ຫຕ຺ຖວນຄລ຺ລວິຫາຣ |ໂອ໐.໐໐໐໑| ວໍໂສ

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

໑. ສ຺ເນຫຸຕ຺ຕຣາຍ ຫທຍາ ມລມລ຺ລິກາຍ,

ປຊ຺ຊາລິໂຕ ມຕິທສາຍ ຊິນປ຺ປທີໂປ;

ໂມຫຓ຺ຘກາຣມຂິລໍ ມມ ນີຫຣນ຺ໂຕ,

ນິຈ຺ຈໍ ວິຠາວຍຕຸ ຈາຣຸ ປທຕ຺ຖຣາສິໍ.

໒. ລງ຺ກາຠິສິຕ຺ຕວສຸຘາຘິປຕີສຸ ຣາຊາ,

ໂຍ ໂພຘິສຕ຺ຕຄຸຓວາ ສິຣິສງ຺ຆໂພຘິ;

ຕສ຺ສາຕິຈາຣຸ ຈຣິຍາ ຣຈນາມຸເຂນ,

ວກ຺ກາມິ ຫຕ຺ຖວນຄລ຺ລວິຫາຣ ວໍສໍ.

໓. ພ຺ຣຫ຺ມນ຺ວເຍນນຸຄຕຕ຺ຖມໂນມທສ຺ສີ,

ຂ຺ຍາເຕນ ສພ຺ພຍຕິຣາຊຘຸຣນ຺ຘເຣນ;

ວ຺ຍາປາຣິໂຕຫມິຕິຠານຸຄຕໍ ກຖຎ຺ຈ,

ນິສ຺ສາຍ ປຸພ຺ພລິຂິຕໍວິຘ ວາຍມາມິ.

໔. ອຣ຺ຓ຺ຖ ສຸຄຕາຄມສຸຘາປຄານິທ຺ໂຘຕກຸທິຏ຺ຐິວິສກລງ຺ກາຍ ລໍກາຍ ຠຄວໂຕ ອງ຺ຄີຣສສ຺ສມຫານາຄວນຸຍ຺ຍາເນ ສມິຕິສມາຄຕຍກ຺ຂ ຣກ຺ຂສໂລກວິຊຍາປທານສ຺ສ ສິທ຺ຘກ຺ເຂນ຺ຕຠູໂຕ ສີຫຬມຫີມຓ຺ຑລມຓ຺ຑນາຍ ມາໂນ ວິວິຘຣຕນາກໂຣປລກ຺ຂມານມຫຄ຺ຆມຓິ ເຠໂທ ມຓິ ເຠໂທ ນາມ ຊນປໂທ.

໕. ລທ຺ຘານ ສຕ຺ຖຸ ວຣຓງ຺ກມນຎ຺ຎລພ຺ຠ,

ມານຓ຺ທິນາ ສຸມນກູຏສິລຸຈ຺ຈເຍນ;

ອຸສ຺ສາປິຕາ ວິຊຍເກຕຸມຕລ຺ລິເກວ,

ສຸທ຺ໂຘຣຸວາລຸກນທີ ຍມລງ຺ກໂຣຕິ.

໖. ລງ຺ກາຍ ຍກ຺ຂຄຓນີຫຣເຓ ຊິນສ຺ສ,

ຈມ຺ມາສນຸຄ຺ຄນຫຸນາສນຜສ຺ສທາຫາ;

ສໍສາຣຣກ຺ຂສວປຸພ຺ຠວພຸພ຺ພຸລໍຈ,

ຍສ຺ມິໍ ວິຫາຕິ ມຫິຍງ຺ຄຓ ຖູປຣາຊາ.

໗. |ໂອ໐.໐໐໐໒|

ສທາມໂຫຆາຍ ມຫາປຄາຍ,

ປານີຍປານາຍ ສໂມສຏານໍ;

ສມຸຈ຺ຈໂຍ ສາຣທວາຣິທານໍ,

ນູນໍ ຄໂຕ ຖາວຣຖູປຣູປໍ.

໘. ຕສ຺ສາປຄາຍ ວິມລມ຺ພຸນິ ທິສ຺ສມານ,

ມາໂລລວິຈິຕຣລໍ ປຏິພິມ຺ພຣູປໍ;

ໂຠເຄຫິ ເວຐິຍ ນິຊໍ ຠວນໍ ຜຓີຫິ,

ປູຊຕ຺ຖິເກຫິ ວິຍ ຣາຊຕິ ນີຍມານໍ.

໙. ຕສ຺ສ ມຫິຍງ຺ຄຓ ມຫາ ວິຫາຣສ຺ສ ປຣິຍນ຺ຕຄາມເກ ເສລາຠໂຍ ນາມ ຂຕ຺ຕິໂຍ ປຏິວສນ຺ໂຕ ປຸຕ຺ຕໍ ປຏິລຠິຕ຺ວາ ອງ຺ຄລກ຺ຂຓປາຐການໍ ທສ຺ເສສິ ເຕ ຕສ຺ສ ກຸມາຣສ຺ສ ອງ຺ຄລກ຺ຂຓານິ ໂອໂລເກຕ຺ວາ ‘‘ອຍໍ ກຸມາໂຣ ຂມກສຕ຺ໂຕ ນໂຫຕິ. ຘຎ຺ຎປຸຎ຺ຎລກ຺ຂຓສມ຺ປນ຺ໂນ, ສກລມ຺ປິ ສີຫຬທີປໍ ເອກຈ຺ຉຕ຺ຕໍ ກຣິຕ຺ວາ ມຫນ຺ຕມຫນ຺ຕານິ ອຈ຺ຉຣິຍພ຺ຠຸຕານິ ມຫາວີຣຈຣິຕານິ ທສ຺ເສສ຺ສຕີ’’ຕິ ວ຺ຍາກຣິໍສຸ.

໑໐. ຕໂຕ ເສລາຠຍ ຂຕ຺ຕິໂຍ ປຸຕ຺ຕສ຺ສ ອຠິເສກາທິສມ຺ປຕ຺ຕິໍ ສຸຕ຺ວາ ໂກຏິປ຺ປຕ຺ຕປໂມທປຣວໂສປິ ຕສ຺ມິໍ ກາເລ ອນຸຣາຘປຸເຣ ຣຊ຺ຊໍ ກາຣຍຕາ ‘‘ໂວຫາຣຕິສ຺ສມຫາຣາຊໂຕ ກທາຈິ ເກຈິ ອຸປທ຺ທໂວ ຊາຍິສ຺ສຕີຕິ. ຊາຕປຣິສງ຺ໂກຕໍ ກຸມາຣມາທາຍ ມຫິຍງ຺ຄຓມຫາວິຫາເຣ ໂພຘິ ອງ຺ຄເຓ ປຣິຕ຺ຕຄ຺ເຄ ສນ຺ນິປຕິຕສ຺ສ ນຓ຺ທມຫາເຖຣປມຸຂສ຺ສ ມຫາຠິກ຺ຂຸສງ຺ຆສ຺ສ ມຊ຺ເຌ ນິປຊ຺ຊາເປຕ຺ວາ ‘‘ເອໂສ ເມ ຠນ຺ເຕ ກຸມາໂຣ ມຫາສງ຺ຆສ຺ສ ຈ ມຫາ ໂພຘິປາທສ຺ສ ຈ ສຣຓໍ ຄຈ຺ຉຕິ ຕໍ ສພ຺ເພປິ ຠທນ຺ຕາ ຣກ຺ຂນ຺ຕຸ ສງ຺ຆໂພຘິ ນາມໂກ ຈາຍໍ ໂຫຕຸ’’ຕິ ມຫາສງ຺ຆສ຺ສ ຈ ໂພຘິ ເທວຕາຍ ຈ ນິຍ຺ຍາເທຕ຺ວາ ປຏິຊຄ຺ຄນ຺ໂຕ ກຸມາຣສ຺ສ ສຕ຺ຕວສ຺ສິກ ກາເລ ກາລມກາສິ.

