໔. ເມຕ຺ຕາຠາວນານິທ຺ເທສ

໑. ເມຕ຺ຕາ ຠາວນ ມິຈ຺ຉມ຺ປິ, ສຸຓ ພຸທ຺ຘວໂຈ ຍິທໍ;

ໂທສ ນິຄ຺ຄຫຓຕ຺ຖາຍ, ໂທໂສ ເມຕ຺ຕາຍເວຣິຫິ.

໒. ອກ຺ໂກຈ຺ຉິມໍ ອວຘິມໍ, ອຊິນິມໍ ອຫາສິເມ;

ເຍຈ ຕໍ ອຸປນຍ຺ຫນ຺ຕິ, ເວຣໍ ເຕສໍ ນສມ຺ມຕິ.

໓. ອກ຺ໂກຈ຺ຉິມໍ ອວຘິມໍ, ອຊິນິມໍ ອຫາສິເມ;

ເຍຈຕໍ ນຸປນຍ຺ຫນ຺ຕິ, ເວຣໍ ເຕສໍ ອຸປສມ຺ມຕິ.

໔. ນຫິເວເຣນ ເວຣານິ, ສມ຺ມນ຺ຕິຘ ກຸທາຈນ;

ອເວເຣນຈ ສມ຺ມນ຺ຕິ, ເອສຘມ຺ໂມ ສນນ຺ຕໂນ.

໕. ປເຣຈ ນວິຊານນ຺ຕິ, ມຍ ເມຕ຺ຖ ຍມາມເສ;

ເຍຈ ຕຕ຺ຖ ວິຊານນ຺ຕິ, ຕໂຕ ສມ຺ມນ຺ຕິ ເມຘຄາ.

໖. ກຸທ຺ໂຘ ອຕ຺ຖໍ ນຊານາຕິ, ກຸທ຺ໂຘ ຘມ຺ມໍ ນປສ຺ສຕິ;

ສທາ ອນ຺ຘຕມໍ ໂຫຕິ, ຍໍໂກໂຘ ສຫເຕນຣໍ.

໗. ອຸຠິນ຺ນ ມຕ຺ຖໍ ຈຣຕິ, ອຕ຺ຕໂນຈ ປຣສ຺ສຈ;

ປຣໍ ສໍກຸປ຺ປິຕໍ ຎຕ຺ວາ, ໂຍ ສໂຕ ອຸປສມ຺ມຕິ.

໘. ຕສ຺ເສວ ເຕນ ປາປິຍ຺ໂຍ, ໂຍ ກຸທ຺ຘໍ ປຏິກຸຊ຺ຌຕິ;

ກຸທ຺ຘໍ ອປຏິກຸຊ຺ຌນ຺ໂຕ, ສງ຺ຄາມໍ ເຊຕິ ທຸຊ຺ຊຍໍ.

໙. ຂນ຺ຕີ ປຣມໍ ຕໂປ ຕິຕິກ຺ຂາ,

ນິພ຺ພານໍ ປຣມໍ ວທນ຺ຕິ ພຸທ຺ຘາ;

ນຫິ ປພ຺ພຊິໂຕ ປຣູປຆາຕີ,

ນສມໂຓ ໂຫຕິ ປຣໍ ວິເຫຐຍນ຺ໂຕ.

໑໐. ອໂກເຘນ ຊິເນ ໂກຘໍ, ອສາຘຸໍ ສາຘຸນາ ຊິເນ;

ຊິເນ ກທຣິຍໍ ທາເນນ, ສຈ຺ເຈນາ ລິກວາທິນໍ.

໑໑. ໂຍ ເວ ອຸປ຺ປຕິຕໍ ໂກຘໍ, ຣຖໍ ຠນ຺ຕໍວ ວາຣເຍ;

ຕ ມຫໍ ສາຣຖີ ພ຺ຣູມິ, ຣສ຺ມິຄ຺ຄາໂຫ ອິຕໂຣຊໂນ.

