ສຕ຺ຕຣສມ ປຣິຈ຺ເຉທ

ຘາຕຸອາຄມໂນ

໑. ວຸຕ຺ຖວສ຺ໂສ ປວາເຣຕ຺ວາ, ກຕ຺ຕິກປຸຓ຺ຓມາສິຍໍ;

ອໂວເຈ’ທໍ ມຫາຣາຊໍ, ມຫາເຖໂຣ ມຫາມຕິ.

໒. ຈິຣທິຏ຺ໂຐ ຫິ ສມ຺ພຸທ຺ໂຘ, ສຕ຺ຖາ ໂນ ມນຸຊາຘິປ;

ອນາຖວາສໍ ອວສິມ຺ຫ, ນຕ຺ຖິ ໂນ ປູຊິຍໍ ອິຘ.

໓. ‘‘ຠາສິຕ຺ຖ ນນຸ ຠນ຺ເຕເມ, ສມ຺ພຸທ຺ໂຘ ນິພ຺ພຸໂຕ’’ ອິຕິ;

ອາຫ ຘາຕູສຸ ທິຏ຺ເຐສຸ, ທິຏ຺ໂຐ ໂຫຕິ ຊິໂນ’’ ອິຕິ.

໔. ວິທິໂຕ ໂວ ອຘິປ຺ປາໂຍ, ຖູປສ຺ສ ກາຣເຓ ມຍາ;

ກາເຣສ຺ສາມິ ອຫໍ ຖູປໍ, ຕຸມ຺ເຫ ຊານາຖ ຘາຕຸໂຍ.

໕. ມນ຺ເຕຫິ ສຸມເນນາຕິ, ເຖໂຣ ຣາຊານມພ຺ຣວິ;

ຣາຊາ’ຫ ສາມເຓຣໍ ຕໍ, ກຸໂຕ ລຈ຺ຉາມ ຘາຕຸໂຍ.

໖. ວິຠູສຍິຕ຺ວາ ນຄຣໍ, ມຄ຺ຄຎ຺ຈ ມນຸຊາຘິປ;

ອຸໂປສຖີ ສປຣິໂສ, ຫຕ຺ຖິໍ ອາຣຸຍ຺ຫ ມງ຺ຄລໍ.

໗. ເສຕຈ຺ຉຕ຺ຕໍ ຘາຣຍນ຺ໂຕ, ຕາລາວຈຣສໍຫິໂຕ;

ມຫານາຄວນຸຍ຺ຍານໍ, ສາຍນ຺ຫສມເຍ ວຊ.

໘. ຘາຕຸເຠທຎ຺ຎຸໂນ ຣາຊ, ຘາຕຸໂຍ ຕຕ຺ຖ ລຈ຺ຉສິ;

ອິຈ຺ຉາຫ ສາມເຓໂຣ ໂສ, ສຸມໂນ ຕໍ ສຸມານສໍ.

໙. ເຖໂຣ’ຖ ຣາຊກຸລໂຕ, ຄນ຺ຕ຺ວາ ເຈຕິຍປພ຺ພຕໍ;

ອາມນ຺ຕິຍ ສາມເຓຣໍ, ສຸມນໍ ສຸມໂນ ຄຕິໍ.

໑໐. ເອຫິ ຕ຺ວໍ ຠທ຺ຣ ສຸມນ, ຄນ຺ຕ຺ວາ ປຸປ຺ຜປຸຣໍ ວຣໍ;

ອຍ຺ຍກໍ ເຕ ມຫາຣາຊໍ, ເອວໍ ໂນ ວຈນໍ ວທ.

໑໑. ສຫາໂຍ ເຕ ມຫາຣາຊ, ມຫາຣາຊາ ມຣຸປ຺ປິໂຍ;

ປສນ຺ໂນ ພຸທ຺ຘສມເຍ, ຖູປໍ ກາເຣຕຸມິຈ຺ຉຕິ.

໑໒. ມຸນິໂນ ຘາຕຸໂຍ ເທຫິ, ປຕ຺ຕໍ ຠຸຕ຺ຕຎ຺ຈ ສຕ຺ຖຸນາ;

ສຣີຣຘາຕຸໂຍ ສນ຺ຕິ, ພຫໂວ ຫິ ຕວນ຺ຕິເກ.

໑໓. ປຕ຺ຕປູຣາ ຄເຫຕ຺ວາ ຕາ, ຄນ຺ຕ຺ວາ ເທວປຸຣໍ ວຣໍ;

ສກ຺ກໍ ເທວານມິນ຺ທໍ ຕໍ, ເອວໍ ໂນ ວຈນໍ ວທ.

