ເຕຈຕ຺ຕາລີສຕິມ ປຣິຈ຺ເຉທ

ຈຕຸຣາຊໂກ

໑. ຕໂຕ ວິຊິຕສງ຺ຄາໂມ, ກສ຺ສໂປ ປຸຣິຕາສໂຍ;

ມຫາປາຬິມ຺ຫິ ສງ຺ຆສ຺ສ, ສມິທ຺ຘໍ ໂຠຊນໍ ອກາ.

໒. ນາຄສາລາ ນິວາສິໍ ໂສ, ມຫາຘມ຺ມກຖິໍ ຍຕິໍ;

ມຫາປູຊາຍ ປູເຊຕ຺ວາ, ສທ຺ຘມ຺ມໍ ເຕນ ວາຈຍິ.

໓. ວສນ຺ຕໍ ຠາຕຸອາວາເສ, ສມຸທ຺ທິສ຺ສ ລິຂາປຍິ;

ກຏນ຺ຘກາຣວາສິໍ ໂສ, ປາຬິ ສພ຺ພໍ ສສງ຺ຄຫໍ.

໔. ຊິຓ຺ຓໍ ສງ຺ຂຣິກມ຺ມຎ຺ຈ, ນວໍ ກາເຣສິ ເຈຕິເຍ;

ສງ຺ຆໂຠຄມເນກຎ຺ຈ, ຕຕ຺ຖ ຕຕ຺ຖ ປວຕ຺ຕຍິ.

໕. ນານາມຓິສມຸຊ຺ໂຊຕໍ, ກາສິ ຈູຬມຓິຕ຺ຕຍໍ;

ສຕໍ ປຓ຺ຑຸປລາສານໍ, ວຕ຺ຖທາເນນ ຕປ຺ປຍິ.

໖. ຕສ຺ສາສຸໍ ພຫໂວ ປຸຕ຺ຕາ, ເຊຏ຺ໂຐ ເຕສຎ຺ຈ ມາຓໂກ;

ສພ຺ເພ ເຕ ນ ວຍປ຺ປຕ຺ຕາ, ພາລາວິຄຕພຸທ຺ຘິໂນ.

໗. ຕໂຕ ໂສ ພ຺ຍາຘິນາ ຜຸຏ຺ໂຐ, ອເຕກິຈ຺ເຉນ ເກນຈິ;

ປຸຕ຺ຕາ ເມ ພາລກາ ສພ຺ເພ, ເນ’ເຕ ຣຊ຺ຊກ຺ຂມາ ອິຕິ.

໘. ວສນ຺ຕໍ ໂຣຫເຓ ເທເສ, ຠາຄິເນຍ຺ຍໍ ມຫາມຕິໍ;

ອາຫຸຍ ສພ຺ພໍ ປາທາສິ, ຣຊ຺ຊໍ ປຸຕ຺ເຕຫິ ອຕ຺ຕໂນ.

໙. ຄນ຺ຘມາລາທິປູຊາຫິ, ປູຊຍິຕ຺ວານ ເຈຕິເຍ;

ຠິກ຺ຂຸສງ຺ຆໍ ຂມາຘປສິ, ທຕ຺ວານ ຈຕຸປຈ຺ຈຍໍ.

໑໐. ເອວໍ ຘມ຺ມໍ ຈຣິຕ຺ວານ, ມິຕ຺ຕາມຈ຺ຈຊເນສຸ ຈ;

ຄໂຕ ນວຫິ ວສ຺ເສຫິ, ຍຖາກມ຺ມໍ ນຣາຘິໂປ.

໑໑. ກຕ຺ວາ ກຕ຺ຕພ຺ພກິຈ຺ຈໍ ໂສ, ມາຕຸລສ຺ສ ສຄາຣໂວ;

ສງ຺ຄຫນ຺ໂຕ ຊນໍ ມາໂຓ, ທມິເຬ ນີຫຣາປຍິ.

໑໒. ເອກໂຕ ທມິຬາ ຫຸຕ຺ວາ, ນິພ຺ພາເສມ ອິມໍ ອິຕິ;

ຕສ຺ມິໍ ຐິເຕ ພຫິທ຺ຘາວ, ອຄ຺ຄເຫສຸໍ ປຸຣໍ ສຍໍ.

