ອຏ຺ຐຈຕ຺ຕາລີສຕິມ ປຣິຈ຺ເຉທ

ເອກຣາຊໂກ

໑. ຕໂຕ ຕສ຺ສາ’ນຸໂຊ ເສໂນ, ຉຕ຺ຕໍ ອຸສ຺ສາປຍີ ປຸເຣ;

ປິຍໍ’ວ ປຸຕ຺ຕໍ ປສ຺ສນ຺ໂຕ, ສຕ຺ເຕ ສພ຺ເພ ມຫາຘໂນ.

໒. ຈຣິຍໍ ປຸພ຺ພຣາຊູນໍ, ສມາຈຣິ ຍຖາຠຕໍ;

ອປຸພ຺ພມ຺ປິ ຈ ວຕ຺ເຕສິ, ຈຣິຍໍ ຘມ຺ມສໍຫິຕໍ.

໓. ຠິກ຺ຂູນໍ ຠິກ຺ຂູນີນຎ຺ຈ, ຎາຕີນໍ ທີປວາສິນໍ;

ມຈ຺ຉານໍ ມິຄປກ຺ຂີນໍ, ກຕ຺ຕພ຺ພໍ ສ ສມາຈຣິ.

໔. ມຫິນ຺ທໍ ປຣຕີຣໍ ໂສ, ຄຕໍ ໂຍຊິຍມາຣຍິ;

ເອວໍ ໂສ ສຸວິໂສເຘສິ, ຣຊ຺ຊປຈ຺ຈຕ຺ຖິເກ’ຂິເລ.

໕. ມຫາທານໍ ປວຕ຺ເຕສິ, ຍາຈການໍ ຘເນສິນໍ;

ຠິກ຺ຂູນໍ ພ຺ຣາຫ຺ມຓານຎ຺ຈ, ມນຸຎ຺ຎໍ ຣາຊໂຠຊນໍ.

໖. ອເຫສຸໍ ອນຸຊາຕສ຺ສ, ມຫິນ຺ໂທ ກສ຺ສໂປ ຕຖາ;

ອຸທໂຍຕິ ຕໂຍ ເຕສຸ, ມຫິນ຺ໂທ ຍຸວຣາຊໂກ.

໗. ຫຸຕ຺ວາ ຕສ຺ສານຸວຕ຺ຕນ຺ໂຕ, ສກ຺ກຈ຺ຈໍ ຕມຸປຏ຺ຐຫິ;

ສງ຺ຆານາມາສິ ຣາຊສ຺ສ, ຠຣິຍາ ຕສ຺ສ ຣາຊິນີ.

໘. ກີຬນຕ຺ຖໍ ສມຸທ຺ທສ຺ສ, ຄເຕ ຣາຊິນິ ປຏ຺ຏນໍ;

ອຸທໂຍ ອາທິປາໂທໂສ, ໂອຫີໂນ ນຄເຣ ຕທາ.

໙. ນາລນາມໍ ຄເຫຕ຺ວານ, ຘີຕຣໍ ມາຓິລານິຍາ;

ຣກ຺ຂິຕໍ ຣາຊຣກ຺ຂາຍ, ປຸຬຕ຺ຖິນຄຣໍ ອຄາ.

໑໐. ຣາຊາ ຕສ຺ມິໍ ອກຸຊ຺ຌິຕ຺ວາ, ສນ຺ຘິໍ ກຕ຺ວາ ອກຸປ຺ປິຍໍ;

ມຫາທີປາທໍ ເປເສຕ຺ວາ, ໂຕສຕ຺ວາ ຕໍ ອິຘານຍິ.

໑໑. ເອວໍ ສມຄ຺ຄາ ເຕ ອາສຸໍ, ຕໂຕ ປຏ຺ຐາຍ ຂຕ຺ຕິຍາ;

ຣກ຺ຂນ຺ຕາ ສາສນໍ ໂລກໍ, ວສິໍສຸ ສຸສມາຫິຕາ.

໑໒. ຕໂຕ ເກນຈິ ກາເລນ, ປຓ຺ຑຸຣາຊາ ມຫາພໂລ;

ຊມ຺ພຸທີປາ ອິຘາ’ຄມ຺ມ, ທີປ ຄຓ຺ຫິຕຸມາຣຠິ.