໑໑. ອຖ ມາຕຸໂລ ນຓ຺ທມຫາເຖໂຣ ກຸມາຣກໍ ວິຫາຣມາເນຕ຺ວາ ປຏິຊຄ຺ຄນ຺ໂຕ ເຕປິຏກໍ ພຸທ຺ຘວຈນໍ ອຸຄ຺ຄຓ຺ຫາເປຕ຺ວາ ພາຫິຣສຕ຺ເຖສຸ ຈ ປຣມໂກຈິທໍ ກາເຣສິ. ສງ຺ຆໂພຘິກຸມາໂຣປິ ກຕາຘິກາຣຕ຺ຕາ ຕິກ຺ຂປຎ຺ຎຕ຺ຕາ ຈ ຎາຓວິຎ຺ຎາຓສມ຺ປນ຺ໂນ ຫຸຕ຺ວາ ວຍປ຺ປຕ຺ໂຕ ໂລກສ຺ສ ໂລຈເນຫິນິປິຍມານາຍ ຣູປສມ຺ປຕ຺ຕິຍາ ສວຎ຺ຊລິປຸເຏຫິ ອສ຺ສາທິຍມານສທາຈາຣຄຸຓ ສມ຺ປຕ຺ຕິຍາ ຈ ປຕ຺ຖ ຏ ຍໂສໂຆໂສ ອໂຫສິ.

໑໒. ກິມິຫ ພຫຸນາ?- ກາທມ຺ພິນີ ກທມ຺ພໂຕ ສິນິທ຺ຘນີລາຍຕຄຸຓໍຘມ຺ມິລ຺ລກລາເປ, ປຣິປຸຓ຺ຓຫຣິຓງ຺ກມຓ຺ຑລໂຕ ຫິລາທກຣປສາທໂສມ຺ມຄຸຓໍ ມຸຂມຓ຺ຑເລ ຈາມີກຣປິໍຊຣກມ຺ພຸວຣໂຕ ເມທຸໂຣທາຣພຓ຺ຘຸຣຠາວໍ ຄີວາວຍເວ, ກລ຺ຍາຓສິລຸຈ຺ຈຍໂຕ ສໍຫຕ ວິລາສໍ ອຸຣຕ຺ຖເລ, ສຸຣສາຘິສາຂໂຕ |ໂອ໐.໐໐໐໓| ປີວຣາຍຕລລິຕຣູປໍ ກາມທານປທານທ຺ວ ພາຫຸຍຸຄເຬ, ສມທຄນ຺ຘສິນ຺ຘຸຣໂຕ ຄມນລີຬ຺ຫໍ ກຣາກາຣທ຺ວ ຫຕ຺ຖິຍຸຄເຬ, ຈາຣຸຕຣຖຣຸຈິໂຣຈມານຈາມີກຣມຸກຸຣໂຕ ຕທາກາຣໍ ສຊາຓຸມຓ຺ຑເລ ຊງ຺ຆຍຸຄເຬ, ນິຈ຺ຈາ ສີນກມລາ ກມລໂຕ ຣຕ຺ຕໂກມຬທລສິຣໍ ຈຣຓຍຸຄເຬ ອາທາຍ ໂຍຊຍຕາ ປາຣມິຕາຘມ຺ມສິປ຺ປິຕາ ນິມ຺ມິຕສ຺ສ ປຣມທສ຺ສນີຍຄຣູປວິລາສສ຺ສ ຕສ຺ສ ອຕ຺ຕຠາວສ຺ສ ສໍວຓ຺ຓນາຄນ຺ຖຄາຣວມາວຫຕິ.

໑໓. ເທເຫ ສຸລກ຺ຂຓຍຸເຕ ນວໂຍພ຺ພນຑ຺ເຒ,

ຕສ຺ສຸຊ຺ຊເລ ຈ ປສມາຫຣໂຓທເຍນ;

ກາ ວຓ຺ຓນາ ກມລຣູປິນິ ຊາຕຣູເປ,

ໂລກຸຕ຺ຕຣໍ ປຣິມລໍ ປຣິໂຕ ວຫນ຺ເຕ.

໑໔. ໂທສາຣໂຍ ຫທຍທຸຄ຺ຄປຸເຣ ວິຊິຕ຺ວາ,

ຕຕ຺ຖາຠິສິຈ຺ຈ ສຸຫທໍ ວິຍ ຘມ຺ມຠູປໍ;

ອຕ຺ຖານຸສາສນິມິມສ຺ສ ວທໍ ຄິຣາຍ,

ຕຕ຺ຖປ຺ປວຕ຺ຕຍິ ສຸຘີ ນິຊກາຍກມ຺ມໍ.

ອິຕິ ຣາຊກຸມາຣຸປ຺ປຕ຺ຕິ ປຣິຈ຺ເຉໂທ ປຐໂມ.

໑໕. ອເຖກທາ ມາຕຸລມຫາເຖຣາ ວຍປ຺ປຕ຺ຕໍ ສິຣິສງ຺ຆໂພຘິ ກຸມາຣໍ ຘມ຺ມສວນາວສາເນ ອາມນ຺ເຕຕ຺ວາ ເອວມາຫ, ‘‘ກຸມາຣ! ມຫາຠາຄເຘຍ຺ຍ! ອິທານິ ຕ຺ວມສິ ອຘີຕສຸຄຕາຄໂມ, ວິທິຕສກລ ພາຫິຣສຕ຺ໂຖ. ຈຕຸພ຺ພິຘປຓ຺ຑິຈ຺ຈໂກຏິປ຺ປຕ຺ໂຕ, ຕຖາປິ ອຠິມານຘເນ ຂຕ຺ຕິຍກຸເລ ຊາຕິ, ສພ຺ພປຕ຺ຖວ຺ຍາປິຕາ ໂຍພ຺ພນວິລາເສນ ສມລງ຺ກຕໍ ສຣີຣໍ, ອປ຺ປຏິມາ ຣູປສິຣິ, ອມານຸສໍ ພລຎ຺ເຈຕິ ມຫຕີຍ ພລວນຓ຺ຖ ປຣມ຺ປຣາ’ສພ຺ພາອວິນຍານ ເມເກກມ຺ປິ ເຕສມາຍຕນໍ ກິມຸຕ ສມວາໂຍ?‘‘ເຍຠຸຍ຺ເຍນ ສຕ຺ຖສລິລ ວິກ຺ຂາລນາຕິ ນິມ຺ມລາປິ ກາລຸສິຍມຸປຍານິ ພຸທ຺ຘີ, ອນຸຊ຺ຌິຕຘວລຕາປິ ສຣາຄາເອວ ຠວຕິ ນວໂຍພ຺ພນຄພ຺ພິຕານໍ ທິຏ຺ຐິ, ອປຫຣຕິ ຈ ວາຕມຓ຺ຑລິ ເກວ ສຸກ຺ຂປຓ຺ຓໍ ອຸພຠຸຕຣໂຊ ຠນ຺ຕິ ອຕິທູຣມຕ຺ຕໂນ ອິຈ຺ຉາຍ ໂຍພ຺ພນສມເຍ ປຸຣິສໍ ປກຕິ. ອິຓ຺ທ຺ຣິຍຠຣິຓຠາຣິນີ ສຕ຺ຕມຕິທຸຣນ຺ຕາຍ ມຸປໂຠຄມິຄຕຓຫິກາ ຕສ຺ມາ ອຍເມວານສ຺ສາທິຕ ວິສຍ ຣສສ຺ສ ເຕ ກາໂລ ຄຸຣຸປເທສສ຺ສ. ມທນສຣປ຺ປຠາຣຊຊ຺ຊຣິເຕ ຫທເຍ ຊລມິວ ຄລຕິ ຄຸຣູນມນຸສ຺ສານໍ ອກາຣຓໍຉວຕິ ທຸປ຺ປກຕິ ໂນ ກຸລໍວາ ສຸຕໍ ວາ ມນຍສ຺ສ ວຓ຺ທນປ຺ປຠໂວນທຫຕິ ກິໍ ທຫໂນ? ກິໍວາປສມເຫຕຸນາປິ ນາຕິວຓ຺ຑຕໂຣ ຠວຕິ ວຑພານໂຬ ສລິເລນ, ຕສ຺ມາ ຄາຬ຺ຫຕຣ ມນຸສາສີຕພ຺ໂພສິ.

