກຸຕ຺ຕຣ ຘມ຺ມານໍ ກາມາວຈຣຕາທິ ມຸຈ຺ຈນຕ຺ຖໍ ເຍຠຸຍ຺ເຍນ ອຸປ຺ປນ຺ນຠູມິ ວິສຸໍ ວຕ຺ຕພ຺ພາ ສິຍາ. ນ ຈ ສາ ນາມຠູມິ ອຕ຺ຖິ. ຍຕ຺ຖ ເຕ ເຍຠຸຍ຺ເຍນ ອຸປ຺ປຊ຺ຊນ຺ຕີຕິ. ເຕຫິ ອຸປ຺ປຊ຺ຊນ຺ຕາ ຕີສຸ ຠເວສຸ ເອວ ອຸປ຺ປຊ຺ຊນ຺ຕິ. ຕສ຺ມາ ເຕສໍ ກາມ ຣູປາຣູປາວຈຣຕາປຕ຺ຕິໂທໂສ ທຸນ຺ນິວາໂຣ ສິຍາຕິ. ເອວໍ ນານາໂທສຍຸຕ຺ໂຕ ໂຫຕີຕິ. ຕສ຺ມາສ຺ສ ຕຖາ ອຕ຺ຖໍ ອຄ຺ຄເຫຕ຺ວາ ເອຕ຺ຖາວຈຣາ ເອຕ຺ຖ ປຣິຍາປນ຺ນາຕິ ຠຄວຕາ ສໍວຓ຺ຓິເຕນ ປາຬິນເຍເນວສ຺ສ ອຕ຺ໂຖ ຄເຫຕພ຺ໂພຕິ. ອຍຎ຺ເຫຕ຺ຖ ອຕ຺ໂຖ. ກາເມ ອວຈຣຕິ ປຣິຍາປນ຺ນຠາເວນ ຕສ຺ມິໍ ອຊ຺ໂຌຄາເຫຕ຺ວາ ຈຣຕິ ປວຕ຺ຕຕີຕິ ກາມາວຈຣນ຺ຕິ. ປຣິຍາປນ຺ນຠາໂວຈນາມ ອຕ຺ຕໂນ ອາຘາຣຠູເຕນ ເຕນ ກາເມນ ສຫ ສມານຊາຕິໂຄຕ຺ຕນາມຕາ ສງ຺ຂາເຕຫິ ປຣິໂຕຠາເຄຫິ ຕສ຺ມິໍ ກາເມ ອາປນ຺ນຠາໂວ ອນຸປ຺ປວິຏ຺ຐ ຠາໂວ. ອນ຺ໂຕຄຘຠາໂວຕິ ວຸຕ຺ຕໍ ໂຫຕິ. ໂສຈ ຕຖາ ປຣິຍາປນ຺ນຠາໂວ ປຣິຄ຺ຄາຫິນິຍາ ກາມຕຓ຺ຫາຍ ກໂຕຕິ ທຏ຺ຐພ຺ໂພ. ເອຕ຺ຕາວຕາ ເຍຘມ຺ມາ ຣູປາຣູປສຕ຺ຕສນ຺ຕານຠູຕາປິ ມຍ຺ຫໍ ເອເຕຕິ ກາມ ຕຓ຺ຫາຍ ປຣິຄ຺ຄຫິຕາ ກາເມ ປຣິຍາປນ຺ນາວ ໂຫນ຺ຕິ. ເຕ ກາມາວຈຣານາມາຕິ ສິທ຺ຘາ ໂຫນ຺ຕິ. ຣູປາຣູປາ ວຈເຣສຸປິ ອຍໍ ນໂຍ ເນຕພ຺ໂພ. ເຕສຸປນ ຣູປຕຓ຺ຫາ ອຣູປຕຓ຺ຫາຈ ປຣິຄ຺ຄາຫິນີ ຕຓ຺ຫາ ທຏ຺ຐພ຺ພາ.

ເຍປນ ຘມ຺ມາ ຕິຓ຺ຓໍ ຕຓ຺ຫານໍ ປຣິຄ຺ຄຫວິມຸຕ຺ຕາ ໂຫນ຺ຕິ. ເຕ ຕີສຸ ຠເວສຸ ອຸປ຺ປນ຺ນາປິ ຕຕ຺ຣ ອປຣິຍາປນ຺ນາເອວ ໂຫນ຺ຕີຕິ ໂລກຸຕ຺ຕຣາ ນາມ ຊາຕາຕິ ເວທິຕພ຺ພາ. ເອຕ຺ຖຈ ປຏ຺ຐາເນ ອາຣຸປ຺ເປ ກາມຈ຺ຉນ຺ທໍ ນີວຣຓໍ ປຏິຈ຺ຈ ອຸທ຺ຘຈ຺ຈນີວຣຓນ຺ຕິອາທິນາ ອຣູປສຕ຺ຕສນ຺ຕາເນປິ ກາມຈ຺ຉນ຺ທສງ຺ຂາຕາຍ ກາມຕຓ຺ຫາຍ ອຸປ຺ປຕ຺ຕິ ວຸຕ຺ຕາ. ຕສ຺ມາ ຣູປາຣູປ ຠູມີສຸ ອຸປ຺ປນ຺ນານໍ ກາມຘມ຺ມານໍ ປຣິຄ຺ຄາຫິນີຕຓ຺ຫາ ຣູປາຣູປສຕ຺ຕສນ຺ຕານ ຄຕາປິ ທຏ຺ຐພ຺ພາ. ປາຬິຍໍ ກາມຈ຺ຉນ຺ທນີວຣຓນ຺ຕິ ອິທໍ ນີວຣຓຊາຕິກຕ຺ຕາ ວຸຕ຺ຕໍ. ນ ຫິ ຌານຠູມີສຸ ເອກນ຺ຕນີວຣຓກິຈ຺ຈານິ ນີວຣຓານິ ສກ຺ກາ ລທ຺ຘຸນ຺ຕິ. ອຕ຺ຣ ກາມເຠໂທ ວຕ຺ຕພ຺ໂພ. ທ຺ເວກາມາ ກິເລ ສກາໂມຈ, ວຕ຺ຖຸກາໂມຈາຕິ. ຕຕ຺ຖ ຖເປຕ຺ວາ ຣູປາຣູປຣາເຄ ອຎ຺ໂຎ ສພ຺ໂພປິ ໂລໂຠ ອິມສ຺ມິໍ ຈຕຸພ຺ຠູມິປຣິຈ຺ເຉເທ ກິເລ ສກາໂມນາມ. ຖເປຕ຺ວາຈ ຣູປາຣູປາວຈຣຘມ຺ເມ ອຎ຺ເຎ ສພ຺ເພປິ ຕີສຸ ຠູມີສຸ ອຸປ຺ປນ຺ນາ ກາມາວຈຣຘມ຺ມາ ວຕ຺ຖຸກາໂມນາມາຕິ. ຍໍປນ ອຏ຺ຐສາລິນິຍໍ ສພ຺ເພປິ ເຕຠູມກາ ຘມ຺ມາ ວຕ຺ຖຸກາໂມຕິ ວຸຕ຺ຕໍ. ຕໍ ມຫານິທ຺ເທເສ ນິທ຺ທິຏ຺ເຐນ ສຸຕ຺ຕນ຺ຕິກປຣິຍາເຍນ ວຸຕ຺ຕນ຺ຕິ ຄເຫຕພ຺ພໍ. ນ ຫິ ຣູປາຣູປາວຈຣຘມ຺ມາ ອຠິຘມ຺ເມ ກາມນາເມນ ວຸຕ຺ຕາ ອຕ຺ຖີຕິ. [ກາມາວຈຣປທໍ]

໑໙. ຣູປາວຈຣໍ ອຣູປາວຈຣນ຺ຕິ ເອຕ຺ຖ ຣູປາຣູປສທ຺ທາ ຕາສຸ ຠູມີສຸ ນິຣຸຬ຺ຫາຕິ ທຏ຺ຐພ຺ພາ. ອປິຈ ທ຺ເວ ຠູມິໂຍ ຣູປຠູມິ, ອຣູປຠູມີຕິ. ຕຕ຺ຖ ຣຸປ຺ປນລກ຺ຂຓໍ ຣູປໍ ຍຕ຺ຖ ນຕ຺ຖິ, ສາ ຈຕຸພ຺ພິຘາ ຠຸມ຺ມິ ອຣູປຠູມິນາມ. ເສສາ ສຕ຺ຕວີສຕິວິຘາ ຠຸມ຺ມິ ຣູປຠູມິນາມ. ຕຕ຺ຖຈ ເຫຏ຺ຐາ ເອກາທສວິຘາ ຠຸມ຺ມິ ໂອຬາຣິເກນ ກາເມນ ວິເສເສຕ຺ວາ ກາມ ຠູມີຕິ ວຸຕ຺ຕາ. ອຸປຣິ ໂສຬສວິຘາ ຠຸມ຺ມິ ຣູປຠູມິອິຈ຺ເຈວ ວຸຕ຺ຕາຕິ ທຏ຺ຐພ຺ພາ. ຍຕ຺ຖປນ ຕຓ຺ຫາວາ ຌານານິວາ ຣູປາຣູປສທ຺ເທຫິ ວຸຕ຺ຕານິ. ຕຕ຺ຖ ນິສ຺ສຍສ຺ສນາມໍ ນິສ຺ສິເຕ ອາໂຣປນວເສນ ນິສ຺ສໂຍປຈາໂຣ ເວທິຕພ຺ໂພ. ຍຕ຺ຖຈ ກາມາວຈຣາທິສທ຺ເທຫິ ຠູມິເອວ ວຸຕ຺ຕາ. ຕຕ຺ຖ ນິສ຺ສິຕສ຺ສ ນາມໍ ນິສ຺ສເຍ ອາໂຣປນວເສນ ນິສ຺ສິໂຕ ປຈາໂຣຕິ. ຍເມຕ຺ຖ ວຕ຺ຕພ຺ພໍ, ຕໍ ກາມາວຈຣປເທ ວຸຕ຺ຕນຍເມວາຕິ. ອຍເມຕ຺ຖ ເຕຠູມກ ປຣິຈ຺ເຉເທ ປາຬິອນຸຄຕາ ປຣມຕ຺ຖທີປນາ. ຍຖາຫ –

ກຕເມ ຘມ຺ມາ ກາມາວຈຣາ. ເຫຏ຺ຐໂຕ ອວີຈິນິຣຍໍ ປຣິຍນ຺ຕໍ ກຣິຕ຺ວາ ອຸປຣິໂຕ ປຣນິມ຺ມິຕວສວຕ຺ຕີເທເວ ອນ຺ໂຕ ກຣິຕ຺ວາ ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ຂນ຺ຘຘາຕຸອາຍຕນາ ຣູປາ ເວທນາ ສຎ຺ຎາ ສງ຺ຂາຣາ ວິຎ຺ຎາຓໍ. ອິເມຘມ຺ມາ ກາມາວຈຣາ. ກຕເມ ຘມ຺ມາ ຣູປາວຈຣາ. ເຫຏ຺ຐໂຕ ພ຺ຣຫ຺ມໂລກໍ ປຣິຍນ຺ຕໍ ກຣິຕ຺ວາ ອຸປຣິໂຕ ອກນິຏ຺ເຐ ເທເວ ອນ຺ໂຕ ກຣິຕ຺ວາ ຍໍ ເອຕສ຺ມິໍ ອນ຺ຕເຣ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ສມາປນ຺ນສ຺ສວາ ອຸປປນ຺ນສ຺ສວາ ທິຏ຺ຐຘມ຺ມສຸຂວິຫາຣິສ຺ສວາ ຈິຕ຺ຕເຈຕສິກາ ຘມ຺ມາ, ອິເມ ຘມ຺ມາ ຣູປາວຈຣາ. ກຕເມ ຘມ຺ມາ ອຣູປາວຈຣາ. ເຫຏ຺ຐໂຕ ອາກາສານຎ຺ຈາຍຕນຸປເຄ ເທເວ ປຣິຍນ຺ຕໍ ກຣິຕ຺ວາ ອຸປຣິໂຕ ເນວສຎ຺ຎາ ນາສຎ຺ຎາ ຍຕນຸປເຄ ເທເວ ອນ຺ໂຕ ກຣິຕ຺ວາ ຍໍ ເອຕສ຺ມິໍ ອນ຺ຕເຣ. ລ. ອິເມ ຘມ຺ມາ ອຣູປາວຈຣາຕິ.

[໑໙] ຏີກາສຸ ປນ

ຍຖາວຸຕ຺ຕໍ ສຸວິສທໍ ປາຬິນຍໍ ອຄ຺ຄເຫຕ຺ວາ ອຎ຺ຎຖາ ວຈນຕ຺ຖາຈ ວິນິຈ຺ຉຍາຈ ເອຕ຺ຖ ວຸຕ຺ຕາ. ສພ຺ເພ ເຕ ສາຣໂຕ ນ ປຈ຺ເຈຕພ຺ພາຕິ.

ນນຸ ອຏ຺ຐສາລິນິຍເມວ ເຕຈ ອຎ຺ເຎຈ ອຕ຺ຖາ ວຸຕ຺ຕາຕິ. ສຈ຺ຈໍ. ຠູຕໍປນ ສຸວິສທໍ ປາຬິອນຸຄຕໍ ອຕ຺ຖໍ ຎຕ຺ວາ ກິໍວິກ຺ເຂເປນາຕິ.

໒໐. ໂລກຸຕ຺ຕຣນ຺ຕິ ເອຕ຺ຖ ລຸຊ຺ຊນປລຸຊ຺ຊນຏ຺ເຐນ ໂລໂກ ວຸຈ຺ຈຕິ ຍຖາວຸຕ຺ໂຕ ເຕຠູມກຘມ຺ໂມ. ຍຖາຫ ລຸຊ຺ຊຕິ ປລຸຊ຺ຊຕີຕິ ໂຂ ຠິກ຺ຂເວ ຕສ຺ມາ ໂລໂກຕິ ວຸຈ຺ຈຕີຕິ. ເອວໍ ສນ຺ເຕ ໂລກຸຕ຺ຕຣຘມ຺ມານໍປິ ນິພ຺ພານວຊ຺ຊານໍ ໂລກຕາປຕ຺ຕິ ສິຍາ. ກສ຺ມາ, ເຕສໍປິ ລຸຊ຺ຊນປລຸຊ຺ຊນຘມ຺ມຕ຺ຕາຕິ. ນສິຍາ. ຍຕ຺ຖ ຫິ ນິຈ຺ໂຈ ຘຸໂວ ສສ຺ສໂຕຕິ ມຫາຊນສ຺ສ ມິຈ຺ຉາຄາໂຫ ນິວິສຕິ. ຕຕ຺ເຖວ ຕສ຺ສ ນິວາຣຓຕ຺ຖໍ ອຍໍ ໂລກສມຎ຺ຎາ ນິຍມີຍຕິ. ຕສ຺ມາ ສພ຺ພໂສ ມິຈ຺ຉາຄາຫວິມຸຕ຺ຕານໍ ເຕສໍ ໂລກຕາປຕ຺ຕິ ນຕ຺ຖີຕິ ວທນ຺ຕິ. ເຍສໍວາ ລຸຊ຺ຊນໍປລຸຊ຺ຊນຎ຺ຈ ມຫາຊນສ຺ສ ປາກຏໍ. ເຕສຎ຺ເຎວ ໂລກຕາສິທ຺ຘີຕິ ນຕ຺ຖິ ໂລກຸຕ຺ຕຣານໍ ໂລກຕ຺ຕປ຺ປສງ຺ໂຄຕິ. ໂລກໂຕ ອຸຕ຺ຕຣຕີຕິ ໂລກຸຕ຺ຕຣໍ. ມຄ຺ຄຈິຕ຺ຕໍ. ຕໂຕ ອຸຕ຺ຕິຓ຺ຓນ຺ຕິ ໂລກຸຕ຺ຕຣໍ. ຜລຈິຕ຺ຕໍ. ນິພ຺ພານໍປນ ອິຘ ນລພ຺ຠຕີຕິ. ອຸຕ຺ຕຣຓຎ຺ເຈຕ຺ຖ ຕຓ຺ຫາຕ຺ຕຍຄ຺ຄາຫ ວິມຸຕ຺ຕິຍາ ຕີສຸ ໂລເກສຸ ອປຣິຍາປນ຺ນຠາໂວເຍວ. ໂສຈ ອປຣິຍາປນ຺ນຠາໂວ ເກສໍ ຘມ຺ມານໍ ອຘິຏ຺ຐານ ຠູໂຕວິຍ ຄຍ຺ຫຕີຕິ ວິສຸໍ ເອກາ ຈຕຸຕ຺ຖີ ອວຕ຺ຖາຠູມິນາມາຕິ.

ຈຕຸພ຺ຠູມິວິຠາຄສ຺ສ ປຣມຕ຺ຖທີປນາ ນິຏ຺ຐິຕາ.

໒໑. ເອວໍ ຈິຕ຺ຕໍ ຠູມິເຠເທນ ຫີນປຓີຕາ ນຸກ຺ກມໂຕ ຈຕຸຘາ ນິທ຺ທິສິຕ຺ວາ ອິທານິ ຕເທວ ຈຕຸພ຺ພິຘໍ ຈິຕ຺ຕໍ ຍຖານິທ຺ທິຏ຺ຐກ຺ກເມນ ວິຠຊນ຺ໂຕ ປຖມໍ ກາມາວຈຣຈິຕ຺ຕໍ. ຕຕ຺ຖຈ ຫີນໍ ອໂສຠຓຈິຕ຺ຕໍ. ຕຕ຺ຖຈ ສພ຺ພຫີນໍ ອກຸສລຈິຕ຺ຕໍ ຕາວ ທສ຺ເສຕຸໍ ໂສມນສ຺ສສຫ ຄຕນ຺ຕິອາທິມາຫ. ເອຕ຺ຖຈ ກາມາວຈຣຈິຕ຺ຕສ຺ສປິ ອກຸສລາເຫຕຸກ ສເຫຕຸການຸກ຺ກໂມ ຫີນ ປຓີຕານຸກ຺ກມວເສນ ວຸຕ຺ໂຕຕິ ທຏ຺ຐພ຺ໂພ.

[໒໐] ວິຠາວນິຍໍ ປນ

ອຸປຣິ ວຸຈ຺ຈມານານໍ ພຫູນໍ ຈິຕ຺ຕານໍ ໂສຠຓສຎ຺ຎາກຣຓສຸຂຕ຺ຖໍ ອປ຺ປເກ ປາປາເຫຕຸເກເຍວ ປຖມໍ ທສ຺ເສນ຺ໂຕຕິ ວຸຕ຺ຕໍ. ຕໍ ນ ສຸນ຺ທຣໍ.

ຕທຕ຺ໂຖ ຫິ ຍຖາວຸຕ຺ຕຫີນາທິກ຺ກເມເນວ ສິທ຺ໂຘຕິ.

[໒໑] ຍຎ຺ຈ ຕຕ຺ຖ

ເຕສຸ ເຕສຸຈ ຠເວສຸ ຄຫິຕປ຺ປຏິສນ຺ຘິກສ຺ສ ສຕ຺ຕສ຺ສ ອາທິໂຕ ວີຖິຈິຕ຺ຕວເສນ ໂລຠສຫຄຕ ຈິຕ຺ຕຸປ຺ປາທານ ເມວ ສມ຺ຠວໂຕ ເຕເຍວ ປຖມນ຺ຕິ ວຸຕ຺ຕໍ. ຕໍປິ ນຍຸຊ຺ຊຕິ.

ອາທິໂຕ ວີຖິຈິຕ຺ຕວເສນ ມໂນທ຺ວາຣາ ວຊ຺ຊນສ຺ເສວ ສພ຺ພປຖມໍ ອຸປ຺ປຊ຺ຊນໂຕຕິ. ອກຸສເລສຸ ປນ ໂລຠມູລ ຈິຕ຺ຕໍ ພຫຸກຎ຺ຈ ໂຫຕິ. ທ຺ວີຫິ ວຏ຺ຏມູເລຫິ ຍຸຕ຺ຕຕ຺ຕາ ປຘານໍ ປາກຏຎ຺ຈ ໂຫຕີຕິ ຕເທວ ປຖມໍ ວຸຕ຺ຕນ຺ຕິ ທຏ຺ຐພ຺ພໍ.

໒໒. ຕຕ຺ຖ ສຸນ຺ທຣໍ ມໂນຕິ ສຸມໂນ. ສິນິທ຺ຘຈິຕ຺ຕໍ. ນ ຫິ ອນວຊ຺ຊຏ຺ເຐນ ສຸນ຺ທຣຕາ ອິຘ ຍຸຕ຺ຕາຕິ. ສຸນ຺ທຣໍ ມໂນ ເອຕສ຺ສາຠິວາ ສຸມໂນ. ສິນິທ຺ຘຈິຕ຺ຕສມງ຺ຄີ ປຸຄ຺ຄໂລ. ສຸມນສ຺ສ ຠາໂວ ໂສມນສ຺ສ. ມານສິກສຸຂເວທນາເຍຕໍ ນາມໍ. ເອຕ຺ຖຈ ສຸມນສ຺ສ ຠາໂວຕິ ຕສ຺ມິໍ ຈິຕ຺ເຕ ປຸຄ຺ຄເລວາ ສຸມນາຠິຘານສ຺ສວາ ອຍໍ ໂສ ສຸມໂນຕິ ສຸມນພຸທ຺ຘິຍາວາ ປວຕ຺ຕິນິມິຕ຺ຕນ຺ຕິ ອຕ຺ໂຖ. ຠາໂວຕິ ຫິ ອຠິຘານພຸທ຺ຘີນໍ ປວຕ຺ຕິນິມິຕ຺ຕໍ ວຸຈ຺ຈຕິ. ຠວນ຺ຕິ ປວຕ຺ຕນ຺ຕິ ອຠິຘານພຸທ຺ຘິໂຍ ເອຕສ຺ມິນ຺ຕິ ກຕ຺ວາ. ເອຕສ຺ມິນ຺ຕິ ຈ ນິມິຕ຺ເຕ ຠຸມ຺ມໍ. ຍຖາ ນາໂຄ ທນ຺ເຕສຸ ຫຎ຺ຎເຕຕິ. ຍຖາ ຫິ ຕຕ຺ຖ ອຕ຺ຕໂນ ທນ຺ຕນິມິຕ຺ຕໍ ທນ຺ຕຍຸຕ຺ເຕ ນາເຄ ຫນນປ຺ປວຕ຺ຕິ ໂຫຕິ, ເອວມິຘປິ ຕໍ ເວທນານິມິຕ຺ຕໍ ເວທນາຍຸຕ຺ເຕ ມນສ຺ມິໍ ປຸຄ຺ຄເລວາ ອຠິຘານພຸທ຺ຘິໂຍ ປວຕ຺ຕນ຺ຕີຕິ. ຠວນ຺ຕິ ພຸທ຺ຘິສທ຺ທາ ເອເຕນາຕິ ຠາໂວຕິຈ ວທນ຺ຕິ. ເອຕສ຺ມາຕິ ຈ ອປເຣ. ໂສມນສ຺ເສນ ສຫ ເອກໂຕ ຄຕໍ ປວຕ຺ຕນ຺ຕິ ໂສມນສ຺ສສຫຄຕໍ. ໂສມນສ຺ສເວທນາສມ຺ປຍຸຕ຺ຕນ຺ຕິ ອຕ຺ໂຖ. ທສ຺ສນໍ ທິຏ຺ຐິ. ສາ ປນ ສມ຺ມາທິຏ຺ຐິ, ມິຈ຺ຉາທິຏ຺ຐິວເສນ ທຸວິຘາ. ອິຘ ມິຈ຺ຉາທິຏ຺ຐິຍຸຕ຺ຕາ. ອກຸສລາຘິກາຣຕ຺ຕາ. ທິຏ຺ຐິເຍວ ທິຏ຺ຐິຄຕໍ. ຍຖາ ຄູຖຄຕໍ ມຸຕ຺ຕຄຕນ຺ຕິ. ທິຏ຺ຐິຄເຕນ ສມໍ ປກາເຣຫິ ຍຸຕ຺ຕນ຺ຕິ ທິຏ຺ຐິຄຕ ສມ຺ປຍຸຕ຺ຕໍ. ທິຏ຺ຐິຄເຕນ ເອກຸປ຺ປາທຕາທີຫິ ປກາເຣຫິ ສມໍ ເອກີຠູຕ ມິວ ຍຸຕ຺ຕໍ ສໍສຏ຺ຐນ຺ຕິ ອຕ຺ໂຖ. ອສງ຺ຂາຣິກເມກໍ ສສງ຺ຂາຣິກເມກນ຺ຕິ ເອຕ຺ຖ ສງ຺ຂາໂຣຕິ ປຸພ຺ພາຕິສງ຺ຂາໂຣ. ໂສຈ ທຸວິໂຘ ປໂຍໂຄ, ອຸປາໂຍຈາຕິ. ຕຕ຺ຖ ອາຓຕ຺ຕິຍາວາ ອຊ຺ເຌສນາຍວາ ຕຊ຺ເຊຕ຺ວາ ວາ ອິທໍ ກໂຣຫີຕິ ປເຣຫິ ກໂຕ ກາຍວຈີປໂຍໂຄ ປໂຍໂຄນາມ. ອາຓຕ຺ຕາທິນາປນ ວິນາວ ກມ຺ມສ຺ສ ກຣຓຕ຺ຖໍ ຕໍ ຕໍ ອຸປາຍໍ ປເຣ ອາຈິກ຺ຂນ຺ຕິ. ອກຣເຓ ອາທີນວໍ ກຣເຓຈ ອານິສໍສໍ ທສ຺ເສນ຺ຕິ, ກຕິກໍວາ ກໂຣນ຺ຕິ, ທຓ຺ຑໍວາ ຖເປນ຺ຕິ, ສຍເມວ ວາ ຕໍ ຕໍ ກາຣຓໍ ອນຸສ຺ສຣຕິ, ປຈ຺ຈເວກ຺ຂຕິ. ເອວມາທິນາ ນເຍນ ອຸປາໂຍ ອເນກວິໂຘ. ໂສ ທຸວິໂຘປິ ອິຘ ສງ຺ຂາໂຣ ນາມ. ສງ຺ຂໂຣຕິ ອຕ຺ຕໂນ ປກຕິຍາ ກາຕຸໍ ອນິຈ຺ຉມານໍ ຈິຕ຺ຕ ສນ຺ຕານໍ ອກາຕຸໍ ອທຕ຺ວາ ກຣຓຕ຺ຖາຍ ສໍວິທຫຕິ ຕສ຺ມິໍ ຕສ຺ມິໍ ກມ຺ເມ ປໂຍເຊຕີຕິ ກຕ຺ວາ. ໂຍປນ ປຈ຺ຈຍຄໂຓ ເຕນ ສງ຺ຂາເຣນ ວິຣຫິໂຕ ໂຫຕິ. ໂສ ອສງ຺ຂາໂຣ. ໂຍປນ ເຕນສຫິໂຕ ໂຫຕິ. ໂສ ສສງ຺ຂາໂຣຕິ. ວຸຕ຺ຕຎ຺ເຫຕໍ ອຏ຺ຐກຖາຍໍ –

ສຫ ສງ຺ຂາເຣນາຕິ ສສງ຺ຂາໂຣ. ເຕນ ສສງ຺ຂາເຣນ ສປ຺ປໂຍເຄນ ສອຸປາເຍນ ປຈ຺ຈຍຄເຓນາຕິ ອຕ຺ໂຖຕິ.

