ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ນມກ຺ກາຣປາຬິ

໑. ສຸຄຕໍ ສຸຄຕໍ ເສຏ຺ຐໍ, ກຸສລໍກຸສລໍ ຊຫໍ;

ອມຕໍ ອມຕໍ ສນ຺ຕໍ, ອສມໍ ອສມໍ ທທໍ.

ສຣຓໍ ສຣຓໍ ໂລກໍ, ອຣຓໍ ອຣຓໍ ກຣໍ;

ອຠຍໍ ອຠຍໍ ຐານໍ, ນາຍກໍ ນາຍກໍ ນເມ.

໒. ນຍນສຸຠຄກາຍງ຺ຄໍ,

ມຘຸຣວຣສໂຣເປຕໍ;

ອມິຕຄຸຓຄຓາຘາຣໍ,

ທສພລມຕຸລໍ ວນ຺ເທ.

໓. ໂຍ ພຸທ຺ໂຘ ຘິຕິມາຎ຺ຎຘາຣໂກ,

ສໍສາເຣ ອນຸໂຠສິ ກາຍິກໍ;

ທຸກ຺ຂໍ ເຈຕສິກຎ຺ຈ ໂລກໂຕ,

ຕໍ ວນ຺ເທ ນຣເທວມງ຺ຄລໍ.

໔. ພາຕ຺ຕິໍສຕິລກ຺ຂຓຈິຕ຺ຣເທຫໍ,

ເທຫຊ຺ຊຸຕິນິຄ຺ຄຕປຊ຺ຊລນ຺ຕໍ;

ປຎ຺ຎາຘິຕິສີລຄຸໂຓຆວິນ຺ທໍ,

ວນ຺ເທ ມຸນິມນ຺ຕິມຊາຕິຍຸຕ຺ຕໍ.

໕. ປາໂຕທຍໍ ພາລທິວາກຣໍວ,

ມຊ຺ເຌ ຍຕີນໍ ລລິຕໍ ສິຣີຫິ;

ປຸຓ຺ຓິນ຺ທຸສງ຺ກາສມຸຂໍ ອເນຊໍ,

ວນ຺ທາມິ ສພ຺ພຎ຺ຎຸມຫໍ ມຸນິນ຺ທໍ.

໖. ອຸເປຕປຸຎ຺ໂຎ ວຣໂພຘິມູເລ,

ສເສນມາຣໍ ສຸຄໂຕ ຊິນິຕ຺ວາ;

ອໂພຊ຺ຌິ ໂພຘິໍ ອຣຸໂຓທຍມ຺ຫິ,

ນມາມິ ຕໍ ມາຣຊິນໍ ອຠງ຺ຄໍ.

໗. ຣາຄາທິເຉທາມລຎາຓຂຄ຺ຄໍ,

ສຕີສມຎ຺ຎາຜລກາຠິຄາຫໍ;

ສີໂລຆລງ຺ກາຣວິຠູສິຕໍ ຕໍ,

ນມາມິຠິຎ຺ຎາວຣມິທ຺ຘຸເປຕໍ.

໘. ທຍາລຍໍ ສພ຺ພຘິ ທຸກ຺ກຣໍ ກຣໍ,

ຠວຓ຺ຓວາຕິກ຺ກມມຄ຺ຄຕໍ ຄຕໍ;

ຕິໂລກນາຖໍ ສຸສມາຫິຕໍ ຫິຕໍ,

ສມນ຺ຕຈກ຺ຂຸໍ ປຓມາມິ ຕໍມິຕໍ.

໙. ຕຫິໍ ຕຫິໍ ປາຣມິສຎ຺ຈຍໍ ຈຍໍ,

ຄຕໍ ຄຕໍ ສພ຺ຠິ ສຸຂປ຺ປທໍ ປທໍ;

ນຣານຣານໍ ສຸຂສມ຺ຠວໍ ຠວໍ,

ນມານມານໍ ຊິນປຸງ຺ຄວໍ ຄວໍ.

໑໐. ມຄ຺ຄງ຺ຄນາວໍ ມຸນິທກ຺ຂນາວິໂກ,

ອີຫາຜິຍໍ ຎາຓກເຣນ ຄາຫໂກ;

ອາຣຸຍ຺ຫ ໂຍ ຕາຍ ພຫູ ຠວຓ຺ຓວາ,

ຕາເຣສິ ຕໍ ພຸທ຺ຘມຆປ຺ປຫໍ ນເມ.

