ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ຊິນາລງ຺ກາຣ

ປຓາມທີປນີຄາຖາ

໑. ໂຍ ໂລກຕ຺ຖາຍ ພຸທ຺ໂຘ ຘນສຸຕຠຣິຍາອງ຺ຄຊີເວ ຈຊິຕ຺ວາ ປູເຣຕ຺ວາ ອາຣມິໂຍ ຕິທສມນຸປເມ ໂພຘິປກ຺ຂີຍຘມ຺ເມ,

ປຕ຺ວາ ໂພຘິໍ ວິສຸທ຺ຘໍ ສກລຄຸຓທທໍ ເສຏ຺ຐຠູໂຕ ຕິໂລເກ,

ກຕ຺ວາ ທຸກ຺ຂສ຺ສ ອນ຺ຕໍ ກຕສຸຠຊນຕໍ ທຸກ຺ຂໂຕ ໂມຈຍິຕ຺ຖ.

໒. ນຕ຺ວານາຫໍ ຊິນນ຺ຕໍ ສມຸປຈິຕສຸຠໍ ສພ຺ພໂລເກກພນ຺ຘຸໍ,

ນາຫຸ ເຍນປິ ຕຸລ຺ໂຍ ກຸສລມຫິມໂຕ ອຸຕ຺ຕໂມ ຠູຕໂລເກ ຕສ຺ເສວາຍໍ ອຸວິມ຺ຫໍ ສຸວິປຸລມມລໍ ໂພຘິສມ຺ຠາຣຠູຕໍ,

ເຫຕຸໍ ເຫຕ຺ວານຸຣູປໍ ສຸຄຕຄຕຜລໍ ຠາສໂຕ ເມ ສຸຓາຖ.

ໂຍຄາວຈຣສມ຺ປຕ຺ຕິທີປນີຄາຖາ

໓. ຊາໂຕ ໂຍ ນວເມ ຂເຓ ສຸຕຘໂຣ ສີເລນ ສຸທ຺ຘິນ຺ທ຺ຣິໂຍ ສໍສາຣໍ ອຍໂຕ ຠວກ຺ກຍກຣໍ ທິສ຺ວາ ສິວໍ ເຂມໂຕ,

ຕໍ ສມ຺ປາປກມຄ຺ຄເທສກມຸນິໍ ສມ຺ປູຊຍນ຺ໂຕ ຕໂຕ ອຸທ຺ຘານຸສ຺ສຕິຠາວນາທິກມໂຕ ສມ຺ປາທເຍ ຕໍ ສິວໍ.

ວຕ຺ຖຸວິໂສຘນີຄາຖາ

໔. ພຸທ຺ໂຘຕິ ໂກ ພຸທ຺ຘຄຸໂຓ ຕິ ໂກ ໂສ,

ອຈິນ຺ຕຍາທິຕ຺ຕມຸປາຄໂຕ ໂຍ;

ອນຎ຺ຎສາຘາຣຓຠູຕມຕ຺ຖໍ,

ອກາສິ ກິໍ ໂສ ກິມໂວຈ ພຸທ຺ໂຘ.

໕. ວິສຸທ຺ຘຂນ຺ຘສນ຺ຕາໂນ ພຸທ຺ໂຘຕິ ນິຍໂມ ກໂຕ,

ຂນ຺ຘສນ຺ຕານສຸທ຺ຘີ ຕຸ ຄຸໂຓຕິ ນິຍໂມ ກໂຕ.

໖. ອກາສິ ກິຈ຺ຈານິ ທິເນສຸ ປຎ຺ຈ,

ປສາທຍຎ຺ຈິທ຺ຘິພເລນ ເສນ;

ຊນານເສສໍ ຈຣິຍານຸກູລໍ,

ຎຕ຺ວານໂວຈານຸສຍປ຺ປຫານໍ.