໑໓. ຣາຊາ ສຸຕ຺ວາ ມຫາເສນໍ, ເປສຸຍິຕ຺ຖ ຕທນ຺ຕິກໍ;

ອມຈ຺ຈານໍ ວິວາເທນ, ຖທ຺ໂຘຕາໂຣ ນາຣາຘິໂປ.

໑໔. ປຓ຺ຑຸຣາຊາ ວິນາເສນ຺ໂຕ, ສພ຺ພໍ ຕໍ ເທສມຸຕ຺ຕຣໍ;

ຂນ຺ຘາວາຣໍ ນິເວເສສິ, ມຫາຕາລິຕຄາມເກ.

໑໕. ວສນ຺ຕາ ທມິຬາ ເອຕ຺ຖ, ພຫໂວ ເຍ ຕຫິໍ ຕຫິໍ;

ສພ຺ເພ ຕໍ ປກ຺ຂິຍາເຫສຸໍ, ຕໂຕ ໂສ ພລວາ ອຫຸ.

໑໖. ຕຕ຺ຖ ຄນ຺ຕາ ມຫາເສນາ, ຣຎ຺ໂຎ ຍຸຊ຺ຌິຕຸມາຣຠິ;

ຫຕ຺ຖິກ຺ຂນ຺ຘຄໂຕ ປຓ຺ຑຸ-ຣາຊາປິ ສມຸປາວິສິ.

໑໗. ອຫຸ ທມິຬເສນາສາ, ປສ຺ສນ຺ຕິ ສາມິໂນ ມຸຂໍ;

ສມ຺ປຕ຺ຕພລຫຸສ຺ສາຫາ, ຕທຕ຺ເຖ ຈຕ຺ຕຊີວິຕາ.

໑໘. ທີປເສນາ ຕຸ ສາມິນ-ມຠາເວນ ນິຣຸສ຺ສຸກ຺ກາ;

ຍຸຊ຺ຌນ຺ຕິ ປຣິຠິນ຺ທິຕ຺ວາ, ປລາຍິຕ຺ຖ ຕໂຕ ຕໂຕ.

໑໙. ໂອຕຣິຕ຺ຖມຫາເສນາ, ປຓ຺ຑຸຣາຊາສ຺ສ ຕງ຺ຂເຓ;

ມາຣເສນາວ ຄຈ຺ຉນ຺ຕິ, ວິຈຸຓ຺ເຓນ຺ຕິ ມຫາຊນໍ.

໒໐. ຣາຊາ ເສນາຍ ຠິນ຺ນຕ຺ຕໍ, ສຸກ຺ກາ ສພ຺ພໍ ສມາທິຍ;

ຫຕ຺ຖສາຣໍ ປຸຣໍ ຫິຕ຺ວາ, ມລຍາຠິມຸໂຂ ຄໂຕ.

໒໑. ຕໂຕ ຫຕ຺ຖິໍ ສມາຣຸຍ຺ຫ, ຍຸວຣາຊາ ມຫິນ຺ທໂກ;

ຍຸຊ຺ຌນ຺ໂຕ ສກເສນາຍ, ປລາຕຕ຺ຕໍ ສເມກ຺ຂິຍ.

໒໒. ເອເກນເມ ນ ສກ຺ກາ ເວ, ສພ຺ເພ ເອເຕຫິ ມາຣິຕຸໍ;

ເອເຕສໍ ນ ຈ ນີຈານໍ, ຫຕ຺ເຖສຸ ມຣຓໍ ສຸຂໍ.

໒໓. ຕສ຺ມາ ວຣໍ ເມ ມຣຓໍ, ມຍາ ເອເວຕິ ຈິນ຺ຕິຍ;

ຫຕ຺ຖິກ຺ຂນ຺ຘຄໂຕເຍວ, ຉິນ຺ທິ ໂສ ສີສມຕ຺ຕໂນ.

໒໔. ຕໍ ທິສ຺ວາ ພຫໂວ ສີເສ, ຕຕ຺ຖ ຉິນ຺ທິໍສຸ ເສວກາ;

ຕໍ ທິສ຺ວາ ທມິຬີ ເສນາ, ຫຏ຺ຐຕຸຏ຺ຐາ ປໂມທິສາ.

