ສຕ຺ຕປຎ຺ຎາສຕິມ ປຣິຈ຺ເຉທ

ສໍຄຫກຣໂຓນາມ

໑. ລງ຺ກາຣກ຺ຂາຍ ສຈິເວ, ພລິໂນ ໂຍຘສມ຺ມເຕ;

ປຏິປາຏິໍ ສມຸທ຺ທິສ຺ສ, ສມນ຺ຕາ ສນ຺ນິໂຍຊຍິ.

໒. ອຠິເສກມງ຺ຄລຕ຺ຖາຍ, ປາສາທາທິມເນກຕໍ;

ກິຈ຺ຈໍ ສມ຺ປາທນີຍນ຺ຕິ, ສຈິວໍ ສນ຺ນິໂຍຊິຍ.

໓. ວນ຺ທນີເຍ’ຠິວນ຺ທນ຺ໂຕ, ປເທເສເນກເກຕຫິໍ;

ເນຕ຺ວາ ມາສຕ຺ຕຍໍ ຄຎ຺ຉິ, ປຸລຕ຺ຖິນຄຣໍ ປຸນ.

໔. ວິສ຺ສຸໂຕ ອາທິມລຍ-ນາເມນ ພລນາຍໂກ;

ອຸຊຸປຈ຺ຈຕ຺ຖິໂກ ຫຸຕ຺ວາ, ມຫີປາລສ຺ສ ສພ຺ພໂສ.

໕. ຄງ຺ຄາ ມຕ຺ຖຍຸ’ປາຄຎ຺ຉິ, ພລໍ ສພ຺ພໍ ສມາທິຍ;

ອນ຺ທູຕິ ວິສ຺ສຸຕໍ ມນ຺ທ-ປຎ຺ໂຎ ຄາມໍ ປຸຣນ຺ຕິເກ.

໖. ລໍກິສ຺ສໂຣ ຕຫິໍ ຄນ຺ຕ຺ວາ, ອຸທ຺ຘຣິຕ຺ວາ ຕມຸທ຺ຘຕໍ;

ປຸລຕ຺ຖິນຄຣໍ ຄຎ຺ຉິ, ວເສ ວຕ຺ຕິຍ ຕໍ ພລໍ.

໗. ຍຸວຣາຊປທໍເຍວ, ສິໂຕ ສນ຺ໂຕ ລິຂາປຍິ;

ໂສ ສຕ຺ຕຣສວສ຺ສານິ, ສປ຺ປຎ຺ໂຎ ນຣສຕ຺ຕໂມ.

໘. ຕໂຕ’ນຸຣາຘນຄຣ-ມຠິຄມ຺ມ ຍຖາວິຘິໍ;

ອນຸໂຠຕ຺ວາ ວິຘານຎ຺ຎູ, ອຠິເສກມຫຸສ຺ສວໍ.

໙. ອຏ຺ຐິໂຕ ປາປຘມ຺ເມສຸ, ສຸຏ຺ຐິໂຕ ເສຏ຺ຐກມ຺ມນິ;

ໂສ ອຏ຺ຐາຣສມໍ ວສ຺ສໍ, ລິຂາປຍິ ສຸສຓ຺ຐິໂຕ.

໑໐. ຕໂຕ ອາຄມ຺ມ ນິວສິ, ປຸລຕ຺ຖິນຄເຣ ວເຣ;

ໂສ ສິຣີສງ຺ຆໂພຘີ’ຕິ, ນາມເຘຍ຺ເຍນ ວິສ຺ສຸໂຕ.

໑໑. ອນຸຊໍ ໂສ ວີຣພາຫຸ-ໂມປຣຊ຺ເຊ ນິເວສິຍ;

ທຕ຺ວານ ທກ຺ຂິຓໍ ເທສໍ, ຕໍ ສງ຺ຄຓ຺ຫິ ຍຖາວິຘິໍ.

໑໒. ກຓິຏ຺ຐສ຺ສາຖ ຠາຕຸສ຺ສ, ຊຍພາຫຸສ຺ສ ຠູຠຸໂຊ;

ອາທິປາທປທໍ ທຕ຺ວາ, ຣຏ຺ຐໍ ຈາ’ທາສິ ໂຣຫຓໍ.