ອນຎ຺ຎສາຘາຣຓທີປນີຄາຖາ

໗. ອພ຺ຠຸຄ຺ຄຕາ ຍສ຺ສ ຄຸຓາ ອນນ຺ຕາ,

ຕິພຸທ຺ຘເຂຕ຺ເຕກທິວາກໂຣຕິ;

ຊານາຕິ ໂສ ໂລກມິມໍ ປຣຎ຺ຈ,

ສເຈຕນຎ຺ເຈວ ອເຈຕນຎ຺ຈ;

ສກສ຺ສ ສນ຺ຕານຄຕໍ ປເຣສໍ,

ພ຺ຍຕີຕມປ຺ປຕ຺ຕກມຕ຺ຣຠູຕໍ.

໘. ອນນ຺ຕສຕ຺ເຕສຸ ຈ ໂລກຘາຕຸສຸ,

ເອໂກວ ສພ຺ເພປິ ສມາ ນ ເຕນ;

ທິສາສຸ ປຸພ຺ພາທິສຸ ຈກ຺ກວາຬາ,

ສຫສ຺ສສງ຺ຂາຍປິ ອປ຺ປເມຍ຺ຍາ;

ເຍ ເຕສຸ ເທວາ ມນຸຊາ ຈ ພ຺ຣຫ຺ມາ,

ເອກຕ຺ຖ ສງ຺ຄມ຺ມ ຫິ ມນ຺ຕຍນ຺ຕາ.

໙. ອນາທິກາລາຄຕນາມຣູປິນໍ,

ຍຖາສກໍ ເຫຕຸຜລຕ຺ຕວຸຕ຺ຕິນໍ;

ຕພ຺ຠາວຠາວິຕ຺ຕມສມ຺ຠຸຓນ຺ຕາ,

ນານາວິປລ຺ລາສມນຸປວິຏ຺ຐາ.

໑໐. ກມ຺ມປ຺ປວຕ຺ຕິຎ຺ຈ ຜລປ຺ປວຕ຺ຕິໍ,

ເອກຕ຺ຕນານຕ຺ຕນິຣີຫຘມ຺ມຕໍ;

ວິຎ຺ຎຕ຺ຕິສນ຺ຕານຆເນນ ຉນ຺ນໂຕ,

ສິວຎ຺ຊສໍ ໂນ ຠຓິຕຸໍ ສມຕ຺ຖາ.

໑໑. ເອໂກ ວ ໂສ ສນ຺ຕິກໂຣ ປຠງ຺ກໂຣ,

ສງ຺ຂາຍ ເຎຍ຺ຍານິ ອເສສິຕານິ;

ເຕສຎ຺ຫິ ມຊ຺ເຌ ປຣມາສມ຺ຠີວທໍ,

ສິວຎ຺ຊສໍ ທີປຍິຕຸໍ ສມຕ຺ໂຖ.

໑໒. ໂສ ໂຄຕໂມ ສກ຺ຍສຸໂຕ ມຸນິນ຺ໂທ,

ສພ຺ພສ຺ສ ໂລກສ຺ສ ປທີປຠູໂຕ;

ອນນ຺ຕສຕ຺ເຕ ຠວພນ຺ຘນມ຺ຫາ,

ໂມເຈສິ ກາຣຸຎ຺ຎຜລານຸເປກ຺ຂີ.

ອຠິນີຫາຣທີປນີຄາຖາ

໑໓. ວເທຖ ຕສ຺ສີຘ ອນປ຺ປກໍ ຄຸຓໍ,

ນ ເຕນ ຕຸລ຺ໂຍ ປຣໂມ ຈ ວິຊ຺ຊຕິ;

ກິໍ ຕໍ ຄຸຓໍ ຕໍ ສທິເສນ ທິນ຺ນໍ,

ສຍໍກຕໍ ກິນ຺ນຸ ອຘິຈ຺ຈລທ຺ຘໍ.