໒໕. ເອຕໍ ສພ຺ພໍ ສເມກ຺ຂິຕ຺ວາ, ອາທາປາໂທ ສກສ຺ສໂປ;

ຕຸຣງ຺ຄວຣມາຣຸຍ຺ຫ, ສຸສນ຺ນທ຺ໂຘ ມຫາຍຸໂຘ.

໒໖. ວິຫາຣມຸປສງ຺ກມ຺ມ, ອຠຍໍ ເອກໂກວ ໂສ;

ຕາທິສມ຺ປິ ມຫາເສນໍ, ໂອຄາເຫຕ຺ວາ ວິທາຣຍິ.

໒໗. ສຸປຓ຺ໂຓ ວິຍ ຄຓ຺ຫນ຺ໂຕ, ຠູຊເຄນ ສລິລາລ ເຍ;

ໂສ ຕໍ ສພ຺ພໍ ນິວຕ຺ເຕສິ, ອຕ຺ຕານຎ຺ຈ ສຸໂຄປຍິ.

໒໘. ອສ຺ໂສ ເອໂກວ ທິສ຺ສິຕ຺ຖ, ຕຸຣງ຺ຄາວລິສນ຺ນິໂຠ;

ອຕ຺ຕໂນ ໂສ ຊນໍ ກຎ຺ຈິ, ອປສ຺ສນ຺ໂຕ’ນຸຄາມິນໍ.

໒໙. ກິໍ ເມ ເອເກນ ເວຣິນໍ, ປູຣິເຕນ ມໂນຣຖໍ;

ກາລນ຺ຕເຣຫໍ ຊີວນ຺ໂຕ, ປູເຣສ຺ສໍ ເມ ມໂນຣຖໍ.

໓໐. ຕສ຺ມາ ຄນ຺ຕຸໍວ ຍຸຕ຺ຕນ຺ຕິ, ນິມ຺ໂຜເຏຕ຺ວາ ມຫາພລໍ;

ນິພ຺ຠໂຍວ ມຫາໂຍໂຘ, ໂກຓ຺ຑິວາຕມຸປາຄມິ.

໓໑. ປຓ຺ຑຸຣາຊາ ມຫາເສນາ, ອຄ຺ຄເຫສິ ຕໂຕ ປຸຣໍ;

ສີສໍ ຕໍ ຍຸວຣາຊສ຺ສ, ປຓ຺ຑຸຣາຊສ຺ສ ທສ຺ສຍຸໍ.

໓໒. ໂສ ຕໍ ທິສ຺ວາ ຈ ຌາເປຕ຺ວາ, ຣາຊູນໍ ປຓ຺ຑຸເທສິນໍ;

ສພ຺ພມາຬາຫເນ ກິຈ຺ຈໍ, ຕສ຺ສ ກາຕຸໍ ນິໂຍຊຍິ.

໓໓. ສພ຺ພໍ ສາຣໍ ຫຣາເປສິ, ຠຓ຺ຑາຄາຣມ຺ຫິ ຣາຊິໂນ;

ອຄ຺ຄຓ຺ຫິຕ຺ຖ ຄເຫຕພ຺ພໍ, ວິຫາເຣ ນຄເຣປິ ຈ.

໓໔. ປາສາເທ ຣຕເນ ສພ຺ເພ, ໂສວຓ຺ຓໍສຕ຺ຖຸພິມ຺ພກໍ;

ສິລາມຍ ມຸນິນ຺ທສ຺ສ, ຈກ຺ຂຸຠູກ ມຓິທ຺ວຍໍ.

໓໕. ຕຖາ ໂສວຓ຺ຓປຏ຺ເຏ ຈ, ຖູປາຣາມມ຺ຫິ ເຈຕິເຍ;

ສຸວຓ຺ຓ ປຏິມາໂຍ ຈ, ວິຫາເຣສຸ ຕຫິໍ ຕຫິໍ.

໓໖. ສພ຺ພໍ ຄເຫຕ຺ວາ ນິສ຺ສາຣໍ, ລງ຺ກາທີປ ມກາສິ ໂສ;

ຉຑ຺ຑຍິຕ຺ຖ ປຸຣໍ ຣມ຺ມ, ຍກ຺ຂຠກ຺ຂິຕ ຣູປກໍ.

