໘. ອຸຓາທິກປ຺ປ

ຉຏ຺ຐກຓ຺ຑ

໖໒໔. , ໕໖໓. ກຕ຺ຕຣິ ກິຕ.

ກຕ຺ຕຸອິຈ຺ເຈຕສ຺ມິໍ ອຕ຺ເຖ ກິຕ ປຈ຺ຈຍາ ໂຫນ຺ຕິ.

ກາຣຸ, ກາຣຸໂກ, ກາຣໂກ, ປາຈໂກ, ກຕ຺ຕາ, ຊນິຕາ, ປຈິຕາ, ເນຕາ.

໖໒໕. , ໖໐໕. ຠາວກມ຺ເມສຸ ກິຈ຺ຈຕ຺ຕ ຂຕ຺ຖາ.

ຠາວກມ຺ມອິຈ຺ເຈເຕສ຺ວຕ຺ເຖສຸ ກິຈ຺ຈ ຕ຺ຕ ຂຕ຺ຖອິຈ຺ເຈເຕ ປຈ຺ຈຍາ ໂຫນ຺ຕິ.

ອຸປສມ຺ປາເທຕພ຺ພໍ ອຸປສມ຺ປາທນີຍໍ ຠວຕາ, ສຍິຕພ຺ພໍ ຠວຕາ, ກຕ຺ຕພ຺ພໍ ຠວຕາ, ໂຠຕ຺ຕພ຺ໂພ ໂອທໂນ ຠວຕາ, ອສິຕພ຺ພໍ ໂຠຊນໍ ຠວຕາ, ອສິຕໍ ຠວຕາ, ສຍິຕໍ ຠວຕາ, ປຈິຕໍ ຠວຕາ, ອສິຕໍ ອສນໍ ຠວຕາ, ສຍິຕໍ ສຍນໍ ຠວຕາ, ປຈິໂຕ ໂອທໂນ ຠວຕາ, ກິຎ຺ຈິສ຺ສໂຍ, ອີສສ຺ສໂຍ, ທຸສ຺ສໂຍ, ສຸສ຺ສໂຍ ຠວຕາ.

໖໒໖. , ໖໓໔. ກມ຺ມນິ ທຸຕິຍາຍ ຕ຺ໂຕ.

ກມ຺ມນິ ອິຈ຺ເຈຕສ຺ມິໍ ອຕ຺ເຖ ທຸຕິຍາຍໍ ວິຠຕ຺ຕິຍໍ ກຕ຺ຕຣິ ຕ຺ຕປຈ຺ຈໂຍ ໂຫຕິ.

ທານໍ ທິນ຺ໂນ ເທວທຕ຺ໂຕ, ສີລໍ ຣກ຺ຂິໂຕ ເທວທຕ຺ໂຕ, ຠຕ຺ຕໍ ຠຸຕ຺ໂຕ ເທວທຕ຺ໂຕ, ຄຣຸໍ ອຸປາສິໂຕ ເທວທຕ຺ໂຕ.

໖໒໗. , ໖໕໒. ຂ຺ຍາທີຫິ ມານ ມ ຈ ໂຕ ວາ.

ຂິ ຠີ ສຸ ຣຸ ຫຸ ວາ ຘູ ຫິ ລູ ປີ ອທອິຈ຺ເຈວມາທີຫິ ຘາຕູຫິ ມນ ປຈ຺ຈໂຍ ໂຫຕິ, ມສ຺ສ ຈ ໂຕ ໂຫຕິ ວາ.

ຂີຍນ຺ຕິ ອຸປທ຺ທວາ ເອຕ຺ຖາຕິ ເຂໂມ, ຠາຍິຕພ຺ໂພຕິ ເຠໂມ, ຠາຍນ຺ຕິ ເອຕສ຺ມາຕິ ວາ ເຠໂມ, ຣໍສິໂຍ ອຠິສ຺ສເວຕີຕິ ໂສໂມ, ຣວຕິ ຄຈ຺ຉຕີຕິ ໂຣໂມ, ຫຸວຕິ ຊຸຫ຺ວຕິ ເອເຕນາຕິ ໂຫໂມ, ປຏິໂລມວເສນ ວາຕິ ຄຈ຺ຉຕີຕິ ວາໂມ, ລາມກວເສນ ວາຕິ ຄຈ຺ຉຕິ ປວຕ຺ຕຕີຕິ ວາ ວາໂມ, ຘຸນາຕິ ກມ຺ປຕີຕິ ຘູໂມ, ເສຏ຺ຐຠາເວນ ຫິໂນຕິ ປວຕ຺ຕຕິ ຈິຕ຺ຕໍ ເອຕສ຺ມິນ຺ຕິ ເຫໂມ, ລຸນິຕພ຺ໂພຕິ ໂລໂມ, ມໍສຈມ຺ມານິ ລຸນາຕິ ຉິນ຺ທຕີຕິ ວາ ໂລໂມ, ປິຍນໍ ເປໂມ, ປິຍາຍິຕພ຺ໂພຕິ ວາ ເປໂມ, ສຸຂທຸກ຺ຂໍ ອທຕິ ຠກ຺ຂຕີຕິ ອຕ຺ຕາ, ຊາຕິຊຣາມຣຓາທີຫິ ອທີຍເຕ ຠກ຺ຂີຍເຕຕິ ວາ ອຕ຺ຕາ, ອາຕຸມາ.

໖໒໘. , ໖໕໓. ສມາທີຫິ ຖ ມາ.

ສມຸ ທມຸ ທຣ ຣຫ ທຸ ຫິ ສິ ຠີ ທາ ຍາ ສາ ຐາຠສອິຈ຺ເຈວມາທີຫິ ຘາຕູຫິ ຖ ມ ປຈ຺ຈຍາ ໂຫນ຺ຕິ.

ສເມຕີຕິ ສມໂຖ, ທມຕີຕິ ທມໂຖ, ທມນໍ ວາ ທມໂຖ, ທມິຕພ຺ໂພຕິ ວາ ທມໂຖ, ທຣຕີຕິ ທຣໂຖ, ຊິຓ຺ຓຠາວໍ ຣຫິສ຺ສຕິ ຄຓ຺ຫິສ຺ສຕີຕິ ຣໂຖ, ທພ຺ພສມ຺ຠາເຣ ຣຫຕິ ຄຓ຺ຫາຕີຕິ ວາ ຣໂຖ, ທວຕິ ຄຈ຺ຉຕີຕິ ທຸໂມ, ທວຕິ ວຸທ຺ຘິ ວິຣຸຬ຺ຫິ ຄຈ຺ຉຕິ ປວຕ຺ຕຕີຕິ ອຸທ຺ຘໍ ວາ ທຸໂມ, ປຖວີປພ຺ພຕາທີສຸ ຄຈ຺ຉຕິ ປຕຕີຕິ ຫິໂມ, ກມ຺ມວາຈາຍ ພນ຺ຘຕິ ເອຕ຺ຖາຕິ ສີມາ. ພນ຺ຘິຕພ຺ພາຕິ ວາ ສີມາ. ຠາຍນ຺ຕິ ເອຕສ຺ມາຕິ ຠີໂມ, ສຕ຺ເຕ ອວຂຓ຺ເຑນ຺ຕິ ນິວາເຣນ຺ຕິ ເອເຕນາຕິ ທາໂມ, ມູສິກາທີຫິ ຂາທີຍຕິ ອວຂຓ຺ຑີຍຕີຕິ ວາ ທາໂມ, ຍາຕິ ຄຈ຺ຉຕີຕິ ຍາໂມ, ປເຣສໍ ຈິຕ຺ຕໍ ຄຓ຺ຫິຕຸໍ ສມຕ຺ເຖຕີຕິ ສາໂມ, ຕິຏ຺ຐນ຺ຕິ ເອເຕນາຕິ ຖາໂມ, ຠສຕິ ຠສ຺ມີກຣີຍຕີຕິ ຠສ຺ມາ.

໖໒໙. , ໕໖໙. ຄຫສ຺ສຸ’ປຘສ຺ເສ ວາ.

ຄຫອິຈ຺ເຈຕສ຺ສ ຘາຕຸສ຺ສ ອຸປຘສ຺ສ ອກາຣສ຺ສ ເອຕ຺ຕ ໂຫຕິ ວາ.

ທພ຺ພສມ຺ຠາຣ ຄຓ຺ຫາຕີຕິ ເຄຫໍ, ຄຫໍ.

໖໓໐. , ໖໕໔. ມສຸສ຺ສ ສຸສ຺ສ ຈ຺ຉຣ ຈ຺ເຉຣາ.

ມສຸອິຈ຺ເຈຕສ຺ສ ປາຏິປທິກສ຺ສ ສຸສ຺ສ ຈ຺ຉຣຈ຺ເຉຣາເທສາ ໂຫນ຺ຕິ.

ມຈ຺ຉຣຕີຕິ ມຈ຺ຉໂຣ, ເອວໍ ມຈ຺ເຉໂຣ.

໖໓໑. , ໖໕໕. ອາປຸພ຺ພຈຣສ຺ສ ຈ.