໑໔. ນາຘິຈ຺ຈລທ຺ຘໍ ນ ຈ ປຸພ຺ພພຸທ຺ຘາ,

ພ຺ຣຫ຺ມາທິນໍ ສມ຺ມຸຕິຍາ ພຫູນໍ;

ສຍໍກເຕເນວ ອໂນປເມນ,

ທານາທິນາ ລທ຺ຘມິທໍ ວິປາກໍ.

໑໕. ອິໂຕ ຈຕຸນ຺ນໍ ອສງ຺ຂິຍານໍ,

ສຕໍສຫສ຺ສານຘິການມຕ຺ຖເກ;

ກປ຺ເປ ອຕີຕມ຺ຫິ ສຸເມຘຕາປໂສ,

ເວຫາຍສໍ ຄຈ຺ຉຕິ ອິທ຺ຘິຍາ ຕທາ.

໑໖. ທິປງ຺ກໂຣ ນາມ ຊິໂນ ສສງ຺ໂຆ,

ຣມ຺ມໍ ປຸຣໍ ຍາຕິ ວິໂຣຈມາໂນ;

ມນຸສ຺ສເທເວຫິຠິປູຊິຍນ຺ໂຕ,

ສຫສ຺ສຣໍສິ ວິຍ ຠາຓຸມາ ນເຠ.

໑໗. ຕສ຺ສຎ຺ຊສໍ ກາຕຸພຫຸສ຺ສຫານໍ,

ພຸທ຺ໂຘຕິ ສຸຕ຺ວາ ສຸມໂນ ປຕີໂຕ;

ມມຊ຺ຊ ເທຫໍ ປນິມສ຺ສ ທຕ຺ວາ,

ພຸທ຺ໂຘ ອຫໍ ເຫສ຺ສມນາຄເຕທິໂສ.

໑໘. ຕສ຺ມິຎ຺ຊເສ ກນ຺ທຣຕມ຺ຫິ ປງ຺ເກ,

ກຕ຺ວານ ເສຕຸໍ ສຍິ ໂສ ສເທຫໍ;

ພຸທ຺ໂຘ ອຍໍ ຄຈ຺ຉຕຸ ປິຏ຺ຐິຍາ ມມໍ,

ໂພຘິສ຺ສເຈ ເຫສ຺ສຕິ ເມ ອນາຄເຕ.

໑໙. ອຸສ຺ສີສກໍ ຍາຕິ ຊິໂນ ຫິ ຕສ຺ສ,

ອຊ຺ຌາສໂຍ ສິຊ຺ຌຕິມສ຺ສນາຄເຕ;

ຎຕ຺ວານ ພ຺ຍາກາສິ ອເສສໂຕ ຫິ,

ພຸທ຺ໂຘ ອຍໍ ເຫສ຺ສຕິນາຄເຕສຸ.

໒໐. ສຸຕ຺ວານ ປຕ຺ໂຕ ວ ມຫາຠິເສກໍ,

ລທ຺ຘໍ ວ ໂພຘິໍ ສມນຸສ຺ສຣນ຺ໂຕ;

ປູເຊຕ຺ວາ ຍາເຕ ມຸນິເທວມານຸເສ,

ອຸຏ຺ຐາຍ ໂສ ສມ຺ມສິ ປາຣມີ ທສ.

໒໑. ທຬ຺ຫໍ ຄເຫຕ຺ວາ ສມຕິໍສປາຣມີ,

ສິກ຺ຂຕ຺ຕຍຎ຺ຈສ຺ສ ຊິນສ຺ສ ສນ຺ຕິເກ;

ກາຕຸໍ ສມຕ຺ໂຖ ປິ ຠວສ຺ສ ປາຣໍ,

ສຕ຺ເຕສຸ ກາຣຸຎ຺ຎພລາ ຠວໍ ຄໂຕ.

