ປຎ຺ຈປຎ຺ຎາສຕິມ ປຣິຈ຺ເຉທ

ໂຣຫຓາຣາຕິ ວິຊໂຍນາມ

໑. ໂລກນາໂມ ຈມູນາໂຖ, ມກ຺ຂກຸທ຺ຣູສວາສິໂກ;

ສຈ຺ຈປຏິຎ຺ໂຎ ຘີຕິມາ, ໂຈຬທປ຺ປວິຆາຕໂນ.

໒. ອຠິຠູຍ ຊເນ ປຕ຺ວາ, ຣຊ຺ຊໍ ໂຣຫຓມຓ຺ຑເລ;

ວສີ ກາຊຣຄາມມ຺ຫິ, ຈາຣິຕ຺ຕວິຘິໂກວິໂທ.

໓. ອຫຸ ຕທາ ກິຕ຺ຕິນາໂມ, ຣາຊປຸຕ຺ໂຕ ມຫພ຺ພໂລ;

ຕສ຺ສ ວໍສາທິສມ຺ປຕ຺ຕີ, ນຸປຸພ຺ເພນ ປວຸຈ຺ຈເຕ.

໔. ສຸໂຕ ກສ຺ສປຠູປສ຺ສ, ມາຓນາເມນ ວິສ຺ສຸໂຕ;

ອາທິປາໂທ ອຫຸ ຘີໂຣ, ສທາຈາຣວິຠູສິໂຕ.

໕. ຕສ຺ສາ’ຖ ເຊຏ຺ຐໂກ ຠາຕາ, ມາຓວມ຺ໂມ ມຫາມຕິ;

ໂຄກຓ຺ຓກສມີປຏ຺ຐ-ນທີຕີເຣ ນິສີທິຍ.

໖. ກຕມນ຺ຕຸປຈາໂຣ ໂສ, ຍຖາວິຘິມເສສໂຕ;

ອກ຺ຂມາລໍ ຄເຫຕ຺ວານ, ມນ຺ຕໍ ຊປ຺ປິຕຸມາຣຠິ.

໗. ກຸມາໂຣ ກິຣ ຠຕ຺ຕຄ຺ເຄ, ປາຕຸຣາສິ ສວາຫໂນ;

ສິຂຓ຺ຑິ ມຸຂຕຸຓ຺ເຑນ, ພລິປຏ຺ຏໍ ວິຂຓ຺ຑິຍ.

໘. ສຈ຺ຉິທ຺ທເກ ນາຬິເກຣ-ກປາເລ ວິຈ຺ຈຸໂນທເກ;

ລູເຂ ຊລມປສ຺ສນ຺ໂຕ, ຊປນ຺ຕສ຺ສ ມຸຂໍຄໂຕ.

໙. ຕໂຕ ຠາວິນິໍ ສິທ຺ຘິ, ມເປກ຺ຂໍ ນຍນໍ ສກໍ;

ຕສ຺ໂສປເນສິ, ນິພ຺ຠິຊ຺ຊ, ໂສປິ ຕໍ ສຫສາປິຈິ.

໑໐. ກຸມາໂຣ ຕສ຺ສ ສນ຺ຕຸຏ຺ໂຐ, ກຸມາຣສ຺ສາຠິປຕ຺ຖິຕໍ;

ວຣໍ ປທາຍ ນຠສາ, ຣາຊມາໂນ ຄໂຕ ຕໂຕ.

໑໑. ຠິນ຺ເນກນຍນໍ ທິສ຺ວາ, ສຈິວາຕໍ ປໂຣ ທິສຸໍ;

ວຣລາຠໍ ປກາເສຕ຺ວາ, ສມສ຺ສາເສສິ ໂສ ຊເນ.

໑໒. ຕໂຕ ໂສ ສຈິວາຕສ຺ສ, ສນ຺ຕຸຏ຺ຐາຣາຘຍິໍສຸ ຕໍ;

ອນຸຣາຘປຸຣໍ ປຕ຺ວາ, ຠິເສໂກ ກາຣິໂຍ ອິຕິ.