໑໔. ຕິໂລກທກ຺ຂິເຓຍ຺ຍສ຺ສ, ທາຐາຘາຕຸ ຈ ທກ຺ຂິຓາ;

ຕວນ຺ຕິກມ຺ຫິ ເທວິນ຺ທ, ທກ຺ຂິຓກ຺ຂກຘາຕຸ ຈ.

໑໕. ທາຐໍ ຕ຺ວເມວ ປູເຊຫິ, ອກ຺ຂກໍ ເທຫິ ສຕ຺ຖຸໂນ;

ລໍກາທີປສ຺ສ ກິຈ຺ເຈສຸ, ມາປມຊ຺ຊ ສຸຣາຘິປ.

໑໖. ‘‘ເອວໍ ຠນ຺ເຕ’’ຕິ ວຕ຺ວາ ໂສ, ສາມເຓໂຣ ມຫິທ຺ຘິໂກ;

ຕງ຺ຂຓໍເຍວ ອຄມາ, ຘມ຺ມາໂສກສ຺ສ ສນ຺ຕິກໍ.

໑໗. ສາລມູລມ຺ຫິ ຐປິຕໍ, ມຫາໂພຘິໍ ຕຫິໍ ສຸຕໍ;

ກຕ຺ຕິກຈ຺ຉຓປູຊາຫິ, ປູຊິຍໍ ຕຎ຺ຈ ອທ຺ທສ.

໑໘. ເຖຣສ຺ສ ວຈນໍ ວຕ຺ວາ, ຣາຊໂຕ ລທ຺ຘຘາຕຸໂຍ;

ປຕ຺ຕປູຣໍ ຄເຫຕ຺ວານ, ຫິມວນ຺ຕມຸປາຄມິ.

໑໙. ຫິມວນ຺ເຕ ຐເປຕ຺ວານ, ສຘາຕຸໍ ປຕ຺ຕມຸຕ຺ຕມໍ;

ເທວິນ຺ທສນ຺ຕິກໍ ຄນ຺ຕ຺ວາ, ເຖຣສ຺ສ ວຈນໍ ຠຓິ.

໒໐. ຈູຬາມຓິ ເຈຕິຍມ຺ຫາ, ຄເຫຕ຺ວາ ທກ຺ຂິຓກ຺ຂກໍ;

ສາມເຓຣສ຺ສ ປາທາສິ, ສກ຺ໂກ ເທວານມິສ຺ສໂຣ.

໒໑. ຕໍ ຘາຕຸໍ ຘາຕຸປຕ຺ຕຎ຺ຈ, ອາທາຍ ສຸມໂນ ຕໂຕ;

ອາຄມ຺ມ ເຈຕິຍຄິຣິໍ, ເຖຣສ຺ສ’ທາສິ ຕໍ ຍຕິ.

໒໒. ມຫານາຄວນຸຍ຺ຍານໍ, ວຸຕ຺ເຕນາ ວິຘິນາ’ຄມາ;

ສາຍນ຺ຫາສມເຍ ຣາຊາ, ຣາຊເສນາ ປຸຣກ຺ຂໂຕ.

໒໓. ຐເປສິ ຘາຕຸໂຍ ສພ຺ພາ, ເຖໂຣ ຕຕ຺ເຖວ ປພ຺ພເຕ;

ມິສ຺ສກໍ ປພ຺ພຕໍ ຕສ຺ມາ, ອາຫຸ ເຈຕິຍ ປພ຺ພຕໍ.

໒໔. ຐເປຕ຺ວາ ຘາຕຸປຕ຺ຕໍ ຕໍ, ເຖໂຣ ເຈຕິຍປພ຺ພເຕ;

ຄເຫຕ຺ວາ ອກ຺ຂກໍ ຘາຕຸໍ, ສງ຺ເກຕໍ ສຄໂຓ’ຄມາ.

໒໕. ສຈາຍໍ ມຸນິໂນ ຘາຕຸ, ຉຕ຺ຕໍ ນມຕຸ ເມ ສຍໍ;

ຊຓ຺ຓຸເກຫິ ກຣີຘາຕຸ, ຘາຕຸຈງ຺ໂກຏໂກ ອຍໍ.

໒໖. ສິຣສ຺ມິໍ ເມ ປຕິຏ຺ຐາຕຸ, ອາຄມ຺ມ ສຫ ຘາຕຸໂກ;

ອິຕິ ຣາຊາ ວິຈິນ຺ເຕສິ, ຈິນ຺ຕິຕໍ ຕໍ ຕຖາ ອຫຸ.

