ທຸຕິຍປຣິຈ຺ເຉທ

ມຫາສມ຺ມຕວໍສ

໑. ມຫາສມ຺ມຕ ຣາຊສ຺ສ, ວໍສໂຊ ຫິ ມຫາມຸນິ;

ກປ຺ປສ຺ສາທິມ຺ຫິ ຣາຊາ’ສິ, ມຫາສມ຺ມຕນາມໂກ.

໒. ໂຣໂຊ ຈ ວຣໂຣໂຊ ຈ, ຕຖາ ກລ຺ຍາຓກາ ທຸເວ;

ອຸໂປສໂຖ ຈ ມນ຺ຘາຕາ, ຈຣໂກ’ປຈຣາ ທຸເວ.

໓. ເຈຕີໂຍ ມຸຈໂລ ເຈວ, ມຫາມູຈລນາມໂກ;

ມຸຈລິນ຺ໂທ ສາຄໂຣ ເຈວ, ສາຄໂຣ ເທວ ວນາມໂກ.

໔. ຠຣໂຕ ຠຄີຣໂຖ ເຈວ, ຣຸຈິ ຈ ສຸຣຸຈິ ປິຈ;

ປຕາໂປ ມຫາປຕາໂປ, ປນາທາ ຈ ຕຖາ ທຸເວ.

໕. ສຸທສ຺ສໂນ ຈ ເນຣຸ ຈ, ຕຖາ ເອວ ທຸເວ ທຸເວ;

ປຈ຺ຉິມາ ຈາ’ຕິ ຣາຊາໂນ, ຕສ຺ສ ປຸຕ຺ຕປປຸຕ຺ຕກາ.

໖. ອສໍຂິຍາຍຸກາ ເອເຕ, ອຏ຺ຐວີສຕິ ຠູມິປາ;

ກຸສາວຕິໍ ຣາຊຄຫໍ, ມິຖິລຎ຺ຈາປິ ອາວສຸໍ.

໗. ຕໂຕ ສຕຎ຺ຈ ຣາຊໂນ, ຉປ຺ປຎ຺ຎາສ ຈ ສຏ຺ຐິ ຈ;

ຈຕຸຣາສີຕິ ສຫສ຺ສານິ, ຉຕ຺ຕິໍສາ ຈ ຕໂຕ ປເຣ.

໘. ທ຺ວຕ຺ຕິໍສ ອຏ຺ຐວີສາ ຈ, ທ຺ວາວີສຕິ ຕໂຕ ປເຣ;

ອຏ຺ຐາຣສ ສຕ຺ຕຣສ, ປຎ຺ຈທສ ຈຕຸທ຺ທສ.

໙. ນວ ສຕ຺ຕ ທ຺ວາທສ ຈ, ປຎ຺ຈວີສ ຕໂຕປເຣ;

ປຎ຺ຈວີສໍ ທ຺ວາທສ ຈ, ທ຺ວາທສຎ຺ຈ ນວາ ປິຈ.

໑໐. ຈຕຸຣາສີຕິສຫສ຺ສານິ, ມຂາເທວາທິກາປິ ຈ;

ຈຕຸຣາສີຕິສຫສ຺ສານິ, ກຬາຣາຊນກາທໂຍ.

໑໑. ໂສຬສ ຍາວ ໂອກ຺ກາຕໍ, ປປຸຕ຺ຕາ ຣາສິໂຕ ອິເມ;

ວິສຸໍ ວິສຸໍ ປຸເຣ ຣຊ຺ຊໍ, ກມໂຕ ອນຸສາສິສຸໍ.

໑໒. ໂອກ຺ກາມຸໂຂ ເຊຏ຺ຐປຸຕ຺ໂຕ, ໂອກ຺ກາກສາ’ສິ ຠູປຕິ;

ນິປຸໂຣ ຈນ຺ທີມາ ຈນ຺ທໍ-ມຸໂຂ ຈ ສິວິ ສຎ຺ຊໂຍ.

໑໓. ເວສ຺ສນ຺ຕຣ ມຫາຣາຊາ, ຊາລີ ຈ ສີຫວາຫໂນ;

ສີຫສ຺ສໂຣ ຈ ອິຈ຺ເຈເຕ, ຕສ຺ສ ປຸຕ຺ຕ ປ ປຸຕ຺ຕກາ.

໑໔. ທ຺ເວອສີຕິ ສຫສ຺ສານິ, ສີຫສ຺ສຣສ຺ສ ຣາຊິໂນ;

ປຸຕ຺ຕ ປ ປຸຕ຺ຕ ຣາຊາໂນ, ຊຍເສໂນ ຕທນ຺ຕິໂມ.

໑໕. ເອເຕ ກປິລວຕ຺ຖຸສ຺ມິໍ, ສກ຺ຍຣາຊາຕິ ວິສ຺ສຸຕາ;

ສີຫຫນຸ ມຫາຣາຊາ, ຊຍເສນສ຺ສ ອຕ຺ຣໂຊ.

໑໖. ຊຍເສນສ຺ສ ຘີຕາ ຈ, ນາເມນາ’ສິ ຍໂສຘຣາ;

ເທວທເຍ ເທວທຫ-ສກ຺ໂກ ນາມາ’ສິ ຠູປຕິ.

໑໗. ອຎ຺ຊໂນ ຈາ’ຖ ກຈ຺ຈານາ, ອາສຸໍ ຕສ຺ສ ສຸຕາ ທຸເວ;

ມເຫສີຈາ’ສິ ກຈ຺ຈານາ, ຣຎ຺ໂຎ ສີຫຫນຸສ຺ສ ສາ.