໑໒. ປຸຣິສສ຺ສ ຫິ ຊາຕສ຺ສ, ກຸຘາຣີ ຊາຍເຕ ມຸເຂ;

ຍາຍ ຉິນ຺ທຕິ ອຕ຺ຕານໍ, ພາໂລ ທຸພ຺ຠາສິຕໍຠຓໍ.

໑໓. ເສໂລ ຍຖາ ເອກຄ຺ຆໂນ, ວາເຕນ ນສມີຣຕິ;

ເອວໍ ນິນ຺ທາ ປສໍສາສຸ, ນສມິຎ຺ຊນ຺ຕິ ປຓ຺ຑິຕາ.

໑໔. ສມານຠາຄໍ ກ຺ຣຸພ຺ເພຖ, ຄາເມ ອກ຺ກຸຏ຺ຐ ວນ຺ທິຕໍ;

ມໂນປໂທສໍ ຣກ຺ເຂຍ຺ຍ, ສນ຺ໂຕ ອນຸຓ຺ຓໂຕ ສິຍາ.

໑໕. ນປໂຣ ປຣໍ ນິກຸປ຺ເປຖ, ນາຕິມຎ຺ເຎຖ ກຕ຺ຖຈິ ນກິຎ຺ຈິ;

ພ຺ຍາໂຣສນາ ປຏິຆສຎ຺ຎາ, ນຎ຺ຎມຎ຺ຎສ຺ສ ທຸກ຺ຂ ມິຈ຺ເຉຍ຺ຍ.

໑໖. ມາຕາ ຍຖາ ນິຍໍ ປຸຕ຺ຕ,

ມາຍຸສາ ເອກປຸຕ຺ຕ ມນຸຣກ຺ເຂ;

ເອວມ຺ປິ ສພ຺ພ ຠູເຕສຸ,

ມານສໍ ຠາວເຍ ອປຣິມາຓໍ.

໑໗. ສຸຕ຺ວານ ທຸສິໂຕ ພຫຸໍ ວາຈໍ,

ສມຓານໍວາ ປຸຖຸຊນານໍ;

ຜຣຸເສນ ຫິ ນ ປຏິວຊ຺ຊາ,

ນ ຫິ ສນ຺ໂຕ ປຏິເສນິໍ ກໂຣນ຺ຕິ.

໑໘. ສຈ຺ຈໍ ຠເຓ ນກຸຊ຺ເຌຍ຺ຍ, ທຊ຺ຊາ ອປ຺ປມ຺ປິ ຍາຈິໂຕ;

ເອເຕຫິ ຕີຫິ ຐາເນຫິ, ຄຈ຺ເຉ ເທວານ ສນ຺ຕິເກ.

໑໙. ນ ປເຣສໍ ວິໂລມານິ, ນ ປເຣສໍ ກຕາກຕໍ;

ອຕ຺ຕໂນວ ອເວກ຺ເຂຍ຺ຍ, ກຕານິ ອກຕານິຈ.

໒໐. ສຸ ທສໍ ວຊ຺ຊມຎ຺ເຎສໍ, ອຕ຺ຕໂນ ປນ ທຸທ຺ທສໍ;

ປເຣສຎ຺ຫິ ໂສ ວຊ຺ຊານິ, ໂອຜຸນາຕິ ຍຖາ ຠຸສໍ;

ອຕ຺ຕໂນ ປນ ຉາເທຕິ, ກລິໍວ ກິຕວາ ສຏ຺ໂຐ.

໒໑. ນິຘີນໍວ ປວຕ຺ຕານໍ, ຍໍ ປສ຺ເສ ວຊ຺ຊທສ຺ສິນໍ;

ນິຄ຺ຄຍ຺ຫວາທິໍ ເມຘາວິໍ, ຕາທິສໍ ປຓ຺ຑິຕໍ ຠເຊ.