ເອຕ຺ຖຈ ປຈ຺ຈຍຄໂຓຕິ ອາຣມ຺ມຓາທິໂກ ສາຘາຣໂຓ ປຈ຺ຈຍ ຄໂຓ ອຏ຺ຐກຖາຍໍ ວຸຕ຺ໂຕ. ອສາຘາຣໂຓປນ ກຸສລກມ຺ເມສຸ ສປ຺ປຸຣິສຸປນິສ຺ສຍາທິໂກ ອກຸສລກມ຺ເມສຸ ອສປ຺ປຸຣິສຸປນິສ຺ສຍາທິໂກ ປຈ຺ຈຍຄໂຓ ວິເສເສຕ຺ວາ ໂຍເຊຕຸໍ ຍຸຕ຺ໂຕ. ໂສປນ ຍທາ ທຸວິເຘນ ສງ຺ຂາເຣນ ວິນາ ສຍເມວ ຈິຕ຺ຕໍ ອສໍສີທມານໍ ກຕ຺ວາ ອຸຏ຺ຐາເປຕິ ສມຸຏ຺ຐາເປຕິ, ຕທາ ໂສອສງ຺ຂາໂຣນາມ. ຍທາປນ ເຕນ ວິນາ ສຍເມວ ຈິຕ຺ຕໍ ອຸຏ຺ຐາເປຕຸໍ ສມຸຏ຺ຐາເປຕຸໍ ນສກ຺ໂກຕິ, ສງ຺ຂາຣໍ ສຫາຍໍ ລຠິຕ຺ວາວ ສກ຺ໂກຕິ, ຕທາ ໂສ ສສງ຺ຂາໂຣນາມ. ອິຕິ ອສງ຺ຂາໂຣ ສສງ຺ຂາໂຣຕິຈ ອິທໍ ປຈ຺ຈຍ ຄຓສ຺ເສວ ນາມໍ. ນ ຈິຕ຺ຕສ຺ສ. ຈິຕ຺ຕໍປນ ອສງ຺ຂາເຣນ ສຸທ຺ເຘນ ປຈ຺ຈຍຄເຓນ ອຸປ຺ປນ຺ນໍ ອສງ຺ຂາຣິກໍ. ສສງ຺ຂາເຣນ ປຈ຺ຈຍຄເຓນ ອຸປ຺ປນ຺ນໍ ສສງ຺ຂາຣິກໍ, ອຸປ຺ປນ຺ນຕ຺ເຖ ຫິ ອຍໍ ອິກປຈ຺ຈໂຍຕິ. ຍສ຺ມິໍ ສມເຍ ອກຸສລໍ ຈິຕ຺ຕໍ ອຸປ຺ປນ຺ນໍ ໂຫຕິ ໂສມນສ຺ສສຫຄຕໍ ທິຏ຺ຐິຄຕສມ຺ປຍຸຕ຺ຕໍ ສສງ຺ຂາເຣນາຕິ ຫິ ປາຬິຍໍ ວຸຕ຺ຕນ຺ຕິ. ເອຕ຺ຖຈ ສສງ຺ຂາເຣນ ປຈ຺ຈຍຄເຓນ ອຸປ຺ປນ຺ນໍ ໂຫຕີຕິ ໂຍເຊຕພ຺ພນ຺ຕິ. ອຍເມຕ຺ຖ ອສງ຺ຂາຣິກສສງ຺ຂາຣິກປເທສຸ ປຣມຕ຺ຖທີປນາ.

[໒໒] ຏີກາສຸ ປນ

ອິມມຕ຺ຖໍ ອສລ຺ລກ຺ເຂຕ຺ວາ ຈິຕ຺ຕເມວ ອສງ຺ຂາຣໍ ສສງ຺ຂາຣນ຺ຕິ ຈ ຄເຫຕ຺ວາ ຍໍ ວຸຕ຺ຕໍ, ‘‘ນຕ຺ຖິ ສງ຺ຂາໂຣ ອສ຺ສາຕິ ອສງ຺ຂາຣໍ. ຕເທວ ອສງ຺ຂາຣິກໍ. ສຫ ສງ຺ຂາເຣນ ວຕ຺ຕຕີຕິ ສສງ຺ຂາຣໍ. ສສງ຺ຂາຣເມວ ສສງ຺ຂາຣິກນ຺ຕິ ຈ. ໂສ ຍສ຺ສ ນຕ຺ຖິ. ຕໍ ອສງ຺ຂາຣໍ. ຕເທວ ອສງ຺ຂາຣິກໍ. ສງ຺ຂາເຣນ ສຫິຕໍ ສສງ຺ຂາຣິ ກນ຺ຕິ ຈ’’. ສພ຺ພເມຕໍ ນ ຍຸຊ຺ຊຕິເຍວ.

[໒໓] ຍຎ຺ຈ ວິຠາວນິຍໍ

ສງ຺ຂໂຣຕິ ຈິຕ຺ຕໍ ຕິກ຺ຂຠາວສງ຺ຂາຕມຓ຺ຑນວິເສເສນ ສຊ຺ເຊຕິ. ສງ຺ຂຣີຍຕິວາ ຕໍ ເອເຕນ ຍຖາວຸຕ຺ຕນເຍນ ສຊ຺ຊີຍຕີຕິ ສງ຺ຂາໂຣຕິ ວຸຕ຺ຕໍ. ຕໍປິ ນ ສຸນ຺ທຣໍ.

ເອວຎ຺ຫິ ສຕິ ສສງ຺ຂາຣິກປິ ຈິຕ຺ຕໍ ຕິກ຺ຂໍນາມ ສິຍາຕິ.

[໒໔] ຍຎ຺ຈ ຕຕ຺ຖ

‘‘ໂສ ປນ ອຕ຺ຕໂນ ປຸພ຺ພຠາຄປ຺ປວຕ຺ເຕ ຈິຕ຺ຕສນ຺ຕາເນເຈວ ປຣສນ຺ຕາເນຈ ປວຕ຺ຕຕີຕິ ຕໍ ນິພ຺ພຕ຺ຕິໂຕ ຈິຕ຺ຕສ຺ສ ຕິກ຺ຂຠາວ ສງ຺ຂາໂຕ ວິເສໂສວ ອິຘ ສງ຺ຂາໂຣຕິ’’ ວຸຕ຺ຕໍ. ຕໍປິ ອສງ຺ຂາຣິກ ສສງ຺ຂາຣິກປທານໍ ວຈນຕ຺ເຖສຸ ວິຣຊ຺ຌິຕ຺ວາ ຕທນຸ ຣູປສ຺ສ ສງ຺ຂາຣສ຺ສ ປຣິກປ຺ປນາວເສນ ວຸຕ຺ຕຕ຺ຕາ ນຍຸຕ຺ຕເມວ.

[໒໕] ເອເຕນ

ປຸພ຺ພປ຺ປໂຍຄສມ຺ຠູໂຕ, ວິເສໂສ ຈິຕ຺ຕສມ຺ຠປີ;

ສງ຺ຂາໂຣ ຕໍ ວເສເນຕ຺ຖ, ໂຫຕ຺ຍາສງ຺ຂາຣິກາທິຕາຕິ.

ສາຘກຄາຖາປິ ປຏິກ຺ຂິຕ຺ຕາ ໂຫຕີຕິ.

[໒໖] ຍຎ຺ຈ ຕຕ຺ຖ

‘‘ອຖວາ, ສສງ຺ຂາຣິກໍ ອສງ຺ຂາຣິກນ຺ຕິ ເຈ ຕໍ ເກວລໍສງ຺ຂາຣສ຺ສ ຠາວາຠາວໍ ສນ຺ຘາຍ ວຸຕ຺ຕໍ. ນຕສ຺ສ ສຫປວຕ຺ຕິສພ຺ຠາ ວາ ຠາວໂຕຕິ. ຠິນ຺ນສນ຺ຕານປ຺ປວຕ຺ຕິໂນປິ ສງ຺ຂາຣສ຺ສ ອິຘມຕ຺ຖິຕາຍ ຕໍ ວເສນ ນິພ຺ພຕ຺ຕໍ ຈິຕ຺ຕໍ ສງ຺ຂາໂຣ ອສ຺ສ ອຕ຺ຖີຕິ ສສງ຺ຂາຣິກໍ. ສໂລມໂກ ສປກ຺ຂໂກຕ຺ຍາທີສຸວິຍ ສຫ ສທ຺ທສ຺ສ ວິຊ຺ຊມານຕ຺ຖປຣິທີປນໂຕ. ຕພ຺ພິປຣີຕມ຺ປນ ຕທຠາວໂຕ ວຸຕ຺ຕນເຍນ ອສງ຺ຂາຣິກ’’ນ຺ຕິ ວຸຕ຺ຕໍ. ຕໍປິ ປາຬິອຏ຺ຐກຖາສິທ຺ຘໍ ອຸຊຸໍ ວິສທໍ ອຕ຺ຖໍ ມຸຎ຺ຈິຕ຺ວາ ອຕ຺ຕໂນ ປຣິກປ຺ປນາ ວເສນ ວຸຕ຺ຕຕ຺ຕາ ນ ຄເຫຕພ຺ພເມວ.

ເອຕ຺ຖຈ ອຕ຺ຕໂນ ອິຈ຺ຉາຍ ວິນາ ປເຣສໍ ອາຓຕ຺ຕິຍາວາ ອຊ຺ເຌ ສນາຍວາ ຍາຈນາຍວາ ປວຕ຺ຕິຕໍ ຈິຕ຺ຕໍ ປໂຍຄສມຸຏ຺ຐິຕໍ ນາມ. ຕຖາ ອຕ຺ຕໂນ ອິຈ຺ຉາຍ ວິນາ ປເຣສໍ ຠເຍນວາ ລຊ຺ຊາຍວາ ຄາຣເວນວາ ກຖິກາຍວາ ທຓ຺ຑຠເຍນວາ ປວຕ຺ຕິຕໍ ອຸປາຍສມຸຏ຺ຐິຕໍ ນາມ. ສຍເມວວາ ອຕ຺ຕໂນ ລີນໍ ຈິຕ຺ຕໍ ຎຕ຺ວາ ເຕນ ເຕນ ອຸປາເຍນ ອຕ຺ຕານໍ ໂອວທິຕ຺ວາວາ ຕໍ ຕໍ ອຸປາຍໍ ອນຸສ຺ສຣິຕ຺ວາວາ ປວຕ຺ຕິຕໍ ຈິຕ຺ຕໍ ອຸປາຍສມຸຏ຺ຐິຕໍ ນາມ. ອິທຎ຺ຈ ນຍທສ຺ສນເມວາຕິ. ທິຏ຺ຐິຄເຕນ ວິປ຺ປຍຸຕ຺ຕໍ ທິຏ຺ຐິຄຕວິປ຺ປຍຸຕ຺ຕໍ. ອຸທາສິນຠາເວນ ເປກ຺ຂຕິ ອນຸຠວນາກາເຣນ ອາຣມ຺ມຓໍ ປສ຺ສຕີຕິ ອຸເປກ຺ຂາ. ອຸປປຕ຺ຕິໂຕ ຍຸຕ຺ຕິໂຕ ອິກ຺ຂຕິ ປສ຺ສຕີຕິວາ ອຸເປກ຺ຂາ. ຍຖາຫິ ໂສມນສ຺ສ ໂທມນສ຺ສານິ ອາຣມ຺ມຓໍ ອຘິມຕ຺ຕໂຕ ປສ຺ສນ຺ຕິ. ຍໂຕ ໂສມນສ຺ສິໂຕ ປຸຄ຺ຄໂລ ເຕນ ອາຣມ຺ມເຓນ ວິໂຍເຄ ວິກາຣປຕ຺ໂຕ ໂຫຕິ. ໂທມນສ຺ສິໂຕຈ ເຕນ ອາຣມ຺ມເຓນ ສໍໂຍເຄ ວິກາຣປຕ຺ໂຕ ໂຫຕິ. ນ ຕຖາ ອຍໍ, ອຍໍ ປນ ຍຸຕ຺ຕິໂຕວ ປສ຺ສຕິ ນ ອາຣມ຺ມຓສໍໂຍຄ ວິໂຍຄເຫຕຸ ປຸຄ຺ຄລໍ ວິກາຣໍ ປາເປຕີຕິ. ເກຈິປນ ອຸປປຕ຺ຕິໂຕ ຍຸຕ຺ຕິໂຕ ອິກ຺ຂຕີຕິ ອິທໍ ອິຘ ນສມ຺ຠວຕິ. ນ ຫິ ອກຸສລໍ ຍຸຕ຺ຕຣູປໍ ນາມ ໂຫຕີຕິ ວທນ຺ຕິ. ອຸເປກ຺ຂາຍ ສຫຄຕນ຺ຕິ ສມາໂສ.

໒໓. ເອຕ຺ຖຈ ກິຎ຺ຈາປິ ຜສ຺ສາທໂຍ ວິຕກ຺ກາທໂຍ ໂມຫາທໂຍຈ ຘມ຺ມາ ອິມິນາ ສກເລນ ອຏ຺ຐວິເຘນ ຈິຕ຺ເຕນ ສຫ ຄຕາ ສມ຺ປຍຸຕ຺ຕາຈ ໂຫນ຺ຕິ, ນ ປນ ເຕ ເວທນາວິຍ ສຍໍປິ ເຠທວນ຺ຕາ ໂຫນ຺ຕິ. ນຈ ທິຏ຺ຐິສງ຺ຂາຣານໍ ວິຍເຕສໍ ອິມສ຺ມິໍ ຈິຕ຺ເຕ ກຕ຺ຖຈິ ໂຫນ຺ຕິ ກຕ຺ຖຈິນໂຫນ຺ຕີຕິ ອຍໍ ວິກປ຺ໂປ ອຕ຺ຖິ. ຕສ຺ມາເຕ ອິມສ຺ສຈິຕ຺ຕສ຺ສ ເຠທກຣາ ນໂຫນ຺ຕີຕິ ອິຘ ນຄຫິຕາຕິ ທຏ຺ຐພ຺ພາ. ໂລໂຠປນ ອຎ຺ເຎຫິ ອິມສ຺ສ ອຏ຺ຐວິຘສ຺ສ ເຠທກໂຣ ໂຫຕິ. ເວທນາທິຏ຺ຐິ ສງ຺ຂາຣາຈ ອິມສ຺ສ ອຎ຺ຎມຎ຺ຎສ຺ສ ເຠທກຣາ ໂຫນ຺ຕີຕິ ເຕເອວ ອິຘ ຄຫິຕາຕິ ທຏ຺ຐພ຺ພາ. ນນຸ ປີຕິ ມານ ຖິນມິທ຺ຘານິປິ ເຠທກຣານິ ໂຫນ຺ຕີຕິ ຕານິປິ ອິຘ ສປີຕິກໍ ອປີຕິກນ຺ຕິ ມານສມ຺ປຍຸຕ຺ຕໍ ມານວິປ຺ປຍຸຕ຺ຕນ຺ຕິ ຖິນມິທ຺ຘສມ຺ປຍຸຕ຺ຕໍ ຖິນມິທ຺ຘວິປ຺ປຍຸຕ຺ຕນ຺ຕິ ຈ ຄເຫຕພ຺ພາ ນີຕິ. ນ. ເຕສຸ ຫິ ໂສມນສ຺ເສ ຄຫິເຕ ປີຕິ ຄຫິຕາວ ໂຫຕິ. ອິຕຣານິຈ ຕີຓິ ອນິຍຕໂຍຄີນິຈ ໂຫນ຺ຕິ, ເຍວາປນ ການິຈາຕິ ນຄຫິຕານີຕິ.

[໒໗] ວິຠາວນິຍໍ ປນ

ຜສ຺ສາທິວິຕກ຺ກາທິໂມຫາທິຘມ຺ມາ ອິໂຕ ອຎ຺ເຎຫິປິ ຈິຕ຺ເຕ ຫິ ຍຸຕ຺ຕາ ໂຫນ຺ຕີຕິ ນເຕ ອຎ຺ເຎຫິ ອິມສ຺ສ ວິເສສໍ ກໂຣນ຺ຕິ. ຕສ຺ມາ ເຕ ອິຘ ນ ຄຫິຕາຕິ ອິມິນາ ອຘິປ຺ປາເຍນ ຍໍ ວຸຕ຺ຕໍ ‘‘ກສ຺ມາ ປເນຕ຺ຖ ອຎ຺ເຎສຸປິ ຜສ຺ສາທີສຸ ສມ຺ປຍຸຕ຺ຕຘມ຺ເມສຸ ວິຊ຺ຊມາເນສຸ ໂສມນສ຺ສສຫຄຕາທິຠາໂວວ ວຸຕ຺ໂຕຕິ. ໂສມນສ຺ສາທີນເມວ ອສາຘາຣຓ ຠາວໂຕຕິ. ຜສ຺ສາທໂຍຫິ ເກຈິ ສພ຺ພຈິຕ຺ຕ ສາຘາຣຓາ ເກຈິ ກຸສລາທິ ສາຘາຣຓາ. ໂມຫາທໂຍຈ ສພ຺ພາ ກຸສລສາຘາຣຓາຕິ ນ ເຕຫິ ສກ຺ກາ ຈິຕ຺ຕໍ ວິເສເສຕຸ’’ນ຺ຕິ. ຕໍ ວິຈາເຣຕພ຺ພໍ.

ເອວຎ຺ຫິ ສຕິ ໂສມນສ຺ສຸເປກ຺ຂາ ສງ຺ຂາຣາປິ ອຎ຺ເຎສຸ ທິສ຺ສນ຺ຕີຕິ ເຕປິ ອຎ຺ເຎຫິ ອິມສ຺ສ ວິເສສໍ ນກໂຣນ຺ຕິ. ຕສ຺ມາ ເຕປິ ອິຘ ນຄເຫຕພ຺ພາ ສິຍຸນ຺ຕິ.

໒໔. ເອຕ຺ຖຈ ໂສມນສ຺ສປ຺ປຏິສນ຺ຘິກຕາ, ອຄມ຺ຠີຣປ຺ປກຕິຕາ, ອິຏ຺ຐາຣມ຺ມຓສມາໂຍໂຄ, ພ຺ຍສນມຸຕ຺ຕິຈ ໂສມນສ຺ສສ຺ສ ກາຣຓໍ. ໂສມນສ຺ສປ຺ປຏິສນ຺ຘິໂກຫິ ສທາ ຠວງ຺ຄໂສມນສ຺ເສນ ປຣິຠາວິຕ ສນ຺ຕາໂນ ໂຫຕີຕິ ຕສ຺ສ ຈິຕ຺ຕໍ ອຸປ຺ປຊ຺ຊມານໍ ເຍຠຸຍ຺ເຍນ ໂສມນສ຺ສສຫຄຕໍ ອຸປ຺ປຊ຺ຊຕີຕິ. ອຄມ຺ຠີຣປ຺ປກຕິໂກຈ ຫີນຊ຺ຌາສໂຍ ອປ຺ປກໍປິ ມຫນ຺ຕໍ ມຎ຺ຎຕິ. ຫີນໍປິ ປຓີຕໍ ມຎ຺ຎຕິ. ຕສ຺ມາ ຕສ຺ສປິ ຈິຕ຺ຕໍ ອຸປ຺ປຊ຺ຊມານໍ ເຍຠຸຍ຺ເຍນ ໂສມນສ຺ສສຫຄຕໍ ໂຫຕີຕິ. ອິຏ຺ຐາຣມ຺ມຓສມາໂຍໂຄຕິ ອຕ຺ຕນາ ອິຈ຺ຉິເຕນ ຫີເນນວາ ປຓີເຕນວາ ອາຣມ຺ມເຓນ ສມາໂຍໂຄ. ພ຺ຍສນມຸຕ຺ຕີຕິ ຎາຕິພ຺ຍສນາທິໂຕ ມຸຕ຺ຕິ. ອຸເປກ຺ຂາປຏິສນ຺ຘິກຕາ, ຄມ຺ຠີຣປ຺ປກຕິຕາ, ມຊ຺ຌຕ຺ຕາຣມ຺ມຓສມາໂຍໂຄ, ພ຺ຍສນມຸຕ຺ຕິຈ ອຸເປກ຺ຂາຍ ກາຣຓໍ. ເອຕ຺ຖຈ ຄມ຺ຠີຣປ຺ປກຠິຕານາມ ມຫຊ຺ຌາສຍຕາ. ຕາທິໂສ ຫິ ປຸຄ຺ຄໂລ ມຫນ຺ຕໍປິ ອປ຺ປກໍ ມຎ຺ຎຕິ, ປຓີຕໍປິ ຫີນໍ ມຎ຺ຎຕີຕິ. ທິຏ຺ຐຊ຺ຌາສຍຕາ, ທິຏ຺ຐິວິປນ຺ນປຸຄ຺ຄລເສວນາ, ສທ຺ຘມ຺ມວິມຸຂຕາ, ມິຈ຺ຉາວິຕກ຺ກພຫຸລຕາ, ອໂຍນິໂສ ອຸມ຺ມຸຊ຺ຊນຎ຺ຈ ທິຏ຺ຐິຍາ ກາຣຓໍ. ຕຕ຺ຖ ທິຏ຺ຐຊ຺ຌາສຍຕາຕິ ກາຓາຣິຏ຺ຐສ຺ສວິຍ ສຸນກ຺ຂຕ຺ຕສ຺ສວິຍຈ ປຸຣິມຠເວ ທິຏ຺ຐິ ຄຕິກຠາເວນ ອາຄຕຕ຺ຕາ ອິມສ຺ມິໍ ຠເວປິ ສສ຺ສຕຸຈ຺ເຉທາສຍ ຠາໂວ. ສທ຺ຘມ຺ມວິມຸຂຕາຕິ ຈິຣໍປິ ກາລໍ ສທ຺ຘມ຺ເມນ ວິນາ ອາຄຕຕາ. ມິຈ຺ຉາວິຕກ຺ກພຫຸລຕາຕິ ອຕ຺ຕໂນ ອວິສເຍສຸ ສພ຺ພຎ຺ຎຸວິສເຍສຸ ຐາເນສຸ ອຕ຺ຕໂນ ປມາຓໍ ອຊານິຕ຺ວາ ຈິນ຺ຕາປສຸຕວເສນ ມິຈ຺ຉາວິຕກ຺ກພຫຸລຠາໂວ. ອໂຍນິໂສ ອຸມ຺ມຸຊ຺ຊນນ຺ຕິ ອຕ຺ຕນາທິຏ຺ຐກາຣຓເມວ ສາຣໂຕ ສຈ຺ຈໂຕ ອຸມ຺ມຸຊ຺ຊນໍ. ຕພ຺ພິປຣີເຕນ ທິຏ຺ຐິວິປ຺ປຍຸຕ຺ຕກາຣຓໍ ເວທິຕພ຺ພໍ. ອສງ຺ຂາຣິກກມ຺ມຊນິຕປ຺ປຏິສນ຺ຘິ ກຕາ, ກລ຺ລກາຍ ຈິຕ຺ຕຕາ, ຂນ຺ຕິ ພຫຸລຕາ, ປຸຣິສກາເຣສຸ ທິຏ຺ຐານິສໍສຕາ, ກມ຺ມປ຺ປສຸຕຕາ, ອຸຕຸໂຠຊນາທິ ສປ຺ປາຍ ລາໂຠຕິ ອິທໍ ອສງ຺ຂາຣິກກາຣຓໍ. ຕຕ຺ຖ ຂນ຺ຕິພຫຸລຕາຕິ ສີຕຸຓ຺ຫາທີນໍ ຂມນພຫຸລຕາ. ປຸຣິສກາເຣສູຕິ ປຸຣິເສຫິ ກຕ຺ຕພ຺ເພສຸ ກມ຺ເມສຸ. ກມ຺ມປ຺ປສຸຕຠາຕິ ກມ຺ເມສຸ ຈິຓ຺ຓວສິຕາ. ຕພ຺ພິປຣີ ເຕນ ສສງ຺ຂາຣິກກາຣຓໍ ເວທິຕພ຺ພໍ. ອິເມສໍປນ ຈິຕ຺ຕານໍ ອຸປ຺ປຕ຺ຕິ ວິຘານໍ ວິສຸທ຺ຘິມຄ຺ເຄ ຄເຫຕພ຺ພໍ. ອຏ຺ຐປີຕິ ປິສທ຺ເທນ ເນສໍ ລພ຺ຠມານກມ຺ມປຖເຠທໂຕ ກາລ ສນ຺ຕານາ ຣມ຺ມຓາທິ ເຠທໂຕຈ ອເນກວິຘຕ຺ຕໍ ສມ຺ປິຓ຺ເຑຕີຕິ.