໑໑. ສມຕິໍສຕິປາຣມິສມ຺ຠຣຓໍ,

ວຣໂພຘິທຸເມ ຈຕຸສຈ຺ຈທສໍ;

ວຣມິທ຺ຘິຄຕໍ ນຣເທວຫິຕໍ,

ຕິຠວູປສມໍ ປຓມາມິ ຊິນໍ.

໑໒. ສຕປຸຎ຺ຎຊລກ຺ຂຓິກໍ ວິຣຊໍ,

ຄຄນູປມຘິໍ ຘິຕິເມຣຸສມໍ;

ຊລຊູປມສີຕລສີລຍຸຕໍ,

ປຖວີສຫນໍ ປຓມາມິ ຊິນໍ.

໑໓. ໂຍ ພຸທ຺ໂຘ ສຸມຕິ ທິເວ ທິວາກໂຣວ,

ໂສຠນ຺ໂຕ ຣຕິຊນເນ ສິລາສນມ຺ຫິ;

ອາສີໂນ ສິວສຸຂທໍ ອເທສິ ຘມ຺ມໍ,

ເທວານໍ ຕມສທິສໍ ນມາມິ ນິຈ຺ຈໍ.

໑໔. ໂຍ ປາທປງ຺ກຊມຸທຸຕ຺ຕລຣາຊິເກຫິ,

ໂລເກຫິ ຕີຫິວິກເລຫິ ນິຣາກຸເລຫິ;

ສມ຺ປາປຸເຓ ນິຣຸປເມຍ຺ຍຕເມວ ນາໂຖ,

ຕໍ ສພ຺ພໂລກມຫິຕໍ ອສມໍ ນມາມິ.

໑໕. ພຸທ຺ຘໍ ນຣານຣສໂມສຣຓໍ ຘິຕຕ຺ຕໍ,

ປຎ຺ຎາປທີປຊຸຕິຍາ ວິຫຕນ຺ຘກາຣໍ;

ອຕ຺ຖາຠິກາມນຣເທວຫິຕາວຫໍ ຕໍ,

ວນ຺ທາມິ ກາຣຸຓິກມຄ຺ຄມນນ຺ຕຎາຓໍ.

໑໖. ອຂິລຄຸຓນິຘາໂນ ໂຍ ມຸນິນ຺ໂທປຄນ຺ຕ຺ວາ,

ວນມິສິປຕນວ຺ຫໍ ສຎ຺ຎຕານໍ ນິເກຕໍ;

ຕຫິມກຸສລເຉທໍ ຘມ຺ມຈກ຺ກໍ ປວຕ຺ໂຕ,

ຕມຕຸລມຠິກນ຺ຕໍ ວນ຺ທເນຍ຺ຍໍ ນມາມິ.

໑໗. ສຸຈິປຣິວາຣິຕໍ ສຸຣຸຈິຣປ຺ປຠາຫິ ຣຕ຺ຕໍ,

ສິຣິວິສຣາລຍໍ ຄຸປິຕມິນ຺ທ຺ຣິເຍຫຸເປຕໍ;

ຣວິສສິມຓ຺ຑລປ຺ປຠຸຕິລກ຺ຂໂຓປຈິຕ຺ຕໍ,

ສຸຣນຣປູຊິຕໍ ສຸຄຕມາທຣໍ ນມາມິ.

໑໘. ມຄ຺ໂຄຬຸມ຺ເປນ ມຸຫປຏິຆາສາທິອຸລ຺ໂລລວີຈິໍ,

ສໍສາໂຣຆໍ ຕຣິ ຕມຠຍໍ ປາຣປຕ຺ຕໍ ປຊານໍ;

ຕາຓໍ ເລຓໍ ອສມສຣຓໍ ເອກຕິຕ຺ຖໍ ປຕິຏ຺ຐໍ,

ປຸຎ຺ຎກ຺ເຂຕ຺ຕໍ ປຣມສຸຂທໍ ຘມ຺ມຣາຊໍ ນມາມິ.

໑໙. ກຓ຺ຑມ຺ພໍມູເລ ປຣຫິຕກໂຣ ໂຍ ມຸນິນ຺ໂທ ນິສິນ຺ໂນ,

ອຈ຺ເຉຣໍ ສີຆໍ ນຍນສຸຠຄໍ ອາກຸລຓ຺ຓຄ຺ຄິຊາລໍ;

ທຸຊ຺ຊາລທ຺ຘໍສໍ ມຸນິຠິຊຫິຕໍ ປາຏິເຫຣໍ ອກາສິ,

ວນ຺ເທ ຕໍ ເສຏ຺ຐໍ ປຣມຣຕິຊໍ ອິທ຺ຘິຘມ຺ເມຫຸເປຕໍ.