໒໗. ອມເຕນາ’ຠິສິຕ຺ໂຕວ, ອຫຸ ຫຏ຺ໂຐ’ຕິ ຠູປຕິ;

ສີສໂຕ ຕໍ ຄເຫຕ຺ວານ, ຫຕ຺ຖິກ຺ຂນ຺ເຘ ຐເປສິຕໍ.

໒໘. ຫຏ຺ໂຐ ຫຕ຺ຕີ ກຸຎ຺ຈນາທໍ, ອກາ ກມ຺ປິຕ຺ຖ ເມທິນີ;

ຕໂຕ ນາໂຄ ນິວຕ຺ຕິຕ຺ວາ, ສເຖຣ ພລວາຫໂນ.

໒໙. ປຸຣຕ຺ຖິເມນ ທ຺ວາເຣນ, ປວິສິຕ຺ວາ ປຸຣໍ ສຸຠໍ;

ທກ຺ຂິເຓນ ຈ ທ຺ວາເຣນ, ນິກ຺ຂມິຕ຺ວາ ຕໂຕ ປຸນ.

໓໐. ຖູປາຣາເມ ເຈຕິຍສ຺ສ, ຐານໂຕ ປຈ຺ຉໂຕ ກຕໍ;

ປໂມຊວຕ຺ຖຸໍ ຄນ຺ຕ຺ວານ, ໂພຘິຐາເນ ນິວຕ຺ຕິຍ.

໓໑. ປຸຣຕ຺ຖາວທໂນ ອຐາ, ຖູປຐານໍ ຕທາ ຫິຕໍ;

ກທມ຺ພປຸປ຺ຜອາທາຣິ-ວລ຺ລີຫິ ຈິຕກໍ ອຫຸ.

໓໒. ມນຸສ຺ສເທໂວ ເທເວຫິ, ຕໍ ຐານໍ ຣກ຺ຂິຕໍ ສຸຈິໍ;

ໂສຘາເປຕ຺ວາ ຠູສຍິຕ຺ວາ, ຕງ຺ຂຓໍເຍວ ສາຘຸກໍ.

໓໓. ຘາຕຸໍ ໂອໂຣປນຕ຺ຖາຍ, ອາຣຠີ ຫຕ຺ຖິກ຺ຂນ຺ຘໂຕ;

ນາໂຄ ນ ອິຈ຺ຉິຕໍ ຣາຊາ, ເຖຣໍ ປຸຈ຺ຉິຕ຺ຖ ຕໍ ມນໍ.

໓໔. ອຕ຺ຕໂນ ຂນ຺ຘສມເກ, ຐາເນ ຐປນມິຈ຺ຉຕິ;

ຘາຕຸໂອໂຣປນໍ ເຕນ, ນ ອິຏ຺ຐມີ’ຕິ ໂສ ພ຺ຣວິ.

໓໕. ອາຓາເປຕ຺ວາ ຂຓໍເຍວ,

ສຸກ຺ຂາໂຕ’ຠຍວາປິໂຕ;

ສຸກ຺ຂກທ຺ທມ ຂຓ຺ເຑຫິ,

ຈິຕາ ເປຕ຺ວານ ຕໍ ສມໍ.

໓໖. ອລງ຺ກຣິຕ຺ວານ ພຫຸຘາ, ຣາຊາ ຕໍ ຐານມຸຕ຺ຕມໍ;

ໂອໂຣເປຕ຺ວາ ຫຕ຺ຖິກ຺ຂນ຺ຘາ, ຘາຕຸໍ ຕຕ຺ຖ ຐເປສິຕໍ.

໓໗. ຘາຕາຣກ຺ຂໍ ສໍວິຘາຍ, ຐເປຕ຺ວາ ຕຕ຺ຖ ຫຕ຺ຖິນໍ;

ຘາຕຸຖູປສ຺ສ ກຣເຓ, ຣາຊາ ຕຸຣິຕມານໂສ.

໓໘. ພຫູ ມນຸສ຺ເສ ໂຍເຊຕ຺ວາ, ອິຕ຺ຖິກາກຣເຓ ລຫຸໍ;

ຘາຕຸກິຈ຺ຈໍ ວິຈິນ຺ເຕນ຺ໂຕ, ສາມຈ຺ໂຈ ປາວິສີ ປຸຣໍ.

໓໙. ມຫາມຫິນ຺ທຕ຺ເຖໂຣ ຕຸ, ມຫາ ເມຆວນໍ ສຸຠໍ;

ສຄໂຓ ອຠິຄນ຺ຕ຺ວານ, ຕຕ຺ຖ ວາສມກປ຺ປຍິ.