໑໓. ຐານນ຺ຕຣານິ ສພ຺ເພສ-ມມຈ຺ຈານໍ ຍຖາຣຫໍ;

ທຕ຺ວາ ຣຊ຺ເຊ ຍຖາຎາຍໍ, ກຣໍ ໂຍເຊສິ ຄຓ຺ຫິຕຸໍ.

໑໔. ຈິຣສ຺ສໍ ປຣິຫີນໍ ໂສ, ທຍາວາໂສ ມຫີປຕິ;

ປວຕ຺ເຕສິ ຍຖາຘມ຺ມໍ, ຐິຕຘມ຺ໂມ ວິນິຈ຺ຉຍໍ.

໑໕. ເອວໍ ສມຸທ຺ຘຏາເນກ, ຣິປຸກຓ຺ຏກສຎ຺ຈເຍ;

ນິຈ຺ຈໍ ຣຊ຺ຊໍ ປສາເສນ຺ເຕ, ລງ຺ກໍສມ຺ມານຣິສ຺ສເຣ.

໑໖. ຉຕ຺ຕຄ຺ຄາຫກນາໂຖ ຈ, ຘມ຺ມເຄຫກນາຍໂກ;

ຕເຖວ ເສຏ຺ຐິນາໂຖ ຈ, ອິຈ຺ເຈເຕ ຠາຕໂຣ ຕໂຍ.

໑໗. ຣຎ຺ໂຎ ວິໂຣຘິຕໍ ຍາຕາ, ຜລາຕາ ຊມ຺ປຸທີປກໍ;

ລງ຺ກໍ ວີສຕິເມ ວສ຺ເສ, ເອເກນູເນ ສໂມຕຣຸໍ.

໑໘. ເຕ ສພ຺ເພ ໂຣຫຓໍ ຣຏ຺ຐໍ, ສພ຺ພໍ ມລຍມຓ຺ຑລໍ;

ສພ຺ພໍ ທກ຺ຂິຓປສ຺ສຎ຺ຈ, ສຫສາ ປຣິວຕ຺ຕຍຸໍ.

໑໙. ນິປຸໂຓ ໂຣຫຓໍ ຄນ຺ຕ຺ວາ, ຕຖາ ມລຍມຓ຺ຑລໍ;

ນິຆາເຕນ຺ໂຕ ພຫູ ຕຕ຺ຖ, ຕຕ຺ຖ ປຈ຺ຈຕ຺ຖິເກ ຊເນ.

໒໐. ສມ຺ມາວຸປສເມຕ຺ວາ ຕໍ, ຐເປຕ຺ວາ ສຈິເວ ຕຫິໍ;

ທກ຺ຂິໂຓ ທກ຺ຂິຓໍ ເທສໍ, ສຍໍ ຄນ຺ຕ຺ວາ ມຫພ຺ພໂລ.

໒໑. ເປເສຕ຺ວາ ສມຓີຠາຕຸ-ວໍສຊໍ ສຈິວໍ ຕທາ;

ຄາເຫຕ຺ວາ ສມເຣໂຆເຣ, ວີໂຣ ເຕ ສກເວຣິໂນ.

໒໒. ສມາໂຣປິຍສູລມ຺ຫິ, ລງ຺ກໍ ວິຄຕກຓ຺ຏກໍ;

ກາເຣຕ຺ວານ ນິຣາຕງ຺ກໍ, ປຸລຕ຺ຖິປຸຣມາຄມິ.

໒໓. ວສນ຺ຕີ ໂຈຬວິສເຍ, ຊຄຕິປາລຣາຊິນີ;

ໂຈຬຫຕ຺ຖາ ປມຸຎ຺ຈິຕ຺ວາ, ສທ຺ຘິໍ ຘີຕຸ ກຸມາຣິຍາ.

໒໔. ລີລາວຕ຺ຍາຠິຘານາຍ, ນາວາມາຣຸຍ຺ຫ ເວຄສາ;

ລໍກາທີປມ຺ຫິ ໂອຕິຓ຺ຓາ, ປສ຺ສິ ລໍກິສ຺ສຣໍ ຕທາ.

໒໕. ສຸຕ຺ວາ ວໍສກ຺ກມໍ ຕສ຺ສາ, ໂສ ຎຕ຺ວາ ສຸທ຺ຘວໍສຕໍ;

ລີລາວຕິໍ ມຫິສິຕ຺ເຕ, ອຠິສິຎ຺ຈິ ນຣິສ຺ສໂຣ.