໑໓. ອຕ຺ໂຖ ໂກ ມມຣຊ຺ເຊນ, ວິກລງ຺ຄສ຺ສ ສມ຺ປຕິ;

ຕໂປກມ຺ມໍ ກຣິສ຺ສາມິ, ປພ຺ພຊ຺ຊມຸປຄມ຺ມຫໍ.

໑໔. ກຓິຏ຺ໂຐ ມາຓນາໂມ ຈ, ລງ຺ກາຣຊ຺ຊໍ ກມາຄຕໍ;

ປາເລຕຸ ອິຕິ ໂສ ຣຊ຺ຊໍ, ສມ຺ປຕ຺ຕໍ ສມ຺ປຏິກ຺ຂິປິ.

໑໕. ວິຎ຺ຎາຕຈິຕ຺ຕສຎ຺ຈາຣາ, ສຈິວາ ຕສ຺ສ ສພ຺ພຖາ;

ວຕ຺ຕຸເມຕໍ ກຓິຏ຺ຐສ຺ສ, ເປເສສຸໍ ປຸຣິເສ ຕທາ.

໑໖. ສຸຕ຺ວາ ຕໍ ສີຆມາຄມ຺ມ, ປສ຺ສິຕ຺ວາ ສກຠາຕຣໍ;

ປຕິຕ຺ວາ ປາທມູລມ຺ຫິ, ພຫຸໍ ກນ຺ທິຍ ໂຣທິຍ.

໑໗. ເຊຏ຺ເຐນ ຠາຕຣາ ສທ຺ຘິ-ມນຸຣາຘປຸຣໍ ຄໂຕ;

ມກຸຏໍ ຕຕ຺ຖ ຘາເຣສິ, ເຊຏ຺ຐຈິຕ຺ຕານຸວຕ຺ຕໂກ.

໑໘. ຕໂຕ’ຠຍຄິຣິໍ ຄນ຺ຕ຺ວາ, ປພ຺ພຊ຺ຊໍ ສກຠາຕຸໂນ;

ຍຕ ໂຍ ຕຕ຺ຖ ຍາຈິຕ຺ຖ, ພຫຸມານປຸຣສ຺ສຣໍ.

໑໙. ຕໂຕ ເຕ ຍຕໂຍ ຕສ຺ສ, ປພ຺ພຊ຺ຊມຸປສມ຺ປທໍ;

ອກໍສຸ ວິກລງ຺ຄສ຺ສ, ສິກ຺ຂາປທນິຣາທຣາ.

໒໐. ປຣິເວຓມຸຕ຺ຕໂຣຬ-ມຸຬາຣໍ ຕສ຺ສ ກາຣິຍ;

ກຕ຺ວາ ຕໍ ປຣິເວຓສ຺ສ, ສາມິກໍ ຘຣຓີ ປຕິ.

໒໑. ຠິກ຺ຂູນໍ ຉສຕໍ ຕຕ຺ຖ, ວິຘາຍ ຕທຘີນກໍ;

ປຣິຫາເຣ ອທາ ຕສ຺ສ, ເປສ຺ສວຄ຺ເຄ ຈ ປຎ຺ຈ ໂສ.

໒໒. ສມປ຺ເປສິ ຈ ໂສ ນານາ-ສິປ຺ປກມ຺ມວິຈກ຺ຂເຓ;

ຊເນ ຈາກາ ຕທາຍຕ຺ເຕ, ໂສ ທາຐາຘາຕຸຣກ຺ຂິເຍ.

໒໓. ຕສ຺ເສວາທກຣາ’ເຫສຸໍ, ຠິກ຺ຂູ’ຠຍຄິຣິມ຺ຫິ ເຕ;

ຣາຊາ ຈ ໂລກໍ ປາເລສິ, ສມ຺ມາ ຕສ຺ສານຸສິຏ຺ຐິຍາ.

໒໔. ຊນາ ຕພ຺ພໍສຊາ ເກຈິ, ຕໍ ຣຊ຺ຊນິຣເປກ຺ຂກາ;

ນິວສິໍສຸ ຍຖາກາມໍ, ມຫາສາມິ ປທໍສິຕາ.