໑໓. ຫຕ຺ຕ ທາຐສ຺ສ ເປເສສິ, ຊມ຺ພຸທີປຄຕສ຺ສ ເຕ;

ອາຄນ຺ຕຸໍຕວ ກາໂລຕິ, ສາສນໍ ຣຊ຺ຊຄາຫເຓ.

໑໔. ມາໂຓ’ປິ ສງ຺ຆໍ ເປເສສິ, ສາສນໍ ປິຕຸໂຣຫຓໍ;

ປິຕາ ສຸຕ຺ວານ ຕໍ ອາຄາ, ນ ຈີເຣເນວ ໂຣຫຓາ.

໑໕. ອຸເຠ ເຕ ມນ຺ຕຍິຕ຺ວານ, ອກໍສຸ ສນ຺ຘິເລສກໍ;

ອຸມິເຬຫິ ຕໂຕ ຊາຕາ, ສພ຺ເພ ເຕ ສມວຸຕ຺ຕິໂນ.

໑໖. ຕໂຕ ໂສ ປິຕຣໍ ຣຊ຺ເຊ, ອຠິສິຎ຺ຈິຕ຺ຖ ມາຓໂກ;

ໂສ’ຠິສິຕ຺ໂຕ ນິກາຍານໍ, ສຫສ຺ສານໍ ຕຍໍ ອທາ.

໑໗. ສງ຺ຆໍ ຣຏ຺ຐຎ຺ຈ ສງ຺ຄຍ຺ຫ, ສພ຺ພໍ ຣາຊກຸລຏ຺ຐິຕໍ;

ຠຓ຺ຑໍ ເປເສສິ ສຕ຺ຕູຫິ, ຣກ຺ຂຓຕ຺ຖາຍ ໂຣຫຓໍ.

໑໘. ຫຕ຺ຖທາໂຐປິ ສຸຕ຺ວານ, ທມິຬານໍ ຕຸ ສາສນໍ;

ຂເຓນາ’ຄາ ອິມໍ ທີປໍ, ຄເຫຕ຺ວາ ທມິຬ຺ຫໍ ພລໍ.

໑໙. ຕທາ ເຕ ທມິຬາ ສພ຺ເພ, ປຣິຠູຕາ ອິຘ ຐິຕາ;

ອາຍນ຺ຕເມວ ຕໍ ຄນ຺ຕ຺ວາ, ປຣິວາເຣສຸ ມຎ຺ຊເສ.

໒໐. ມາໂຓປິ ສຸຕ຺ວາ ຕໍ ສພ຺ພໍ, ນາຍໍ ກາໂລຕິ ຍຸຊ຺ຌິຕຸໍ;

ເປເສຕ຺ວາ ປິຕຸຣາຊານໍ, ສທ຺ຘິໍ ສາເຣນ ໂຣຫຓໍ.

໒໑. ປຸພ຺ພເທສໍ ສຍໍ ຄນ຺ຕ຺ວາ, ສງ຺ຄຓ຺ຫນ຺ໂຕ ຊນໍ ວສີ;

ລທ຺ຘາ ທມິຬປກ຺ຂໍ ໂສ, ຄເຫຕ຺ວາ ຣາຊກໍ ປຸຣໍ.

໒໒. ທາໂຐປຕິສ຺ໂສ ຣາຊາຕິ, ນາມໍ ສາເວຕິ ອຕ຺ຕໂນ;

ມາຕຸລໍ ວິຍ ຕໍ ໂລໂກ, ເຕນ ນາເມນ ໂວຫຣິ.

໒໓. ປິຕຸຈ຺ຉປຸຕ຺ຕມາເນຕ຺ວາ, ອຄ຺ຄໂພຘິ ສນາມກໍ;

ຐເປຕ຺ວາ ຍຸວຣາຊຕ຺ເຕ, ເທສຎ຺ຈາ’ທາສິ ທກ຺ຂິຓໍ.

໒໔. ຐານນ຺ຕຣຎ຺ຈ ປາທາສິ, ນິສ຺ສິຕານໍ ຍຖາຣຫໍ;

ສາສນສ຺ສ ຈ ໂລກສ຺ສ, ສພ຺ພໍ ກຕ຺ຕພ຺ພມາຈຣິ.

