(໒໗) ໗. ກມ຺ມປຖວຄ຺ໂຄ

໑. ປາຓາຕິປາຕີສຸຕ຺ຕໍ

໒໖໔. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ຈຕູຫິ? ອຕ຺ຕນາ ຈ ປາຓາຕິປາຕີ ໂຫຕິ, ປຣຎ຺ຈ ປາຓາຕິປາເຕ ສມາທເປຕິ, ປາຓາຕິປາເຕ ຈ ສມນຸຎ຺ໂຎ ໂຫຕິ, ປາຓາຕິປາຕສ຺ສ ຈ ວຓ຺ຓໍ ຠາສຕິ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ.

‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ. ກຕເມຫິ ຈຕູຫິ? ອຕ຺ຕນາ ຈ ປາຓາຕິປາຕາ ປຏິວິຣໂຕ ໂຫຕິ, ປຣຎ຺ຈ ປາຓາຕິປາຕາ ເວຣມຓິຍາ ສມາທເປຕິ, ປາຓາຕິປາຕາ ເວຣມຓິຍາ ຈ ສມນຸຎ຺ໂຎ ໂຫຕິ, ປາຓາຕິປາຕາ ເວຣມຓິຍາ ຈ ວຓ຺ຓໍ ຠາສຕິ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄ’’ຕິ. ປຐມໍ.

໒. ອທິນ຺ນາທາຍີສຸຕ຺ຕໍ

໒໖໕. ‘‘ຈຕູຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍ. ກຕເມຫິ ຈຕູຫິ? ອຕ຺ຕນາ ຈ ອທິນ຺ນາທາຍີ ໂຫຕິ, ປຣຎ຺ຈ ອທິນ຺ນາທາເນ ສມາທເປຕິ, ອທິນ຺ນາທາເນ ຈ ສມນຸຎ຺ໂຎ ໂຫຕິ, ອທິນ຺ນາທານສ຺ສ ຈ ວຓ຺ຓໍ ຠາສຕິ – ອິເມຫິ ໂຂ…ເປ….

‘‘ອຕ຺ຕນາ ຈ ອທິນ຺ນາທານາ ປຏິວິຣໂຕ ໂຫຕິ, ປຣຎ຺ຈ ອທິນ຺ນາທານາ ເວຣມຓິຍາ ສມາທເປຕິ, ອທິນ຺ນາທານາ ເວຣມຓິຍາ ຈ ສມນຸຎ຺ໂຎ ໂຫຕິ, ອທິນ຺ນາທານາ ເວຣມຓິຍາ ຈ ວຓ຺ຓໍ ຠາສຕິ – ອິເມຫິ ໂຂ, ຠິກ຺ຂເວ…ເປ…. ທຸຕິຍໍ.

໓. ມິຈ຺ຉາຈາຣີສຸຕ຺ຕໍ

໒໖໖. … ອຕ຺ຕນາ ຈ ກາເມສຸມິຈ຺ຉາຈາຣີ ໂຫຕິ, ປຣຎ຺ຈ ກາເມສຸມິຈ຺ຉາຈາເຣ ສມາທເປຕິ, ກາເມສຸມິຈ຺ຉາຈາເຣ ຈ ສມນຸຎ຺ໂຎ ໂຫຕິ, ກາເມສຸມິຈ຺ຉາຈາຣສ຺ສ ຈ ວຓ຺ຓໍ ຠາສຕິ – ອິເມຫິ ໂຂ…ເປ….

ອຕ຺ຕນາ ຈ ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ປຣຎ຺ຈ ກາເມສຸມິຈ຺ຉາຈາຣາ ເວຣມຓິຍາ ສມາທເປຕິ, ກາເມສຸມິຈ຺ຉາຈາຣາ ເວຣມຓິຍາ ຈ ສມນຸຎ຺ໂຎ ໂຫຕິ, ກາເມສຸມິຈ຺ຉາຈາຣາ ເວຣມຓິຍາ ຈ ວຓ຺ຓໍ ຠາສຕິ – ອິເມຫິ ໂຂ…ເປ…. ຕຕິຍໍ.

໔. ມຸສາວາທີສຸຕ຺ຕໍ

໒໖໗. … ອຕ຺ຕນາ ຈ ມຸສາວາທີ ໂຫຕິ, ປຣຎ຺ຈ ມຸສາວາເທ ສມາທເປຕິ, ມຸສາວາເທ ຈ ສມນຸຎ຺ໂຎ ໂຫຕິ, ມຸສາວາທສ຺ສ ຈ ວຓ຺ຓໍ ຠາສຕິ – ອິເມຫິ ໂຂ…ເປ….