໓໗. ຣາຊາ’ປິ ຣກ຺ຂໍ ທຕ຺ວານ, ມຫາມຄ຺ເຄ ຕຫິໍ ຕຫິໍ;

ຄງ຺ຄາທ຺ວຍ ມຸເຂ ວາສໍ, ກປ຺ເປສິ ປຣິສງ຺ກິໂຕ.

໓໘. ປຓ຺ຑຸຣາຊາ ຕໂຕ ສທ຺ຘິໍ, ກາຕຸໍ ສີຫຬສາມິນາ;

ອມຈ຺ເຈ ຕຕ຺ຖ ເປເສສິ, ທິສ຺ວາ ເຕ ສີຫລາຘິໂປ.

໓໙. ສຸຓິຕ຺ວາ ສາສນໍ ເຕສໍ, ສພ຺ພໍ ຕໍ ສມ຺ປຏິຈ຺ຉິຍ;

ທູຕານໍ ກາຣຍິຕ຺ວານ, ຍຖາກາເມນ ສງ຺ຄຫໍ.

໔໐. ຫຕ຺ຖິທ຺ວຍໍ ສທຕ຺ວານ, ສພ຺ພມາຠຣຓມ຺ປິ ຈ;

ຕສ຺ສ ເປເສສິ ທູເຕໂສ, ອຕ຺ຕໂນປິ ຫິຕາວເຫ.

໔໑. ປຓ຺ຑຸຣາຊາ ສິຕໍ ສພ຺ພໍ, ທິສ຺ວາ ສນ຺ຕຸຏ຺ຐມານໂສ;

ນິຍ຺ຍາເຕຕ຺ວານ ທູຕານໍ, ຕທເຫວ ມຫາປຸຣໍ.

໔໒. ນິກ຺ຂມິຕ຺ວາ ປຸຣາ ຄນ຺ຕ຺ວາ, ນ ຈິເຣເນວ ປຏ຺ຏນໍ;

ຕຕ຺ຖ ອາຣຸຍ຺ຫ ນາວໍ ໂສ, ສກ ເທສ ມຸປາຄມິ.

໔໓. ຕໂຕ ອາຄມ຺ມ ນຄຣໍ, ສີລາເມໂຆ ມຫີປຕິ;

ຍຖາຐາເນ ຐເປຕ຺ວານ, ທີປໍ ວສິ ສມາຫິໂຕ.

໔໔. ຠາຕຣໍ ທຸຕິຍໍ ກຕ຺ວາ, ອຸທຍໍ ນາມ ຂຕ຺ຕິຍໍ;

ມຫາທີປາທໍ ຕສ຺ສາ’ທາ, ໂສຄຕ຺ຖໍ ທກ຺ຂິຓໍ ທິສໍ.

໔໕. ໂສປິ ໂຂ ນ ຈິເຣເນວ, ກຕ຺ວາ ປຸຎ຺ຎໍ ຍຖາຣຫໍ;

ໂຣເຄເນເກນ ສມ຺ຜຸຏ຺ໂຐ, ປວິຏ຺ໂຐ ມຈ຺ຈຸໂນ ມຸຂໍ.

໔໖. ກສ຺ສໂປ ອາທິປາໂທປິ, ປຸລຕ຺ຖິນຄເຣ ວສໍ;

ໂຍເຊຕ຺ວາ ປຓ຺ຑຸຣາເຊນ, ອໂຫສິ ກິຣ ມາຣິໂຕ.

໔໗. ຕທາ ກສ຺ສປນາມສ຺ສ, ປຸຕ຺ຕາ ອາສຸໍ ມຫາຣຫາ;

ອາທິປາທສ຺ສ ຈຕ຺ຕາໂຣ, ຘຎ຺ຎລກ຺ຂຓ ສຎ຺ຎຸຕາ.

໔໘. ໂຍ ເສນໍ ສພ຺ພປຐໂມ, ເສໂນ ນາມ ກຸມາຣໂກ;

ສູໂຣ ວີໂຣ ມຫຸສ຺ສາໂຫ, ຣາຊຠາຣກ຺ຂໂມ ສໂມ.