໑໖. ອປຄຕມເລ ຫິ ມນສິ ເອລິກມຓິມ຺ຫິ ວິຍ ຣຊນິກຣມຍຸຂາປວິສນ຺ຕິ, ສຸຂມຸປເທສຄຸຓາ, ຄຸຣຸວຈນມມລມ຺ປິ ສລິລມິວ ມຫນ຺ຕໍ ຊານິມຸປຊນຍຕິ ສວນຫຕໍ ສູລມິວ ອຠພ຺ພສ຺ສ, ຠພ຺ພສ຺ສຕຸ |ໂອ໐.໐໐໐໔| ກຣິໂນ ວິຍ ສພ຺ພາຠຣຓມານນໂສຠາສມຸທຍມຘິກຕຣ ມຸປວຫຕິ, ອນາທິສິທ຺ຘ ຕຓ຺ຫາກສາຍິຕິຓ຺ທ຺ຣິຍານຸຈຣຎ຺ຫິ ຈິຕ຺ຕໍ ນາວຫຕິ ກນ຺ນາມານຕ຺ຖໍ, ຕສ຺ມາ ຣາຊ ກຸມາຣານຎ຺ຈ ຍຕີນຎ຺ຈ ສຕິພເລນ ອິຓ຺ທ຺ຣິຍວິຊໂຍ ທິຏ຺ຐຘມ຺ມິກສມ຺ປຣາຍິກມ຺ພິລໍ ກລ຺ຍາຓຊາຕມຸປຊນຍຕິ, ອິຓ຺ທ຺ຣິຍວິຊໂຍ ຈ ສມ຺ຠວຕິ ຄຸຣຸວຸທ຺ໂຘປເສວາຍ ຕພ຺ພວນມວິຣາເຘຕ຺ວາ ປຏິປຊ຺ຊໂຕ, ຕສ຺ມາ ຕຍາ ອາປາຓປຣິຍນ຺ຕໍ ວຕ຺ຖຸຕ຺ຕຍສຣຓປຣາຍຓຕາ ນ ປຫາຕພ຺ພາ.

ນ ຣາຄາປສ຺ມາຣວິໂພຘນໍ ວິສຍທຫນສລິລ ສໍເສວນໍ ກາຕພ຺ພໍ, ປສ຺ສຕູ ຫິ ກລ຺ຍາຓາຠິນິເວສິ ຈກ຺ຂູຓ຺ທ຺ຣິຍລາຬນ ປຣວສສ຺ສ ສລຠສ຺ສ ສມຸຊ຺ຊລິຕ ທີປສິຂາປຕນໍ ໂສຕິຓ຺ທ຺ຣິຍ ສຸຂານຸຍຸຕ຺ຕສ຺ສ ຕຣຸຓ ຫຣີຓສ຺ສ ອຸສຸ ປາຕສມ຺ມຸຂີຠວນໍ ຆາຓິຓ຺ທ຺ຣິຍ ປຣວສສ຺ສ ມຘຸກຣສ຺ສ ມທວາຣຓກຓ຺ຓຕາລຠນ຺ນໍ ຣສນິຓ຺ທ຺ຣິຍຕປ຺ປຓວ຺ຍສນິໂນ ປຸຖຸໂລມສ຺ສ ພລິສາຆາສວ຺ຍສນໍ ຜສ຺ສີຓ຺ທ຺ຣິຍານຸຠວນລາລສສ຺ສມຕງ຺ຄຊສ຺ສວາຣິຓິ ພຓ຺ຘນາປາຍໍ ອິເມຫິ ອິຓ຺ທ຺ຣິເຍຫິ ມິລິເຕຫິ ເອກສ຺ສ ກາມິໂນ ສທິເທວ ປຎ຺ຈນ຺ນໍ, ວິສຍຣສານມຸປເສວາຍ ປຕ຺ຕພ຺ພໍ ມຫນ຺ຕໍ ທຸກ຺ຂຊາລໍ ກຖມຸປວຓ຺ຓຍາມ? ອິມານິ ຈ ສຸຠາສິຕານິ ປຈ຺ຈເວກ຺ຂຕຸ ອນຸກ຺ຂຓໍ ວິຈກ຺ຂໂຓ.

໑໗. ນາຄາຣິກໍ ສຸຂມຸທິກ຺ຂຕິ ກິຎ຺ຈິ ຘີໂຣ,

ຊານາຕິ ເທຫປຏິຊຄ຺ຄນມຕ຺ຖໂຕເວ;

ສໍເສວໂຕປິ ຍຸວຕິໍ ຣຕິໂມຫິຕສ຺ສ,

ກຓ຺ຑຸຍເນ ວິຍ ພນສ຺ສ ສຸຂາຠິມາໂນ.

໑໘. ໂກ ເສເວຍ຺ຍ ປຣໍ ໂປໂສ ອວມານໍ ສເຫຍ຺ຍວວ,

ນ ເວ ກລຕ຺ຕນິຄຬໍ ຍທິ ທຸກ຺ຂນິພຓ຺ຘນໍ.

໑໙. ອາກຑ຺ຒມານາ ຈິສິຂາ ສ຺ມິປໍ,

ປຣມ຺ມຸຂາເຍວ ສທາ ປວຕ຺ຕາ;

ທູຣມ຺ປິ ຄຈ຺ຉນ຺ຕິ ຄຸຓໍ ວິຫາຍ,

ປວຕ຺ຕນໍ ຕາທິສເມວ ຖີນ.

໒໐. ອສນ຺ຖຸຕໍ ຕາ ປຸຣິສມ຺ປິ ອນ຺ໂຕ,

ກໂຣນ຺ຕິ ອາທາຍກຕາວ ຠິຕ຺ຕິ;

ເນຕ຺ຕິໍ ສວລ຺ລີ ວິຍ ຫຓ຺ຖຄາປິ,

ທສາສຸ ສພ຺ພາສຸ ຈ ສງ຺ກນີຍາ.

໒໑. ອນ຺ໂຕຣຸທ຺ຘາ ພຫິທ຺ຘາປິ ນິສ຺ສາສາ ວິຍ ນາຣິໂຍ,

ກໂຣນ຺ຕິ ນາສເມວສ຺ສ ໂກຘີມາຕາສຸ ວິສ຺ສເສ.

໒໒. ມານສ ປາປສໍນິນ຺ນໍ ອປາຍາ ວິວຏາ ນນາ,

ສມນ຺ຕາ ປາປມິຕ຺ຕາວ ໂມກ຺ໂຂ ສພ຺ພຠຍາກຖໍ.

໒໓. |ໂອ໐.໐໐໐໕| ອປິ ຈ ຫທຍຕຣຸໂກຏຣ ກຸຏີໂຣ ໂກຘ ກຸຓ຺ຑລີນ ກທາຈິ ພຫິ ກາຕພ຺ໂພ. ອປິ ຕຸ’ຕິຕິກ຺ຂາມນ຺ເຕນ ອຈິປ຺ຜຓ຺ທນ຺ຕໍ ອຸປເນຕພ຺ໂພ.

