ປຎ຺ຈຕິໍສຕິມປຣິຈ຺ເຉທ

ທ຺ວາທສຣາຊໂກ

໑. ອາມຓ຺ຑຄາມຓ຺ຍຠໂຍ, ມຫາທາຐິກອຈ຺ຈເຍ;

ນວວສ຺ສນຏ຺ຐມາເສ, ຣຊ຺ຊໍ ກາເຣສິ ຕໍ ສຸໂຕ.

໒. ຉຕ຺ຕາຕິ ຉຕ຺ຕໍ ກາເຣສິ, ມຫາຖູເປ ມໂນຣເມ;

ຕເຖວ ປາທເວທິຎ຺ຈ, ມຸທ຺ຘເວທິຎ຺ຈ ກາຣຍິ.

໓. ຕເຖວ ໂລຫປາສາທ, ຖູປວ຺ເຫ ໂປສຖວ຺ຫເຍ;

ກາເຣສິ ກຸຈ຺ຉິອາຊິຣໍ, ກຸຈ຺ຉິອາຬິນ຺ທເມວ ຈ.

໔. ອຸຠຍຕ຺ຖາປິ ກາເຣສິ, ຈາຣຸໍ ຣຕນປຓ຺ຑປໍ;

ຣຊຕເລຓ ວິຫາຣຎ຺ຈ, ກາຣາເປສິ ນຣາຘິເປ.

໕. ມຫາຄາເມຓ຺ຑວາປິໍໂສ, ປສ຺ເສ ກາຣິຍ ທກ຺ຂິເຓ;

ທກ຺ຂິຓສ຺ສ ວິຫາຣສ຺ສ, ອທາສິ ປຸຎ຺ຎທກ຺ຂິໂຓ.

໖. ມາຆາຕໍ ສກເລ ທີເປ, ກາເຣສິ ມນຸຊາຘິໂປ;

ວລ຺ລິຜລານິ ສພ຺ພານິ, ໂຣປາເປຕ຺ວາ ຕຫິໍ ຕຫິໍ.

໗. ມໍ ສກຸຠຓ຺ຑກໍ ນາມ, ອາມຓ຺ຑິຍ ມຫີປຕິ;

ປຕ຺ຕໍ ປູຣາປຍິຕ຺ວານ, ກາເຣຕ຺ວາ ວຕ຺ຖຈຸມ຺ພຏໍ.

໘. ທາເປສິ ສພ຺ພສງ຺ຆສ຺ສ, ວິປ຺ປສນ຺ເນນ ເຈຕສາ;

ປຕ຺ເຕ ປູຣາປຍິຕ຺ວາ ໂສ, ອາມຓ຺ຑ ຄາມຓິວິທູ.

໙. ຕງ຺ກນິຏ຺ໂຐກຓິຣາຊາ-ຕິສ຺ໂສ ຆາຕິຍ ຕາຕຣໍ;

ຕີຓິ ວສ຺ສານິ ນຄເຣ, ຣຊ຺ຊໍ ກາເຣສິ ຂຕ຺ຕິໂຍ.

໑໐. ອຸໂປສຖຆຣຏ຺ຏໍ ເອສາ, ນິຈ຺ຉິນິ ເຈກິຍວ຺ຫເຍ;

ຣາຊາປຣາຘກມ຺ມມ຺ຫິ, ປຸຕ຺ເຕ ສຏ຺ຐິຕຸ ຠິກ຺ຂໂວ.

໑໑. ສໂຫຑ຺ເຑ ຄາຫຍິຕ຺ວານ, ຣາຊາ ເຈຕິຍ ປພ຺ພເຕ;

ຂິປາເປສິ ກຓິຣວ຺ເຫ, ປພ຺ຠາຣມ຺ຫິ ອສີລເກ.

໑໒. ກຓິຣາຊາ ອຈ຺ຈເຍນ, ອາມຓ຺ຑຄາມຓິ ສຸໂຕ;

ຈູຬາຠໂຍ ວສ຺ສເມກໍ, ຣຊ຺ຊໍ ກາເຣສິ ຂຕ຺ຕິໂຍ.