ໂລຠມູລຈິຕ຺ຕສ຺ສ ປຣມຕ຺ຖທິປນາ ນິຏ຺ຐິຕາ.

໒໕. ໂທສມູລຈິຕ຺ເຕ ທຸຏ຺ຐຸມໂນຠິ ທຸມ຺ມໂນ. ວິຣູປໍ ຈິຕ຺ຕໍ. ທຸຏ຺ຐຸມໂນ ເອຕສ຺ສາຕິວາ ທຸມ຺ມໂນ. ວິຣູປຈິຕ຺ຕສມງ຺ຄີປຸຄ຺ຄໂລ. ທຸມ຺ມນສ຺ສ ຠາໂວ ໂທມນສ຺ສໍ. ມານສິກທຸກ຺ຂເວທນາເຍຕໍ ອຘິວຈນໍ. ສາ ຫິ ອຕ຺ຕນາ ສຫຄເຕ ຈິຕ຺ເຕວາ ຕໍ ສມງ຺ຄີປຸຄ຺ຄເລວາ ທຸມ຺ມນາ ຠິຘານສ຺ສວາ ອຍໍ ໂສ ທຸມ຺ມໂນຕິ ທຸມ຺ມນພຸທ຺ຘິຍາວາ ປວຕ຺ຕິນິມິຕ຺ຕໍ ໂຫຕີຕິ. ເສສໍ ເຫຏ຺ຐາ ວຸຕ຺ຕນຍເມວ. ໂທມນສ຺ເສນ ສຫ ຄຕນ຺ຕິ ສມາໂສ. ປຏິຫຎ຺ຎຕີຕິ ປຏິໂຆ. ໂທໂສ. ໂສຫິ ອຸປ຺ປຊ຺ຊມາໂນ ສມ຺ປຍຸຕ຺ຕຘມ຺ເມປິ ປຏິຫນຕິ. ລູເຂ ສນ຺ຕຕ຺ເຕ ກໂຣຕິ. ອຕ຺ຕໂນ ວຕ຺ຖຸມ຺ປິ ປຏິຫນຕິ. ຫທຍປ຺ປເທສໍ ທຫຕິ. ຕໍ ປຸຄ຺ຄລໍ ທຸມ຺ມຸຂໍ ກໂຣຕິ, ອຕ຺ຕໂນ ອາຣມ຺ມຓໍປິ ປຏິຫນຕິ. ຕໍ ພາຘຍ ມາໂນ ຄຓ຺ຫາຕິ. ຕສ຺ມາ ປຏິໂຆຕິ ວຸຈ຺ຈຕີຕິ.

໒໖. ເອຕ຺ຖ ສິຍາ. ສງ຺ຂາໂຣ ຕາວ ອິມສ຺ສ ຈິຕ຺ຕສ຺ສ ເຠທ ກໂຣຕິ ຕສ຺ສ ອິຘ ຄຫຓໍ ຍຸຕ຺ຕໍ. ເວທນາ ປຏິຆາປນ ເຠທກຣາ ນ ໂຫນ຺ຕີຕິ ເຕ ອິຘ ນ ຄເຫຕພ຺ພາຕິ. ວຸຈ຺ຈເຕ, ໂທມນສ຺ສຄ຺ຄຫຓໍ ຕາວ ອິມສ຺ສ ຈິຕ຺ຕສ຺ສ ກທາຈິ ອຎ຺ຎເວທນາໂຍຄຕາ ປສງ຺ຄນິວຕ຺ຕນຕ຺ຖນ຺ຕິ. ຍທາຫິ ຣາຊາໂນ ຫສມານາເຍວ ໂຈຣວຘໍ ເປເສນ຺ຕິ. ຍທາຈ ຊນາ ອຕ຺ຕໂນ ເວຣີນໍ ມຣເຓ ຕຸຏ຺ຐິໍ ປເວເທນ຺ຕິ. ມຣຓໍ ອຠິນນ຺ທນ຺ຕິ. ຍທາຈ ພາລຊນາ ຫສມານາວ ມິຄປກ຺ຂິໂນ ມາເຣນ຺ຕິ. ຕທາ ອິທໍ ນຸໂຂ ໂສມນສ຺ເສນ ຍຸຕ຺ຕນ຺ຕິ ອຕ຺ເຖວ ປສງ຺ໂຄ. ອຸເປກ຺ຂາໂຍເຄປນ ວຕ຺ຕພ຺ພເມວ ນຕ຺ຖິ. ຕປ຺ປສງ຺ຄນິວຕ຺ຕນຕ຺ຖໍ ໂທມນສ຺ສຄ຺ຄຫຓນ຺ຕິ. ປຏິຆຄ຺ຄຫຓໍປິ ອຎ຺ຎຘມ຺ມສມ຺ປຍຸຕ຺ຕຕາ ປສງ຺ຄນິວຕ຺ຕນຕ຺ຖໍ. ຕຖາຫິ ເຍ ນຕ຺ຖິກາເຫຕຸກາ ກິຣິຍມິຈ຺ຉາ ທິຏ຺ຐິກາ ປາຓວເຘ ອປຸຎ຺ຎໍນາມ ນຕ຺ຖີຕິ ຄຓ຺ຫນ຺ຕິ. ເຍຈ ມນຸສ຺ສປາຓ ວເຘເອວ ອປຸຎ຺ຎໍ ໂຫຕິ, ຕິຣຈ຺ຉານຄຕປາຓວເຘ ອປຸຎ຺ຎໍ ນຕ຺ຖີຕິ ຄຓ຺ຫນ຺ຕິ. ເຍຈ ປາຓວຘໍ ກຕ຺ວາ ຍຎ຺ຎໍ ຍຊນ຺ຕານໍ ມຫນ຺ຕໍ ປຸຎ຺ຎໍ ໂຫຕິ, ທິພ຺ພສໍວຕ຺ຕນິກນ຺ຕິ ຄຓ຺ຫນ຺ຕິ. ເຕ ສກ຺ກາຍທິຏ຺ຐິຍາ ວິສ຺ສຏ຺ຐາ ປາຓວຘໍ ສຍໍວາ ກໂຣນ຺ຕິ. ອຎ຺ເຎວາ ເປເສນ຺ຕິ. ຕທາ ອິທໍ ທິຏ຺ຐິຍາປິ ສມ຺ປຍຸຕ຺ຕໍ ສິຍາຕິ ປສງ຺ໂຄ ໂຫຕິເຍວ. ເຍປນ ສມ຺ມາທິຏ຺ຐິເກສຸ ພາລາ ອພ຺ຍຕ຺ຕາ, ເຕ ກທາຈິ ເຕສໍ ມິຈ຺ຉາທິຏ຺ຐິການໍ ລທ຺ຘິໍ ຄເຫຕ຺ວາ ປາຓໍ ວຘນ຺ຕາ ອາທິໂຕ ເວມຕິກຊາຕາວ ໂຫນ຺ຕິ. ຕທາເຕສໍ ອິທໍ ວິຈິກິຈ຺ຉາຍປິ ຍຸຕ຺ຕໍ ສິຍາຕິ ປສງ຺ໂຄ ໂຫຕິ. ຕປ຺ປສງ຺ຄ ນິວຕ຺ຕນຕ຺ຖໍ ປຏິຆຄ຺ຄຫຓນ຺ຕິ. ອິຕຣຖາ ປຸຣິມ ຈິຕ຺ຕສ຺ສ ໂລຠສຫຄຕຠາໂວວິຍ ອິມສ຺ສ ປຏິຆສມ຺ປຍຸຕ຺ຕຠາໂວ ຈູຬນິຄເມເນວ ສິທ຺ໂຘຕິ ເຕສໍ ຄຫຓໍ ນິຣຕ຺ຖກໍ ສິຍາຕິ. ເອຕ຺ຖຈ ອິສ຺ສາມຈ຺ຉຣິຍກຸກ຺ກຸຈ຺ຈານໍ ຖິນມິທ຺ຘສ຺ສຈ ອຄ຺ຄຫຓໍ ປຸຣິມຈິຕ຺ເຕ ມານຖິນມິທ຺ຘນເຍນ ເວທິຕພ຺ພໍ. ອຍເມຕ຺ຖ ປຣມຕ຺ຖທີປນາ.

[໒໘] ວິຠາວນິຍໍ ປນ ມຫາຏີກາຍຎ຺ຈ

‘‘ອສາຘາຣຓ ຘມ຺ມວເສນ ຈິຕ຺ຕສ຺ສ ອຸປລກ຺ຂຓຕ຺ຖໍ ໂທມນສ຺ສຄ຺ຄຫຓ’’ນ຺ຕິ ວຸຕ຺ຕໍ. ຕຕ຺ຖ ອສາຘາຣຓຘມ຺ມວເສນາຕິ ອິທໍ ຕາວ ນຍຸຊ຺ຊຕິ.

[໒໙] ສຕິປິ ອິມສ຺ສ ໂສມນສ຺ສຸເປກ຺ຂາສຫຄຕຠາເວ ອນຎ຺ຎສາຘາຣເຓເນວ ໂທມນສ຺ເສນ ອິມສ຺ສ ອຸປລກ຺ຂຓຕ຺ຖນ຺ຕິ ອຕ຺ຖສ຺ສ ອາປຊ຺ຊນໂຕ. ຍຖາຕໍ ສຕິປິ ປຸຣິມສ຺ສ ອິມສ຺ສຈ ຈິຕ຺ຕສ຺ສ ໂມຫສຫຄຕຠາເວ ອນຎ຺ຎສາຘາຣເຓເນວ ໂລເຠນ ປຏິເຆນຈ ອຸປລກ຺ຂຓຕ຺ຖໍ ໂລຠສຫຄຕປຏິຆ ສມ຺ປຍຸຕ຺ຕຄ຺ຄຫຓນ຺ຕິ. ອຸປລກ຺ຂຓຕ຺ຖນ຺ຕິ ຈ ນ ວຕ຺ຕພ຺ພໍ.

ເອວຎ຺ຫິ ສຕິ ປາກເຏນ ໂທມນສ຺ເສນ ອປາກຏານໍ ອຎ຺ຎເວທນາ ນໍປິ ອິຘ ລທ຺ຘຠາວໍ ອຸປລກ຺ເຂຕີຕິ ອາປຊ຺ຊຕິ. ຍຖາ ລທ຺ຘາຕປຕ຺ໂຕ ຣາຊກຸມາໂຣຕິ.

[໓໐] ຍຎ຺ຈ ວິຠາວນິຍໍ

‘‘ປຏິຆສມ຺ປຍຸຕ຺ຕຠາໂວປນ ອຸຠິນ຺ນໍ ເອກນ຺ຕ ສຫຈາຣິຕາ ທສ຺ສນຕ຺ຖໍ ວຸຕ຺ໂຕ’’ຕິ ວຸຕ຺ຕໍ. ຕໍປິ ນ ສຸນ຺ທຣໍ.

ອິມສ຺ສ ຈູຬນິຄເມເນວ ຕທຕ຺ຖສິທ຺ຘິໂຕຕິ.

໒໗. ເອຕ຺ຖຈ ໂທສຊ຺ຌາສຍຕາ, ອຄມ຺ຠີຣປ຺ປກຕິຕາ, ອປ຺ປສ຺ສຸກຕາ, ອາຆາຕວຕ຺ຖຸສມາໂຍໂຄວາ, ອນິຏ຺ຐາຣມ຺ມຓສມາໂຍ ໂຄວາ ໂທມນສ຺ສສ຺ສ ປຏິຆສ຺ສຈ ກາຣຓໍ. ຕຕ຺ຖ ໂທສ ພຫຸລ ຠາວໂຕ ອາຄຕວເສນ ໂທສຊ຺ຌາສຍຕາ ທຏ຺ຐພ຺ພາ. ອຄມ຺ຠີຣປ຺ປກຕິຕາ ຫີນຊ຺ຌາສຍຕາ. ອປ຺ປສ຺ສຸຕສ຺ສຈ ອນິຏ຺ຐ ໂລກ ຘມ຺ເມຫິຜຸຏ຺ຐສ຺ສ ຕໍກຸເຕຕ຺ຖລພ຺ຠາຕິ ປຈ຺ຈເວກ຺ຂນາ ນຕ຺ຖີຕິ. ອິເມສມ຺ປິ ທ຺ວິນ຺ນໍ ອຸປ຺ປຕ຺ຕິວິຘານໍ ວິສຸທ຺ຘິມຄ຺ເຄ ຄເຫຕພ຺ພໍ. ປິສທ຺ທສ຺ສ ອຕ຺ໂຖປິ ວຸຕ຺ຕນໂຍເອວາຕິ.

ໂທສມູລຈິຕ຺ຕສ຺ສ ປຣມຕ຺ຖທິປນາ ນິຏ຺ຐິຕາ.

໒໘. ໂມຫມູລຈິຕ຺ເຕ ວິຈິກິຈ຺ຉຸທ຺ຘຈ຺ຈານໍ ປທຕ຺ໂຖ ອຸປຣິ ອາຄມິສ຺ສຕິ. ຍສ຺ມາປນ ອິທໍ ຈິຕ຺ຕໍ ມູລນ຺ຕຣວິຣເຫນ ລທ຺ໂຘກາເສນ ສຸຏ຺ຐຸພລວນ຺ເຕນ ໂມເຫນເຈວ ສໍສປ຺ປມານວິກ຺ຂິປມາເນຫິ ວິຈິກິຈ຺ຉຸທ຺ຘຈ຺ເຈຫິ ຈ ຍຸຕ຺ຕໍ ໂຫຕິ. ຕສ຺ມາ ອິຘ ເວທນາປິ ອາຣມ຺ມຓໍ ອຘິມຕ຺ຕໂຕ ອນຸຠວິຕຸໍ ນ ສກ຺ໂກຕີຕິ ອຸເປກ຺ຂາເວທນາວ ຍຸຕ຺ຕາ ໂຫຕິ. ເອວໍ ສນ຺ເຕປິ ອິທໍ ຈິຕ຺ຕໍ ໂສມນສ຺ສ ໂທມນສ຺ສ ສຫຄຕານໍປິ ອນນ຺ຕເຣ ອຸປ຺ປຊ຺ຊຕິ. ຕສ຺ມາ ຕທຸຠຍເວທນາຫິປິ ອິທໍ ຍຸຕ຺ຕໍ ສິຍາຕິ ປສງ຺ໂຄ ໂຫຕີຕິ ຕປ຺ປສງ຺ຄນິວຕ຺ຕນຕ຺ຖໍ ອິຘ ອຸເປກ຺ຂາຄຫຓໍ ກຕໍ. ອນຎ຺ຎຈິຕ຺ຕສາຘາຣເຓນ ຘມ຺ເມນ ຈິຕ຺ຕສ຺ສ ນິຍມນຕ຺ຖໍ ວິຈິກິຈ຺ຉາຄຫຓໍ. ອຸທ຺ຘຈ຺ຈໍ ປນ ສພ຺ພາກຸສເລສຸ ຍຸຕ຺ຕໍປິ ອິຘ ລທ຺ໂຘກາສໍ ຫຸຕ຺ວາ ສຸຏ຺ຐຸ ພລວໍ ໂຫຕີຕິ ທສ຺ສນຕ຺ຖໍ ອິເຘວ ຄຫິຕນ຺ຕິ ທຏ຺ຐພ຺ພໍ. ເຕເນວຫິ ຘມ຺ມສງ຺ຄຓິຍໍ ຘມ຺ມຸທ຺ເທສວາເຣ ອຸທ຺ຘຈ຺ຈໍ ອຎ຺ເຎສຸ ປາປຈິຕ຺ເຕສຸ ສຣູປໂຕ ອນຸທ຺ຘຣິຕ຺ວາ ເຍວາປນກຠາເວເນວ ວຸຕ຺ຕໍ. ອິມສ຺ມິໍ ອນ຺ຕິມຈິຕ຺ເຕເອວ ສຣູປໂຕ ອຸທ຺ຘຏນ຺ຕິ ທຏ຺ຐພ຺ພໍ. ຍສ຺ມາຈ ອິທໍຈິຕ຺ຕທ຺ວຍໍ ສຕ຺ຕານໍ ປກຕິສຠາວຠູຕນ຺ຕິ ປໂຍເຄນ ວາ ອຸປາເຍນ ວາ ເກນຈິ ອຸປ຺ປາເທຕພ຺ພໍ ນາມ ນຕ຺ຖິ. ສພ຺ພກາລມ຺ປິ ຠວງ຺ຄຈິຕ຺ຕໍວິຍ ອໂນສກ຺ກມານໍ ອສໍສີທມານໍ ອກິຈ຺ເຉນ ອກສິເຣນ ປວຕ຺ຕຕິ. ຕສ຺ມາ ເອກນ຺ເຕນ ອສງ຺ຂາຣິກເມວ ໂຫຕີຕິ ກຕ຺ວາ ອິຘ ສງ຺ຂາຣເຠໂທ ນ ຄຫິໂຕຕິ ທຏ຺ຐພ຺ພໍ. ເຕເນວຈ ປາຬິຍໍປິ ປຸຣິມຈິຕ຺ເຕສຸວິຍ ອິຘ ສສງ຺ຂາເຣນາຕິ ທຸຕີຍຈິຕ຺ຕວາໂຣ ນວຸຕ຺ໂຕຕິ. ອຍເມຕ຺ຖ ປຣມຕ຺ຖທີປນາ.

[໓໑] ວິຠາວນິຍໍ ປນ

ອິມານິ ທ຺ເວ ຈິຕ຺ຕານິ ອຕິສມ຺ມຸຬ຺ຫຕາຍ ອຕິຈຎ຺ຈລຕາຍ ຈ ສພ຺ພຕ຺ຖປິ ຣຊ຺ຊນທຸສ຺ສນຣຫິຕານິ ໂຫນ຺ຕິ. ຕສ຺ມາ ອຸເປກ຺ຂາ ສຫຄຕາເນວ ປວຕ຺ຕນ຺ຕີຕິ ວຸຕ຺ຕໍ. ຕໍ ນ ສຸນ຺ທຣໍ.

ຣຊ຺ຊນ ສຫິຕານໍປິ ໂລຠມູລ ຈິຕ຺ຕານໍ ອຸເປກ຺ຂາ ໂຍຄສ຺ສ ທິຏ຺ຐຕ຺ຕາຕິ.

[໓໒] ຍຎ຺ຈ ຕຕ຺ຖ ມຫາຏີກາຍຎ຺ຈ

‘‘ຕໂຕເຍວຈ ສຠາວຕິກ຺ຂຕາຍ ອຸສ຺ສາເຫຕພ຺ພຕາຍຈ ອຠາວໂຕ ສງ຺ຂາຣເຠໂທປິ ເນສໍ ນຕ຺ຖີ’’ຕິ ວຸຕ຺ຕໍ. ຕຕ຺ຖ ສຠາວຕິກ຺ຂຕາຍ ອຠາວໂຕຕິ ອິມິນາ ອິມສ຺ສ ອສງ຺ຂາຣິກຠາວໍ ປຏິກ຺ຂິປຕິ. ອຸສ຺ສາເຫຕພ຺ພຕາຍ ອຠາວໂຕຕິ ອິມິນາ ສສງ຺ຂາຣິກຠາວໍ ປຏິກ຺ຂິປຕິ. ຕທຸຠເຍ ປນ ອິທໍ ຈິຕ຺ຕທ຺ວຍໍ ສພ຺ພໂສ ສງ຺ຂາຣວິມຸຕ຺ຕໍ ໂຫຕີຕິ ທສ຺ເສຕິ. ຕໍ ອຏ຺ຐກຖາຍປິ ຕາວ ນ ສເມຕິ.

ປຏິຈ຺ຈສມຸປ຺ປາທວິຠງ຺ຄອຏ຺ຐກຖາຍຎ຺ຫິ ສງ຺ຂາຣເຠເທນ ອວິຊ຺ຊາຍ ທຸວິຘຠາໂວວ ວຸຕ຺ໂຕ. ຍທິຈ ອິທໍທ຺ວຍໍ ສງ຺ຂາຣມຸຕ຺ຕໍ ສິຍາ. ເອວໍ ສຕິ ອິຘ ໂມໂຫປິ ສງ຺ຂາຣມຸຕ຺ໂຕ ສິຍາ. ໂສຈ ອວິຊ຺ຊາເຍວາຕິ ຕິວິຘຠາໂວວ ອວິຊ຺ຊາຍ ຕຕ຺ຖ ວຕ຺ຕພ຺ໂພ. ນຈ ວຸຕ຺ໂຕຕິ. ເອວໍ ຕາວ ອຏ຺ຐກຖາຍ ນສເມຕິ.

[໓໓] ຍສ຺ມາຈ ອິຘ ຕິກ຺ຂຠາໂວນາມ ວິນາ ສງ຺ຂາເຣນ ເກວລໍ ປກຕິ ປຈ຺ຈຍ ຄຓ ວເສເນວ ປວຕ຺ຕນສມຕ຺ຖຕາ ວຸຈ຺ຈຕິ. ອິທຎ຺ຈ ຈິຕ຺ຕໍ ຕເຖວ ປວຕ຺ຕຕິ. ຕສ຺ມາ ອິທໍ ສຠາວຕິກ຺ຂໍ ນ ໂຫຕີຕິ ນ ສກ຺ກາ ວຕ຺ຕຸນ຺ຕິ.

ລທ຺ໂຘກາເສນ ໂມເຫນ ສຸຏ຺ຐຸ ມຸຍ຺ຫນ຺ຕີຕິ ໂມຫມູຫານີຕິ ວຕ຺ຕພ຺ເພ ນິຣຸຕ຺ຕນເຍນ ໂມມູຫານີຕິ ວຸຕ຺ຕໍ.

໒໙. ອິຈ຺ເຈວນ຺ຕິອາທິ ມຫານິຄມນໍ. ຕຕ຺ຖ ອິຈ຺ເຈວນ຺ຕິ ອິຕິ ເອວໍ. ນິປາຕສມຸທາໂຍ ເຫສ. ປຈ຺ຉິໂມວາ ເອວໍ ສທ຺ໂທ ປຸຣິມສ຺ສ ອິຕິສທ຺ທສ຺ສ ອຕ຺ຖວຈໂນ. ອິຈ຺ເຈວນ຺ຕິວາ ວິສຸໍ ເອໂກ ນິປາໂຕ. ສພ຺ພຖາປິ ອິມິນາ ໂສມນສ຺ສສຫຄຕນ຺ຕິອາທິນາ ວຸຕ຺ຕປ຺ປກາເຣ ນາຕິ ອຕ຺ໂຖ ທຏ຺ຐພ຺ໂພ. ອິທຎ຺ຈ ທ຺ວາທສາຕິ ເອຕ຺ຖ ວິເສສນໍ ເວທິຕພ຺ພໍ. ສພ຺ພຖາປີຕິ ຘມ຺ມສງ຺ຄຓີຍໍ ວຸຕ຺ເຕນ ປກາເຣນາປິ ທ຺ວາທເສວ. ວິຠງ຺ເຄ ວິຠຕ຺ເຕນ ປກາເຣນາປິ ທ຺ວາທເສວ. ຘາຕຸກຖາທີສຸ ວຸຕ຺ເຕນ ປກາເຣນາປິ ທ຺ວາທເສວ. ເຕສຸ ເຕສຸ ສຸຕ຺ຕນ຺ເຕສຸ ວຸຕ຺ເຕນ ປກາເຣນາປິ ທ຺ວາທເສວ. ກາລເທສ ສນ຺ຕານາທິ ເຠທຠິນ຺ເນນ ປກາເຣນາປິ ທ຺ວາທເສວ. ກຖໍ ທ຺ວາທເສວາຕິ. ອິຈ຺ເຈວໍ ທ຺ວາທເສວາຕິ ໂຍເຊຕພ຺ພໍ.

[໓໔] ວິຠາວນິຍໍ ປນ

ເຫຏ຺ຐາ ວຸຕ຺ໂຕ ສມ຺ປໂຍຄາທິ ອາກາໂຣວ ວິຠາວິໂຕ. ໂສປນ ອິຈ຺ເຈວນ຺ຕິ ອິມິນາວ ສິທ຺ໂຘຕິ.