໒໕. ເອຕສ຺ສ ມາຓວມ຺ມສ຺ສ, ຣຎ຺ໂຎ ຘມ຺ມນຍຎ຺ຎຸໂນ;

ອຄ຺ຄໂພຘິກຸມາຣາທິ-ປຸຕ຺ຕນຕ຺ຕຸກ຺ກມາຄເຕ.

໒໖. ວໍເສ ວິສຸທ຺ເຘ ຊາຕສ຺ສ, ຠູປາລນ຺ວຍມຸທ຺ຘນິ;

ສມາໂສຬສກງ຺ກາຍໍ, ສມ຺ມາ ຣຊ຺ຊານຸສາສິໂນ.

໒໗. ມຫີປສ຺ສ ມຫິນ຺ທສ຺ສ, ທຸເວ ມາກຸລຘີຕໂຣ;

ເທວລາ ໂລກິກາ ຈາຕິ, ນາມໂຕ ວິສ຺ສຸຕາ ສຸຠາ.

໒໘. ເອຕາສຸ ທ຺ວີສຸ ຘີຕາສຸ, ໂລກິກາ ມາຕຸລຕ຺ຕຊໍ;

ປຏິຈ຺ຈ ຣາຊຕນຍໍ, ສຸຠໍ ກສ຺ສປນາມກໍ.

໒໙. ສາ ໂມຄ຺ຄລ຺ລານ ໂລກວ຺ເຫ, ປຸຕ຺ເຕ ທ຺ເວ ລຠິ ໂສຠເນ;

ເຕສຸ ເຊຏ຺ຐສຸໂຕ ໂລກ-ສາສນາຘາຣໂກວິໂທ.

໓໐. ມຫາສາມີຕິ ປຎ຺ຎາໂຕ, ສງ຺ຆຸປາສນປາລໂຍ;

ເນກສາຣຄຸຓາວາໂສ, ວາສໍ ກປ຺ເປສິ ໂຣຫເຓ.

໓໑. ທາໂຐປຕິສ຺ສ ຣາຊສ຺ສ, ນຕ຺ຕາ ສຸຄຕສາສເນ;

ປພ຺ພຊ຺ຊູປຄໂຕ ສທ຺ໂຘ, ຘຸຕວາ ສີລສໍວຸໂຕ.

໓໒. ປຫິຕຕ຺ໂຕ ວິຈິຕ຺ໂຕໂສ, ປນ຺ຕເສນາສເນ ວສີ;

ຄຸຓໍ ສພ຺ພຕ຺ຖ ວຓ຺ເຓສຸໍ, ຕສ຺ມິໍ ເທວາ ປສີທິຍ.

໓໓. ຄຸຓໍ ສຸຓິຕ຺ວາ ລໍກິນ຺ໂທ, ຕທາ ສພ຺ພຕ຺ຖ ປຕ຺ຖຏໍ;

ອຸປສງ຺ກມ຺ມ ຕໍ ນຕ຺ວາ, ກາຕຸມຕ຺ຕານຸສາສນໍ.

໓໔. ອາຣາຘຍມນິຈ຺ຉນ຺ຕໍ, ຍາຈິຕ຺ວານ ປຸນປ຺ປຸນໍ;

ອານີຍ ວາສຍິຕ຺ວາ ຕໍ, ປາສາເທ ສາຘຸກາຣິເຕ.

໓໕. ຍຕິສ຺ສຣສ຺ສ ວສໂຕ, ກຕ຺ຖ ຣາຊາຄຸຓປ຺ປິໂຍ;

ຕສ຺ສານຸສິຏ຺ຐິມຄ຺ຄຏ຺ໂຐ, ໂລກໍ ຘມ຺ເມນ ປາລຍິ.

໓໖. ອຸທ຺ທິສ຺ສາຣາຘນໍ ສມ຺ມາ, ລໍກິນ຺ເທນ ກຕໍ ຕທາ;

ເສລນ຺ຕຣາຠິນິກ຺ຂມ຺ມ, ຍຕິນ຺ໂທ ໂສ ທຍານຸໂຄ.

໓໗. ຍໂຕ ຠິກ຺ຂູ ສມູເຫຕ຺ວາ, ວາສໍ ກປ຺ເປສິ ຍຕ຺ຖ ໂສ;

ເສລນ຺ຕຣສມູໂຫ’ຕິ, ວິກ຺ຂ຺ຍາຕິໍ ໂສ ຕໂຕ ຄໂຕ.