ອຕ຺ຕນາ ຈ ມຸສາວາທາ ປຏິວິຣໂຕ ໂຫຕິ, ປຣຎ຺ຈ ມຸສາວາທາ ເວຣມຓິຍາ ສມາທເປຕິ, ມຸສາວາທາ ເວຣມຓິຍາ ຈ ສມນຸຎ຺ໂຎ ໂຫຕິ, ມຸສາວາທາ ເວຣມຓິຍາ ຈ ວຓ຺ຓໍ ຠາສຕິ – ອິເມຫິ…ເປ…. ຈຕຸຕ຺ຖໍ.

໕. ປິສຸຓວາຈາສຸຕ຺ຕໍ

໒໖໘. … ອຕ຺ຕນາ ຈ ປິສຸຓວາໂຈ ໂຫຕິ, ປຣຎ຺ຈ ປິສຸຓາຍ ວາຈາຍ ສມາທເປຕິ, ປິສຸຓາຍ ວາຈາຍ ຈ ສມນຸຎ຺ໂຎ ໂຫຕິ, ປິສຸຓາຍ ວາຈາຍ ຈ ວຓ຺ຓໍ ຠາສຕິ – ອິເມຫິ…ເປ….

ອຕ຺ຕນາ ຈ ປິສຸຓາຍ ວາຈາຍ ປຏິວິຣໂຕ ໂຫຕິ, ປຣຎ຺ຈ ປິສຸຓາຍ ວາຈາຍ ເວຣມຓິຍາ ສມາທເປຕິ, ປິສຸຓາຍ ວາຈາຍ ເວຣມຓິຍາ ຈ ສມນຸຎ຺ໂຎ ໂຫຕິ, ປິສຸຓາຍ ວາຈາຍ ເວຣມຓິຍາ ຈ ວຓ຺ຓໍ ຠາສຕິ – ອິເມຫິ…ເປ…. ປຎ຺ຈມໍ.

໖. ຜຣຸສວາຈາສຸຕ຺ຕໍ

໒໖໙. … ອຕ຺ຕນາ ຈ ຜຣຸສວາໂຈ ໂຫຕິ, ປຣຎ຺ຈ ຜຣຸສາຍ ວາຈາຍ ສມາທເປຕິ, ຜຣຸສາຍ ວາຈາຍ ຈ ສມນຸຎ຺ໂຎ ໂຫຕິ, ຜຣຸສາຍ ວາຈາຍ ຈ ວຓ຺ຓໍ ຠາສຕິ…ເປ….

ອຕ຺ຕນາ ຈ ຜຣຸສາຍ ວາຈາຍ ປຏິວິຣໂຕ ໂຫຕິ, ປຣຎ຺ຈ ຜຣຸສາຍ ວາຈາຍ ເວຣມຓິຍາ ສມາທເປຕິ, ຜຣຸສາຍ ວາຈາຍ ເວຣມຓິຍາ ຈ ສມນຸຎ຺ໂຎ ໂຫຕິ, ຜຣຸສາຍ ວາຈາຍ ເວຣມຓິຍາ ຈ ວຓ຺ຓໍ ຠາສຕິ – ອິເມຫິ ໂຂ…ເປ…. ຉຏ຺ຐໍ.

໗. ສມ຺ຜປ຺ປລາປສຸຕ຺ຕໍ

໒໗໐. … ອຕ຺ຕນາ ຈ ສມ຺ຜປ຺ປລາປີ ໂຫຕິ, ປຣຎ຺ຈ ສມ຺ຜປ຺ປລາເປ ສມາທເປຕິ, ສມ຺ຜປ຺ປລາເປ ຈ ສມນຸຎ຺ໂຎ ໂຫຕິ, ສມ຺ຜປ຺ປລາປສ຺ສ ຈ ວຓ຺ຓໍ ຠາສຕິ – ອິເມຫິ…ເປ….