ອກຸສລຈິຕ຺ຕານີຕິ ກຸສລປຏິວິຣຸທ຺ຘສຠາວຕ຺ຕາ ເອວໍ ລທ຺ຘນາ ມານິ ຈິຕ຺ຕານິ. ເອຕ຺ຖຈ ເອກນ຺ເຕນ ສທ຺ຘາທໂຍເອວ ກຸສລານາມ. ໂມຫາທໂຍເອວ ອກຸສລາ ນາມ. ຈິຕ຺ຕໍປນ ຜສ຺ສາທໂຍ ວິຍ ອຎ຺ຎສມານເມວ ໂຫຕິ, ນ ຫິ ອາຣມ຺ມຓ ວິຊານນໍວາ ເອກນ຺ເຕນ ມຸຍ຺ຫນາທິວິຍ ສາວຊ຺ຊໍວາ ໂຫຕິ. ສທ຺ທຫນາທິວິຍ ອນວຊ຺ຊໍວາຕິ. ຕໍປນ ອກຸສເລຫິ ຍຸຕ຺ຕໍ ອກຸສລນ຺ຕິ ວຸຈ຺ຈຕິ. ກຸສເລຫິ ຍຸຕ຺ຕໍ ກຸສລນ຺ຕິ. ສທ຺ຘາທີນໍປນ ໂມຫາທີນຎ຺ຈ ປຏິວິຣຸທ຺ຘຠາໂວ ຍຖາກ຺ກມໍ ປຫາຍກປຫາຕພ຺ພຠາເວນ ເວທິຕພ຺ໂພ. ອກຸສລຘມ຺ມາຫິ ທຸພ຺ພລາ ໂຫນ຺ຕິ. ສຸວຓ຺ຓປ຺ປຏິຣູປກາວິຍ ເຜຄ຺ຄຸຠູຕາ ອຠາວນາຣຫາ ປຸນປ຺ປຸນໍ ອາເສວີຍມານາປິ ຈຎ຺ຈລນ຺ຕິເຍວ ວິກ຺ກິຣນ຺ຕິເຍວ. ນິຍາມໍ ໂອກ຺ກມນ຺ຕາປິ ເອກສ຺ມິໍຠເວ ເອວ ອປາຍຠາຄິຕາຍ ໂອກ຺ກມນ຺ຕິ. ນປນ ກຸສລມູລານິ ສພ຺ພໂສ ປຈ຺ຉິນ຺ທິຕ຺ວາ ສຕ຺ເຕ ວຏ຺ຏໂສຕນິຍເຕ ກາຕຸໍ ສກ຺ໂກນ຺ຕິ. ກຸສລຘມ຺ມາປນ ພລວນ຺ຕາ ໂຫນ຺ຕິ. ຊາຕິສຸວຓ຺ຓາວິຍ ສາຣຠູຕາ ຠາວນາຣຫາ ປຸນປ຺ປຸນໍ ອາເສວີຍມານາ ຖິຣຕຣປຕ຺ຕາ ໂລກິເຍສຸ ຍາວ ອິທ຺ຘິວິຘານາ ໂລກຸຕ຺ຕເຣສຸຈ ຍາວ ອຣຫຕ຺ຕມຄ຺ຄາ ວຸທ຺ຘິວິຣຸຬ຺ຫີຘມ຺ມາ ໂຫນ຺ຕິ. ນິຍາມໍ ໂອກ຺ກມນ຺ຕາ ອປາຍໂສຕໍວາ ວຏ຺ຏໂສ ຕໍວາ ສພ຺ພໂສ ສມຸຈ຺ຉິນ຺ທິຕ຺ວາ ອນຸປາທິເສສນິພ຺ພານຠາຄິຕາຍ ໂອກ຺ກມນ຺ຕິ. ຕສ຺ມາ ກຸສລ ຘມ຺ມາເອວ ປຫາຍການາມ. ອິຕເຣປນ ປຫາຕພ຺ພາເອວ ນາມາຕິ ເວທິຕພ຺ພາ. ອປິຈ ກຸສລຘມ຺ມານາມ ອນ຺ຕມໂສ ອາໂລປຠິກ຺ຂາ ທານມຕ຺ຕາປິ ໂລເກເຠສຊ຺ຊວິຘານານິວິຍອກຸສລປ຺ປຫານາຍ ເອວ ປຓ຺ຑິເຕຫິປຎ຺ຎປີຍນ຺ຕິ ກຣີຍນ຺ຕິ ຈ, ຕສ຺ມາ ເຕເອວ ປຫາຍກາ. ອກຸສລຘມ຺ມາປນ ໂລເກ ນານາໂຣຄຊາຕິໂຍວິຍ ສກລໂລກສ຺ສ ປກຕິສຠາວຠູຕາເອວ ໂຫນ຺ຕີຕິ ເຕ ປຫາຕພ຺ພາເອວາຕິ. ສມນ຺ຕໂຕ ອນວເສສໂຕ ອາທິຍິໍສຸ ຄຓ຺ຫິຍິໍສູຕິ ສມຕ຺ຕານິ. ອປິຈ ສມຕ຺ຕານີຕິ ນິຏ຺ຐິຕານິ ປຣິປຸຓ຺ຓານິວາ. ອຏ຺ຐຘາຕິອາທິສງ຺ຄຫຄາຖາ. ໂລໂຠມູລໍ ເອເຕສນ຺ຕິ ສມາໂສ. ທ຺ວາທສາ ກຸສລາ ສິຍຸນ຺ຕິ ເອຕ຺ຖ ສິຍຸນ຺ຕິ ນິປາຕປທໍ ອິຘ ທຏ຺ຐພ຺ພໍ. ອກຸສລ ຈິຕ຺ຕານິ ທ຺ວາທສ ຠວນ຺ຕີຕິ ອຕ຺ໂຖ.

ອິຕິ ປຣມຕ຺ຖທີປນິຍານາມ ອຠິຘມ຺ມຕ຺ຖສງ຺ຄຫສ຺ສ

ຈຕຸຕ຺ຖວຓ຺ຓນາຍ ອກຸສລຈິຕ຺ຕສ຺ສ

ປຣມຕ຺ຖທິປນາ ນິຏ຺ຐິຕາ.

໓໑. ເອວໍ ສພ຺ພນິຫີນໍ ອກຸສລໍ ສງ຺ຄເຫຕ຺ວາ ອິທານິ ອເຫຕຸກໍ ສງ຺ຄຓ຺ຫນ຺ໂຕ ຕຕ຺ຖຈ ສພ຺ພນິຫີນໍ ອກຸສລວິປາກໍ ຕາວ ທສ຺ເສຕຸໍ ອຸເປກ຺ຂາສຫຄຕນ຺ຕິອາທິມາຫ.

[໓໕] ວິຠາວນິຍໍ ປນ

ຕໍ ອກຸສລ ວິປາກຕ຺ຕາເຍວ ອກຸສລານນ຺ຕຣໍ ປຖມໍ ທສ຺ສິຕນ຺ຕິ ອຘິປ຺ປາເຍນ ຍໍ ວຸຕ຺ຕໍ ‘‘ເຕສໍ ອກຸສລວິປາກາ ທິວເສນ ຕິວິຘຠາເວປິ ອກຸສລານນ຺ຕຣໍ ອກຸສລວິປາເກເຍວ ວິຠຊິຕຸ’’ນ຺ຕິ. ຕໍ ນ ສຸນ຺ທຣໍ.

ເອວຎ຺ຫິ ສຕິ ກຸສລວິປາການິປິ ກຸສລາ ນນ຺ຕເຣເອວ ວຕ຺ຕພ຺ພານິ ສິຍຸນ຺ຕິ.

໓໑. ຈກ຺ຂຸໂສຕາທີນໍ ປທຕ຺ໂຖ ອຸປຣິ ອາຄມິສ຺ສຕິ. ວິຊານາຕີຕິ ວິຎ຺ຎາຓໍ. ຍຖາຫ-ວິຊານາຕິ ວິຊານາຕີຕິ ໂຂ ຠິກ຺ຂເວ ຕສ຺ມາວິຎ຺ຎາຓນ຺ຕິ ວຸຈ຺ຈຕີຕິ. ຈກ຺ຂຸໍ ນິສ຺ສິຕໍ ວິຎ຺ຎາຓໍ ຈກ຺ຂຸວິຎ຺ຎາຓໍ. ຈກ຺ຂຸນາວາ ປຈ຺ຈຍຠູເຕນ ຊນິຕໍ ວິຎ຺ຎາຓໍ ຈກ຺ຂຸວິຎ຺ຎາຓໍ. ກມ຺ເມນວາ ຈກ຺ຂຸສ຺ສ ອຸປນີຕໍ ວິຎ຺ຎາຓໍ ຈກ຺ຂຸວິຎ຺ຎາຓໍ. ຈກ຺ຂຸໂຕວາ ຊາຕໍ ວິຎ຺ຎາຓໍ ຈກ຺ຂຸວິຎ຺ຎາຓໍ. ຈກ຺ຂຸສ຺ສວາ ອິນ຺ທ຺ຣິຍຠາເວນ ສາມິ ຠູຕສ຺ສ ວິຎ຺ຎາຓໍ ຈກ຺ຂຸວິຎ຺ຎາຓໍ. ຈກ຺ຂຸສ຺ມິໍວາ ອຸປ຺ປນ຺ນໍວິຎ຺ຎາຓໍ ຈກ຺ຂຸວິຎ຺ຎາຓໍ. ເອສນໂຍ ໂສຕວິຎ຺ຎາຓາທີສຸປິ. ປາຬິຍໍປນ ມຫາ ຕຓ຺ຫາສງ຺ຂຍສຸຕ຺ເຕ –

ເສຍ຺ຍຖາປິ ຠິກ຺ຂເວ ກຏ຺ຐຎ຺ຈ ປຏິຈ຺ຈ ອຄ຺ຄິ ຊລຕິ. ກຏ຺ຐຄ຺ຄີຕ຺ເວວ ສງ຺ຂ຺ຍໍ ຄຈ຺ຉຕິ. ສກລິກຎ຺ຈ ປຏິຈ຺ຈ ອຄ຺ຄິ ຊລຕິ. ສກລິ ກຄ຺ຄີຕ຺ເວວ ສງ຺ຂ຺ຍໍ ຄຈ຺ຉຕິ. ຕິຓຎ຺ຈ ປຏິຈ຺ຈ ອຄ຺ຄິ ຊລຕິ. ຕິຓຄ຺ຄີ ຕ຺ເວວ ສງ຺ຂ຺ຍໍ ຄຈ຺ຉຕິ. ໂຄມຍຎ຺ຈ ປຏິຈ຺ຈ ອຄ຺ຄິ ຊລຕິ. ໂຄມຍຄ຺ຄີຕ຺ເວວ ສງ຺ຂ຺ຍໍ ຄຈ຺ຉຕິ. ຖຸສຎ຺ຈ ປຏິຈ຺ຈ ອຄ຺ຄິ ຊລຕິ. ຖຸສຄ຺ຄີຕ຺ເວວ ສງ຺ຂ຺ຍໍ ຄຈ຺ຉຕິ. ສງ຺ກາຣຎ຺ຈ ປຏິຈ຺ຈ ອຄ຺ຄິ ຊລຕິ. ສງ຺ກາຣຄ຺ຄີຕ຺ເວວ ສງ຺ຂ຺ຍໍ ຄຈ຺ຉຕິ. ເອວເມວໂຂ ຠິກ຺ຂເວ ຈກ຺ຂຸຎ຺ຈ ປຏິຈ຺ຈ ຣູເປຈ ອຸປ຺ປຊ຺ຊຕິ ວິຎ຺ຎາຓໍ. ຈກ຺ຂຸວິຎ຺ຎາຓນ຺ເຕວ ສງ຺ຂ຺ຍໍ ຄຈ຺ຉຕິ. ໂສຕຎ຺ຈ ປຏິຈ຺ຈ ສທ຺ເທ ຈ ອຸປ຺ປຊ຺ຊຕິ ວິຎ຺ຎາຓໍ. ໂສຕວິຎ຺ຎາຓນ຺ເຕວ ສງ຺ຂ຺ຍໍ ຄຈ຺ຉຕິ. ຆານຎ຺ຈ ປຏິຈ຺ຈ ຄນ຺ເຘຈ ອຸປ຺ປຊ຺ຊຕິ ວິຎ຺ຎາຓໍ. ຆານວິຎ຺ຎາຓນ຺ເຕວ ສງ຺ຂ຺ຍໍ ຄຈ຺ຉຕິ. ຊິວ຺ຫຎ຺ຈ ປຏິຈ຺ຈ ຣເສຈ ອຸປ຺ປຊ຺ຊຕິ ວິຎ຺ຎາຓໍ. ຊິວ຺ຫາວິຎ຺ຎາຓນ຺ເຕວ ສງ຺ຂ຺ຍໍ ຄຈ຺ຉຕິ. ກາຍຎ຺ຈ ປຏິຈ຺ຈ ໂຜຏ຺ຐພ຺ເພຈ ອຸປ຺ປຊ຺ຊຕິ ວິຎ຺ຎາຓໍ. ກາຍວິຎ຺ຎາຓນ຺ເຕວ ສງ຺ຂ຺ຍໍ ຄຈ຺ຉຕິ. ມນຎ຺ຈ ປຏິຈ຺ຈ ຘມ຺ເມຈ ອຸປ຺ປຊ຺ຊຕິ ວິຎ຺ຎາຓໍ. ມໂນ ວິຎ຺ຎາຓນ຺ເຕວ ສງ຺ຂ຺ຍໍ ຄຈ຺ຉຕີຕິ ວຸຕ຺ຕໍ.

ຕຖາຕິ ອິມິນາ ອຸເປກ຺ຂາສຫຄຕນ຺ຕິ ປທໍ ອາກຑ຺ຒຕິ. ທຸກ຺ຂຍຕີຕິ ທຸກ຺ຂໍ. ສມ຺ປຍຸຕ຺ຕຘມ຺ເມ ຕໍ ສມງ຺ຄິປຸຄ຺ຄລໍວາ ພາຘຕິ ຫິໍສຕີຕິ ອຕ຺ໂຖ. ທຸຏ຺ຐຸວາ ຂນຕິ ກາຍິກສຸຂນ຺ຕິ ທຸກ຺ຂໍ. ທຸກ຺ກເຣນວາ ຂມິຕພ຺ພນ຺ຕິ ທຸກ຺ຂໍ. ທຸກ຺ກຣໍ ໂອກາສທານໍ ເອຕສ຺ສາຕິວາ ທຸກ຺ຂໍ. ກາຍິກທຸກ຺ຂເວທນາເຍວ ນາມໍ. ສຸຏ຺ຐຸ ປຏິມຸຂຎ຺ຈ ອິຈ຺ຉຕີຕິ ສມ຺ປຏິຈ຺ຉນໍ. ສຸຏ຺ຐູຕິ ອມຸຎ຺ຈມານໍ. ປຏິມຸຂນ຺ຕິ ອນຎ຺ຎາເປກ຺ຂໍ. ອິຈ຺ຉຕີຕິ ກາເມຕິ ອຠິນນ຺ທຕິ ປຏິຄ຺ຄຓ຺ຫຕິ. ເຕເນວຫິ ຠາສິຕໍ ອຠິນນ຺ທຸນ຺ຕິ ເອຕ຺ຖ ສມ຺ປຏິຈ຺ຉິໍ ສູຕິ ວຓ຺ຓຍິໍສຸ. ສຸຏ຺ຐຸ ຕີເຣຕິ ຕຸເລຕິ ວິຈາເຣຕີຕິ ສນ຺ຕີຣຓໍ. ຏີກາຍໍ ຕີເຣຕິ ນິຏ຺ຐາເປຕີຕິ ວຸຕ຺ຕໍ. ວິຠາວນິຍໍ ຕີເຣຕິ ວີມໍສຕີຕິ ວຸຕ຺ຕໍ.

໓໒. ເອຕ຺ຖຈ ຈກ຺ຂຸສ຺ສ ອສມ຺ຠິນ຺ນຕາ, ອາໂລກ ສນ຺ນິສ຺ສຍປ຺ປຏິລາໂຠ, ຣູປານໍ ອາປາຕາຄມນໍ, ມນສິກາໂຣຕິ ຈຕ຺ຕາໂຣ ປຈ຺ຈຍາ ຈກ຺ຂຸວິຎ຺ຎາຓສ຺ສ ອຸປ຺ປຕ຺ຕິກາຣຓານິ. ໂສຕສ຺ສ ອສມ຺ຠິນ຺ນຕາ ອາກາສສນ຺ນິສ຺ສຍປ຺ປຏິລາໂຠ, ສທ຺ທານໍ ອາປາຕາຄມນໍ ມນສິກາໂຣຕິ ໂສຕວິຎ຺ຎາຓສ຺ສ. ຆານສ຺ສ ອສມ຺ຠິນ຺ນຕາ, ວາສຸສນ຺ນິສ຺ສຍປ຺ປຏິລາໂຠ, ຄນ຺ຘານໍ ອາປາຕາຄມນໍ ມນສິກາໂຣຕິ ຆານວິຎ຺ຎາຓສ຺ສ. ຊິວ຺ຫາຍ ອສມ຺ຠິນ຺ນຕາ ອາໂປສນ຺ນິສ຺ສຍປ຺ປຏິລາໂຠ. ຣສານໍ ອາປາຕາຄມນໍ, ມນສິກາໂຣຕິ ຊິວ຺ຫາວິຎ຺ຎາຓສ຺ສ. ກາຍສ຺ສ ອສມ຺ຠິນ຺ນຕາ, ປຖວິສນ຺ນິສ຺ສຍປ຺ປຏິລາໂຠ, ຕິຓ຺ຓໍ ໂຜຏ຺ຐພ຺ພານໍ ອຎ຺ຎຕຣສ຺ສ ອາປາຕາຄມນໍ, ມນສິກາໂຣຕິ ກາຍວິຎ຺ຎາຓສ຺ສາຕິ. ເອຕ຺ຖຈ ອາໂລກ ອາກາສາທີນໍ ສນ຺ນິສ຺ສຍານໍ ຄຫຓໍ ເຕຫິ ວິນາ ຣູປາທີນໍ ປສາເທສຸ ອາປາຕາຄມນສ຺ເສວ ອຠາວໂຕຕິ ທຏ຺ຐພ຺ພໍ, ນ ຫິ ອາໂລເກ ສຕິ ຣູປານິ ສນ຺ນິຫິຕານິປິ ຈກ຺ຂຸມ຺ຫິ ອາປາຕມາຄຈ຺ຉນ຺ຕິ. ເອສນໂຍ ເສເສສຸປີຕິ. ຍໍປນ ອຏ຺ຐກຖາຍໍ -

ຈກ຺ຂຸສ຺ມິໍປນ ອສມ຺ຠິນ຺ເນປິ ພຫິທ຺ຘາຣູປາຣມ຺ມເຓ ອາປາຕໍ ອນາ ຄຈ຺ຉນ຺ເຕ ຈກ຺ຂຸວິຎ຺ຎາຓໍ ນຸປ຺ປຊ຺ຊຕິ. ຕສ຺ມິໍ ປນ ອາປາຕໍ ອາຄຈ຺ຉນ຺ເຕປິ ອາໂລກສນ຺ນິສ຺ສເຍ ອສຕິ ນຸປ຺ປຊ຺ຊຕີຕິ ວຸຕ຺ຕໍ.

ຕໍ ວິນາ ອາໂລເກນ ວິຎ຺ຎາຓຸປ຺ປຕ຺ຕິຍາ ອຠາວທສ຺ສນປຣໍ. ນປນ ອາປາກາຄມນໍນາມ ອາໂລເກ ອສຕິປິ ສມ຺ຠວຕີຕິ ທສ຺ສນປຣນ຺ຕິ ທຏ຺ຐພ຺ພໍ. ອິຕຣຖາ ຣຕ຺ຕນ຺ຘກາເຣປິ ຣູປານິ ຈກ຺ຂຸມ຺ຫິ ອາປາຕໍ ອາຄຈ຺ຉນ຺ຕີຕິ ອາປຊ຺ຊຕີຕິ. ອກຸສລສ຺ສ ວິປາການິ ອກຸສລ ວິປາການິ.

໓໓. ເອຕ຺ຖາ ເກນຏ຺ເຐນ ວິປາກໍນາມາຕິ. ວິປຈ຺ຈນຏ຺ເຐນ. ກິຎ຺ຈ ວິປຈ຺ຈນນ຺ຕິ. ຍຖາ ໂລເກ ອມ຺ພຜລາທີນໍ ຕຣຸຓຠາວໍ ອຕິກ຺ກມ຺ມ ປຣິຓຕຠາວປ຺ປຕ຺ຕິວິປຈ຺ຈນນ຺ຕິ ວຸຈ຺ຈຕິ. ເອວເມວໍ ອິຘປິ ວິປຈ຺ຈນໍ ເວທິຕພ຺ພນ຺ຕິ. ອຍຎ຺ຈ ອຕ຺ໂຖ ຈຕູຫິ ສມງ຺ຄີຕາຫິ ທີເປຕພ຺ໂພ. ຈຕສ຺ໂສຫິ ສມງ຺ຄີຕານາມ ເຈຕນາສມງ຺ຄິຕາ, ກມ຺ມສມງ຺ຄິຕາ, ອຸປຏ຺ຐານສມງ຺ຄິຕາ, ວິປາກສມງ຺ຄິຕາຕິ. ຕຕ຺ຖ ປຸພ຺ເພ ຕໍ ຕໍ ກມ຺ມາຍູຫນກາເລຍາ ກຸສລາກຸສລເຈຕນາຍ ຂຓຕ຺ຕຍສມງ຺ຄິຕາ. ອຍໍ ເຈຕນາສມງ຺ຄີຕານາມ. ສາປນ ເຈຕນາ ນິຣຸຊ຺ຌມານາ ສພ຺ພໂສ ອຠາວໍ ປຕ຺ວາ ນນິຣຸຊ຺ຌຕິ. ອາຍຕິໍປນ ວິປາກປາຕຸຠາວາຍ ອຕ຺ຕໂນ ສພ຺ພາກາຣປຣິປູຣໍ ກ຺ຣິຍາວິເສສໍ ຕສ຺ມິໍ ຈິຕ຺ຕສນ຺ຕາເນ ນິທຫິຕ຺ວາວ ນິຣຸຊ຺ຌຕິ. ໂສຈ ກ຺ຣິຍາວິເສໂສ ຍາວ ໂອກາສໍ ນລຠຕິ. ຕາວ ກປ຺ປສໍຕສຫສ຺ສໍປິ ຕໍສນ຺ຕານໍ ອນຸຄໂຕເຍວ ໂຫຕິ. ຍໍ ສນ຺ຘາຍ ຘມ຺ມປເທ –

ນ ຫິ ປາປໍ ກຕໍ ກມ຺ມໍ, ສຊ຺ຊຸຂີຣໍວ ມຸຈ຺ຈຕິ;

ທຫນ຺ຕໍ ພາລມນ຺ເວຕິ, ຠສ຺ມາ ຉນ຺ໂນວ ປາວໂກຕິ ວຸຕ຺ຕໍ.

ໂສປນ ວິສຸໍ ເອໂກ ປຣມຕ຺ຖຘມ຺ໂມຕິປິ ສງ຺ຂ຺ຍໍ ນຄຈ຺ຉຕິ, ອນຸສຍຘາຕຸໂຍວິຍາຕິ. ອຍໍ ກມ຺ມສມງ຺ຄິຕານາມ. ໂສປນ ຍທາ ອຕ຺ຕໂນ ອນຸຣູເປ ປຈ຺ຈເຍ ລຠຕິ. ຕທາ ວິປຈ຺ຈນຕ຺ຖາຍ ໂອກາສໍ ກໂຣຕິ. ກຖໍ ກໂຣຕີຕິ. ໂສ ອາສນ຺ນມຣຓສ຺ສ ສຕ຺ຕສ຺ສ ອຕ຺ຕານໍວາ ປຈ຺ຈຸປຏ຺ຐາເປຕິ. ອຕ຺ຕໂນ ນິມິຕ຺ຕໍວາ ປຈ຺ຈຸປຏ຺ຐາເປຕິ. ຄຕິນິມິຕ຺ຕໍວາ ປຈ຺ຈຸປຏ຺ຐາເປຕິ. ໂສຈ ສຕ຺ໂຕ ຕໍ ອມຸຎ຺ຈມາໂນ ຍທິ ຄຓ຺ຫາຕິ. ຕທາ ໂອກາສໍ ລຠຕິ. ອຍໍ ອຸປຏ຺ຐານສມງ຺ຄິຕານາມ. ຕໍ ອມຸຎ຺ຈິຕ຺ວາ ຈຸຕສ຺ສປນ ຈຸຕິອນນ຺ຕຣເມວ ໂສ ກມ຺ມສງ຺ຂາໂຕ ກ຺ຣິຍາ ວິເສໂສ ວິສຸໍ ເອໂກ ສສມ຺ປຍຸຕ຺ໂຕ ປຣມຕ຺ຖຘມ຺ມຣາສິ ຫຸຕ຺ວາ ເອກໍ ຠວໍ ປູຣຍມາໂນ ວິປຈ຺ຈຕິ, ເອກໍ ຠວໍ ປູຣຍມາໂນຕິຈ ຍາວ ຕາຍຸກໍ ຠວງ຺ຄກິຈ຺ຈໍ ຉສຸ ທ຺ວາເຣສຸ ຕໍ ຕໍ ທ຺ວາຣິກວິປາກກິຈ຺ຈານິ ປຣິໂຍສາເນ ຈຸຕິກິຈ຺ຈຎ຺ຈ ສາຘຍມາໂນຕິ ອຕ຺ໂຖ. ຕຕ຺ຖ ປຸຣິມາ ຕິສ຺ໂສ ສມງ຺ຄີຕາ ຕຣຸຓາ ວຕ຺ຖານາມ ໂຫນ຺ຕິ. ປຈ຺ຉິມາ ວິປາກສມງ຺ຄີຕາ ປຣິຓຕາວຕ຺ຖານາມາຕິ ເວທິຕພ຺ພາ. ອິຕິ ວິປຈ຺ຈນ຺ຕີຕິ ວິປາການິ ມຸທຸຕຣຸຓາວຕ຺ຖໍ ອຕິກ຺ກມິຕ຺ວາ ປຣິຓກາວຕ຺ຖສງ຺ຂາຕໍ ວິປກ຺ກຠາວໍ ອາປຊ຺ຊນ຺ຕີຕິ ເອວເມຕ຺ຖ ອຕ຺ໂຖ ເວທິຕພ຺ໂພ. ເອວຎ຺ຈ ກຕ຺ວາ ປາຬິຍໍ ກຸສລາກຸສລກມ຺ມສມຸຏ຺ຐານານໍປິ ກຏຕ຺ຕາຣູປານໍ ວິປາກປເທ ອຄ຺ຄຫຓໍ ໂຫຕີຕິ. ຕານິຫິ ກມ຺ມສນ຺ຕານໂຕ ວິສຸໍ ສິທ຺ຘຕ຺ຕາ ວິສຸໍ ກມ຺ມໂຕ ຊາຕານິເຍວ ນາມ ໂຫນ຺ຕິ, ນວິປກ຺ການິ ນາມາຕິ. ອຎ຺ຎໍຫິ ອຣູປຘມ຺ມານໍ ສນ຺ຕານໍ. ອຎ຺ຎໍ ຣູປຘມ຺ມານນ຺ຕິ. ອຍເມຕ຺ຖ ວິປາກປເທ ປຣມຕ຺ຖທີປນາ.