໒໕. ມຫາປາຬິມ຺ຫິ ທາເປສິ, ສວຕ຺ຖໍ ທຘິຠຕ຺ຕກໍ;

ຂີຣໍ ປາຍາສກຎ຺ເຈວ, ຘມ຺ມໍ ສຸຓິ ອຸໂປສຖິ.

໒໖. ກາເຣຕ຺ວາ ສພ຺ພປູຊາໂຍ, ເທສາ ເປຕ຺ວານ ເທສນໍ;

ເອວມາທີຫິ ປຸຎ຺ເຎຫິ, ອຕ຺ຕານໍ’ກາສິ ຠທ຺ທກໍ.

໒໗. ກສ຺ສປສ຺ສ ວິຫາຣສ຺ສ, ທຕ຺ວາເສນວ຺ຫຄາມກໍ;

ມຫາຄລ຺ລຎ຺ຈ ປາທາສິ, ປຘານຆຣກສ຺ສ ໂສ.

໒໘. ປຣິເວຓສ຺ສ ໂມຣສ຺ສ, ອກາສິ ສກຄາມກໍ;

ຖູປາຣາມສ຺ສ ປຸຓ຺ໂຓຬິໍ, ທຕ຺ວາ ສກ຺ກາສິ ເຈຕິຍໍ.

໒໙. ກປ຺ປູຣປຣິເວຓໍ ໂສ, ກາເຣສິ ອຠຍຸຕ຺ຕເຣ;

ວິຫາຣໍ ຕິປຸຖຸລ຺ລວ຺ຫໍ, ກຕ຺ວາ ຕສ຺ເສວ ທາປຍິ.

໓໐. ຕສ຺ມິໍ ກໂຣນ຺ເຕ ວາເຣສຸໍ, ສີມາຍນ຺ໂຕ’ຕິ ຠິກ຺ຂໂວ;

ເຖຣິຍາ ເຕ ກິພາເຫຕ຺ວາ, ພລໍ ຕເຖວ ກາຣຍິ.

໓໑. ອຖ ເຕ ເຕ ເຖຣິຍາ ຠິກ຺ຂູ, ທຸມ຺ມຎ຺ຎູ ຕຕ຺ຖ ຣາຊິນິ;

ອສ຺ສທ຺ຘໍ ຕໍ ວິທິຕ຺ວານ, ປຕ຺ຕນິກ຺ກຸຊ຺ຊນໍ ກຣຸໍ.

໓໒. ວຸຕ຺ຕຎ຺ຫິ ມຸນິນາ ເຕນ, ອສ຺ສທ຺ໂຘ ໂຍ ອຸປາສໂກ;

ອລາຠາຍ ຈ ຠິກ຺ຂູນໍ, ເຈເຕຕ’ກ຺ໂກສຕິ ຈ ເຕ.

໓໓. ປຕ຺ຕນິກຸຊ຺ຊນໍ ຕສ຺ສ, ກຕ຺ຕພ຺ພນ຺ຕິ ຕໂຕ ຫິ ເຕ;

ຕສ຺ສ ຕໍ ກມ຺ມມກຣຸໍ, ໂລໂກ ມຎ຺ຎິຕ຺ຖ ອຎ຺ຎຖາ.

໓໔. ອາທາຍຸ ກຸຊ຺ຊິຕໍ ປຕ຺ຕໍ, ຈຣນ຺ໂຕ ຠິກ຺ຂຸຠິກ຺ຂກໍ;

ນິກຸຊ຺ເຊຍ຺ຍ ຆຣທ຺ວາເຣ, ຕສ຺ສາ’ຕິ ກຖິກໍ ກຣຸໍ.

໓໕. ຕສ຺ມິໍ ໂສ ສມເຍ ຜຸຏ຺ໂຐ, ພ຺ຍາຘິນາ ມຫຕາມຣິ;

ວສ຺ສມ຺ຫິ ນວເມ ຣາຊາ, ສມ຺ປຕ຺ໂຕ ຊີວິຕກ຺ຂຍໍ.

໓໖. ທປ຺ປຸໂລປິ ຕໂຕ ຣາຊາ, ຄໂຕ ໂຣຫຓກໍ ສກໍ;

ວາສໍ ກປ຺ເປສິ ຕຕ຺ເຖວ, ກໂຣນ຺ໂຕ ປຸຎ຺ຎສຎ຺ຈຍໍ.