໑໓. ໂສ ໂຄຓກນທີຕີເຣ, ປຸຣປສ຺ສມ຺ຫິ ທກ຺ຂິເຓ;

ກາຣາເປສິ ມຫີປາໂລ, ວິຫາເຣ ຈູຬຄລ຺ລກໍ.

໑໔. ຈູຬາຠຍສ຺ສ’ຈ຺ຈ ເຍນ, ສີວລິ ຕໍ ກນິຏ຺ຐິກາ;

ອາມຓ຺ຑຘີຕາ ຈຕຸໂຣ, ມາເສ ຣຊ຺ຊມກາຣຍິ.

໑໕. ອາມຓ຺ຑ ຠາຄິເນຍ຺ຍາ ຕຸ, ສີວລິໍ ອປນີຍຕໍ;

ອິຬນາໂຄຕິ ນາເມນ, ຉຕ຺ຕໍ ອຸສ຺ສາປຍິ ປຸເຣ.

໑໖. ຕິສ຺ສວາປິໍ ຄເຕ ຕສ຺ມິໍ, ອາທິວສ຺ເສ ນຣາຘິເປ;

ຕໍ ຫິຕ຺ວາ ປຸຣມາຄຎ຺ຉຸໍ, ພຫໂວລມ຺ພກຓ຺ຓກາ.

໑໗. ຕຫິໍ ອທິສ຺ວາ ເຕ ຣາຊາ, ກຸທ຺ໂຘ ເຕຫິ ອກາຣຍິ;

ມທ຺ທຍໍ ວາປິຍາ ປສ຺ເສ, ມຫາຖູປຎ຺ຊສໍສຍໍ.

໑໘. ເຕສໍ ວິຈາຣເກ ກຕ຺ວາ, ຈຓ຺ຑາເລ ຈ ຐປາປຍິ;

ເຕນ ກຸທ຺ຘາລມ຺ພກຓ຺ຓາ, ສພ຺ເພ ຫຸຕ຺ວານ ເອກໂຕ.

໑໙. ຣາຊານໍ ຕໍ ຄເຫຕ຺ວານ, ຣຸນ຺ຘິຕ຺ວານ ສເກ ຆເຣ;

ສຍໍ ຣຊ຺ຊໍ ວິຈາເຣສຸໍ, ຣຎ຺ໂຎ ເທວີ ຕທາ ສກໍ.

໒໐. ປຸຕ຺ຕໍ ຈນ຺ທມຸຂສິວໍ, ມຓ຺ຑຍິຕ຺ວາ ກຸມາຣກໍ;

ທຕ຺ວານ ຫຕ຺ເຖ ຘາຕີນໍ, ມງ຺ຄລຫຕ຺ຖິ ສນ຺ຕິເກ.

໒໑. ເປເສສິ ວຕ຺ວາ ສນ຺ເທສໍ, ເນຕ຺ວາ ຕໍ ຘາຕິໂຍ ຕຫິໍ;

ວທິໍສຸ ເທວິສນ຺ເທສໍ, ສພ຺ພໍ ມງ຺ຄລ ຫຕ຺ຖິໂນ.

໒໒. ‘‘ອຍໍ ເຕ ສາຘິໂນ ປຸຕ຺ໂຕ,

ສາມິໂກ ຈາຣເກ ຐິໂຕ;

ອຣິຫິ ຆາຕໂຕ ເສໂສ,

ຕຍາ ຆາໂຕ ອິມສ຺ສ ຕຸ.

໒໓. ຕ຺ວເມນໍ ກິຣ ຆາເຕຫິ, ອິທໍ ເທວິວໂຈ’’ອິຕິ;

ວຕ຺ວາ ຕຸ ສຍາເປສຸໍ, ປາທມູລມ຺ຫິ ຫຕ຺ຖິໂນ.

໒໔. ທຸກ຺ຂິໂຕ ໂສ ຣຸທິຕ຺ວານ, ນາໂຄ ເຠຕ຺ວານ ອາຬກໍ;

ປວິສິຕ຺ວາ ມຫາວຕ຺ຖຸໍ, ທ຺ວາຣໍ ປາຕິຍ ຖາມສາ.