ເຍປນ ອຣູປຠາເວນ ສາຣມ຺ມຓຠາເວນຈ ກມ຺ເມນ ສທິສ ຕາມຕ຺ຕໍ ຄເຫຕ຺ວາ ອຣູປຘມ຺ມານເມວ ວິປາກຕ຺ຕໍ ສາເຘນ຺ຕິ. ເຕສໍ ວິປາກສທ຺ໂທ ອຣູປຘມ຺ເມສຸ ຣຸຬ຺ຫີວເສນ ປວຕ຺ໂຕຕິ ອາປຊ຺ຊຕີຕິ. ຍຎ຺ຈ ຕຕ຺ຖ ສາລິພີຊນິພ຺ພຕ຺ເຕສຸ ນາຬປຕ຺ຕປຸປ຺ຜຜເລສຸ ພີຊສທິສານໍ ຜລານເມວ ສາລິຜລສາລິປກ຺ກນາມໍ ສິທ຺ຘໍ ວິຍາຕິ ອຸປມໍ ທສ຺ເສນ຺ຕິ, ສາປິ ນສເມຕິ. ນ ຫິ ຜລານິປິ ຕຣຸຓກາເລ ປາກນາມໍ ລຠນ຺ຕິ. ນຈ ນາຬປຕ຺ຕປຸປ຺ຜານິປິ ປຣິຓຕກາເລ ປາກນາມໍ ນລຠນ຺ຕີຕິ. ຕານິ ປິຫິ ຕທາ ນາຬໍ ປກ຺ກໍ, ປຕ຺ຕໍ ປກ຺ກໍ, ປຸປ຺ຜໍ ປກ຺ກນ຺ຕິ ນ ນວຸຈ຺ຈນ຺ຕີຕິ. ສຸຂຍຕີຕິ ສຸຂໍ, ສມ຺ປຍຸຕ຺ຕຘມ຺ເມ ຕໍສມງ຺ຄີປຸຄ຺ຄລໍວາ ລທ຺ຘສາຕໍ ກໂຣຕີຕິ ອຕ຺ໂຖ.

໓໔. ສຸຏ຺ຐຸວາ ຂນຕິ ກາຍິກທຸກ຺ຂໍ. ສຸເຂນຈ ຂມິຕພ຺ພໍ. ສຸກຣໍ ໂອກາສທານໍ ເອຕສ຺ສາຕິວາ ສຸຂໍ. ກຸສລສ຺ສ ວິປາການິ ສມ຺ປຍຸຕ຺ຕ ເຫຕຸວິຣຫໂຕ ອເຫຕຸການິຈາຕິ ກຸສລວິປາກາ ເຫຕຸກ ຈິຕ຺ຕານິ.

[໓໖] ວິຠາວນິຍໍ ປນ

ປຸພ຺ພກມ຺ມສຫຊາເຕນ ນິພ຺ພຕ຺ຕກເຫຕຸນາປິ ອິຘ ວິປາກສ຺ສ ສເຫຕຸກຕາປສງ຺ໂຄກໂຕ. ໂສ ນ ສຸນ຺ທໂຣ.

ນ ຫິ ອຠິຘມ຺ເມ ກຕ຺ຖຈິ ປຸພ຺ພກມ຺ມສຫຊາເຕນ ນິພ຺ພຕ຺ຕກເຫຕຸນາ ວິປາກສ຺ສ ສເຫຕຸກາເຫຕຸກຕາ ສມ຺ຠໂວນາມ ອຕ຺ຖິ. ອສຕິຈ ສມ຺ຠເວ ພ຺ຍຠິຈາຣສ຺ສປິ ອຠາວໂຕ ໂສ ປສງ຺ໂຄ ນິຣຕ຺ຖໂກວາຕິ. ຕຕ຺ຖ ພ຺ຍຠິຈາຣສ຺ສາຕິ ປສງ຺ຄສ຺ສ ອິຈ຺ເຈວຕ຺ໂຖ. ເອຕ຺ຖຈ ອກຸສລວິປາການໍ ສຍໍ ອພ຺ຍາກຕຘມ຺ມຕ຺ຕາ ໂລຠາທີຫິ ອກຸສລເຫຕູຫິຈ ສຍໍ ອກຸສລວິປາກຕ຺ຕາ ອໂລຠາທີຫິ ອນວຊ຺ຊເຫຕູຫິຈ ສເຫຕຸກຕາ ສມ຺ຠໂວ ນຕ຺ຖິ. ອສຕິ ຈ ຕໍ ສມ຺ຠເວ ເຕສໍ ອເຫຕຸກຠາໂວ ອພ຺ຍຠິຈາໂຣເຍວ ໂຫຕີຕິ ຕຕ຺ຖ ອເຫຕຸກຄ຺ຄຫຓໍ ນ ກຕໍ. ກຸສລວິປາການໍ ປນ ສຍໍ ກຸສລວິປາກຕ຺ຕາເຍວ ອໂລຠາທີຫິ ກຸສລາ ພ຺ຍາກຕໂຍຄີຫິ ອນວຊ຺ຊເຫຕູຫິ ສເຫຕຸກຕາ ສມ຺ຠໂວ ອຕ຺ຖິເຍວ. ສຕິຈ ຕສ຺ມິໍ ສມ຺ຠເວ ເຕສໍ ອເຫຕຸກຠາໂວ ພ຺ຍຠິຈາຣສຫິໂຕ ໂຫຕີຕິ ຕຕ຺ເຖວ ອເຫຕຸກຄ຺ຄຫຓໍ ກຕນ຺ຕິ ທຏ຺ຐພ຺ພໍ.

໓໕. ຈກ຺ຂາທິເກ ປຎ຺ຈທ຺ວາເຣ ອຸປ຺ປນ຺ນໍ ອາວຊ຺ຊນໍ ປຎ຺ຈທ຺ວາຣາວຊ຺ຊນໍ, ຕຎ຺ຫິ ປຎ຺ຈທ຺ວາເຣ ຆຏ຺ຏິຕໍ ອາຣມ຺ມຓໍ ຄເຫຕ຺ວາ ອາວຊ຺ຊນໍ ອຸປ຺ປຊ຺ຊຕີຕິ. ຠວງ຺ຄສງ຺ຂາເຕ ມໂນທ຺ວາເຣ ອຸປ຺ປນ຺ນໍ ອາວຊ຺ຊນໍ ມໂນທ຺ວາຣາວຊ຺ຊນໍ. ຕຎ຺ຫິ ຕສ຺ມິໍ ອາປາຕໍ ອາຄຈ຺ຉນ຺ຕໍ ອາຣມ຺ມຓໍ ຄເຫຕ຺ວາ ອາວຊ຺ຊນ຺ຕໍ ປວຕ຺ຕຕີຕິ. ເອຕ຺ຖຈ ມໂນທ຺ວາຣນ຺ຕິ ສກລໍ ຠວງ຺ຄຈິຕ຺ຕໍ ທຏ຺ຐພ຺ພໍ.

[໓໗] ຍໍປນ ຏີກາຍໍ

ຕາວ ‘‘ມໂນທ຺ວາຣນ຺ຕິ ເອຕ຺ຖ ອາວຊ຺ຊນສ຺ສ ອນນ຺ຕຣ ປຈ຺ຈຍຠູຕໍ ຠວງ຺ຄຈິຕ຺ຕໍ ມໂນຕິ ວຸຈ຺ຈຕິ. ຕເທວ ທ຺ວາຣໍ ອາວຊ຺ຊນຊວນາທິ ຖິຈິຕ຺ຕ ປວຕ຺ຕິຍາ ມຸຂຕ຺ຕາ’’ຕິ ວຸຕ຺ຕໍ.

ຍຎ຺ຈ ວິຠາວນິຍໍ

‘‘ອາວຊ຺ຊນສ຺ສ ອນນ຺ຕຣ ປຈ຺ຈຍຠູຕໍ ຠວງ຺ຄຈິຕ຺ຕໍ ມໂນທ຺ວາຣໍ, ປີຖິຈິຕ຺ຕານໍ ປວຕ຺ຕິມຸຂຠາວໂຕ’’ຕິ ວຸຕ຺ຕໍ. ຕໍ ສພ຺ພໍປິ ນ ຍຸຊ຺ຊຕິເຍວ.

ຍທິຫິ ຍສ຺ສ ຠວງ຺ຄສ຺ສ ອນນ຺ຕຣໍ ວີຖິຈິຕ຺ຕານິ ປວຕ຺ຕນ຺ຕິ. ຕເທວ ເອກນ຺ເຕນ ເຕສໍ ປວຕ຺ຕິມຸຂຕ຺ຕາ ມໂນທ຺ວາຣໍນາມ ໂຫຕິ. ນ ຕໂຕ ປຸຣິມານີຕິ ອຍມຕ຺ໂຖ ສິຍາ. ເອວຎ຺ຈສຕິ ເຍສຸ ຈກ຺ຂາທີສຸ ຣູປາ ທີນໍ ຆຏ຺ຏິຕຕ຺ຕາ ອາວຊ຺ຊນາທີນິ ວີຖິຈິຕ຺ຕານິ ປວຕ຺ຕນ຺ຕິ. ຕາເນວ ເອກນ຺ເຕນ ເຕສໍ ປວຕ຺ຕິມຸຂຕ຺ຕາ ທ຺ວາຣານິນາມ ໂຫນ຺ຕິ. ນ ຕໂຕ ອຎ຺ຎານີຕິ ອຍມຕ຺ໂຖ ອາປຊ຺ຊຕິ. ນຈ ຕານິ ຈກ຺ຂາທີນິ ນາມ ອຕ຺ຖິ. ຍານິ ຈກ຺ຂາທີນິ ທ຺ວາຣຣູປານິນາມ ນ ໂຫນ຺ຕີຕິ. ສພ຺ພເມຕໍ ອຸປຣິ ທ຺ວາຣ ສງ຺ຄເຫ ອາວິຠວິສ຺ສຕີຕິ. ຫສນໍ ຫສິຕໍ. ມຸຂສ຺ສ ປຫຏ຺ຐາກາຣປ຺ປວຕ຺ຕິ. ຕໍ ອຸປ຺ປາເທຕິ ຊເນຕີຕິ ຫສິຕຸປ຺ປາໂທ. ຕໍວາ ອຸປ຺ປາເທນ຺ຕິ ຂີຓາສວາ ເອເຕນາຕິ ຫສິຠຸປ຺ປາໂທ. ຕໍວາ ອຸປ຺ປຊ຺ຊຕິ ເອເຕນາຕິ ຫສິຕຸປ຺ປາໂທ. ໂສເອວ ຈິຕ຺ຕນ຺ຕິ ສມາໂສ. ຂີຓາສວານໍ ອໂນຬາຣິເກສຸ ອາຣມ຺ມເຓສຸ ເຍນ ຈິຕ຺ເຕນ ສິຕໍ ປາຕຸກໂຣນ຺ຕິ, ຕສ຺ເສຕໍ ນາມໍ. ນ ຫິ ຂີຓາສວາ ໂລກິຍ ມຫາ ຊນາວິຍ ຣຊ຺ຊນີຍາທິ ຠາເວນ ໂອຬາຣິເກສຸ ຫສນິຍ ວຕ຺ຖູສຸ ຫສນ຺ຕີຕິ. ຏີກາສຸ ປນ ຈິຕ຺ຕໍ ອເປກ຺ຂິຕ຺ວາ ຫສິຕຸປ຺ປາທນ຺ຕິ ນິທ຺ທິຏ຺ຐໍ ສິຍາຕິ. ວຸຕ຺ຕນເຍນ ອເຫຕຸການິຈ ຕານິ ວິປຈ຺ຈນ ວິປາກຸປ຺ປາທນ ກິຈ຺ຈຣຫິຕຕ຺ຕາ ຕໍ ຕໍ ກ຺ຣິຍາມຕ຺ຕຠູຕານິ ຈິຕ຺ຕານິຈາຕິ ອເຫຕຸກກ຺ຣິຍຈິຕ຺ຕານິ. ເອຕ຺ຖຈ ວີຖິມຸຕ຺ຕຈິຕ຺ຕານິ ກິຈ຺ຈທຸພ຺ພລຕ຺ຕາ ປຎ຺ຈວິຎ຺ຎາຓານິ ວຕ຺ຖຸທຸພ຺ພລຕ຺ຕາ ສມ຺ປຏິຈ຺ຉນາທີນິຈ ກິຈ຺ຈຏ຺ຐານທຸພ຺ພລຕ຺ຕາ ອຕ຺ຕໂນ ອຸສ຺ສາເຫນ ວິນາ ເກວລໍ ວິປຈ຺ຈນມຕ຺ເຕນ ປວຕ຺ຕນ຺ຕີຕິ ຕານິ ສພ຺ພານິ ວິປາການິເອວ ໂຫນ຺ຕິ. ຍານິປນ ພລວກິຈ຺ຈຕ຺ຕາ ອຕ຺ຕໂນ ອຸສ຺ສາເຫນ ປວຕ຺ຕນ຺ຕິ. ອາຍຕິໍຈ ວິປາກຸປ຺ປາທນຕ຺ຖໍ ອຸສ຺ສາຫສຫິຕານິ ໂຫນ຺ຕິ. ຕານິ ກຸສລາກຸສລານິນາມ ໂຫນ຺ຕິ. ຍານິ ປນ ຈິຕ຺ຕານິ ວິປຈ຺ຈນມຕ຺ຕໍ ອຕິກ຺ກມ຺ມ ອຕ຺ຕໂນ ອຸສ຺ສາເຫເນວ ປວຕ຺ຕນ຺ຕິ. ເຕສຸ ອາວຊ຺ຊນທ຺ວຍໍ ວິປາກສນ຺ຕານໂຕ ລທ຺ຘປຈ຺ຈຍຕ຺ຕາ ໂຖກໍ ທຸພ຺ພລຠາວໂຕ ອິຕຣານິຈ ນິຣານຸສຍສນ຺ຕາເນ ປວຕ຺ຕຕ຺ຕາ ສພ຺ພໂສ ວິປາກຸປ຺ປາທນຕ຺ຖໍ ອຸສ຺ສາຫຣຫິຕານິເອວ ໂຫນ຺ຕີຕິ ຕານິ ສພ຺ພານິ ກ຺ຣິຍານິນາມ ຊາຕານີຕິ ທຏ຺ຐພ຺ພໍ.

໓໖. ອິທານິ ອາທິໂຕ ປຏ຺ຐາຍ ເວທນາວິຈາຣຓາ ວຸຈ຺ຈຕິ. ຕຖາຫິ ຈກ຺ຂຸວິຎ຺ຎາຓາທີນໍ ຕາວ ວຕ຺ຖູນິຈ ອາຣມ຺ມຓານິຈ ອຸປາທາຣູປາເນວ ໂຫນ຺ຕິ, ອຸປາທາຣູປານຎ຺ຈ ວິຈຸປິຓ຺ຑການໍວິຍ ອຎ຺ຎມຎ຺ຎສງ຺ຆຏ຺ຏນໍ ທຸພ຺ພລເມວາຕິ ຕານິ ອິຏ຺ເຐ ອນິຏ຺ເຐຈ ອາຣມ຺ມເຓ ອຸເປກ຺ຂາ ສຫຄຕາເນວ ໂຫນ຺ຕີຕິ. ກາຍວິຎ຺ຎາຓສ຺ສປນ ອາຣມ຺ມຓານິ ມຫາຠູຕານິ ໂຫນ຺ຕີຕິ ຍຖາ ອຘິກຣຓິມຕ຺ຖເກ ຖປິຕໍ ປິຈຸປິຓ຺ຑກໍ ອໂຍກູເຏນ ປຫຣນ຺ຕານໍ ອໂຍກູຏສ຺ສ ປິຈຸປິຓ຺ຑກໍ ອຕິກ຺ກມ຺ມ ອຂິກຣຓິຆຏ຺ຏນໍ ພລວຕຣໍ ໂຫຕິ. ຕຖາ ເຕສໍ ອາຣມ຺ມຠູຕານໍ ກາຍວຕ຺ຖຸໍ ອຕິກ຺ກມ຺ມ ກາຍນິສ຺ສຍ ຠູເຕສຸ ສງ຺ຆຏ຺ຏນໍ ພລວຕຣໍ. ຕສ຺ມາ ກາຍວິຎ຺ຎາຓໍ ອິຏ຺ເຐ ສຸຂສຫຄຕໍ ອນິຏ຺ເຐ ທຸຂສຫຄຕໍ ໂຫຕີຕິ. ສມ຺ປຏິຈ຺ຉນຈິຕ຺ຕໍປນ ສພ຺ພທຸພ຺ພລານໍ ປຎ຺ຈວິຎ຺ຎາຓານໍ ອນນ຺ຕຣໍ ອຸປ຺ປຊ຺ຊຕີຕິ ນິຈ຺ຈໍ ທຸພ຺ພລໍ ຫຸຕ຺ວາ ສພ຺ພຕ຺ຖ ອຸເປກ຺ຂາສຫຄຕເມວາຕິ. ວິຠາວນິຍໍ ປນ ອສມານນິສ຺ສເຍ ຫິ ເຕຫິ ລທ຺ຘປຈ຺ຈຍຕາວເສນ ອຍມຕ຺ໂຖ ວິຠາວິໂຕ, ສນ຺ຕີຣຓໍປນ ສຍໍປິ ພລວວຕ຺ຖຸໍ ນິສ຺ສາຍ ປວຕ຺ຕຕິ. ຕາທິເສນຈ ພລວວຕ຺ຖຸນິສ຺ສເຍນ ປຸຣິມຈິຕ຺ເຕນ ລທ຺ຘປຈ຺ຈຍໍ ໂຫຕີຕິ ໂຖກໍ ພລວໍ ໂຫຕິ. ຕສ຺ມາ ຕໍ ກຸສລວິປາກໍ ອິຏ຺ເຐ ອຸເປກ຺ຂາສຫຄຕໍ ອຠິອິຏ຺ເຐ ໂສມນສ຺ສສຫຄຕໍ ໂຫຕິ. ອກຸສລວິປາກໍປນ ອນິຏ຺ເຐປິ ອຠິອນິຏ຺ເຐປິ ອຸເປກ຺ຂາສຫຄຕເມວ ໂຫຕິ. ກສ຺ມາ ອິຕິເຈ. ຍທິຫິ ຕໍ ອຕິອນິຏ຺ຐາຣມ຺ມຓວເສນ ເວທນາ ເຠທຍຸຕ຺ຕໍ ສິຍາ. ທຸກ຺ເຂນວາ ໂທມນສ຺ເສນວາ ຍຸຕ຺ຕໍ ສິຍາ. ຕຕ຺ຖ ທຸກ຺ເຂນ ຕາວ ນ ຍຸຊ຺ຊຕິ, ກສ຺ມາ, ເອກນ຺ຕກາຍິກຕ຺ຕາ ທຸກ຺ຂສ຺ສາຕິ. ໂທມນສ຺ເສນປິ ນ ຍຸຊ຺ຊຕິ. ກສ຺ມາ, ປຏິເຆນ ປຏິຫຎ຺ຎຕ຺ຕາເອວ ໂທມນສ຺ສຠາວໍ ປຕ຺ຕາ ໂທມນສ຺ສເວທນາ ປຏິເຆນ ວິນາ ນປ຺ປວຕ຺ຕຕີຕິ. ເອກນ຺ຕາກຸສລຠູເຕນ ປຏິເຆນ ນິຈ຺ຈໂຍຄິໂນ ໂທມນສ຺ສສ຺ສ ອພ຺ຍາກເຕສຸ ອສມ຺ຠວໂຕຕິ. ອາວຊ຺ຊນທ຺ວຍໍປນ ສນ຺ຕີຣຓໂຕປິ ໂຖກໍ ພລວໍ ໂຫຕິ. ວິປາການຎ຺ຫິ ປວຕ຺ຕິຕຸໍປິ ອຕ຺ຕໂນ ອຸສ຺ສາຫພລໍນາມ ນຕ຺ຖິ. ພລວນ຺ເຕຫິປນ ກມ຺ມາທິປຈ຺ຈເຍຫິ ຊາຕານິ ພລວນ຺ຕານິນາມ ໂຫນ຺ຕິ. ທຸພ຺ພເລຫິ ຊາຕານິ ທຸພ຺ພລານິ ນາມາຕິ. ເອວໍ ສນ຺ເຕປິ ຕໍ ອາວຊ຺ຊນທ຺ວຍໍ ກມ຺ມານຸຠາວໂຕຈ ມຸຈ຺ຈິຕ຺ວາ ວິປາກສນ຺ຕານໂຕຈ ປຈ຺ຈຍໍ ຄເຫຕ຺ວາ ອຸຏ຺ຐິຕຕ຺ຕາ ທຸພ຺ພລເມວ ໂຫຕີຕິ ສທາປິ ອຸເປກ຺ຂາສຫຄຕເມວາຕິ.

[໓໘] ວິຠາວນິຍໍ ປນ

ປຎ຺ຈທ຺ວາຣາວຊ຺ຊນໍ ປຸພ຺ເພ ເກນຈິ ອຄ຺ຄຫິເຕ ອາຣມ຺ມເຓ ເອກວາ ຣເມວ ປວຕ຺ຕຕ຺ຕາ ມໂນທ຺ວາຣາວຊ຺ຊນຎ຺ຈ ວິສທິສຈິຕ຺ຕສນ຺ຕານປຣາວຕ຺ຕນວເສນ ພ຺ຍາປາຣນ຺ຕຣສາເປກ຺ຂຕ຺ຕາ ອາຣມ຺ມຓຣສໍ ອຘິມຕ຺ຕໂຕ ອນຸຠວິຕຸໍ ນສກ຺ໂກຕີຕິ ສພ຺ພຕ຺ຖປິ ມຊ຺ຌຕ຺ຕ ເວທນາຍຸຕ຺ຕເມວາຕິ ວຸຕ຺ຕໍ. ຕຕ຺ຖ ພ຺ຍາປາຣນ຺ຕຣສາເປກ຺ຂຕ຺ຕາຕິ ອິທໍ ນ ຍຸຊ຺ຊຕິ.

ນ ຫິ ຈິຕ຺ຕານໍ ພລວທຸພ຺ພລຕາວິເສໂສອຕ຺ຕໂນປຈ຺ຉາ ປວຕ຺ຕສ຺ສ ຈິຕ຺ຕສ຺ສ ວເສນ ສກ຺ກາ ວຕ຺ຕຸໍ. ອຕ຺ຕໂນປນ ປຈ຺ຈເຍຫິເອວ ໂສ ສກ຺ກາ ວຕ຺ຕຸນ຺ຕິ. ອິຕຣຖາ ສນ຺ຕີຣຓສ຺ສປິ ພ຺ຍາປາຣນ຺ຕຣສາເປກ຺ຂຕາ ສິຍາ. ຕໍປິ ຫິ ວິສທິສຈິຕ຺ຕສນ຺ຕານໍ ອຕ຺ຕນາປຣໍ ວຕ຺ເຕຕິ ເຍວາຕິ.