໒໒. ຕາທິສໍ ຠຊມານສ຺ສ,

ເສຍ຺ໂຍໂຫຕິ ນປາປິໂຍ;

ອິຕິ ວຸຕ຺ຕໍ ມຸນິນ຺ເທນ,

ຕິໂລກຄ຺ເຄນ ສຕ຺ຖຸນາ.

໒໓. ເມຕ຺ຕາ ຄນ຺ເຘນ ວາເສນ຺ໂຕ,

ໂທສໍ ທູເຣກເຣ ພຸໂຘ;

ທູຣາສນ຺ເນສຸ ສພ຺ເພສຸ,

ອຕ຺ຕໂນ ເວຣິເກສຸປິ.

໒໔. ຫເນ ໂທສູ ປນາຫານິ, ອນຕ຺ຖ ກາຣການິ ຫິ;

ເຕສ຺ວ ສນ຺ເຕສຸ ສພ຺ເພສຸ, ເມຕ຺ຕາໂຫຕິ ສຸນິມ຺ມລາ.

໒໕. ສຕໍ ທຸຊ຺ຊນ ວາກ຺ເຍຫິ, ນມໂນ ຍາຕິ ວິກ຺ຣິຍໍ;

ນຫິຕາປຍິຕຸໍ ສກ຺ກາ, ຄງ຺ຄານທິໍ ຕິຓຸກ຺ກຍາ.

໒໖. ນຫິ ນິນ຺ທາ ປສໍສາຫິ, ສຕໍ ມໂນວິກາຣຕາ;

ນ ກທາຈິປິ ກມ຺ເປຍ຺ຍ, ວາເຕຫິ ເສລປພ຺ພໂຕ.

໒໗. ນທິຍໍ ຂຸທ຺ທກາ ນາວາ, ວິຈີຫິ ອຸນ຺ນໂຕນຕາ;

ມຫານາວາ ນກມ຺ປນ຺ຕິ, ມຫນ຺ຕີຫິ ວິຈີຫິປິ.

໒໘. ໂລເກ ປສໍສ ນິນ຺ທາຫິ, ທຸຊ຺ຊໂນວຸນ຺ນໂຕນໂຕ;

ສນ຺ໂຕປຎ຺ໂຎ ນຈລຕິ, ມຫານິນ຺ທາ ຖຸຕີຫິປິ.

໒໙. ເສໂລເສໂລ ນິເລເຫວ,

ວຓ຺ຓາວຓ຺ຓາ ອສສ຺ສຕາ;

ລາຠາລາຠາ ສຸຂາທຸກ຺ຂາ,

ຍສາຍສາ ນກມ຺ປຕິ.

໓໐. ຂມາຘຄ຺ຄ ກເຣຕສ຺ສ, ທຸຊ຺ຊໂນ ກິໍ ກຣິສ຺ສຕິ;

ອຕິເຓ ປຕິໂຕ ອຄ຺ຄິ, ສຍເມວ ປສມ຺ຠຕິ.

໓໑. ສຍເມວ ສກຕ຺ຕານໍ, ມຈ຺ຈຸພ຺ຠເຍນ ຕຈ຺ຉຕຸ;

ມາຎ຺ເຎ ຕຈ຺ຉຕຸ ໂທເສນ, ກິມຕ຺ຖໍ ອຎ຺ຎຕຈ຺ຉນໍ.

໓໒. ມາຎ຺ເຎ ຕຈ຺ຉ ຕຸໂທເສນ, ນເສຍ຺ໂຍ ອຎ຺ຎຕຈ຺ຉນໍ;

ມາຎ຺ໂຎ ຕໍ ອຫິພ຺ຍຄ຺ເຆວ, ໂທມນສ຺ເສນ ຠາຍຕຸ.

໓໓. ນິສ຺ສາຍ ຄຣຸກາຕພ຺ພໍ, ພຫູນໍ ປາປໂມຈນໍ;

ອຈາປລ຺ເລນ ສນ຺ເຕນ, ຄຣຸກາຕພ຺ພຕໍ ວເຊ.