໒໐. ມຸນິນ຺ທກ຺ໂກ ຍ຺ເວໂກ ທຍຸທຍຣຸໂຓ ຎາຓວິຕ຺ຖິຓ຺ຓພິມ຺ໂພ,

ວິເນຍ຺ຍປ຺ປາໂຓຆໍ ກມລກຖິຕໍ ຘມ຺ມຣໍສີວເຣຫິ;

ສຸໂພເຘສີ ສຸທ຺ເຘ ຕິຠວກຸຫເຣ ພ຺ຍາປິຕກ຺ກິຕ຺ຕິນຎ຺ຈ,

ຕິໂລເກກຈ຺ຈກ຺ຂຸໍ ທຸຂມສຫນໍ ຕໍ ມເຫສິໍ ນມາມິ.

໒໑. ໂຍ ຊິໂນ ອເນກຊາຕິຍໍ ສປຸຕ຺ຕທາຣມງ຺ຄຊີວິຕມ຺ປິ,

ໂພຘິເປມໂຕ ອລຄ຺ຄມານໂສ ອທາສິເຍວ ອຕ຺ຖິກສ຺ສ;

ທານປາຣມິໍ ຕໂຕ ປຣໍ ອປູຣິ ສີລປາຣມາທິກມ຺ປິ,

ຕາສມິທ຺ຘິໂຍປຍາຕມຄ຺ຄຕໍ ຕເມກທີປກໍ ນມາມິ.

໒໒. ເທວາເທວາຕິເທວໍ ນິຘນວປຸຘຣໍ ມາຣຠງ຺ຄໍ ອຠງ຺ຄໍ,

ທີປໍ ທີປໍ ປຊານໍ ຊຍວຣສຍເນ ໂພຘິປຕ຺ຕໍຘິປຕ຺ຕໍ;

ພ຺ຣຫ຺ມາພ຺ຣຫ຺ມາຄຕານໍ ວຣຄິຣກຖິກໍ ປາປຫີນໍ ປຫີນໍ,

ໂລກາໂລກາຠິຣາມໍ ສຕຕມຠິນເມ ຕໍ ມຸນິນ຺ທໍ ມຸນິນ຺ທໍ.

໒໓. ພຸທ຺ໂຘ ນິຄ຺ໂຣຘພິມ຺ໂພ ມຸທຸກຣຈຣໂຓ ພ຺ຣຫ຺ມໂຆເສຓິຊງ຺ໂຆ,

ໂກສຈ຺ຉາທງ຺ຄຊາໂຕ ປຸນຣປິ ສຸຄໂຕ ສຸປ຺ປຕິຏ຺ຐິຕປາໂທ;

ມູໂທທາຕຸຓ຺ຓໂລໂມ ອຖມປິ ສຸຄໂຕ ພ຺ຣຫ຺ມຸຊຸຄ຺ຄຕ຺ຕຠາໂວ,

ນີລກ຺ຂີ ທີຆປຓ຺ຫີ ສຸຂຸມມລຉວີ ໂຖມ຺ຍຣສຄ຺ຄສຄ຺ຄີ.

໒໔. ຈຕ຺ຕາລີສຄ຺ຄທນ຺ໂຕ ສມກລປນໂຊ ອນ຺ຕຣໍສປ຺ປປີໂນ,

ຈກ຺ເກນງ຺ກິຕປາໂທ ອວິຣຬທສໂນ ມາຣຊຸສ຺ສງ຺ຂປາໂທ.

ຕິຏ຺ຐນ຺ໂຕ ໂນນມນ຺ໂຕຠຍກຣມຸທຸນາ ຊຓ຺ຓຸການາມສນ຺ໂຕ,

ວຏ຺ຏກ຺ຂນ຺ໂຘ ຊິໂນ ໂຄຕຣຸຓປຂຸມໂກ ສີຫປຸພ຺ພຑ຺ຒກາໂຍ.

໒໕. ສຕ຺ຕປ຺ປີໂນ ຈ ທີຆງ຺ຄຸລິ ມຖ ສຸຄໂຕ ໂລມກູເປກໂລໂມ,

ສມ຺ປນ຺ໂນທາຕທາໂຐ ກນກສມຕໂຈ ນີລມຸທ຺ຘຄ຺ຄໂລໂມ.

ສມ຺ພຸທ຺ໂຘ ຖູລຊິວ຺ໂຫ ອຖ ສີຫຫນຸໂກ ຊາລິກປ຺ປາທຫຕ຺ໂຖ,

ນາໂຖ ອຸຓ຺ຫີສສີໂສ ອິຕິຄຸຓສຫິຕໍ ຕໍ ມເຫສິໍ ນມາມິ.