໔໙. ຣາຊາ ມຫາທີປາທຕ຺ຕໍ, ຕສ຺ສ ທຕ຺ວາ ຍຖາວິຘິໍ;

ໂຠຄຕ຺ຖໍ ທກ຺ຂິຓໍ ເທສໍ, ສວາຫນ ມຸປາທິສິ.

໕໐. ໂຣຫຓາຘິປຕິສ຺ສາ’ສຸໍ, ປຸຕ຺ຕາ ກິຕ຺ຕຄ຺ຄໂພຘິໂຕ;

ຈຕ຺ຕາໂຣ ຘີຕໂຣ ຕິສ຺ໂສ, ທສ຺ສເນຍ຺ຍາ ມໂນຣມາ.

໕໑. ຕທາ ເຊຏ຺ຐສຸຕໍ ຕສ຺ສ, ມຫິນ຺ທໍ ນາມ ຂຕ຺ຕິຍໍ;

ປິຕຸຈ຺ຉາ ມາຣຍິຕ຺ວານ, ເທສໍ ຄຓ຺ຫິ ສສາຘນໍ.

໕໒. ຠາຕໂຣ ເຕ ຕໂຍ ຕສ຺ມິໍ,

ສໍຣຸຏ຺ຐາ ຠາຕຸ ຆາຕເນ;

ອາທາຍ ຠຄີນີ ຕິສ຺ໂສ,

ຣຎ຺ໂຎ ສນ຺ຕິກມາຄມຸໍ.

໕໓. ຣາຊາປິ ທິສ຺ວາ ເຕຕີວ, ມມາຍນ຺ໂຕ ທຍາລຸໂກ;

ສພ຺ເພ ເທວກຸມາເຣວ, ສຸຂໍ ວຑ຺ເຒສິ ເປມວາ.

໕໔. ຕໂຕ ກສ຺ສປນາມໍ ໂສ, ເຕສໍ ເຊຏ຺ຐໍ ນຣິສ຺ສໂຣ;

ເທສໍ ຕໍ ຄຓ຺ຫ ຍາຫີຕິ, ທຕ຺ວາ ພລມເປສຍິ.

໕໕. ໂສ’ປິ ຄນ຺ຕ຺ວານ ຕໍ ຫນ຺ຕ຺ວາ, ໂຣຫຓໍ ກສິຓມ຺ປິ ຕໍ;

ກຕ຺ວາ ຫຕ຺ຖຄຕໍ ຕຕ຺ຖ, ວສິຕ຺ຖ ນິຣຸປທ຺ທໂວ.

໕໖. ອຖ ໂສ ຠາຕໂຣ ທ຺ເວ’ປິ, ເສນຎ຺ຈ ອຸທຍໍ ຕຖາ;

ປກ຺ໂກສິຕ຺ວານ, ຠາເຊຕ຺ວາ, ເທສໍ ເຕຫິ ສຫາວສິ.

໕໗. ຣາຊາ ຕາ ສາຘຸ ວຑ຺ເຒຕ຺ວາ, ວຍປຕ຺ຕາສຸ ຕີສຸ ໂສ;

ຣາຊກຎ຺ຎາສຸ ຘຎ຺ຎາສຸ, ເທວຈ຺ຉຣສູ ຣູປິສຸ.

໕໘. ຐເປຕ຺ວາ ຣາຊິນິ ຐາເນ, ອຸປຣາຊສ຺ສ ທາປຍິ;

ສງ຺ຆນາມໍ ມຫາໂຠຄໍ, ທຕ຺ວາ ຣຊ຺ຊສຣິກ຺ຂກໍ.

໕໙. ກຓິຏ຺ໂຐ ອຸປຣາຊສ຺ສ, ມຫິນ຺ໂທ ນາມ ຠາຕຸໂກ;

ອຕ຺ຖິ ສພ຺ພຄຸໂຓເປໂຕ, ສພ຺ພສຕ຺ຖວິສາຣໂທ.

໖໐. ຕສ຺ສາ’ທາສິ ທຸເວ ຣາຊາ, ຣາຊກຎ຺ຎາ ມໂນຫຣາ;

ຕິສ຺ສວ຺ຫກິຕ຺ຕ ນາມຎ຺ຈ, ທຕ຺ວາ ໂຠຄໍ ຍຖາຣຸຈິໍ.