ອາປຸພ຺ພສ຺ສ ຈຣອິຈ຺ເຈຕສ຺ສ ຘາຕຸສ຺ສ ຈ຺ຉຣິຍຈ຺ຉຣຈ຺ເຉຣາ ເທສາ ໂຫນ຺ຕິ, ອາປຸພ຺ພສ຺ສ ຈ ຣສ຺ໂສ ໂຫຕິ.

ອາຠຸໂສ ຈຣິຕພ຺ພນ຺ຕິ ອຈ຺ຉຣິຍໍ. ເອວໍ ອຈ຺ຉຣໍ, ອຈ຺ເຉຣໍ.

ຈຄ຺ຄຫເຓນ ມສຸສ຺ສ ສຸສ຺ສາປິ ຈ຺ຉຣິຍາເທໂສ ໂຫຕິ, ມຈ຺ຉຣິຍໍ.

໖໓໒. , ໖໕໖. ອລ ກລ ສເລຫິ ລຍາ.

ອລ ກລ ສລອິຈ຺ເຈເຕຫິ ຘາຕູຫິ ລ ຍປຈ຺ຈຍາ ໂຫນ຺ຕິ.

ອລຕິ ສມຕ຺ເຖຕີຕິ ອລ຺ລໍ, ກລິຕພ຺ພໍ ສງ຺ຂ຺ຍາຕພ຺ພນ຺ຕິ ກລ຺ລໍ, ສລຕິ ຄຈ຺ຉຕິ ປວິສຕີຕິ ສລ຺ລໍ. ເອວໍ ອລ຺ຍໍ, ກລ຺ຍໍ, ສລ຺ຍໍ.

໖໓໓. , ໖໕໗. ຍາຓ ລາຓາ.

ເຕຫິ ກລ ສລອິຈ຺ເຈເຕຫິ ຘາຕູຫິ ຍາຓ ລາຓປຈ຺ຈຍາ ໂຫນ຺ຕິ.

ກລິຕພ຺ພໍ ສງ຺ຂ຺ຍາຕພ຺ພນ຺ຕິ ກລ຺ຍາຓໍ, ຄຓໂຕ ປຏິກ຺ກມິຕ຺ວາ ສລນ຺ຕິ ເອຕ຺ຖາຕິ ປຏິສລ຺ຍາຓໍ. ເອວໍ ສລ຺ລາໂຓ, ປຏິສລ຺ລາໂຓ.

໖໓໔. , ໖໕໘. ມຖິສ຺ສ ຖສ຺ສ ໂລ ຈ.

ມຖອິຈ຺ເຈຕສ຺ສ ຘາຕຸສ຺ສ ຖສ຺ສ ລາເທໂສໂຫຕິ. ອຎ຺ຎມຎ຺ຎໍ ມຖຕິ ວິໂລຬຕີຕິ ມລ຺ໂລ, ມລ຺ລໍ.

ຈຄ຺ຄຫເຓນ ລໂຕ ໂກ ຈ ອາຄໂມ ໂຫຕິ. ມລ຺ລໂກ, ມລ຺ລກໍ.

໖໓໕. , ໕໕໙. ເປສາຕິສຄ຺ຄປຕ຺ຕກາເລສຸກິຈ຺ຈາ.

ເປສ ອຕິສຄ຺ຄ ປຕ຺ຕກາລອິຈ຺ເຈເຕສ຺ວຕ຺ເຖສຸ ກິຈ຺ຈປຈ຺ຈຍາ ໂຫນ຺ຕິ.

ກຕ຺ຕພ຺ພໍ ກມ຺ມໍ ຠວຕາ, ກຣຓີຍໍ ກິຈ຺ຈໍ ຠວຕາ, ໂຠຕ຺ຕພ຺ພໍ ໂຠຊນໍ ຠວຕາ, ໂຠຊນີຍໍ ໂຠຊນໍ ຠວຕາ, ອຊ຺ຌຍິຕພ຺ພໍ ອຊ຺ເຌຍ຺ຍໍ ຠວຕາ, ອຊ຺ຌຍນີຍໍ ອຊ຺ເຌຍ຺ຍໍ ຠວຕາ.

໖໓໖. , ໖໕໙. ອວສ຺ສກາ’ຘມິເຓສຸ ຓີ ຈ.

ອວສ຺ສກ ອຘມິຓອິຈ຺ເຈເຕສ຺ວຕ຺ເຖສຸ ຓີປຈ຺ຈໂຍ ໂຫຕິ, ກິຈ຺ຈາ ຈ.

ອວສ຺ສເຕ ຕາວ – ກາຣີສິ ເມ ກມ຺ມໍ ອວສ຺ສໍ ຫາຣີສິ ເມ ຠາຣໍ ອວສ຺ສໍ.

ອຘມິເຓ – ທາຍີສິ ເມ ສຕໍ ອິຓໍ, ຘາຣີສິ ເມ ສຫສ຺ສໍ ອິຓໍ.

ກິຈ຺ຈາ ຈ – ທາຕພ຺ພໍ ເມ ຠວຕາ ສຕໍ ອິຓໍ. ຘາຣຍິຕພ຺ພໍ ເມ ຠວຕາ ສຫສ຺ສໍ ອິຓໍ, ກຕ຺ຕພ຺ພໍ ເມ ຠວຕາ ເຄຫໍ, ກຣຓີຍໍ ເມ ຠວຕາ ກິຈ຺ຈໍ, ກາຣິຍໍ ເມ ຠວຕາ ສຍນໍ.

໖໓໗. , ໐. ອຣຫສກ຺ກາທີຫິ ຕຸໍ.

ອຣຫ ສກ຺ກ ຠພ຺ພອິຈ຺ເຈວມາທີຫິ ປໂຍເຄ ສຕິ ສພ຺ພຘາຕູຫິ ຕຸໍປຈ຺ຈໂຍ ໂຫຕິ.

ອຣຫາ ຠວໍ ວຕ຺ຕຸໍ, ອຣຫາ ຠວໍ ກຕ຺ຕຸໍ, ສກ຺ກາ ຠວໍ ຫນ຺ຕຸໍ, ສກ຺ກາ ຠວໍ ຊເນຕຸໍ, ຊນິຕຸໍ, ຠວິຕຸໍ, ສກ຺ກາ ຠວໍ ທາຕຸໍ, ສກ຺ກາ ຠວໍ ຄນ຺ຕຸໍ, ຕພ຺ໂພ ຠວໍ ຊເນຕຸໍ ອິຈ຺ເຈວມາທິ.

໖໓໘. , ໖໖໐. ວຊາທີຫິປພ຺ພຊ຺ຊາທໂຍ ນິປ຺ປຊ຺ຊນ຺ເຕ.

ວຊອິຈ຺ເຈວມາທີຫິ ຘາຕູຫິ, ອຸປສຄ຺ຄປຈ຺ຈຍາທີຫິ ຈ ປພ຺ພຊ຺ຊາທໂຍ ສທ຺ທາ ນິປ຺ປຊ຺ຊນ຺ເຕ.

ປຐມເມວ ວຊິຕພ຺ພາຕິ ປພ຺ພຊ຺ຊາ, ອິຎ຺ຊນໍ ເອຊ຺ຊາ, ສມຊ຺ຊນໍ ສມຊ຺ຊາ, ນິສີທນໍ ນິສຊ຺ຊາ, ວິຊານນໍ ວິຊ຺ຊາ ວິສຊ຺ຊນໍ ວິສຊ຺ຊາ, ປທນໍ ປຊ຺ຊາ, ຫນນໍ ວຊ຺ຌາ, ເອສນໍ ອິຈ຺ຉາ, ອຕິເອສນໍ ອຕິຈ຺ຉາ, ສທນໍ ສຊ຺ຊາ, ສຍນ຺ຕິ ເອຕ຺ຖາຕິ ເສຍ຺ຍາ, ສມ຺ມາ ຈິຕ຺ຕໍ ນິເຘຕິ ເອຕາຍາຕິ ສທ຺ຘາ, ຈຣິຕພ຺ພາ ຈຣິຍາ, ກຣຓໍ ກິຣິຍາ, ຣຸຊນໍ ຣຸຈ຺ຉາ, ປທນໍ ປຈ຺ຉາ, ຣິຎ຺ຈນໍ ຣິຈ຺ຉາ, ຕິກິຈ຺ຉນໍ ຕິຕິຈ຺ຉາ, ສໍໂກຈນໍ ສໍກຸຈ຺ຉາ, ມທນໍ ມຈ຺ຉາ, ລຠນໍ ລຈ຺ຉາ, ຣທິຫພ຺ພາຕິ ຣຈ຺ຉາ, ຣທນໍ ວິເລຂນໍ ວາຣຈ຺ຉາ, ອໂຘ ຠາເຄນ ຄຈ຺ຉຕີຕິ ຕິຣຈ຺ຉາ, ຕິຣຈ຺ຉາໂນ, ອຊນໍ ອຈ຺ຉາ, ຕິຕິກ຺ຂຕີຕິ ຕິຕິກ຺ຂາ, ສຫ ອາຄມນໍ ສາຄຈ຺ຉາ, ທຸຏ຺ຐຸ ຠກ຺ຂນໍ ໂທຠຈ຺ຉາ, ທຸຏ຺ຐຸ ໂຣສນໍ ທຸຣຸຈ຺ຉາ, ປຸຈ຺ຉນໍ ປຸຈ຺ຉາ, ມຸຫນໍ ມຸຈ຺ຉາ, ວສນໍ ວຈ຺ຉາ, ກຈນໍ ກຈ຺ຉາ, ສຫ ກຖນໍ ສາກຈ຺ຉາ, ຕຸທນໍ ຕຸຈ຺ຉາ, ວິສນໍ ວິຈ຺ຉາ, ປິສນໍ ປິຈ຺ຉິລ຺ລາ, ສຸຂທຸກ຺ຂໍ ມຸທຕິ ຠກ຺ຂຕີຕິ ມຈ຺ໂຉ, ສຕ຺ຕານໍ ປາຓໍ ມຸເສຕິ ຈເຊຕີຕິ ມຈ຺ຈຸ, ສຕນໍ ສຈ຺ຈໍ, ອຸທ຺ຘໍ ຘຸນາຕິ ກມ຺ປຕີຕິ ອຸທ຺ຘຈ຺ຈໍ, ນຏນໍ ນຈ຺ຈໍ, ນິຕນໍ ນິຈ຺ຈໍ, ຕຖນໍ ຕຈ຺ຉໍ ອິຈ຺ເຈວມາທິ.