໓໔. ນິສ຺ສາຍ ຄຣຸກາຕພ຺ພໍ, ພຫູນໍ ປຸຎ຺ຎວຑ຺ຒນໍ;

ຄຣຸກາຕພ຺ພຕໍ ຄຈ຺ເຉ, ຘີຕິຍາ ສີລ ຄຸຕ຺ຕິຍາ.

໓໕. ສນ຺ຕໍ ຫິ ສີລວໍ ຘີຕິໍ, ຫິໂຣຕ຺ຕປ຺ເປນ ຠາຍຕິ;

ທຸຊ຺ຊນໍ ໂທມນສ຺ເສນ, ອຫິພ຺ຍຄ຺ເຆວ ຠາຍຕິ.

໓໖. ນຜຣຸສາຍ ວາຈາຍ, ອຎ຺ເຎ ທເມຍ຺ຍ ປຓ຺ຑິໂຕ;

ອຕ຺ຕານໍວ ທເມຕ຺ວານ, ອຎ຺ເຎ ສຓ຺ເຫນ ໂອວເທ.

໓໗. ຈິຕ຺ເຕ ສຓ຺ເຫ ອສຓ຺ຫາປິ, ນວາຈາຜຣຸສາ ຠເວ;

ຕສ຺ມາ ໂອວາ ທນາທີສຸ, ຣກ຺ເຂຍ຺ຍ ຖທ຺ຘຈິຕ຺ຕໂຕ.

໓໘. ອຕ຺ຕານ ໂມວທຕ຺ຖາຍ, ສິກ຺ເຂຍ຺ຍ ພຸທ຺ຘຠາສິຕໍ;

ປຣມ຺ປິ ອນຸກມ຺ປາຍ, ອິຈ຺ຉນ຺ໂຕ ອນຸສາສເຍ.

໓໙. ອຎ຺ຎໍ ນນິຄ຺ຄເຫ ກິຎ຺ຈິ, ສຸເຕນ ປຏິປຕ຺ຕິຍາ;

ອຕ຺ຕນິຄ຺ຄຫຓໍ ເສຍ຺ໂຍ, ນຸນ຺ນເມຍ຺ຍ ຊິໂນຣໂສ.

໔໐. ນາວີກເຣຍ຺ຍ ໂທສໍວາ, ໂລຠໍ ມານໍ ສກໍມລໍ;

ມາຎ຺ເຎ ມຎ຺ຎນ຺ຕຸ ຕໍ ທິສ຺ວາ, ຈິຣປ຺ປພ຺ພ ຊິໂຕ ນຸຕິ.

໔໑. ກກເຈນ ຕ຺ຕເຉເທນ຺ເຕ, ເວຣິເກປິນໂທສເຍ;

ອິຈ຺ໂຈວາທໍ ມຸນິນ຺ທສ຺ສ, ສມ຺ປຏິຈ຺ຉ ຊິໂນຣໂສ.

໔໒. ເວຣີ ອຈ຺ຈຸປນາຫີປິ, ຣູເປວ ທຸກ຺ຂກາຣໂກ;

ນ ຕ຺ວ ຕພ຺ພິສເຍ ນາເມ, ທຸກ຺ຂໍ ມາກຣິ ເຈຕສິ.

໔໓. ເວຣີ ຕິພນ຺ຘ ເວໂຣປິ, ອິເຫວ ທຸກ຺ຂກາຣໂກ;

ຠວນ຺ຕຣໍ ນອນ຺ເວຕິ, ສກມ຺ມຸນາ ຄໂຕ ຫິໂສ.

໔໔. ໂທໂສຕຸ ອິຫ ປີເຬຕ຺ວາ,

ທຸກ຺ຂາວໂຫ ຠເວຠເວ;

ມຫານຕ຺ຖ ກຣໍ ໂທສໍ,

ກສ຺ມາ ວຑ຺ເຒຕິ ເຈຕສິ.