໓໗. ອິມານິ ຈິຕ຺ຕານິ ອຕ຺ຕໂນ ປກຕິ ປຈ຺ຈຍຄຓສມາໂຍເຄ ສຕິ ນຸປ຺ປຊ຺ຊນ຺ຕີຕິ ນຕ຺ຖິ. ຕສ຺ມາ ອສງ຺ຂາຣິກາເນວາຕິ ວທນ຺ຕິ. ມູລຏີກາຍໍ ປນ ວິປາກຸທ຺ຘາເຣ –

ອເຫຕຸກວິປາການໍ ອປຣິພ຺ຍຕ຺ຕກິຈ຺ຈຕ຺ຕາ ສສງ຺ຂາຣິກ ກມ຺ມ ວິຣຸທ຺ໂຘ ອສງ຺ຂາຣິກຠາໂວປິ ນຕ຺ຖິ. ອສງ຺ຂາຣິກກມ຺ມວິຣຸທ຺ໂຘ ສສງ຺ຂາຣິກກາໂວປິ ນຕ຺ຖິ. ຕສ຺ມາ ເຕສໍ ອຸຠຍກມ຺ເມນປິ ອຸປ຺ປຕ຺ຕິ ເຖເຣນ ອນຸຎ຺ຎາຕາຕິ ວຸຕ຺ຕໍ.

ເອເຕນ ຕິຓ຺ຓໍ ກ຺ຣິຍຈິຕ຺ຕານໍປິ ຕທຸຠຍຠາວາຠາໂວ ວຸຕ຺ໂຕ ໂຫຕິ. ຕານິປິຫິ ອປຣິພ຺ຍຕ຺ຕກິຈ຺ຈານິເຍວາຕິ. ອຖວາ. ຣູປທສ຺ສ ນ ສທ຺ທສ຺ສວນາທີນິ ສຕ຺ຕາ ກທາຈິ ອຕ຺ຕໂນ ອິຈ຺ຉາຍ ກໂຣນ຺ຕິ. ກທາຈິ ປເຣຫິ ອຸສ຺ສາຫິຕາ ກໂຣນ຺ຕີຕິ ປຈ຺ຈກ຺ຂໂຕວ ສິທ຺ຘເມຕໍ. ຕຕ຺ຖ ຍທາ ອຕ຺ຕໂນ ອິຈ຺ຉາຍ ກໂຣນ຺ຕິ. ຕທາ ປຎ຺ຈທ຺ວາຣາວຊ຺ຊນາທີນິ ສພ຺ພານິ ວີຖິຈິຕ຺ຕານິ ອສງ຺ຂາຣິການິນາມ ໂຫນ຺ຕິ. ຍທາ ປເຣຫິ ອຸສ຺ສາຫິຕາ ກໂຣນ຺ຕິ. ຕທາ ສສງ຺ຂາຣິການິນາມ ໂຫນ຺ຕິ. ທ຺ວາຣ ວິມຸຕ຺ເຕສຸປນ ທ຺ວີສຸ ອຸເປກ຺ຂາສນ຺ຕີຣເຓສຸ ອຏ຺ຐມຫາວິປາເກສຸວິຍ ວຕ຺ຕພ຺ໂພ. ອິຕິ ສພ຺ພານິ ອເຫຕຸກຈິຕ຺ຕານິ ເຕນ ປຣິຍາເຍນ ສງ຺ຂາຣເຠເທນ ປຈ຺ເຈກໍ ຠິນ຺ນານິເອວ ໂຫນ຺ຕິ. ເອວໍ ສນ຺ເຕປິ ອປຣິ ພ຺ຍຕ຺ຕກິຈ຺ຈຕ຺ຕາເຍວ ເຕສໍ ສງ຺ຂາຣເຠໂທ ປາຬິຍໍ ນວຸຕ຺ໂຕຕິ ເວທິຕພ຺ໂພ.

໓໘. ຍສ຺ມາປນ ເຫຕຸໂຍນາມ ມຫນ຺ຕຘມ຺ມາ ໂຫນ຺ຕິ. ຕສ຺ມາ ເຕ ທຸພ຺ພລກມ຺ມນິພ຺ພຕ຺ເຕສຸ ທຸພ຺ພລວຕ຺ຖຸກິຈ຺ຈຏ຺ຐາເນສຸຈ ອິເມສຸ ຈິຕ຺ເຕສຸ ນຸປ຺ປຊ຺ຊນ຺ຕິ. ຕຕ຺ຖ ສພ຺ພໍ ປາປກມ຺ມໍ ວິກ຺ເຂປຍຸຕ຺ຕໍ ສຍໍປິ ຈຎ຺ຈລຕິ ທຸພ຺ພລໍ ໂຫຕິ. ຕສ຺ມາ ຕໍ ກປ຺ປຏ຺ຐິຕິກໍປິ ສມານໍ ກາລນ຺ຕເຣ ເຫຕຸຍຸຕ຺ຕໍ ວິປາກໍ ຊເນຕຸໍ ນສກ຺ໂກຕິ. ຕິເຫຕຸກກມ຺ມໍປິ ສມານໍ ທຸພ຺ພເລສຸ ຈກ຺ຂາທິວຕ຺ຖູສຸຈ ທສ຺ສນາທີສຸ ກິຈ຺ຈຏ຺ຐາເນສຸຈ ເຫຕຸຍຸຕ຺ຕໍ ວິປາກໍ ຊເນຕຸໍ ນສກ຺ໂກຕິ. ອາວຊ຺ຊນຫສນກິຈ຺ຈາ ນິຈ ທຸພ຺ພລກິຈ຺ຈານິເອວ ໂຫນ຺ຕິ. ຕສ຺ມາ ອິມານິ ສພ຺ພານິ ສມ຺ປຍຸຕ຺ຕເຫຕຸຣຫິຕານິ ຊາຕານີຕິ ທຏ຺ຐພ຺ພໍ.

໓໙. ສພ຺ພຖາປີຕິ ປທສ຺ສ ອຕ຺ໂຖ ເຫຏ຺ຐາ ວຸຕ຺ຕນເຍເນວ ເວທິຕພ຺ໂພ.

[໓໙] ວິຠາວນິຍໍ ປນ

ສພ຺ພຖາປີຕິ ອກຸສລວິປາກ ກຸສລວິປາກ ກ຺ຣິຍເຠເທ ນາຕິ ວຸຕ຺ຕໍ. ຕໍ ນ ສຸນ຺ທຣໍ.

ໂສຫິ ເຠໂທ ອິຈ຺ເຈວນ຺ຕິ ອິມິນາວ ຄຫິໂຕຕິ. ສງ຺ຄຫຄາຖາຍໍ ອກຸສລວິປາການິ ວຕ຺ຖຸກິຈ຺ຈເຠເທນ ສຕ຺ຕ, ປຸຎ຺ຎປາການິ ວຕ຺ຖຸກິຈ຺ຈເວທນາເຠເທນ ອຏ຺ຐຘາ, ກ຺ຣິຍຈິຕ຺ຕານິ ກິຈ຺ຈທ຺ວາຣເຠເທນ ຕີຓີຕິ ອເຫຕຸກຈິຕ຺ຕານິ ອຏ຺ຐາຣສ ໂຫນ຺ຕີຕິ ໂຍຊນາ. ເອຕ຺ຖຈ ປຸຎ຺ຎປາເກສຸ ເວທນາເຠໂທປິ ວຕ຺ຕພ຺ໂພ. ອິຕຣຖາ ສນ຺ຕີຣຓສ຺ສ ອເຠໂທ ສິຍາ. ຕຖາ ກ຺ຣິຍາສຸ ທ຺ວາຣເຠໂທປິ ວຕ຺ຕພ຺ໂພ. ອຎ຺ຎຖາ ອາວຊ຺ຊນສ຺ສ ອເຠໂທ ສິຍາຕິ. ຏີກາສຸປນ ໂສ ນ ວຸຕ຺ໂຕຕິ.

ອເຫຕຸກຈິຕ຺ຕສ຺ສ ປຣມຕ຺ຖທີປນາ.

໔໐. ອິທານິ ເຫຏ຺ຐາ ວຸຕ຺ຕານໍ ຈິຕ຺ຕານໍ ອໂສຠຓນາມໍ ອຸປຣິ ວຸຈ຺ຈມານານຎ຺ຈ ໂສຠຓນາມໍ ຖເປນ຺ໂຕ ຄາຖມາຫ. ອຸປຣິ ວຸຈ຺ຈມານານຎ຺ຫິ ໂສຠຓຕ຺ເຕ ວຸຕ຺ເຕ ເຫຏ຺ຐາ ວຸຕ຺ຕານໍ ອໂສຠຓຕາ ອວຸຕ຺ຕາປິ ສິທ຺ຘາ ໂຫຕີຕິ. ຕຕ຺ຖ ປາປາເຫຕຸກມຸຕ຺ຕານີຕິ ປາເປຫິ ອເຫຕຸເກຫິຈ ມຸຕ຺ຕານິ ເອກູນສຏ຺ຐິຈິຕ຺ຕານິ. ອຖວາ. ເອກນວຸຕິຈິຕ຺ຕານິປິ ໂສຠຓານີຕິ ວຸຈ຺ຈເຣ ວຸຈ຺ຈນ຺ຕີຕິ ໂຍຊນາ. ຕຕ຺ຖ ປາເປຫີຕິ ອກຸສເລຫິ. ອກຸສລານິຫິ ອຕ຺ຕສມງ຺ຄິໂນ ສຕ຺ເຕ ອນິຈ຺ຉນ຺ເຕເຍວ ອປາຍໍ ປາເປນ຺ຕິ. ຕສ຺ມາ ປາປານີຕິ ວຸຈ຺ຈນ຺ຕິ. ເອເຕນ ປຸຎ຺ຎານໍປິ ສຸຄຕິປາປນຏ຺ເຐນ ປາປຕາ ປສງ຺ໂຄ ນິວຕ຺ຕິໂຕ ໂຫຕິ. ນ ຫິ ອິຈ຺ຉນ຺ຕານໍ ປາປເນ ປາປນພ຺ຍາປາໂຣ ປາກໂຏ ໂຫຕີຕິ. ລາມກຏ຺ເຐນວາ ຕານິເຍວ ປາປານີຕິ ວຸຈ຺ຈນ຺ຕີຕິ. ໂສຠເຓຫິ ສທ຺ຘາທິຄຸຓຘມ຺ເມຫິ ຍຸຕ຺ຕິຍາ ຕໂຕເຍວ ຈ ສຍໍປິ ໂສຠຄ຺ຄປຕ຺ຕິຍາ ໂສຠຓານີຕິ.

໔໑. ອິທານິ ຕານິ ໂສຠຓານິ ຫີນ ປຓີຕາ ນຸກ຺ກເມນ ທສ຺ເສນ຺ໂຕ ໂສມນສ຺ສສຫຄຕນ຺ຕິອາທິມາຫ. ຕຕ຺ຖ ຊານາຕີຕິ ຎາຓໍ, ຍາຖາວໂຕ ປຏິວິຊ຺ຌຕີຕິ ອຕ຺ໂຖ. ຎາເຓນ ສມ຺ປຍຸຕ຺ຕໍ ວິປ຺ປຍຸຕ຺ຕນ຺ຕິ ສມາໂສ. ນຕ຺ຖິ ສງ຺ຂາໂຣ ອສ຺ສາຕິ ອສງ຺ຂາໂຣ. ສໍວິຊ຺ຊຕິ ສງ຺ຂາໂຣ ອສ຺ສາຕິ ສສງ຺ຂາໂຣ. ສປ຺ປຸຣິສຸປນິສ຺ສ ຍາທິໂກ ກຸສລຸປ຺ປຕ຺ຕິຍາ ປກຕິປຈ຺ຈຍຄໂຓ. ໂສຫິ ຍທາ ທຸວິເຘນ ສງ຺ຂາເຣນ ວິນາ ເກວລໍ ອຕ຺ຕໂນ ພເລນ ກຸສລຈິຕ຺ຕໍ ສມຸຏ຺ຐາເປຕິ. ຕທາ ອສງ຺ຂາໂຣນາມ. ໂສເຍວ ຍທາ ອຕ຺ຕໂນ ພເລນ ກຸສລຈິຕ຺ຕໍ ສມຸຏ຺ຐາເປຕຸໍ ນ ສກ຺ໂກຕິ. ສງ຺ຂາຣສຫາຍໍ ລຠິຕ຺ວາວ ຕໍ ສມຸຏ຺ຐາເປຕິ. ຕທາ ສສງ຺ຂາໂຣນາມ. ອສງ຺ຂາເຣນ ອຸປ຺ປນ຺ນໍ ອສງ຺ຂາຣິກໍ. ສສງ຺ຂາເຣນ ອຸປ຺ປນ຺ນໍ ສສງ຺ຂາຣິກນ຺ຕິ ສພ຺ພໍ ເຫຏ຺ຐາ ວຸຕ຺ຕເມວ. ເອຕ຺ຖຈ ໂສມນສ຺ສາທີນໍ ອຸປ຺ປຕ຺ຕິກາຣຓໍ ເຫຏ຺ຐາ ວຸຕ຺ຕເມວ. ອປິຈ ສທ຺ຘາສມ຺ປຕ຺ຕິ ທສ຺ສນສມ຺ປຕ຺ຕິ ເທຍ຺ຍຘມ຺ມ ປຏິຄ຺ຄາຫກ ສມ຺ປຕ຺ຕີຕິ ເອວມາທິ ໂສມນສ຺ສກາຣຓໍ, ຕພ຺ພິປຣີຕໍ ອຸເປກ຺ຂາກາຣຓໍ. ຍານິຈ ປີຕິສມ຺ໂພຊ຺ຌງ຺ຄສ຺ສ ອຸເປກ຺ຂາສມ຺ໂພຊ຺ຌງ຺ຄສ຺ສຈ ກາຣຓານິອຏ຺ຐກຖາສຸ ວຸຕ຺ຕານິ. ຕານິປິ ອິມສ຺ມິໍ ຐາເນ ວຕ຺ຕພ຺ພານີຕິ. ປຎ຺ຎາ ສໍວຕ຺ຕນິກ ກມ຺ມຸປນິສ຺ສຍຕາ, ອພ຺ຍາປຊ຺ຊໂລກຸປປຕ຺ຕິຕາ ອິນ຺ທ຺ຣິຍປຣິປາກຕາ, ກິເລສທູຣຕາຈ ຎາຓຸປ຺ປຕ຺ຕິຍາ ກາຣຓໍ. ຕິເຫຕຸກປຏິສນ຺ຘິກຕາ, ອໂມຫຊ຺ຌາສຍຕາ, ປຎ຺ຎວນ຺ຕປຸຄ຺ຄລເສວນາ. ສຸຕຈິນ຺ຕາປສຸຕາຕິປິວຕ຺ຕຸໍ ຍຸຊ຺ຊຕິ. ຍານິຈຘມ຺ມວິຈຍສມ຺ໂພຊ຺ຌງ຺ຄສ຺ສ ກາຣຓານິ ອຏ຺ຐກຖາສຸ ວຸຕ຺ຕານິ. ຕານິປິ ອິຘ ວຕ຺ຕພ຺ພານິ. ຕພ຺ພິປຣີຕໍ ຎາຓວິປ຺ປຍຸຕ຺ຕກາຣຓໍ. ສງ຺ຂາຣກາຣຓໍປິ ປຸພ຺ເພ ວຸຕ຺ຕເມວ. ຍານິຈ ວີຣິຍສມ຺ໂພຊ຺ຌງ຺ຄສ຺ສ ປສ຺ສທ຺ຘິສມ຺ໂພຊ຺ຌງ຺ຄສ຺ສຈ ກາຣຓານິ ອຏ຺ຐກຖາສຸ ວຸຕ຺ຕານິ. ຕານິປິ ອິຘ ວຕ຺ຕພ຺ພານີຕິ. ອິເມສໍປິ ອຸປ຺ປຕ຺ຕິ ວິຘານໍ ວິສຸທ຺ຘິມຄ຺ເຄ ຄເຫຕພ຺ພນ຺ຕິ.

໔໒. ອຏ຺ຐປີຕິ ເອຕ຺ຖ ປິສທ຺ໂທ ສມ຺ປິຓ຺ຑນຕ຺ໂຖ. ເຕນ ອິເມສໍ ອິຘ ວຸຕ຺ຕປ຺ປກາຣໂຕ ອຎ຺ເຎຫິ ປກາເຣຫິ ອເນກວິຘຕໍ ສມ຺ປິຓ຺ເຑຕິ. ຕຕ຺ຣາຍໍ ນໂຍ. ອິມານິ ອຏ຺ຐຈິຕ຺ຕານິ ທສຫິ ປຸຎ຺ຎກ຺ຣິຍາວຕ຺ຖູຫິ ຄຸຓິຕານິ ອສີຕິ ໂຫນ຺ຕິ. ປຸນ ຕານິ ຉຫິ ອາຣມ຺ມເຓຫິ ຄຸຓິຕານິ ຈຕ຺ຕາຣິສຕານິເຈວ ອສີຕິ ຈ ໂຫນ຺ຕິ. ປຸນ ຕານິ ຕີຫິ ກມ຺ເມຫິ ຄຸຓິຕານິ ສຫສ຺ສໍ ຈຕ຺ຕາຣິ ສຕານິ ຈຕ຺ຕາລີສໍຈ ໂຫນ຺ຕິ. ປຸນ ຕານິ ຕີຫິ ຫີນມຊ຺ຌິມປຓີເຕຫິ ຄຸຓິຕານິ ຈຕ຺ຕາຣິ ສຫສ຺ສານິ ຕີຓິ ສຕານິ ວີສຕິຈ ໂຫນ຺ຕິ. ຕານິ ອິມານິ ສຸທ຺ຘິການີຕິ ກຕ຺ວາ ທ຺ວີສຸ ຐາເນສຸ ຖເປຕພ຺ພານິ. ຕໂຕ ເອກໍ ຐານໍ ຄເຫຕ຺ວາ ທ຺ວິຘາ ກໂຣນ຺ຕສ຺ສ ຎາຓສມ຺ປຍຸຕ຺ຕານິ ທ຺ເວສຫສ຺ສານິ ສຕໍ ສຏ຺ຐິຈ ໂຫນ຺ຕິ. ຕຖາ ຎາຓວິປ຺ປຍຸຕ຺ຕານີຕິ. ປຸນ ຕຕ຺ຖ ຎາຓສມ຺ປຍຸຕ຺ຕານິ ຈຕູຫິ ອຘິປຕີຫິ ຄຸຓິຕານິ ອຏ຺ຐສຫສ຺ສານິ ຉສຕານິ ຈຕ຺ຕາລີສໍຈ ໂຫນ຺ຕິ. ຎາຓວິປ຺ປຍຸຕ຺ຕານິປນ ວີມໍສາວຊ຺ຊິເຕຫິ ຕີຫິ ອຘິປຕີຫິ ຄຸຓິຕານິ ຉສຫສ຺ສານິ ຈຕ຺ຕາຣິສຕານິ ອສີຕິຈ ໂຫນ຺ຕິ. ປຸນ ຕທຸຠຍານິ ສມ຺ປິຓ຺ຑິຕານິ ທສສຫສ຺ສໍ ປຎ຺ຈສຫສ຺ສານິ ສຕໍ ວີສຕິຈ ໂຫນ຺ຕິ. ປຸນ ຕານິ ປຸພ຺ເພ ວິສຸໍ ຖປິເຕຫິ ສຸທ຺ຘິເກຫິ ສມ຺ປິຓ຺ຑິຕານິ ທສສຫສ຺ສໍ ນວສຫສ຺ສານິ ຈຕ຺ຕາຣິ ສຕານິ ຈຕ຺ຕາລີສຎ຺ຈ ໂຫນ຺ຕີຕິ. ຍໍປນ ຏີກາຍໍ ອິຘ ວຸຕ຺ຕນເຍນ ສຸທ຺ຘິການິຈ ຎາຓວິປ຺ປຍຸຕ຺ຕານິ ຈ ວິສຸໍ ອກຕ຺ວາ ສພ຺ພານິ ປຸຎ຺ຎກ຺ຣິຍາທີຫິ ສມໍ ຄຸຓິຕານິ ສຕ຺ຕຣສ ສຫສ຺ສານິ ທ຺ເວ ສຕານິ ອສີຕິຈ ໂຫນ຺ຕີຕິ ວຸຕ຺ຕໍ.

[໔໐] ຍຎ຺ຈ ວິຠາວນິຍໍ

ສຸທ຺ຘິການິ ວິສຸໍ ອກຕ຺ວາ ຎາຓວິປ຺ປຍຸຕ຺ຕານິເອວ ວິສຸໍ ກຕ຺ວາ ຕຖາ ຄຸຓິຕານິ ວີສ ສຕາຘິກ ປນ຺ນຣສ ສຫສ຺ສານິ ໂຫນ຺ຕີຕິ ວຸຕ຺ຕໍ. ຕໍ ສພ຺ພໍ ນ ຍຸຕ຺ຕໍ.

ເອວຎ຺ຫິ ສຕິ ອິມານິ ກາມາວຈຣກຸສລານິ ນິຈ຺ຈໍ ສາຘິປຕິການິ ຫຸຕ຺ວາ ນິຍຕາຘິປຕິການິນາມ ຠເວຍ຺ຍຸໍ. ນຈ ອິມານິ ອຸປຣິ ມຫຄ຺ຄຕ ກຸສລານິ ວິຍ ໂລກຸຕ຺ຕຣານິ ວິຍ ຈ ນິຍຕາ ຘິປຕິການິ ໂຫນ຺ຕີຕິ. ຏີການເຍນປນ ຎາຓວິປ຺ປຍຸຕ຺ຕານິປິ ວີມໍສາສຫຄຕານີຕິ ອາປຊ຺ຊຕີຕິ. ຍຖາວາ ໂກສລ຺ລສມ຺ຠູຕຏ຺ເຐນ ກຸສລາຕິເອຕ຺ຖ ຎາຓວິປ຺ປຍຸຕ຺ຕານິປິ ໂກສລ຺ເລນ ນານາວຊ຺ຊນວີຖິຍໍ ປວຕ຺ເຕນ ອຸປນິສ຺ສຍຎາເຓນ ສມ຺ຠູຕຕ຺ຕາ ກຸສລານິ ເອວ ນາມ ໂຫນ຺ຕິ. ເອວມິຘປິ ຕານິ ເຕເນວ ວີມໍສາຘິປຕິຠູເຕນ ສມ຺ຠູຕຕ຺ຕາ ວີມໍສາຘິປເຕຍ຺ຍານິປິ ນາມ ໂຫນ຺ຕີຕິ ນ ນສກ຺ກາ ວຕ຺ຕຸນ຺ຕິ ອິມິນາ ອຘິປ຺ປາເຍນ ຕານິ ວິສຸໍ ອກຕານິ ສິຍຸນ຺ຕິ. ເອວໍສນ຺ເຕປິ ກາມກຸສລານິນາມ ອຘິປຕິວິມຸຕ຺ຕານິ ເອວ ພຫຸຕຣານິ ໂຫນ຺ຕິ. ຕສ຺ມາ ນສກ຺ກາ ສພ຺ພານິ ກາມກຸສລານິ ວີມໍສາຘິປຕິມູລິການິ ຠວິຕຸນ຺ຕິ.

໔໓. ກາມາວຈຣານິຈ ຕານິ ກຸສລານິ ຈິຕ຺ຕານິຈາຕິ ວິຄ຺ຄໂຫ. ຕຕ຺ຖ ເກນຏ຺ເຐນ ກຸສລານີຕິ. ອາໂຣຄ຺ຍຏ຺ເຐນ, ສຸນ຺ທຣຏ຺ເຐນ, ເຉກຏ຺ເຐນ, ອນວຊ຺ຊຏ຺ເຏນ, ສຸຂວິປາກຏ຺ເຐນຈາຕິ. ຣາຄາທໂຍຫິ ຘມ຺ມາ ຈິຕ຺ຕສນ຺ຕານສ຺ສ ຣຸຊ຺ຊນຏ຺ເຐນ ໂຣຄານາມ. ອຫິຕຏ຺ເຐນ ອສຸນ຺ທຣາ ນາມ. ອນິປຸຓຏ຺ເຐນ ອເຉການາມ. ຄາຣຍ຺ຫຏ຺ເຐນ ວຊ຺ຊານາມ. ອນິຏ຺ຐ ວິປາກຏ຺ເຐນ ທຸກ຺ຂວິປາການາມ ໂຫນ຺ຕິ. ອິມານິປນ ເຕຫິ ວຸຏ຺ຐິຕຕ຺ຕາ ກຸສລານິນາມ ອໂຣຄານິ ນາມາຕິ ອຕ຺ໂຖ. ຕປ຺ປຏິປກ຺ຂຕ຺ຕາຈ ສຸນ຺ທຣານິ ເຉການິ ອນວຊ຺ຊານິ ສຸຂວິປາການິ ຈ ນາມ ໂຫນ຺ຕີຕິ. ກຸຈ຺ຉິເຕ ປາປຘມ຺ເມ ສລຍນ຺ຕິ ຈາເລນ຺ຕິ ກມ຺ເປນ຺ຕິ ວິທ຺ຘໍເສນ຺ຕີຕິ ກຸສລານິ. ກຸຈ຺ຉິເຕນວາ ອາກາເຣນ ສຕ຺ຕສນ຺ຕາເນ ເສນ຺ຕິ ອນຸເສນ຺ຕີຕິ ກຸສາ. ຣາຄາທໂຍ. ເຕ ລຸນນ຺ຕິ ຉິນ຺ທນ຺ຕີຕິ ກຸສລານິ. ກຸສໍວາ ວຸຈ຺ຈຕິ ຎາຓໍ ກຸຈ຺ຉິຕານໍ ສານຏ຺ເຐນ ຕນຸກຣຓຏ຺ເຐນ ອນ຺ຕກຣຓຏ຺ເຐນວາ. ກຸເສນ ລາຕພ຺ພານີຕິ ກຸສລານິ. ກຸສາວິຍ ຫຕ຺ຖປ຺ປເທສໍ ສໍກິເລສປກ຺ຂໍ ລຸນນ຺ຕີຕິວາ ກຸສລານິ. ອປິຈ, ກຸຈ຺ຉິເຕ ປາປຘມ຺ເມ ສຣນ຺ຕິ ຫິໍສນ຺ຕີຕິ ກຸສລານິ. ຣກາຣສ຺ສ ລກາໂຣ. ໂກສລ຺ລສມ຺ຠູຕຏ຺ເຐນວາ ກຸສລານີຕິ.