໖໓໙. , ໕໘໕. ກ຺ວິໂລໂປ ຈ.

ກ຺ວິໂລໂປ ໂຫຕິ, ປຸນ ຈ ນິປ຺ປຊ຺ຊນ຺ເຕ.

ວິວິເຘຫິ ສີລາທິຄຸເຓຫິ ຠວຕີຕິ ວິຠູ, ວິເສເສນ ວາ ຠວຕີຕິ ວິຠູ, ສຍໍ ອຕ຺ຕນາ ຠວຕີຕິ ສຍມ຺ຠູ, ອຠິວິຕ຺ວາ ຠວຕີຕິ ອຠິຠູ, ສໍ ສຸຏ຺ຐຸ ຘຸນາຕິ ກມ຺ປຕີຕິ ສນ຺ຘູ, ວິເສເສນ ຠາຕິ ທິພ຺ພຕີຕິ ວິຠາ, ນິສ຺ເສເສນ ຠາຕິ ທິພ຺ພຕີຕິ ນິຠາ, ປກາເຣນ ຠາຕິ ທິພ຺ພຕີຕິ ປຠາ, ສຫ ຠາສນ຺ຕິ ເອຕ຺ຖາຕິ ສຠາ, ອາຠຸໂສ ຠາຕິ ທິພ຺ພຕີຕິ ອາຠາ, ຠຸເຊນ ກຸຏິເລນ ຄຈ຺ຉຕີຕິ ຠຸຊໂຄ, ຕຸຣິຕຕຸຣິໂຕ ຄຈ຺ຉຕີຕິ ຕຸຣໂຄ, ສໍ ສຸຏ຺ຐຸ ປຖວິໍ ຂນຕີຕິ ສງ຺ໂຂ, ວິເສເສນ ຍມຕິ ອຸປຣມຕີຕິ ວິໂຍ, ສຸຏ຺ຐຸ ມນຕິ ຊານາຕີຕິ ສຸໂມ, ປຣິ ສມນ຺ຕໂຕ ຕໂນຕິ ວິຕ຺ຖາເຣຕີຕິ ປຣິໂຕ ອິຈ຺ເຈວມາທິ.

໖໔໐. , ໐. ສຈຊານໍ ກຄາ ຓານຸພນ຺ເຘ.

ສຈ ຊານໍ ຘາຕູນມນ຺ຕານໍ ຈຊານໍ ກຄາເທສາ ໂຫນ຺ຕິ ຍຖາສງ຺ຂ຺ຍໍ ຓານຸພນ຺ເຘ ປຈ຺ຈເຍ ປເຣ.

ໂອໂກ, ປາໂກ, ເສໂກ, ໂສໂກ, ວິເວໂກ, ຈາໂຄ, ໂຍໂຄ, ໂຠໂຄ, ໂຣໂຄ, ຣາໂຄ, ຠາໂຄ, ຠງ຺ໂຄ, ຣງ຺ໂຄ, ສງ຺ໂຄ.

໖໔໑. , ໕໗໒. ນຸທາທີຫິ ຍຸຓ຺ວູນມນານນາການນກາ ສກາຣິເຕຫິ ຈ.

ນຸທ ສູທ ຊນ ສຸ ລູ ຫຸ ປຸ ຠູ ຎາ ອ ສ ສມຸອິຈ຺ເຈວມາທີຫິ ຘາຕູຫິ, ຜນ຺ທ ຈິຕິ ອາຓ ອິຈ຺ເຈວມາທີຫິ ສກາຣິເຕຫິ ຈ ຍຸຓ຺ວູນໍ ປຈ຺ຈຍານໍ ອນ ອານນ ອກ ອານນກາເທສາ ໂຫນ຺ຕິ ຍຖາສງ຺ຂ຺ຍໍ ກຕ຺ຕຣິ, ຠາວກຣເຓສຸ ຈ.

ກຕ຺ຕຣິ ຕາວ – ປນຸທຕີຕິ ປນູທໂນ. ເອວໍ ສູທໂນ, ຊນໂນ, ສວໂຓ, ລວໂນ, ຫວໂນ, ປວໂນ, ຠວໂນ, ຎາໂຓ, ອສໂນ, ສມໂຓ.

ຠາເວ ຈ – ປນຸທເຕ ປນູທນໍ. ເອວໍ ສູທນໍ, ຊນນໍ, ສວຓໍ, ລວນໍ, ຫວນໍ, ປວນໍ, ຠວນໍ, ຎາຓໍ, ອສນໍ, ສມຓໍ, ສຎ຺ຊານນໍ, ກຸຍເຕ ການນໍ.

ກາຣິເຕ ຈ – ຜນ຺ທາປີຍເຕ ຜນ຺ທາປນໍ, ເຈຕາປີຍເຕ ເຈຕາປນໍ, ອາຓາປີຍເຕ ອາຓາປນໍ.

ກຣເຓ – ນຸທນ຺ຕິ ອເນນາຕິ ນູທນໍ, ເອວໍ ສູທນໍ, ຊນນໍ, ສວຓໍ, ລວຓໍ, ຫວນໍ, ປວນໍ, ຠຄນໍ, ຎາຓໍ, ອສນໍ, ສວຓໍ.

ປຸນ ກຕ຺ຕຣິ – ນຸທຕີຕິ ນູທໂກ, ສູທຕີຕິ ສູທຘກາ, ຊເນຕີຕິ ຊນໂກ, ສຸໂຓຕີຕິ ສາວໂກ, ລຸນາຕີຕິ ລາວໂກ, ຊຸໂຫຕີຕິ ຫາວໂກ, ປຸນາຕີຕິ ປາວໂກ, ຠວຕີຕິ ຠາວໂກ, ຊານາຕີຕິ ຊານໂກ, ອສຕີຕິ ອສໂກ, ອຸປາສຕີຕິ ອຸປາສໂກ, ສເມຕີຕິ ສມໂກ.

ກາຣິເຕ ຕຸ – ຜນ຺ທາປຍຕີຕິ ຜນ຺ທາປຍໂກ. ເອວໍ ອາຓາປຍໂກ, ເຈຕາປຍໂກ, ສຎ຺ຊານນໂກ.

໖໔໒. , ໕໘໘. ອິ ຍ ຕ ມ ກິ ເອ ສານ’ມນ຺ຕສ຺ສໂຣ ທີຆໍ ກ຺ວຈິ ທຸ ສ ສ຺ສ ຄຸຓໍ ໂທ ຣໍ ສກ຺ຂີ ຈ.

ອິຍ ຕ ມ ກິ ເອ ສອິຈ຺ເຈເຕສໍ ສພ຺ພນາມານມນ຺ໂຕ ສໂຣ ທີຆມາປຊ຺ຊເຕ, ກ຺ວຈິ ທຸສອິຈ຺ເຈຕສ຺ສ ຘາຕຸສ຺ສ ອຸກາໂຣ ຄຸຓມາປຊ຺ຊເຕ, ທກາໂຣ ຣກາຣມາປຊ຺ຊເຕ, ຘາຕ຺ວນ຺ຕສ຺ສ ສສ຺ສ ຈ ສ ກ຺ຂ ອີອິຈ຺ເຈເຕ ອາເທສາ ໂຫນ຺ຕິ ຍຖາສມ຺ຠວໍ. ເອເຕ ສທ຺ທາ ສເກນ ສເກນ ນາເມນ ຍຖານຸປໂຣເຘນ ພຸທ຺ຘສາສເນ ປຈ຺ຉາ ປຸນ ນິປ຺ປຊ຺ຊນ຺ເຕ.