໔໕. ເມຕ຺ຕາສີຕມ຺ພຸເສເກນ, ຊິໂນວາທ ມນຸສ຺ສຣໍ;

ມຫາ ນຕ຺ຖ ກຣໍ ໂທສໍ, ນິພ຺ພາຍຕຸ ສ ເຈຕສິ.

໔໖. ຉທ຺ທນ຺ໂຕ ລຸທ຺ທກໍ ປາປໍ, ຠູຣິທຕ຺ໂຕຫິ ຕຸຓ຺ຑິກໍ;

ຘມ຺ມປາໂລ ຂມິ ຕາຕໍ, ກປິນ຺ໂທ ກນ຺ທໂຣ ປຕໍ.

໔໗. ອສງ຺ຂ຺ເຍຍ຺ຍ ຕ຺ຕຠາເວສຸ, ປຣວຊ຺ຊໍ ຕິຕິກ຺ຂໂຕ;

ນາຖສ຺ສ ປາຣມິໍ ຂນ຺ຕິໍ, ສຣໍ ຘີໂຣ ຕິຕິກ຺ຂຕຸ.

໔໘. ສາສເນ ຈິຣວາເສນ, ເອວໍ ນິທ຺ໂທສກາ ອິຕິ;

ຕຸວໍ ປຏິຈ຺ຈ ມຎ຺ຎນ຺ຕຸ, ສາສເນ ສປ຺ປໂຍຊນໍ.

໔໙. ສາສເນ ຈິຣ ວາສາປິ, ມາທິສາວ ອິເມ ອິຕິ;

ຕມາຄມ຺ມ ນມຎ຺ຎນ຺ຕຸ, ສາສເນ ນິປ຺ປໂຍຊນໍ.

໕໐. ທ຺ເວ ອຸເສຕີຕິ ໂທໂສ ໂສ, ສປຣໍ ທຍ຺ຫເຕ ທ຺ວຍໍ;

ປຫາຕພ຺ໂພ ສ ສພ຺ເພສຸ, ປຣຕ຺ຖ ສຕ຺ຖ ມິຈ຺ຉຕາ.

໕໑. ປຣທິນ຺ເນຫິ ໂນອາຍຸ, ຕິຏ຺ຐເຕ ນາຕ຺ຕໂນ ວສາ;

ປຣວຊ຺ຊໍ ຂເມຕພ຺ພໍ, ນສາຘຸ ອຎ຺ຎວິໂຣຘິໂຕ.

໕໒. ເຊຄຸຈ຺ຉ ກ຺ໂກສ ນິນ຺ທານິ, ພາໂລ ຄຓ຺ຫາຕິ ອກ຺ຂໂມ;

ຂມນ຺ໂຕຕຸ ນຄຓ຺ຫາຕິ, ຊານໍ ເຊຄຸຈ຺ຉິຕານິຕິ.

໕໓. ປຣທິນ຺ນານິ ວຈ຺ຈານິ, ປາຠຕນ຺ຕິ ນໂກຈິປິ;

ຄຓ຺ເຫຍ຺ເຍວໍ ທຸຣຸຕ຺ຕານິ, ອຄຓ຺ຫນ຺ໂຕ ຂເມ ສໂຕ.

໕໔. ນທິ ກລ຺ໂລລ ວິຈິໂຍ, ຕີຣໍ ປຕ຺ວາ ສມນ຺ຕິຘ;

ສພ຺ເພ ອຸປ຺ປຕິຕາ ໂທສາ, ຂນ຺ຕິປຕ຺ວາ ສມນ຺ຕິ ເຕ.

໕໕. ໂທສຸມ຺ມຕ຺ຕກ ວາຈາຍ, ນຸມ຺ມຕ຺ໂຕ ກິໍກຣິສ຺ສຕິ;

ຠເວ ຍ຺ຍຸມ຺ມຕ຺ຕໂກ ໂສວ, ຕາທິສໍ ວຈນໍ ຠຓໍ.