໒໕. ຣຎ຺ໂຎ ນິສິນ຺ນງ຺ຄຓມ຺ຫິ, ອຸຄ຺ຆາເຏຕ຺ວາ ກວາຏກໍ;

ນິສີທາປິຍ ຕໍ ຂນ຺ເຘ, ມຫາຕິຕ຺ຖມຸປາຄມິ.

໒໖. ນາວໍ ອາໂຣ ປຍິຕ຺ວານ, ຣາຊານໍ ຕຕ຺ຖ ກຸຎ຺ຊໂຣ;

ປຈ຺ຉິໂມ ທຘິຕີເຣນ, ສຍໍ ມລຍ ມາຣຸຫີ.

໒໗. ປຣຕີເຣ ວສິຕ຺ວາ ໂສ, ຕີຓິວສ຺ສານິ ຂຕ຺ຕິໂຍ;

ພລກາຍໍ ຄເຫຕ຺ວານ, ອາຄາ ນາວາຕິ ໂຣຫຓໍ.

໒໘. ຕິຕ຺ເຖ ສກ຺ຂຣໂສພ຺ຠມ຺ຫິ, ໂອຕຣິຕ຺ວານ ຠູປຕິ;

ອກາສິ ໂຣຫເຓ ຕຕ຺ຖ, ມຫນ຺ຕໍ ພລສງ຺ຄຫໍ.

໒໙. ຣຎ຺ໂຎ ມງ຺ຄລຫຕ຺ຖິໂສ, ທກ຺ຂິຓໍ ມລຍໍ ຕໂຕ;

ໂຣຫຓໍເຍ’ວຸປາຄຎ຺ຉິ, ຕສ຺ສ ກມ຺ມານິ ກາຕເວ.

໓໐. ມຫາປທຸມນາມສ຺ສ, ຕຕ຺ຖ ຊາຕກຠາຓິໂນ;

ຕຸລາຘາຣວ຺ຫວາສິສ຺ສ, ມຫາເຖຣສ຺ສ ສນ຺ຕິເກ.

໓໑. ກປິຊາຕກໍ ສຸຕ຺ວານ, ໂພຘິສຕ຺ເຕ ປສາທວາ;

ນາຄມຫາວິຫາຣໍ ໂສ, ຊິຍາມຸຕ຺ຕຘນຸສ຺ສຕໍ.

໓໒. ກຕ຺ວາ ກາເຣສິ ຖູປຎ຺ຈ, ວຑ຺ຒາເປສິ ຍຖາຐິຕໍ;

ຕິສ຺ສວາປິຎ຺ຈ ກາເຣສິ, ຕຖາ ທຸຣວ຺ຫວາປິກໍ.

໓໓. ໂສ ຄເຫຕ຺ວາ ພລໍ ຣາຊາ, ຍຸທ຺ຘາຍ ອຠິນິກ຺ຂມິ;

ຕໍ ສຸຕ຺ວາ ລມ຺ພກຓ຺ຓາ ຈ, ຍຸທ຺ຘາຍ ອຠິສໍຍຸຕາ.

໓໔. ປປລ຺ລກ຺ຂນ຺ຘທ຺ວາຣມ຺ຫິ, ເຂຕ຺ເຕ ຫິງ຺ກຣວາປິເກ;

ຍຸທ຺ຘໍ ອຸຠິນ຺ນໍ ວຕ຺ຕິຕ຺ຖ, ອຎ຺ຎມຎ຺ຎວິເຫສນໍ.

໓໕. ນາວາກິລນ຺ຕເທຫຕ຺ຕາ, ໂປສາ ສີທນ຺ຕິ ຣາຊິໂນ;

ຣາຊາ ນາມໍ ສາວຍິຕ຺ວາ, ສຍໍ ປາວິສິ ເຕນ ໂສ.

໓໖. ເຕນ ຠີຕາລມ຺ພກຓ຺ຓາ, ສຍິໍສຸ ອຸທເຣນ ໂສ;

ເຕສໍ ສີສານິ ຉິນ຺ທິຕ຺ວາ, ຣຕນາຠິສມໍກຣິ.

໓໗. ຕິກ຺ຂຕ຺ຕຸເມວນ຺ຕຸກເຕ, ກຣຸຓາຍ ມຫີປຕິ;

‘‘ອມາເຣຕ຺ວາ’ວ ຄຓ຺ຫາຖ, ຊີວຄ຺ຄາຫ’ນ຺ຕິ ອພ຺ຣຸວິ.

