(໑໑) ໑. ອາສາທຸປ຺ປຊຫວຄ຺ໂຄ

໑໑໙. ‘‘ທ຺ເວມາ, ຠິກ຺ຂເວ, ອາສາ ທຸປ຺ປຊຫາ. ກຕມາ ທ຺ເວ? ລາຠາສາ ຈ ຊີວິຕາສາ ຈ. ອິມາ ໂຂ, ຠິກ຺ຂເວ, ທ຺ເວ ອາສາ ທຸປ຺ປຊຫາ’’ຕິ.

໑໒໐. ‘‘ທ຺ເວເມ, ຠິກ຺ຂເວ, ປຸຄ຺ຄລາ ທຸລ຺ລຠາ ໂລກສ຺ມິໍ. ກຕເມ ທ຺ເວ? ໂຍ ຈ ປຸພ຺ພກາຣີ, ໂຍ ຈ ກຕຎ຺ຎູ ກຕເວທີ. ອິເມ ໂຂ, ຠິກ຺ຂເວ, ທ຺ເວ ປຸຄ຺ຄລາ ທຸລ຺ລຠາ ໂລກສ຺ມິ’’ນ຺ຕິ.

໑໒໑. ‘‘ທ຺ເວເມ, ຠິກ຺ຂເວ, ປຸຄ຺ຄລາ ທຸລ຺ລຠາ ໂລກສ຺ມິໍ. ກຕເມ ທ຺ເວ? ຕິຕ຺ໂຕ ຈ ຕປ຺ເປຕາ ຈ. ອິເມ ໂຂ, ຠິກ຺ຂເວ, ທ຺ເວ ປຸຄ຺ຄລາ ທຸລ຺ລຠາ ໂລກສ຺ມິ’’ນ຺ຕິ.

໑໒໒. ‘‘ທ຺ເວເມ, ຠິກ຺ຂເວ, ປຸຄ຺ຄລາ ທຸຕ຺ຕປ຺ປຍາ. ກຕເມ ທ຺ເວ? ໂຍ ຈ ລທ຺ຘໍ ລທ຺ຘໍ ນິກ຺ຂິປຕິ, ໂຍ ຈ ລທ຺ຘໍ ລທ຺ຘໍ ວິສ຺ສຊ຺ເຊຕິ. ອິເມ ໂຂ, ຠິກ຺ຂເວ, ທ຺ເວ ປຸຄ຺ຄລາ ທຸຕ຺ຕປ຺ປຍາ’’ຕິ.

໑໒໓. ‘‘ທ຺ເວເມ, ຠິກ຺ຂເວ, ປຸຄ຺ຄລາ ສຸຕປ຺ປຍາ. ກຕເມ ທ຺ເວ? ໂຍ ຈ ລທ຺ຘໍ ລທ຺ຘໍ ນ ນິກ຺ຂິປຕິ, ໂຍ ຈ ລທ຺ຘໍ ລທ຺ຘໍ ນ ວິສ຺ສຊ຺ເຊຕິ. ອິເມ ໂຂ, ຠິກ຺ຂເວ, ທ຺ເວ ປຸຄ຺ຄລາ ສຸຕປ຺ປຍາ’’ຕິ.

໑໒໔. ‘‘ທ຺ເວເມ, ຠິກ຺ຂເວ, ປຈ຺ຈຍາ ຣາຄສ຺ສ ອຸປ຺ປາທາຍ. ກຕເມ ທ຺ເວ? ສຸຠນິມິຕ຺ຕຎ຺ຈ ອໂຍນິໂສ ຈ ມນສິກາໂຣ. ອິເມ ໂຂ, ຠິກ຺ຂເວ, ທ຺ເວ ປຈ຺ຈຍາ ຣາຄສ຺ສ ອຸປ຺ປາທາຍາ’’ຕິ.

໑໒໕. ‘‘ທ຺ເວເມ, ຠິກ຺ຂເວ, ປຈ຺ຈຍາ ໂທສສ຺ສ ອຸປ຺ປາທາຍ. ກຕເມ ທ຺ເວ? ປຏິຆນິມິຕ຺ຕຎ຺ຈ ອໂຍນິໂສ ຈ ມນສິກາໂຣ. ອິເມ ໂຂ, ຠິກ຺ຂເວ, ທ຺ເວ ປຈ຺ຈຍາ ໂທສສ຺ສ ອຸປ຺ປາທາຍາ’’ຕິ.

໑໒໖. ‘‘ທ຺ເວເມ, ຠິກ຺ຂເວ, ປຈ຺ຈຍາ ມິຈ຺ຉາທິຏ຺ຐິຍາ ອຸປ຺ປາທາຍ. ກຕເມ ທ຺ເວ? ປຣໂຕ ຈ ໂຆໂສ ອໂຍນິໂສ ຈ ມນສິກາໂຣ. ອິເມ ໂຂ, ຠິກ຺ຂເວ, ທ຺ເວ ປຈ຺ຈຍາ ມິຈ຺ຉາທິຏ຺ຐິຍາ ອຸປ຺ປາທາຍາ’’ຕິ.

໑໒໗. ‘‘ທ຺ເວເມ, ຠິກ຺ຂເວ, ປຈ຺ຈຍາ ສມ຺ມາທິຏ຺ຐິຍາ ອຸປ຺ປາທາຍ. ກຕເມ ທ຺ເວ? ປຣໂຕ ຈ ໂຆໂສ, ໂຍນິໂສ ຈ ມນສິກາໂຣ. ອິເມ ໂຂ, ຠິກ຺ຂເວ, ທ຺ເວ ປຈ຺ຈຍາ ສມ຺ມາທິຏ຺ຐິຍາ ອຸປ຺ປາທາຍາ’’ຕິ.

໑໒໘. ‘‘ທ຺ເວມາ, ຠິກ຺ຂເວ, ອາປຕ຺ຕິໂຍ. ກຕມາ ທ຺ເວ? ລຫຸກາ ຈ ອາປຕ຺ຕິ, ຄຣຸກາ ຈ ອາປຕ຺ຕິ. ອິມາ ໂຂ, ຠິກ຺ຂເວ, ທ຺ເວ ອາປຕ຺ຕິໂຍ’’ຕິ.

໑໒໙. ‘‘ທ຺ເວມາ, ຠິກ຺ຂເວ, ອາປຕ຺ຕິໂຍ. ກຕມາ ທ຺ເວ? ທຸຏ຺ຐຸລ຺ລາ ຈ ອາປຕ຺ຕິ, ອທຸຏ຺ຐຸລ຺ລາ ຈ ອາປຕ຺ຕິ. ອິມາ ໂຂ, ຠິກ຺ຂເວ, ທ຺ເວ ອາປຕ຺ຕິໂຍ’’ຕິ.

໑໓໐. ‘‘ທ຺ເວມາ, ຠິກ຺ຂເວ, ອາປຕ຺ຕິໂຍ. ກຕມາ ທ຺ເວ? ສາວເສສາ ຈ ອາປຕ຺ຕິ, ອນວເສສາ ຈ ອາປຕ຺ຕິ. ອິມາ ໂຂ, ຠິກ຺ຂເວ, ທ຺ເວ ອາປຕ຺ຕິໂຍ’’ຕິ.

ອາສາທຸປ຺ປຊຫວຄ຺ໂຄ ປຐໂມ.