ອິມມິວ ນໍ ປສ຺ສຕີຕິ ອີທິໂສ, ຍມິວ ນໍ ປສ຺ສຕີຕິ ຍາທິໂສ, ຕມິວ ນໍ ປສ຺ສຕີຕິ ຕາທິໂສ, ມມິວ ນໍ ປສ຺ສຕີຕິ ມາທິໂສ, ກິມິວ ນໍ ປສ຺ສຕີຕິ ກີທິໂສ, ເອຕມິວ ນໍ ປສ຺ສຕີຕິ ເອທິໂສ, ສມານມິວ ນໍ ປສ຺ສຕີຕິ ສາທິໂສ. ອິມມິວ ນໍ ປສ຺ສຕີຕິ ອີຣິໂສ, ຍມິວ ນໍ ປສ຺ສຕີຕິ ຍາຣິໂສ, ຕມິວ ນໍ ປສ຺ສຕີຕິ ຕາຣິໂສ, ມມິວ ນໍ ປສ຺ສຕີຕິ ມາຣິໂສ, ກິມິວ ນໍ ປສ຺ສຕີຕິ ກີຣິໂສ, ເອຕມິວ ນໍ ປສ຺ສຕີຕິ ເອຣິໂສ, ສມານມິວ ນໍ ປສ຺ສຕີຕິ ສາຣິໂສ. ອິມມິວ ນໍ ປສ຺ສຕີຕິ ອີທິກ຺ໂຂ, ຍມິວ ນໍ ປສ຺ສຕີຕິ ຍາທິກ຺ໂຂ, ຕມິວ ນໍ ປສ຺ສຕີຕິ ຕາທິກ຺ໂຂ, ເອວໍ ມາທິກ຺ໂຂ, ກີທິກ຺ໂຂ, ເອທິກ຺ໂຂ, ສາທິກ຺ໂຂ. ອີທີ, ຍາທີ, ຕາທີ, ມາທີ, ກີທີ, ເອທີ, ສາທີ.

ຈຄ຺ຄຫເຓນ ເຕສເມວ ສທ຺ທານໍ ອິຍອິຈ຺ເຈວມາທີນມນ຺ໂຕ ຈ ສໂຣ ກ຺ວຈິ ທີຆຕ຺ຖມາຫຸ. ອີທິກ຺ໂຂ, ຍາທິກ຺ໂຂ, ຕາທິກ຺ໂຂ, ມາທິກ຺ໂຂ, ກີທິກ຺ໂຂ, ເອທິກ຺ໂຂ, ສາທິກ຺ໂຂ. ອິທິໂສ, ສທິໂສ, ສຣິໂສ, ສຣິກ຺ໂຂ.

໖໔໓. , ໖໓໕. ຠ຺ຍາທີຫິ ມຕິ ພຸຘິ ປູຊາທີຫິ ຈ ຕ຺ໂຕ.

ຠີອິຈ຺ເຈວມາທີຫິ ຘາຕູຫິ, ມຕິ. ພຸຘິ ປູຊາທິໂຕ ຈ ຕ຺ຕ ປຈ຺ຈໂຍ ໂຫຕິ.

ຠາຍິຕພ຺ໂພຕິ ຠີໂຕ, ສຸປິຕພ຺ໂພຕິ ສຸຕ຺ໂຕ, ມິຊ຺ຊິຕພ຺ໂພ ສິເນເຫຕພ຺ໂພຕິ ມິຕ຺ໂຕ, ສມ຺ມນ຺ນິຕພ຺ໂພຕິ ສມ຺ມໂຕ, ສໍ ສຸຏ຺ຐຸ ມານິຕພ຺ໂພ ປູເຊຕພ຺ໂພຕິ ສມ຺ມໂຕ, ສມ຺ມານີຍິຕ຺ຖາຕິ ສມ຺ມໂຕ, ສໍກປ຺ປີຍເຕຕິ ສງ຺ກປ຺ປິໂຕ, ສໍກປ຺ປີຍິຕ຺ຖາຕິ ສງ຺ກປ຺ປິໂຕ, ສມ຺ປາທີຍເຕຕິ ສມ຺ປາທິໂຕ, ສມ຺ປາທີຍິຕ຺ຖາຕິ ສມ຺ປາທິໂຕ, ອວຘາຣີຍເຕຕິ ອວຘາຣິໂຕ, ອວຘາຣີຍິຕ຺ຖາຕິ ອວຘາຣິໂຕ, ພຸຊ຺ຌິຕພ຺ໂພ ຎາຕພ຺ໂພຕິ ພຸທ຺ໂຘ, ອຊ຺ຌຍິຕພ຺ໂພຕິ ອິໂຕ, ເອຕພ຺ໂພ ຄນ຺ຕພ຺ໂພຕິ ອິໂຕ, ວິທິຕພ຺ໂພ ຎາຕພ຺ໂພຕິ ວິທິໂຕ, ຕກ຺ກີຍເຕຕິ ຕກ຺ກິໂຕ, ປູຊີຍເຕຕິ ປູຊິໂຕ, ປູຊີຍິຕ຺ຖາຕິ ປູຊິໂຕ, ອປຈາຍິຕພ຺ໂພຕິ ອປຈາຍິໂຕ, ມານິຕພ຺ໂພ ປູເຊຕພ຺ໂພຕິ ມານິໂຕ, ອປຈີຍເຕຕິ ອປຈິໂຕ, ວນ຺ທີຍເຕຕິ ວນ຺ທິໂຕ, ວນ຺ທີຍິຕ຺ຖາຕິ ວນ຺ທິໂຕ, ສກ຺ກຣີຍເຕຕິ ສກ຺ກາຣິໂຕ, ສກ຺ກຣີຍິຕ຺ຖາຕິ ສກ຺ກາຣິໂຕ.

໖໔໔. , ໖໖໑. ເວປຸ ສີ ທວ ວມຸ ກຸ ທາ ຠູ ຫ຺ວາທີຫິ ຖຸ ຕ຺ຕິມ ຓິມາ ນິພ຺ພຕ຺ເຕ.

ເວປຸ ສີ ທວ ວມຸ ກຸ ທາ ຠູ ຫຸອິຈ຺ເຈວມາທີຫິ ຘາຕູຫິ ຍຖາສມ຺ຠວໍ ຖຸ ຕ຺ຕິມ ຓິມປຈ຺ຈຍາ ໂຫນ຺ຕິ ນິພ຺ພຕ຺ຕຕ຺ເຖ.

ເວປນໍ ເວໂປ, ເຕນ ນິພ຺ພຕ຺ໂຕ ເວປຖຸ, ສຍນໍ ສໂຍ, ເຕນ ນິພ຺ພຕ຺ໂຕ ສຍຖຸ, ທວນໍ ທໂວ, ເຕນ ນິພ຺ພຕ຺ໂຕ ທວຖຸ. ວມນໍ ວໂມ, ເຕນ ນິພ຺ພຕ຺ໂຕ ວມຖຸ. ກຸຕ຺ຕິ ກຣຓໍ, ເຕນ ນິພ຺ພຕ຺ຕໍ ກຸຕ຺ຕິມໍ. ທາຕິ ທານໍ, ເຕນ ນິພ຺ພຕ຺ຕໍ ທຕ຺ຕິມໍ. ຠູຕິ ຠວນໍ, ເຕນ ນິພ຺ພຕ຺ຕໍ ໂຠຕ຺ຕິມໍ. ອວຫຸຕິ ອວຫນໍ, ເຕນ ນິພ຺ພຕ຺ຕໍ ໂອຫາວິມໍ.

໖໔໕. , ໖໖໒. ອກ຺ໂກເສ ນມ຺ຫານິ.

ອກ຺ໂກສອິຈ຺ເຈຕສ຺ມິໍ ອຕ຺ເຖ ນມ຺ຫິ ປຏິເສຘຍຸຕ຺ເຕ ອານິປຈ຺ຈໂຍ ໂຫຕິ ຘາຕູຫິ.

ນ ຄມິຕພ຺ພໍ ອຄມານິ ເຕ ຊມ຺ມ ເທສໍ, ນ ກຕ຺ຕພ຺ພໍ ອກຣາຓິ ເຕ ຊມ຺ມ ກມ຺ມໍ.

ນມ຺ຫີຕິ ກິມຕ຺ຖໍ? ວິປຕ຺ຕິ ເຕ ຊມ຺ມ, ວິກຕິ ເຕ ຊມ຺ມ.

ອກ຺ໂກເສຕິ ກິມຕ຺ຖໍ? ນ ຄນ຺ຕພ຺ພາ ອຄຕິ ເຕ.

໖໔໖. , ໔໑໙. ເອກາທິໂຕ ສກິສ຺ສ ກ຺ຂຕ຺ຕຸໍ.

ເອກາທິໂຕ ສກິສ຺ສ ກ຺ຂຕ຺ຕຸໍ ໂຫຕິ.