໒໔. ສຕໍ ຕິຕິກ຺ຂາກວເຈ ວິຄຸຓ຺ຐິຕາ,

ສິຍຸໍ ທຸຣາລາປຂຄາ ຂລານໍ;

ສຠາປສໍສາກຸສຸມຕ຺ຕ ເມຕາ,

ນິພຊ຺ຌເຣ ຕາ ຄຸຓ ມາລິກາຍ.

໒໕. ໂລກາຘິປຈ຺ຈໍ ວິປຸເລຘເນ ຈ,

ມໂນນຸກູເລ ຕນເຍ ຈ ທາເຣ;

ລທ຺ຘາປິ ຍາເຍຕິ ນ ຊາຕຸ ຕິຕຕິໍ,

ພາເຘຕຸ ສາຕໍ ນ ປປຎ຺ຈ ຕຓ຺ຫາ.

໒໖. ວຓ຺ຓປ຺ປສາທາ ຍສ຺ສາ ສຸຂາວ,

ຘນາ ຈ ຫາຍນ຺ຕຸປ ຊີວິກາຈ;

ເຍນາຠິຠູຕາຣິປຸເນວ ສຕ຺ຕາ,

ໂທສຄ຺ຄິ ໂສ ເຕ ຫທຍໍ ຊຫາຕຸ.

໒໗. ເຂໂທ ວິປຕ຺ຕີສຸ ປຏິກິຣຍາ ນ,

ຕສ຺ມາ ນ ທີນປ຺ປ ກຕິໍ ຠເຊຍ຺ຍ;

ປຎ຺ຎານຸຍາຕໍ ວີຣິຍໍ ວທນ຺ຕິ,

ສພ຺ພຕ຺ຖ ສິທ຺ຘິຄ຺ຄຫຓຄ຺ຄຫຓ຺ຖໍ.

໒໘. ວ຺ຍາປາຣາ ສພ຺ພຠູຕານໍ ສຸຂຕ຺ຖາຍ ວິຘີຍເຣ;

ສຸຂຎ຺ຈ ນ ວິນາ ຘມ຺ມໍ ຕສ຺ມາ ຘມ຺ມປໂຣ ຠວາ’ຕິ.

໒໙. ເອວມາທິກໍ ສປ຺ປຸຣິສນີຕິປຖໍ ອາທິສນ຺ເຕ ມຫາເຖເຣ ເຕນ ກລ຺ຍາຓຘມ຺ເມນ ອໂສຕພ຺ພຕານາທຣິຍຣຈິຕຠຸກູຏິກ ມຸເຂນ ວາ ທິສາຈິກ຺ຂິຕ຺ຕຈກ຺ຂຸນາ ຈ ອຫງ຺ກາຣປຣວເສນ ຄຊນິມິລິຕມຸພ຺ຠາວຍຕາ ວາ ອຕ຺ຕໂນ ປຎ຺ຎາຘິກ຺ເຂປມິວຈ ອຈິນ຺ຕຍຕາ ຈຸຬາວິນິຫິຕໂກມຬຎ຺ຊລິປຸເຏນ ຕນ຺ນິນ຺ເນນ, ຕປ຺ໂປເຓນ ສິຣສາ ຈ ປີຕິ ສມຸທິຕ ສາຘຸວາທວິກສິຕກໂປເລນມຸເຂນ ຈ. ສກລາວຍວຈິຕ຺ຖຏໂຣມຎ຺ຈ ກຎ຺ຈຸກິເຕນ ເທເຫນ ຈ ຠູມິຍໍ ນິປຊ຺ຊິຕ຺ວາ ທີຆປ຺ປມາຓ ປມາຓ ມາວຣຕ຺ຕາມຄ຺ຄຜລລາຠໂຕວິຍ ວິສິຏ຺ຐຕຣໍ ປມຸທິຕມາວິກຕມາສິ.

ອິຕິ ອນຸສາສນ ປຣິຈ຺ເຉໂທ ທຸຕິໂຍ.

໓໐. ຕໂຕ ປຏ຺ຐາຍ ຍຖາວຸຕ຺ຕປຏິປທໍ ອວິຣາເຘຕ຺ວາ ສມາວຣເຓນ ສນ຺ຕຸຏ຺ໂຐ ຕສ຺ສ ສງ຺ຆໂພຘິ ສມຎ຺ຎໍ ໂຄເປຕຸກາໂມ ມາຕຸລມຫາເຖໂຣ ຘມ຺ມິໂກຕິ ໂວຫາຣໍ ປຏ຺ຐເປສິ.

໓໑. ລກ຺ຂຓປາຐການໍ ວຈນໍ ສທ຺ທຫນ຺ໂຕ ຠາຄິເນຍ຺ຍໍ ປພ຺ພຊິຕຸກາມມ຺ປິ |ໂອ໐.໐໐໐໖| ອປພ຺ພາເຊຕ຺ວາ ‘‘ອິຘ ວາສໂຕ ອນຸຣາຘປຸເຣ ວາໂສເຍວ ກຸມາຣສ຺ສ ໂຍຄກ຺ເຂມາວໂຫ, ປຸຎ຺ຎານຸຣູເປນ ຊາຍມານສ຺ສ ວິປາກສ຺ສ ຈ ຐານໍ ໂຫຕິ, ມຫາເຈຕິຍສ຺ສ ວຕ຺ຕປຏິວຕ຺ຕສມາຈຣເຓນຈ ມຫນ຺ໂຕ ປຸຎ຺ຎກ຺ຂຓ຺ໂຘ ສມ຺ປຊິສ຺ສຕິ’’ຕິ ມຎ຺ຎມາໂນ ຕໍ ກຸມາຣມາທາຍ ຄຈ຺ຉນ຺ໂຕ ອນຸຣາຘປຸຣໍ ຄນ຺ຕຸກາໂມ ນິກ຺ຂມິ. ສງ຺ຆຕິສ຺ໂສໂຄຐາຠໂຍຕິ ຈ ລມ຺ພກຓ຺ຓາ ຣາຊ ກຸມາຣາ ອປເຣປິ ທຸເຈ ຕສ຺ສ ປໍສຸກີຬນໂຕ ປຏ຺ຐາຍ ສຫາຍາເຕນ ກຸມາເຣນ ສທ຺ຘິໍ ນິກ຺ຂມິໍສຸ ເຕ ຕໂຍ ກຸມາເຣ ອາທາຍ ຄຈ຺ຉນ຺ໂຕ ມຫາເຖໂຣ ປຸເຣຕຣເມວ ອນຸຣາຘປຸຣໍ ປາວິສິ. ມຫາເຖຣມນຸຄຈ຺ຉນ຺ເຕສຸ ເຕສຸ ກຸມາເຣສຸ ເຊຏ຺ໂຐ ສງ຺ຆຕິສ຺ໂສ ມຊ຺ຌິໂມ ສງ຺ຆໂພຘິ ກນິຏ຺ໂຐ ໂຄຐາຠໂຍຕິ ເຕ ເຖຣໍ ປຈ຺ຉໂຕ ອນຸຄຈ຺ຉນ຺ຕາ ຕໂຍປິ ປຏິປາຏິ ຍາ ຕິສ຺ສວາປິຍາ ເສຕຸມຕ຺ຖເກນ ຄຈ຺ຉນ຺ຕິ.