໓໗. ອິໂຕ ປຏ຺ຐາຍ ວກ຺ຂາມ, ຕສ຺ສ ວໍສມນາກຸລໍ;

ວຸຈ຺ຈມານມ຺ຫິ ເອຕ຺ເຖວ, ຕສ຺ມິໍ ໂຫຕິ ອສງ຺ກໂຣ.

໓໘. ຊາໂຕ ໂອກ຺ກາກວໍສມ຺ຫິ, ມຫາຕິສ຺ໂສຕິ ວິສ຺ສຸໂຕ;

ອາສິ ເອໂກ ມຫາປຸຎ຺ໂຎ, ສມາກິຓ຺ຓຄຸຓາກໂຣ.

໓໙. ຕສ຺ເສ’ກາ ຠຣິຍາ ອາສິ, ສງ຺ຆປິວາຕິ ວີສ຺ສຸຕາ;

ຘຎ຺ຎປຸຎ຺ຎຄຸຓູເປຕາ, ຘີຕາ ໂຣຫຓສາມິໂນ.

໔໐. ຕສ຺ສາປຸຕ຺ຕາ ຕໂຍ ອາສຸໍ, ປຐໂມ ອຄ຺ຄເພຘິໂກ;

ທຸຕິໂຍ ທປ຺ປຸໂລ ນາມ, ຕຕິໂຍ ມຓິອກ຺ຂິໂກ.

໔໑. ເອກາວ ຘີຕາ ຕສ຺ສາສິ, ຣາຊນມຄມາ ຈ ສາ;

ເຊຏ຺ໂຐ ໂຣຫຓນາມສ຺ສ, ເທສສ຺ສາ’ສິ ສຍໍ ວສີ.

໔໒. ມຫາປາຬິໍ ສ ກາເຣສິ, ມຫາຄາເມ ມຫາຘໂນ;

ທາຐຄ຺ຄໂພຘິນາມຎ຺ຈ, ປຣິເວຓໍ ຕຫິ ວໍໂສ.

໔໓. ກາຓຄາມມ຺ຫິ ກາຓານໍ, ຄິລານານຎ຺ຈ ສາລເກ;

ວິຫາເຣ ປຏິມາວ຺ເຫ ຈ, ມຫນ຺ຕໍ ປຏິມາຆຣໍ.

໔໔. ປຕິຏ຺ຐເປສິ ກຕ຺ວານ, ພຸທ຺ຘຕຕ຺ຖ ສິລາມຍໍ;

ມຫນ຺ຕນາມໍ ສປ຺ປຎ຺ໂຎ, ອິທ຺ຘີຫິ ວິຍ ນິມ຺ມິຕໍ.

໔໕. ສາລວາຓຎ຺ຈ ກາເຣສິ, ວິຫາຣໍ ອຕ຺ຕນາມກໍ,

ປຣິເວຓວິຫາຣຎ຺ຈ, ຕຖາ ກາຊຣຄາມກໍ.

໔໖. ນວກມ຺ມານິ ກາເຣຕ຺ວາ, ຘມ຺ມສາລວິຫາຣເກ;

ສຍໍ ວຈ຺ຈກຸຏີ ເອສ, ຕຕ຺ຖ ໂສເຘສິ ພຸທ຺ຘິມາ.

໔໗. ອຸຈ຺ຈິຏ຺ຐໍ ຠິກ຺ຂຸສງ຺ຆສ຺ສ, ໂຠຊນໍ ປຣິຠຸຎ຺ຊິຍ;

ມຓ຺ຑຄາມຎ຺ຈ ສງ຺ຆສ຺ສ, ຄາມໍ’ທາສິ ມສາທວາ.

໔໘. ປຸຎ຺ຎາເນ’ຕານິຈຎ຺ຎານິ, ກຕ຺ວາ ຕສ຺ມິໍ ທິວງ຺ຄເຕ;

ອາສີ ຕສ຺ສາ’ນຸໂຊ ຕຕ຺ຖ, ສາມິ ທປ຺ປຸລນາມໂກ.

໔໙. ອິສ຺ເສຣໍ ຕຕ຺ຖ ວຕ຺ເຕສິ, ສມ຺ປມທ຺ທິຍ ສຕ຺ຕ ໂວ;

ມຫາທານໍ ປວຕ຺ເຕສິ, ນິສ຺ສງ຺ກໍ ໂຣຫຓໍ ອຄາ.