໔໔. ມຫາວິປາເກສຸ ປທຕ຺ຖໂຕ ວຕ຺ຕພ຺ພໍ ນຕ຺ຖິ. ເວທນາເຠໂທ ອາຣມ຺ມຓວເສນ ວຕ຺ຕພ຺ໂພ. ຕານິຫິ ອຕິອິຏ຺ເຐ ອິຏ຺ຐມຊ຺ຌຕ຺ເຕ ຈ ອາຣມ຺ມເຓ ຍຖາກ຺ກມໍ ໂສມນສ຺ເສນ ອຸເປກ຺ຂາຍ ຈ ຍຸຕ຺ຕານີຕິ. ສມ຺ປໂຍຄເຠໂທ ກມ຺ມວເສນ ຊວນວເສນຈ ວຕ຺ຕພ຺ໂພ. ຕານິຫິ ພລວກມ຺ເມນ ຊນິຕານິ ຎາຓສມ຺ປຍຸຕ຺ຕານິ ໂຫນ຺ຕິ. ທຸພ຺ພລກມ຺ເມນ ຊນິຕານິ ຎາຓວິປ຺ປຍຸຕ຺ຕານິ. ກທາຈິປນ ຕທາຣມ຺ມຓວເສນ ປວຕ຺ຕິກາເລ ເຍຠຸຍ຺ເຍນ ຕິເຫຕຸກຊວນານຸພນ຺ຘານິ ຎາຓສມ຺ປຍຸຕ຺ຕານິ ໂຫນ຺ຕິ. ອິຕຣຊວນານຸພນ຺ຘານິ ຎາຓວິປ຺ປຍຸຕ຺ຕານີຕິ. ສງ຺ຂາຣເຠໂທປິ ເກຫິຈິ ອາຈຣິເຍຫິ ກມ຺ມວເສເນວ ກຖິໂຕ. ອສງ຺ຂາຣິກກມ຺ມຊນິຕານິ ອສງ຺ຂາຣິການິ. ສສງ຺ຂາຣິກກມ຺ມຊນິຕານິ ສສງ຺ຂາຣິການີຕິ. ສງ຺ຄຫກາເຣນປນ ສນ຺ນິຫິຕປຈ຺ຈຍວເສນ ວຸຕ຺ໂຕ. ຕານິຫິ ປຏິສນ຺ຘິຍໍ ປຸຣິມຠເວ ມຣຓາສນ຺ນກາເລ ຎາຕກາທີຫິ ເຕນ ເຕນ ປໂຍເຄນ ອຸປຏ຺ຐາປິຕານິ ກມ຺ມາທີນິ ອາຣມ຺ມຓານິ ຄເຫຕ຺ວາ ປວຕ຺ຕານິ ສສງ຺ຂາຣິການິນາມ ໂຫນ຺ຕິ. ຕາທິເສນ ປໂຍເຄນ ວິນາ ສຍເມວ ກມ຺ມພເລນ ອຸປຏ຺ຐິຕານິ ຄເຫຕ຺ວາ ປວຕ຺ຕານິ ອສງ຺ຂາຣິການິນາມ ໂຫນ຺ຕິ. ຕທາຣມ຺ມຓ ກາເລປນ ອສງ຺ຂາຣິກຊວນານຸພນ຺ຘານິ ອສງ຺ຂາຣິການິນາມ. ສສງ຺ຂາຣິກ ຊວນານຸພນ຺ຘານິ ສສງ຺ຂາຣິການິ ນາມາຕິ. ເອຕ຺ຖປິ ສມ຺ປິຓ຺ຑນຕ຺ໂຖ ວິສທ຺ໂທ. ເຕນ ອາຣມ຺ມຓຉກ຺ກ ຫີນຕ຺ຕິກວເສເນວ ກາລເທສ ສນ຺ຕານາທິວເສນຈ ເຕສໍ ອເນກເຠທຕ຺ຕໍ ສມ຺ປິຓ຺ເຑຕິ. ຍສ຺ມາ ປເນຕານິ ທານາທິວເສນ ກາຍກມ຺ມາທິວເສນ ຉນ຺ທາທີນິ ຘຸຣໍ ກຕ຺ວາ ຈ ນ ປວຕ຺ຕນ຺ຕິ. ຕສ຺ມາ ຕານິ ປຸຎ຺ຎກ຺ຣິຍາວຕ຺ຖູນໍ ກມ຺ມາຘິປຕີນຎ຺ຈ ວເສນ ວຑ຺ຒນໍ ນລຠນ຺ຕີຕິ.

[໔໑] ວິຠາວນິຍໍ ປນ

ອິມານິ ວິຎ຺ຎຕ຺ຕິສມຸຏ຺ຐາປນາຠາວໂຕ ກມ຺ມທ຺ວາຣ ວເສນ ນ ປວຕ຺ຕນ຺ຕິ. ອວິປາກສຠາວໂຕຈ ກມ຺ມວເສນ ນປວຕ຺ຕນ຺ຕີຕິ ວຸຕ຺ຕໍ. ຕໍ ວິຈາເຣຕພ຺ພໍ.

ເຫຏ຺ຐາຫິ ກຸສເລສຸ ກມ຺ມຕ຺ຕິກວເສເນວ ວຑ຺ຒນໍ ວຸຕ຺ຕໍ. ນປນ ວິສຸໍ ກມ຺ມທ຺ວາຣວເສນ. ກມ຺ມຕ຺ຕິກຎ຺ຈນາມ ຕິວິຘ ກມ຺ມທ຺ວາຣ ວເສເນວ ສິທ຺ຘນ຺ຕິ. ນນຸ ອຏ຺ຐກຖາຍໍ ໂຍຫິ ກາມາວຈຣກຸສເລສຸ ກມ຺ມທ຺ວາຣ ກມ຺ມປຖ ປຸຎ຺ຎກ຺ຣິຍາວຕ຺ຖຸເຠໂທ ວຸຕ຺ໂຕ. ໂສ ອິຘ ນຕ຺ຖິ. ກສ຺ມາ. ອວິຎ຺ຎຕ຺ຕິຊນກໂຕ ອວິປາກ ຘມ຺ມໂຕ ຕຖາ ອປ຺ປວຕ຺ຕິຍາຈາຕິ ວຸຕ຺ຕນ຺ຕິ. ສຈ຺ຈໍ. ຕຕ຺ຖ ປນ ອວິຎ຺ຎຕ຺ຕິຊນກໂຕ ກມ຺ມທ຺ວາຣ ເຠໂທ ອິຘ ນຕ຺ຖີຕິ ເອເຕນ ກາຍກມ຺ມໍ ວຈີກມ຺ມໍ ມໂນກມ຺ມນ຺ຕິ ເອວໍ ເຠທສ຺ສ ອຠາວໍ ວທຕິ. ອວິປາກຘມ຺ມໂຕ ກມ຺ມປຖເຠໂທ ອິຘ ນຕ຺ຖີຕິ ເອເຕນ ທສວິຘສ຺ສ ກມ຺ມປຖເຠທສ຺ສ ອຠາວໍ ວທຕິ. ອິຘປນ ກຸສເລສຸປິ ກມ຺ມປຖເຠທໍ ອຄ຺ຄເຫຕ຺ວາ ຕິວິຘກມ຺ມທ຺ວາຣ ເຠທຠິນ຺ນໍ ກມ຺ມຕ຺ຕິກເມວ ຄຫິຕໍ. ຕຎ຺ຈ ວິຎ຺ຎຕ຺ຕິ ສມຸຏ຺ຐາປນາ ຠາວໂຕ ຕິວິຘກມ຺ມທ຺ວາຣວເສນ ນປວຕ຺ຕນ຺ຕີຕິ ອິມິນາວ ສິທ຺ຘໍ. ຍທິຈ ເຫຏ຺ຐາ ກຸສເລສຸປິ ທສວິຘກມ຺ມປຖເຠທວເສນ ວິສຸໍ ວຑ຺ຒນໍ ວຸຕ຺ຕໍ ສິຍາ. ເອວໍສຕິ ອິຘປິ ອວິປາກສຠາວໂຕ ກມ຺ມປຖວເສນ ນປວຕ຺ຕນ຺ຕີຕິ ອິທໍ ວຕ຺ຕພ຺ພເມວາຕິ.

໔໕. ມຫາກ຺ຣິຍຈິຕ຺ເຕສຸປິ ມຫາວິປາເກສຸວິຍ ອາຣມ຺ມຓ ວເສເນວ ເວເທນາເຠໂທ ອຸປຣິ ສຍເມວ ວກ຺ຂຕິ. ຎາຓສມ຺ປຍຸຕ຺ຕ, ວິປ຺ປຍຸຕ຺ຕ, ອສງ຺ຂາຣິກ, ສສງ຺ຂາຣິກເຠໂທປນ ຍຖາຣຫໍ ກຸສເລສຸ ວຸຕ຺ຕນເຍນ ເວທິຕພ຺ໂພ.

[໔໒] ວິຠາວນິຍໍ ປນ

ຕຖາ ອວິຈາເຣຕ຺ວາ ກ຺ຣິຍຈິຕ຺ຕານໍປິ ກຸສເລ ວຸຕ຺ຕນເຍນ ຍຖາຣຫໍ ໂສມນສ຺ສ ສຫຄຕາທິຕາ ເວທິຕພ຺ພາຕິ ວຸຕ຺ຕໍ. ຕໍ ນ ຍຸຊ຺ຊຕິ.

ອິຈ຺ເຈວໍ ສພ຺ພຖາປີຕິ ປທານໍ ອຕ຺ໂຖ ເຫຏ຺ຐາ ວຸຕ຺ໂຕເຍວ. ສເຫຕຸກ ກາມາວຈຣ ກຸສລ ວິປາກ ກ຺ຣິຍ ຈິຕ຺ຕານີຕິ ເອຕ຺ຖ ສເຫຕຸ ກຄ຺ຄຫຓໍ ກຸສລ ສທ຺ທ ສມ຺ພນ຺ເຘ ຠູຕກຖນ ວິເສສນໍ. ເຕເນວຫິ ຕໍ ກຸສລຈິຕ຺ຕານໍ ຈູຬນິຄເມນ ຄຫິຕໍ. ວິປາກ ກ຺ຣິຍ ສທ຺ທສມ຺ພນ຺ເຘປນ ພ຺ຍວຈ຺ເຉທກວິເສສນໍ ທຏ຺ຐພ຺ພໍ.

[໔໓] ວິຠາວນິຍໍ ປນ

ສກ຺ຂຣກຖລິກໍປິ ມຈ຺ຉຄຸມ຺ພໍປິ ຕິຏ຺ຐນ຺ຕໍປິ ຈຣນ຺ຕໍປິ ປສ຺ສຕີຕິ ສຸຕ຺ຕປເທ ວິຍ ອິຘ ຍຖາລາຠ ໂຍຊນາຕິ ວຸຕ຺ຕໍ. ຕໍ ນ ສເມຕິ. ຕຕ຺ຖຫິ ສກ຺ຂຣກຖລິກໍນາມ ນຈຣຕີຕິ ຍຸຕ຺ຕໍ. ອິຘປນ ກຸສລໍ ສເຫຕຸກໍ ນໂຫຕີຕິ ນຍຸຕ຺ຕເມຕນ຺ຕິ.

໔໖. ສງ຺ຄຫຄາຖາຍໍ ເວທນາ ຎາຓ ສງ຺ຂາຣ ເຠເທນາຕິ ເວທນາເຠເທນ, ຎາຓເຠເທນ, ສງ຺ຂາຣເຠເທນຈ. ຕຕ຺ຖ ເວທນາ ເຠເທນາຕິ ເວທນາເຠທສິທ຺ເຘນ ຈິຕ຺ຕເຠເທນ, ຎາຓເຠເທນາຕິ ຎາຓໂຍຄາ ໂຍຄສິທ຺ເຘນຈິຕ຺ຕເຠເທນ. ສງ຺ຂາຣເຠເທນາຕິ ສງ຺ຂາເຣນ ວິນາ ສຫຈ ປວຕ຺ຕປຈ຺ຈຍຄຓເຠທສິທ຺ເຘນ ຈິຕ຺ຕເຠເທນາຕິ ອຕ຺ໂຖ. ອິທຎ຺ຫິ ສມາສປທານໍ ສາມຕ຺ຖິຍໍ, ຍທິທໍ ສຸວິຎ຺ຎາຕານໍ ນານາປ຺ປກາຣານໍ ປທຕ຺ຖານໍ ອປ຺ປເກນ ພ຺ຍຎ຺ຊເນນ ທີປນສມຕ຺ຖຕາຕິ.

[໔໔] ເອເຕນ ວິຠາວນິຍໍ

ສຍໍ ອຠິນ຺ນານໍ ຎາຓສງ຺ຂາຣານໍ ເຠທວຈເນ ຈິຕ຺ຕສ຺ສ ເຠທກຣ ຠາເວ ຈ ໂຈທນາຍ ອໂນກາສຕາ ສາຘິຕາ ໂຫຕີຕິ.

ຕຕ຺ຣາຍໍ ໂຍຊນາ. ສເຫຕຸ ກາມາວຈຣ ປຸຎ຺ຎປາກກ຺ຣິຍາ ເວທນາຎາຓສງ຺ຂາຣເຠເທນ ຍຖາກ຺ກມໍ ຉຈ ທ຺ວາທສຈ ຈຕຸວີສຕິ ຈ ມຕາຕິ. ເອຕ຺ຖຈ –

ເວທນາຎາຓສງ຺ຂາຣ, ເຠເທເນຕານິ ອຏ຺ຐຘາ;

ປຸຎ຺ຎປາກກ຺ຣິຍາເຠທາ, ຈຕຸວີສຕິວິຘາ ມກາ ຕິປິ.

ວຕ຺ຕພ຺ພາ. ເອວຎ຺ຫິ ສຕິ ອຕ຺ຖຄຕິຈ ວິສທາ ໂຫຕິ. ອຸປຣິ ວກ຺ຂ, ມານາຫິຈ ສງ຺ຄຫຄາຖາຫິ ສທ຺ຘິໍ ສເມຕີຕິ.

໔໗. ກາເມຕິອາທິ ສພ຺ເພສໍ ກາມຈິຕ຺ຕານໍ ສງ຺ຄຫຄາຖາ. ຕຕ຺ຖ ກາເມ ກາມຠູມິຍໍ ປາການິ ສເຫຕຸກາເຫຕຸກວເສນ ສພ຺ພານິ ວິປາກຈິຕ຺ຕານິ ເຕວີສ. ປຸຎ຺ຎາປຸຎ຺ຎານິ ກຸສລາກຸສລຈິຕ຺ຕານິຈ ວີສຕິ. ກ຺ຣິຍາຈ ສເຫຕຸກາເຫຕຸກວເສນ ສພ຺ພານິ ກ຺ຣິຍຈິຕ຺ຕານິ ປນ ເອກາທສ ໂຫນ຺ຕິ. ອິຈ຺ເຈວໍ ສພ຺ພຖາປິ ຈຕຸປ຺ປຎ຺ຎາສ ໂຫນ຺ຕີຕິ ໂຍຊນາ. ສພ຺ພຖາຕິ ເຈຕ຺ຖ ວິສທ຺ໂທ ລຸຕ຺ຕ ນິທ຺ທິຏ຺ໂຐ. ຘມ຺ມສງ຺ຄຓິຍໍ ວຸຕ຺ເຕນ ສພ຺ພປ຺ປກາເຣນປິ ຈຕຸປ຺ປຎ຺ຎາສເອວ. ວິຠງ຺ເຄ ວິຠຕ຺ເຕນ ສພ຺ພປ຺ປກາເຣນປິ ຈຕຸປ຺ປຎ຺ຎາສ ເອວາຕິອາທິນາ ຕສ຺ສ ອຕ຺ໂຖ ເຫຏ຺ຐາ ວຸຕ຺ໂຕເຍວາຕິ.

[໔໕] ເອເຕນ ວິຠາວນິຍໍ

ອິຘ ວຸຕ຺ຕານໍ ກຸສລາທີນໍ ອນ຺ໂຕຄຘເຠທວເສນ ຕສ຺ສ ອຕ຺ຖວິຠາວນາ ປຏິສິທ຺ຘາ ໂຫຕິ.

[໔໖] ຍຎ຺ຈ ວິຠາວນິຍໍ

ກາເມ ຠເວຕິ ວຸຕ຺ຕໍ. ຕໍປິ ວິຈາເຣຕພ຺ພໍ.

ຠວສທ຺ໂທ ຫິ ກຸສລາກຸສລກມ຺ເມສຸ ກມ຺ມນິພ຺ພຕ຺ເຕສຸຈ ວິປາກ ກຏຕ຺ຕາຣູເປສຸ ວຕ຺ຕມາໂນ ອຠິຘມ຺ເມ ທິຏ຺ໂຐ. ນ ຕທຎ຺ເຎສຸ ນາມຣູປຘມ຺ເມສູຖິ. ຠູມິປຣິຍາໂຍຈ ອິຘ ກາມສທ຺ໂທ. ຠູມີຕິຈ ສໂຫກາໂສ ອິນ຺ທ຺ຣິຍາ ນິນ຺ທ຺ຣິຍພທ຺ຘຘມ຺ມສມູໂຫ ວຸຈ຺ຈຕີຕິ ກາເມ ກາມຠູມິຍນ຺ຕິ ອຍມຕ຺ໂຖ ທຏ຺ຐພ຺ໂພ. ຠໂວຕິວາ ຠູມິເອວ ວຸຈ຺ຈຕິ ສຸຕ຺ຕນ຺ຕປຣິຍາເຍນ ຠວນ຺ຕິ ເອຕ຺ຖ ສຕ຺ຕາ ສງ຺ຂາຣາຈາຕິ ກຕ຺ວາ. ເອສນໂຍ ປຣຕ຺ຖປີຕິ.

ອິຕິ ປຣມຕ຺ຖທີປນິຍານາມ ອຠິຘມ຺ມຕ຺ຖສງ຺ຄຫສ຺ສ

ຈຕຸຕ຺ຖວຓ຺ຓນາຍ ກາມຈິຕ຺ຕສ຺ສ

ປຣມຕ຺ຖທີປນາ ນິຏ຺ຐິຕາ.

໔໘. ເອວໍ ກາມຈິຕ຺ຕສງ຺ຄຫໍ ທສ຺ເສຕ຺ວາ ອິທານິ ຍຖານຸປ຺ປຕ຺ຕໍ ຣູປຈິຕ຺ຕສງ຺ຄຫໍ ທສ຺ເສນ຺ໂຕ ວິຕກ຺ກວິຈາຣປີຕິສຸເຂກຄ຺ຄຕາສຫິຕນ຺ຕິອາທິມາຫ. ວິຕກ຺ໂກຈ ວິຈາໂຣຈ ປີຕິຈ ສຸຂຎ຺ຈ ເອກຄ຺ຄຕາຈາຕິ ທ຺ວນ຺ໂທ. ຕາຫິ ສຫິຕນ຺ຕິ ສມາໂສ. ວິຕກ຺ກວິຈາຣປີຕິສຸເຂ ກຄ຺ຄຕາ ສງ຺ຂາເຕນສມຸທິເຕນປຖມຊ຺ຌາເນນ ສມ຺ປຍຸຕ຺ຕໍກຸສລຈິຕ຺ຕໍ ປຖມຊ຺ຌານກຸສລຈິຕ຺ຕໍ. ຕຕ຺ຖ ເກນຏ຺ເຐນປຖມໍ, ເກນຏ຺ເຐນຈ ຌານນ຺ຕິ. ອາທິໂຕ ປຏິປຊ຺ຊິຕພ຺ພຕ຺ຕາ ປຖມໍ. ກສິຓາທິກສ຺ສ ອາຣມ຺ມຓສ຺ສ ອນິຈ຺ຈາທິລກ຺ຂຓສ຺ສຈ ອຸປນິຊ຺ຌາຍນໂຕ ປຈ຺ຈນີກຘມ຺ມານຎ຺ຈ ຌາປນໂຕ ທຍ຺ຫນໂຕ ຌານໍ. ອິເມສຸ ທ຺ວີສຸ ອຕ຺ເຖສຸ ເອກຄ຺ຄຕາເອວ ສາຕິ ສຍຍຸຕ຺ຕາຕິ ທຏ຺ຐພ຺ພາ. ສາຫິ ເອກຕ຺ຕາຣມ຺ມຓສງ຺ຂາໂຕ ເອໂກ ອຄ຺ໂຄໂກຏິໂກຏ຺ຐາໂສວາ ອສ຺ສາຕິ ອຕ຺ເຖນ ເອກຄ຺ຄສງ຺ຂາຕສ຺ສ ຈິຕ຺ຕສ຺ສ ຕຖາປວຕ຺ຕເນ ອາຘິປຈ຺ຈຄຸຓໂຍເຄນ ເອກຄ຺ຄຕາຕິ ຈ ວຸຈ຺ຈຕິ. ສາເຍວ ຈິຕ຺ຕໍ ນານາຣມ຺ມເຓສຸ ວິກ຺ຂິປິຕຸໍ ອທຕ຺ວາ ເອກສ຺ມິໍ ເຍວາຣມ຺ມເຓ ປຏິປກ຺ຂຘມ຺ມານໍ ທູຣີຠາເວນ ສມ຺ມາຈ ອາຘິຍຕິ ຖເປຕິ. ອິນ຺ທ຺ຣິຍານຎ຺ຈ ສມຠາວໍ ກຕ຺ວາ ຕຕ຺ເຖວ ລີນຸທ຺ຘຈ຺ຈາຠາວາປາທເນນ ສມຎ຺ຈ ອາຘິຍຕິ ຖເປຕີຕິ ອຕ຺ເຖນ ສມາຘີຕິຈ ວຸຈ຺ຈຕິ. ສາເຍວຈ ປາຬິຍໍ ອວິກ຺ເຂໂປ ອວິສາຫາໂຣ ສຓ຺ຐິຕິ ອວຏ຺ຐິຕີຕິ ນິທ຺ທິຏ຺ຐາຕິ. ວິຕກ຺ກາທໂຍປິ ປນ ຕສ຺ສາ ສາຕິສຍໍ ອຸປກາຣກຕ຺ຕາ ຌານນ຺ເຕວ ວຸຕ຺ຕາ. ຕຖາ ຫິ ວິຕກ຺ໂກ ຕາວ ຈິຕ຺ຕໍ ຖິນມິທ຺ຘວເສນ ໂອສກ຺ກິຕຸໍ ອທຕ຺ວາ ທຬ຺ຫໍ ອາຣມ຺ມຓາຠິມຸຂເມວ ກໂຣຕິ. ອາຣມ຺ມຓາຠິນິໂຣປນ ລກ຺ຂໂຓຫິ ວິຕກ຺ໂກ. ຖິນ ມິທ຺ຘນີວຣຓສ຺ສຈ ອຸຊຸປ຺ປຏິປກ຺ໂຂຕິ. ວິຈາໂຣຈ ນໍ ວິຈິກິຈ຺ຉາວເສນ ສໍສປ຺ປິຕຸໍ ອທຕ຺ວາ ທຬ຺ຫໍ ອາຣມ຺ມຓານຸພນ຺ຘເມວ ກໂຣຕິ. ອາຣມ຺ມຓານຸມຊ຺ຊນລກ຺ຂໂຓ ຫິ ວິຈາໂຣ ປຎ຺ຎາປກຕິໂກ. ວິຈິກິຈ຺ຉານີວຣຓສ຺ສຈ ອຸຊຸປ຺ປຏິປກ຺ໂຂຕິ. ປີຕິຈ ຈິຕ຺ຕໍ ພ຺ຍາປາທວເສນ ອຸກ຺ກຓ຺ຐິຕຸໍ ອທຕ຺ວາ ອາຣມ຺ມເຓ ປຣິຕຸຏ຺ຐເມວ ກໂຣຕິ. ອາຣມ຺ມຓສໍປິ ຍາຍນລກ຺ຂຓາ ຫິ ປີຕິ. ພ຺ຍາປາທນີວຣຓສ຺ສຈ ອຸຊຸປ຺ປຏິປກ຺ຂາຕິ. ຕຖາ ສຸຂຎ຺ຈ ນໍ ອຸທ຺ຘຈ຺ຈ ກຸກ຺ກຸຈ຺ຈວເສນ ອວູປສມິຕຸໍ ອທຕ຺ວາ ອາຣມ຺ມເຓ ລທ຺ຘສາຕໍ ອຸປພ຺ຣູຫິຕໍ ກໂຣຕິ. ສາກລກ຺ຂຓຎ຺ຫິ ສຸຂໍ, ອຸທ຺ຘຈ຺ຈກຸກ຺ກຸຈ຺ຈນີວຣຓສ຺ສຈ ອຸຊຸປ຺ປຏິປກ຺ຂນ຺ຕິ.