໒໒. ອຸປ຺ປນ຺ນຸປ຺ປນ຺ນເກ ໂສ ຊິນວຣມຕຸເລ ປູຊຍິຕ຺ວາ ອເສສໍ ພຸທ຺ໂຘ ເອໂສ ຫິ ໂອໂສ ຠວຕິ ນິຍມໂຕ ພ຺ຍາກໂຕ ເຕຫິ ເຕຫິ ເຕສໍ ເຕສໍ ຊິນານໍ ອຈນມນຸປມໍ ປູຊຍິຕ຺ວາ ສິເຣນ,

ຕໍ ຕໍ ທຸກ຺ຂໍ ສຫິຕ຺ວາ ສກລຄຸຓທທໍ ປາຣມີ ປູຣຍິຕ຺ຖ.

ໂພຘິສມ຺ຠາຣທີປນີຄາຖາ

໒໓. ໂສ ທຸກ຺ຂຂິນ຺ນຊນທສ຺ສນທຸກ຺ຂຂິນ຺ໂນ,

ກາຣຸຎ຺ຎເມວ ຊນຕາຍ ອກາສິ ນິຈ຺ຈໍ;

ເຕສໍ ຫິ ໂມຈນມຸປາຍມິທນ຺ຕິ ຎຕ຺ວາ,

ຕາທີປຣາຘມປິ ອຕ຺ຕນິ ໂຣປຍີ ໂສ.

໒໔. ທານາທິເນກວຣປາຣມິສາຄເຣສຸ,

ໂອຄາຬ຺ຫຕາຍປິ ປທຸຏ຺ຐຊເນນ ທິນ຺ນໍ;

ທຸກ຺ຂໍ ຕຖາ ອຕິມຫນ຺ຕຕຣມ຺ປິ ກິຎ຺ຈິ,

ນາຎ຺ຎາສິ ສຕ຺ຕຫິຕເມເວອ ຄເວສຍນ຺ໂຕ.

໒໕. ເຉຕ຺ວານ ສີສໍ ຫິ ສກໍ ທທນ຺ໂຕ,

ມໍສໍ ປຈິຕ຺ວານ ສກໍ ທທນ຺ໂຕ;

ໂສ ຈຕ຺ຕຄຕ຺ໂຕ ປຓິຘານກາເລ,

ທຸຏ຺ຐສ຺ສ ກິໍ ທຸສ຺ສຕິ ເຉທເນນ.

໒໖. ເອວໍ ອນນ຺ຕມປິ ຊາຕິສເຕສຸ ທຸກ຺ຂໍ,

ປຕ຺ວານ ສຕ຺ຕຫິຕເມວ ຄເວສຍນ຺ໂຕ;

ທີປງ຺ກເຣ ຄຫິຕສີລສມາຘິປຎ຺ຎໍ,

ປາເລສິ ຍາວ ສກໂພຘິຕເລ ສຸນິຏ຺ໂຐ.

໒໗. ຍທາຠິນີຫາຣມກາ ສຸເມໂຘ,

ຍທາ ຈ ມທ຺ທິໍ ອທທາ ສິວິນ຺ໂທ;

ເອຕ຺ຖນ຺ຕເຣ ຊາຕິສຸ ກິຎ຺ຈິເປກໍ,

ນິຣຕ຺ຖກໍ ໂນ ອຄມາສິ ຕສ຺ສ.

໒໘. ມຫາສມຸທ຺ເທ ຊລພິນ຺ທຸໂຕປິ,

ຕທນ຺ຕ຺ເຣ ຊາຕິ ອນປ຺ປກາ ວ;

ນິຣນ຺ຕຣໍ ປູຣິຕປາຣມີນໍ,

ກຖໍ ປມາຓໍ ອຸປມາ ກຸຫິໍ ວາ.

໒໙. ໂຍ ມຄ຺ຄປສ຺ເສ ມຘຸຣມ຺ພພີຊໍ,

ຉາຍາຜລຕ຺ຖາຍ ມຫາຊນານໍ;

ໂຣເປສິ ຕສ຺ມິໍ ຫິ ຂເຓວ ເຕນ,

ຉາຍາຜເລ ປຸຎ຺ຎມລທ຺ຘມຸທ຺ຘໍ.