ເອກສ຺ສ ປທຕ຺ຖສ຺ສ ສກິໍ ວາຣໍ ເອກກ຺ຂຕ຺ຕຸໍ, ທ຺ວິນ຺ນໍ ປທຕ຺ຖານໍ ສກິໍ ວາຣໍ ທ຺ວິກ຺ຂຕ຺ຕຸໍ, ຕິຓ຺ຓໍ ປທຕ຺ຖານໍ ສກິໍ ວາຣໍ ຕິກ຺ຂຕ຺ຕຸໍ, ເອວໍ ຈຕຸກ຺ຂຕ຺ຕຸໍ, ປຎ຺ຈກ຺ຂຕ຺ຕຸໍ, ຉກ຺ຂຕ຺ຕຸໍ, ສຕ຺ຕກ຺ຂຕ຺ຕຸໍ, ອຏ຺ຐກ຺ຂຕ຺ຕຸໍ, ນວກ຺ຂຕ຺ຕຸໍ, ທສກ຺ຂຕ຺ຕຸໍ. ອິຈ຺ເຈວມາທໂຍ ສທ຺ທາ ໂຍເຊຕພ຺ພາ.

໖໔໗. , ໖໖໓. ສຸນສ຺ສຸນສ຺ໂສຓ ວານຸວານູນຸນຂຸນານາ.

ສຸນອິຈ຺ເຈຕສ຺ສ ປາຏິປທິກສ຺ສ ອຸນສ຺ສ ໂອຓ ວານ ອຸວານ ອູນ ອຸນຂ ອຸນ ອາ ອານາເທສາ ໂຫນ຺ຕິ.

ສາມິກສ຺ສ ສທ຺ທໍ ສຸຓາຕີຕິ ໂສໂຓ, ສາມິກສ຺ສ ສທ຺ທໍ ສຸຓາຕີຕິ ສ຺ວາໂນ, ເອວໍ ສຸວາໂນ, ສູໂນ, ສຸນໂຂ, ສຸໂນ, ສາ, ສາໂນ.

໖໔໘. , ໖໖໔. ຕຣຸຓສ຺ສ ສຸສຸ ຈ.

ຕຣຸຓອິຈ຺ເຈຕສ຺ສ ປາຏິປທິກສ຺ສ ສຸສຸ ອາເທໂສ ໂຫຕິ.

ສຸສຸ ກາຬເກໂສ.

໖໔໙. , ໖໖໕. ຍຸວສ຺ສຸວສ຺ສຸວຸວານຸນູນາ.

ຍຸວອິຈ຺ເຈຕສ຺ສ ປາຏິປທິກສ຺ສ ອຸວສ຺ສ ອຸວອຸວານ ອຸນອູນາເທສາ ໂຫນ຺ຕິ.

ຍຸວາ, ຍຸວາໂນ, ຍຸໂນ, ຍູໂນ.

໖໕໐. , ໖໕໑. ກາເລ ວຕ຺ຕມານາຕີເຕ ຓ຺ວາທໂຍ.

ກາເລ ວຕ຺ຕມານຕ຺ເຖ ຈ ອຕີຕຕ຺ເຖ ຈ ຓຸ ຍຸ ຕປຈ຺ຈຍາ ໂຫນ຺ຕິ.

ອກາສິ, ກໂຣຕີຕິ ກາຣຸ, ອຄຈ຺ຉິ, ຄຈ຺ຉຕີຕິ, ວາຍຸ, ອຠວິ, ຠວຕີຕິ ຠູຕໍ.

໖໕໑. , ໖໔໗. ຕວິສ຺ສຕິ ຄມາທີຫິ ຓີ ຆິຓ.

ຠວິສ຺ສຕິກາລຕ຺ເຖ ຄມຸ ຠຊ ສຸ ຐາອິຈ຺ເຈວມາທີຫິ ຘາຕູຫິ ຓີ ຆິຓ ປຈ຺ຈຍາ ໂຫນ຺ຕິ.

ອາຍຕິໍ ຄມິຕຸໍ ສີລໍ ຍສ຺ສ, ໂສ ໂຫຕີຕິ ຄາມີ, ອາຍຕິໍ ຠຊິຕຸໍ ສີລໍ ຍສ຺ສ, ໂສ ໂຫຕີຕິ ຠາຊີ, ອາຍຕິໍ ປສ຺ສາປິຕຸໍ ສີລໍ ຍສ຺ສ, ໂສ ໂຫຕີຕິ ປສ຺ສາວິ, ອາຍຕິໍ ປຏ຺ຐາຍິຕຸໍ ສີລໍ ຍສ຺ສ, ໂສ ໂຫຕີຕິ ປຏ຺ຐາຍິ.

໖໕໒. , ໖໔໘. ກ຺ຣິຍາຍໍ ຓ຺ວຸ ຕໂວ.

ກ຺ຣິຍາຍມຕ຺ເຖ ຓ຺ວຸ ຕຸອິຈ຺ເຈເຕ ປຈ຺ຈຍາ ໂຫນ຺ຕິ ຠວິສ຺ສຕິກາເລ.

‘‘ກຣິສ຺ສ’’ນ຺ຕິ ກາຣໂກ ວຊຕິ, ‘‘ຠຸຎ຺ຊິສ຺ສ’’ນ຺ຕິ ໂຠຕ຺ຕາ ວຊຕິ.

໖໕໓. , ໓໐໖. ຠາວວາຈິມ຺ຫິ ຈຕຸຕ຺ຖີ.

ຠາວວາຈິມ຺ຫິ ຈຕຸຕ຺ຖີວິຠຕ຺ຕິ ໂຫຕິ ຠວິສ຺ສຕິກາເລ,

ປຈິສ຺ສເຕ, ປຈນໍ ວາ ປາໂກ, ປາກາຍ ວຊຕິ. ຠຸຎ຺ຊິສ຺ສເຕ, ໂຠຊນໍ ວາ ໂຠໂຄ, ໂຠຄາຍ ວຊຕິ. ນຈ຺ຈິສ຺ສເຕ, ນຈ຺ຈນໍ ວາ ນຈ຺ຈໍ, ນຈ຺ຈາຍ ວຊຕິ.

໖໕໔. , ໖໔໙. ກມ຺ມນິ ໂຓ.

ກມ຺ມນິ ອຸປປເທ ຓປຈ຺ຈໂຍ ໂຫຕິ ຠວິສ຺ສຕິກາເລ.

ນຄຣໍ ກຣິສ຺ສຕິ ນຄຣກາໂຣ ວຊຕິ, ສາລິໍ ລາວິສ຺ສຕິ ສາລິລາໂວ ວຊຕິ, ຘຎ຺ຎໍ ວປິສ຺ສຕິ ຘຎ຺ຎວາໂປ ວຊຕິ, ໂຠຄໍ ທທິສ຺ສຕິ ໂຠຄທາໂຍ ວຊຕິ, ສິນ຺ຘຸໍ ປິວິສ຺ສຕິ ສິນ຺ຘຸປາໂຍ ວຊຕິ.

໖໕໕. , ໖໕໐. ເສເສ ສ຺ສໍ ນ຺ຕຸມານານາ.

ເສສອິຈ຺ເຈຕສ຺ມິໍ ອຕ຺ເຖ ສ຺ສໍ ນ຺ຕຸ ມານ ອານ ອິຈ຺ເຈເຕ ປຈ຺ຈຍາ ໂຫນ຺ຕິ ຠວິສ຺ສຕິກາເລ ກມ຺ມູປປເທ.

ກມ຺ມໍ ກຣິສ຺ສຕິ ກມ຺ມໍ ກຣິສ຺ສໍ, ເອວໍ ກມ຺ມໍ ກໂຣນ຺ໂຕ, ກມ຺ມໍ ກຸຣຸມາໂນ, ກມ຺ມໍ ກຣາໂນ ວຊຕິ. ໂຠຊນໍ ຠຸຎ຺ຊິສ຺ສຕິ ໂຠຊນໍ ຠຸຎ຺ຊິສ຺ສໍ, ເອວໍ ໂຠຊນໍ ຠຸຎ຺ຊນ຺ໂຕ, ໂຠຊນໍ ຠຸຎ຺ຊມາໂນ, ໂຠຊນໍ ຠຸຎ຺ຊາໂນ ວຊຕິ. ຂາທນໍ ຂາທິສ຺ສຕິ ຂາທນໍ ຂາທິສ຺ສໍ, ເອວໍ ຂາທນໍ ຂາທນ຺ໂຕ, ຂາທນໍ ຂາທມາໂນ, ຂາທນໍ ຂາທາໂນ ວຊຕິ. ມຄ຺ຄໍ ຈຣິສ຺ສຕິ ມຄ຺ຄໍ ຈຣິສ຺ສໍ, ເອວໍ ມຄ຺ຄໍ ຈຣນ຺ໂຕ, ມຄ຺ຄໍ ຈຣມາໂນ, ມຄ຺ຄໍ ຈຣາໂນ ວຊຕິ. ຠິກ຺ຂໍ ຠິກ຺ຂິສ຺ສຕິ ຠິກ຺ຂໍ ຠິກ຺ຂິສ຺ສໍ, ເອວໍ ຠິກ຺ຂໍ ຠິກ຺ຂນ຺ໂຕ, ຠິກ຺ຂໍ ຠິກ຺ຂມາໂນ, ຠິກ຺ຂໍ ຠິກ຺ຂາໂນ ວຊຕິ.