໓໒. ຕຕ຺ຖ ເສຕຸສາລາຍ ນິສິນ຺ໂນ ໂກຈິ ອຓ຺ໂຘວິຈກ຺ຂໂຓ ເຕສໍ ຕິຓ຺ຓນ຺ຕໍ ກຸມາຣານໍ ປທວິຎ຺ຎາສທ຺ທໍ ສຸຕ຺ວາ ລກ຺ຂຓານຸສາເຣນ ອຸປປຣິກ຺ຂິປິຕ຺ວາ ‘‘ເອເຕ ຕໂຍປິ ສີຫຬທີເປ ປຖວິສ຺ສຣາ ຠວິສ຺ສນ຺ຕີ’’ຕິ ຕຕ຺ຖ ນິສິນ຺ນານໍ ວ຺ຍາກາສິ. ຕໍວຈນໍ ປຈ຺ຉາ ຄຈ຺ຉນ຺ໂຕ ໂຄຐາຠໂຍ ສຸຕ຺ວາ ອິຕເຣສໍ ຄຈ຺ຉນ຺ຕານໍ ອນິເວທຍິຕ຺ວາ ປຈ຺ຈາຄມ຺ມ ‘‘ກຕໂມ ຈິຣໍ ຣຊ຺ຊໍ ກາເຣສ຺ສຕິ? ຈໍສຏ຺ຐິຕິຎ຺ຈ ກໂຣຕິ’’ຕິ? ປຸຈ຺ຉິຕ຺ວາ ປຈ຺ຉິໂມຕິ ວຸຕ຺ເຕ ຫຏ຺ຐປຫຏ຺ໂຐ ອຸທຄ຺ຄຸທຄ຺ໂຄ ສີຆຕຣໍ ອາຄມ຺ມ ເຕຫິ ສທ຺ຘິໍ ຄຈ຺ຉນ຺ໂຕ ຕິຂິຓ ມນ຺ຕິຕາຍ ຄມ຺ຠີຣຠາວໂຕ ຈ ກຎ຺ຈິ ອຊານາເປຕ຺ວາ ອນ຺ໂຕປຸຣໍ ປາວິສິ. ເຕ ຕໂຍປິ ປຕິຣູເປ ນິວາເສ ວາສໍ ຄຓ຺ຫິໍສຸ.

໓໓. ອຖ ກນິຏ຺ໂຐ ‘‘ເອເຕ ທ຺ເວປິ ອປ຺ປາຍຸກຕ຺ຕາ ຣຊ຺ເຊ ປຕິຏ຺ຐິຕາປິ ນ ຈິຣໍ ຊີວນ຺ຕິ ກິຣ ອຫເມວ ເຕສໍ ຣຊ຺ຊໍ ທຸເປສ຺ສາມິ’’ຕິ ຕທນຸຣູເປນ ອຸປາເຍນປຏິຊ຺ຊນ຺ໂຕ ເຕສໍ ຣຊ຺ຊລາຠາຍ ອຸປາຍໍ ທສ຺ເສນ຺ໂຕ ອຠິຓ຺ຫໍ ມຕ຺ເຕຕິ. ເຊຏ຺ໂຐປິ ຕສ຺ມິໍ ອຕິປິຍາສມາໂນ ເຕໂນປທິຏ຺ຐເມວ ສມາຈຣນ຺ໂຕຣາຊານໍ ທິສ຺ວາ ລທ຺ຘ ສມ຺ມາໂນ ສພ຺ເພສຸ ຣາຊກິຈ຺ເຈສຸ ປຸພ຺ພງ຺ຄໂມ ຫຸຕ຺ວາ ນ ຈິຣສ຺ເສວ ຣາຊວລ຺ລໂຠ ອໂຫສິ? ຕສ຺ມິໍ ກາເລ ຣຊ຺ຊໍ ກາເຣນ຺ໂຕ ວິຊຍ ຣາຊາ ນາມ ຂຕ຺ຕິໂຍ ຕສ຺ມິໍ ປສນ຺ໂນ ສພ຺ເພສຸ ຣາຊກິຈ຺ເຈສຸ ຕມເມວ ປຘານຠູຕໍ ກຕ຺ວາ ເສນາປຕິໍ ອກາສິ.

໓໔. ຘມ຺ມິໂກ ປນ ຣຊ຺ເຊນ ອນຕ຺ຖິກຕາຍ ຣຊ຺ຊລາຠາຍ ຈິຕ຺ຕມ຺ປິ ອນຸປ຺ປາເທຕ຺ວາ ເກວລໍ ມຫາເຖຣສ຺ສ ອນຸສາສນມຕ຺ເຕເນວ ຣາຊຸປຏ຺ຐານເວລາຍໍ ອນຸຈຣຓມຕ຺ຕມາຈຣນ຺ໂຕ ຣາຊເຄຫໍ ປວິສິຕ຺ວາ ຕໂຕ ເຕຫິ ສທ຺ຘິໍ ນິກ຺ຂມ຺ມ ສາຍໍ ມຫາ ເຖຣສ຺ສ ວິຫາເຣເຍວ ວສນ຺ໂຕ ອຕ຺ຕໂນ ຘມ຺ມິການຸຏ຺ຐານໍ ອຫາເປຕ຺ວາ ມຫາເຈຕິໂຍ ປຏ຺ຐານຄິລານຸປຏ຺ຐານາທິກໍ |ໂອ໐.໐໐໐໗| ອນວຊ຺ຊ ຘມ຺ມໍຈຣນ຺ໂຕ ກາລໍ ວີຕິນາເມຕິ.

ຕທາ ສງ຺ຆຕິສ຺ໂສ ສກລຣຊ຺ຊຎ຺ຈ ປຸຣຎ຺ຈ ອຕ຺ຕໂນຫຕ຺ຖຄຕໍ ກຕ຺ວາ ເອກສ຺ມິໍ ທິເນ ລທ຺ໂຘກາໂສ ຣາຊານໍ ອນ຺ໂຕຠວເນເຍວ ໂຄຐາຠເຍນ ມາຣາເປຕ຺ວາ ສຍໍ ຣຊ຺ເຊ ປຕິຏ຺ຐຕິ.

ອິຕິ ອນຸຣາຘປຸຣປ຺ປເວສປຣິຈ຺ເຉໂທ ຕຕິໂຍ.

໓໕. ອຖ ໂຄຐາຠໂຍ ຘມ຺ມິກໍ ອນິຈ຺ຉາມານມ຺ປິ ເສນາປຕິຏ຺ຐາເນ ຐເປຕ຺ວາ ອາຍຕິໍ ອເປກ຺ຂມາໂນ ສຍໍ ຠຓ຺ຑາຄາຣິໂກ ອໂຫສິ. ອຖ ສງ຺ຆຕິສ຺ໂສ ຣາຊາ ພຫຸໍ ປຸຎ຺ຎ຺ຈ ອປຸຎ຺ຎ຺ຈ ປສວນ຺ໂຕ ຊມ຺ພຸຜລປາກກາເລ ສເສໂນ ສາມຈ຺ໂຈ ສໂຠໂຣໂຘ ອຠິຓ຺ຫໍ ປາຈີນ ເທສໍ ຄນ຺ຕ຺ວາ ຊມ຺ພຸຜລານິ ຂາທຕິ. ຣຎ຺ໂຎ ເຍຠຸຍ຺ເຍນ ຄມນາ ຄມເນນ ອຸປທ຺ທຸຕາ ຣຏ຺ຐວາສິໂນ ຣາຊຸປໂຠຄາຣເຫສຸ ຊມ຺ພຸຜເລສຸ ວິສໍ ໂຍເຊສຸໍ. ອຖ ໂສ ສງ຺ຆຕິສ຺ໂສ ຣາຊາ ເຕນ ວິເສນ ຕຕ຺ເຖວ ກາລມກາສິ.

