໒. ປຣິເຍສນາສຸຕ຺ຕໍ

໒໕໕. ‘‘ຈຕສ຺ໂສ ອິມາ, ຠິກ຺ຂເວ, ອນຣິຍປຣິເຍສນາ. ກຕມາ ຈຕສ຺ໂສ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຊຣາຘມ຺ໂມ ສມາໂນ ຊຣາຘມ຺ມໍເຍວ ປຣິເຍສຕິ; ອຕ຺ຕນາ ພ຺ຍາຘິຘມ຺ໂມ ສມາໂນ ພ຺ຍາຘິຘມ຺ມໍເຍວ ປຣິເຍສຕິ; ອຕ຺ຕນາ ມຣຓຘມ຺ໂມ ສມາໂນ ມຣຓຘມ຺ມໍເຍວ ປຣິເຍສຕິ; ອຕ຺ຕນາ ສໍກິເລສຘມ຺ໂມ ສມາໂນ ສໍກິເລສຘມ຺ມໍເຍວ ປຣິເຍສຕິ. ອິມາ ໂຂ, ຠິກ຺ຂເວ, ຈຕສ຺ໂສ ອນຣິຍປຣິເຍສນາ.

‘‘ຈຕສ຺ໂສ ອິມາ, ຠິກ຺ຂເວ, ອຣິຍປຣິເຍສນາ. ກຕມາ ຈຕສ຺ໂສ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຊຣາຘມ຺ໂມ ສມາໂນ ຊຣາຘມ຺ເມ ອາທີນວໍ ວິທິຕ຺ວາ ອຊຣໍ ອນຸຕ຺ຕຣໍ ໂຍຄກ຺ເຂມໍ ນິພ຺ພານໍ ປຣິເຍສຕິ; ອຕ຺ຕນາ ພ຺ຍາຘິຘມ຺ໂມ ສມາໂນ ພ຺ຍາຘິຘມ຺ເມ ອາທີນວໍ ວິທິຕ຺ວາ ອພ຺ຍາຘິໍ ອນຸຕ຺ຕຣໍ ໂຍຄກ຺ເຂມໍ ນິພ຺ພານໍ ປຣິເຍສຕິ; ອຕ຺ຕນາ ມຣຓຘມ຺ໂມ ສມາໂນ ມຣຓຘມ຺ເມ ອາທີນວໍ ວິທິຕ຺ວາ ອມຕໍ ອນຸຕ຺ຕຣໍ ໂຍຄກ຺ເຂມໍ ນິພ຺ພານໍ ປຣິເຍສຕິ; ອຕ຺ຕນາ ສໍກິເລສຘມ຺ໂມ ສມາໂນ ສໍກິເລສຘມ຺ເມ ອາທີນວໍ ວິທິຕ຺ວາ ອສໍກິລິຏ຺ຐໍ ອນຸຕ຺ຕຣໍ ໂຍຄກ຺ເຂມໍ ນິພ຺ພານໍ ປຣິເຍສຕິ. ອິມາ ໂຂ, ຠິກ຺ຂເວ, ຈຕສ຺ໂສ ອຣິຍປຣິເຍສນາ’’ຕິ. ທຸຕິຍໍ.