໒໖. ສາ ຕໍ ປຏິຈ຺ຈ ຣາຊານໍ, ມເຫສີ ຘີຕຣໍ ລຠິ;

ນາມໍ ຍໂສຘຣາຕິ’ສ຺ສາ, ອກາສິ ຘຣຓີ ປຕິ.

໒໗. ເມຣຸກນ຺ທຣຣຏ຺ເຐນ, ສທ຺ຘິໍ ຣາຊາ ສຘີຕຣໍ;

ວີຣວມ຺ມສ຺ສ ປາທາສິ, ສາ ລຠິ ຘີຕໂຣ ທຸເວ.

໒໘. ສມານນາມິກາ ເຊຏ຺ຐາ, ສາ ມາຕາ ມຫິຍາ ອຫຸ;

ສຸຄລາ ນາມິກາ ອາສິ, ຕາສຸ ທ຺ວີສຸ ກຓິຏ຺ຐິກາ.

໒໙. ກາລິງ຺ຄຘຣຓີປາລ-ວໍສຊໍ ຈາຣຸທສ຺ສນໍ;

ຕິໂລກສຸນ຺ທຣໍ ນາມ, ສຸກຸມາຣໍ ກຸມາຣິກໍ.

໓໐. ກາລິງ຺ຄຣຏ຺ຐໂຕ ຣາຊາ, ອາຓາເປຕ຺ວາ ຈິຣຏ຺ຐິຕິໍ;

ນິຊວໍສສ຺ສ ອິຈ຺ຉນ຺ໂຕ, ມເຫສິຕ຺ເຕ’ຠິ ເສຈຍິ.

໓໑. ສຸຠທ຺ທາ ຈ ສຸມິຕ຺ຕາ ຈ, ໂລກນາຖວ຺ຫຍາປິ ຈ;

ຣຕນາວລີ ຣູປວຕີ, ອິຕິມາ ປຎ຺ຈ ຘີຕໂຣ.

໓໒. ປຸຕ຺ຕໍ ວິກ຺ກມພາຫຸຎ຺ຈ, ສາ ລຠີ ຘຎ຺ຎລກ຺ຂຓໍ;

ສມ຺ປຕ຺ຕາ ສາ ປຊວຸທ຺ຘິໍ, ຫຣນ຺ຕິ ຣາຊິໂນ ມຕໍ.

໓໓. ອິຕ຺ຖາຄາເຣສຸ ເສເສສຸ, ວີຕາ ສມກຸລງ຺ຄນາ;

ຄພ຺ໂຠ ຊາຕຸມຫີປາລໍ, ຕໍ ປຏິຈ຺ຈ ນ ສຓ຺ຐຫິ.

໓໔. ອເຖກທິວສໍ ຣາຊາ, ອມຈ຺ຈຄຓມຊ຺ຌໂຄ;

ປິໂລກິຍຐິຠາ ສພ຺ພາ, ຘີຕໂຣ ປຏິປາຏິຍາ.

໓໕. ຘີຕຸ ນວມວເສສານໍ, ຐເປຕ຺ວາ ຣຕນາວລິໍ;

ຘຎ຺ຎລກ຺ຂຓສມ຺ປນ຺ນ-ປຸຕ຺ຕສ຺ສຸປ຺ປຕ຺ຕິສຸຈກໍ.

໓໖. ລກ຺ຂຓໍ ລກ຺ຂຓຎ຺ຎູ ໂສ, ອປສ຺ສໍ ເປມເຈຄວາ;

ຣຕນາວລິມາຫູຍ, ຕສ຺ສາ ມຸທ຺ຘນິ ຈຸມ຺ພິຍ.

໓໗. ເຕໂຊຄຸເຓຫິ ຈາເຄຫິ, ຘິຍາ ສູຣຕ຺ຕເນນ ຈ;

ຠູເຕ ຈ ຠາວິໂນ ເຈວ, ສພ຺ເພ ຠູເປ’ຕິສາຍິໂນ.

໓໘. ນິຈ຺ຈໍ ລງ຺ກໍ ນິຣາສງ຺ກ-ເມກຈ຺ຉຕ຺ຕກເມວ ຈ;

ປວິຘາຕຸໍ ສມຕ຺ຖສ຺ສ, ສມ຺ມາສາສນຕາຍິໂນ.