໕໖. ໂກຘໂນ ອກ຺ຂໂມ ອຎ຺ຎ, ທຸຏ຺ຐສຎ຺ຎີ ຠຍາລຸໂກ;

ຄາມມຊ຺ເຌ ອຬກ຺ໂກວ, ຕຖາ ມາໂຫຫິ ຕໍ ຊຫ.

໕໗. ເມຕ຺ຕາລຸໂກ ຂມາສີໂລ,

ສພ຺ພຏ຺ຐາເນສຸນິພ຺ຠໂຍ;

ປຣຕ຺ຖ ສຕ຺ຖ ມິຈ຺ຉນ຺ໂຕ,

ຂນ຺ຕິ ເມຕ຺ຕຎ຺ຈ ຠາວເຍ.

໕໘. ປຣກ຺ໂກສານິ ນິນ຺ທານິ, ຕໍວ ປຈ຺ເຈນ຺ຕິ ນາຎ຺ຎຄູ;

ຂິຕ຺ຕໍປໍສຸວ ວາຕຸທ຺ຘໍ, ຄຣຸກໍ ກິໍ ຂມາຍເຕ.

໕໙. ອກ຺ໂກສນ຺ໂຕຈ ນິນ຺ທີຈ, ປີຬິໂຕ ສກ ກມ຺ມຸນາ;

ອິຘ ເປຈ຺ຈຈ ນີເຈຍ຺ໂຍ, ນໍນຍໍ ຄຓ຺ຫິ ອກ຺ຂໂມ.

໖໐. ອກ຺ໂກໂສ ມໍ ນອາຄຈ຺ຉິ,

ຕສ຺ເສວາ ນຕ຺ຖກາຣໂກ;

ອິຕິ ຎຕ຺ວາວ ສປ຺ປຎ຺ໂຎ,

ອກ຺ໂກສໍ ນ ຄຣຸໍ ກເຣ.

໖໑. ວິກາຣາປຕ຺ຕິ ມິຈ຺ຉນ຺ໂຕ, ເວຣີ ພຫຸ ມຸປກ຺ກມິ;

ມາມິຕ຺ຕວສ ມນ຺ເວຫິ, ນິພ຺ພິກາໂຣ ຕຸວໍຠວ.

໖໒. ເມຕ຺ຕມ຺ພຸນາ ສທ຺ໂທໂສຈ, ປຣໂທໂສຈ ສມ຺ມຕິ;

ເມຕ຺ຕາເສເກນ ສພ຺ເພສຸ, ສພ຺ພໂຕຄ຺ຄິໍ ນິປາຣເຍ.

໖໓. ສໂທສ ປຣໂທສຄ຺ຄິໍ, ສພ຺ພໂຕ ທິສໂຕ ຏ຺ຐິຕໍ;

ເມຕ຺ຕາ ໂຕເຍນ ວາເຣຍ຺ຍ, ສິຍາ ນິພ຺ພຸຕິ ສພ຺ພຘິ.

໖໔. ນຄເມ ອຕ຺ຕໂນ ອຄ຺ຄິໍ, ປຣຄ຺ຄິໍວາປິ ນາຄເມ;

ເມຕ຺ຕມ຺ພຸນາວ ນິພ຺ພາຕຸ, ສປຣຄ຺ຄິ ທ຺ວຍໍ ຠຸສໍ.

໖໕. ຄຸຓີ ຄຸຓີ ນນ຺ທິນ຺ທາຍ, ປສໍສາຍ ຄຸຓີ ຄຸຓີ;

ນິນ຺ທໍນິນ຺ທໍ ນກຸປ຺ເປຍ຺ຍ, ນສາທິເຍ ຖຸຕິໍ ຖຸຕິໍ.