໖໕໖. , ໖໖໖. ຉວາທີຕິ ຕຕ຺ຣຓ.

ຉ ທ ຈິ ຕິ ສຸ ນີ ວິ ທ ປທ ຕນຸ ຍຕ ອທ ມທ ຍຸຊ ວຕຸມິທ ມາ ປຸ ກ ລ ວຣ ເວ ປຸ ຄຸປ ທາ ອິຈ຺ເຈວມາທີຫິ ຘາຕູຫິ ຕຕ຺ຣຓ ອິຈ຺ເຈເຕ ປຈ຺ຈຍາ ໂຫນ຺ຕິ ຍຖາສມ຺ຠວໍ.

ອາຕປໍ ຉາເທຕີຕິ ຉຕ຺ຕໍ, ຉຕ຺ຣໍ. ອາຣມ຺ມຓໍ ຈິນ຺ເຕຕີຕິ ຈິຕ຺ຕໍ, ຈິຕ຺ຣໍ. ຈິນ຺ເຕນ຺ຕິ ສມ຺ປຍຸຕ຺ຕຘມ຺ມາ ເອເຖນາຕິ ວາ ຈິຕ຺ຕໍ, ຈິຕ຺ຣໍ. ອຕ຺ເຖ ອຠິສ຺ສເວຕີຕິ ສຸຕ຺ຕໍ, ສຸຕ຺ຣໍ. ອຕ຺ເຖ ສູເຈຕີຕິ ວາ ສຸຕ຺ຕໍ, ສຸຕ຺ຣໍ. ສຕ຺ເຕ ເນຕີຕິ ເນຕ຺ຕໍ, ເນຕ຺ຣໍ. ສຕ຺ເຕ ອິຈ຺ຉິຕຏ຺ຐານໍ ເນນ຺ຕິ ເອເຕນາຕິ ວາ ເນຕ຺ຕໍ, ເນຕ຺ຣໍ. ປກາເຣນ ວິທຕີຕິ ປວິຕ຺ຕໍ, ປວິຕ຺ຣໍ. ວິວິເຘນ ອາກາເຣນ ມງ຺ຄ ປາປໍ ປຸນາຕິ, ໂສເຘຕີຕິ ປວິຕ຺ຕໍ, ປວິຕ຺ຣໍ. ສຸຈິຠາວໍ ວາ ປາປຸຓາຕີຕິ ປວິຕ຺ຕໍ, ປວິຕ຺ຣໍ. ປທຕິ ປາປຸຓາຕີຕິ ປຕ຺ໂຕ, ປຕ຺ໂຣ. ອາຫາຣາ ປຕນ຺ຕິ ເອຕ຺ຖ ຠາຊເນຕິ ປຕ຺ຕໍ, ປຕ຺ຣໍ. ປທຕິ ປວຕ຺ຕຕີຕິ ວາ ປຕ຺ຕໍ, ປຕ຺ຣໍ. ຕໂນຕິ ວິຕ຺ຖາເຣຕີຕິ ຕນ຺ຕໍ, ຕນ຺ຕ຺ຣໍ, ຕນິຕພ຺ພໍ ວິຕ຺ຖາເຣຕພ຺ພນ຺ຕິ ວາ ຕນ຺ຕໍ, ຕນ຺ຕ຺ຣ. ຍຕຕີຕິ ຍຕ຺ຕໍ, ຍຕ຺ຣໍ. ຍຕຕິ ວີຣິຍໍ ກໂຣຕິ ເອເຕນາຕິ ວາ ຍຕ຺ຕໍ, ຍຕ຺ຣໍ. ຍຕນໍ ວາ ຍຕ຺ຕໍ, ຍຕ຺ຣໍ. ສຸຂທຸກ຺ຂໍ ອທຕິ ຠກ຺ຂຕີຕິ ອຕ຺ຕາ, ອຕ຺ຣາ. ມທຕີຕິ ມຕ຺ຕໍ, ມຕ຺ຣໍ. ວຕ຺ຖຸໍ ຍຸຊ຺ຊນ຺ຕິ ເອເຕນາຕິ ໂຍຕ຺ຕໍ, ໂຍຕ຺ຣໍ. ວຕ຺ຕຕີຕິ ວຕ຺ຕໍ, ວຕ຺ຣໍ. ມິທຕິ ສິເນຫໍ ກໂຣຕີຕິ ມິຕ຺ຕໍ. ມິຕ຺ຣໍ. ມິທຕິ ສິເນຫຕິ ເອຕາຍາຕິ ເມຕ຺ຕາ, ເມຕ຺ຣາ. ປຣິ ສມນ຺ຕ ໂຕ ສພ຺ພາກາເຣນ ມິນນ຺ຕິ ເອຕາຍາຕິ ມຕ຺ຕາ, ມຕ຺ຣາ. ມານນໍ ວາ ມຕ຺ຕໍ, ມຕ຺ຣໍ. ອຕ຺ຕໂນ ກຸລໍ ປຸນາຕິ ໂສເຘຕີຕິ ປຸຕ຺ໂຕ, ປຸຕ຺ໂຣ. ກລິຕພ຺ພໍ ສງ຺ຂ຺ຍາຕພ຺ພນ຺ຕິ ກລຕ຺ຕໍ, ກລຕ຺ຣໍ. ສໍສຸຏ຺ຐຸ ວາເຣຕິ ເອເຕນາຕິ ວຣຕ຺ຕໍ, ວຣຕ຺ຣໍ. ເວປຕິ ກມ຺ປຕີຕິ ເວຕ຺ຕໍ, ເວຕ຺ຣໍ. ໂຄປິຕພ຺ພໍ ຣກ຺ຂິຕພ຺ພນ຺ຕິ ຄຸຕ຺ຕໍ. ຄຸຕ຺ຣໍ, ໂຄຕ຺ຕໍ, ໂຄຕ຺ຣໍ. ທາຕິ ອວຂຓ຺ຑຕິ ເອເຕນາຕິ ທາຕ຺ຕໍ, ທາຕ຺ຣໍ ອິຈ຺ເຈວມາທິ.

໖໕໗. , ໖໖໗. ວທາທີຫິ ຓິຕ຺ໂຕ ຄເຓ.

ວທ ຈຣ ວຣອິຈ຺ເຈວມາທີຫິ ຘາຕູຫິ ຓິຕ຺ຕປຈ຺ຈໂຍ ໂຫຕິ ຄຓຕ຺ເຖ.

ວາທິຕານໍ ຄໂຓ ວາທິຕ຺ຕໍ. ເອວໍ ຈາຣິຕ຺ຕໍ, ວາຣິຕ຺ຕໍ, ອິຈ຺ເຈວມາທິ.

໖໕໘. , ໖໖໘. ມິທາທີຫິ ຕ຺ຕິຕິໂຍ.

ມິທ ປທ ຣນ຺ຊ ຕນຸ ຘາອິຈ຺ເຈວມາທີຫິ ຘາຕູຫິ ຕ຺ຕິ ຕິ ອິຈ຺ເຈເຕ ປຈ຺ຈຍາ ໂຫນ຺ຕິ.

ມິທຕິ ສິເນຫຕີຕິ ເມຕ຺ຕິ, ປທຕິ ຄຈ຺ຉຕີຕິ ປຕ຺ຕິ, ຣນ຺ຊຕິ ເອຕ຺ຖາຕິ ຣຕ຺ຕິ, ຕໂນຕິ ວິຕ຺ຖາເຣຕີຕິ ຕນ຺ຕິ, ອຕ຺ຕໂນ ກຸລໍ ຕໂນຕິ ວິຕ຺ຖາເຣຕີຕິ ວາ ຕນ຺ຕິ, ປເຣສໍ ອິຕ຺ຖີນໍ ປຸຕ຺ຕໍ ຘາເຣຕີຕິ ຘາຕິ, ຂີຣໍ ຘາເຣຕີຕິ ວາ ຘາຕິ, ອຕ຺ຕໂນ ສຠາວໍ ຘາເຣຕີຕິ ວາ ຘາຕິ ອິຈ຺ເຈວມາທິ.

໖໕໙. , ໖໖໙. ອຸສຸ ຣນ຺ຊ ທໍສານໍ ທໍສສ຺ສ ທຑ຺ໂຒຒ ຐາ ຈ.

ອຸສຸ ຣນ຺ຊ ທໍສອິຈ຺ເຈເຕສໍ ຘາຕູນໍ ທໍສສ຺ສ ທຑ຺ຒາເທໂສ ໂຫຕິ, ຒ ຐປຈ຺ຈຍາ ຈ ໂຫນ຺ຕິ.

ອຸສີຍເຕ ອຸຑ຺ໂຒ, ຣນ຺ຊນ຺ຕິ ເອຕ຺ຖາຕິ ຣຏ຺ຐໍ, ທໍສີຍເຕຕິ ທຑ຺ໂຒ.

໖໖໐. , ໖໗໐. ສູວຸສານມູວຸສານມໂຕໂຖຈ.