ອຸເປກ຺ຂາຈ ສນ຺ຕສຠາວຕ຺ຕາ ສຸເຂເອວ ສງ຺ຄຫິຕາຕິ. ເອວໍ ກໂຣນ຺ຕາຈ ເຕ ຘມ຺ມາ ຕສ຺ມິໍ ອາຣມ຺ມເຓ ຕສ຺ສ ຈິຕ຺ຕສ຺ສ ສຸຏ຺ຐຸ ເອກຄ຺ຄຠາວຕ຺ຖາຍຈ ໂຫນ຺ຕິ. ເອກຄ຺ຄຠາໂວຕິຈ ເອກຄ຺ຄຕາເຍວ. ສາຈ ເອກຄ຺ຄຕາ ເຕຫິ ຘມ຺ເມຫິ ຕຖາ ອນຸຄ຺ຄຫິຕາ ສຸຏ຺ຐຸ ພລວຕີ ຫຸຕ຺ວາ ສຍໍ ກາມຈ຺ຉນ຺ທວເສນ ນານາຣມ຺ມເຓສຸ ຈິຕ຺ຕວິຘາວນໍ ນີວາເຣຕ຺ວາ ກສິຓນິມິຕ຺ຕາທິເກ ຕສ຺ມິໍ ອາຣມ຺ມເຓ ນິຈ຺ຈລໍ ຐຕ຺ວາ ຕໍອາຣມ຺ມຓໍ ອຸປຄນ຺ຕ຺ວາ ນິຊ຺ຌາຍຕິ ໂອໂລເກຕິ. ຕສ຺ມາ ເຕ ສພ຺ເພປິ ຘມ຺ມາ ອຸປນິຊ຺ຌາຍນຏ຺ເຐນປິ ຌານນ຺ຕິ ວຸຕ຺ຕາຕິ. ເຕສຸຈ ຕຖາ ປວຕ຺ຕມາເນສຸ ຕປ຺ປຈ຺ຈນີກາ ນີວຣຓຘມ຺ມາ ໂອກາສໍ ອລຠິຕ຺ວາ ມນສ຺ມິໍປິ ປຣິຍຸຏ຺ຐິຕຸໍ ນສກ຺ໂກນ຺ຕິ. ຌາປິຕານາມ ໂຫນ຺ຕິ. ຕສ຺ມາ ເຕ ປຈ຺ຈນີກຊ຺ຌາປນຏ຺ເຐນປິ ຌານນ຺ຕິ ວຸຕ຺ຕາຕິ. ເອວໍ ສນ຺ເຕປິ ຍສ຺ມາ ຌານ ມຄ຺ຄ ສມ຺ໂພຘິສງ຺ຂາເຕສຸ ຕີສຸ ຐາເນສຸ ຘມ຺ມສາມຄ຺ຄີ ປຘານໍ ໂຫຕິ. ອງ຺ຄານໍ ສມຄ຺ຄຠາເວເອວ ອປ຺ປນາປຕ຺ຕິວເສນ ອຸປນິຊ຺ຌາຍ ນາທິ ກິຈ຺ຈສໍສິທ຺ຘິໂຕ. ຍສ຺ມາຈ ເອເຕ ຘມ຺ມາ ວຸຕ຺ຕນເຍນ ວິສຸໍວິສຸໍ ອຕ຺ຕໂນ ກິຈ຺ຈໍ ກໂຣນ຺ຕາປິ ຈິຕ຺ຕສ຺ສ ອາຣມ຺ມເຓ ນິຈ຺ຈລປ຺ປວຕ຺ຕິ ສງ຺ຂາຕໍ ເອກເມວ ອຸປນິຊ຺ຌານກິຈ຺ຈໍ ສາເຘນ຺ຕິ. ຕສ຺ມາ ຣຖງ຺ຄານໍ ສມຸທາເຍເອວ ຣຖໂວຫາໂຣວິຍ ເຕສໍ ສມຸທາເຍເອວ ຌານ ໂວຫາໂຣ ສິທ຺ໂຘຕິ ເວທິຕພ຺ໂພ. ອປເຣປນ ປຎ຺ຈນ຺ນໍປິ ເຕສໍ ອາຣມ຺ມຓາຠິນິໂຣປນາທີນິ ຍຖາສກໍ ກິຈ຺ຈານິເຍວ ວິສຸໍ ວິສຸໍ ອຸປນິຊ຺ຌານກິຈ຺ຈານິນາມ ໂຫນ຺ຕີຕິ ປຏ຺ຐາເນ ຌານປຈ຺ຈຍໍ ປຕ຺ວາ ສພ຺ເພເປເຕ ວິສຸໍ ວິສຸໍ ຌານປຈ຺ຈຍໍ ສາເຘນ຺ຕິເຍວ. ຕສ຺ມາ ເຕ ວິສຸໍ ວິສຸໍປິ ຌານານິເຍວ ໂຫນ຺ຕີຕິ ສກ຺ກາ ວຕ຺ຕຸໍ. ຍຖາຈ ປຎ຺ຈງ຺ຄິກໍ ສີລໍ ທສງ຺ຄິກໍ ສີລນ຺ຕິ ເອຕ຺ຖ ປຎ຺ຈສມຸທິຕາທີນິ ເຕສໍ ສີລານໍ ປຎ຺ຈງ຺ຄິກາ ທິນາມລາຠສ຺ເສວ ກາຣຓານິ ໂຫນ຺ຕິ. ນ ສີລຠາວສ຺ສ. ນ ຫິ ປາຓາຕິປາຕາ ເວຣມຓາທິກໍ ເອກໍປິ ສມານໍ ສີລໍນາມ ນ ໂຫຕີຕິ. ເອວເມວໍ ອິຘປິ ປຎ຺ຈສມຸທິຕາທີນິ ປຎ຺ຈງ຺ຄິກາທິ ຠາວສ຺ເສວ ປຖມຊ຺ຌານາທິ ຠາວສ຺ເສວຈ ກາຣຓານິ. ນປນ ຌານຠາວສ຺ສາຕິ ນສກ຺ກາ ວິຎ຺ຎາຕຸໍ. ອິຕຣຖາ ຌານປຈ຺ຈເຍ ຌານງ຺ຄານິ ປຈ຺ຈນິຍານິເຍວ ສິຍຸນ຺ຕິປິ ວທນ຺ຕິ. ເອຕ຺ຕາວຕາ ສຕິປິ ອິມສ຺ສ ຈິຕ຺ຕສ຺ສ ຜສ຺ສາທີຫິປິ ສຫິຕຠາເວ ເຕສໍ ຕຖາວິຘກິຈ຺ຈວິເສສາຠາວາ ອິຘ ອຄ຺ຄຫຓນ຺ຕິປິ ສິທ຺ຘໍ ນໂຫຕີຕິ. ວິຈາຣປີຕິສຸເຂກຄ຺ຄຕາ ສງ຺ຂາເຕນ ທຸຕີຍຊ຺ຌາເນນ ສມ຺ປຍຸຕ຺ຕໍ ກຸສລຈິຕ຺ຕໍ ທຸຕີຍຊ຺ຌານ ກຸສລຈິຕ຺ຕໍ, ເອວໍ ເສເສສຸປິ.

໔໙. ເອຕ຺ຖ ສິຍາ. ເກນປນ ອິເມສໍ ຌານານໍ ອງ຺ຄເຠໂທ ກໂຕຕິ. ປຸຄ຺ຄລຊ຺ຌາສເຍນ ກໂຕຕິ. ໂຍຫິ ວິຕກ຺ກສຫາໂຍ ຫຸຕ຺ວາ ປຎ຺ຈງ຺ຄິກໍ ປຖມຊ຺ຌານໍ ອຸປ຺ປາເທຕ຺ວາ ຕຕ຺ຖ ວສີຠາວໍ ກຕ຺ວາ ປຸນວິຕກ຺ເກ ນິພ຺ພິນ຺ທຕິ. ຕສ຺ສ ວິຕກ຺ກໍ ສມຕິກ຺ກມິຕ຺ວາ ອວິຕກ຺ກໍ ຈຕຸຣງ຺ຄິກໍ ຌານໍ ອຘິຄນ຺ຕຸໍ ອຊ຺ຌາສໂຍ ສຓ຺ຐາຕິ. ຕທາ ໂສ ຕເມວ ປຖມຊ຺ຌານໍ ປາທກຠາວຕ຺ຖາຍ ທຬ຺ຫໍ ສມາປຊ຺ຊິຕ຺ວາ ວຸຏ຺ຐາຍ ເຕນ ອຊ຺ຌາສເຍນ ສເຫວ ປຸນຠາວນໍ ອນຸຍຸຎ຺ຊນ຺ໂຕ ອວິຕກ຺ກໍ ຈຕຸຣງ຺ຄິກໍ ຌານໍ ອຘິຄຈ຺ຉຕິ. ຕຕ຺ຖ ສາ ຠາວນາສຍໍ ວິຕກ຺ກຍຸຕ຺ຕາປິ ເຕນ ອຊ຺ຌາສເຍນ ປຣິຠາວິຕຕ຺ຕາ ວິຕກ຺ກວິຣາຄ ຠາວນານາມ ໂຫຕິ. ຕສ຺ສາ ຠາວນາຍ. ພເລນ ຕໍ ຌານໍ ອຸປ຺ປຊ຺ຊ ມານໍ ອວິຕກ຺ກໍ ຈຕຸຣງ຺ຄິກໍ ອຸປ຺ປຊ຺ຊຕິ. ເສສຊ຺ຌານາຘິຄເມສຸປິ ເອເສວນໂຍຕິ. ເອວໍ ປຸຄ຺ຄລຊ຺ຌາສເຍນ ເຕສໍ ຌານານໍ ອງ຺ຄເຠໂທ ກໂຕຕິ ເວທິຕພ຺ໂພ. ເອຕ຺ຖຈ ອຸຕ຺ຕຣຸຕ຺ຕຣຊ຺ຌານາ ຘິຄມເນ ປາທກຠາວຕ຺ຖາຍ ປຸຣິມປຸຣິມຊ຺ຌານສ຺ສ ສມາປຊ຺ຊນໍ ອວສ຺ສໍ ອິຈ຺ຉິຕພ຺ພໍ. ເຫຏ຺ຐິມໍ ເຫຏ຺ຐິມໍ ປຄຸຓຊ຺ຌານໍ ອຸປຣິມສ຺ສ ອຸປຣິມສ຺ສ ປທຏ຺ຐານໍ ໂຫຕີຕິ ອຏ຺ຐກຖາຍໍ ວຸຕ຺ຕໍ. ອຊ຺ຌາສຍພເລນປນ ອຸຕ຺ຕຣຊ຺ຌານໍ ອຸປ຺ປຊ຺ຊມານໍ ປາທກຊ຺ຌານສທິສໍ ນໂຫຕິ. ປາທກຊ຺ຌານໂຕຫິ ປຸຄ຺ຄລຊ຺ຌາສໂຍວ ພລວຕໂຣ. ເຕນາຫ ຠຄວາ ອິຊ຺ຌຕິ ຠິກ຺ຂເວ ສີລວໂຕ ເຈໂຕປຓິຘິ ວິສຸທ຺ຘຕ຺ຕາຕິ. ອຍຎ຺ຈ ອຕ຺ໂຖ ອຸປຣິ ໂລກຸຕ຺ຕຣຈິຕ຺ຕໍ ປຕ຺ວາ ອາວິ ຠວິສ຺ສຕີຕິ.

໕໐. ເອຕ຺ຖ ສິຍາ. ກສ຺ມາ ອິຘ ສງ຺ຂາຣເຠໂທ ນວຸຕ຺ໂຕຕິ. ປາຬິຍເມວ ອວຸຕ຺ຕຕ຺ຕາ. ກສ຺ມາຈ ໂສ ປາຬິຍໍ ອວຸຕ຺ໂຕຕິ. ປຏິປທາ ເຠທວຈເນເນວ ສິທ຺ຘຕ຺ຕາຕິ. ຕຖາຫິ ສພ຺ເພສໍປິ ໂລກິຍ ໂລກຸຕ຺ຕຣຊ຺ຌານານໍ ສຸຂປ຺ປຏິປທຠາເວ ສິທ຺ເຘ ອສງ຺ຂາຣິກຠາໂວ ສິທ຺ໂຘເຍວ ໂຫຕິ. ທຸກ຺ຂປ຺ປຏິປທຠາເວຈ ສິທ຺ເຘ ເຕສໍ ສສງ຺ຂາຣິກຠາໂວ ສິທ຺ໂຘເຍວ ໂຫຕີຕິ. ກຖໍ ວິຎ຺ຎາຍຕີຕິ ເຈ. ອຏ຺ຐກຖາທສ຺ສນໂຕ. ວຸຕ຺ຕຎ຺ເຫຕໍ ອຏ຺ຐສາລິນິຍໍ -

ໂຍ ອາທິໂຕ ກິເລເສ ວິກ຺ຂມ຺ເຠນ຺ໂຕ ທຸກ຺ເຂນ ສສງ຺ຂາເຣນ ສປ຺ປໂຍເຄນ ກິລມນ຺ໂຕ ວິກ຺ຂມ຺ເຠຕິ. ຕສ຺ສ ທຸກ຺ຂາ ປຏິປທາ ໂຫຕິ. ໂຍ ກິເລເສ ວິກ຺ຂມ຺ເຠນ຺ໂຕ ສຸເຂນ ອກິລມນ຺ໂຕ ວິກ຺ຂມ຺ເຠຕິ. ຕສ຺ສ ສຸຂາປຏິປທາ ໂຫຕີຕິ.

ຕຖາ ສມ຺ໂມຫວິໂນທນີ ວິສຸທ຺ຘິມຄ຺ເຄສຸປີຕິ. ເອຕ຺ຖຈ ປຸພ຺ພວາກ຺ເຍ ທຸກ຺ເຂນ ສສງ຺ຂາເຣນ ສປ຺ປໂຍເຄນາຕິ ທິຏ຺ຐຕ຺ຕາ ປຣວາກ຺ເຍປິ ສຸເຂ ນ ອສງ຺ຂາເຣນ ອປ຺ປໂຍເຄນາຕິ ທິຏ຺ຐເມວ ໂຫຕິ. ຕຕ຺ຖ ສສງ຺ຂາເຣນ ສປ຺ປໂຍເຄນາຕິ ສງ຺ຂາຣປ຺ປໂຍຄສຫິເຕນ ກາມາທີນວທສ຺ສນາທິນາ ປຈ຺ຈຍຄເຓນາຕິ ອຕ຺ໂຖ. ເອເຕນ ສພ຺ເພສໍ ທຸກ຺ຂປ຺ປຏິປທຊ຺ຌານານໍ ສສງ຺ຂາຣິກຠາໂວ ວຸຕ຺ໂຕ ໂຫຕິ. ອສງ຺ຂາເຣນ ອປ຺ປໂຍເຄນາຕິ ສງ຺ຂາຣປ຺ປໂຍຄຣຫິເຕນ ເຕເນວ ປຈ຺ຈຍຄເຓນ. ເອເຕນ ສພ຺ເພສໍ ສຸຂປ຺ປຏິປທຊ຺ຌານານໍ ອສງ຺ຂາຣິກຠາໂວ ວຸຕ຺ໂຕ ໂຫຕີຕິ. ຂິປ຺ປາຠິຎ຺ຎຊ຺ຌານານໍປິຫິ ທຸກ຺ຂປ຺ປຏິປທຠາເວ ສຕິ ສສງ຺ຂາຣິກຕາວ ວິຎ຺ຎາຍຕິ. ທນ຺ຘຠິຎ຺ຎຊ຺ຌານານໍປິ ສຸຂປ຺ປຏິປທຠາເວ ສຕິ ອສງ຺ຂາຣິກຕາວ ວິຎ຺ຎາຍຕີຕິ. ຍທິເອວໍ ປຏິປທາຣຫິຕານໍ ມຄ຺ຄ ສິທ຺ຘອຸປປຕ຺ຕິສິທ຺ຘຊ຺ຌານານໍ ກຖໍ ສງ຺ຂາຣເຠໂທ ສິທ຺ໂຘຕິ. ເຕສໍປິ ວຬຎ຺ຊນກາເລ ສມາປຕ຺ຕິປ຺ປຏິພນ຺ຘການໍ ປຈ຺ຈຍານໍ ສນ຺ນິຫິຕາ ສນ຺ນິຫິຕວເສນ ທຸກ຺ຂສຸຂປ຺ປຏິປທຠາວສມ຺ຠໂວ ໂຫຕິເຍວາຕິ. ຕຕ຺ຖ ມຄ຺ຄສິທ຺ຘຊ຺ຌານໍນາມ ສຸທ຺ຘວິປສ຺ສນາຍານິການໍ ມຄ຺ຄປ຺ປຏິລາເຠນ ສເຫວ ສິທ຺ຘຊ຺ຌານໍ. ຕໍ ທຸວິຘໍ ເຫຏ຺ຐິມມຄ຺ຄສິທ຺ຘໍ, ອຣຫຕ຺ຕມຄ຺ຄສິທ຺ຘນ຺ຕິ. ຕຕ຺ຖ ມຫາສມຍສຸຕ຺ເຕ ອາຄຕານໍ ປຎ຺ຈສຕານໍ ຠິກ຺ຂູນໍ ຌານໍ ເຫຏ຺ຐິມ ມຄ຺ຄສິທ຺ຘໍ. ອານນ຺ທຕ຺ເຖຣສ຺ສ ຌານໍ ອຣຫຕ຺ຕມຄ຺ຄສິທ຺ຘໍ. ຍໍປິ ອນາຄາມີນໍ ອຊານນ຺ຕານຎ຺ເຎວ ສຕ຺ເຖນ ຫນິຕ຺ວາ ສຫສາ ມຣນ຺ຕານໍ ອຸປ຺ປນ຺ນໍ. ຕໍປິ ມຄ຺ຄສິທ຺ຘຄຕິກໍ. ໂຍປນ ອຏ຺ຐສມາປຕ຺ຕິໂຍ ຠາເວຕ຺ວາ ອຎ຺ຎຕຣສ຺ມິໍ ຣູປິ ພ຺ຣຫ຺ມໂລເກ ນິພ຺ພຕ຺ຕິ. ຕສ຺ສ ຕາ ສມາປຕ຺ຕິ ໂຍ ຕຕ຺ຖ ປາກຕິກາເອວ ໂຫນ຺ຕິ. ອິທໍ ອຸປປຕ຺ຕິສິທ຺ຘນ຺ຕິ. ເອກສ຺ມິໍ ຠເວປິ ຫິ ລທ຺ຘຊ຺ຌານານິ ວຬຎ຺ຊນກາເລ ສນ຺ນິຫິຕປຈ຺ຈຍວເສນ ນານາປຏິປທາຍຸຕ຺ຕານິ ໂຫນ຺ຕີຕິ. ຌານຸປ຺ປຕ຺ຕິປ຺ປຏິປທາ ຣຫິຕຕ຺ຕາວາ ອສງ຺ຂາຣິກຊ຺ຌາເນສຸ ເຕສໍ ສງ຺ຄໂຫ ຍຸຕ຺ໂຕ ສິຍາຕິ. ອປິຈ, ເນຕ຺ຕິປາຬິຍໍ ສພ຺ເພສໍ ໂລກິຍ ໂລກຸຕ຺ຕຣສມາຘີນໍ ສງ຺ຂາຣເຠໂທ ສຣູປໂຕວ ນິທ຺ທິຏ຺ໂຐ. ຍຖາຫ-ທ຺ເວ ສມາຘໂຍ ສສງ຺ຂາໂຣ ສມາຘິ ອສງ຺ຂາໂຣ ສມາຘີຕິ. ອຏ຺ຐກຖາຍຎ຺ຈ ສຸຂປ຺ປຏິປທາ ປຸພ຺ພການໍ ທ຺ວິນ຺ນໍ ທນ຺ຘາຠິຎ຺ຎຂິປ຺ປາຠິຎ຺ຎສມາຘີນໍ ອສງ຺ຂາຣຠາໂວ ທຸກ຺ຂປ຺ປຏິປທາ ປຸພ຺ພການໍ ທ຺ວິນ຺ນໍ ສສງ຺ຂາຣຠາໂວຈ ວຸຕ຺ໂຕຕິ. ເອຕ຺ຕາວຕາ ສພ຺ເພສໍ ມຫຄ຺ຄຕໂລກຸຕ຺ຕຣຊ຺ຌານຈິຕ຺ຕານໍ ອສງ຺ຂາຣິກ ສສງ຺ຂາຣິກວເສນ ວິສຸໍ ວິສຸໍ ທຸວິຘຠາໂວ ສິທ຺ໂຘ ໂຫຕິ. ຍສ຺ມາປນ ອຍໍ ສງ຺ຂາຣໂວຫາໂຣ ອກຸສລານໍປິ ສາຘາຣໂຓ. ປຏິປທາໂວຫາໂຣປນ ວິເສເສນ ປຏິປຕ຺ຕິຘມ຺ເມສ຺ເວວ ປາກໂຏ. ມຫຄ຺ຄຕ ໂລກຸຕ຺ຕຣຘມ຺ມາຈ ເອກນ຺ຕໍ ປຏິປຕ຺ຕິຘມ຺ມາເອວ. ຕສ຺ມາ ເຕສໍ ເຠທໍ ສງ຺ຂາຣວເສນ ອວຕ຺ວາ ປຏິປທາວເສເນວ ຘມ຺ມສງ຺ຄຓິ ປາຬິຍໍປິ ວຸຕ຺ໂຕຕິ ທຏ຺ຐພ຺ໂພ. ອຍເມຕ຺ຖ ປຣມຕ຺ຖທີປນາ.

໕໑. [໔໗] ຍໍປນ ວິຠາວນິຍໍ

‘‘ສພ຺ພສ຺ສປິ ຌານສ຺ສ ປຣິກມ຺ມສງ຺ຂາຕປຸພ຺ພາຠິສງ຺ຂາເຣນ ວິນາ ເກວລໍ ອຘິກາຣວເສນ ອນຸປ຺ປຊ຺ຊນໂຕ ອສງ຺ຂາຣິກນ຺ຕິປິ. ອຘິກາເຣນຈ ວິນາ ເກວລໍ ປຣິກມ຺ມາຠິສງ຺ກາຣວເສເນວ ອນຸປ຺ປຊ຺ຊນໂຕ ສສງ຺ຂາຣິກນ຺ຕິປິ ນສກ຺ກາ ວຕ຺ຕຸ’’ນ຺ຕິ ວຸຕ຺ຕໍ. ຕຕ຺ຖ ປຣິກມ຺ມສງ຺ຂາຕ.ລ. ອສງ຺ຂາຣິກນ຺ຕິປິ ນສກ຺ກາ ວຕ຺ຕຸນ຺ຕິ ອິທໍ ຕາວ ນຍຸຊ຺ຊຕິ.

ນ ຫິ ປຣິກມ຺ມສງ຺ຂາຕ ປຸພ຺ພາຠິສງ຺ຂາໂຣ ອິມສ຺ມິໍ ສງ຺ຂາຣເຠເທ ສງ຺ຂາໂຣ ເອວນາມ ໂຫຕິ. ກສ຺ມາ, ຌານຸປ຺ປຕ຺ຕິຍາ ປກຕິປຈ຺ຈຍ ຠູຕຕ຺ຕາ, ຕຖາຫິ ໂລເກ ສາສເນຈ ສພ຺ພໍປິ ກຸສລາກຸສລ ກມ຺ມໍ ອຕ຺ຕໂນ ອນຸຣູເປນ ປຣິກມ຺ມສງ຺ຂາຕ ປຸພ຺ພາຠິສງ຺ຂາເຣນ ວິນາ ອຸປ຺ປນ຺ນໍນາມ ນຕ຺ຖິ. ອນ຺ຕມໂສ ອາໂລປຠິກ຺ຂາທານມຕ຺ຕໍປີຕິ. ຍຎ຺ຈ ຈິຕ຺ຕໍ ເຍນ ອຕ຺ຕໂນ ອນຸຣູເປນ ປຣິກມ຺ມສງ຺ຂາຕປຸພ຺ພາ ຠິສງ຺ຂາເຣນ ວິນາ ນ ອຸປ຺ປຊ຺ຊຕິ. ໂສ ຕສ຺ສ ຈິຕ຺ຕສ຺ສ ປກຕິປຈ຺ຈຍຄເຓເອວອນ຺ໂຕ ຄໂຘ ໂຫຕິ. ຌານານິຈ ໂລກິຍ ໂລກຸຕ຺ຕຣ ຠູຕານິ ສພ຺ພານິ ອຕ຺ຕໂນ ອນຸຣູເປນ ປຣິກມ຺ມສງ຺ຂາຕ ປຸພ຺ພຠາຄຠາວນາ ຠິສງ຺ຂາເຣນ ວິນາ ອຸປ຺ປນ຺ນານິນາມ ນຕ຺ຖີຕິ ໂສ ເຕສໍ ປກຕິປຈ຺ຈຍຄເຓສຸເອວ ອນ຺ໂຕຄໂຘ ໂຫຕີຕິ. ອິຕຣຖາ ສພ຺ພໍປິ ກຸສລາກຸສລ ກມ຺ມໍ ອສງ຺ຂາຣິກໍ ນາມນຕ຺ຖີຕິ ອາປຊ຺ຊຕີຕິ.

[໔໘] ຍຎ຺ຈ ຕຕ຺ຖ