໓໘. ຕໂຕ ປຏ຺ຐາຍ ວາເສຕ຺ວາ, ຣຕ຺ຕິຍໍ ເທວປລ຺ລິຍໍ;

ເທວຕານຸມຕໍ ຠິກ຺ຂຸໍ, ມູລຐາເນ ຐເປນ຺ຕິ ຫິ.

໓໙. ມູລຕ຺ຕມາວສນ຺ຕານໍ, ຍຕີນມນຸສາສນາ;

ລໍກິສ຺ສຣາ ປວຕ຺ຕນ຺ຕິ, ປາເລນ຺ຕາ ໂລກສາສນໍ.

໔໐. ຕສ຺ສ ທາໂຐປຕິສ຺ສສ຺ສ, ວໍສຊໍ ຣາຊປຸຕ຺ຕກໍ;

ໂພຘິໍ ປຏິຈ຺ຈ ຕພ຺ພໍສາ, ພຸທ຺ຘນາມາ ກຸມາຣິກາ.

໔໑. ອລຕ຺ຖ ໂລກິຕໍ ນາມ, ຘີຕຣໍ ວຣລກ຺ຂຓໍ;

ກາເລນ ສາ ປທິນ຺ນາ’ສິ, ໂມຄ຺ຄລ຺ລານສ຺ສ ຘີມໂຕ.

໔໒. ສາ ຕໍ ປຏິຈ຺ຈ ກິຕ຺ຕິຎ຺ຈ, ມິຕ຺ຕໍ ນາມ ກຸມາຣິກໍ;

ມຫິນ຺ທໍ ຣກ຺ຂິຕໍ ຈາປິ, ລຕິຕ຺ຖ ຈຕຸໂຣ ປຊາ.

໔໓. ອຫຸ ເຊຏ຺ຐສຸໂຕ ຘີໂຣ, ວີໂຣ ເຕຣສວສ຺ສິໂກ;

ກຕຫຕ຺ໂຖ ວິເສເສນ, ຘນຸສິປ຺ປມ຺ຫິ ໂສ ຕໂຕ.

໔໔. ກຖໍ ລງ຺ກໍ ຄເຫສ຺ສາມິ, ທູເຣຕ຺ວາ’ຣາຕິ ກຓ຺ຏກໍ;

ອິຕິ ຈິນ຺ຕາປໂຣຄາເມ, ມູລສາລວ຺ຫເຍ ວສີ.

໔໕. ເອໂກ ມຫາພໂລ ວີໂຣ, ພຸທ຺ຘຣາໂຊຕິ ວິສ຺ສຸໂຕ;

ວິໂລມວຕ຺ຕີ ຫຸຕ຺ວານ, ໂລກເສນານິໂນ ຕທາ.

໔໖. ປລາໂຕ ຈຸຓ຺ຓສາລວ຺ຫໍ, ຂິປ຺ປໍ ຊນປທໍ ຕຫິໍ;

ກິຕ຺ຕາທິເກ ຊເນ ເນເກ, ວເສ ວຕ຺ຕິຍ ສພ຺ພຖາ.

໔໗. ສທ຺ຘິໍ ພນ຺ຘູຫິ ສງ຺ຄາມ-ສູເຣຫິ ພຫຸເກຫິ ໂສ;

ມລຍາຈລປາເທສຸ, ວສີ ທຸປ຺ປສໂຫ ຕທາ.

໔໘. ຕສ຺ສ’ນ຺ຕິກມຸປາຄມ຺ມ, ສໍວຈ຺ຉຣິກນາຍໂກ;

ສງ຺ໂຆ ນາມ ກຸມາຣສ຺ສ, ສຣູປໍ ສາຘຸວໍ ພ຺ຣວິ.

໔໙. ມຫາສາມິສ຺ສ ຕນໂຍ, ເຊຏ຺ໂຐ ກິຕ຺ຕິ ສນາມໂກ;

ຘຎ຺ຎລກ຺ຂຓສມ຺ປນ຺ໂນ, ສມ຺ປນ຺ນມຕິວິກ຺ກໂມ.