໔໐. ຣຕ຺ຕິໍ ນາໂຄ’ນຸປຣິຍາຕິ, ຕໍ ຐານໍ ໂສ ສຘາຕຸ ກໍ;

ໂພຘິຐານມ຺ຫິ ສາລາຍ, ທິວາຐາຕິ ສຘາຕຸໂກ.

໔໑. ວຕ຺ຖຸສ຺ສ ຕສ຺ໂສ’ປຣິໂຕ, ຖູປໍ ເຖຣມຕານຸ ໂຄ;

ຊງ຺ຆາມຕ຺ຕໍ ຈິຕາເປຕ຺ວາ, ກຕິປາເຫນ ຠູປຕິ.

໔໒. ຕຕ຺ຖ ຘາຕຸປຕິຏ຺ຐານໍ, ໂຆສາເປຕ຺ວາ ອຸປາຄມິ;

ຕໂຕ ຕໂຕ ສມນ຺ໂຕ ຈ, ສມາຄມິ ມຫາຊໂນ.

໔໓. ຕສ຺ມິໍ ສມາຄເມ ຘາຕຸ, ຫຕ຺ຖິກ຺ຂນ຺ຘາ ນຄາຄ຺ຄຕາ;

ສຕ຺ຕຕາລປ຺ປມາຓມ຺ຫິ, ທິສ຺ສນ຺ຕິ ນຠສິຏ຺ຐິຕາ.

໔໔. ວິມ຺ຫາປຍນ຺ຕິ ຊນຕໍ, ຍມກໍ ປາຏິຫາຣິຍໍ;

ກຓ຺ຓມ຺ພມູເລ ພຸທ຺ໂຘ’ວ, ອກຣິ ໂລມຫໍສນໍ.

໔໕. ຕໂຕ ນິກ຺ຂນ຺ຕຊາລາຫິ, ຊລຘາຣາຫິ ຈາ’ສກິໍ;

ອຍໍ ໂອຠາສິຕາ’ສິຕ຺ຕາ, ສພ຺ພາລໍກາມຫີ ມຫຸ.

໔໖. ປຣິນິພ຺ພານມຎ຺ຈມ຺ຫິ, ນິປນ຺ເນນ ຊິເນນ ຫິ;

ກຕໍ ມຫາອຘິຏ຺ຐານ-ປຎ຺ຈກໍ ປຎ຺ຈຈກ຺ຂຸນາ.

໔໗. ຄຍ຺ຫມານາ ມຫາໂພຘິ ສາຂາໂສເກນ ທກ຺ຂິຓາ;

ຉິຊ຺ຊິຕ຺ວານ ສຍໍເຍວ, ປຕິຏ຺ຐາຕຸ ກຏາຫເກ.

໔໘. ປຕິຏ຺ຐຫິຕ຺ວາ ສາ ສາຂາ, ຉພ຺ພຓ຺ຓຣສ຺ມິໂຍ ສຸຠາ;

ຣຎ຺ຊຍນ຺ຕີ ທິສາ ສພ຺ພາ, ຜລປຕ຺ເຕຫິ ມຸຈ຺ຈຕຸ.

໔໙. ສສຸວຓ຺ຓກຏາຫາ ສາ, ອຸຄ຺ຄນ຺ຕ຺ວານ ມໂນຣມາ;

ອທິສ຺ສມານາ ສຕ຺ຕາຫໍ, ຫິມຄພ຺ຠມ຺ຫິ ຕິຏ຺ຐຕຸ.

໕໐. ຖູປາຣາເມ ປຕິຏ຺ຐນ຺ຕໍ, ມມ ທກ຺ຂິຓອກ຺ຂກໍ;

ກໂຣຕຸ ນຠມຸຄ຺ຄນ຺ຕ຺ວາ, ຍມຍໍ ປາຏິຫາຣິຍໍ.

໕໑. ລງ຺ກາ ລງ຺ກາຣຠູຕມ຺ຫິ, ເຫມມາລິກເຈຕິເຍ;

ປຕິຏ຺ຐຫນ຺ຕິໂຍ ຘາຕຸ, ໂທຓມຕ຺ຕາ ປມາຓໂຕ.

໕໒. ພຸທ຺ຘເວສຘຣາ ຫຸຕ຺ວາ, ອຸຄ຺ຄນ຺ຕ຺ວາ ນຠສິຏ຺ຐິຕາ;

ປຕິຏ຺ຐໍ ຕຸ ກຣິຕ຺ວານ, ຍມກໍ ປາຏິຫາຣິຍໍ.