໖໑. ເອວໍ ກໂຣນ຺ໂຕ ຎາຕີນໍ, ສໍຄຫໍ ໂສ ຍຖາຣຫໍ;

ອາຣາເຘນ຺ໂຕ ຈ ທານາທິ-ສງ຺ຄເຫຫິ ມຫາຊນໍ.

໖໒. ຣາຊາ ທສຍິ ຣາຊູນໍ, ຘມ຺ເມຫິ ສມຸປາຄໂຕ;

ສມາຈຣນ຺ໂຕ ປຸຎ຺ຎານິ, ປຣິຠຸຎ຺ຊິຕ຺ຖ ເມທິນິໍ.

໖໓. ປໍສຸກູລິກ ຠິກ຺ຂູນໍ, ກຕ຺ວາ’ຣິຏ຺ຐມ຺ຫິ ປພ຺ພເຕ;

ມຫາໂຠຄໍ ອທາຣາມໍ, ນິມ຺ມິຕໍ ວິຍ ອິທ຺ຘິຍາ.

໖໔. ປຣິຫາຣຎ຺ຈ ຕສ຺ສທາ, ຣາຊາຣຫມເສສໂຕ;

ອາຣາມິເກ ຈ ພຫໂວ, ທາເສ ກມ຺ມກເຣປິ ຈ.

໖໕. ປາສາທໍ ໂສວ ກາເຣສິ, ວິຫາເຣ ເຊຕນາມເກ;

ອເນກຠູມິໍ ຠູມິນ຺ໂທ, ພຸທ຺ຘຠູມິຄຕາສໂຍ.

໖໖. ວຑ຺ເຒຕ຺ວາ ຕຕ຺ຖ ກາເຣຕ຺ວາ, ສພ຺ພ ໂສວຓ຺ຓຍໍ ຊິນໍ;

ສຓ຺ຐເປຕ຺ວາ ມຫາໂຠຄໍ, ວສາເປສິ ຈ ຠິກ຺ຂໂວ.

໖໗. ມຫາທິ ປຣິເວຓມ຺ຫິ, ກາເຣສິ ສຸມໂນຫຣໍ;

ປາສາທ ມຄ຺ຄິສນ຺ທໍຑ຺ຒໍ, ຕສ຺ມິໍເຍວ ວິຫາຣເກ.

໖໘. ກຕ຺ວາ ວີຣງ຺ກຸຣາຣາມໍ, ວິຫາເຣ ອຠຍຸຕ຺ຕເຣ;

ມຫາສງ຺ຆິກ ຠິກ຺ຂູນໍ, ເຖຣິຍານຎ຺ຈ ທາປຍິ.

໖໙. ປຸພ຺ພາຣາມຎ຺ຈ ກາເຣສິ, ສມ຺ປນ຺ນ ຈຕຸປຈ຺ຈຍໍ;

ສທ຺ຘິໍ ໂສ ສງ຺ຆນາມາຍ, ເທວິຍາປິ ຈ ອຕ຺ຕໂນ.

໗໐. ມຫາວິຫາເຣຕາເຍວ, ສທ຺ຘິໍ ກາເຣສິ ຠູມິໂປ;

ອາວາສໍ ສງ຺ຆເສນວ຺ຫໍ, ມຫາໂຠຄໍ ມຫາມຕິ.

໗໑. ກາເຣຕ຺ວາ ສພ຺ພໂສວຓ຺ຓໍ, ເກສຘາຕຸ ກຣຓ຺ຑກໍ;

ມຫາປູຊໍ ປວຕ຺ເຕສິ, ຣຊ຺ຊໍ ວິສ຺ສຊ຺ຊິ ອຸຕ຺ຕໂມ.

໗໒. ເຈຕິຍສ຺ສ ຄີຣິສ຺ສາທາ, ກາຓວາປິໍ ພຫຸທຍໍ;

ຠິກ຺ຂູນໍ ທິປວາສີນໍ, ທາເປສິ ຈ ຕິຈີວຣໍ.

໗໓. ປຸລຕ຺ຖິ ນຄເຣ ກາສິ, ວາປິໂຍ ຖຸສວາປິຍາ;

ເສນຄ຺ຄໂພຘິມາວາສໍ, ຄາມາຣາມິກ ສຎ຺ຎຸຕໍ.