໓໖. ອຖ ໂຄຐາຠໂຍ ອຓ຺ຘວິຈກ຺ຂຓສ຺ສ ວຈນໍ ອນຸສ຺ສຣນ຺ໂຕ ອນຸກ຺ກເມນ ຣຊ຺ຊໍ ທາເປຕ຺ວາ ປຈ຺ຉາ ອຫໍ ສຸປ຺ປຕິຏ຺ໂຐ ຠວິສ຺ສາມິ’ຕິ ມຎ຺ຎມາໂນ ສາມຈ຺ໂຈ ສເສໂນ ສງ຺ຆໂພຘິກຸມາຣໍ ຣຊ຺ເຊນ ນິມນ຺ເຕສິ. ໂສ ເຕມິຍ ມຫາໂພຘິສຕ຺ເຕນ ທິຏ຺ຐາທີນວຕ຺ຕາ ຣຊ຺ຊສຸຂາປຣິຈ຺ຈາຄານຸຠູຕໍ ມຫນ຺ຕໍ ທຸກ຺ຂຊາລໍ ອນຸສ຺ສຣິຕ຺ວາ ປຸນປ຺ປຸນໍ ຍາຈິຍມາໂນປິ ປຏິກ຺ຂິປິເຍວ ອຠໂຍ ຄາມນິຄມຣາຊຘານີສຸ ສພ຺ເພປິ ມນຸສ຺ເສ ສນ຺ນິປາເຕຕ຺ວາ ເຕຫິ ສທ຺ຘິໍ ນານາປ຺ປກາຣໍ ຍາຈມາໂນປິ ສມ຺ປຏິຈ຺ຉາເປຕຸໍ ນາສກ຺ຂິ. ອຖ ສພ຺ເພປິ ຣຏ຺ຐວາສິໂນ ສາມຈ຺ຈາມຫາວິຫາຣໍ ຄນ຺ຕ຺ວາ ມຫາ ສງ຺ຆໍ ສນ຺ນິປາເຕຕ຺ວາ ສງ຺ຆ ມຊ຺ເຌ ສງ຺ຆໂພຘິກຸມາໂຣ ມຫາ ສງ຺ຆໍ ຠູມິຍໍ ນິປຊ຺ຊ ນມສ຺ສິຕ຺ວາ ລທ຺ໂຘກາໂສ ເອກມນ຺ຕໍ ນິສີທິຕ຺ວາ ເອວໍ ວຕ຺ຕຸມາຣຠີ.

໓໗. ອຍຎ຺ຫິ ຣາຊລກ຺ຂີນາມ ຍຖາ ຍຖາ ທິປ຺ປເຕ, ຕຖາ ຕຖາ ກປ຺ປຸຣທີປສິເຂວ ກຊ຺ຊິລໍມລິນເມວ ກມ຺ມຊາຕໍ ເກວລມຸພ຺ພມຕິ. ຕຖາຫິ ອຍໍ ສໍວຘນວາຣິຘາຣາ ຕຓ຺ຫາວິສວລ຺ລີນໍ, ເນນາທ ມຘຸຣຠີຕິກາ ອຍໍ ອິຓ຺ທ຺ຣິຍມິຄານໍ, ປຣາມາສຘຸມເລຂາ ສຸຈຣິຕ ຈິຕ຺ຕກມ຺ມສ຺ສ ວິພ຺ຠມເສຍ຺ຍາ ໂມຫນິທ຺ທານໍ ຕິມິຣຸຄ຺ຄຕິ ປຎ຺ຎາທິຏ຺ຐີນໍ, ປຸຣສ຺ສຣປຕາກາ ອວິນຍມຫາເສນາຍ, ອຸປ຺ປຕ຺ຕິນິນ຺ນນາ ໂກຘເວຄ ກຸມ຺ຠິລານໍ, ອາປານຠູມິ ມິຈ຺ຉາທິຏ຺ຐິວທນໍ. ສໍຄີຕິ ສາລາ ອິສ຺ສຣິຍ ວິກາຣນາຏການໍ ອາວາສທຣີໂທສາສິວິສານໍ, ອຸສ຺ສາຣຓເວຕ຺ຕລຕາ ສປ຺ປຸຣິສໂວຫາຣານໍ, ອກາລຊທາຄໂມ ສຸຈຣິຕ ຫໍສານໍ, ປຕ຺ຖາວນາ ກປຏນາຏການໍ, ກທລິກາ ກາມກຣິໂນ ວຊ຺ຌວາລາ ສາຘຸຠາວສ຺ສ, ຣາຫຸມຸຂໍ ຘມ຺ມຈຓ຺ທ |ໂອ໐.໐໐໐໘| ມຓ຺ຑລສ຺ສ, ນຫິ ຕໍ ປສ຺ສາມິ ໂຍຫິ ອປຣິຈິຕາຍາປິ ເອຕາຍ ນິພ຺ຠຣມຸປຄຸລ຺ໂຫ ນ ວິປ຺ປລທ຺ໂຘ, ອປິຈ, ອຠິເສກສມເຍ ຣາຊຎ຺ຎານໍ ມງ຺ຄລກລສຊເລຫິ ວິຍ ວິກ຺ຂາລນມຸປຍາຕິ ທກ຺ຂິຎ຺ຎໍ ອຄ຺ຄິຫຸຕຕຘຸເມເນວ ມລິນີຠວຕິ ຫທຍໍ ປຸໂຣຫິຕ ກຸສຄ຺ຄ ສມຊ຺ຊເຕນ ວິຍ ອປນິຍເຕ ຕິຕິກ຺ຂາ, ອຸຓ຺ຫີສ ປຏ຺ຏ ພຓ຺ຘເນນ ວິຍ ຉາທີຍຕີ ຊຣາຄມທສ຺ສນໍ, ອາຕປຕ຺ຕ ມຓ຺ຑເລນ ວິຍ ຕິໂຣກຣີຍຕິ ປຣໂລກາເປກ຺ຂຓໍ, ຈາມຣປວເນນ ວິຍ ທຸຣມຸທ຺ຘຸຍເຕ ສຈ຺ຈາທິຕາ ເວຕ຺ຕລຕາປ຺ປຫາເຣນ ວິຍ ທຸຣມປຍນ຺ຕິ ສຄ຺ຄຸຓາ ເອເກ ຣຊ຺ຊສິຣິ ມທິຣາ ມທມຕ຺ຕາ ສກຕ຺ຖນິປ຺ຜາທນປເຣຫິ ຘນປິສິຕາຆາສຄິຊ຺ເຌຫິ ສຫານລີນີພເກຫິ ທູຕໍ ວິໂນທນນ຺ຕິ, ປຣທາຣາຠິຄມນໍ ວິທ຺ຘຕາຕິ, ມີຄວນ ປຣິສ຺ສໂມຕິ, ສຸຣາປານໍ ວິລາໂສຕິ, ນິຈ຺ຈປ຺ປມຕ຺ຕຕາ, ສຸຣຠາໂວຕິ ສທາຣປ຺ປິຈ຺ຈາຄໍ ອວ຺ຍສນິຕານິ, ຄຸຣຸວຈນາວຘີຣຓໍ ອປຣປ຺ປເນຍຕ຺ຕມິຕິ ອຊິຕຫຈ຺ຈຕໍ ສຸໂຂປເສວຕ຺ຕມີຕິ, ນຈ຺ຈຄີຕ ຄຓາການຸສຕ຺ຕິ ຣສິກເຕຫິ ປຣິຠວສຫຕ຺ຕໍ ຂເມຕິ, ເສຣີຠາວໍ ປຓ຺ຑິຈ຺ຈາມິຕິ ວຓ຺ທິຊນ ນວຈນໍ ຍເສໍໂຆໂສຕິ ຕຣລຕາ ອຸສ຺ສາໂຫຕິ. ອວິເສສຎ຺ຎຸຕ຺ຕໍ ອປກ຺ຂປາຕິຕ຺ຕມິຕິ? ເອວ ໂທສຄຓມ຺ປິ ຄຸຓປກ຺ເຂ ອຊ຺ຌາໂຣປຍນ຺ເຕຫິ ສຍມ຺ປິ ອນ຺ໂຕ ຫ ສນ຺ເຕຫິ ປຕາຣຓກຸສເລຫິ ຘຸຕ຺ເຕຫິ ອມານຸໂສຈິຕາຫິ ໂຖມານາຫິ ປຕາຣິຍມານາ, ຈິຕ຺ຕມທມຕ຺ຕ ຈິຕ຺ຕາ ນິຈ຺ເຈຕ ນ ຕາຍ ຕເຖຕິ ອຕ຺ຕນິ ອຊ຺ຌາໂຣປຍນ຺ຕາ ອລິກາຠິມານໍ ມຈ຺ຈຘມ຺ມສມານາປິ ທິພ຺ພໍ ສາວຕິຓ຺ຓມິວ ອມານຸສມິວ ອຕ຺ຕານ ມຎ຺ຎມານາ ອາຣຘທິພ຺ໂພຈິຕກິຣຍານຸ ຠາວາ ສພ຺ພຊໂນ ປຠສນີຍ ຠາວມຸປຍນ຺ຕິ. ອຕ຺ຕ ມິລມ຺ພນຎ຺ຈ ອນຸ ຊີວິຊເນນ ກຣີຍມານໍ ອຠິນຓ຺ທນ຺ຕິ.