໓໘. ຕໂຕ ວິຊິຕສງ຺ຄາໂມ, ປຸຣໍ ອາຄມ຺ມ ຠູປຕິ;

ຉຕ຺ຕໍ ອຸສ຺ສາປຍິຕ຺ວານ ຕິສ຺ສວາປິ ຉຓໍ ອຄາ.

໓໙. ຊລກີຬາຍ ອຸຄ຺ຄນ຺ຕ຺ວາ, ສຸມຓ຺ຑິຕປສາຘິໂຕ;

ອຕ຺ຕໂນ ສິຣິສມ຺ປຕ຺ຕິໍ, ທິສ຺ວາ ຕສ຺ສນ຺ຕຣາຍິເກ.

໔໐. ລມ຺ພກຓ຺ເຓ ສຣິຕ຺ວານ, ກຸທ຺ໂຘ ໂສ ໂຍຊຍີຣເຖ;

ຍຸຄປຣມ຺ປຣາ ເຕສໍ, ປຸຣໂຕ ປາວິສີ ປຸຣໍ.

໔໑. ມຫາວຕ຺ຖຸສ຺ສ ອຸມ຺ມາເຣ, ຐຕ຺ວາ ຣາຊາຓເປສິ ໂສ;

‘‘ອິເມສໍ ສີສມຸມ຺ມາເຣ, ອສ຺ມິໍ ຉິນ຺ທຖ ໂຠ’’ອິຕິ.

໔໒. ໂຄຓາ ເອເຕຣເຖ ຍຸຕ຺ຕາ, ຕວ ໂຫນ຺ຕິ ຣເຖສຠ;

ສິງ຺ຄໍຂຸຣຎ຺ຈ ເອເຕສໍ, ເຉທາປຍຕ ໂຠ’’ອິຕິ.

໔໓. ມາຕຸຍາ ອຖ ສຎ຺ຎຕ຺ໂຕ, ສີສຈ຺ເຉທໍ ນິວາຣິຍ;

ນາສຎ຺ຈ ປາທງ຺ຄຸຏ຺ຐຎ຺ຈ, ເຕສໍ ຣາຊາ ອເຉທຍິ.

໔໔. ຫຕ຺ຖິວຸຕ຺ຖໍ ຊນປທໍ, ອທາ ຫຕ຺ຖິສ຺ສ ຂຕ຺ຕິໂຍ;

ຫຕ຺ຖິໂຠໂຄ ຊນປໂທ, ອິຕິ ເຕນາສິ ນາມໂຕ.

໔໕. ເອວໍ ອນຸຣາຘປຸເຣ, ອິຬານາໂຄ ມຫີປຕິ;

ຉພ຺ພສ຺ສານິ ອນຸນານິ, ຣຊ຺ຊໍ ກາເຣສິ ຂຕ຺ຕິໂຍ.

໔໖. ອິຬນາຄຈ຺ຈເຍ ຕສ຺ສ, ປຸຕ຺ໂຕ ຈນ຺ທມຸໂຂສິໂວ;

ອຏ຺ຐວສ຺ສໍ ສຕ຺ຕມາສໍ, ຣາຊາ ຣຊ຺ຊມກາຣຍິ.

໔໗. ມຓິກາຣຄາເມ ວາປິ, ກາຣາເປຕ຺ວາ ມຫີປຕິ;

ອິສ຺ສຣສມຓວ຺ຫສ຺ສ, ວິຫາຣສ຺ສ ອທາສິ ໂສ.

໔໘. ຕສ຺ສ ຣຎ຺ໂຎ ມເຫສີ ຈ, ສງ຺ຄາເມ ປຕ຺ຕິມຕ຺ຕໂນ;

ຕສ຺ເສວາ’ທາ ວິຫາຣສ຺ສ, ທມິຬເທວີຕິ ວິສ຺ສຸຕາ.

໔໙. ຕໍ ຕິສ຺ສວາປີ ກີຬາຍ, ຫນ຺ຕ຺ວາ ຈນ຺ທມຸຂໍ ສິວໍ;

ຍສຬາລກຕິສ຺ໂສ’ຕິ, ວິສ຺ສຸໂຕ ຕງ຺ກນິຏ຺ຐໂກ.