໕໐. ຕສ຺ສ ຕຸຏ຺ໂຐ ຊໂນ ອາຫ, ມຫາສາມີຕິ ເອສໂນ;

ຕໂຕ ປຏ຺ຐາຍ ຕໍ ໂລໂກ-ມຫາສາມີຕິ ໂວຫຣິ.

໕໑. ສຸຕ຺ວານ ຕໍ ສິລາທາໂຐ, ນຣິນ຺ໂທ ສກຘີຕຣໍ;

ຕສ຺ສ ປາທາສິ ສນ຺ຕຸຏ຺ໂຐ, ຄຸເຓຫິ ພຫຸເກຫິ ຈ.

໕໒. ຍຸຊຣາຊຕ຺ຕມສ຺ສາທາ, ຣຊ຺ຊໂຍຄ຺ໂຄຕິ ມານິຕຸໍ;

ມາຓວມ຺ມາທໂຍ ຕສ຺ສ, ປຸຕ຺ຕາ ອາສຸໍ ມຫາສຍາ.

໕໓. ປາສາຓທິປວາສິສ຺ສ, ມຫາເຖຣສ຺ສ ສນ຺ຕິເກ;

ຘມ຺ມໍ ສຸຕ຺ວາ ປສີທິຕ຺ວາ, ຕສ຺ມິໍ ຕໍ ພຫຸມານິຕຸໍ.

໕໔. ວິຫາຣໍ ໂຣຫເຓ ກຕ຺ວາ, ຕສ຺ສ ປາທາສິ ໂສປິ ຕໍ;

ຈາຕຸທ຺ທິສິຍສງ຺ຆສ຺ສ, ປຣິໂຠຄາຍ ວິສ຺ສຊ຺ຊິ.

໕໕. ອມ຺ພມາລາ ວິຫາຣາທິ, ວິຫາເຣ ກາຣຍິ ພຫູ;

ຂທິຣາລິວິຫາຣຎ຺ຈ, ກຕ຺ວາ ເທວ ມປູຊຍິ.

໕໖. ປາສາທມນຸຣາຣາມໍ, ມຸຕ຺ໂຕລມ຺ພໍ ສຸຊິຓ຺ຓກໍ;

ສີຣິວຑ຺ຒຎ຺ຈ ປາສາທໍ, ຕຖາ ຕກ຺ກມ຺ພິລໍ ປຣໍ.

໕໗. ໂສເຘຕ຺ວາ ຠິກ຺ຂໂວ ຕຕ຺ຖ, ທ຺ວຕ຺ຕິໍສ ປຣິວາສຍິ;

ສພ຺ພປຈ຺ຈຍທາເນນ, ສນ຺ຕປ຺ເປຕ຺ວາ ມຫີມຕິ.

໕໘. ອທາ ເກວຏ຺ຏຄມ຺ຠີຣໍ, ຄາມໍ ນາຄວິຫາຣເກ;

ຕຖາ ຣາຊວິຫາຣສ຺ສ, ໂຄນ຺ນຄາມໍ ສມາທິຍິ.

໕໙. ອທາ ຕີສວິຫາຣສ຺ສ, ຕຖາກນ຺ຕິກປພ຺ພກໍ;

ຈິຕ຺ຕລປພ຺ພຕສ຺ສາ’ທາ, ຄາມໍ ໂສ ໂຄນ຺ນວິຏ຺ຐິກໍ.

໖໐. ທຕ຺ວາ ຣິຍາກຣສ຺ເສສ, ຄາມໍ ໂສມາລວຕ຺ຖຸກໍ;

ອກາສິ ປຏິມາເຄຫໍ, ຕເຖວ ສຸມໂນຫຣໍ.

໖໑. ຕຕ຺ຣຏ຺ຐສ຺ສ ຊິນສ຺ສາ’ກາ, ອຸຓ຺ຓໂລມໍ ມຫຄ຺ຆິຍໍ;

ເຫມປຏ຺ຏຎ຺ຈ ກາເຣສິ, ສພ຺ພໍ ປູຊາວິຘິໍ ສ’ກາ.