໒໖. ພຸທ຺ໂຘພຸທ຺ໂຘຕິໂຆໂສ ອຕິທຸລຠຕໂຣ ກາ ກຖາ ພຸທ຺ຘຠາໂວ,

ໂລເກ ຕສ຺ມາ ວິຠາວີ ວິວິຘຫິຕສຸຂໍ ສາຘໂວ ປຕ຺ຖຍນ຺ຕາ.

ອິຏ຺ຐໍ ອຕ຺ຖໍ ວຫນ຺ຕໍ ສຸຣນຣມຫິຕໍ ນິພ຺ຠຍໍ ທກ຺ຂິເຓຍ຺ຍໍ,

ໂລການໍ ນນ຺ທິວຑ຺ຒໍ ທສພລມສມໍ ຕໍ ນມສ຺ສນ຺ຕຸ ນິຈ຺ຈໍ.

໒໗. ປຸຎ຺ເຎເນເຕນ ໂສຫໍ ນິປຸຓມຕິ ສໂຕ ສມ຺ປຣາເຍ ຈ ຕິຕ຺ໂຕ,

ທກ຺ໂຂ ທິຏ຺ຐຸຊ຺ຊຸປຎ຺ໂຎ ອວິກລວີຣິໂຍ ໂຠຄວາ ສໍວິຠາຄີ.

ຕິກ຺ໂຂ ສູໂຣ ຘິຕຕ຺ໂຕ ສປຣຫິຕຈໂຣ ທີຆຊີວີ ອໂຣໂຄ,

ຘຎ຺ໂຎ ວຓ຺ໂຓ ຍສສ຺ສີ ອຕິພລວຘໂຣ ກິຕ຺ຕິມາ ຂນ຺ຕຸເປໂຕ.

໒໘. ສທ຺ໂຘ ທາຕງ຺ຄຸເປໂຕ ປຣມສິຣິຘໂຣ ທິຏ຺ຐຘມ຺ເມ ວິຣຕ຺ໂຕ,

ລຊ຺ຊີ ກລ຺ຍາຓມິຕ຺ໂຕ ອຠິຣຕກຸສໂລ ປຎ຺ຈສີລາທິຣກ຺ໂຂ.

ອປ຺ປິຈ຺ໂຉ ອປ຺ປໂກໂຘ ອຕິວຸຊຸຫທໂຍ ອິທ຺ຘິມາ ອປ຺ປເມຍ຺ໂຍ,

ປາສໍໂສ ເປມວາໂຈ ສຸຊນຄຸຓວິທູ ມາມໂກ ໂສ ຠເວຍ຺ຍໍ.

໒໙. ອິຕ຺ຖໍ ອສງ຺ຂເຍ ນາຖ, ຄຸເຓ ລກ຺ຂຓທີປິເຕ;

ຄາຖາສຸ ສູຈກາສ຺ເວກ, ຄາຖມ຺ປິ ສຣເຕ ພຸໂຘ.

໓໐. ຈຕຸຣາປາຍມຸຕ຺ໂຕ ໂສ, ສາຘກຕ຺ຖທ຺ວຍສ຺ສ ຈ;

ຫຕູປທ຺ທວຊາໂລ ຈ, ລາຠີ ຫິຕສຸຂສ຺ສ ຈ.

໓໑. ອຘິໂປ ນຣເທວານໍ, ຈຕຸທີປິສ຺ສໂຣປິ ວາ;

ຠເວຍ຺ຍ ອນ຺ຕິເມ ເທເຫ, ຕມຎ຺ຎໍ ເສຕຉຕ຺ຕກໍ.

໓໒. ຠາວນາຍານມາຣຸຍ຺ຫ, ສມເມສ຺ສຕິ ສຸພ຺ພໂຕ;

ອິມສ຺ມິໍ ອຕ຺ຕຠາເວປິ, ອໂຣໂຄ ທີຆຊີວິໂກ.

໓໓. ປູຊິໂຕ ສພ຺ພໂລເກຫິ, ຠາວນາຠິຣຕີມໂນ;

ຊນປ຺ປິໂຍ ມນາໂປ ຈ, ກາ ກຖາຂິລຘາຣເຓ.

ນມກ຺ກາຣປາຬິ ນິຏ຺ຐິຕາ.

