ປຎ຺ຈມກຓ຺ຑ

໔໒. , ໓໒. ໂຄສເຣ ປຸຖສ຺ສາຄໂມ ກ຺ວຈິ.

ປຸຖອິຈ຺ເຈຕສ຺ສ ອນ຺ເຕ ສເຣ ປເຣ ກ຺ວຈິ ຄກາຣາຄໂມ ໂຫຕິ.

ປຸຖເຄ ວ.

໔໓. , ໓໓. ປາສ຺ສ ຈນ຺ໂຕ ຣສ຺ໂສ.

ປາອິຈ຺ເຈຕສ຺ສ ອນ຺ເຕ ສເຣ ປເຣ ກ຺ວຈິ ຄກາຣາຄໂມ ໂຫຕິ, ອນ຺ໂຕ ຈ ສໂຣ ຣສ຺ໂສ ໂຫຕິ.

ປເຄວ ວຸຕ຺ຍສ຺ສ.

ກ຺ວຈີຕິ ກສ຺ມາ? ປາ ເອວ ວຸຕ຺ຍສ຺ສ.

໔໔. , ໒໔. ອພ຺ໂຠ ອຠິ.

ອຠິອິຈ຺ເຈຕສ຺ສ ສເຣ ປເຣ ອພ຺ຠາເທໂສ ໂຫຕິ. ອພ຺ຠຸທີຣິຕໍ, ອພ຺ຠຸຄ຺ຄຈ຺ຉຕິ.

໔໕. , ໒໕. ອຊ຺ໂຌ ອຘິ.

ອຘິອິຈ຺ເຈຕສ຺ສ ສເຣ ປເຣ ອຊ຺ຌາເທໂສ ໂຫຕິ.

ອຊ຺ໂຌກາເສ, ອຊ຺ຌາຄມາ.

໔໖. , ໒໖. ເຕ ນ ວາ ອິວຓ຺ເຓ.

ເຕ ຈ ໂຂ ອຠິອຘິອິຈ຺ເຈເຕ ອິວຓ຺ເຓ ປເຣ ອພ຺ໂຠ ອຊ຺ໂຌອິຕິວຸຕ຺ຕຣູປາ ນໍ ໂຫນ຺ຕິ ວາ.

ອຠິຈ຺ຉິຕໍ, ອຘີຣິຕໍ.

ວາຕິ ກສ຺ມາ? ອພ຺ຠີຣິຕໍ, ອຊ຺ຌິຓມຸຕ຺ໂຕ.

໔໗. , ໒໓. ອຕິສ຺ສ ຈນ຺ຕສ຺ສ.

ອຕິອິຈ຺ເຈຕສ຺ສ ອນ຺ຕຠູຕສ຺ສ ຕິສທ຺ທສ຺ສ ອິວຓ຺ເຓ ປເຣ ‘‘ສພ຺ໂພ ຈໍ ຕີ’’ຕິ ວຸຕ຺ຕຣູປໍ ນ ໂຫຕິ.

ອຕີສິຄໂຓ, ອຕີຣິຕໍ.

ອິວຓ຺ເຓຕິ ກສ຺ມາ? ອຈ຺ຈນ຺ຕໍ.

໔໘. , ໔໓. ກ຺ວຈິ ປຏິ ປຕິສ຺ສ.

ປຕິອິຈ຺ເຈຕສ຺ສ ສເຣ ວາ ພ຺ຍຎ຺ຊເນ ວາ ປເຣ ກ຺ວຈິ ປຏິອາເທໂສ ໂຫຕິ.

ປຏຄ຺ຄິ ທາຕພ຺ໂພ, ປຏິຫຎ຺ຎຕິ.

ກ຺ວຈີຕິ ກສ຺ມາ? ປຈ຺ຈນ຺ຕິເມສຸ ຊນປເທສຸ, ປຕິລີຍຕິ, ປຕິຣູປເທສວາໂສ ຈ.