໕໐. ຊມ຺ພຸທີເປປິ ຕໍ ຣຊ຺ຊໍ, ກຕ຺ຕຸເມກາຕປຕ຺ຕກໍ;

ສມຕ຺ໂຖຕິ ວິຈິນ຺ເຕປິ, ລງ຺ກາທີປມ຺ຫິ ກາ ກຖາ.

໕໑. ຕສ຺ສ ໂສ ວຈນໍ ສຸຕ຺ວາ, ເສວິຕພ຺ໂພ ກຸມາຣໂກ;

ອິຕິ ນິຈ຺ຉິຍ ເປເສສິ, ກຸມາຣສ຺ສ’ນ຺ຕິກໍ ຊເນ.

໕໒. ສຸຓິຕ຺ວາ ໂສ ວໂຈ ເຕສໍ, ນິວຕ຺ຕນຠຍາ ວິຠູ;

ອຊານຫໍ ປິຕຸນ຺ນໍ ໂສ, ວີໂຣ ຘນຸສຫາຍໂກ.

໕໓. ເຄຫາ ນິກ຺ຂມ຺ມ ປສ຺ສນ຺ໂຕ, ສຸນິມິຕ຺ຕານິເນກຘາ;

ອຄາລຫຸໍ ສຣີວຄ຺ຄ-ປິຏ຺ຐິຄາມໍ ມຫາມຕິ.

໕໔. ຕຫິໍ ໂສ ນິວສໍ ວີໂຣ, ເປສຍິຕ຺ວາ ສເສວເກ;

ວິປກ຺ຂາຘິຏ຺ຐິຕໍ ເຊສິ, ໂພຘິວາລວ຺ຫຄາມກໍ.

໕໕. ຕໂຕ’ຠິມານີ ເສນານີ, ເສນໍ ໂສ ຕຕ຺ຖ ເປສຍິ;

ສາ ປຣິກ຺ຂິປຕໍ ຄາມໍ, ສງ຺ຄາມາຍ ສມາຣຠີ.

໕໖. ກຸມາໂຣ ເຕຫິ ຍຸຊ຺ຌນ຺ໂຕ, ສຸຠໂຏ ປຏຸວິກ຺ກໂມ;

ທິສາສຸ ວິກິຣີສພ຺ເພ, ຕຸລໍ ຈຓ຺ໂຑວ ມາຬຸໂຕ.

໕໗. ຈຸຓ຺ຓສາລໍ ຊນປທໍ, ຄນ຺ຕ຺ວາ ຐານວິທູ ຕທາ;

ຕຫິໍ ວສໍ ວເສກາສິ, ສພ຺ພໍ ມລຍມຓ຺ຑລໍ.

໕໘. ຕທາປິ ເສນໍ ເສນິນ຺ໂທ, ເປເສຕ຺ວາ ອສກິໍ ສກໍ;

ອຠິຠູຕິມສກ຺ໂກນ຺ໂຕ, ກາຕຸໍ ທຸມ຺ມນຕໍ ຄໂຕ.

໕໙. ມກ຺ຂກຸທ຺ຣຸສວາສິສ຺ສ, ສຈິປສ຺ສາຖ ກິຕ຺ຕິໂນ;

ສຸໂຕ ມຫພ຺ພໂລ ເທວ-ມລ຺ໂລຕິ ວິທິໂຕ ຕທາ.

໖໐. ສຫິໂຕ ພນ຺ຘຸມິຕ຺ເຕຫິ, ພຫູ ໂຣຫຓວາສິໂນ;

ສມາທາຍາ’ຠິຄນ຺ຕ຺ວານ, ກຸມາຣໍ ປສ຺ສິ ສາທໂຣ.

໖໑. ພນ຺ຘິຍ ຉຸຣິກໍ ເຉໂກ, ໂສ ປນ຺ນຣສວສ຺ສິໂກ;

ອາທິປາທປທໍ ຕຕ຺ຖ, ສມ຺ປາປຸຓິ ມຫາຍໂສ.