໕໓. ອຘິຏ຺ຐານານິ ປຎ຺ເຈ’ວ, ອຘິຏ຺ຐາສິ ຕຖາຄໂຕ;

ອກາສິ ຕສ຺ມາ ສາ ຘາຕຸ, ຕທາ ຕໍ ປາຏິຫາຣິຍໍ.

໕໔. ອາກາສາ ໂອຕຣິຕ຺ວາ ສາ, ອຏ຺ຐາຠູປສ຺ສ ມຸທ຺ຘນິ;

ອຕີວຫຏ຺ໂຐ ຕໍ ຣາຊາ, ປຕິຏ຺ຐາເປສິ ເຈຕິເຍ.

໕໕. ປຕິຏ຺ຐິຕາຍ ຕສ຺ສາ ຈ, ຘາຕຸຍາ ເຈຕິເຍ ຕທາ;

ອຫຸ ມຫາຠູມິຈາໂລ, ອພ຺ຠຸໂຕ ໂລມຫໍສໂນ.

໕໖. ເອວໍ ອຈິນ຺ຕິຍາ ພຸທ຺ຘາ, ພຸທ຺ຘຘມ຺ມາ ອຈິນ຺ຕິຍາ;

ອຈິນ຺ຕິເຍ ປສນ຺ນານໍ, ວິປາໂກ ໂຫຕິ ອຈິນ຺ຕິໂຍ.

໕໗. ຕໍ ປາຏິຫາຣິຍໍ ທິສ຺ວາ, ປສີທິໍສຸ ຊເນ ຊນາ;

ມຕ຺ຕາຠໂຍ ຣາຊປຸຕ຺ໂຕ, ກນິຏ຺ໂຐ ຣາຊິໂນ ປນ.

໕໘. ມຸນິສ຺ສເຣ ປສີທິຕ຺ວາ, ຍາຈິຕ຺ວານ ນຣິສ຺ສຣໍ;

ປຸຣິສານໍ ສຫສ຺ເສນ, ສຫ ປພ຺ພຊິສາສເນ.

໕໙. ເຈຕາຣິຄາມໂຕ ຈາປິ, ທ຺ວາຣມຓ຺ຑລໂຕປິ ຈ;

ວິຫີຣພີຊໂຕ ຈາປິ, ຕຖາ ຄລ຺ລກປິຏ຺ຐິໂຕ.

໖໐. ຕໂຖ’ປຕິສ຺ສຄາມາ ຈ, ປຎ຺ຈ ປຎ຺ຈ ສຕານິ ຈ;

ປພ຺ພຊຸໍ ທາຣກາ ຫຏ຺ຐາ, ຊາຕສທ຺ຘາ ຕຖາຄເຕ.

໖໑. ເອວໍ ປຸຣາ ພາຫິຣາ ຈ, ສພ຺ເພ ປພ຺ພຊິຕາ ຕທາ;

ຕິໍສ ຠິກ຺ຂຸສຫສ຺ສານິ, ອເຫສຸໍ ຊິນສາສເນ.

໖໒. ຖູປາຣາເມ ຖູປວຣໍ, ນິຏ຺ຐາເປຕ຺ວາ ມຫີປຕິ;

ຣຕນາທີຫິ’ເນເກຫິ, ສທາ ປູຊມກາຣຍິ.

໖໓. ຣາໂຊໂຣຘາ ຂຕ຺ຕິຍາ ຈ, ອມຈ຺ຈາ ນາຄຣາ ຕຖາ;

ສພ຺ເພ ຊນປທາ ເຈວ, ປຸຊາ’ກໍສຸ ວິສຸໍ ວິສຸໍ.

໖໔. ຖູປປຸພ຺ພງ຺ຄມໍ ຣາຊາ, ວິຫາຣໍ ຕຕ຺ຖ ກາຣຍິ;

ຖູປາຣາໂມຕິ ເຕເນ’ສ, ວິຫາໂຣ ວິສ຺ສຸໂຕ ອຫຸ.

໖໕. ສກຘາຕຸສຣີຣເກນ ເຈ’ວໍ,

ປຣິນິພ຺ພານຄໂຕປິ ໂລກນາໂຖ;

ຊນກາຍຫິຕໍ ສຸຂຎ຺ຈ ສມ຺ມາ,

ພຫຸຘາ’ກາສິ ຐິເຕ ຊິເນ ກຖາວກາຕິ.

ສຸຊນປ຺ປສາທສໍເວຄຕ຺ຖາຍ ກເຕ ມຫາວໍເສ

ຘາຕຸອຄມໂນ ນາມ

ສຕ຺ຕຣສໂມ ປຣິຈ຺ເຉໂທ.