ນມກ຺ກາຣຏີກາ

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

໑. ສຸຄຕນ຺ຕ຺ຍາທິວຓ຺ເຓຫິ, ປສຕ຺ຖຎ຺ຈ ສຸຂທ຺ທທໍ;

ວນ຺ທນ຺ຕານໍ ຊິນໍ ນຕ຺ວາ, ຘມ຺ມໍ ສຸທ຺ຘໍ ຄຓຸຕ຺ຕມໍ.

໒. ນມກ຺ກາຣໍ ຫິຕຕ຺ຖີຫິ, ໂປຣາຓາຈຣິເຍຫິ ຈ;

ລິຂິຕ຺ວາ ຐປິຕໍ ປຸຎ຺ຎ, ພຸທ຺ຘິຍາ ເຕນ ວນ຺ທິນໍ.

໓. ຕສ຺ສຕ຺ຖວຓ຺ຓນໍ ກສ຺ສໍ, ຄມ຺ຠີຣຕ຺ຖສຸໂພຘນໍ;

ໂມວິປຸນາເມນ ສນ຺ເຕນ, ສີລຸເປເຕນ ຍາຈິໂຕ.

໔. ວຓ຺ຓນ຺ໂຕປິ ຈ ຕສ຺ສຕ຺ຖໍ, ຕໍ ຕໍ ອຏ຺ຐກຖາທິສຸ;

ວຸຕ຺ຕຎາເຍນ ກສ຺ສາມິ, ສທ຺ຘາ ສຸຓາຖ ສາຘໂວ.

໕. ນມນໍ ນມຕີຕີ ວາ, ນມຕີ ເຕນ ວາ ນໂມ;

ຕສ຺ສ ກາໂຣນ຺ຕິ ຕາຫີຕິ, ນມກ຺ກາໂຣຕິ ວຸຈ຺ຈຕິ.

໖. ຕຎ຺ຈ ພຸທ຺ຘໂຆສາຈຣິ, ເຍນ ປຸພ຺ພສຸຕໍ ກຕໍ;

ພຸທ຺ຘໂຆສຸປ຺ປຕ຺ຕິຍຎ຺ຈ, ຕໍ ຕໍ ປນ ກຖາທິສຸ.

໗. ນ ທິຏ຺ຐໍ ກຕກາຣຓໍ, ຕສ຺ມາ ຫິຕຕ຺ຖິເກຫິ ຈ;

ໂປຣາຓາຈຣິເຍຫີ ຈ, ຐປິຕນ຺ຕິ ມຍາ ວຸຕ຺ຕໍ;

ຕໍ ກາຣຓໍ ວິຎ຺ຎູຫີ ຈ, ວິຈາເຣຕ຺ວາ ວິຊານິຕນ຺ຕິ.

໑. ສຸຄຕໍ ສຸຄຕໍ ເສຏ຺ຐໍ, ກຸສລໍກຸສລໍ ຊຫໍ;

ອມຕໍ ອມຕໍ ສນ຺ຕໍ, ອສມໍ ອສມໍ ທທໍ.

ສຣຓໍ ສຣຓໍ ໂລກໍ, ອຣຓໍ ອຣຓໍ ກຣໍ;

ອຠຍໍ ອຠຍໍ ຐານໍ, ນາຍກໍ ນາຍກໍ ນເມ.

໑. [ກ] ອິທານິ ປຐມໍ ຕາວ ສຸຄຕນ຺ຕ຺ຍາທີຫິ ອຏ຺ຐາຣສຫິ ຄຸເຓຫິ ໂຖເມຕ຺ວາ ພຸທ຺ຘສ຺ສ ວນ຺ທິຕຸກາເມນ ສຸຄຕນ຺ຕິອາທິ ຄາຖາທ຺ວຍໍ ອາຣທ຺ຘໍ. ອຍໍ ປນ ສພ຺ພປາທາທິຍມກປຖ຺ຍາ ວຕ຺ຕຄາຖາຕິ ທຏ຺ຐພ຺ພໍ. ຕໍ ປນ ຍມກໍ ສຸໂພຘາລງ຺ກາເຣ ກິລິຏ຺ຐໂທສນ຺ຕິ ວຸຕ຺ຕໍ.

ວຸຕ຺ຕຎ຺ຫິ ຕຕ຺ຖ –

‘‘ຍໍ ກິລິຏ຺ຐປທໍ ມນ຺ທາ, ຠິເຘຍ຺ຍໍ ຍມກາທິກໍ;

ກິລິຏ຺ຐປທໂທເສວ, ຕມ຺ປິ ອນ຺ໂຕ ກຣີຍຕີ’’ຕິ.