ອຕ຺ຕນາ ຈ ສມ຺ຜປ຺ປລາປາ ປຏິວິຣໂຕ ໂຫຕິ, ປຣຎ຺ຈ ສມ຺ຜປ຺ປລາປາ ເວຣມຓິຍາ ສມາທເປຕິ, ສມ຺ຜປ຺ປລາປາ ເວຣມຓິຍາ ຈ ສມນຸຎ຺ໂຎ ໂຫຕິ, ສມ຺ຜປ຺ປລາປາ ເວຣມຓິຍາ ຈ ວຓ຺ຓໍ ຠາສຕິ – ອິເມຫິ ໂຂ, ຠິກ຺ຂເວ…ເປ…. ສຕ຺ຕມໍ.

໘. ອຠິຊ຺ຌາລຸສຸຕ຺ຕໍ

໒໗໑. … ອຕ຺ຕນາ ຈ ອຠິຊ຺ຌາລຸ ໂຫຕິ, ປຣຎ຺ຈ ອຠິຊ຺ຌາຍ ສມາທເປຕິ, ອຠິຊ຺ຌາຍ ຈ ສມນຸຎ຺ໂຎ ໂຫຕິ, ອຠິຊ຺ຌາຍ ຈ ວຓ຺ຓໍ ຠາສຕິ…ເປ….

‘‘ອຕ຺ຕນາ ຈ ອນຠິຊ຺ຌາລຸ ໂຫຕິ, ປຣຎ຺ຈ ອນຠິຊ຺ຌາຍ ສມາທເປຕິ, ອນຠິຊ຺ຌາຍ ຈ ສມນຸຎ຺ໂຎ ໂຫຕິ, ອນຠິຊ຺ຌາຍ ຈ ວຓ຺ຓໍ ຠາສຕິ – ອິເມຫິ ໂຂ…ເປ…. ອຏ຺ຐມໍ.

໙. ພ຺ຍາປນ຺ນຈິຕ຺ຕສຸຕ຺ຕໍ

໒໗໒. … ອຕ຺ຕນາ ຈ ພ຺ຍາປນ຺ນຈິຕ຺ໂຕ ໂຫຕິ, ປຣຎ຺ຈ ພ຺ຍາປາເທ ສມາທເປຕິ, ພ຺ຍາປາເທ ຈ ສມນຸຎ຺ໂຎ ໂຫຕິ, ພ຺ຍາປາທສ຺ສ ຈ ວຓ຺ຓໍ ຠາສຕິ – ອິເມຫິ…ເປ….

ອຕ຺ຕນາ ຈ ອພ຺ຍາປນ຺ນຈິຕ຺ໂຕ ໂຫຕິ, ປຣຎ຺ຈ ອພ຺ຍາປາເທ ສມາທເປຕິ, ອພ຺ຍາປາເທ ຈ ສມນຸຎ຺ໂຎ ໂຫຕິ, ອພ຺ຍາປາທສ຺ສ ຈ ວຓ຺ຓໍ ຠາສຕິ – ອິເມຫິ ໂຂ…ເປ…. ນວມໍ.

໑໐. ມິຈ຺ຉາທິຏ຺ຐິສຸຕ຺ຕໍ

໒໗໓. … ອຕ຺ຕນາ ຈ ມິຈ຺ຉາທິຏ຺ຐິໂກ ໂຫຕິ, ປຣຎ຺ຈ ມິຈ຺ຉາທິຏ຺ຐິຍາ ສມາທເປຕິ, ມິຈ຺ຉາທິຏ຺ຐິຍາ ຈ ສມນຸຎ຺ໂຎ ໂຫຕິ, ມິຈ຺ຉາທິຏ຺ຐິຍາ ຈ ວຓ຺ຓໍ ຠາສຕິ – ອິເມຫິ…ເປ….

ອຕ຺ຕນາ ຈ ສມ຺ມາທິຏ຺ຐິໂກ ໂຫຕິ, ປຣຎ຺ຈ ສມ຺ມາທິຏ຺ຐິຍາ ສມາທເປຕິ, ສມ຺ມາທິຏ຺ຐິຍາ ຈ ສມນຸຎ຺ໂຎ ໂຫຕິ, ສມ຺ມາທິຏ຺ຐິຍາ ຈ ວຓ຺ຓໍ ຠາສຕິ – ອິເມຫິ ໂຂ, ຠິກ຺ຂເວ, ຈຕູຫິ ຘມ຺ເມຫິ ສມນ຺ນາຄໂຕ ຍຖາຠຕໍ ນິກ຺ຂິຕ຺ໂຕ ເອວໍ ສຄ຺ເຄຕິ. ທສມໍ.

ກມ຺ມປຖວຄ຺ໂຄ ສຕ຺ຕໂມ.