໔໙. , ໔໔. ປຸຖສ຺ສຸ ພ຺ຍຎ຺ຊເນ.

ປຸຖອິຈ຺ເຈຕສ຺ສ ອນ຺ໂຕ ສໂຣ ພ຺ຍຎ຺ຊເນ ປເຣ ອຸກາໂຣ ໂຫຕິ.

ປຸຖຸຊ຺ຊໂນ, ປຸຖຸຠູຕໍ.

ອນ຺ຕຄ຺ຄຫເຓນ ອປຸຖສ຺ສາປິ ສເຣ ປເຣ ອນ຺ຕສ຺ສ ອຸກາໂຣ ໂຫຕິ, ມນຸຎ຺ຎໍ.

໕໐. , ໔໕. ໂອ ອວສ຺ສ.

ອວອິຈ຺ເຈຕສ຺ສ ພ຺ຍຎ຺ຊເນ ປເຣ ກ຺ວຈິ ໂອກາໂຣ ໂຫຕິ.

ອນ຺ຘກາເຣນ ໂອນທ຺ຘາ.

ກ຺ວຈີຕິ ກສ຺ມາ? ອວສຸສ຺ສຕຸ ເມ ສຣີເຣ ມໍສໂລຫິຕໍ.

໕໑. , ໕໙. ອນຸປທິຏ຺ຐານໍ ວຸຕ຺ຕໂຍຄໂຕ.

ອນຸປທິຏ຺ຐານໍ ອຸປສຄ຺ຄນິປາຕານໍ ສຣສນ຺ຘີຫິ ພ຺ຍຎ຺ຊນສນ຺ຘີຫິ ວຸຕ຺ຕສນ຺ຘີຫິ ຈ ຍຖາໂຍຄໍ ໂຍເຊຕພ຺ພໍ.

ປາປນໍ, ປຣາຍຓໍ, ອຸປາຍນໍ, ອຸປາຫນໍ, ນ຺ຍາໂຍໂຄ, ນິຄຸປຘິ, ອນຸໂພໂຘ, ທຸວູປສນ຺ຕໍ, ສຸວູປສນ຺ຕໍ, ທ຺ວາລໂຍ, ສ຺ວາລໂຍ, ທຸຣາຂ຺ຍາຕໍ, ສ຺ວາຂ຺ຍາໂຕ, ອຸທີຣິຕໍ, ສມຸທ຺ທິຏ຺ຐໍ, ວິຍຄ຺ຄໍ, ວິຊ຺ຌຄ຺ຄໍ, ພ຺ຍຄ຺ຄໍ, ອວຍາຄມນໍ, ອນ຺ເວຕິ, ອນຸປຆາໂຕ, ອນຈ຺ຉຣິຍໍ, ປຣິເຍສນາ, ປຣາມາໂສ, ເອວໍ ສເຣ ຈ ໂຫນ຺ຕິ.

ປຣິຄ຺ຄໂຫ, ປຄ຺ຄໂຫ, ປກ຺ກໂມ, ປຣກ຺ກໂມ, ນິກ຺ກໂມ, ນິກ຺ກສາໂວ, ນິລ຺ລຍນໍ, ທຸລ຺ລຍນໍ, ທຸມ຺ຠິກ຺ຂໍ, ທຸພ຺ພຸຕ຺ຕໍ, ສນ຺ທິຏ຺ຐໍ, ທຸຄ຺ຄໂຫ, ວິຄ຺ຄໂຫ, ນິຄ຺ຄໂຕ, ອຠິກ຺ກໂມ, ປຏິກ຺ກໂມ, ເອວໍ ພ຺ຍຎ຺ຊເນ ຈ. ເສສາ ສພ຺ເພ ໂຍເຊຕພ຺ພາ.

ອິຕິ ສນ຺ຘິກປ຺ເປ ປຎ຺ຈໂມ ກຓ຺ໂຑ.

ສນ຺ຘິກປ຺ໂປ ນິຏ຺ຐິໂຕ.