໕໐. ອນຸຣາຘປຸເຣ ຣມ຺ເມ, ລງ຺ກາຠຸວທເນ ສຸເຠ;

ສຕ຺ຕວສ຺ສານຏ຺ຐມາເສ, ຣາຊາ ຣຊ຺ຊມກາຣຍິ.

໕໑. ໂທວິຣິກສ຺ສ ທຕ຺ຕສ຺ສ, ປຸຕ຺ໂຖ ໂທວາຣິໂກ ສຍໍ;

ຣຎ຺ໂຎ ສທິສຣູເປນ, ອໂຫສິ ສຸຠນາມວາ.

໕໒. ສຸຠໍ ພລຕ຺ຖໍ ຕໍ ຣາຊາ, ຣາຊຠູສາຍ ຠູສິຍ;

ນິສິທາປິຍ ປລ຺ລງ຺ເກ, ຫາສຕ຺ຖໍ ຍສຬາລໂກ.

໕໓. ສີສໂຈຬໍ ພລຕ຺ຖສ຺ສ, ສສີເສ ປຏິມຸຎ຺ຈິຍ;

ຍຏ຺ຐິໍ ຄເຫຕ຺ວາ ຫຕ຺ເຖນ, ທ຺ວາຣມູເລ ຐິໂຕ ສຍໍ.

໕໔. ວນ຺ທນ຺ເຕສຸ ອມຈ຺ເຈສຸ, ນິສິນ຺ນໍ ອາສນມ຺ຫິ ຕໍ;

ຣາຊາ ຫສຕິ ເອວໍ ໂສ, ກຸຣຸເຕ ອນ຺ຕຣນ຺ຕຣາ.

໕໕. ‘‘ພລຕ຺ໂຖ ເອກທິວສໍ, ຣາຊານໍ ຫສມານກໍ;

ອຍໍ ພລຕ຺ໂຖ ກສ຺ມາ ເມ, ສມ຺ມຸຂາຫສຕີ’’ຕິ ໂສ.

໕໖. ມາຣາປຍິຕ຺ວາ ຣາຊານໍ, ພລຕ຺ໂຖ ໂສ ສຸໂຠ ອິຘ;

ຣຊ຺ຊໍ ກາເຣສິ ຉພ຺ພສ຺ສໍ, ສຸຠຣາຊາຕິ ວິສ຺ສຸໂຕ.

໕໗. ທ຺ວິສຸ ມຫາວິຫາເຣສຸ, ສຸຠຣາຊາ ມໂນຣມໍ;

ປຣິເວຓປນ຺ຕິໍ ສຸຠ-ນາມກໍເຍວ ກາຣຍິ.

໕໘. ອຸຣຸເວລສມີປມ຺ຫິ, ຕຖາ ເວລ຺ລິວິຫາຣກໍ;

ປຸຣຕ຺ຖິເມ ເອກທ຺ວາຣໍ, ຄງ຺ຄນ຺ເຕ ນນ຺ທິຄາມກໍ.

໕໙. ລມ຺ພກຓ຺ຓສຸໂຕ ເອໂກ, ອຸຕ຺ຕຣປສ຺ສວາສິໂກ;

ເສນາປຕິມຸປຏ຺ຐາສິ, ວສໂຠ ນາມ ມາຕຸລໍ.

໖໐. ເຫສ຺ສຕິ ວສໂຠ ນາມ, ຣາຊາ’ຕິ ສຸຕິຍາສທາ;

ຆາເຕຕິ ຣາຊາທີປມ຺ຫິ, ສພ຺ເພ ວສຠນາມເກ.

໖໑. ‘‘ຣຎ຺ໂຎ ທສ຺ສາມ ວສຕໍ, ອິມ’’ນ຺ຕິ ຠຣິຍາຍ ໂສ;

ເສນາປຕິມນ຺ຕຍິຕ຺ວາ, ປາໂຕ ຣາຊກຸລໍ ອຄາ.

໖໒. ຄຈ຺ຉໂຕ ເຕນ ສຫສາ, ຕມ຺ພຸລໍ ຈຸຓ຺ຓວຊ຺ຊິຕໍ;

ຫຕ຺ຖມ຺ຫິ ວສຠສ຺ສາ’ທາ, ຕໍ ສາຘຸ ປຣິຣກ຺ຂິຕຸໍ.