໓໐. ຕເຖວ ສໍສາຣປເຖ ຊນານໍ,

ຫິຕາຍ ອຕ຺ຕນມຠິໂຣປິຕກ຺ຂເຓ;

ສິທ຺ຘໍ ວ ປຸຎ຺ຎູປຣິ ຕສ຺ສ ຕສ຺ມິໍ,

ຘນງ຺ຄຊີວໍ ປິ ຫຣນ຺ຕິ ເຍ ເຍ.

໓໑. ໂສ ສາຄເຣ ຊລຘິກໍ ຣຸຫິຣໍ ອທາສິ,

ຠູມາປຣາຊິຍ ສມໍສມທາສິ ທານໍ;

ເມຣຸປ຺ປມາຓມຘິກຎ຺ຈ ສໂມຬິສີສໍ,

ເຂ ຕາຣກາຘິກຕຣໍ ນຍນໍ ອທາສິ.

ຄພ຺ໂຠກ຺ກນ຺ຕິທີປນີຄາຖາ

໓໒. ຄມ຺ຠີຣປານທານາທິສາຄເຣສຸ ຫິ ຖາມສາ;

ຕຣນ຺ໂຕ ມທ຺ທິທາເນນ ນິຏ຺ຐາເປຕ຺ວານ ປາຣມີ.

໓໓. ວສນ຺ໂຕ ຕຸສີເຕ ກາເຍ ໂພຘິປຣິປາກມາຄມ຺ມ;

ອາຍາຈນາຍ ຈ ເທວານໍ ມາຕຸຄພ຺ຠມຸປາຄມິ.

໓໔. ສໂຕ ຈ ສມ຺ປຊາໂນ ຈ ມາຕຸກຸຈ຺ຉິມ຺ຫິ ໂອກ຺ກມິ;

ຕສ຺ສ ໂອກ຺ກນ຺ຕິຍໍ ສພ຺ພາ ທສສຫສ຺ສີ ປກມ຺ປິຕ຺ຖ.

໓໕. ຕໂຕ ປຸພ຺ພນິມິຕ຺ຕານິ ທ຺ວຕ຺ຕິໍສານິ ຕທາ ສິຍຸໍ;

ຕຸຏ຺ຐຫຏ຺ຐາ ວ ສາ ມາຕາ ປຸຕ຺ຕໍ ປສ຺ສຕິ ກຸຈ຺ຉິຍໍ.

ວິຊາຍນມງ຺ຄລທີປນີຄາຖາ

໓໖. ສາ ປຸຓ຺ຓຄພ຺ຠາ ທສມາສໂຕ ປຣໍ,

ຄນ຺ຕ຺ວານ ຜຸລ຺ລໍ ວຣລຸມ຺ພິນີວນໍ;

ຐິຕາ ຄເຫຕ຺ວາ ວຣສາລສາຂໍ,

ວິຊາຍິ ຕໍ ປຸຕ຺ຕວຣໍ ສຸເຂນ.

໓໗. ຕທາ ສຫສ຺ສີທສໂລກຘາຕຸສຸ,

ເທວາ ຈ ນາຄາ ອສຸຣາ ຈ ຍກ຺ຂາ;

ນານາທິສາ ມງ຺ຄລຈກ຺ກວາຬໍ,

ສຸມງ຺ຄລໍ ມງ຺ຄລມາຄມິໍສຸ.

໓໘. ອເນກສາຂຎ຺ຈ ສຫສ຺ສມຓ຺ຑລໍ,

ຉຕ຺ຕໍ ມຣູ ຘາຣຍຸມນ຺ຕລິກ຺ເຂ;

ສຸວຓ຺ຓທຓ຺ຑາ ວິປຕນ຺ຕິ ຈາມຣາ,

ຂຊ຺ຊິໍສຸ ເຠຣີ ຈ ນທິໍສຸ ສງ຺ຂາ.