໑໘. ອາສີ ອຎ຺ຊນສກ຺ກສ຺ສ, ມເຫສີ ສາ ຍໂສຘຣາ;

ອຎ຺ຊນສ຺ສ ທຸເວ ຘີຕາ, ມາຍາ ຈາຖ ປຊາປຕິ.

໑໙. ປຸຕ຺ຕາ ທຸເວ ທຓ຺ຑປາຓີ, ສຸປ຺ປພຸທ຺ໂຘ ຈ ສາກິໂຍ;

ປຎ຺ຈ ປຸຕ຺ຕາ ທຸເວ ຘີຕາ, ອາສຸໍ ສີຫຫນຸສ຺ສເຣ.

໒໐. ສຸທ຺ໂຘທໂນ ໂຘໂຕທໂນ, ສກ຺ກສຸກ຺ກມິໂຕທໂນ;

ອມິຕາ ປມິຕາຈາ’ຕິ, ອິເມ ປຎ຺ຈ ອິມາ ທຸເວ.

໒໑. ສຸປ຺ປພຸທ຺ຘສ຺ສ ສກ຺ກສ຺ສ, ມເຫສີ ອມິຕາ ອຫຸ;

ຕສ຺ສາ’ສຸໍ ຠທ຺ທກຈ຺ຈານາ, ເທວທຕ຺ໂຕ ທຸເວ ສຸຕາ.

໒໒. ມາຍາ ມຫາປຊາປຕິ ເຈວ, ສຸທ຺ໂຘທນ ມເຫສີໂຍ;

ສຸທ຺ໂຘທນ ມຫາຣຎ຺ໂຎ, ປຸຕ຺ໂຕ ມາຍາຍ ໂສ ຊິໂນ.

໒໓. ມຫາ ສມ຺ມຕວໍສມ຺ຫິ, ອສມ຺ຠິນ຺ເນ ມຫາມຸນິ;

ເອວໍ ປວຕ຺ເຕ ສຎ຺ຊາໂຕ, ສພ຺ພ ຂຕ຺ຖິຍ ມຸທ຺ຘນິ.

໒໔. ສິທ຺ຘຕ຺ຖສ຺ສ ກຸມາຣສ຺ສ, ໂພຘິສຕ຺ຕສ຺ສ ສາ ອຫຸ;

ມເຫສີ ຠທ຺ທກຈ຺ຈານາ, ປຸຕ຺ໂຕ ຕສ຺ສາ’ສິ ຣາຫຸໂລ.

໒໕. ພິມ຺ພິສາໂຣ ຈ ສິທ຺ຘຕ຺ຖ-ກຸມາໂຣ ຈ ສຫາຍກາ;

ອຸຠິນ຺ນໍ ປິຕໂຣ ຈາປິ, ສຫາຍາເອວ ເຕ ອຫຸໍ.

໒໖. ໂພຘິສຕ຺ໂຕ ພິມ຺ພິສາຣາ, ປຎ຺ຈວສ຺ສາຘິໂກ ອຫຸ;

ເອກູນຕິໍໂສ ວຍສາ, ໂພຘິສຕ຺ໂຕ’ຠິນິກ຺ຂມິ.

໒໗. ປທຫິຕ຺ວານ ຉພ຺ພສ຺ສໍ, ໂພຘິໍ ປຕ຺ວາ ກເມນ ຈ;

ປຎ຺ຈຕິໍໂສ ຖ ວຍສາ, ພິມ຺ພິສາຣມຸປາຄມິ.

໒໘. ພິມ຺ພິສາໂຣ ປນ຺ນຣສ-ວສ຺ໂສ’ຖ ປີຕຣໍ ສຍໍ;

ອຠິສິຕ຺ໂຕ ມຫາປຎ຺ໂຎ, ປຕ຺ໂຕ ຣຊ຺ຊສ຺ສ ຕສ຺ສ ຕຸ.

໒໙. ປຕ຺ເຕ ໂສຬສເມ ວສ຺ເສ, ສຕ຺ຖາ ຘມ຺ມມເທສຍິ;

ທ຺ວາປຎ຺ຎາເສວ ວສ຺ສານິ, ຣຊ຺ຊໍ ກາເຣສິ ໂສ ປນ.

໓໐. ຣຊ຺ເຊ ສມາ ປນ຺ນຣສ, ປຸພ຺ເພ ຊິນສມາຄມາ;

ສຕ຺ຕຕິໍສ ສມາ ຕສ຺ສ, ຘຣມາເນ ຕຖາຄເຕ.

໓໑. ພິມ຺ພິສາຣສຸໂຕ’ຊາຕ-ສຕ຺ຕຸຕໍ ຆາຕີຍາ’ມຕິ;

ຣຊ຺ຊໍ ທ຺ວຕ຺ຕິໍສວສ຺ສານິ, ມຫາມິຕ຺ຕທ຺ທຸກາຣຍີ.

໓໒. ອຊາຕສຕ຺ຕຸໂນ ວສ຺ເສ, ອຏ຺ຐເມ ມຸນິ ນິພ຺ພຸໂຕ;

ປຈ຺ຉາ ໂສ ກາຣຍີ ຣຊ຺ຊໍ, ວສ຺ສານິ ຈຕຸວີສຕິ.

໓໓. ຕຖາຄໂຕ ສກລໂລກຄ຺ຄຕໍ ຄໂຕ;

ອນິຈ຺ຈຕາວ ສມວໂສ ອຸປາຄໂຕ;

ອິຕິ’ຘ ໂຍ ຠຍຊນນິໍ ອນິຈ຺ຈຕໍ,

ອເວກ຺ຂເຕ ສ ຠວຕິ ທຸກ຺ຂປາຣຄູຕິ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ມຫາສມ຺ມຕວໍໂສ ນາມ

ທຸຕິໂຍ ປຣິຈ຺ເຉໂທ.