໖໓. ຣາຊເຄຫສ຺ສ ທ຺ວາຣມ຺ຫິ, ຕມ຺ພຸລໍ ຈຸຓ຺ຓວຊ຺ຊິຕໍ;

ເສນາປຕິ ອຸທິກ຺ຂິຕ຺ວາ, ຕໍ ຈຸຓ຺ຓຕ຺ຖໍ ວິສຊ຺ຊຍິ.

໖໔. ເສນາປຕິສ຺ສ ຠຣິຍາ, ຈຸຓ຺ຓຕ຺ຖໍ ວສຠໍ ຄຕໍ;

ວຕ຺ວາ ຣຫສ຺ສໍ ທຕ຺ວາ ຈ, ສຫສ຺ສໍ ຕໍ ປລາປຍິ.

໖໕. ມຫາວິຫາຣຐານໍ ໂສ, ຄນ຺ຕ຺ວານ ວສໂຠ ປນ;

ຕຕ຺ຖ ເຖເຣຫິ ຂິຣນ຺ນ-ວຕ຺ເຖຫິ ກຕສງ຺ຄໂຫ.

໖໖. ຕໂຕ ປຣໍ ກຸຏ຺ຐິໂນ ຈ, ຣາຊຠາວາຍ ນິຈ຺ຉິຕໍ;

ສຸຕ຺ວານ ວຈນໍຫຏ຺ໂຐ, ‘‘ໂຈໂຣ ເຫສ຺ສ’’ນ຺ຕິ ນິຈ຺ຉິໂຕ.

໖໗. ລທ຺ຘສມຕ຺ຖປຸຣິເສ, ຄາມຆາຕໍ ຕໂຕ ປຣໍ;

ກໂຣນ຺ໂຕ ໂຣຫຓໍ ຄນ຺ຕ຺ວາ, ກປລ຺ລປຸໂວປເທສໂຕ.

໖໘. ກເມນ ຣຏ຺ຐໍ ກຓ຺ຫນ຺ໂຖ, ສມ຺ປຕ຺ຕພລວາຫໂນ;

ໂສ ຣາຊາ ທ຺ວີຫິ ວສ຺ເສຫິ, ອາຄມ຺ມ ປຸຣສນ຺ຕິກໍ.

໖໙. ສຸຠຣາຊໍ ຣເຓ ຫນ຺ຕ຺ວາ, ວສໂຠ ໂສ ມຫພ຺ພໂລ;

ອຸສ຺ສາປຍິ ປຸເຣຠຕ຺ຕໍ, ມາຕຸໂລ’ປິ ຣເຓ ປຕິ.

໗໐. ຕໍ ມາຕຸລສ຺ສ ສຣິຣໍ, ປຸພ຺ພຠູໂຕປກາຣິກໍ;

ອກາສິ ວສໂຠ ຣາຊາ, ມເຫສິໍ ເມຕ຺ຕນາມິກໍ.

໗໑. ໂສໂຫຣປາຐກໍ ປຸຈ຺ຉິ, ອາຍຸປ຺ປມາຓມຕ຺ຕໂນ;

‘‘ອາຫ ທ຺ວາທສວສ຺ສານິ’’, ຣໂຫເຍວສ຺ສ ໂສປິ ຈ.

໗໒. ຣຫສ຺ສໍ ຣກ຺ຂຓຕ຺ຖາຍ, ສຫສ຺ສໍ ຕສ຺ສາ ທາປິຍ;

ສງ຺ຆໍ ໂສ ສນ຺ນິປາເຕຕ຺ວາ, ວນ຺ທິຕ຺ວາ ປຸຈ຺ຉິ ຠູປຕິ.

໗໓. ‘‘ສິຍານຸ ຠນ຺ເຕ ອາຍຸສ຺ສ, ວຑ຺ຒນກາຣຓໍ’’ອິຕິ;

‘‘ອຕ຺ຖີ’’ຕິ ສງ຺ໂຆ ອາຈິກ຺ຂິ, ອນ຺ຕຣາຍວິໂມຈນໍ.