ສູວຸ ອສອິຈ຺ເຈເຕສໍ ຘາຕູນໍ ອູອຸອສານໍ ອຕາເທໂສ ໂຫຕິ, ຖປຈ຺ຈໂຍ ຈ.

ສວຕິ ຫິໍສຕິ ເອເຕນາຕິ ສຕ຺ຖໍ, ຫິໂຣຕ຺ຕປ຺ປໍ ສໍວຣຕິ ເອເຕນາຕິວຕ຺ຖໍ, ສທ຺ທານຸຣູປໍ ອສຕິຠວຕີຕິ ອຕ຺ໂຖ,

໖໖໑. , ໖໗໑. ຣນ຺ຊຸທາທີຫິ ຘ ທິທ຺ທ ກິຣາ ກ຺ວຈິ ຊທໂລໂປຈ.

ຣນ຺ຊ ອຸທ ອິທິ ຈທິ ມທິ ຂຸທ ຉິທິ ຣຸທິ ທລ ສຸສ ສຸຈ ວຈ ວຊ ອິຈ຺ເຈວມາທີຫິ ຘາຕູຫິ ຘ ທ ອິທ຺ທ ກ ອິຣອິຈ຺ເຈເຕ ປຈ຺ຈຍາ ໂຫນ຺ຕິ, ກ຺ວຈິ ຊ ທ ໂລໂປ ຈ, ປຸນ ນິປ຺ປຊ຺ຊນ຺ເຕ.

ຣຎ຺ຊິຕພ຺ພນ຺ຕິ ຣນ຺ຘໍ, ຣນ຺ຊຍິຕ຺ຖາຕິ ວາ ຣນ຺ຘໍ, ອຕ຺ຕນິ ສນ຺ນິສ຺ສິຕານໍ ມຈ຺ຉມກຣານໍ ປີຕິໂສມນສ຺ສໍ ອຸນ຺ທຕິ ປສວຕິ ຊເນຕີຕິ ສມຸທ຺ໂທ, ອິນ຺ທຕິ ປຣມິສ຺ສຣິຍໍ ກໂຣຕີຕິ ອິນ຺ໂທ, ອິນ຺ທຕ຺ຕໍ ອຘິປຕິຠາວໍ ກໂຣຕີຕິ ວາ ອິນ຺ໂທ, ຈນ຺ທິຕພ຺ໂພ ອິຈ຺ຉິຕພ຺ໂພຕິ ຈນ຺ໂທ, ມນ຺ທຕິ ຫາເສຕີຕິ ມນ຺ໂທ, ມທິຕພ຺ໂພ ຫາເສຕພ຺ໂພຕິ ວາ ມນ຺ໂທ, ຂຸທຕິ ປິປາເສຕີຕິ ຂຸທ຺ໂທ, ຉິນ຺ທິຕພ຺ໂພຕິ ຉິທ຺ໂທ, ຣຸທຕິ ຫິໍສຕີຕິ ຣຸທ຺ໂທ, ທລຕິ ທຸຄ຺ຄຕຠາວໍ ຄຈ຺ຉຕີຕິ ທລິທ຺ໂທ, ສຸສ຺ສຕີຕິ ສຸກ຺ກໍ, ສຸຈຕີຕິໂສໂກ, ວຈິຕພ຺ພນ຺ຕິ ວກ຺ກໍ, ອປ຺ປຏິຫໂຕ ຫຸຕ຺ວາ ວຊຕິ ຄຈ຺ຉຕີຕິ ວຊິຣໍ ອິຈ຺ເຈວມາທິ.

໖໖໒. , ໖໗໒. ປຏິໂຕ ຫິສ຺ສ ເຫຣຓ ຫີຣຓ.

ປຏິອິຈ຺ເຈຕສ຺ມາ ຫິສ຺ສ ຘາຕຸສ຺ສ ເຫຣຓ ຫີຣຓ ອາເທສາ ໂຫນ຺ຕິ.

ປຏິປກ຺ເຂມທ຺ທິຕ຺ວາຄຈ຺ຉຕິ ປວຕ຺ຕຕີຕິ ປາຏິເຫຣໍ, ປາຏິຫີຣໍ.

໖໖໓. , ໖໗໓. ກຑ຺ຍາທີຫິ ໂກ.

ກຑິ ຆຑິ ວຑິ ກຣຑິ ມຑິ ສຑິ ກຸຐິ ຠຑິ ປຑິ ທຑິ ຣຑິ ຕຑິ ອິສິຑິ ຈຑິ ຄຑິ ອຑິ ລຑິ ເມຑິ ເອຣຑິ ຂຑິ ອິຈ຺ເຈວມາທີຫິ ຘາຕູຫິ ກປຈ຺ຈໂຍ ໂຫຕິ ສຫ ປຈ຺ຈເຍນ ຈ ນິປ຺ປຊ຺ຊນ຺ເຕ ຍຖາສມ຺ຠວໍ.

ກຓ຺ຑິຕພ຺ໂພ ຉິນ຺ທິຕພ຺ໂພຕິ ກຓ຺ໂຑ, ຆຓ຺ຑິຕພ຺ໂພ ຆເຏຕພ຺ໂພຕິ ຆຓ຺ໂຑ, ວຓ຺ຑນ຺ຕິ ເອຕ຺ຖາຕິ ວຓ຺ໂຑ, ກຣຓ຺ຑິຕພ຺ໂພ ຠາເຊຕພ຺ໂພຕິ ກຣຓ຺ໂຑ, ມຓ຺ຑີຍເຕ ວິຠູສີຍເຕ ເອເຕນາຕິ ມຓ຺ໂຑ, ສຓ຺ຑນ຺ຕິ ຄຸມ຺ພນ຺ຕິ ເອຕ຺ຖາຕິ ສຓ຺ໂຑ, ອງ຺ຄມງ຺ຄານິ ກຸຓ຺ຐຕິ ຉິນ຺ທຕີຕິ ກຸຏ຺ຐໍ, ຠຓ຺ຑິຕພ຺ພນ຺ຕິ ຠຓ຺ຑໍ, ປຓ຺ຑຕິ ລິງ຺ຄເວກລ຺ລຠາວໍ ຄຈ຺ຉຕີຕິ ປຓ຺ຑໂກ. ທຓ຺ຑຕິ ອາຓໍ ກໂຣຕິ ເອເຕນາຕິ ທຓ຺ໂຑ, ຣຓ຺ຑຕິ ຫິໍສຕີຕິ ຣຓ຺ໂຑ, ວິເສເສນ ຕຓ຺ຑຕິ ຈາເລຕິ ປເຣສໍ ວິຎ຺ຎູນໍ ຫທຍໍ ກມ຺ເປຕີຕິ ວິຕຓ຺ໂຑ, ອິສິຓ຺ຑຕິ ປເຣສໍ ມທ຺ທຕີຕິ ອິສິຓ຺ໂຑ, ຈຓ຺ຑຕິ ຈຓ຺ຑິກ຺ກຠາວໍ ກໂຣຕີຕິ ຈຓ຺ໂຑ, ຄຓ຺ຑຕິ ສນ຺ນິຈຍຕິ ສມູຫໍ ກໂຣຕິ ເອຕ຺ຖາຕິ ຄຓ຺ໂຑ, ອຓ຺ຑີຍຕິ ນິພ຺ພຕ຺ຕີຍຕີຕິ ອຓ຺ໂຑ, ລຓ຺ຑິຕພ຺ໂພ ຊິຄຸຈ຺ຉິຕພ຺ໂພຕິ ລຓ຺ໂຑ, ເມຓ຺ຑຕິ ກຸຏິລຠາວໍ ຄຈ຺ຉຕີຕິ ເມຓ຺ໂຑ, ເອຣຓ຺ຑຕິ ໂຣຄໍ ຫິໍສຕີຕິ ເອຣຓ຺ໂຑ, ຂຓ຺ຑິຕພ຺ໂພ ຉິນ຺ທິຕພ຺ໂພຕິ ຂຓ຺ໂຑ ອິຈ຺ເຈວມາທິ.

໖໖໔. , ໖໗໔. ຂາທາມຄມານໍ ຂ ນ຺ຘ’ນ຺ຘ ຄນ຺ຘາ.

ຂາທ ອມ ຄມຸອິຈ຺ເຈເຕສໍ ຘາຕູນໍ ຂນ຺ຘ ອນ຺ຘ ຄນ຺ຘາເທສາ ໂຫນ຺ຕິ, ກປຈ຺ຈໂຍ ຈ ໂຫຕິ.

ຊາຕິຊຣາມຣຓາທີຫິ ສໍສາຣທຸກ຺ເຂຫິ ຂາທິຕພ຺ໂພຕິ ຂນ຺ໂຘ, ອມຕິ ອງ຺ຄມງ຺ຄສ຺ສ ຣຸຊ຺ຊນຠາວໍ ຄຈ຺ຉຕີຕິ ອນ຺ໂຘ, ຈກ຺ຂຸນາ ອມຕິ ຣຸຊ຺ຊຕີຕິ ວາ ອນ຺ໂຘ, ຕໍ ຕໍ ຐານໍ ວາເຕນ ຄຈ຺ຉຕີຕິ ຄນ຺ໂຘ. ເອວໍ ຂນ຺ຘໂກ, ອນ຺ຘໂກ, ຄນ຺ຘໂກ.