໓໘. ມານສາ ເທວຕາຊ຺ຌາໂຣປຓປ຺ປຕາຣຓ ສມ຺ຠູຕ ສມ຺ຠາວໂນ ປຫຕຎ຺ຈ ອນ຺ໂຕ ປວິຏ຺ຐ ອປຣຠຸຊຍຸຄໍ ວິຍ ອຕ຺ຕໂນ ພາຫຸຍຸຄໍ ສມ຺ຠາວຍນ຺ຕິ. ຕຈນ຺ຕຣິຕ ໂລຈນໍສກລລາຏ ມາສໍກນ຺ຕິ, ອລິກສມ຺ຠາວນາຠິມານຠຣິຕາ ນ ນມສ຺ສນ຺ຕິ ເທວຕາໂຍ ນ ປູຊຍນ຺ຕິ ສມຓ ພ຺ຣາຫ຺ມເຓ ນ ມານຍນ຺ຕີ ມານນີເຍ, ນ ອຸປຕິຏ຺ຐນ຺ຕິ ຄຸຣຸທສ຺ສເນປິ ອນຕ຺ຖກາຍາ ສານ຺ຕຣີຕ, ວິສໂຍ ປໂຠຄສຸຂາຕິ ອປຫສນ຺ຕິ ຍຕິໂນ? ຊຣາຠິ ຠວປລປິມິຕິ ນ ສຸຓນ຺ຕິ ວຸທ຺ຘຊນຸປເທສໍ, ອຕ຺ຕໂນ ປຎ຺ຎາ ປຣິຠໂວຕິ ອຸສຸສນ຺ຕິ ສຈິໂວ ປເຫສສ຺ສ,ກຸຎ຺ຊນ຺ຕິ ເອກນ຺ຕ ຫິຕວາທິນໍ ເອວມາທິນາ ກາກເຓນ ພຫຸນ຺ນໍ ໂທສານໍ ມາກຣ ຠູຕໍຣຊ຺ຊີວິຠວໍ ອຍໍ ນ ອິຈ຺ຉາມີ’ຕິ ອໂວຈ.

໓໙. ອຖ ມຫາຊເນນ ສາທຣ ມຊ຺ເຌສິໂຕ ມຫາສງ຺ໂຆ ກຸມາຣຠິມຸໂຂ ຫຸຕ຺ວາ ‘‘ມຫາຠາຄເຘຍ຺ຍ! ຖນຈຸຈຸເກ ລຄ຺ຄິຕາຊລຸກ ຕິກ຺ຂຑສເນນຕຕ຺ຖ ເວທນຸປ຺ປາທຍນ຺ຕິ ໂລຫິຕເມວ ອາກຑ຺ຒຕິ, ທາຣໂກ ປນ ໂກມເລນ ມຸຂປຸເຏນມາຕຸ ສຸຂສຎ຺ຎໍ ອຸປ຺ປາທຍນ຺ໂຕ ຂີຣເມວ ອວ຺ເຫຕິ.

໔໐. |ໂອ໐.໐໐໐໙| ເອວເມວ ຣຊ຺ຊວິຠວໍ ປຕ຺ໂຕ ອຘີໂຣ ພາໂລ ພຫຸໍ ອປຸຎ຺ຎເມວ ສຎ຺ຈິຓານິ, ເມຘາວິ ຘິຣປຸຣິໂສ ປນ ອາຍຸສງ຺ຂາຣສ຺ສ ທຸພ຺ພລຕ຺ຕຎ຺ຈ ຘນສຎ຺ຈຍສ຺ສ ນິສ຺ສາຣຕ຺ຕຎ຺ຈ ປຎ຺ຎາຍ ອຸປ ປຣິກ຺ຂິຕ຺ວາ ທສ ກຸສລກມ຺ມານິ ປູເຣນ຺ໂຕ ຕາທິເສນ ມຫຕາ ໂຠຄກ຺ຂຓ຺ເຘນ ມຫນ຺ຕໍ ກຸສລຣາສິໍ ອຸປຈິຓາຕິ, ຕ຺ວມສິກຕາຘິ ກາໂຣ ມຫາສຕ຺ຕຘຸຣຓ຺ຘໂຣ, ເອຕາທິສໍ ປຸຎ຺ຎາຍຕນຏ຺ຐານໍ ລທ຺ຘາ ຘມ຺ເມນ ສເມນ ໂລກໍ ປຣິປາເລນ຺ໂຕ ສຸຄຕສາສນໍ ປຄ຺ຄຓ຺ຫນ຺ໂຕ ທານປາຣມິໂກຏິປ຺ປຕ຺ຕໍ ກຕ຺ວາ ປຈ຺ຉາ ອຠິນິກ຺ຂມຓຎ຺ຈ ກໂຣນ຺ໂຕ ໂພຘິປກ຺ຂິຍຘມ຺ເມ ປຣິປາເຈຫີ’’ຕິ ອນຸສາສິ.

໔໑. ອຖ ໂສ ມຫຊ຺ຌາສໂຍ ປຸຣິສວໂຣ ມຫາສງ຺ຆສ຺ສ ອນຸສາສນິໍ ມທ຺ທິຕຸ ມສມຓ຺ໂຖ ອຘິວາເສສີ. ອນນ຺ຕຣຎ຺ຈ ມຫາຊນກາໂຍ ສງ຺ຆສ຺ສ ອນຸຎ຺ຎາຍ ສກລໍ ສີລທີປໍ ເອກຈ຺ຉຕ຺ຕໍ ກຕ຺ວາ ອຠິສິຎ຺ຈິຍ ຘມ຺ມິກ ສິຣິສງ຺ຆໂພຘິຣາຊາຕິ ໂວຫາຣໍ ປຏ຺ຐເປສິ ໂຄຐາຠຍຎ຺ຈ ເສນາປຕິຏ຺ຐາເນ ຐເປສິ.

໔໒. ທານໍ ອທາ ຘາຣຍິ ນິຈ຺ຈສີລໍ,

ວຫີ ຕິຕິກ຺ຂໍ ຠຊິ ອປ຺ປມາທໍ;

ປຊາ ຫິຕຊ຺ຌາສຍ ໂສມ຺ມຣູໂປ,

ຘມ຺ໂມ ຈ ໂສ ວິຄ຺ຄຠວາ ວິໂຣຈີ.