໓໙. ໂສຠນາເນກວຕ຺ຕສ຺ສ, ອິມິສ຺ສາ ກຸຈ຺ຉິເຫສ຺ສຕິ;

ປຸຕ຺ຕສ຺ສຸປ຺ປຕ຺ຕິຐານນ຺ຕິ, ມຸທຸໂຕ ໂສ ສມພ຺ຣວິ.

໔໐. ຍາວນ຺ຕສ຺ສາປິໂຂໂຈຬ-ມຫີປາລສ຺ສ ເນກໂສ;

ກຸລາຠິມານີ ຣາຊາ ໂສ, ອທຕ຺ວານ ກຓີຍສິໍ.

໔໑. ອາຓາເປຕ຺ວາ ປຓ຺ຑຸຣາຊໍ, ວິສຸທ຺ຘຕ຺ວຍສມ຺ຠວໍ;

ອນຸຊໍ ຣາຊິນິໍ ວສ຺ສ, ມິຕ຺ຕວ຺ຫຍມທາສິໂສ.

໔໒. ສາມາຓຠຣຓໍ ກິຕ຺ຕິ, ສິຣີ ເມຆາຠິຘານກໍ;

ສິຣິວລ຺ລຠນາມຎ຺ຈ, ຊເນສິ ຕນເຍ ຕໂຍ.

໔໓. ສຸຠທ຺ທ ວີຣພາຫຸສ຺ສ, ສຸມິຕ຺ຕໍ ຊຍພາຫຸໂນ;

ມຫຕາ ປຣິຫາເຣນ, ປາທາສິ ຘຣຓີ ປຕິ.

໔໔. ອທາສິ ມາຓາຠຣເຓ, ຘີຕຣໍ ຣຕນາວລິໍ;

ໂລກນາຖວ຺ຫຍໍ ກິຕ຺ຕິ ສິຣິເມຆສ຺ສ’ທາສິໂສ.

໔໕. ຣູປຕ຺ຍຠິຘານາຍ, ຘີຕຸໂຍ ປຣຕາຍຫິ;

ສຣີຣິວລ຺ລຠສາທາ, ສຸຄລວ຺ຫ ກຸມາຣິກໍ.

໔໖. ມຘຸກຓ຺ຓວຠີມຣາຊ, ພລກ຺ກາຣ ສນາມເກ;

ມເຫສີ ພນ຺ຘເວຣາຊ-ປຸຕ຺ເຕ ສີຫປຸຣາຄເຕ.

໔໗. ປສ຺ສິຕ຺ວານ ປຫີປາໂລ, ຕທາ ສຎ຺ຊາຕປີຕິໂກ;

ເຕສໍ ປາທາສິ ປຈ຺ເຈກໍ, ວຸຕ຺ຕິໍ ໂສ ອນຸຣູປກໍ.

໔໘. ເຕ ສພ຺ເພ ລທ຺ຘສກ຺ກາຣ ສມ຺ມານາຘຣຓີປຕິໍ;

ອາຣາຘຍນ຺ຕາ ສສຕໍ, ນິວສິໍສຸ ຍຖາຣຸຈິໍ.

໔໙. ເອເຕສໍ ຣາຊປຸຕ຺ຕານໍ, ສຸນ຺ທຣິວ຺ຫໍ ກຓິຏ຺ຐກໍ;

ອທາ ວິກ຺ກມພາຫຸສ຺ສ, ນິຊວໍສຐິຕຏ຺ຐິໂກ.

໕໐. ຠິຍ຺ໂຍ ວິກ຺ກມພາຫຸສ຺ສ, ຕໂຕ ລີລາວຕິໍ ສຕິໍ;

ສຫ ໂຠເຄນ ປາທາສິ, ຕທາ ພນ຺ຘຸ ຫິເຕຣໂຕ.

໕໑. ວິຘາຍ ເອວໍ ສຊເນ ຊນິນ຺ໂທ;

ນິສ຺ເສສໂຕ ໂຠຄສມປ຺ປິໂຕ;

ທຍາປໂຣ ຎາຕິຊນາຕມຕ຺ຖໍ;

ສມາຈຣີ ນີຕິປຖານຸຣູປໍ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ສໍຄຫກຣໂຓ ນາມ

ສຕ຺ຕປຎ຺ຎາສຕິໂມ ປຣິຈ຺ເຉໂທ