໖໒. ຕໂຕ ຫິຣຎ຺ຎມລຍ, ມຸປາຄມ຺ມ ມຫພ຺ພໂລ;

ຕຫິໍ ເຣມຸຓເສລມ຺ຫິ, ຂນ຺ຘາວາຣໍ ນິພນ຺ຘຍິ.

໖໓. ຕຕ຺ຖາປິ ເສນໍ ເປເສຕ຺ວາ, ສງ຺ຄາເມນ຺ໂຕ ຈມູປຕິ;

ອລທ຺ຘວິຊໂຍ ຉນ຺ທໍ, ປຸນຍຸທ຺ເຘ ຊຫິຕໂຕ.

໖໔. ໂລກນາໂມ ຈມູນາໂຖ, ໂລກໍ ຫິຕ຺ວາ ສກໍ ຕທາ;

ອຫຸ ວສ຺ສມ຺ຫິ ຉຏ຺ເຐໂສ, ປຣໂລກປຣາຍໂນ.

໖໕. ຕທາ ກສ຺ສປນາເມໂກ, ເກສຘາຕຸກນາຍໂກ;

ຊເນ’ຠິຠູຍວຕ຺ເຕສິ, ນີຊາຓໍ ໂຣຫເຓ ຕທາ.

໖໖. ສຸຕ຺ວາ ຕໍ ໂຈຬສາມນ຺ໂຕ, ປຸຬຕ຺ຖິນຄຣາ ຕທາ;

ນິກ຺ຂມ຺ມ ຍຸທ຺ຘສນທ຺ໂຘ, ຄນ຺ຕ຺ວາ ກາຊຣຄາມກໍ.

໖໗. ເກສາຘາຕຸ ຕໂຕ ຍຸທ຺ເຘ, ຠິນ຺ທິຕ຺ວາ ທມິຬໍ ພລໍ;

ຣກ຺ຂປາສາຓສີມາຍໍ, ຐເປຕ຺ວາ ຣກ຺ຂິເຍ ຊເນ.

໖໘. ປຏິລທ຺ຘຊຍຸທ຺ທາໂມ, ມຫາເສນາ ປຸຣກ຺ຂໂຕ;

ປຸນຣາຄມ຺ມ ປາເວກ຺ຂິ, ວີໂຣ ກາຊຣຄາມກໍ.

໖໙. ຕທາທິປາໂທ ສຸຕ຺ວານ, ສພ຺ພໍ ສຸຕ຺ຖີຣຘາຕຸໂກ;

ເກສຘາຕຸໍ ນິຆາເຕຕຸໍ, ພລໍ ສນ຺ນຍ຺ຫິ ເວຄສາ.

໗໐. ປວຕ຺ຕິໍ ຕໍ ສຸຓິຕ຺ວາ ໂສ, ສາຠິມາໂນ ຠຸສໍຕໂຕ;

ສມຕ຺ຕໍ ພລມາທາຍ, ສິປ຺ປຕ຺ຖລກມາຄມາ.

໗໑. ປຎ຺ຈໂຍຊນຣຏ຺ຐາທິ-ວາສິເກສຸ ພຫູຊເນ;

ສມາທາຍ ສມາສນ຺ເນ, ຣາຊປຸຕ຺ເຕ ສຸທຸຊ຺ຊເຍ.

໗໒. ວິຣຕ຺ຕຕຎ຺ຈ ໂສ ຎຕ຺ວາ, ພຫຸນ຺ນໍ ຣຏ຺ຐວາສິນໍ;

ທຸກ຺ກຣໍ ເອຕ຺ຖ ຍຸທ຺ຘນ຺ຕິ, ຄໂຕ ໂສ ຂທິຣງ຺ຄຓິໍ.

໗໓. ມຫາເສນາຍ ຠູປາລ ສຸໂຕ ໂສຬສວສ຺ສີໂກ;

ຂິປ຺ປໍ ວາເປກ຺ຂິ ໂສ ວີຕ-ທໂຣ ກາຊຣຄາມກໍ.

໗໔. ຉມ຺ມາສມນຸໂຠຕ຺ວານ, ໂຣຫຓໍ ຣຸຏ຺ຐມານໂສ;

ເກສຘາຕຸກນາໂຖປິ, ສງ຺ຄາມຕ຺ຖາຍ ຕຕ຺ຖຄາ.