໖໒. ເຈຕິເຍ ປຣິຊິຓ຺ເຓ ໂສ, ສຸຘາກມ຺ເມນ ຣຎ຺ຊຍິ;

ຕິປຎ຺ຈຫຕ຺ຖໍ ກາເຣສິ, ເມຕ຺ເຕຍ຺ຍໍ ສຸຄຕໍ ປຣໍ.

໖໓. ເອວມາທິນິ ປຸຎ຺ຎານິ, ອປ຺ປເມຍ຺ຍານິ ໂສ ວິຠູ;

ອກາສິ ຈ ສຍໍ ສາຘຸ, ປຣິວາເຣຫີ ກາຣຍິ.

໖໔. ປຣິວາຣາ ຈ ຕສ຺ສາສຸໍ, ພຫູປຸຎ຺ຎກຣາ ນຣາ;

ວິຫາຣາ ເນກກາ ອາສຸໍ, ກຕາ ເຕຫິ ສປ຺ປຈ຺ຈຍາ.

໖໕. ກທາຈິ ມຄ຺ຄໍ ຄຈ຺ຉໍ ໂສ, ອຣຎ຺ຎມ຺ຫິ ອຄາມເກ;

ເສນໍ ສໍວິທຫິຕ຺ວານ, ວາສໍ ກປ຺ເປສິ ຣຕ຺ຕິຍໍ.

໖໖. ສຸນຫາຕວິລ຺ລິຕ຺ໂຕ ໂສ, ສຸຠຸຕ຺ໂຕສຍເນ ສຸເຂ;

ນິປນ຺ເນສຸ ຆເຣ ຣມ຺ເມ, ນິທ຺ທາຍິຕຸມຸປກ຺ກມິ.

໖໗. ອລຠນ຺ໂຕ ຕທາ ນິທ຺ທໍ, ກິນ຺ນຸ ໂຂ ອິຕິ ກາຣຓໍ;

ປວຕ຺ຕິໍ ອຸປຘາເຣນ຺ໂຕ, ທິວເສ ສພ຺ພມຕ຺ຕໂນ.

໖໘. ອທິສ຺ວາ ກາຣຓໍ ອນ຺ໂຕ, ອວສ຺ສໍ ພຫິ ເຫສ຺ສຕິ;

ອິຕິ ຈິນ຺ຕິຍ ໂຍເຊສິ, ມນຸສ຺ເສຕໍ ຄເວສິຕຸໍ.

໖໙. ເອວມາຫ ຈ ນິສ຺ສງ຺ກໍ, ອຍ຺ຍກາ ມມ ຣຕ຺ຕິຍໍ;

ເຕເມນ຺ຕາ ຣຸກ຺ຂມູລສ຺ມິໍ, ຐິຕາ ອາເນຖ ເຕ ອິຕິ.

໗໐. ເຕປິ ຄນ຺ຕ຺ວາ ຄເວສນ຺ຕາ, ທີປຫຕ຺ຖາ ມຫາຊນາ;

ມຫາຄາມາ’ຄເຕ ຠິກ຺ຂູ, ຣຸກ຺ຂມູລຄເຕ ຕທາ.

໗໑. ເຕ ຄນ຺ຕ຺ວາ ສາສນໍ ຣຎ຺ໂຎ, ອາໂຣເຈສຸໍ ປຘາວິໂສ;

ທິສ຺ວາ ຈ ຠິກ຺ຂຸ ສນ຺ຕຸຏ຺ໂຐ, ເນຕ຺ວາ ວາສຆຣໍ ສກໍ.

໗໒. ນິຈ຺ຈທານາຍ ຠິກ຺ຂູນໍ, ຐປິເຕ ຣຕ຺ຕຈີວເຣ;

ເຕສໍ ທຕ຺ວານ ຕິນ຺ຕານິ, ຈີວຣານິ ສມາທິຍ.

໗໓. ສຸກ຺ຂາປິຍ ຈ ກຕ຺ວານ, ປາທໂຘວນກາທິກໍ;

ນິສີທາປິຍ ເຕ ສພ຺ເພ, ສຍເນ ສາຘຸ ສນ຺ຖເຕ.

໗໔. ເຠສຊ຺ຊໍ ປຏິຍາເທຕ຺ວາ, ສຍເມໂວ’ປນາມິຍ;

ປຈ຺ຈູເສປິ ຈ ກຕ຺ວານ, ກຕ຺ຕພ຺ພໍ ໂຠຊນາທິກໍ.