໔໓. ວິຎ຺ຎາຍ ໂລກສ຺ສ ຫິ ໂສ ສຠາວໍ,

ປຘານວຕ຺ຕານຸ ຄຕິປ຺ປຘານໍ;

ນິຘາຕຸກາໂມ ຊນ຺ຕາສຸ ຘມ຺ມໍ,

ສຍມ຺ປິ ຘມ຺ມາ ວຣຓມ຺ຫິ ສຕ຺ໂຕ.

ອິຕິ ຣຊ຺ຊາຠິເສກ ປຣິຈ຺ເຉໂທ ຈຕຸຕ຺ໂຖ.

໔໔. ໂສ ຣາຊາ ມຫາ ວິຫາເຣ ມຫຄ຺ຆ ມຫາວິສາລໍ ສລາກຄ຺ຄໍ ກາຣາເປຕ຺ວາ ອເນກສຫສ຺ສານໍ ຠິກ຺ຂູນໍ ນິຈ຺ຈໍ ສລາກ ຠຕ຺ຕໍ ປຏ຺ຐເປສິ. ມາຕຸລມຫາເຖຣສ຺ສໍຈ ສກນາມ ເຘຍ຺ເຍນ ມຫນ຺ຕໍ ປຣິເວຓ ວິຫາຣໍ ກາຣາເປຕ຺ວາ ອເນເກຫິ ກປ຺ປິຍຠຓ຺ເຑຫິ ສທ຺ຘິໍ ສປຣິວາຣ ເວຓາ ການິ ຄາມກ຺ເຂຕ຺ຕານິ ສງສປຣິໂຠຄາຣຫານິ ກຕ຺ວາ ທາເປສິ ສຕ຺ຕເມວ ນິສີຖກາເລ ຣໂຫຄໂຕ ມຫາໂພຘິສຕ຺ຕສ຺ສ ທຸກ຺ກຣຈຣິຕານິ ສລ຺ລກ຺ເຂນ຺ໂຕ ຕາທິສາປທານໍ ອຕ຺ຕນິ ສມ຺ປາເທຕຸມາສິໍສິ. ຕຖາ ຫິ

໔໕. ເທຫີຕິ ວຕ຺ຖຸມສຸກໍ ຄທິໂຕຕ຺ຖິເກຫິ,

ນາລໍ ກເຖຕຸມ຺ຫ ນຕ຺ຖິ ນ ເທມິຈາຕິ;

ຈິຕ຺ເຕ ມຫາກຣຸຓາຍ ປຫຏາວກາສາວ,

ທຸຣໍຊຄາມ ວິຍ ຕສ຺ສ ຠວຕ຺ຖຸ ຕຓ຺ຫາ.

ເອວມມ຺ຫາກໍ |ໂອ໐.໐໐໑໐| ໂພຘິສຕ຺ຕສ຺ສ ວິຍ ພາຫິຣ ວຕ຺ຖຸປຣິຈ຺ຈາຄມຫຸສ຺ສໂວ ກທາ ເມ ຠວິສ຺ສຕິຕິ ຈ,

໔໖. ອານີຍເຕ ນິສິຕ ສຕ຺ຖນິປາຕເນນ,

ນິກ຺ກຑ຺ຒເຕ ຈ ມຸຫຸ ທານ຺ຫວາຍຣຕ຺ຍາ;

ເອວໍ ປຸນປ຺ປຸນ ຄຕາຄຕເວຄຂິນ຺ນໍ,

ທຸກ຺ຂໍ ນ ຕສ຺ສ ຫທຍໍ ວຕ ປີຬຍິຕ຺ຖ.

ເອວໍ ກິຣສ຺ສ ມຫາສຕ຺ຕສ຺ສ ມໍສ ໂລຫິຕາທິ ອຊ຺ຌຕ຺ຕິກວຕ຺ຖຸທານສມເຍ ທຸກ຺ຂເວທນາ ມນໍ ນ ສມ຺ພາເຘສິ. ມມາປິ ອີທິສໍ ອຊ຺ຌຕ຺ຕິກ ທານມຫາມງ຺ຄລໍ ກທາ ຠວິສ຺ສຕີຕິ ຈ.

໔໗. ໂສ ສໍຂປາລຠູຊໂຄ ວິສເວຄວາປິ,

ສີລສ຺ສ ເຠທນຠເຍນ ອກຸປ຺ປມາໂນ;

ອິຈ຺ຉໍ ສເທຫຫຣວາຠິຊເນ ທຍາຍ,

ຄນ຺ຕຸໍ ສຍໍ ອປທຕາຍ ສຸໂສຈນູນໍ.

ເອວໍ ສີລ ຣກ຺ຂນາປທານສິຣິໍ ກທາ ວິນ຺ທາມີຕິ ຈ,

໔໘. ປິເວຍ຺ຍ ຖຎ຺ຎໍ ອມຕຎ຺ຈ ພາໂລ,

ວຸທ຺ຘິໍ ຄໂຕ ໂສວ ຊິຄຸຈ຺ຉິເຕ ຕໍ;

ສ ຊາຕຸ ເອວໍ ອນຸຠູຍ ຣຊ຺ຊໍ,

ຎາຓສ຺ສ ປາເກ ສຕຕໍ ຊຫາຕິ.

ເອວໍ ມຍາປິ ອຈິຣສ຺ເສວ ອວສ຺ສໍ ອຠິນິກ຺ຂມນໍ ກາຕພ຺ພນ຺ຕິ ຈ,

໔໙. ໂສ ເສນໂກ ທ຺ວິຊປສິພ຺ພກສາຍິສປ຺ປໍ,

ອຎ຺ຎາສິ ໂທສກລຸສາຍ ຘິຍາພ຺ຠຸຕໍຕໍ;

ກາ ວຓ຺ຓນາສ຺ສ ຂລຸ ໂທສວິນິຄ຺ຄຕາຍ,

ສພ຺ພຎ຺ຎຸຕາຍ ທສປາຣມິສາຘິຕາຍ.

ເອວໍວິຘາ ກລ຺ຍານຎາຓສມ຺ປຕ຺ຕິ ກທາ ເມ ສມິຊ຺ຌິສ຺ສຕີຕິ ຈ,

໕໐. ວາເລນ ໂສ ກິສກລຓ຺ທກຊາຕິຍມ຺ປິ,

ອຸສ຺ສິຎ຺ຈິຕຸໍ ສລິລມຸສ຺ສຫິ ສາຄຣສ຺ສ;

ຕໍ ມຸທ຺ຘຕາຍ ນ ຠເວ ມຕິຍາ ມຫນ຺ຍາ,

ສມ຺ປາທນາຍ ຠິມຕສ຺ສ ສມຕ຺ຖຕາຍ.

ເອວໍ ວິຘາຍ ວີຣິຍປາຣມິຍາ ກທາ ຠາຊນໍ ຠວິສ຺ສາມິຕິ ຈ

໕໑. ກລາພຸຣາເຊນ ຫິ ຂນ຺ຕິວາທິ,

ວຘໍ ວິຘາຍາປິ ອຕິຕ຺ຕເກນ;

ຫເຕ ປເທໂນຣສິ ຂນ຺ຕິໂສເຘ,

ໂສ ກູຏສຓ຺ຘິຄ຺ຄຫຓໍ ພຸໂພຘ.

ເອວໍ ວິຘາຍ ຂຕ຺ຕິປາຣມິຍາ ອຕ຺ຕານໍ ກທາ ອລໍກຣິສ຺ສາມິຕິ ຈ

໕໒. |ໂອ໐.໐໐໑໑|

ມິຈ຺ຉາຠິໂຍຄໍ ນ ສຫິໍສຸ ຕສ຺ສ,

ຣາມາຠິຘານສ຺ສປິ ປາທຸກາໂຍ;

ສຈ຺ຈຎ຺ຈຍາ ນາຎ຺ຎມຠາສິຘີໂຣ,