໖໖໕. , ໖໗໕. ປຏາທີຫ຺ຍລໍ.

ປຏ ກລ ກຸສ ກທ ຠຄນ຺ທ ເມຂ ວກ຺ກ ຕກ຺ກ ປລ຺ລ ສທ຺ທ ມູລ ພິລ ວິທ ຈຑໍ ປຎ຺ຈ ວາ ວສ ປຈິ ມຈ ມຸສ ໂຄຕ຺ຖຸ ປຸຖຸ ພຫຸ ມງ຺ຄ ພຫ ກມ຺ພ ສມ຺ພ ອຄ຺ຄອິຈ຺ເຈວມາທີຫິ ຘາຕູຫິ ປາຏິ ປທິເກຫິ ຈ ອຸຕ຺ຕຣປເທສຸ ອລປຈ຺ຈໂຍ ໂຫຕິ, ປຈ຺ຉາ ປຸນ ນິປ຺ປຊ຺ຊນ຺ເຕ.

ປເຏ ອລນ຺ຕິ ປຏລໍ, ກເລ ອລນ຺ຕິ ກລລໍ, ປາປເກ ອກຸສເລ ຘມ຺ເມ ກຸສຕິ ຉິນ຺ທຕີຕິ ກຸສລໍ, ກຸສຠູເຕ ຍຖາສຠາວຘມ຺ເມ ອລນ຺ຕິ ວາ ກຸສລໍ, ກຸເສ ອຸທ຺ທິສ຺ສ ທາເນ ອລນ຺ຕິ ວາ ກຸສລໍ, ກຸເສ ສຎ຺ຈເຍ ຘມ຺ມສມຸທາເຍ ອລນ຺ຕິ ວາ ກຸສລໍ, ກທ຺ເທ ມທ຺ເທ ອລນ຺ຕິ ກທລໍ, ຠຄນ຺ເທ ເສຈເນ ອລນ຺ຕິ ຠຄນ຺ທລໍ, ຠຄນ຺ເທ ມຸຕ຺ຕກຣີສຫຣເຓ ອລນ຺ຕິ ວາ ຠຄນ຺ທລໍ, ເມເຂ ກຏິວິຈິຕ຺ເຕ ອລນ຺ຕິ ເມຂລໍ, ວກ຺ເກ ຣຸກ຺ຂຕເຈ ອລນ຺ຕິ ວກ຺ກລໍ, ຕກ຺ເກ ຣຸກ຺ຂສິເລເສ ອລນ຺ຕິ ຕກ຺ກລໍ, ປລ຺ເລ ນິນ຺ນຏ຺ຐາເນ ອລນ຺ຕິ ປລ຺ລລໍ, ສທ຺ເທ ຫຣິເຕ ອລນ຺ຕິ ສທ຺ທລໍ, ມູເລ ປຕິຏ຺ຐາເນ ອລນ຺ຕິ ມຸລາລໍ, ພິເຬ ນິສ຺ສເຍ ອລນ຺ຕິ ພິລາລໍ, ວິເທ ວິຊ຺ຊມາເນ ອລນ຺ຕິ ວິທລໍ, ຈຓ຺ເຑ ອລນ຺ຕິ ຈຓ຺ຑາໂລ, ປຎ຺ຈນ຺ນໍ ຣາຊູນໍ ອລນ຺ຕິ ປຎ຺ຈາໂລ, ວາ ຄຕິຄນ຺ຘເນສຸ ອລນ຺ຕິ ວາລໍ, ວາ ປທຄມເນ ອລນ຺ຕິ ວາ ວາໂຬ, ວເສ ອຈ຺ຉາທເນ ອລນ຺ຕິ ວສໂລ, ປເຈ ວິຕ຺ຖາເຣ ອລນ຺ຕິ ປຈໂລ, ມເຈ ໂຈຣກມ຺ເມ ອລນ຺ຕິ ມຈໂລ, ມຸເສ ເຖຍ຺ເຍ, ມຸເສ ປາຓຈາເຄ ວາ ອລນ຺ຕິ ມຸສໂລ, ໂຄຕ຺ເຕ ວໍເສ ສິງ຺ຄາລຊາຕິຍໍ ອລນ຺ຕິ ໂຄຕ຺ຖຸໂລ, ປຸຖຸມ຺ຫິ ວິຕ຺ຖາເຣ ອລນ຺ຕິ ປຸຖຸໂລ, ພຫຸມ຺ຫິ ສງ຺ຂ຺ຍາເນ ອລນ຺ຕິ ພຫຸໂລ, ພຫຸມ຺ຫິ ວຸທ຺ຘິມ຺ຫິ ອລນ຺ຕິ ວາ ພຫຸໂລ, ມງ຺ຄມ຺ຫິ ຄມເນ ອລນ຺ຕິ ມງ຺ຄລໍ, ພຫຸມ຺ຫິ ວຸທ຺ຘິມ຺ຫິ ອລນ຺ຕິ ພຫລໍ, ກມ຺ພມ຺ຫິ ສຎ຺ຈລເນ ອລນ຺ຕິ ກມ຺ພລໍ. ສມ຺ພມ຺ຫິ ມຓ຺ຑເລ ອລນ຺ຕິ ສມ຺ພລໍ, ອຄ຺ເຄ ຄຕິໂກຏິລ຺ເລ ອລນ຺ຕິ ອຄ຺ຄຬໍ. ອິຈ຺ເຈວມາທໂຍ ອຎ຺ເຎປິ ສທ຺ທາ ຠວນ຺ຕິ.

໖໖໖. , ໖໗໖. ປຸຖສ຺ສ ປຸຖຸ ປຖາ ໂມ ວາ.

ປຸຖອິຈ຺ເຈຕສ຺ສ ປາຏິປທິກສ຺ສ ປຸຖຸ ປຖາເທສາ ໂຫນ຺ຕິ, ກ຺ວຈິ ອມປຈ຺ຈໂຍ ໂຫຕິ.

ປຸຖ ຫຸຕ຺ວາ ຊາຕນ຺ຕິ ປຸຖວີ ປຖເມ ຊາໂຕ ປຖໂມ, ປຖວີ, ປຐໂມ ວາ, ປຸຖຸ ກິເລເສ ຊເນຕີຕິ ປຸຖຸຊ຺ຊໂນ, ປຸຖຸ ຫຸຕ຺ວາ ຊາຕນ຺ຕິ ປຖວີ, ປຖວີ ວາ.

໖໖໗. , ໖໗໗. ສສ຺ວາທີຫິ ຕຸ ທໂວ.

ສສຸ ທທ ອທ ມທອິຈ຺ເຈວມາທີຫິ ຘາຕູຫິ ຕຸ ທຸອິຈ຺ເຈເຕ ປຈ຺ຈຍາ ໂຫນ຺ຕິ.

ອຎ຺ເຎ ສຕ຺ເຕ ສສຕິ ຫິໍສຕີຕິ ສຕ຺ຕຸ, ທຸກ຺ຂໍ ທທາຕີຕິ ທທ຺ທຸ, ທຸກ຺ເຂນ ອທຕິ ຠກ຺ຂຕິ ເອຕ຺ຖາຕິ ອທ຺ທຸ, ທຸກ຺ຂໍ ອທຕິ ອນຸຠວຕິ ຊໂນ ເອເຕນາຕິ ວາ ອທ຺ທຸ, ທຸກ຺ຂໍ ຠາຊນໍ ອາຘາຣໍ ຠາວຕີຕິ ວາ ອທ຺ທຸ, ມທຕິ ອຸມ຺ມຕ຺ຕໍ ກໂຣຕີຕິ ມທ຺ທຸ, ມທຕິ ມທ຺ທຠາວໍ ກໂຣຕີຕິ ວາ ມທ຺ທຸ.

໖໖໘. , ໖໗໘. ຌາທີຫິ ອີວໂຣ.

ຈິ ປາ ຘາອິຈ຺ເຈວມາທີຫິ ຘາຕູຫິ ອີວຣປຈ຺ຈໂຍໂຫຕິ.

ຈີຍຕີຕິ ຈີວຣໍ, ປິວຕີຕິ ປີວໂຣ, ປາຕພ຺ພໍ ຣກ຺ຂິຕພ຺ພນ຺ຕິ ວາ ປີວຣໍ. ຘາເຣຕິ ຘາເຣຕ຺ວາ ຊີວິຕໍ ກປ຺ເປຕີຕິ ຘີວໂຣ, ຘີວຣໍ.

໖໖໙. , ໖໗໙. ມຸນາທີຫິ ຈິ.

ມຸນ ຍຕ ອຄ຺ຄ ປຕ ກວ ສຸຈ ຣຸຈ ມຫາລ ຠທ຺ທາລ ມນອິອິຈ຺ເຈວມາທີຫິ ຘາຕູຫິ, ປາຏິປທິເກຫິ ຈ ອິປຈ຺ຈໂຍ ໂຫຕິ.